Ka Nupepa Kuokoa, Volume LXIII, Number 43, 23 ʻOkakopa 1924 — OI HOU AE NA MANA KOHO MA OAHU NEI [ARTICLE]

OI HOU AE NA MANA KOHO MA OAHU NEI

Mahope iho o ka paa ana o ka buke hoopaainoa o ka poe kupono i ke koho baloka no Kulanakauhale a Kalana o Oahu nei, i ikeia ai, ua oi hou ae ka nui o na mana koho i keia manawa, mamua o ka heluna ma ke kau koho baloka wao moho aku nei i halaa. O ka heluna nui o na mana koho, no ke kau koho baloka o Novemaba e hoea mai ana, no ka apana eha ame ka apana elima, he 19,956, he 44 wale no baloka i koe, alaila piha ka iwakalua kaukani. Ma ke koho baloka o na luna oihana o ke Kulanakauhale a Kalana, i ikeia ai ke kiekie loa o na mana koho baloka, he 19,264, ua haule iho nae kela heluna malalo i keia manawa. Ma ka apana eha ka nui aku o na mana koho, ua like pu me 11,352, a ma ka apana elima hoi, he 8604 ka nui o kolaila mau mana koho, ua like pu me 2748 ka oi ae o na mana koho o ka apana eha. Ma ka mahele koho o Manoa o ka apana eha, ua oi aku ka nui o na mana koho baloka wahine, mamua o na kane, he 511 wahine a he 442 kane. Ma ka mahele hoi o Waikiki, ma ke alanui Kalalaua ame Keoni Ena, o ka mahele oi loa aku ia o ka nui o na mana koho, he 1165, a ukali aku ka mahele elua ma Kaimuki, me ka heluna mana koho o 1035. Ma ka apana elima hoi, o ka mahele nui loa o na mana koho i keia kau, o ia ka mahele eiwa, he 1004 ka nui o na mana koho, a ukali aku ka mahele umi, me ka huina o na. mana koho he 914. No ka ua o ka po o ka Poakahi nei, a hui pu iho hoi paha kekahi, me ka pau o na kanaka i ka hele e makaikai i na hana hoikeike o ka fea, aole he mau halawai a na moho Repubalika i malama ae ai ma na wahi i hoolahia no kela po.