Ka Nupepa Kuokoa, Volume LXIV, Number 22, 28 May 1925 — WAIHO I RIVER SIDE PARK SPOKANE, WASHINGTON, KE KINO O KUU LEIALOHA HE KEIKI, WILLIAM KEKAHIMOKU ALOHIKEA, UA HALA UA NALO, ALOHA WALE! [ARTICLE]

WAIHO I RIVER SIDE PARK SPOKANE, WASHINGTON, KE KINO O KUU LEIALOHA KE KEIKI, WILLIAM KEKAHIMOKU ALOHIKEA, UA HALA UA NALO, ALOHA WALE!

Mr. Solomon Hanohano, Aloha nui:—E oluolu mai hoi oe, i kekahi wahi kaawale o ka kaua Kilohana, e hookomo iho i ka'u mea aloha, e kau ae la maluna, i ike mai ai na kini o kuu leialoha, e noho mai la ma ka hikina a ka la i Ha'eha'e a ka welona a ka la i Lehua, ua hala, ua maewa wale aku la i ka pali o ka Hiwa, he hiwahiwa hoi na'u

na ka makua, kuu aloha pau ole, kuu minamina hoi e! Oiai me ka mamea, a haupu mua ole ae, he lono kaumaha ke hiki mai ana, aia hoi ma ke ahiahi Poalua, o Dec. 27 1924, hiki mai la ma ke kelekalapa, Alohikea is very sick; kakali hou aku la no ka lono hope, loaa hou mai la, Alohikea is passed away, me ka minamina nui, me ke aloha paumako, e mokumokuahua ana i ka noonoo e au wale ae ana no mao a maanei, mahea la hoi au e ike hou aku ai, i ka helehelena o kuu mea aloha i niau kololani aku nei ka hele ana, nalo aku la na maka, i ke ao polohiwa a Kane, kuu aloha hoi, kuu minamina pau ole a! Ia oe e nani Waipio he alolua na pali, me he keiki la kahi pali e haawe iho ana maluna o kahi pali, e kilohi iho ana I ka nani o ua aina awaawa lipolipo la I ke onaona, he onaona hoi naʻu i lei i na pua hala i Maluo e kuu lei mai ka

moena haunu ole a Liloa, mai ka iʻa hailona i ka leo a ka manu. E Mokuula ka heiau kapu o Kalani e, me ke one hulili wela i ka la o Hikimaiaea, he ikiholu hoi no Pakaalana, kuu aloha ho-i e! Ua hanauia kuu lei aloha, William Kekahimoku Alohikea, maPakaalana, Waipio, Hamakua, Hawaii, i Iulai 12, 1778, mai ka puhaka mai o Lucy Kapohialiiokamamalu ame W. E. Alohikea. Ua haalele iho oia i na kaiaulu aloha o kona onehanau nei, i ka la 2 o Aperila, makahiki 1901, a hele aku la, ma ke ano oia kekahi o na keiki himeni ame ka hookani pila, o ke Kula Kamehameha, I hele aku ma kela hoikeike nui, o ke alawai o Panama. Ua hele oia me ka manao iloko o keia makahiki, e hoi mai ai, aka, ua hoomaha e mai la kona Haku, a hea mai la iaia e hoi aku nolaila e hoomaikaiia ka inoa o Iehova o na kaua, Nana no I haawi mai, Nana no i lawe aku. Me ke aloha nui I ka Lunahooponopono, ame na keiki ulele huakepau me ka mahalo. Owau iho no me ka ohana iloko o ka luuluu. LUCY K. KAILI, Kamoiliili, Honolulu, Mei 20 1925 : |