Ka Nupepa Kuokoa, Volume LXVI, Number 2, 13 January 1927 — LOAA KA MANA HOOPAU I KA MAKAI NUI DAVID L. DESHA Hoakaka ka Loio Kalana Davis i Kona Manao Kanawai o na Makai Kumau Wale no ka i Kaa Malalo o na Komisina Makai [ARTICLE]

LOAA KA MANA HOOPAU I KA MAKAI NUI DAVID L. DESHA

Hoakaka ka Loio Kalana Davis i Kona Manao Kanawai o na Makai Kumau Wale no ka i Kaa Malalo o na Komisina Makai

Mamuli o ke noi i waihoia ae e ka Makai Nui David L. Desha, imua o ka Loio Kalana Charles S. Davis, no kona manao kanawai, e pili ana i ka mana ame ka mana ole o ka makai nui, e hoopau ai i kekahi poe e noho hana ana malalo o ka oihana makai o Honolulu nei, i hoopuka ae ai ka Loio Kalana Davis i kona manao kanawai, e hoakaka ana, no ka loaa o ka mana piha i ka Makai Nui Desha, e hoopau ai i na lunapaahao, na kiai paahao, na makai wahine, na lunanana kaa, na makai kuikawa, na hope, na kakauolelo ame na kokua e ae, a koe ka poe e noho hana ana iloko o ka puali makai kumau. Ma kekahi olelo ana ae, elike me keia manao kanawai o ka Loio Kalana Davis, ua loaa ka mana holookoa i ka makai nui e hookohu ai, a e hoopau ai i na limahana apau iloko o ka oihana makai, a koe na makai iloko o na puali kumau ua kaa aku lakou malalo o na rula hooponopono o ka papa komisina makai ame kinaiahi. Wahi a ka Loio Kalana Davis i hoakaka ae ai, o kela ae la maluna, kana wehewehe ana no ka manao o ke kanawai pili i ka papa komisina makai, o ia hoi, o na makai kumau wale no, ka i kaa aku malalo o kela kanawai, aole o na limahana e ae, iloko o ka oihana makai. Ma keia manao kanawai o ka Loio Kalana Davis, ua ku-e ia i ka manao kanawai o ka Loio Kalana Hathaway i pau i haawi ae ai iloko o ka mahina o Sepatemaba i hala aku nei, o ia kona hoakaka

ana ae, ua kaa aku na lunapaahao ame na kiai paahao, malalo o na rula hooponopono o ke komisina makai. Ma ka manao hoi o ka loio kuhina, ua rula ae oia, o na kiai paahao, he poe no lakou noloko o ka oihana makai, i loaa ai ia lakou ke kuleana e koi ai i na pono malalo o ke kanawai ukuhoomau; ma ka manao kanawai nae o ka Loio Kalana Davis, ua pili wale no ia i ke kanawai o ka papa komisina makai. Iloko o ka makahiki 1924, ua haawi ae o W. H. Heen, i kona wa e noho loio kalana ana no ke aupuni kulanakauhale a kalana o Honolulu nei, i kona manao kanawai, e hoole ana no ka lilo ana o na kiai halepaahao he mau makai, a pela no hoi ka manao kanawai o Massee, oiai oia e noho hope loio kalana ana i ka 1925. Ma kona manao kanawai, e hoole ana oia, aole na kiai o na halepaahao, na makai wahine, na kakauolelo ame ka poe e ae i hookohuia aku e ka makai nui, he mau lala noloko o ka puali makai. Me kela man manao kanawai o W. H. Heen, Massee, ua kakoo mai ia i ka manao kanawai o ka Loio Kalana Davis; nolaila ua lilo ka hoopau ana na ka Makai Nui Desha i kekahi mau limahana oloko o ka oihana makai, i mea mana; e ili aku ai ke ko'iko'i ma ka aoao o na limahana i hoopauia, ke koi ana aku i ko lakou pono imua o na aha hookolokolo: elike me ia a kela poe o ka waiho ana aku i ko lakou hoopauia ana imua o ka Loio Harry T. Mills, ma ka pule aku la i hala.