Ka Nupepa Kuokoa, Volume LXVI, Number 2, 13 January 1927 — Mareia he Mau Opio me ke Ku-e i ke Kanawai Piha Ole na Makahiki Kupono ia Laua e Hiki ai ke Hookoia Aku ka Mare HOIHOIIA KE KANE E HOOPAA MA WAIALEE Hoi ka Wahine Kaikamahine me Kona Mau Makua Pilipino e Noho ai [ARTICLE]

Mareia he Mau Opio me ke Ku-e i ke Kanawai

Piha Ole na Makahiki Kupono ia Laua e Hiki ai ke Hookoia Aku ka Mare

HOIHOIIA KE KANE E HOOPAA MA WAIALEE

Hoi ka Wahine Kaikamahine me Kona Mau Makua Pilipino e Noho ai

Mamuli o ka noii ame ka huli ana ma ka aoao o na luna oihana o ka aha hookolokolo o na kamalii, i loaa aku ai, ka mareia ana o kekahi mau opio i oo ole ma ke kanawai, a waihoia aku kela hana imua o ka Puuku Henry C. Hapai ka mea nana i hookohu na akena hoopuka laikini mare apau, a me he mea la e haawiia aku ana kekahi a'o ikaika ana i na akena apau, no ka lakou mea e hana ai ma keia mua aku. Ma ka Poalua iho nei, i hoikeia ae ai, ka mare ana o kekahi keiki Hawaii o umi-kumamaha wale no makahiki, i kekahi kaikamahine Pilipino o umi-kumamakolu makahiki, ma ka Poaono aku nei i hala; na ka Rev. Robert Ahuna laua i mare O ka mea oiaio i pili i kela keiki Hawaii o ka mare ana i ka wahine he mea oia i noho mua maloko o ke kula hoopololei o na keikikane malalo o Waialee, a ua hookuuia mai oia malalo o ka hoomalu; nolaila i ka wa i maopopo ae ai keia mare ana, o na opio, ua hoihoi hou ia kela keiki no Waialee, a ua kaa aku hoi ke kaikamahine Pilipino malalo o ka malu o kona mau makua. O ka mea nana i hoopuka i ka laikini no ka mare ana o kela mau opio, oia o J. A. Combs. Maloko o ka palapala ae mare, pela hoi maloko o ka palapala mare, e hoakaka ana, he umi-kumamawalu makahiki pakahi o ke kane ame kana wahine; oiai nae o ka mea oiaio, he mau keiki kela i oo ole malalo o ke kanawai a i hiki ole ke hoopukaia he laikini mare no laua, a oki loa aku hoi ka hiki ia laua ke mare ahiki i ke oo ana, elike me ke kauoha a ke kanawai. Aole ka keia o ka paamare opiopio mua loa i ku-eia ai ke kanawai, aka he paamare hou ae no kekahi mamua aku nei, me ka nukuia ana o ka akena nana i haawi i ka palapala ae mare, e ka Puuku Hapai, a mamuli o keia oili ana ae nei o keia pilikia hou, e lawelaweia aku ana na alahele, e loaa ai ka makaala, ma ka aoao o na akena haawi laikini mare, ma keia mua aku.