Ka Nupepa Kuokoa, Volume LXV, Number 23, 10 June 1926 — KA AHAHUI KAMEHAMEHA NO NA AINA HOOPULAPULA. [ARTICLE]

KA AHAHUI KAMEHAMEHA NO NA AINA HOOPULAPULA.

Ma ke ano ahahui, e holo ana ka Ahahui Kamehameha no na aina hoopulapula ma Molokai, ma ka po o keia Poaono iho, no ka ike pono ana no lakou iho i ke kulana oiaio o ka hana hoopulapula iwaena o na Hawaii, ma kela mau aina; kela hana a ke Keikialii Kalanianaole, ke poo o ka ahahui, i kukulu iho ai i kiahoomanao nona mahope nei. E ike pono aku ana na lala o kela ahahui, ame ka poe apau e holo aku ana ma kela huakai makaikai no Molokai, i na kulana oiaio o ka hana hoopulapula, aole wale no, ma ke ano o ke ola ana ame ka noho ana o na aka ma ka lakou mau mea kekahi i hana ai maluna o ko lakou mau aina; a ina aole i hoea aku lakou, i kahi e olelo maoli ia ae ai, no ka halawai o kela hana me ka holomua, aole no lakou ia hewa, oiai aia no he mau mea ano nui i koe e pono ai e loaa aku ia lakou, i loaa ole nae i keia manawa. He mea pono nae e loaa aku keia ike i ka poe e noho mai la ma na aina hoopulapula i keia manawa; aia ahiki ke paniia ka ipuka o ka make, e hoea mai auanei i ka wa e ulu ai ka lahui; aka i mau no ka hamama o kela ipuka, pela no auanei e mau ai ka holomoku ana o keia lahui i ka make, me ka nana

ole, i na hoao ana ma ko kakou aoao, e hoopakele ae ia kakou iho. Eia hou, pehea ka nui o na hooikaika ana a na kanaka e mahi i ko lakou mau aina, pela hoi na hoike no ka nui o na loaa, mailoko mai o na meakanu, na holoholona paha, a mau meaulu paha, e loaa ana i ka poe hoopulapula ma Molokai; ina aole e hiki ia lakou ke hookaa i na ukupanee ame kekahi hapa o na dala a lakou i aie ai mai ke aupuni aku; aole no i halawai lakou me ka holomua; he mau mea ano nui loa keia, ma keia ninau hoopulapula. HMamuli o ka nui o ka poe i hoea ae ma ka halawai a na kalapu Repubalika o ka po o ka Poaha aku nei i hala, i hoike mai ai na Repubalika, i ko lakou makee i na hana kalaiaina, no keia nee ana aku; a o ka loaa ole ana he mau paonioni iloko o kekahi mau kalapu, he hoailona ia, no ka nohoalii ana mai o ke kuikahi ame ka maluhia iwaena o ka poe i ike mau ia ka lokahi ole mamua aku nei. Ua hoole ae nei ke Kamaliiwahine Kawananakoa, no kona ae i na koikoi ana aku a na alakai o ka aoao kalaiaina Repubalika iaia e holo i moho elele lahui i keia kau; he nui hou ae no na moho kupono ma kela aoao kalaiaina, o ka mea nui wale no, 'ina no ke koho lokahi o na Repubalika) i ka moho ako lakou aoao kalaiaina iho; e loaa ana iaia ka lanakila maluna o ka moho a ka aoao Demokarata.