Ka Nupepa Kuokoa, Volume LXV, Number 45, 11 November 1926 — HAAHEO O HAWAII NEI IA MISS LOUISE POHINA. [ARTICLE]

HAAHEO O HAWAII NEI IA MISS LOUISE POHINA.

Ma na ahamele elua o ana maloko o ka.Halekeāka Princess, ma ke ahiahi o ka Poaha ame ka Poalima o ka pule aku nei i hala, na ahamele a Miss Louise Pohina i ku mai ai imua o na hanen o ka poe i hoopiha aku ialoko o kela halekeaka, no ke ake e lohe i kona leo himeni; aole wale no ! hoikeike mai oia i ka nani o kona leo i ka himeni, ka hiehie ame ke kilakila o kona kulana ma kela hana, aka ua umeia aku na manao hialaai ame ka mahalo kiekie o ko Hawaii nei poe nona, e haaheo ai ko Hawaii nei poe apau, o ka oi loa aku nae, o kakou na Hawaii, no keia kaikamahine hanau o ka aina. No na mahina kakaikahi w«le ae nei no i hala i kaa aku ai 0 Miss Pohina malalo o na a'o ana mai a kekahi kumu makaukau himeni ma Los Angeles, Kaleponi, a oiai e hoomakaukau ana iaia iho, no na kalena iloko ona, o ka kakou mea 1 ike, maloko o na nupepa o kela kulanakauhale, ua oili ae o Miss Pohina, maiwaena mai o na puukani o kela kulanakauhale a kau i ka helu kiekie loa, me ka lilo ana iaia o ka medala gula makana, ka inea hiki ole i kekahi poe e ae ke kaili ae i keJa makana, oiai nae ua oo lakou iloko o na hana himeni, a ua hoolilo hoi ia hana, me he hapa la no ko lakou ola ana. O ka nani o ka leo o Miss Pohina, ke kani ame ke kiekie pu, e lili ai na puukani himeni apau i oo iloko o kela liana, he poe hoike ike maka ka poe apau i lohe i kona himeni ana ma kela mau ahamele elua, oiai nae he hoomaka wale ana no keia i haawiia iaia, no ka pomaikai oko Hawaii nei poe; a ma ka hoomau ana aku auanei a Miss Pohina i ka hooikaika ana e huli i ka ike himeni, no ka hoomahuahua ana ae i kona makaukau ; aole loa he wahi kanalua iki iloko o keia pepa, no kona.helu pu ia me na puukani kaulana o ke ao nei, a i oi aku no paha imua o lakou; e uku pono ia ai na hooikaika ana a ka poe na lakou i onou aku iaia imua, a e haawi nei i na kokua ana no kona hoonaauaoia ana ma ka ike himeni. Aole loa he hoohewahewa ana, no ka umeia aku o na manao mahalo o ka piha ohohia o ka lehulehu o ka poe apau 1 lohe i ko Miss Pohina ana ma kana mau ahamele a elua i wehe ai; e lilo ai ia ohohia, i pohaku paepae nana e hooi aku i ka makemake, ka iini iloko ona, e lilo ma keia mua aku, aole wale no i ho-kuhele iwaena o na puukani kaulana o ka honua nei, aka e lilo keia kalena kiekie i loaa iaia, i kumu no kona mau pomaikai ame kona waiwai.