Ka Nupepa Kuokoa, Volume LXV, Number 46, 18 November 1926 — NA HANA KOKUA MANAWALEA [ARTICLE]

NA HANA KOKUA MANAWALEA

Elike me na makahiki i kaahope aku nei, ua hoea hou niai ka manawa a ko Hawii nei poe, e haawi ae ai no na hana kokua manawalea, e hoomaka ana ma ka Poakahi iho nei, a pau ma keia Poaono iho. Ma kahi o ka eha haneri me umi-kumamalima kaukani dala, ka waihona kokua no keia makahiki i makemakeia ai e loaa, no ka puunaue ana aku iwaena o na hale ame na home he iwakalua-kumamakahi ka nui, i kauka'i mai i na kokua ana aku a ka lehulehu. Ua haawi aku ko Hawaii nei poe, mai ka poe waiwai ahiki aku i ka poe ilihune, iwaena o na lalmi kanaka like ole e noho nei maanei, no keia waihona kokua, a oi aku mamua o ka huina i makemakeia ai, aole no ka makemake haawi wale no, aka mamuli o ka manaoio ana o ka lehulehu, aia iloko o kela haawi ana ma ke ano kokua manawalea, ua hoohauoliia aku ka poe iloko o ka poino, a ua hoomamaia ae hoi na manao o ka poe i loaa i ke kaumaha ame na popilikia o keia ola ana. Ma ka haawi ana i na kokua no keia waihona, ua kokua aku kela ame keia mea e noho ana ma Hawaii nei, i kona lahui ponoi iho iloko o ka pilikia, no ka mea eia ke pulamaia mai nei ma na home lehulehu i hookaawaleia he heluna mahuahua o na makaainana, o na lahui like ole, ka poe no lakou na kokua, i konoia mai ai na mea apau, e haawi ae elike me ka mea hiki. Aohe hana nui hiki ole ke hapaiia, mamuli o ka manao lokahi, pela no auanei ka oiaio loa, no ka lilo o ka huina i kohoia no keia makahiki, i mea maalahi, ke kpmohia na manao makee i ka lehulehu no keia hana kokua. Me he mea Ia aole he wahi e ae ma ka honua nei i loaa ai i na kanaka na hoopomaikai ana elike me ia ma Hawaii nei, aole wale no, mamuli o ko lakou kulana ulakolako o ke ola ana, aka ua hookaawaleiā aku na mea e hoopilikiaia mai ai o ka noonoo, ma o na poino la ame na pilikia; a kakou e olelo maoli ae ai, ke hauoli nei lakou iloko o keia mau la o ke ola ana. # I ka hapanui nae o na makaainana o Hawaii nei e hauoli ana, no lakou iho, i na pono ame na pomaikai a ke Akua i hoolako mai ai ia lakou, ua ili aku ke ko'iko'i maluna o lakou, ka puunauwe ana aku ia hauoli, iwaena o ko lakou mau hoa lahui, ka poe i hooneleia mai i kela hauoli piha ana, mamuli o na ulia pakalaki o keia ola ana, ka haawina i ikeia ma na wa'hi apau o ka honua nei. E haawi elike me ka mea hiki, a elike paha me ko kakou kulana lako o ka noho ana, hookahi mea ano nui, e loaa ia kakou apau ka ike, ua haawi aku kakou no keia waihona kokua, no ka hoohauoli ana i ka lehulehu o ko kakou poe iloko o ka pilikia.