| | HE MOOLELO NO IVANE MIKAELE a i ole He Moolelo Kahiko no Rusia i Piha me na
Hana Koa a Hoopihoihoi Noonoo "O Ivana ka mea nana i hoouna mai ia'u no keia wahi, me
kona olelo mai, maanei e loaa ai he home kupono no'u e noho
ai, ahiki i kona hoea kino ana mai i kekahi la. Oia ponoi ka
mea nana i hoopakele mai ia'u mailoko mai o ka halepaahao."
"Akahi no a maopopo pono ia'u na mea apau, a o ia ka'u e
olelo ae nei, o Ivana kekahi o na kanaka maikai, oluolu me ka
piha lokomaikai," i kamailio ae ai ke kaikamahine opio, me ke
kulou ana hoi o kona poo Ualo, me he mea la ke hoomanao la
paha oia, i na hana maikai a Ivana ia laua.
Ma kela wahi, ua hoea aku la ka huakai ma kekahi alanui
pali, e pili kokoke ana i kekahi wahi kahawai uuku, nolaila ho-
akaka mai la ke kanaka alakai i kona manao ia Rurika, e pono
lakou e hoomaha liilii malaila, no ka ai ana i ko lakou aina
awakea, a no ka haawi ana no hoi kekahi i manawa no ko lakou
mau holoholona e hoomaha ai, a e ai weuweu ai, mamua o ka
hoomau hou ana aku i ka lakou huakai imua.
Ua hookakaha loa ia aku ka manao o ke kanaka alakai, i
kona maopopo ana, eia ka o ka home a kana malihini i manao
ai e hele aku ilaila e noho ai, o ka home hookahi no ia o ka
wahine opio; nae oia i hoike mai i kekahi hoailona no kona
hoohuoi, aia ka iini ame ka makemake iloko o kela mau mea
no laua pakahi iho; aka ma na kumuhana okoa la no oia i
kamailio mai ai no ka hoonanea ana i kona mau hoa.
No ka hora hookahi kela hoomaha ana o lakou, ua hoomaka
aku la ka lakou hele ana, a he manawa pokole, ua pii aku la
lakou ma ka aoao ikina o ke kuahiwi, a e iho ana no hoi ilalo
O na awawa kuhoho, me ka lilo i hana nui ma ka aoao o Ku-
lika, ka puliki ana i kona noho, no ka mea aole oia i maa i ka
hele ana i na ala nihinihi, elike me keia, o kana wale no i maa,
o ia ka holo ana maluna o ka lio, ma na kahua kaua palahalaha.
Ma na hora o kela auwina Ia, he uuku loa na manawa a Ru-
rika, i kamailio mai ai i ke kaikamahine opio, a aole no hoi he
hookamailio wale aku o ke kaikamahine iaia, oiai nae o ka
mea oiaio, ua piha laua pakahi me na noonoo like ole, a kela
ame keia pakahi o laua i makemake ole ai e ike wale ia ae ka
Uua meahuna.
O ko lakou hoomau ia i ka hele ana ahiki i ka uhi ana mai
o ka malu o ka po, ua hoea aku la lakou no kahi a ke kanaka
alakai i olelo mai ai, malaila lakou e hoaumoe ai, no kela po.
He awawa uuku keia, i paluluia na aoao a ekolu e ka mauna,
a hookahi wale no aoao hamama, a e kahe ana no hoi he wahi
kahawai uuku iwaenakonu o ua awawa nei.
Aia ma kekahi pali pohaku, he ana nui, i uhiia kona waha
e na laauhihi, maloko o kela ana, i alakai aku ai ke pailaka i
kana mau malihini, me ka hohola ana aku i na huluhulu, no
Mira e hiamoe ai, a noho mai la o Rurika ame kona kokoolua
mawaho o ka waha o ke ana, malaila laua e hiamoe ai, me ka
makaala mau aku i ko lakou mau holoholona, i hopaaia i na
kumulaau.
Elike no me ka po mamua aku, ke konane maikai o ka ma-
hina, pela no ke kulana i ikeia ma keia po, aole he mau mea
e hoopilikiaia mai ai ka noonoo, nolaila, me na manao hauoli,
no ka palekana, ua haule aku la ke kauna opio hooluolu; aia
hoi iloko ona, na noonoo ano hou loa, ka mea ana i hoohiki
paa iho ai, aole oia e huli hoi hou aku i kona aina hanau, aka
e hoohala aku ana oia i ke koena o kona mau la i koe o ke ola
ana maloko o ke kihapai o Edena, kahi auanei e ai aku ai i ka
hua o ka laau i papaia, a e hoohihi ai oia i ka ono ame ka mo-
mona o ua hua nei. MOKUNA IX. " Ma ke kakahiaka nui o kekahi la ae, hakalia no a pau ka la-
kou ai ana i kekahi mau meaai mama, o ka haalele iho la no
ia o Rurika ma i kela wahi a hoomau aku la ko lakou alahele
no mu a.
Me he mea la, ua lilo ka oluolu maikai o ka hiamoe ana, pe-
la hoi ka loli ano e ana ae o ko Rurika noonoo, i kumu, nona
e hoike okoa mai ai i kona hoihoi loa ma kela kakahiaka, no
ka mea ia lakou o ka hoomaka ana aku e hele, ua hoomaka
mai la no oia e kamailio me ka piha hoihoi, a ua pana'iia aku
no hoi na pane apau ma ka aoao o ke kaikamahine opio, me
ia ano hoihoi hookahi no.
Ma ka helehelena o ke kaikamahine opio, pela pu hoi ma ke
ano o kona leo aole a kaua mea e ka makamaka heluhelu e
hoohewahewa iho ai, no ka loaa ana o kekahi mau mea nana
i hoololi ae i kona kulana haka-nu o ka Ia aku mamua, a i
keia kulana hou.
Ua hele no hoi a na hora o ke awakea, hoea aku la ka hua-
kai a Rurika ma, no ka piko o kekahi puu kiekie, aia hoi ia Ru-
rika i nana aku ai ilalo o kekahi awawa palahalaha, e waiho mai
ana he kahawai akea, a aia hoi ma kona mau kapa, na kauhale
e ku kaawale ana kekahi mai kekahi aku.
"O ke Kauhale keia o Kamali, ka pahuhopu o kau huakai,"
i huli mai ai o Lafela e kamailio ia Rurika, i ke kauna opio i
kaohi mai ai i kona hoki, no ke kilohi pono ana aku i na hio-
na nani o ka waiho ana o ka aina.
"O kahi kauhale i'o keia o Kamali, a o kela hale e ku mai
la, malalo pono iho o kela mau puu kinikini, e hoopuniia ana
e na kumulaau uliuli, o ka home ia o kuu makuakane," i komo
mai ai o Mira ma ka hoakaka ana imua o ka malihini i kona
wahi i noho ai. "E wikiwiki aku ko kakou hele ana a hoea
i ka hale, no ka mea ke hopohopo loa nei au, no ka lilo o kona
ike ole ia'u, i kumu e hooi loa ia aku ai kona pilikia !"
"E awiwi i'o aku ko kakou hele ana imua," i kokua mai a
o Rurika i ka manao o ka wahine opio, pau ae la no kona hoi-
hoi no ka nana ana i na hiona nani o ka aina, hookahi mea nu
iloko ona, o ia ka hana aku i na mea apau e hoomamaia ae a
ka manao kaumaha o Mira.
Ua hoa-wiwi i'o aku la ka lakou hele ana imua, a iloko o ka
hora hookahi aia hoi, ua hoea aku la lakou, mawaho pono o ka
hale o Min, e ku ana ma kapa o ka muliwai, he mau anana
loihi no nae mai ke kahawai aku a e ku kaawale ana no hoi | mai ka hapanui mai o na kauhale e ae. Hakalia no a ku na hoki o lakou mawaho o ka hale, o ka lele koke iho la no ia o Mira mailuna aku o kona hoki, a holo aku la noloko o ka hale, oiai hoi o Rurika i kii aku ai i ka hoki e hoopaa, a i ka hala ana o kekahi mau minuke o kona hooponopono ana aku i na holoholona, komo aku la oia iloko o ka hale. O ka hiona mua loa i halawai mai me ka ike a kona mau maka, o ia no kekahi elemakule e noho ana ma ka aoao o kekahi moe haahaa, a e apo aku ana hoi na lima palupalu o Mira ma kona a-i. Ua hala kona mau la o ke kanaka ikaika, he kulana nawaliwali kona, a ua hele no hoi kona lauoho a keokeo, aka nae ma kona mau ano ke nana aku, me he mea la oia kekahi o na kanaka ikaika, i kona mau la opio. "O oe mai la ka ia e kuu Mira!" i lohe aku ai o Rurika, i ka pane ana mai o ke kanaka elemakule i kaha kaikamahine, "ua lilo na hora lehulehu o ko'u ike ole ana ia oe, i kumu hoonawaliwali loa mai i ko'u kino, a ua koho maoli iho no au, ina no ko'u ike hou ole ia oe; alaila ua hoohikiwawe loa ia aku ko'u iho ana iloko o ka luakupapau." "E hoolana i ka manao e kuu makuakane, no ka mea ua huli hou mai la au imua ou, me ke ola kino maikai, me ko'u hoopilikia ole ia mai. Na keia kanaka i hoopakele ia'u, alaila huli mai la oia imua o Rurika, me ka hoomau ana ae no i kana kamailio ana: "O keia kuu makuakane a'u i hoike aku ai ia oe a ke ike pu mai la no oe, ua pololei na mea a'u o ka hoike ana aku imua ou, ua lilo ko'u kaawale ana mai iaia aku, i kumu e hoemiia mai ai ka ikaika o kona kino." Ua nawaliwali loa ka makuakane o Mira, e hiki ole ai iaia ke eu ae iluna no ka haawi ana mai i kona aloha i ka kakou koa opio, aka haawi mai la nae oia i kona lima, no ke aloha ana, a me na waimaka e kihe'ahe'a ana ma kona mau papalina, pane mai la oia i keia mau olelo: "Na ke Akua e hoomaikai mai ia oe e ke kanaka opio, no ka mea au i hana ai. Aole i maopopo ia oe, ka nui ame ka makamae o keia waiwai au i hoihoi mai la imua o'u. Ina aole oia i hoihoi hou ia mai nei imua o'u, he mea maopopo loa, iloko o ka imo ana a ka maka, ua pio ke kukui o ke ola iloko o'u ; aka hoi he nani ia ua hoi hou mai la oia imua o'u, ke paa nei kuu manao, e loaa hou ana ka ikaika ame ke ola iloko o kuu kino." Ma kela wahi o na olelo a ke kanaka elemakule i kamailio mai ai, komo aku la o Lafela iloko o ka hale. Ua ike pinepine no o Lafela ia Aleba, koe nae ko laua kamaaina ana kekahi i kekahi, a o ia ka Mira o ka pane ana aku imua o kona makuakane : "Oia nei pu kekahi i komo mai ma ka hoopakele ana i kuu ola me ke Kauna Rurika. "Eia ihea ke Kauna Rurika?" wahi a ke kanaka elemakule ma ke ano puiwa. "Owau ka mea au i ninau mai la," i pane aku ai o Rurika, no ka hoakaka ana i wahi e hoopauia ae ai ka pohihihi o ke kanaka elemakule. "Alaila no keia wahi anei kau huakai? Owau anei kau i hele mai nei e huli?" "Ae, na kekahi hoaloha o'u, na Ivana i kuhikuhi mai nei i kou wahi e loaa ai." ''Ua pono, ua pololei kau huli ana mai la a loaa au ia oe; nolaila he malihini keia na kaua e Mira, ua maopopo anei ia oe ia mea?" "Ae, ua maopopo ia'u he malihini oia na kaua, no ka mea ua kamailio mai oia i kona moolelo ia'u ma keia alahele mai nei a makou." Nana pono mai la o Aleba maluna o ka helehelena o ke kauna opio no kekahi manawa, alaila huli aku la kona alo i ka paia, no ka mea ua hele maoli oia a nawaliwali ; a ua lilo nae kona nawaliwali i kumu no Mira e hoopoina ae ai i na mea apau, a hele koke aku la oia e hoomakaukau i kekahi mau meaai na kona makuakane, aole no hoi i loihi, hoea mai la oia me ke pola ti ame kekahi mau meaai mama, a oiai ua hele maoli o Aleba a pololi hoomaka iho Ia oia e ai i kela mau mea me ka hoonuu maoli. ! I ka maona ana o kona makuakane, hele aku la oia e hoomakaukau i kekahi mau meaai na na malihini, a i ka makaukau ana, kahea mai la ia Rurika ame Lafela e hele aku e ai, a ia laua i noho iho ai ma ka aoao o ke pakaukau i hoi hou aku ai o Mira no ka hooponopono ana i kona makuakane. Ma ke ahiahi o kela la, ua haalele iho la o Lafela ke kanaka alakai i kahi kauhale o Kamali; ua au'a mai no o Rurika ame Mira iaia, e noho a kekahi la ae, aole nae ona ae iki, no ke kumu, ua makemake loa oia e hoea koke no Maimai, a oiai he konane maikai ka mahina o ka po; ua hauoli loa oia e hoi i ka po, ka manawa oluolu no kona mau holoholona. Uku aku la o Rurika, i kekahi mau dala mahuahua, no ka lawe ana mai o Lafela iaia ahiki i kela wahi, a o ia ka Lafela i pane mai ai: "Aole no he loihi o ka manawa au e kakali ai, e halawai hou ana no kaua, oiai e hele mau mai ana no au no keia wahi, ma ke ano o ka'u oihana. No kela mau kanaka i make ia kaua na'u e nana aku i ko lakou mau kino, aole au mea e hopohopo ai. . "O ke aloha no kou, a hui hou aku kaua i ka wa pono, a ina aole e loaa ana ia oe he hauoli, ma ka noho ana malalo o ka malumalu o na kaupoku o keia home, alaila ua kuhihewa ka'u mau mea i hoomaopopo aku ai no kou ano, ame ke ano o ka wahine opio a kaua i hoopakele ai, a i hoihoi mai ai imua o ke alo o kona makuakane. Ua hoopukaia mai na olelo maluna ae e Lafela, me ka minoaka ma kona mau papalina, a ke Kauna Rurika no nae e hoohewahewa ole mai la i ka manao maoli o na olelo a kona alakai, a mamua nae o ka loaa ana he manawa iaia e pane mai ai, ua kaha e mai la o Lafela hele no kahi o ke alanui. No kekahi manawa pokole ko Rurika ku ana e nana i kona alakai, ahiki i ke kaawale loa ana mai iaia aku, ua hoi hou mai la oia noloko o ka hale, aia hoi e noho ana no o Mira ma ka aoao o ka moe, me ka paa ana o kekahi Uma maluha o ka umauma o kona makuakane, a ma ka lae hoi kekahi lima, a ua hiamoe nae o Aleba. , Hele pololei aku la ke Kauna Rurika a noho iho la ma ka aoao o Mira, a ia wa i huli mai ai ke kaikamahine opio me ka helehelena kaumaha, a kamailio mai la i kana malihini, me ka leo malie loa: "Ke ike nei au i ka nui maoli o ka ma'i maluna o kuu makuakane, a ua hele kona kino a nawaliwali maoli. He malie loa kona hanu ana, a aole hoi he maikai o ka pana o kona puuwai. Ma ko'u manao, he oi ae e loaa kekahi mea nana e kokua mai iaia, mamua o ke kauka'i ana i ka kaua mea e hana aku ai no kona palekana. "Aia ma kekahi wahi mamao mai keia home aku, kekahi kanaka a'u i kamaaina oo kona makaukau, ma ka haawi ana | i kuu makuakane, alaila e hele ae au e kii i kela kanaka, e
hele mai, e nana, i ka mea pono e hana aku ai no ka mea ilo-
ko o ke kulana nawaliwali."
I kinohi, ua hoike aku o Rurika i kona manao, no ka oi
loa aku o ka pono, oia ka mea nana e kii i ke kanaka i make-
makeia e hele mai e nana i ka mea ma'i aka nae, no ka paa-
kiki loa no o Mira oia ke hele, a hui pu iho no hoi kekahi
me ka ike ana o Rurika, he oi aku ka hikiwawe ina o Mira
ke hele, mamua ona, hooholo like iho la laua, e noho i'o o
Rurika e kiai ia Aleba, a o Mira ke hele ma kela misiona hoo-
pakele.
Puka like mai la na opio nowaho o ka hale, a i ke kau ana
ae o Mira maluna o kona hoki, huli hoi aku la o Rurika nolo-
ko o ka hale, me kona lawe koke ana ae i kona kulana kiai, ma
ka aoao o ka moe, me kona hoonioni ole aku ia Aleba.
No na minuke paha he iwakalua kela noho malie ana o Ru-
rika kiai i ke kanaka ma'i ua ala mai la o Aleba, me ka nana
ana mai maluna o ke kauna opio a i mai la :
"Eia o Mira ihea e nalowale nei?" wahi ana me ka hoao
ana ae e nana ialoko o ka rumi, no kana kaikamahine.
"Ua hala aku oia no ke kii ana i kekahi kauka, e hele mai
e nana i kou ma'i," wahi a Rurika, me ka uwai ana aku i ko-
na noho a pili kokoke loa i ka aoao o ka moe.
"Pela i'o ka oia i nalowale ai, a oia no ka mea i ike, i ka
hana pono no'u. Ma ka po nei, ma keia manawa, iuka au
O ke kuahiwi, he ikaika nae ko'u kino ia manawa."
"He mea oiaio no ia, aka i keia manawa he kino ma'i, no-
laila o ka hoea mai o kekahi kauka, o ka manaolana wale no
ia, no ka hiki iaia ke lawelawe mai i na mea apau e auhee
aku ai ka pilikia mai ia oe aku.
"Ae, ua hiki wawe loa ka hoea ana mai o keia pilikia malu-
na o'u, a malia ina nei no ka hoea mai o ke kauka, e hiki ana
iaia ke haawi mai .!' m la^u no ka hooikaika ana ae i ko'u
kino."
Me kela mau olelo i kamailioia mai e Aleba, upo'i iho la
kona mau maka me kona noho hamau loa, aia hoi o Ruri-
ka ke hakilo mai la i ke kulana o ka mea ma'i, a o kana mea e
hoomaopopo mai la o no ka nui o kona hanu ana, me ka oni
hoi o na lima i kekahi manawa, a i kekahi manawa no hoi,
e lohe okoa aku ana oia i ka leo nunulu.
Ua ma'u no kela moe hoololo ana o Aleba, alaila kaakaa
hou ae la koiia miu maka, a huli mai la naha ia Rurika me ka
pane ana mai:
"Ua hoakaka mai nei oe i kekahi mea e pili ana no Ivana,
ua ike nae paha oe iaia ea?" wahi ana me ka leo malie loa.
"Ae, ua ike au iaia mamua o kuu haalele ana aku ia Rusia,"
i pane aku ai no hoi o Rurika, me kona haupu koke ana mai,
no ka loaa o ka ike iaia no ko Ivana mau ano mai ia Aleba
aku.
"Pehea he maikai no anei ke ola o kona kino, ia oe o ka
haalele ana aka iaia?"
"Ae, he maikai kona ola kino ma na ano apau."
"Pehea he holomua anei kona noho ana?''
"Ke pohihihi loa nei au i ke ano o kau ninau."
"No kona holomua ma kana lawelawe oihana ana, ka ma-
nao o ka'u ninau."
"Ma ia wahi, ua noho pouliuli loa au, no ka mea aole i
maopopo ia'u ke ano o kana oihana, koe wale no, he kauwa
lawelawe aku oia malalo o ke Keikialii Menikopa."
"Alaila aole oia i hoakaka mai ia oe i kana oihana, ke nele
la kou maopopo, elike me kau e hoakaka mai nei ia'u."
"No ka nui ole o ka manawa, pela i hiki ole ai iaia ke hoa-
kaka piha mai i na mea apau e pili ana iaia ame kaha oihana,
a malia o hiki ia oe ke hoike mai ia'u nona. Hookahi wale
no a'u mea i ike, o ia kona hookuu ana ae ia'u mailoko mai o
ka halepaahao, a mawaho ae olaila, he hoaloha kahiko oia no
kuu makuakane. Heaha ka mea hiki ia oe ke hoike mai ia'u
e pili ana iaia?"
Pehea, aole anei i hoike mai o Ivana ia oe, i kona manawa
e hoea mai ai no keia wahi?" i ninau hou mai ai o Aleba, me
kona hoike ole mai i ka mea a ke kanaka opio i ake aku ai e
lohe mai iaia mai.
"O kana wale no i olelo mai ai, he manawa wale no nona e
hoea mai ai, malia paha he mau makahiki, a i ole he mau ma-
hina helu wale no, oia hookahi wale no ka i ike, i ka manawa
pololei loa.
"Aole oe i pane mai nei i ka'u ninau ; he mea oiaio loa ua
nui kau mau mea i ike a i maopopo no Ivana, e hoike mai oe
i kau ike e pili ana i kela kanaka."
"Aohe a'u mea e hoike aku ai ia oe nona, mawaho ae o kau
mau mea apau i maopopo i keia manawa, koe wale no nae
keia, o Ivana kekahi o na kanaka maikai loa, a oiai nae he ku-
lana kauwa lawelawe kona kulana e nanaia aku nei e na kana-
ka, o ka mea oiaio Ioa nae, aia ke koko kiekeie, me ka oi; a'e o
ka maemae ke holo la iloko o kona kino, imua o na maka o
ke Akua, mamua o ke koko e holo la iloko o ka Emepera Ni-
kola, ka mea e noho hoomalu la maluna o kona aina hanau.
"E hoolilo oe i keia hale i home nou, a ua hiki ia oe ke noho
maanei elike me ka loihi au i makemake ai. Aia hoi a loaa
ka ikaika kupono ia'u, alaila lawe aku au e hoomakaikai ia oe,
ma na wahi apau e nohoia ana e na kanaka, i loaa aku ai na
ike ia oe, i ke ano o ke ola ana o na kanaka maanei nei a pela
hoi me ka lakou mau hana e pono ai ko lakou noho ana."
Ke hoomaopopo la o Rurika, i ka hoomanawanui maoli o
Aleba i ke kamailio ana mai i na olelo maluna ae, nolaila. hoo-
holo iho la oia, aole e hoouluhua aku i ka noonoo o kela ka-
naka, ma ka noke ana aku iaia i ka niele, i na mea ana i ake
nui ai e ike ; a ina no paha i noke aku oia i ke koi hoomano,
aole no ia he kumu, e hookoia ai kona iini, no ka mea i kela
manawa, ua huli hoi mai la o Mira me ke kauka.
Elike no me ko Mira ano mau, o kona makuakane wale no
ka mea nui iloko o kona noonoo, hakalia no a lele oia mai-
luna iho o kona hoki, holo aku la a komo iloko o ka hale, aia
hoi ke kauka mahope koke aku ona, me ka noho ana iho o
Mira ma ka aoao o ka moe, a noho iho la no hoi ke kauka,
maluna o kekahi noho i paneeia mai imua ona.
"Aole no he ikaika loa o ka ma'i maluna o'u," i pane mai ai
o Aleba, iaia i ike mai ai i ke kauka.
Me kona kamailio ole aku nae, hoomaka iho la ke kauka
e nana i ka pana ma kekahi lima o ke kanaka ma'i, a hoopili
iho la no hoi i kona pepeiao maluna o ka umauma, a i ka hala
ana o kekahi mau minuke, o kona nana ana i ka mea ma'i,
ka ae Ia oia iluna, me ka hookaawale ana aku ma kahi mamao
mai ka moe aku, a wehe ae la i kekahi paiki liilii ana o ka paa
pu ana mai me ia.
"E waiho ana au i kekahi laau nou, aka o ka mea nui wale
no, o ia ka malama ana i kou kino me ka makaala loa. He
kulana nawaliwali maoli kou e Aleba, a me ka makaala wale
no pe e palekana ai, a e hala ana no hoi kekahi ma'u la mahua- | o ka ikaika kupono o kou kino, elike me na ia AKU wo. . ...... 4 "O, aole he ikaika o ko'u ma'i elike paha nie kau e manao nei, a me he mea la, ua hiki loa ia'u. ke haalele iho i ko'u wahi moe, iloko o na la helu wale no." Pahola ae la ka minoaka ma na papalina o ke kauka, a i aku la. "E hoolohe loa oe i ka'u kauoha, o ia no ka malama loa i kou kino, malia e hooi loa ia aku ana ka loihi o kou mau la e ola ai, mamua o makou apau," alaila pahola ae la ka minoaka ma na papalina o ke kauka. Me kela mau olelo ae la, ninini iho la oia i kekahi omole laau a haawi mai la ia Mira me na kuhikuhi, no ke ano e haawi ai i kona makuakane, alaila haawi mai la no hoi he mau olelo hoolana ia Rurika, o kona oili aku Ia no ia nowaho o ka hale, no kahi o kona lio e ku mai ana. Ua ukali aku la nae o Rurika mahope o ke kauka nowaho ai ka hale, a mamua o ke kau ana ae o ke kauka maluna o kona lio, ua ninau mua aku la o Rurika iaia i ka i ana aku: "E hoike maoli mai oe i kou manao imua o'u no kau ike e pili ana i ke kulana oiaio loa o Aleba?'' Ua puka ae ka mahina a kiekie i kela manawa, a ma ka malamalama o ka mahina i ike mai ai ke kauka i ka helehelena o ka kakou koa opio, me kona paku'iku'i olelo ole mai nae, aka pane mai la: "No kau ninau ea, o ka mea oiaio maoli, e pohala ae ana no o Aleba mai kona ma'i pilikia mai, aka elike nae me kona kulana elemakule, aole no he loihi loa o kona mau la i koe e ola aku ai, o ka pau no ia o kana mau hana maanei, a pau no hoi ka ike ana i na inea ame na kaumaha. Aole nae e hiki ia'u ke hoike pololei aku i ka nui o kona mau la i koe e ola aku ai, koe wale no nae keia, he mau Ia pokole loa, he mau mahina kakaikahi wale no paha, a i ole, he mau mahina loihi paha; ma ke ano wale no o kona malamaia ana aku, e loihi ai kona ola ana, a e pokole ai paha. E hoea hou mai ana no au no ka ike ana iaia, ina aole ma ka la apopo, alaila i kela la aku; nolaila e hoolana i ka manao, a mai hookaumaha!" I ka hala ana aku o ke kauka, komo hou aku la o Rurika noloko o ka hale, me kona ala ana aku me Mira ahiki i ke kani ana o ka hora eiwa ma kela po, ia manawa i hoakaka aku ai o Rurika i kona manao imua o Mira, no ko laua ku kiai no ka pono o ka mea ma'i. I kinohi, ua hoole loa o Mira, no kona makemake ole, e komo pu aku o Rurika, ma ke kiai ana i kona makuakane, aka mahope mai, akahi no oia a ae mai, e hoi oia e hiamoe, a e ku kiai aku o Rurika, ahiki i ka hora umi-kumamalua o kela po, alaila kii aku oia e hoala ia Mira, no ka hoomau ana aku i ke kiai ana. He ekolu no mau rumi maloko o kela hale, o ka ekolu nae o na rumi, malaila e hoahuia ai na lako halii ame na kapa moe, ua hookaawaleia ae la kela rumi no Rurika, a no kekahi mau rumi hou ae elua, hookahi no Mira, a o ka rumi no hoi e waiho ana o Aleba. Ma kela hoi ana aku o Mira e hiamoe maloko o kona rumi, noho iho la o Rurika e kiai ma ka aoao o ka moe o Aleba, a aole oia i hoi iki e hooluolu, a i ole hoala aku paha ia Mira e ku kiai, ahiki wale no i ke ao ana ae ma kekahi kakahiaka mai. Aole he lulumi mai o ka makahiamoe ma na maka o ke kauna opio ma kela po ahiki wale no i ke ao ana, o ke kumu, he nui na mea iloko o kona noonoo, o ia no kona alakaiia ana mai ahiki i kona hoea ana iloko o kela home, ana i moeuhane mua ole ai, pela iho la ka kekahi alahele i hoolalaia no kona ola ana aku. Iloko hoi o ko Mira nanea i ka hiamoe, a mailoko ae o kona puiwa hikilele i ala ae ai oia a nana aku la iwaho o ka puka aniani, eia ka ua malamalama loa ua wehe ae ka pewa o ke ao. Hele mai la oia me ka huhu ana aku ia Rurika, no ke kii ole ana aku e hoala iaia mai kona hiamoe mai ; minoaka wale mai la no nae o Rurika me ka olelo ana mai, ua hiki no iaia ke kiai pakahi, me kona makemake e haawi mai i manawa nui kupono. no ka wahine opio e hooluolu ai, me ka hoopilikia ole ia aku. MOKUNA X. No ka mahina hookahi kela noho ana o ke Kauna Rurika maloko o kona home hou, ua maikai loa ae la o Aleba, me ka hiki iaia ke kau iluna o ka lio, me ke kokuaia aku no nae e kekahi mea, ahiki i ke kau ana iluna o ka noho, a i kekahi la ia Rurika i kokua aku ai ia Aleba ahiki i kona kau ana iluna o ka lio, pane ae la ua elemakule nei i ke kauna opio: "Aole loa au i maa mai kinohi. mai o ko'u noho ana ma keia wahi, na kekahi mea au e kokua mai ma ke kau ana iluna o ko'u lio. Me he mea la ua nui maoli ko'u ma'i, i kau mai ai keia haawina nawaliwali maluna o'u." "Aole keia he wahi ma'i uuku i loaa ia oe, aka he ma'i koiko'i loa ia, a ma ka lokomaikai wale no o na lani, i palekana mai ai oe. O ka'u kauoha wale no ia oe, o ia ka malama ana i ka hoomanawanui, malia he manawa no ma keia hope aku, e hoi mai no ka ikaika maikai iloko o kou kino. E noho malie loa oe maluna o kou noho, a e hookuu aku i ka lio, e hele ma kau mau wahi apau e makemake ai." "Aole e loaa hou ia'u ka ikaika elike me na la aku nei i hala, aole loa, no ka mea ke ike nei au, i ke emi mau mai o ko'u ikaika i kela ame keia manawa. Ke noho nei au maluna o ke kua o ka lio, no ka mea ua maa au i ka noho ana pela a ua kokua mai ko'u mau lima ame na wawae, ma na ano apau e haule ole aku ai au ilalo, aka i ka pau ana o ka hiki i kuu mau lima ke paa hou iho, o ka hoea ana mai ia i ko'u hopena. "O, aole he loihi o ko'u mau la i koe e ola aku ai; o ka iini hookahi wale no iloko o'u, o ia ko'u ola ana aku, ahiki i kuu ike hou ana ia Ivana, a ke pule mau nei au i ke Akua, e hoea koke mai oia, mamua o ka upo'i ana iho o kuu mau maka, no ka manawa hope loa." Iloko o kela mau mahina o ka noho ana o Rurika maloko o kona home hou, ua pipili aku kona noonoo no Aleba mamuli o kona ike. i na ano maikai me ka oluolu iloko o kela kanaka iaia; a ua komohia pu aku no hoi kela ano hoohihi hookahi iloko o Aleba no Rurika. I kekahi la, oiai ka makuakane e noho hookahi ana me kana kaikamahine, ua kaawale aku o Rurika mailoko aku o ka hale, kamailio mai la o Aleba i ka i ana mai: "Auhea oe e Mira kuu kaikamahine," wahi ana me ka leo haalulu, me ke kau ana mai i kona lima akau maluna o ka poohiwi o kana kaikamahine, "e kuhihewa ana au, aole la he mea a kuu aloha e kau aku ai ma ka honua nei, mawaho ae ou; no Rurika, ma ko'u ike, ua kupono kela aloha iaia. Hookahi wale no nae a'u mea e minamina nui nei. o ia ka pulama ole aku o ka emepera i na kanaka kilakila o keia ano, me he mau pohaku momi makamae loa la maloko o kekahi wahi hoano." (Aole i pau) | |
