| | HE MOOLELO
No Ke Kaikamahine 0 Ka Pouli A i Ole
Ka Iliohae Iloko o ka Aahu Huluhipa ame na
Alahele o ka Poe Ino. MOKUNA XIII. Ma ke kakahiaka o kekahi la ae, hakalia no a ala ae o Ka-
loke mai kona hiamoe ana, a iaia e hoomakaukau ana iho, ku
ana no o Kike, ka wahine Paele lawelawe mawaho o kona ru-
mi moe, a hoomaka mai la e kamailio no kana mau mea i ike
ai ma ka po aku mamua.
"Ea, aole o'u makemake iki e lohe i kena mau olelo au e
Kite," i paa aku ai o Kaloke. "Aole o'u makemake e lohe hou
i na olelo o kena ano mai ia oe mai, a ina au e lohe ana mai ke-
kahi poe okoa aku, no kou kamailio ana aku ia lakou i na mea
au e hoike mai nei ia'u alaila e kauoha ana au ia oe, e ku a
hele mailoko aku o keia home, aole e hehi hou kou mau wawae
maluna o kona mau papahele.
"Owai la ka mea hiki ke manaoio aku i kau mau olelo e
Kite? Ma ko'u manao maoli, ua opulepuleia kou noonoo, i
hoopuka mai a i oe i na mea hiki ole ke hilinaiia."
"Aole au i opulepule e Miss Kaloke, o ka'u mau mea apau
i kamailio mua aku nei ia oe, he mau mea ia a ko'u mau maka
i ike pono ai. Ua ike pono au i ka puka ana mai o Mr. Kuaina
mailoko mai o ka rumi o Miss Mine, ma ka hora umi-kuma-
malua o ka po nei; ua lohe pono au i ke kapa ana aku o Mr.
Kuaina ia Mine, ka momi o Bacelona, pela hoi o Mine i kapa
mai ai ia Kuaina o Matado. O keia ka mea oiaio loa a'u e
hoike aku nei ia oe, aole loa an i moeuhane a i olalau paha ka
noonoo, elike me kau i kapa mai nei."
"Ina aole kau mau hana maikai, kou ano oluolu, me ka ma-
kaala mau no ko'u pono, iloko o ka manawa loihi o kou noho
hana ana mai malalo o'u; ina ua kipaku koke ia oe e a'u i
keia manawa ano, me ka hoohakalia hou ole iho. Aole he
oiaio iki iloko o kau mau mea e haanui mai nei e Kite, a ua
manaoio maoli no au he mea hakuepa wale iho no kena nau, no
kou makemake paha e oi ae kou punahele imua o kuu alo."
"Ua kuhihewa loa kena mau manao ou e kuu haku. No ka
nui o kuu aloha ia oe, a no ko'u makee i kou pono wale no,
pela au i konoia mai ai e hakilo i na ano o keia mau mea komo-
hewa o ka hoea ana mai nei, a ua loaa i'o ia'u ka ike, ke hoo-
ikaika nei kela mau mea, e lilo aku kou mau waiwai apau ma
ke ano kolohe.
"Ua ike no oe e Miss Kaloke, ua holo aku na waiwai apau
o Kenerala Rudena maluna o kana kaikamahine hiapo, a nele
loa oe ma na ano apau ; no keia kumu i hakilo pono loa ai au
ia Miss Mine, ina he kaikamahine i'o oia na Kenerala Rudena;
aka ma ka'u mau mea i ike ai, a i lohe pono ai ma ka po nei,
akahi no a hoopauia ae ko'u pohihihi, aohe kela he kaikamahi-
ne ponoi na kou makuakane, a i ole he kaikuaana paha nou,
oia kekahi o na wahine komohewa i makemake wale no e hoo-
nele mai ia oe i na waiwai o kou makuakane.
"E manao ana au la ma ko'u kamailio ana aku ia oe i keia
mau mea, he kumu ia nou e komo pu mai ai me a'u ma ka
hakilo pono ana i ke ano o kela wahine, o ke kukahala-ke iho
la ka kau mea e haawi mai ai, me ka noke okoa mai i ka nuku."
"Mai hana hou aku oe elike me kau i hana mai ai A keia ka-
kahiaka, he opiopio loa oe, me ka maopopo ole, i ke ano nui o
kau mau olelo i kamailio mai nei ia'u; pela hoi na hooikaika
aha i wahi e hoi hou mai ai ko'u mau waiwai. Ke mahalo
aku nei no au ia oe e Kike, no ka nui o kou makee no ko'u
pono, eia nae o na hooikaika ana apau i wahi e hoi hou mai ai
na mea i kailiia mai ia'u aku, he manaolana poho ia; nolaila
aole o'u makemake e lawe mai oe i na moolelo o keia ano e
hoike ia'u.
"Elike me ia a'u i kamailio mua aku nei, ina e lohe mai ana
au mai kekahi poe mai, ua kamailio aku oe ia lakou, i na mea
au e hoike mai nei imua o'u, e kipaku no au ia oe mai Pinelana
aku nei. Pehea ka nui o kou hoowahawaha a hoihoi ole ia
Mine e hoomanao mau iho oe i keia mea oiaio, he kaikuaana oia
no'u, aole loa au i makemake e lohe aku i na olelo e hoinoino
ana iaia mai kekahi poe mai.
"E hele oe e Kite ma kau mau hana, a mai hoao e kamailio
wale aku i ka poe okoa i keia moolelo oiaio ole, o huikala ole
aku auanei au ia oe."
Me na kaina wawae kaumaha, me na manaolana poho, a
me ke kino hoi i piha i ka haalulu, i oili aku ai o Kite mailoko
aku o ka rumi o Kaloke, me ka namunamu liilii ana iho:
"Aia ka hoi a ike au me kuu mau maka ponoi, a lohe pono
i na olelo i kamailioia mawaena o kela mau mea, aole nae he
manaoio mai o Kaloke i ka'u mau olelo. Ua hiki nae e hooi
loa aku ana au i ka'u hakilo ana i ka laua mau hana ma keia
hope aku, me ko'u hoike ole ae i kekahi poe. Aole au i ike
i ko Kaloke paakiki maoli elike me keia kakahiaka, iloko ka
hoi o ko'u noke mau aku i ke kamailio iaia no ka'u mau mea
i ike ai, aohe wahi mea a maliu mai."
Ma kela haalele ana mai hoi a ka wahine Paele ia Kaloke,
hoomau aku la oia i ka hoomakaukau ana iaia iho, me he mea
la. aole he wahi noonoo iki iloko ona no na olelo a Kite i ka-
mailio aku ai e pili ana ia Mine ame Mr. Kuaina.
"He keu aku a ka hupo o kela wahine, me ka hoomaopopo
ole i ke ko'iko'i o kana mau mea i kamailio mai nei ia'u. Me
he mea la, ua kuhihewa loa oia i ka rumi a Mr. Kuaina i puka
mai ai iwaho, o ka rumi kela o Mine, a i ole ma ka hihia moe-
uhane paha oia i ike ai, aole ma ke kino maoli.
"Hookahi nae mea a'u e hauoli loa nei, o ia kona hele mua
ana mai e ike ia'u i keia kakahiaka, a lohe pono i ko'u ma-
nao, mamua o kona kamailio ana aku i ka nui o na Paele o
Iakou, e lilo ai i mea hoohilahila i na malihini. Aole ana e
nele ka manaoio mai o kekahi poe i ka moolelo a keia wahine
Paele, oiai nae, he mau hora kakaikahi wale no ko Mr. Kuaina
noho ana maloko o keia home, a he mea hoi oia i kamaaina
loa ia Mine.
"Ina no ka lohe aku o kuu makuakane i keia moolelo, aole
ana oia e hoohakalia ma ke kipaku ana ia Kite mailoko aku o
kona home ; ua laki nae, owau hookahi wale no ka i lohe i na
mea ana i kamailio mai nei, a e noho hamau loa ana au, me
ka hoike ole ae imua o kekahi mea okoa aku."
Ua hooko i'o o Kaloke, i kela mau olelo ana o ka hoakaka
ana ae, eia nae iloko o na la mahope mai, iaia i nana aku ai i
ke ano o ke ola ana ame kana mau hana, i loaa iho ai iaia ka
manao mihi, no kona kupale, mau ana no ko Mine pono, me ka | papa ikaika ana aku ia Kite, aole e hakilo hou elike me kana
i hana ai ma ka po mamua aku.
O kela leka a ua o Kaloke i kakau ai ma ka po mamua aku
na ke Kanikela Paniolo, ua hoounaia aku la ia, a no na la
eono mahope mai, aole he loaa mai o ka pane, me kona palaka
loa no kela leka, mamuli o ka lilo o kona noonoo ma kekahi
mau mea lehulehu.
No na pule elua mahope mai, e hoopipili mau aku ana o
Matado ia Kaloke, ma na wahi apau a kela kaikamahine e
hele ai, a e noho ai paha, aia ua o Matado malaila kahi i noho
pu ai, a i ole hele pu ai paha, me ka noke ana aku i ke kamailio
no ke pahele ana i ka noonoo o Kaloke.
Ua lilo kela hoopipili mau aku, ame ke kamailio aku o Ma-
tado, i mea hoihoi ole na Kaloke, o kana mea nae e ha'oha'o
loa la, o ia no ka ulu mahiehie o ka helehelena o kona makua-
kane, ke ike mai ia Matado me ia; a iloko no hoi o kela ma-
nawa hookahi, ua hoomamao loa o Pilipo iaia iho mai ia Ka-
loke aku.
Ma kekahi po nae, oiai ua o Kaloke ame Pilipo e noho ko-
koolua ana mawaho o ka lanai o ka hale, a no ka hiki ole i ua
kaikamahine nei, ke uumi iho i kona mau manao hoowaha-
waha no Matado, kamailio okoa mai la oia ia Pilipo i ka i ana
mai:
"Aneane e hiki hou ole iho ia'u ke hoomanawanui, no ka
hoopilipili mau mai o kela kanaka ia'u, a ua ku ole no hoi
kana mau olelo ke kamailio mai i ka hoihoi. Ina penei iho la
kana mau hana ia'u, no kekahi mau la hou aku, e kono okoa
ia mai ana au, e hoike aku iaia, i ka nui o ko'u hoowahawaha
nona."
"Ea, he mea maikai ole maoli ka hoi keia!" i pane aku ai
o Pilipo ma ke ano hoolalau. "E kuhihewa ana ka hoi au, ua
lilo la i mea hoohauoli aku i kou manao, ka hui mau ana me
kela keonimana."
"Ua hele au a piha i ka hoowahawaha iaia, Iloko o ko'u
hoike aku imua ona, no ko'u makemake ole i kona hoopipili
mai ia'u, aole nae ia he kumu nona e hoomamao aku ai."
"Malia paha aia kekahi mau kumu ano nui loa a kela kana-
ka i manao ai e pili mau mai me oe? Ua maopopo no ia oe e
Kaloke, ina e haulehia kekahi mea i ke aloha, aole oia e nana
mai ana i ke kipakuia aku, malia pela keia kanaka i nana ole
mai ai i kou nanakee aku iaia. Ke ole au e kuhihewa, aia
kekahi manao nui iloko o Pilipo, no ke noi ana mai ia oe i wa-
hine nana."
"Ina e hoao ana kela kanaka e noi mai ia'u e mare aku iaia,
e ku okoa ana au iluna, a hele mailoko aku o ka rumi, me ka
hoolohe ole i kekahi huaolelo mai iaia mai, aka i wahi nae e
hoohilahila ole ia aku ai kela kanaka, ke noi aku nei au ia oe
e Mr. Kakona, e hoike mua aku oe iaia, i ko'u manao, i loaa
mua aku ka ike iaia, aole he wahi lihi iki iloko o'u nona."
"Alaila aole loa anei he wahi lihi makemake iloko ou no kela
kanaka e Miss Kaloke?"
"Aole o'u hoihoi iki iaia, elike me ko'u ike mau aku i kona
mau maka, pela ka pii mahuahua ae o ko'u hoowahawaha, a
ua hookahaha loa ia mai ko'u manao no ke kumu o kou make-
make ana iaia, a lawe mai i hoaloha nou."
"E hoomanao oe e Miss Kaloke, oia ko'u haku, nolaila aole
au i ike i kekahi kumu kupono ma ko'u aoao e hoowahawaha
aku ai iaia. Ke noho hana nei au malalo ona, a ua noho aie
au i kona lokomaikai no keia kulana a'u e paa nei."
"Owau no kekahi kaikamahine ilihune, aka nae aole no ko'u
ike iho i ko'u nele, a hoopilimeaai wale aku malalo o kekahi
mea, a'u no i ike ai i kona kupono ole e lilo i hoaloha no'u."
"Aole anei ou manao e Miss Kaloke, mamuli o kou kulana
nele, he kumu maikai loa ia nou e mare aku ai ia Pilipo Kuai-
na, a e lilo i wahine waiwai ma keia mua aku?"
"Ua lohe mua no oe i ko'u manao, pela e lilo ka hanohano,
ka waiwai ame ke dala, i kumu no'u e haawi aku ai ia'u iho i
wahine na kekahi kanaka, ke ole e haulehia au i ke aloha iaia.
Aole e lilo ka waiwai o Pilipo Kuaina i kumu no'u e mare
aku ai me ia, aole loa."
"Ke hoomanao i'o nei au i kou kamailio ana mai pela e
Miss Kaloke, aka nae, aole au i ike i kona mau ano maikai
ele, nana i hookomo mai i ka manao hoowahawaha iloko ou
nona. Ma ko'u kamaaina iaia, oia kekahi o na kanaka oiaio
maloko o kona puuwai, e haaheo ai ka wahine e lawe mai
ana iaia i kane nana."
"Ua oi loa aku ko'u makemake e mare i kekahi kanaka haa-
haa, mamua o ka mare ana aku me Pilipo, me ko'u nana ole
i kona mau waiwai."
"Alaila e ae ana anei oe e mare mai me a'u?" me ka hopu
okoa ana mai o Pilipo i kekahi lima o Kaloke, a nana mai la
hoi ma kona mau maka, no ka hakilo ana, ina e maliuia aku
ana kana noi."
"Aole e hiki ia'u ke haawi koke aku i ka'u pane e Mr. Ka-
Kakona no ka ua kukohana loa keia kumuhana au i hoala mai
la, iloko o ka manawa a'u i noonoo mua ole ai."
"Ke ike aku la au i ka pololei o kena mau hoakaka au e
Miss Kaloke, aole i'o keia he wahi kupono, no kou haawi ana
mai i ka ae," wahi a Pilipo, me ke kaomi malie ana iho i ka
lima o Kaloke ana e paa la. Aole i'o au e hoouluhua hou aku
ana ia oe ma keia wahi, no ka mea aia wale no a puliki mai
au ia oe iloko o kou poli, o ka wa maikai loa ia au e haawi
mai ai i kou ae."
"Pehea i maopopo ai ia oe, e ae aku ana au i kau noi?"
"No ka mea na kou helehelena i hoike okoa mai, aia iloko o
kou puuwai ke aloha kahi i lolii ai; a mamua o kou hoopuka
ana mai i hookahi, huaolelo no ke apono ana i ka'u noi, ua
heluhelu mua aku au i na mea apau iloko ou, me he buke ha-
mama la,
"Ua hele no anei oe iloko o ka hale meakanu i keia ahiahi?
Ua ike au i ka popohe o na pua rose, nolaila hele ae kaua ma-
loko o kela hale, i hookuku aku ai au ina paha ua oi ae ka
nani o kela mau mua rose, mamua o ka ula ohelohelo ma kou
mau papalina."
O ka pane a Kaloke no keia mau olelo hookaau a Pilipo, o
ia no ka noke ana ae i ka akaaka o ke ano hooha'i, me kona
ku okoa ana ae iluna, a hopu mai la i ka lima o Pilipo, a hele
aku la ke kuikuilima pu ana no ka hale e waiho ana o na pahu
rose ame na meakanu e ae. O na mea i hanaia maloko o kela
hale, hiki ole aku la i ka meakakau moolelo ke ike, aka nae
he hana ia i kuleana wale ai no o Miss Kaloke ame Pilipo Kua-
ina.
O ka mea oiaio nae e kuu makamaka heluhelu, aole i like
mai ka nani o na pua rose, me ka ula ohelohelo o na papalina
o Miss Kaloke, a ia laua i oili hou mai ai iwaho, ua hele na
papalina o ua kaikamahine nei a lamalama, o ia no oe o ka
hua ohi'a pala haama o ka uka.
"Aole au e hoi hou aku ana noloko o ka rumi hookipa i keia
ahiahi, aka e olelo aku oe ia papa, ua hoihoi pololei loa aku
nei no au noloko o ko'u rumi. No na mea i hooholoia mawa-
ena o kaua i keia po, mai hoike e aku oe i kuu makuakane ahiki
i ka la apopo, no ka mea ua makemake au, owau pu kekahi me
oe, ma kou manawa e noi aku ai iaia e lilo au i wahine mare | nau. Owau wale no ka i kamaaina i na ano apau o kuu makua-
kane, a ua ike au i ka nui o kona mahalo ia oe, no kou mau
ano maikai he nui ; aka nae hookahi wale no kumu nui o kona
makemake ana ia'u e mare me Pilipo, no ka waiwai o kela
kanaka; he mea hiki no nae ia ke hoololiia; ina na'u e kamai-
lio aku imua ona."
"Alaila ua paa loa no anei kou manao e mare mai ia'u, iloko-
o ko'u kulana nele a ilihune?"
"Ua paa kuu manao e mare aku ia oe me ka nana ole ae
i kou kulana."
"Heaha ke kumu nui o kou manao ana pela?"
"Hookahi no kumu nui, ua haulehia kahiko au i ke aloha
ia oe. O kuu aloha ia oe, ua oi ae ia mamua o ke gula ame
ka waiwai, aka e hoopau ko kaua kamailio ana, ke lohe nei
au i ka hele mai o kekahi mea."
Hakalia no a pau kela mau olelo a Kaloke i kamailio mai
ai, kulou mai la oia imua no ka honi ana ia Pilipo, a kaha
aku la hele, ma kekahi aoao o ka hale, e komo aku ai iloko,
no ka hoi pololei loa ana noloko o kona rumi.
He elua minuke mahope iho o kela, hala ana aku o Kaloke,
oili ana no o Kite, mamua o ke alo o Pilipo, aia hoi ka mino-
aka ma na papalina e ka wahine Paele. MOKUNA XIV, I kela hala ana mai hoi o Kaloke, a no ka piha loa e Pilipo
i ka olioli, komo mai la oia iloko o ka hale no ka huli ana ia
Matado, aole no ia he hana nui, ua loaa koke mai la no ua
hoaloha nei ona, e noho ana maloko o ka rumi hookipa, a o ia
kana o ke kamailio ana aku :
"Ke manao nei an, ua lawa loa keia mau pule elua, no ko
kaua hoao i ko kaua haawina laki; nolaila aole he hoohakalia
hou ana aku i koe. E hele aku oe e hui pu me Kenerala Ru-
dena maloko o ke keena heluhelu buke, a maloko olaila e noi
aku ai oe no ka lima o kana kaikamahine. Aia hoi a ka la
apopo, alaila hele aku au me ka paa pu ana aku ia Kaloke imua
o kona makuakane, a hoao aku i ko'u laki. Ina owau ka ka
makuakane e ae mai ana i kane na kana kaikamahine, alaila
e wehe koke no au i ke koloka hoonalonalo mai ia'u aku, a
ku aku imua o kona alo me ko'u ano oiaio loa."
"Heaha la hoi, ina pela kou manao ea, aole a'u mau ku-e
ana aku" wahi a Matado, me ka hooikaika ana e uumi i kona
manao hoonaukiuki, a hoowahawaha no ke kanaka ana i ma-
kemake loa al e hoolilo i pio nana. "E hooko i'o aku ana au
elike me kau kauoha e kuu hoaloha; aka no ka hoike koke
ana ae i kou ano oiaio, aole paha ia he hana maikai. Heaha
no hoi ka hewa, ke hoomanawanui kaua ahiki i ka la e hookoia
ai ka mare, alaila hoike ae i kou ano, he makana pookela loa
kela mamua o na makana e ae, au e haawi aku ai na Miss Ka-
loke."
"Aole he he manao pololei! Ua paa ka kaua aelike, e hoao
kaua ia Miss Kaloke me keia mau ano o kaua, a ina ua koho
mai oia ia'u, me kona ike no he kanaka ilihune au, ua lawa
ia; no kona koho ana mai, aole mamuli o ka waiwai, aka no
ke komohia ana o ke aloha iloko ona no'u, aole hoi i nana
aku ia oe, me ka nui o kou mau waiwai.
"E hoomanao pu iho oe, aole he mea maikai, ka hookomo
ana aku i ke kenerala iloko o ke kulana kaumaha, no kona ma-
nao mai, owau kekahi kanaka ilihune loa; nolaila ma ka la
apopo e ike ai oia i ko'u ano oiaio, aole au he kanaka ilihune,
elike me kana i nana mai ai, aka owau no ke keiki a kona
hoaloha kahiko."
"Mamua o ka hoea ana mai o ka la apopo, a mamua o ka
hora au i koho ai, no ka hoike ana aku i ka meahuna imua
o Kenerala Rudena, e make oe e pono ai," i namunamu liilii
wale iho ai no o Matado, me ka aaki ana o kona ku'i. "He
keu aku maoli no au a ke kanaka hawawa o ka hoopaneenee
ana a hala kekahi manawa loihi, me ka hookau ole aku i ka
make maluna o Pilipo ; pehea hoi e hiki ai ke alo ae, i ka nui
o ka'u mau hoolala ana, i na alahele e kaawale aku ai o Ke-
nerala Rudena ame Mine. Aohe nae he manawa hou aku e
kakali ai, ua hoea mai ka hora, no ka hoonee ana i ka'u papa-
hana imua."
No ka hele ana aku e hui me Kenerala Rudena, a e noi
aku i ka lima o Kaloke i wahine nana, ku ae la o Matado
iluna, a hele aku la noloko o ke keena heluhelu buke, oiai
hoi o Pilipo i haalele iho ai i kona noho, a hele aku la e hui pu
me Mine, me ke koi ana aku e hele laua i ka holoholo ma-
loko o ka hale o na meakanu, nolaila ua waiho malaelae ke
alahele no Matado e kamailio ai me ke kenerala, me ka hoo-
pilikia ole ia aku.
Hakalia no a noho pono iho o Matado iluna o kona noho,
a huli papu aku la hoi imua o Kenerala Rudena, ia wa oia i
hoomaka aku ai e kamailio i na olelo e pahele ana i ka noo-
noo o ke kanerela.
Ua hookahaha loa ia aku nae ka manao o Matado, no kona
ike ole aku i kekahi mau hoailona o ka hoihoi ame ka hialaai
ma ka aoao e Kenerala Rudena, aia no nae he mau kumu, no
kela ano mumule o ua kenerala nei, ae ike aku ana no" kaua
mahope ae nei.
O ke kumu nui o kela noho kukule o ke kenerala mamuli
no ia o ke emi mau mai o kona hoihoi no Matado, i kela ame
keia la, elike me ka loihi o ko lakou noho pu ana, me ka mao-
popo ole nae iaia o ke kumu oiaio; a o ka lua o ke kumu o
kona noho haka-nu, mamuli no ia o kekahi meahuna ana i ma-
nao ai, he oi ae ka pono, e ike o Pilipo ame Kaloke, i kona
kuleana maoli o kela kaikamahine.
Oiai nae ua noho pouliuli o Matado i na kumu oiaio loa o
ka haka-nu o Kenerala Rudena, hookahi hana pono ma kona
aoao, o ia ka haanui aku i kona aloha ame ka makee no Kaloke,
o kela wale no ka wahine hookahi ma ka honua holookoa
ana i aloha ai, a ke hooko ole ia mai ka iini a kona puuwai,
ua ahona kona make ana, mamua o ke ola hou ana aku, e
hoopihaia me na manao kaumaha.
No kekahi manawa loihi ka noho malie ana o ke Kenerala
e hoolohe i na olelo haanui a Matado no kona aloha ia Kaloke,
alaila aea ae la kona poo iluna me ka pane ana mai:
"Ina he moiwahine oia, aole o'u kanalua iki, no kou papahi
aku i na mea apau au e kamailio mai nei ia'u maluna ona. Ina
nae e loaa aku ana ka ike ia oe ma keia hope aku, he haahaa
maoli ke kulana o keia kaikamahine, ua nele loa oia i ka inoa
ame ke dala, aole ana anei, e mihi ana oe me ka walania loa
o ka naau no kona lilo ana i wahine nau?"
"Pehea la oe i ninau mai ai ia'u e kuu kenerala maikai i keia
mea? Aole anei, ua kapae ae au i kau kaikamahine hiapo,
kou hooilina, mai ke koho ana iaia i wahine na'u, me nana ole ae i kona wahine u'i ame ka nui o kona mau waiwai.
Heaha ka'u makee wale aku ia mea he waiwai, oiai ua nui ka
waiwai ia'u? Aole o ka waiwai ka'u nana aku ai, aole loa,
aka no ko'u haulehia ana i ke aloha no Kaloke, pela wale no au
e noi aku nei ia oe, e ae mai e lilo oia i wahine na'u.
"Elike me kona kulana nele i keia la, pela no au e apo aku
ai iaia, a puili mai iloko o kuu poli, he momi makamae na kuu
puuwai, a he malamalama olino hoi no kuu uhane" (Aole i pau.) | HE MOOLELO KAMAHAO
No Ko Geofere Lanakila Ana A I OLE
KE KEIKI MAKUA OLE I PALUA KA HANA
EPAIA. "Aole anei oia i noho ma Santa Fe nei no kekahi manawa"
wahi a Geofere i ninau aku ai.
"Aole o'u manao ua noho oia maanei, ke nana aku iaia me
he mea la mai kekahi aina mamao oia o ka hele ana mai, a
aohe no ona hele mau mai. Ua loaa mau keia manao ia'u mai
kekahi mai o ia o na aina eli gula ma kuaaina loa."
"A pehea, ua loaa mai no nae paha kekahi mau leka lehu-
lehu iaia ma o keia haleleka la?"
"Ae ; i kinohi ua loaa mai no, aka no ekolu a eha paha ma-
hina hope o elua a ekolu makahiki i hala aku aohe kii matt ia
mai a ua hala he manawa loihi mamua o ke kiiia ana mai o
kekahi mau leka ana. I ka manawa hope ana o ka hele ana
mai ua hoike mai oia ia'u e haalele loa ana oia i keia aupuni a e
hele aku ana no kekahi wahi mamao."
"Kupanaha maoli ka," wahi a Geofere o ka namunamu ana
iho, oiai oia e noho ana ilalo a e milikaa ana no hoi i ka apana
medala o ka haawiia ana mai iaia.
"Ina no hoi e hiki ana i nei wahi mea ke kamailio ae, o km
hoopokoleia ana no hoi ia o ka ka'u hana imi aku iaia," wahi
ana i noonoo iho ai.
"E oluolu ana anei oe e kuai mai i keia wahi apana medala
ia'u?" i ninau aku ai o Geofere mahope wale iho, ma ka huli
ana aku a nana i ka lunaleka mua i waiho i ka hana.
"O, aole, e ka malihini opio. Aohe o'u manao iki e hoolilo
aku i kena wahi mea i kekahi mea okoa ma ke kuai ; aka nae,
ina io o oe ke keiki a kela kanaka, elike me ia a'u i olelo mua
mai nei, nau ia, a he kuleana kou ia mea, a ke ae aku nei au
me ka manao maikai."
Haawi aku la o Geofere i kona mahalo i ke keonimana ele-
makule me ka naau i piha i ka hauoli no kona lokomaikai, no
ka haawi ana mai Ia ia wahi mea waiwai ole i kona manao,
koe wale no kona malama ia mea ma ke ano i mea hoomanao,
a no ka hoike ana mai hoi o ke keonimana i na haina apau
i uiiia aku iaia, alaila o ko Geofere ku koke ae la no ia iluna.
Mamua o kona kaha ana aku e hele hopu mua iho oia i ke-
kahi papale, o ka paa koke ana iho no ia i ka hanaia e Mrs.
Baraunu, a noi aku la ina e hiki ana iaia ke hana a paa i kekahi
nona a makaukau ma ka manawa ana e hoi hou mai ai i Santa
Fe.
Ua pane mai la ka wahine e makaukau ana ia papale ma-
mua o kona huli hoi ana mai, a mamuli o ka Geofere ninau
ana aku no ke kumukuai ua hoike mai kela wahine.
O ko Geofere kiola iho Ia no ia i kekahi hapalua kini i ka
lima o ka wahine, me ka olelo pu ana iho, o ke koena aku, ke
lawe ae oia i ke dala no ka papale, e paa no oia ia koena ahiki
i kona hoi hou ana mai, a ina no hoi no kona hoi ole mai ma-
hope o ka hala ana o na pule eono, e lawe no oia ia mau dala
koena aku a pau nana.
Aohe ona manao e hoi hou mai ana oia ia hale a i ke kula-
nakauhale hoi o Santa Fe; no ka hookipa maikai ana o keia
mau mea iaia, a no ka loaa ana mai o kekahi mau pane no
kana mau ninau lehulehu mai ke keonimana mai, ua loaa iaia
ka manao e panai aku i ka maikai ma kona aoao no ka maikai
i hanaia mai nona, no ia kumu o ke koena aku o ke dala ana i
haawi ai no ka papale o kana makana ia laua, no ka mea, ua
manao iho oia ua oi loa aku ka maikai i hanaia mai iaia mamua
o kana i haawi aku ai.
Iaia i haalele iho ai ia hale ua pilihua loa kona noonoo no
ka loaa ole ana o kekahi ike maopopo iaia no kahi e loaa aku al
o kona makuakane, ka hana nui hoi ana e hele ana e huli, a
ua hiki ole iaia ke hoomama i kona noonoo no ka hiki ole ana
i ka lunaleka elemakule ke hoomanao i ka inoa piha o kona
makuakane, oiai he mea ano nui a waiwai loa ia i kona noonoo.
No kahi apana medala i haawiia mai la iaia aohe mea hiki
ia wahi mea ke hooiaio mai, eia nae, me ia ike no ona i ka
waiwai ole ua hookomo iho la no iloko o kekahi o kona mau
pakeke, me ka lilo o ia mea i mea hoomanao nana, pela ka
paa o kona manao, malia e lilo ana ia i wahi mea hoike no
kena makuakane ma ia mua aku.
Iloko 6 na la waena, o ka hapalua like o ka mahina o Sepa-
temaba, i hoea hou ae ai oia i Saratoga, kahi i loaa aku ai o
Mr. ame Mrs. Hunatere, kona mau makua hanai ame Gelade,
iaia e kakali nui mai ana no o kona hoi aku, me ko lakou hele
a uluhua me ka haohao pu no kana wahi o ka hele ana, ia
hoi ana aku ana me ke ola maikai ua hoopihaia aku Iakou
apau me ka hauoli. Ua noho loihi loa lakou ma kela wahi a
oi aku mamua o ka manawa a lakou i manao mua ai, a e ka-
kali wale mai ana no lakou o ko Geofere hoi aku alaila lakou
hoi no Burukeline, Nu Ioka ma ka la iwakalua o ia mahina.
He mea mau i na mea apau i kaawale no kekahi wahi ma-
mao no kekahi mau la loihi, ke hoi hou aku i ko lakou home
me na ola maikai, e hoopihaia iho ana no ka naau i ka hauoli,
pela no me keia ohana Hunatere.
Ia lakou i hoea aku ai i ka hale, a ua hala he mau la ma ia
hope mai, hoike aku la o Geofere i ka hoaloha ona, wahi ana
ia Mr. Hunatere, no ka waiwai ole o kana huakai o ka hele
ana e huli i kekahi mau ike i mea e loaa ai kona makuakane
iaia, a i ole kona wahi paha e noho mai ana ia manawa, koe
wale no na mea i hoikeia mai ai iaia e Keaka Henele.
I ka lohe ana aku o Mr. Hunatere i kana moolelo mai ka
mua a ka hope, alaila kau mai la oia i kona lima maluna o ka
poohiwi o Geofere a i mai la:
"No kou pono, e Geofere, ke kaumaha nei au, a no ka mea,
ua ike au i ka hoouluhua nui, ia o kou noonoo maluna o ke
kumuhana e pili ana i kou mau makua ; aka nae, ma ko'u aoao
e kuu keiki, a e manaoio mai oe i keia, ua maha mau kuu noo-
noo a no ka mea, ua kuokoa mau au no'u iho a ua hiki hoi ia'u
e hoike ae he wahi manao lili iki eia iloko o'u no kekahi ka-
naka e olelo mai ana he keiki oe nana a e pani mai hoi oia ma
kahi o kekahi makuakane i aloha aku ia oe me ka naau oiaio
apau.
"Ua maopopo ia oe ua nui kuu aloha nou, a ua nana aku
no hoi au ia oe ma ke ano na'u ponoi oe; o ka manao ana mai
o kekahi kanaka e kii mai ia oe a kaili aku i kou aloha he mea
hoehaeha mai ia i kuu noonoo."
He mau olelo maikai wale no keia i ko Geofere noonoo,
aka nae, ua maopopo iaia aohe mea hoonana mai i kona luna-
ikehala ahiki i ka loaa ana o ka ike iaia e pili ana i ka mea
huna pohihihi holookoa e pili ana i kona mau makua; ua hoo- | |
