Ka Nupepa Kuokoa, Volume LXIV, Number 17, 23 April 1925 — KAKOO KA HON. KAWEWEHI I KA POE HOME HOOKUONOONO [ARTICLE+ILLUSTRATION]

KAKOO KA HON. KAWEWEHI I KA POE HOME HOOKUONOONO

Ma ka wa i huli hoi mai ai na hoa hanohano o ka ahaolelo mai ka lakou huakai noii ma ka Mokupuni o Hawaii, no na pilikia ame na hemahema o ia mokupuni, a mahope iho hoi o ka hookomo ana ae o na Mea Hanohano Lyman ame Wishard i kekahi Olelo Hooholo ame kekahi bila kanawai e pili ana no ka pono o ka poe home hookuonoono o Waiakea, Hilo, ua ku koke aku ka Mea Hanohano Henry L. Kawewehi a kakoo aku me ka ikaika, e ku-e loa ana hoi i ke ano o ka lawelawe

a hooponopono ana a ka hui mahiko me ka poe home hookuonoono, a o ka hopena o ia hooikaika ana ana pela, ua haawi aku ka poe i ikemaka ia mau hana a ia hoa hanohano o ka hale i na mahalo ana he nui. O kekahi o kana mau mea hooikaika loa, o ia no ka loaa nui o na bila haawina no kona apana o Hawaii Komohana apuni, e laa na alanui ame ka uwapo o Kailua, ame kekahi mau hana aupuni hou ae, a o kekahi o ia mau bila haawina ua hooholoia.

Kekahi o na Hoa Hanohano o ka Hale o na Lunamakaainana, Levi L. Joseph ame Henry L. Kawewehi.