Ka Nupepa Kuokoa, Volume LXV, Number 49, 9 December 1926 — Page 6

Page PDF (1.34 MB)
Nupepa Kuokoa
KE KILOHANA POOKELA NO KA LAHUI HAWAII
NA MOOLELO HOONANEA, NA NUHOU KALAIAINA
ME NA NUHOU O KA MANAWA
AOAO NO NA MANAO PEPA
SOLOMON HANOHANO, LUNAHOOPONOPONO.
EONO . NUPEPA KUOKOA, HONOLULU, T. H. POAHA, DEKEMABA 9, 1926.
Daniel Makaahoa, ma ke alanui Kukui, Dec. 5.
Charles Young, ma ke alanui, Dec. 5.
Louis Kahilahila, ma Puuloa, Dec. 6.
Nuhou
Kuwaho
NU IOKA, Dec. 3.— Eia na mokuaina ma ka hapa-hikina loa iloko o na umii a ke au anu, a ma kekahi wahi maloko o ka mokuaina o Nu Ioka ua emi iho ke ana anu a ko 56 degere malalo iho o na hora he 24. Maloko o kekahi mau apana o ka mokuaina he 15 degere ka haule iho malalo o ka olo i hoike mai. Hookahi kanaka i mako i ko anu ma Rochester, N. Y. Ma ka Moanawai Tapper e loli mau ana ke ana anu ailiki i ka lo de-gere malalo o ka ole. O ke ana anu ma Daucet, ma Quebec komohana, he 32 degere malalo o ke ana anu loa i keia la.
SOFIA Dec. 3— He kanaka oki wahie ilihune a e hana ana me kana koi uo ka hana ana i mea e loaa ai ko ola onei he waiwai nui i hunaia ka i loaa iaia me ka hooikaika ole. He kanaka lopa oiai oia e eli ana i na aa o kekahi kumulaau ana o ke oki ana a hina ua ike iho la oia i kekahi papa pohaku me kekahi mau huaolelo Tureke i kakau ia maluna iho. Mahiki ae la oia ia papa pohaku a hemo a he mea e kona hauoli i ka ike ana iho malalo o ia papa pohaku he pahu i piha me na dala gula e hulali ae ana i hiki aku ka waiwaiio i ka $450,000.
MOSCOW, Dec. 5— Ua hoolalaia e na luna aupuni o Rusia kekahi hana no ka hookahua ana i kekahi laina ma ka lewa no na mokulele mawaena o Leningrad ame Valdisvostok. He mokulele pilikua o 600 kapuai a oi aku ka loa ke lele aku ana maloko o na la ekolu. Mahope aku e hooloihiia aku ai ka laina ahiki i Kovama, me ka hoomaha pu ana ma kekahi o na kulanakauhale nui ma ka hapa komohana o Europa.
HAVANA, Cuba, Dec. 5— He mau kiai kuikawa ka i hoonohoia aku maluna o ka mokuahi Lafayette i kona manawa i ku mai ai ianei i nehinei me ka Madame Aleandra, ke kuhina Rukini i Mekiko, no ke keakea ana aku iaia aole e lele mai iuka o ka aina a i olo ka hoolalaia ana paha o kekahi mau hana hoohanohano iaia e na ahahui.
WAKINEKONA, Dec. 5— Ua ae mai o Chile i ka manao a ke Kakauolelo o ke Aupuni Kellog i hoolele aku ni no ka haawi ana aku ia Bolivia o na o kana aina hoopaapaaia, o Taena ame Ariea.
BERLINA, Dec. 5— Ke hooko nei o Kelemania me ke kupaa i na hookaa dala koke ana me ka piha, mailoko ae o kona mau loaa makahiki, no ka hooko ana aku i ka Dawes manao i hoolaia aku ai no ka hookaa ana i ka aio kaua, elike me ia a Seynoure Parker Gilbert, ka akena laula poo no ka hookaa ana i na aie kaua o ka hoike ana no maloko o kana hoike makahiki. Wahi ana, iloko o ka eliia o ka makahiki uku aie ua holomua loa ka Kelemania hoomakaulii ana iloko o kekahi wa kuhaiki loa o ke aupuni a iloko hoi o ka wa kupilikii loa o na oihana o ke aupuni e hookeleia ana iloko o ka hoolilo o ka 1925-26.
No ka hele no o na kolamu o ke Kuokoa a piha i keia pule, pela i hoopaneeia ai ka hoopukaia ana aku o kekahi mau manao i kakauia mai e na makamaka a no keia pule ae.
Eia na halekuai o Honolulu nei
ke kahiko mai nei ia lakou iho me
na hoohiwahiwa o na la kulaia ilo-
ko o keia mau la, no ke pahele ana
i ka- noonoo o ka lehulehu, me na
meakuai apau o na ano like ole.
NA HANAU.
Na Mr. ame Mrs. John Nahoi,
he kaikamahine, Nov. 8.
Na Mr. ame Mrs. Carey Hooser,
he kaikamahine, Nov. 18.
Na Mr. ame Mrs. Leonore Ke-
kaula, he kaikamahine, Nov . 26.
Na Mr. ame Mrs. August Romans,
he keikikane, Nov. 27.
Na Mr. ame Mrs. Herman F.
Gramberg, he kaikamahine, Nov . 29.
Na Mr. ame Mrs. Charles M. Aka-
na, he keikikane Dec. 1.
Na Mr. ame Mr. Manuel Richards
he kaikamahine, Nov. 3.
Na Mr. ame Mrs. Frederick Rocha
he keikikane, Dec. 4.
Na Mr. ame Mrs. Francis M. Pet-
tigrew, he kaikamahine, Dec. 5.
Na Mr. ame Mrs. John Tremaine,
he kaikamahine, Dec, 6.
Nuhou
Kuloko
O na auhau wai malalo o ke aua mila, no ka hapaha e pau ana ma ka mahina aku la i hala, ua hoea mai i ka manawa e uku ai i keia mahina.
Ma nehinei i huli hoi mai ai o John C. Cluney, o ke keena o ka loio kulauakauhale me kana lawehala, Russell V. Roberts, oloko o ka oihana wai o Houolulu nei, mai Kapalakiko mai. .
Aole he halawai a ka Ahahui Na'i Aupuni i keia Lapule, aia i ka Lapule hope o keia mahina o malamaia ai ka halawai ma kahi mau.
Mahope o ka noho hana ana me ka Hui Alahao Kaaahi o Oahu uei, no na makahiki he kanakolu-kumamahiku ae nei i hala, ma ke ano he poo kamana, i waiho aku ai o Mr. John A. Hughes kekahi o na hoa hou o ka papa lunakiai o ke Kulanakauhale a Kalana o Honolulu nei i kohoia, i kona noho hana ana no kela hui.
Maloko o ka halepule o na Kula Kamehameha, ma ke kakahiaka o keia Sabati iho, e malamaia ae ana he anaina pulo hoomanao no ke Kamaliiwahine Bernice Pauahi Bishop, a ma ka auwina la hoi o kela la, e malama hou ia ana he anaina haipule hope, ma ka ilina mauka ao nei o Maemae.
He ewalu mau hihia oki mare i hooloheia imua o ka Lunakanawai Kaapuni John R. Desha, ma ka Poalua aku nei i hala, me ka aeia ana o na noi apau ewalu, no ka hoonoaia o ka mare mawaena o na kane ame na wahine.
Ahiki mai i keia manawa, eia no ke noho pouliuli nei ka lehulehu no na hookohu oihana e lawelaweia mai ana o ka Meia Charles N. Arnold ame na poo o na keena oihana like ole o ke kulanakauhale.
Iloko o ka aha a ka Lunakanawai Kaapuni John R. Desha ma ka Poakahi iho nei, i hookamaia ae ni he kaikamahine uuku o Annie Perry ka inoa e Mr. ame Mrs. George K. Kealialia, me ka hoololiia ana o ka inoa o kela kaikamahine o Annie K. Kealialia.
He hoike hui o na Kula Sabati o ka aoao Kona o Oahu ke malamaia ana ma ka luakini ma Manana, Ewa, ma keia Sabati iho, Dekemaba 12, a ke manaolana aku nei e akoakoa ae ana ka hapanui o ua Kula Sabati ma ia la.
No ke ka'u ana o na lima kakauha o kekahi Pilipino o Dolio ka inoa maluna o kekahi kaikamahine opio, i kauia mai ai ka hoopa'i o kanakolu dala maluna ona o ka Lunakanawai Hoomalu Harry Steiner ma ka Poakahi iho nei.
Ma ka Poakahi iho nei, i hookohu hou mai ai o Kiaaina W. R. Farrington ia Henry C. Hapai i puuku no ke teritore, no na makahiki eha o hoea mai ana, a mawaho ae o Hapai, he umi-kumamaha hou ae poe, i hookohu pu ia mai no na kulana liko olo a lakou o paa nei i keia manawa.
UA MAKEMAKEIA E HOIKE AE
I KAHI I NOHO AI.
He kanaka Hawaii nona ka inoa o Kiki, he kanaka akamai ka i ka wawahi pohaku, ka i makemakeia e hoike ae i kona wahi i noho ai ia Haliaka Kaili, o ke Alanui Hone, Helu 1016-G no ke kuka ana me ia.
NA MARE.
Gus Anderson ia Larita Hana-
mana, Nov. 28.
James Nuhi ia Caroline Keaupu-
ni, Dec. 1.
George Lonohiwa ia Anna Kalei-
nani Mendiola, Dec. 2.
Thomas R. Riddle ia Anita Kaihe,
Dec. 2.
Peter A. Kaaiama ia Virginia
Costa, 3.
Henry Fie Chong ia Anita Kihe,
Dec. 4.
Stephen Parker Waipa ia Mary
Kalama Rodrigues, Dec. 4.
NA MAKE
Angeline A. Hakeleleponi Sing,
ma ke alanui Halehala, Nov. 29.
Ambrose Hutchinson, ma ke ala-
nui Mooheau, Dec. 1.
Jennie Lua, ma ke alanui Water-
house, Dec. 1.
S. Kalema, ma ka Halema'i Moi-
wahine, Dec. 4.
E IKE MUA IA NA REPUBALIKA KUPAA I KA AOAO.
Ma na mea i hoomaopopoia iloko o na la mahope mai nei o ka lanakila ana o na moho o ka aoao Repubalika, no na kulana oihana iloko o ke aupuni kulanakauhale, na holomoku aku na Demokarata o kekahi mau mahele koho, e komo iloko o ka aoao Repubalika, ma ka hele ana ae e hoopaa i ko lakou mau inoa maloko o na buke inoa o na kalapu Repubalika.
Ina me na manao maikai, na manao kui'o i makemake ai kela mau Demokarata e komo mai iloko o ka aoao Repubalika, mamuli paha o ko lakou ike maoli i ke kupono ole o ka aoao Demokarata, ilaila e loaa ka manao hoomaikai i na Repuba
lika e pono ; no kela hana ma ka aoao o keia mau Demokarata, a e lilo i hana na lakou, ka hookipa ana aku i keia poe, me ka manao maikai; aka hoi, ina no ke ake wale no o kela poe Demokarata, e loaa aku he mau hana ia lakou malalo
o ka hookele aupuni kulanakauhale; a e hoomauia aku paha
lakou, ma na kulana oihana a lakou e paa nei i keia mana-
wa, ma ko lakou ano he poe Demokarata, alaila aole e lilo
ko lakou kakauinoa ana i na buke o na kalapu Repubalika,
i kahua e noonooia ai no ko lakou kulana Repubalika; aka e
haawiia kekahi manawa nui kupono, no lakou e noho ai ilo-
ko o ka aoao Repubalika, a e ikeia aku ko lakou hooikaika
ana no kela aoao kalaiaina, mamua o ko lakou kuleana pu
ana, iloko o na pono ame na pomaikai, i manaoia no ka poe
kahiko i kupaa iloko o ka aoao Repubalika, i na makahiki
lehulehu ae, nei i hala, oiai na Demokarata e hoohauoli ana
ia lakou iho, i na pomaikai ame ka momona, o ka aina.
Eia na noi oihana he nui, ke holomoku nei imua o na komite i kuleana ma ka noonoo ana i na noi oihana, elike me na rula hooponopono o ka aoao Repubalika; no keia mau noi oihana, e pono kela mau komile e akahele loa, ma ka haawi ana ae i na apono ana, ma ko lakou huli mua ana i na Repu-
balika oiaio, a i kupaa mahope o ' - -nao kalaiaina, iloko o ka wa nele ame ka wa loaa, .....^u ke hoonoho mua
ia ae ma na hana o ke kulanakauhale e pono ai, a ina he mau wahi kekahi no na Demokarata i holo ae iloko o ka aoao Re-
pubalika, alaila ia wa e noonooia ai ka lakou mau noi; aole ma kekahi manawa e ae mamua aku.
Ke hoomanao nei ko ke kulanakauhale nei, poe, i ka hoohanaia ana o ka mikini kalaiaina Demokarata, ma ke koho baloka o na luna oihana o ke kulanakauhale a kalana o Honolulu nei i kaahope aku la, ma ka haawiia ana o ke kauoha i na limahana apau, e noho mana ana malalo o na Demoka-
rata o na keena oihana lehulehu, e koho lakou i na moho Demokarata; a ma kekahi olelo ana ae hoi, ua ku-e maoli mai no lakou, i ka aoao Repubalika ame kana mau moho apau; nolaila o ka haawi ana aku i na alina i keia poe i hoolilo ae ia lakou, i mau enemi no ka aoao kalaiaina o ka poe i loaa ia lakou ka lanakila, o kela kekahi hana hiki ole ke hookoia aku, ina no ka lawe maoli ae o na alakai o ka aoao Repubalika, i ke kulana uahoa, me ka pana'i aku i ka ino no ka ino.
Ma na ano nae apau, e ike mua ia na Repubalika oiaio apau, ka poe i kupaa mahope o ko lakou aoao kalaiaina iloko o na hoouka kalaiaina apau i kaahope ae nei, a i holo ole aku iloko
o ka aoao Demokarata, no ke ake e loaa he mau hana ia lakou,
i na la e noho lanakila ana na Demokarata ma na oihana o ke
kulanakauhale.
O ka lanakila i loaa i ka aoao Repubalika, ame na moho na lakou e noho hookele mai ana i ke aupuni kulanakauhale, no keia mau makahiki elua e hoea mai ana, aole ia malalo o kekahi mau kumu e ae aka mamuli no o na Repubalika i kupaa i ko lakou aoao kalaiaina iho; aole maluna o na Repubalika, i nana wale no i na moho ma ko lakou mau ano kupono, a mamuli paha o ko lakou kulana ame ka ili, no keia kumu la, a no kekahi mau kumu kupono lehulehu e ae; he kuleana nui ko kela poe e koi mai ai, no ko lakou ikeia aku, ma ka wa e puunauweia ai na waiwaipio.
E HOOMAHU'I MA KA HANA HANAI MOA.
Aole he hana i nele i na pono ame na pomaikai, ke lawelaweia kela mau hana, maluna o na kahua kupono; pela no auanei ka oiaio loa, no ka lilo o ka oihana hanai moa, i oihana holomua loa.
Ma ka hoomahu'i ana i ka hana hanai moa, aole no e ikeia ka pomaikai o kela hana, ina he uuku na moa e hanai ai, a i ole, hanai paha ma na welo moa maikai ole, e laa ka hanau nui ole i ka hua, a liilii paha o ke kino; a iloko no hoi o ia manawa hookahi, e loaa pu he ike me kekahi makaukau kupono no ka malama ana i na moa.
O keia kekahi o na hana kupono loa, e lawelaweia maluna b na aina hookuonoono apuni o Hawaii nei, no ke kumu, he hikiwawe loa ka hoopomaikai mai i ka poe e komo ana ma kela hana, me ke kakali ole no kekahi mau makahiki loihi, alaila ike aku i na pomaikai o ka hooikaika ana, ina ma kekahi mau hana e ae i hoohanaia aku ai kela mau aina hookuonoono.
He mau mahina kakaikahi wale ae nei no i hala, ua lawe mai la o Mr. Dan K. Pokipala i kekahi aina hookuonoono o Lualualei, Waianae, i haaleleia e ka mea mua nana i lawe i kela aina, no ka ike ole ia o kekahi pomaikai. Me na haneri moawahine i loaa iaia, ua hoihoi aku la oia e hanai i keia mau moa maluna o kona aina hookuonoono, a i keia la, ke ohi mau nei oia ma kekahi o ke kanaha ame ke kanalima kakini huamoa no ka pule hookahi; ua like ia me kanaha ame kanalima dala kona loaa no na huamoa wale no i ka pule, me ka helu ole ia o na dala e loaa ana iaia, mai na moa e hooliloia aku ana ma ke kuai.
O ka malama i na moa i ikeia ka hanau i na hua, o ka nui no hoi o na moa e malama ai, a hui pu me ka ike i ke ano o ka malama ana, o na kahua nui iho la no ia o ka holomua ma keia oihana.
Ua makaukau mau na makeke no na huamoa ame na moa, me ka hiki ole no ke hoolawa aku i na wahi i makemake mai i na huamoa ame na moa; nolaila ina e hoomahu'i ana na Hawaii, ma keia oihana, me ke kanalua ole ke olelo ae, aole no e loihi ka manawa e hoohana aku ai, e ohi koke ana no i na pomaikai o ka luhi ana, ka mea nana e hapai ae i kekahi heluna nui o ka poe hookuonoono a kau ma na anuu kiekie e hookupono ana i ko lakou noho ana o keia mua aku.
E Makaala i ka puulu o ka poe aihue. kaa e noho nei ma keia kulanakauhale; ke manaoio nei na makai, he puulu o kela ano, ka poe na lakou e aihue mau nei i na kaa otomobile, i kela ame keia manawa, aole no ka manao kolohe wale no, e laa ka wehewehe ana i na lako o kela mau kaa a hookomo
aku maloko o na kaa kahiko; aka no ka imi pu ana i pomaikai no lakou, ma ke kuai hoolilo ana aku i na kaa kahiko, me na dala nunui. O ka paa o ka puulu o keia poe aihue i ka hopuhopu ia, a hoonoho aku maloko p ka halepaahao, pela wale no e loaa mai ai ka maha ame ka oluolu o ka manao, i ka poe apau he kaa otomobile ko lakou.