Ka Nupepa Kuokoa, Volume LXIII, Number 33, 14 ʻAukake 1924 — HE KANIKAU NO KUU KANE ALOHA MR. HERMAN KUNEWA, AME KUU KAIKAMAHINE MISS LIZZIE KUNEWA. [ARTICLE]

HE KANIKAU NO KUU KANE ALOHA MR. HERMAN KUNEWA, AME KUU KAIKAMAHINE MISS LIZZIE KUNEWA.

Mr. Solomon Hanohano; Aloha oe a nui:—E oluolu mai hoi oe no'u kekahi wahi kaawale o ka Nupepa Kuokoa no ka'u puolo waimaka e kau ae la maluna, i ike mai ai na makamaka ame na hoaloha o kuu kane ame kuu lei aloha i haalele mai i keia ola ana. Aloha wale au ka wahine i hooneleia i ke kane, ame ke keiki, a pela hoi me na lei a maua i hooneleia i ka makua ame ka pokii. Ua hanauia kuu kane aloha Mr. Herman Kunewa mai kona mau makua mai, Mrs. Poomanu Kunewa, ma Kauluwela, Oahu, i ka mahina o Nov. 12, 1882, a ua piha iaia na makahiki he 41 me 8 mahina a make aku la i ka mahina o Iune 17, 1924. He elua wale iho no laua, oia no ame kona hanaumua e noho mai la ma Wailuku, Maui, oia o Mr. Joseph. Kunewa. Auwe no hoi kuu ehaeha ame kuu luuluu e, no ka'u mau mea aloha he kane ame kuu lei, i hele aku ma kela ao! Eia la ua puanuanu ka home aole o makou papa; aole pu hoi ka ike aku i ka holoholo pu mai o kuu lei me kona mau hanaumua. Auwe no hoi kuu lihaliha, kuu ehaeha i kuu papa ame kuu lei heleloa! O kuu kane aloha i haalele mai la, he lunapaahao oia no Kailua, N. Kona, Hawaii. Ua hana oia malaila no umi-kumamakahi makahiki, he eha makahiki i ka hopelunapaahao a he ehiku makahiki i ke poo lunapaahao. Aloha wale ia wahi a maua i noho ai me na lei a maua i hoomanawanuiia no hoi ka noho ana a haalele wale mai la oia. Aloha wale kuu makua ame ka makua o na lei a maua, a makua pu hoi o na ohana ame na hoaloha. Ua noho aloha wale ia ka poe apau e kuu papa aloha. He kane puuwai hamama oia, e haawi ana ka akau, e haawi ana ka hema. Aloha wale kuu kane puuwai aloha. He taifoid kona ma'i a pela kuu kaikamahine, pela ka ike a ke kauka. Ua hoihoiia laua i ka halema'i, he mau la wale no, ua haalele mai la ka lei a maua i ka Poakahi, Iune 16, hora eono o ke ahiahi, a ao ae i Iune 17, hora ekolu o ka wanaao i haalele mai ai kuu papa aloha. Auwe ka manaonao ke noo noo ae! Ua ha'iia aku na lei a maua no ka ka ma'i pilikia o ko lakou papaua kau mai la hookahi kaikamahine mai Honolulu mai, a elua hoi kaikamahine mai Kohala Seminary mai, a hoea no hoi ia nei i Iune 17, ua hala e iho la ka papa ame ka pokii. Auwe kuu poe keiki aloha e! Ike wale iho la no i na kino puanuanu

o ko lakou papa aloha ame ka pokii

Ua loaa ia maua he umi-kumama-lua keiki, huiia me kana kaikamahine me kana wahine mua, ua piha ka umikumakolu keiki. Ua lawe aku ka make he eha keike, a koe iho la he ewalu e ola nei. Aloha wale a'u mau lei i hooneleia i ka papa. Ke haawi nei au i na hoomaikai palena ole i ka ohana, na makai, ame na hoaloha i akoakoa mai i kuu wa o ka luuluu. Ke hoomaikai pu aku nei hoi au ia James Ake, no kana mau kokua he nui ia'u, a i na lei a maua, pela pu ka'u hoomaikai nui i na kahuma'i o ka halema'i ame na lunanui o ka Hoomana o Iesu Kristo o ka Poe Hoano o na la Hope Nei. Ke hoomaikai ae nei au i ka Makua Mana Loa, a ma ka inoa o Kana Keiki Iesu Kristo, Nana no e hoomama a e hooluolu ae i na ehaeha ame na luuluu o keia noho honoua ana. Me oe e ka Lunahooponopono ka'u mahalo nui ame na keiki o kou papapa'i ka welina pau ole. O makou iho no iloko o ka luuluu. MRS. L. KUNEWA, MISS H. KUNEWA, MISS E. KUNEWA, MISS M. KUNEWA, MAS. J. KUNEWA, MAS. J. H. KUNEWA, MISS V. KUNEWA, MAS. H. KUNEWA, MISS L. KUNEWA,