Ka Nupepa Kuokoa, Volume LXIII, Number 41, 9 October 1924 — Page 4

EHA NUPEPA KUOKOA, HONOLULU, T. H., POAHA. OKATOBA, 9. 1924.


	e kuu hoaloha," wahi a Pilipo me ka ninini ana iho i ka rama iloko o kekahi kiaha uuku, a haawi mai la ia Matado; me ka loaa ole he wahi haili iloko ona, aole keia, he hoaloha nona e noho aku ana, aka oia kekahi o na kanaka ino loa, he moo nahesa, i kahikoia iloko o ka hulu hipa. Aohe makemake o Matado i ka barani, aole no o ka rama ka mea nana e hoihoi hou mai i kona mau ano maikai; aka nae he kanaka oia i piha me ka maalea, nolaila hookahi hana pono ma kona aoao, o ia ka hooma'ima'i ana, i ole ai e komo aku na manao hoohuoi iloko o Pilipo, no ke kumu oiaio loa 0 ka haikea ana o kona helehelena. Lalau aku la ua o Matado i ke kiaha barani, a inu ae la me ka malie, e ike mai ai o Pilipo, ua loaa i'o oia i kekahi ma'i, a laia i hoihoi hou aku ai i ke kiaha ia Pilipo, hamohamo ae la na lima ma kona lae, no kona piha me na manao kuaki, no ka loaa koke ole ae iaia o kekahi alahele maalahi loa, e kaa- wale aku ai o Pilipo mai iaia aku ma ka make. No kekahi mau minuke kela noonoo ana a Matado, a i ka maopopo ana iaia o kana mea e hana aku ai, akahi no a noho mai iluna, haule iho la na lima ma kona aoao, a pane mai la : "Me ka mahalo a nui ia oe e Pilipo; he keu maoli no a ka nui o kou makee no ko'u pono, o kou mau ano no nae ia a'u i ike ai. Ua hookahaha loa ia mai au, no ke kumu o ko'u ano e ana i keia po, ua pau aku la nae kela ano, a ua maikai au i keia manawa, a ua hiki ia kaua ke kamailio me ka hopohopo ole no kekahi pilikia. Heaha la hoi kau mea i kamailio mua mai "nei, ahiki i ka loli ano e ana ae o ko'u helehelena?" "E pili ana hoi no Kaloke ame ko'u manao, e hoike ae i keia hana kolohe a kaua. He keu aku a ka mea hookahaha, ke loaa aku ka ike i kela kaikamahine i kona haawi ana mai i kona puuwai i kekahi kanaka waiwai, aole hoi i kekahi kana- ka ilihune, elike me kana i nana mai ai ia'u." "Mai pupuahulu loa oe e Pilipo, ma ka hoohihi ana i kela kaikamahine, o hoea mai auanei ka Ia au e mihi ai me ka wa- lania loa. Ua ike no oe e Pilipo, aia wale no mahina ou ko'u noonoo ana i na manawa apau, a no ka hoopakele ana ae ia oe mailoko mai o kekahi hana kuhihewa, e nonoi aku ana au i kou oluolu e hoolohe iki mai i ka'u mea i ike ai, a i ma- naoio ai no Miss Rudena. "He kaikamahine huapala i'o o Miss. Rudena, aole a kaua hoopaapaa ma ia mea, aia iloko o kela kaikamahine ka manao- paa e loaa iaia kekahi mea ana i iini nui ai, aole loa e moe ana kona noonoo ahiki i ka hookoia ana o kona makemake, aka nae elike me ke ano o na pua rose, ka mae wale o ko lakou nani, a helelei ko lakou lau, me ke ku ole i ka hoihoi ke nana aku, pela iho la kela kaikamahine e pakuwa ai i kana mea e hoohihi ai. "Mai kahamaha mai oe i ka'u, mau mea e kamailio aku nei no kou pono e Pilipo, koe wale no kou hoolohe ana mai i na a'o ana aku a kou hoaloha nei, e uwalo aku ana no ka hoopa- kele ana ae ia oe mailoko mai o kekahi hana kuhihewa. "Malia paha ua kuhihewa ka'u mau mea i koho ai no Miss Rudena ame kona mau ano; aka nae mamua o kou hooko ana aku i kou manaopaa e lawe mai iaia i wahine mare nau, o ka'u noi hope wale no ia oe, e hoao aku oe, no ka hooia ana i ka pololei a i ole no ka lalau paha o keia mau mea a'u e hoakaka aku nei. "Auhea nae oe e Pilipo kuu hoaloha, no kekahi mau kumu a'u i maopopo mua ole ai, ua paa mua ka manao o Kenerala Rudena, e haawi mai i kana kaikamahine elua, aole i ka hoo- ilina o kona mau waiwai, aka i kona muli mai, i wahine ma- re na'u. O keia ka mea oiaio loa a'u e hoike aku nei ia oe, oiai ua kamailio okoa mai nei ke kenerala ia'u no ia mea i keia po." "Pela i'o anei ka mea pololei?" wahi a Pilipo me ka piha loa i ke kahaha. "O keia ka mea oiaio loa i lohe oe e Pilipo. Nolaila ina he kaikamahine loli wale o ka noonoo kela kaikamahine au e hoo- hihi nei, a ua paa kona manao e hooko aku ma na mea a kona makuakane e hana ai, alaila owau auanei kana e koho mai ai i kane nana, aole o Keoki Kakona." "Ma ia wahi o kau mau mea e kamailio mai nei, aole o'u wahi manaoio iki. O Miss Rudena kekahi o na kaikamahine hiki ole ke hoohulihuliia kona manaopaa, ma kana mau mea e koho ai. Pehea na hoao ana a kona makuakane e hoohuli- huli i kona noonoo, aole loa ia he. kumu nona e puni wale aku ai. ina no e waihoia aku ana ka waiwai, ka hanohano ame na mea nani apau o ka honua nei imua o kona alo." "I mea e maopopo ai, owai la o kaua ka i pololei hookahi wale no alahele e hoopauia ai ko kaua pohihihi, o ia no ka ho- ao ana aku iaia, mamua o kou hoike ana ae i kou mau ano oiaio imua ona ame kona makuakane. Ke ae mai oe i keia manao o'u. alaila e loaa auanei ia'u he manawa e hakilo pono loa ai no ke kaikamahine hiapo a Kenerala Rudena, a'u no e manao- io nei, oia o laua ka i makaukau loa e haawi mai i kona puu- wai ia oe. me ka nana ole ae i kou kulana haahaa. "No'u iho nae ea, o kela ka'u kaikamahine i haulehia ai i ke aloha!" "He keu aku maoli ka keia a kekahi o na mea ano nui loa, ko kana haulehia like ana i ke aloha me na kaikamahine elua a Kenerala Rudena," wahi a Pilipo me ka hopu ana mai i na limi o Matado, a puliki iha Ia. "Aole he mea hoohauoli nui mai i kuu uhane, koe wale r. o ka ike aku, e lilo mai kela kai- kamahine i wahine mare nau; a e lilo aku ai o oe kekahi o na kanaka waiwai a hanohano, ma ka mare ana me ka hooilina o Pinelana nei." Hopu wale aku la no o Matado ma ka poohiwi o Pilipo, me ka hookuoo o kona mau ano, alaila pane aku la: "Aole o'u makemake e kamailio mai oe no ka waiwai o Miss Rudena, aole no ka waiwai ka'u mea e nana aku nei, aka no ka u'i ame ka nohea o ka helehelena o kela kaikamahine. Ina no aole he keneka malalo o ka malu o kela kaikamahine, e hoao ana au ma na ano apau, i wahi nona e lilo mai ai ia'u, o ka mea nui hookahi wale no a'u e kauka'i aku nei, o ia kona haawi mai i kona puuwai ia'u, a ke hui na puuwai o maua i kahi hookahi, e loaa auanei ia maua pakahi ka hauoli i'o, aole hoi elike me ka poe i kauka'i wale aku no maluna o ka wai- wai. "Ina e hooko koke aku ana oe e Pilipo i na mea au e manao nei, o ia ka hoike ana ae i ko kaua mau ano oiaio maoli, e haule pa-hu ana ko'u mau manaolana apau, no kela kaika- mahine. Me keia ano a'u e hookohukohu nei, o Pilipo au, a o Keoki Kakona oe, e hiki auanei ia'u ke pili mau aku ma ka aoao o ka. hooilina o Pinelana nei, a e pahele aku i kona mau noonoo ahiki i kona haulehia maoli ana i ke aloha no'u: a ina e ike ae ana oia i ko'u ano oiaio mahope mai, a kapae ae oia ia'u ma kula, no ka haahaa paha o ko'u kulana, alaila e hoo- pakeleia ae ana au. mai kekahi hana pupuahulu ae; aka ina i keia manawa koke no oe. e wehe ae ai i ka huluhipa a'u e kahiko nei, a ahuwale ae ko'u ano ka, e pepehi aku ana oe i ka manaolana iloko o kela kaikamahine, no ke kupu ae o ke aloha oiaio iloko o kona puuwai no'u. He mea maamau keia i na wahine apau, me ke akahele wale no oe e hana ai, aole me	ka pupuahulu, o ala mai auanei ka hoowahawaha o na wahine, aohe mea hiki ke hoomalielie aku e na ai!" "Ke ike i'o aku la au i ka maikai o na kumu au e hoakaka mai la, no ka pilikia e hoea mai ana, ke hoike koke ae au i kp kaua mau ano," wahi a Pilipo me ka nana pono aku o kona mau maka, i ke kapuahi hoopumehana, me ka owiliwili ana hoi i kona umiumi. "He mea oiaio, o kou hoi ana iho, he mau anuu ilalo o ke alapii, e loli hikiwawe ae ai kou kulana, mai ke kanaka ona- miliona mai, a i kekahi kanaka ilihune, ka mea a kona ma- kuakane, i makemake ole ai i kane nana; he kaola nui kela e alai ae ana mamua, o ke alahele e komohia aku ai ke aloha iloko ona nou. Aia he like ole nui mawaena o Kaloke Rudena ame Mine Rudena. Ina o keia ka mea nana i hoopilikia loa aku i kou noonoo ea, alaila ke ae aku nei au i kou manao e hoopanee i ka hoike ana ae i ko kaua mau ano, a no kekahi manawa kupono okoa aku." Ua hoopiha Ioa ia aku o Matado me ka hauoli, no ke holo- pono loa o kana mau mea o ka hoolala ana, aole nae oia i hoi- keike wale ae ia hauoli ona ma kona helehelena, aka ke noho hamau loa la oia no kekahi mau minuke, aka nae i wahi no Pilipo e hoohuoi ole aku ai i ke kumu o kona noho kukule, kamailio mai la i ka pane ana mai: "He keu aku maoli no a kou oluolu e Pilipo, mamuli o ka maliu ana mai la i ka lea uwalo o kou hoaloha nei. Hookahi no nae kumu nui o ko'u uwalo ana aku nei imua ou, e hoo- manawanui iki, i ka hoike ana ae i ko kaua mau ano maoli a loaa he manawa kupono, mamuli no ia o ka maopopo ana ia'u, e pomaikai like ana kaua ma ia mea. Auhea oe e kuu Pilipo, ke hoomanao nei no anei oe i ka'u mea i kamailio mua aku nei , he mau minuke helu wale ae nei no i hala, no ka hoao ana aku ia Miss Kaloke, i wahi nou e ike pono ai i kona mau ano oiaio maoli? "Aole a'u mau hoahewa wale ana aku maluna ou, no ka hoohihi o kou manao i kela kaikamahine, elike no hoi me ko'u hoohihi ia Mine. O ke kanaka e hiki ana ke kaili mai i ka puuwai o kela kaikamahine, oia kekahi o na kanaka laki loa, nolaila e ae mai oe i keia manao o'u, i loaa ai ka ike ia kaua, no ka oiaio a no ka hoopalaimaka wale no paha o keia mau kai- kamahine a elua. Aia wale no oe a maliu mai e Pilipo i keia manao o'u, alaila kokua aku au i kela manao mua, e hooma- nawanui iki i ka hua'i ana ae i ko kaua mau ano i ke akea; ina aole pela, alaila e hoike koke aku oe i na ano o kaua ma ka la apopo." He mau olelo pahele wale no keia a Matado e kamailio aku nei, i wahi e manaoio mai ai o Pilipo, pela maoli ka ma- nao iloko ona. he oiaio ua puni loa o Pilipo i kela mau olelo a Matado, me ka i ana mai:. "Ke apono aku nei au i kau mau mea apau i manao ai," wahi a Pilipo me ka noke okoa ana ae i ka akaaka. "Pehea ke ano ame ka nui o na hana hoao au i makemake ai, i wahi e ikeia ae ai ke ano oiaio loa o Miss Kaloke, ke paa nei ko'u manao, aole ia he mea e loli ae ai o kela kaikamahine mai kona mau ano mai a'u i ike ai nona. He mea makehewa wale no ka hoonuinui olelo hou ana aku mahina o keia kumuhana, aka e hoike koke mai oe i ke ano o ka hana hoao au i manao ai!" "He nani hoi ia ua apono oe e Pilipo i ka'u mau mea apau i manao ai, nolaila eia ka hana hoao a'u i hoolala ai no kela kaikamahine. Ke hoomanao "nei no oe i kuu hoike mua ana aku nei ia oe, no ka makemake o ka makuakane o Miss Ka- loke, e mare kana kaikamahine, me ke keikikane a kona ho- aloha kahiko, a ua paa loa kona manao, e hooko mai ana kana kaikamahine i ka makemake o kona makuakane, me ka nana ole ae, ina he poe okoa aku kekahi e noi mai ana iaia e mare aku me kekahi o lakou. "Penei ka'u i manao ai, e noi like kaua i kela kaikamahine, i wahine na kaua, owai la kana e. koho mai ai, o oe paha, a i ole owau paha. E ku mau no oe ma kou ano he kanaka nele i Ue dala, ka waiwai ame ka hanohano, a pela no hoi au e ku ai ma ko'u ano hookohukohu, owau kekahi o na kanaka wai- wai loa ma ka honua nei. Imua ponoi o Kaloke oe e noi aku ai iaia i wahine nau, a imua hoi o kona makuakane au e noi aku ai i ka lima o kana kaikamahine; alaila kakali aku kaua i ka mea a kela kaikamahine e hana mai ai, e ae mai ana palia i kau noi, a i ole, o ka makemake paha o kona makuakane kana e hooko mai ana." "Heaha la hoi. ina o kou manao ia ea, aohe a'u mea e ku-e aku ai ; aka i hoike mua aku no nae au i ko'u manao imua ou, pehea ka nui o ka waiwai, ke dala ame ka hanohano, aole ia he kumu, e loli ai ka manao o kela kaikamahine, ma kana mea i koho ai, no ke ano o kana, kane e mare aku ai,'' wahi a Pilipo, me ka paa loa o kona manaoino ke eo iaia, elike mo kana mea i hoomaopopo ai no Kaloke ma keia po. "Ke hele loa aku nei keia i ke aumoe e Pilipo, ua lawa paha keia kamailio pu ana o kaua," wahi a Matado me kona ku ana ae iluna. "Alaila ua paa keia aelike a kaua ea?" "Ae, ua paa ia aohe mea nana e hoololi ae," i pane aku ai o Pilipo, me ka haawi ana aku i kona lima no ke aloha ana, haawi ae la ke aloha poeleele, me ka pane ana mai nae o Ma- tado: "Mai hookahaha i kou manao e Pilipo, ke lohe oe mai ia. Miss Rudena mai, no ko'u noi ana aku iaia i wahine na'u; a i ole, no ke koi ana aku paha o kona makuakane iaia owau kana kane e mare ai." "Heaha auanei hoi ke kumu e hookahahaia ai ka manao, oiai ua maopopo mua ia kaua pakahi, ka kaua hana hoao i ke ano o kela kaikamahine ! E hoao oe e kuu hoaloha i kou laki, a ke ike oe i kou lanakila maluha o kau mau hoao ana, e hoololi hou ole ae ai kekahi o kela mau kaikamahine i ko laua manao mahope aku, alaila o ko kaua manawa ia e wehe ae ai i ke koloka hoonalonalo, a hua'i ae i ko kaua mau ano oiaio maoli." O ka Matado pane no keia mau olelo a Pilipo, o ia no ka haawi ana mai i kona minoaka, e hoike mai ana, no kona piha Ioa i ka hauoli, o ka lululima ae la no ia o na hoaloha, a huli hoi aku la o Matado noloko o kona rumi. Ma kela huli hoi ana aku a Matado no kona rumi, hele aku la oia a kaawale mai ia Pilipo aku, alaila huli mai la ihope, me ka hoopuka ana ae i keia mau olelo o ka piha lokoino: "Auhea oe e Pilipo, aole e hoea mai" ana i ka la au e ike ai i ka mea oiaio, mahope iho o ko ae ana mai, e mau no ko kaua ikeia ana mai ma ko kaua mau ano hoonalonalo; a aole loa oe e ola ana a ike mai, i ko'u kiola ana ae i keia mau ka- hiko a'u e komo nei ma kou makalua: He keu aku oe a ke kanaka hupo haalele, i ka puni wale mai no i ka'u mau mea apau e waiho aku ana imua ou. "Ina e mau aku ana ke ola iloko ou no hookahi mahina mai keia la aku, mamuli wale no ia o na ulia pomaikai. Aia oe a hoi aku maluna o kou wahi moe, no ka hiamoe ana, aole loa oe e puoho hou mai ana no ka nana ana i ka malamalama o ka la ; a e ike mai auanei oe e kuu hoaloha mailoko mai o ka aina moeuhane, e noho aku ana o Matado, he haku a he hoilina maluna o kou mau waiwai apau, a he kane hoi na Kaloke." (Aole i pau.)

HOEA NA PAILAKA AMERI-
KA I KA PAHUHOPU

SAND POINT AVIATION FIELD, Seattle. Sept. 28.—O na kanaka Amerika lele i ka lewa i hoomaka mai ai ka lelo ana mai lugene, Aregona mai, ma ka hora 10:02 o keia kakahiaka, ua kuu iho i ka honua ma Venekouva, Wash., ma ka hora 11:15, no ka hana ana e pau ai kekahi pilikia o ka enekini o ka mokuea a ka Lutanela Wade, a i ka paa ana ua hoomau, mai la i ka lele ana a hoea ianei ma ka hora 1:36 o keia auwina la, ke kahua i hoomaka aku ai ka lele ana no ke kaapuni ana i ke ao ma ka lewa ma ka la 6 o Aperila ma ka hora 8 o ke kakahiaka. O Smith ka Mua i Kuu Iho ai

O ka Lutanela Lowell R. Smith, ke aliikoa nana e hoomalu ana i ka huakai ma ka lewa ka i kuu mua iho, ua kuu kona mikini iluna o ka honua ma ka hora 1:40 p.m., no ka Lutanela Wade ua ku kona mikini iluna o ka honua ma ka hora 1:37, a no ko Lutanela Nelson hoi, ua kuu iho kona mikini ma ka hora 1:38. Ua hoea mai na mokuea maluna ae o ke kahua San Point mahope iki iho o ka hora ekahi, a mahope o ka lele kaapuni ana ae maluna o ka Moanawai Washington no kekahi manawa me ka haawi aku o na kaukani o na kanaka i na leo huro e hoopuni ana i ke kahua o na mokuea, i kuu iho ai na mokuea apau i ka honua. O ka makuahine ame ke kaikuahine o ka Lutanela Leslie P. Arnold, ka mikanika maka'u ole a ka Lutanela Smith i ka manawa i kuu iho ai o ka mokuea i ka honua, ua holo koke aku Ia laua e haawe i ke aloha me ka piha hauoli iaia no kona hoi ola ana mai.

O ka Major Frederick L. Martin, pailaka o ka mokuea lawehae i poino ai, ke aliikoa mua nana e hoomalu na mokuea Amerika kaapuni honua, a nona hoi ka mokuea i nahaha ai ma kekahi piko kiekie o kekahi mauna ma Alaska, oiai ke kuahiwi e uhipaaia aoa e ka noe, kekahi o na kanaka mua loa i hele mai haawi i kona aloha ma ka lululima ana me ka Lutanela Smith, Hoopuniia o Smith e na Kanaka

Hakalia no ia Smith a lele mai iwaho mailuna mai o ka pahu o ka, mokuea Nu Olina, ua hoopuni koke ia mai oia e na kanaka i makemake e lohe i kekahi haiolelo mai iaia aku, a ua haiolelo aku no oia me ka pokole loa.

O na hana hookipa a ka lehulehu no keia mau kanaka i hoolalaia ai e ke komite ua hoohaikiia mai a ma na lululima aloha wale no, a mahope iho maluna o kekahi moku i malamaia ai kekahi papaaina no ka hoohauoli ana i na kanaka lele i ka lewa me ka holopono loa.

Mai ko lakou hoomaka ana e lele aku ma ka huakai kaapuni honua ma ka lewa mai Santa Monica, Ka-leponi aka 195 i kaawale aku ai Iakou ahiki i ka hehi hou ana i ka lepo o Santa Monica. He 57 mau manawa a lakou i kuu iho ai ma na wahi like ole a he 483 mile ke kowa ma ka Averike ana o kela ame keia wahi a lakou i lele aku ai. He 21,000 mau galani gasoline i pau me 351. mau ora ka mauawa o ka lele ana.

Iloko o keia man la loihi o ka lele ana a maluna ae hoi o na wahi anu loa a me a wahi wela loa, e alaiia mai ana omua e ka noe uhipaa a powehiwehi ka ike ena aku ia mua, pilikia no hoi na mikini i kekahi manawa a no kekahi mau la e hana ai ahiki i ka paa ana, a i kekahi manawa mai kekahi wahi mamao loa mai e laweia mai ai kekahi mau mea no ka hoopau ana ae i ka pilikia o ka mikini, eia nae, i ka manawa hope loa, ua hoea ae la na kanaka Amerika kaapuni honua ma ka lewa i ko lakou pahu-hopu me ka palekana o ko lakou mau ola kino, a he hana hoi i hanaia e haaheo ai ka lahui Amerika, no ka mea, o keia ka mua loa o ka manawa i hoaoia ai e kaapuni i ka honua ma ka lewa a ikeia ka holopono.

OTTAWA, Can., Sept. 28.—He hoomalu no ka ma'i ka i kauia aku maluna o na holoholona bibi apau i laweia mai Texas mai, ame kekahi mau mokuaina waena ma ka hapa komohana, mamuli o ka puka ana ae o ka ma'i maiwaena ae o na holoholona ma kahi kokoke i Houston, Texas, ua hoolahaia ae ia hookapu ana i keia Ia.

HE PUOLO WAIMAKA KO KUU
KEIKI HELELOA, HARRY
K. KAIEPA.

Mr. Solomon Hanohano, Lunahooponopono o ka ahailono a ka lehu-

lehu;—E oluolu mai hoi oe i kekahi rumi kaawale no ka makou hiwahiwa aloha a ka lahui a nana hoi ia e ahai aku ma na kihi eha o ka aina aloha nei o Hawaii mai ka puka ana o ka la roa Haehae a ia welona a ka la i ka mole olu o Lehua, i ike mai ai na ohana ame na hoaloha o kuu keiki heleloa, ua haalele mai kuu keiki Harry Kahalewai Kaiepa, i keia ola honua ana i ka hora 9 p. m., o ka la 14 o Sept. 1924.

Ua haalele mai oia i kona makua-
hine aloha ma kahi o ka aoao o kona
mee ame au hoi kona Aunty aloha,

Mrs. Annie Pila, a upoi iho la na

maka a kuu ka luhi pau ka ike ana i ka ehaeha. Auwe no hoi kuu keiki aloha o kuu keiki aloha i haalele mai ia makou! Ua piha iaia

i he 20 a oi makahiki, i keia mahina Sept. 29, 1924, he maa pule keu

I wale no i koe a piha pono iaia na makahiki he 21 a haalele mai no hoi oia i keia ola ana. Aloha no kuu keiki hoomanawanui i keia ao maewaewa aka e hoi ka lepo i ka lepo a o ka uhane me ka mea i kuleana ia mea. Hoonani mau loa ia ka inoa o ka Haku, ke Keiki ka Uhane Hemolele, Amene.

Ua hanau mai kuu keiki aloha mai ka puhaka mai o kona makuahine Koleka, ame Kahalewai kona papa i ka makahiki 1903 o Sept. 29, ma Iwilei, Oahu, a iaia i haalele iho la ia'u i kona ua haalele pu iho Ia oia i kona kaikaina Oliva Kahalewai ame kona makuahine aloha. Ua kaama'i kuu keiki no aneane he ehiku mahina a haalele wale mai la ia'u.

Kuu. keiki puuwai hamama, kuu keiki heahea e hookipa ana i na poe apau mai ka liilii a ka nui; kuu keiki maemae, kuu keiki hoo-

maiau i ka noho ana o ka home. Auwe kuu keiki heleloa i ke ala au e hiki ole aku ai ke ike, aloha ino! Kuu keiki kuu milimili kuu lei poino ole. He mea nui no oia ia maua kona Aunty ame kona Unele, o na mea ana e makemake ai ua hooko no maua a ua hoolilo no hoi oia ia maua kehu mea he makua ponoi, nona. Ua noho ia o Kalihi maua me kuu keiki no hookahi makahiki me eono mahina a haalele wale mai la kuu keiki ia makou. Ua aloha no hoi ka noho ana o Kalihi. I kuu keiki na hoi kamaaina au ia Kalihi nei.

E Waikoae e pau kou hoopulu hou ana i ka ili lahilahi o kuu keiki. Ua auau ia ia wai e kuu keiki aloha. Ua holo kaapuni ia Oahu e kuu keiki. E Honolulu e, kahi a kuu keiki i hale ai i ka po me ke ao, i kia ua me ka la! Aloha no o Honolulu ke kaona nui kahi a kuu keiki i hele ai, ua puni o Honolulu i kuu keiki i ka heleia.

Ua hoonaauaoia kuu keiki i ke kula o Kamehameha no eha maka-hiki a waiho aku oia i ke kula me ka maikai i ka hemo ana mai hoomaka oia e hele i ka hana poola; i ka

pau ana no nae o kona hana ana. i ka hana poola ua loaa aku la kana hana mawaho o Waikiki iluna o ke kao eliawa.

He keiki makaala i ka hana; e hele ana oia i ka hana i ka po me ke ao a na ka ma'i i hookaawale mai iaia mai ka hana mai, a haalele pu mai la no hoi aia ia makou ka ohana. Aloha no ka hoomanawanui ana i ka ehaeha!

Auwe menemene wale au i kuu keiki ka hoomanao, ae! auwe no hoi kuu aloha pauole i kuu keiki e! Aole no au e poina i kana mau hana maikai a peia no hoi me kana mau olelo i ku i ke aloha ahiki ole iho ia'u ke paa i ko'u waimaka. Aloha no o Leahi ka home a kuu

keiki i noho ai, e hoomanawanui
ana ka makua i ka po me ke ao.
Nolaila ke hoomaikai loa nei au

i ka Makua Lani, a peia no hoi

au hoomaikai nei i na poe apau i malama i kuu keiki maloko o Leahi, a peia no hoi au e haawi nei i ko'u mahalo a nui Ioa i na poe apau i lawe mai i ka lakou mau bo-ke pua ame na lei i mea hoohiwahiwa no kuu keiki heleloa a peia no hoi au e hoomaikai loa nei ia Bokuwiki i kona maIama maikai ana i ke kino wailua o kuu keiki aloha, aloha pauole, a ke mahalo piha loa nei au i ka Hui Lunalilo

i kona hele ana mai e ku kiai i ke kino wailua o kuu keiki aloha ame ko lakou hele pu ana, a peia Hoi me ko lakou hoomaikai ana i kuu keiki aloha. Kuu mahalo piha kuu mahalo pauole me oukou apau loa, a peia no hoi me ka Ekalesia- Kakolika ko'u mahalo piha a hoonani mau loa aku no au i ka inoa o ka Makua ke Keiki ka Uhane Hemolele Amene. A ma kona home mau loa

e hoomaha ai no ka wa mau loa o Kuu keiki i haalele mai ia makou. Ua uhai aku no oia i ka meheu o kona makuakane aloha. Ua hoomoe ia kuu keiki aloha maloko o ka ilina o Koula i ka hora 4 p. m.. Sept. 16, 1924, pau ua nalo no ka wa man loa, na ke Akua e hoomama i kuu naau luuluu a kaumaha.

Ke hooki nei au me ka waimaka
a maluna ou ka Lunahooponopono

me na keiki papapa'i ko'u welina
hope loa.

Owau iho no me ka luuluu,

MRS. ANNIE PILA,
LAI PILA,
MRS. K. KEALOHA,
PETER KEALOHA,

Me ka Ohana

HOOLAHA KUAI O KA LAIKINI
E OHI HUA KIAWE.

Ma keia ke haawiia aku nei ka hoolaha akea ma ka hora 10:00, a. m., Poaono, Okatoba 25, 1924, ma ke Keena o ka Hope-akena, Mr. F. K. Kalua. Wailuku, Maui, malaila e kuai hoolilo ia aku ai ma ke ku

dala akea i ka mea koho kiekie loa malolo o na manao o ka Pauku 73 o ke Kanawai Kumu o Hawaii, na Pauku 348 ame 358 o ua Kanawai Hooponopono Hou ia o Hawaii o .1915 ame ke Kanawai 143 o na Kanawai Ahaolelo o 1917, he laikini no ka pono e hele maluna, e ohi a e lawe i na hua kiawe ma na aina aupuni i hookoeia makai o na nina hookuonoono makai o Waiakoa, Ku-la Maui, nona ka iliaina o 43.48 eka, oi aku a emi mai paha.

E komo maloko o ka laikini e
hoopukaia aku ana mamuli o keia
kuai na kulana e hoakaka ana elike
me ia mahope ae nei:
Aole i haawiia ka mana ma ka
laikini a pono paha mawaho ae
o ka ae ana i ka mea e lilo
ai a i ole kona akena paha e
hele maluna o ka aina i oleloia
e ohi a e lawe i na hua kiawe,
o ua pono la nae, e hoohanaia
ma ko ano e hoopilikia ole aku
ai me ka hele ana o ka lehu-
lehu i na manawa apau no ka
a'e ana ma ka aina i oleloia
no kahakai.

2. Ke hookoe nei ke Teritore i ke kuleana e lawe ma kekahi manawa me ka uku ole, i kekahi hapa o ku aina e apoia ana e keia Inikini ke koiia mai ua mea la no ka liana o ka lehulehu a i ole no ke kuni no kekahi hana e hooliloia aku ai ka aina.

3. Ke hookoe nei ke Teritore i ke
kuleana e hoopau i keia laikini
ma kekahi, manawa, ma ka haa-
wi ana aku i ka mea e lilo ai
i hoolaha o eono (G) mahina ma
ko kakau.

E kaa keia kuai malalo o na ku-
lana mahope ae nei:
a. Manawa o ka laikini, 5 ma-
kahiki mai Okatoba 18, 1924
aku. b. Uku koina haahaa, $341.00 o
ka makahiki, e uku hapa-maka-
hiki mua ia.

c, "E uku ka mea e lilo ai, ma ka haule ana o ka hamare, i ka uku hoolimalima o ka makahiki mua, hui pu me na hoolilo o ka hoolaha ana ame na kaki e ae apau e pili ana me ka hoomakaukau ana i ka laikini i oleloia.

No ka hoakaka aku i koe e ninau ae ma ke Keena o ka Hope-akena, Mr. F. K. Kalua, Wailuku, Maui, a i ole ma ke keena o ke Komisina o na Aina Aupuni, Hale Kapitala, Honolulu, kalu o ke kii palapala aina o ka aina e apoia ana e keia laikini e waiho noi a e ikeia ai.

Hanaia ma Honolulu maloko o ke Keena o ke Komisina o na Aina Aupuni, i keia la 16 o Sepatemaba, A. D. 1924.

C. T. BAILEY,
Komisina, o na Aina Aupuni.
6628—Oct. 2, 9.

T. O. MURATA

FURNITURE STORE
(Na noho hoolimalima me lako pa

maanei.)
Na Lako Hale Hou me Kahiko,

Hoolimalima mo Kuai Hoolilo. 715 Alanui Hema, Honolulu, T. H. Kelepona 1695