Ka Nupepa Kuokoa, Volume LXIII, Number 3, 17 Ianuali 1924 — HE HOOMAIKAI IA MRS. KAM CHEE O KAMALO, MOLOKAI. [ARTICLE]
HE HOOMAIKAI IA MRS. KAM CHEE O KAMALO, MOLOKAI.
Oiai au i holo malihini aku nei e ike ia Molokai Nui a Hina, ua noho ma Kamalo he mau la, ua hui launa pu me Mrs. Kam Chee, Mrs Dan Kahoili, Mr. Kahooili, ilaila au i ike ai i na hana Kristiano a Mrs. Kam Chee i na hana kokua i ka poe pilikia. Ia'u ma ko'u home ma ke alanui Houghtailing, loaa mai la he leta kauoha ia'u e helo i ka uwapo, a e nana ia Leleiona, ua hoouna au i ka'u kane me ka pahu puaa ame hookahi kini limu i hana maiau ia a nui ka ono. Loaa ia'u he Hapenuia maikai, oiai ua hoounaia mai na ono apau o Molokai e laa ka hee ame ka pipipi ame na uala mokaekae ono loa o Ualapue. Nolaila ke haawi aku nei i na hoomaikai kiekie loa ia oukou apau na kamaaina o Molokai, pela pu ka mea Mana Loa e ninini iho ai i na pomaikai a lawa a hu. Kc hooki nei au me ka mahalo a nui ia oukou apau. Hape Nuia! Owau iho no, MRS. KANEALII