Ka Nupepa Kuokoa, Volume LXII, Number 45, 8 November 1923 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

 

He Moolelo Walohia

Ko Vekinia Waiwai Hooilina

 

Hoopuhiliia na Hana a ka Mea Manao Ino—Kau i ke Aki i ka Manawa Hope

 

            No ka umi-kumamawalu mau makahiki a oi aku ka ike hou ole ana o Vekinia i ke kane, a iloko o keia manawa loihi ua lilo loa ae ko ke Sa wiliama Hita helehelena mamuli no o na kumu lehulehu, o ia hoi kona haawi mau i kona noonoo ma kana mau hana, a o ka oi aku, mamuli no o ka noonoo mau no Vekinia ame ke kaikamahine ana i aloha a i hui kino hou ole ai no na makahiki lehulehu i kaahope.

            Ua hookaumaha nui ia ka noonoo o Sa Williama ma kekahi ano. Ua ano aoo pu mai no hoi kona kino i nei manawa, kona mau papalina a ma kona mau lehelehe aia he mau moali a ua hoomaka mai na ohohina e o maluna o kona poo, a e hoike mai ana he luuluu i hoonana ole ia aia maloko o kona naau.

            Ua oi aku ka nui o ko Sa Wiliama kino i nei manawa, kihikihi kona mau kipoohiwi a ua oi ae no hoi ka momona i ka Vekinia nana mai. Aka nae he hiona o ke kulana me he moi la me ka ano kapukapu o ke kane i hiki koke no nae ia Vekinia ke ike mai o kana aloha kahiko no ia.

            Oiai o Vekinia e nana pono mai ana maluna o ka helehelena o ke kanaka e ku aku ana mamua ona haikea ae la kona helehelena; holowai ae la kona mau maka, a me ka maeele apuni kona kino, a e aneane iho ana hoi e hina, nolaila hopu koke mai la kona mau lima i ke pakaukau no ke ko ana ae iaia, a o ka buke baibala nui ana o ka lawe ana mai ka hale mai maluna, haule aku la iluna o ka papahele a na ke pahu i hoopuiwa ae iaia.

            Eia nae, iloko o ia helehelena haikea ona he oia mau no kona ui, o ia mau no ka nohea oia paa no o kona mau aahu o ke komo ana ma ka aina kakahiaka, a e kau ana noi hoi na pua loke ma kona apo ma ka puhaka.

            Ma keia kakahiaka a ka Sa Wiliama Hita e nana aku ana i ka wahine aohe manawa ana i ike aku ai iloko o ko laua makahiki hookahi o ka noho mare ana i oi aku ai ka ui, ka nohea, ame ka hiehie o ko Vekinia helehelena mamua o keia minuke ana e nana aku ana i ka wahine.

            “Auwe, kuu Vekinia!” wahi a Sa Wiliama o ka hooho ana ae me ka hele koke ana aku imua, a mai hopu aku paha ia Vekinia a hoopili mai i kona umauma, me ka hoopoina ae i na mea i hanaia o ka wa i hala, no ka mea, ua piha loa oia i ka hauoli no ka loa hou ana o kana mea aloha, ina aole i hele koke ae o Vekinia ma kekahi aoao o ke pakaukau, oiai nae ua hele oia a haalulu me ka mau no o ka paa mai o kona lima i ke pakaukau i ole oia e hina, a ia manawa like kau mai la i kona lima imua no ka papa ana mai i ke kane aole e hookokoke aku iaia, a i mai la:

            “E Sa Wiliama Hita, ku aku oe pela, mai hookokoke mai oe ia’u.” a luliluli pu mai la i kona poo me he mea la e hoomanao iho ke kane aole oia he wahine nana ia manawa, no ka mea ua okiia laua e ke kanawai a kaawale.

            A ei nae, oia mau no ke aloha iloko o ke kane nona, a i ka wa i ike aku ai iaia ua hoonui loa ia ae la ia aloha iloko ona.

            “O, e kuu Vekinia, loaa no hoi oe ia’u a i nei manawa hope mahope o kuu uuni ana i ke aloha nou no na makahiki lehulehu i hala,” wahi a Sa Wiliama Hita me ka hoomaka ana iho o uwe.

            “Ae, i keia manawa hope io no hoi halawai ana kaua, he halawai ana a’u i manao ole ai elike ana me keia iho la. Ua hele mai nei anei oe ianei e huli ia’u?”

            “aole, no ka hana me ka Haku Noatona au i hiki mai nei, me kuu moeuhane mua ole e halawai ana au me oe maanei. Ihea oe kahi i pee ai iloko o keia mau makahiki loihi, keia mau makahiki a ka ehaeha i hoomanawanui ia ai. Auhea ko kaikamahine? O, e kuu Veki hoi, pehea oe i ku ai a nana wale mai no me ko hele ole mai e ike ia’u?”

            “Ua maopopo ia oe eia ke ku nei he kaola nui mawaena o kaua e hiki ole ai ke a’e aku i oi aku mamua o ka make,” i pane mai ai o Vekinia, me ka helelei o na waimaka, me ka aneane hoi e haalele mai ka ikaika i kona kino.

            Aia kekahi mea iloko o ka leo o Vekinia o ia pane ana mai ana a ke Sa Wiliama i ike iho ai o ia mau no ke aloha o ka wahine iaia, me ka nana ole ae i ka nui o na hana kuhihewa i hanaia o na wa aku i hala, nolaila lelele ae la ka hauoli iloko o ka naau o ke kane no ka mea ua loaa he manaolana hou iaia no ko laua hoohui hou ia.

            “E kuu Vekinia aloha, aole loa he kaola iki mawaena o kaua, aole loa he kaola iki, koe wale no kela hoopii okimare au o ka hookomo ana ae i ka aha hookolokolo no ko kaua hookaawaleia,” i pane aku ai ke kane.

            anehe hou aku la ke Sa wiliama Hita e hookokoke aku ia Vekinia, kau e mai la no nae o Vekinia i kona lima no ka papa ana mai i ke kane aole e hookokoke aku iaia a i mai la.

            “Auhea ko wahine ame ko keiki? Ua make anei laua?”

            “Aole a’u wahine e noho nei mahope iho o ko kaua hookaawaleia ana e ke kanawai,” i pane aku ai ke Sa Wiliama Hita me ke kakau o ke aa ma kona lae. “Aole no hoi a’u keiki elike me kau e kuhihewa la.”

            “Alaila ua make anei laua?” Akahi no a nana maikai mai ka wahine no ka manawa mua loa mahope iho o ko laua ike maopopo ana kekahi i kekahi.

            “Aole, no ka mea aole au i mare wahine hou a aohe no a’u keiki.”

            “Aole?” wahi a Vekinia o ka ninau ana mai. Alaila noono iho la o Vekinia auhea la ka wahine ana i mare ai ame ke keiki i loaa ai ia laua i ko laua manawa i mare ai. Ua hoopunipuni mai anei oia ia’u mahope o kona haalele ana ae ia’u no na makahiki lehulehu i kaahope aku nei?

            “E kuu Vekinia aloha, aole a’u wahine e ae hookahi wale no a oia no oe,” i pane aku ai ke Sa Wiliama me ke kuoo.

            Ua like o Vekinia me kekahi pohaku ia mau sekona no kona lohe ana mai i keia mau huaolelo. Alaila he kuhihewa nui anei kekahi, a i ole he hana apuhi kiekie loa anei kekahi i hanaia? He umi-kumamawalu na makihiki o ke kaawlae ana aku o ka hauoli mai iaia aku he manawa hoi e pono ai e noho aloha oia me kana kane a o kana kane hoi me ia a eia nae, ua hoonele like ia laua i ka hauoli iloko o ia mau makahiki lehulehu mamuli o kekahi hana kuhihewa.

            “Auhea oe, e kuu wahine aolha, ua maopopo ia’u na hana epa lapuwale loa i hoolahala maloko o na nupepa, i ka manawa i mare ai kuu hoahanau Wiliama Hita i ka wahine a ua kuhihewaia owau ka i mare mamuli o ke kulike loa o ko maua mau inoa, a oia paha kau e hoopaanaau loa nei he wahine ka’u a he keiki.

            “Eia ka moolelo oiaio i lohe mai oe; mahope iho o kuu hoi ana mai i Enelani nei ua mare aku la kuu hoahanau Wiliama Hita ia aMkaleka Sanhope, a ma ka moolelo i puk amai ai maloko o na nupepa me he mea la owau ka i mare aole kuu hoahanau. Ua loaa hookahi keiki na laua; alaila, e kuu Vekinia ua manaoio anei oe i kela keiki o Wile na’u?” wahi ana o ka hoakaka ana aku i hoopauia ae ai ko ka wahine kuhihewa.

            “Na ka Lede Linetona no i hoike ae ia’u ia mare ana ou—ua @ kau maoli ae no oia i kekahi leka ia’u e hoakaka ana no ia mea, O—kela mau leka i piha me na manao lokoino!” a oki pu iho la ka Vekinia kamailio ana me ka piha i ka haalulu no ka piha i ka inaina.

            “Nawai i hoike aku ia oe? Heaha na mea a kuu kaikuahine lokoino o ka hoike ana aku ia oe?” a oki pu iho la ka Sa Wiliama kamailo ana; o kela manao koa a hoomanawanui ona ua hiki ole ke uumi hou iho i ka inaina no ke kaikuahine i ka manawa ana i hoomaopopo iho ai i na hana lapuwale loa, eia nae, ua lolohi loa, ua hanaia ka hana, ua auamo like laua i na ehaeha he nui mamuli o na hana awahua loa a ka Lede Linetona, a mamua o ka pau ana o ka Sa Wiliama Hita kamailio ua haule iho la o Vekinia maluna o kona mau kuli malalo iho o na wawae o ke kane.

            Hele koke aku la ke Sa Wiliama imua me ka hooho ana ae i kekahi leo maka’u, a hapai malie ae la ia Vekinia iluna a hii ae la iluna o kona mau lima, a hoopili mai la i ke poo ma kona umauma, a honi iho la i ka helehelena haikea o ka wahine, me kona mau lehelehe e haalulu ana me ka helelei o na waimaka, me ka hoopili mai la ma kona umauma kahi kokoke loa i kona puuwai, kela apo au, e ka makamaka heluhelu e apo mai ai i kau mea aloha loa, me ka nana ole ae la i ka olelo hooholo lokoino a ka aha hookolokolo nana i hookaawale ia laua no na makahiki lehulehu i kaahope aku.

            Aka aole i lilo ko Vekina hina ana iho i mea e palaka loa ai kona noonoo; mamuli o kona hina hapa wale ana iho i hoihoi hou mai i kona noonoo a hoomaopopo iho la no ka haawina ano maule i loaa iaia mamua iho, oiai nae aohe ona ikaika ia manawa e hooikaika ae ai iaia iho, no ka mea, ma kana nana iho iaia ia manawa me he mea la, aohe ikaika i koe iloko o kona kino.

            Ke hoomaopopo la no oia ia manawa aia oia ma ka umauma o ke kanaka ana i aloha mau ai kahi i pili ai, a i kona noonoo iho ia manawa he moe ana ia ana ma ka umauma ana i aloha mau ai me ka loaa o ka hauoli ame ka maha, a ke ike iho hoi aia oia iloko o ke apo ana a na lima i maa i ka malama ame ka hoopakele ana iaia i na wa i hala aku.

            Ua ike iho la oia me ka maopopo loa i nei manawa o ia mau no ka ke aloha o kana kane iaia, elike no hoi me ka wela mau o kona umauma no kana kane, a ke hoomaopopo la oia o ke aloha o kana kane nona he aloha oiaio luli ole a i hiki ole hoi ke mokuhia i na waikahe he nui, o na hana ino wale no a ka wahine i imi ai ma na ano apau i mea kaawale ai laua ke kumu o ko laua hookaawaleia ana mamuli o ka lili ame ka hoowahawaha iaia.

            O! hauoli wale ka ike ana iho, wahi ana iaia iho, oia mau no ka ke aloha o kana kane iaia, kela aloha luli ole, he aloha hoi i kakia paaia i ka iwi, o ka make wale no ka mea nana e hookaawale ia laua, elike me kana i lohe mau mai ai i kana kane oiai laua e noho pu ana iloko o ka makahiki hookahi o ko laua mare ana ae.

            Aole i pili kona mau lihilihi, nolaila nana ae la oia iluna i ka helehelena o ke kane e nana pono iho ana maluna ona me na waimaka e helelei iho ana, a no ia mau waimaka ana e ike ae ana ua hoohaninini pu iho oia i kona mau waimaka o ke aloha i awilipu ia me ka hauoli, a ke hoomau iho la no hoi ke kane i ka honi ana ma kona mau lehelehe a ma na papalina, elike no me ia a laua e noho aloha ana i ko laua mau la omaka mua o ka noho hauoli ana he kane a he wahine.

            Alaila papale ae la oia i na lima o ke kane no kona makemake e ku pono ae iluna, alaila kai aku la ke kane iaia ahiki i kahi o kekahi noho nui ma kekahi aoao aku a hoonoho iho la iaia maluna olaila, ka noho nui hooluolu no ana o ka noho ana iaia i komo mua mai ai iloko o ka rumi.

            Ia minuke kikeke mai ana kekahi mea ma ka puka, a i ka hemo ana mai he kauwa ka i ku mai ma ka puka a hoike mai la ua makaukau ke kaalio o Sa Wiliama. Ia minuke e mau ana no ko Sa Wiliama hauhau uwe, a me ka hooikaika wale no oia i uumi ai e hoomalu iaia iho, a i ka loaa ana ae o ka maha i kau la i ke kauwa.

            “Ke ike nei au i ka hiki ole ia’u ke hookaawale koke mai nei no kekahi hora a oi mai nei manawa aku. E oluolu oe e hoihoi hou kau i kuu kaalio iloko o ka halekaa, e nalo no hoi ko’u makaukau no ka hoi e hookani aku ana ia oe.”

            Kunou mai la ke kauwa a papani hou mai la i ka puka, a huli hou ae la o Sa Wiliama i ka wahine ana i aloha ai no na kau ame na hooilo lehulehu i kaahope aku, me ka lilo o ka ai i mea kanea a ono ole, a e hekau mau ana no hoi na ao hakumakuma o na manao kaumaha maluna ona no kahi o ka wahine ame ka laua kaikamahine i nalowale ai, me ka maopopo ole o ko laua mau wahi i noho ai.

            “Pehea, ua oluolu maikai iki ae la anei oe, e Vekinia? E kahea anei au i kekahi kauwa wahine e hele mai e kokua ia oe?” a ku koke ae la oia iluna a hele aku la e kii i ka pika wai ame kekahi kiaha aniani, hoopiha iho la i ke kiaha a lawe mai la e haawi i ka wahine.

            “Aole, mai kena aku oe,” i papa mai ai ka wahine.

            Lalau aku la o Vekinia i ke kiahawai a inu ae la, me he mea la ua makewai loa, a i ka pau ana haawi hou aku la i ke kiaha i ke kane, me ka nana ae iluna me ka minoaka e haawi ae ana i ka mahalo no ka hana a ke kane i hana mai la nona.

            Alaila kulou iho la ke kane a hoopa iho la i kona mau lehelehe ma ka lae o ka wahine a pane iho la: “O, e kuu mea aloha, loaa no hoi oe ia’u a i nei manawa hope, mahope o kuu naauauwa hele ana ia oe no na makahiki loihi he umi-kumamawalu i hala hope aku.”

            Ia manawa naholo hou ae la ka ula ma ko Vekinia mau papalina a hiolo makawalu iho la na waimaka mai kona mau lihilihi maka iho, a no ka mea, iloko o na makahiki lehulehu i kaahope aku i ka helehelena o kana kane, he ole nae ka lohe a ike aku, aka, i nei minuke ke ike nei oia a ke lohe hou nei i kona leo, a ke hui pu nei no hoi, aole ma ka moeuhane, aka, ma ke kino.

            No ka ike aku hoi o ke kane i ka hiolo mai o na waimaka o ka wahine hookahi ka hiolo pu ana o kona mau waimaka. Iloko o kona kanaka makua, wahi ana, i nei manawa nae ua like loa oia me kamalii ka uwe wale, aka, pehea la e hiki ai ke alo ae, he mau makahiki lehulehu ka hoi ka uumi ana i ke aloha akahi no a hui hou.

            Waiho aku la oia i ke kiahawai iluna o ke pakaukau, alaila kukuli iho la mamua mai o ka wahine a apo mai la i ka wawahine a pili i kona umauma, a no kekahi manawa loihi ka hoohaniniia ana aku o na waimaka. Kupouli ke aloha la e Kanehoa! A aloha wale ia no la hoi o Kaunuohua he puu wale no, aiwa aku hoi keia o ka huluhulu moe poli hoopumehana o na po anu o ka hooilo.

 

HE MOOLELO NO

ALIKA

AIOLE

 

Ke Ao Omamalu o Kekahi Karaima Pohihihi Mamuli o ka Manao Lili

 

            Ina he kuipine kekahi e haule ana iluna o ka papahele i kela manawa, ua hiki ke loheia kona kani, i kau a mea o ka hele oloko o kela keena a anoano eehia.

            He mea oiaio i ka manawa a Mrs. Vana Dona i komo mai ai iloko o ke keena hookolokolo, me ka hilinai ana aku o kekahi wahine opio iluna o kona pphiwi, ua komo koke na manao hoohuoi iloko o kekahi poe makaikai, o ke kaikamahine opio kela i make, a i lawe aihueia ai kona kino, ua ola hou mai oia mai ka make ae, a o ke kuma ia o ka hele o ko lakou manao a piha me na haawina ku i ke aloha.

            I ka hemo ana ae hoi o ka papale, me ka uhimaka, nana e alai ana i ka helehelena, a ahuwale ae la imua o ka lehulehu, aole e hiki ia Lola ke kaohi mai i kona manao puiwa, no ka mea ua hooho okoa ae la oia, me ka olelo ana: “Auwe, o Alika kela!” me kona palulu ana ae i kona mau maka, a hookahe aku la i na kulu waimaka o ke aloha hoahanau oiaio.

            “E oluolu hou mai kou hanohano e ke kahu o ka aha ame na keonimana o ke kiure,” i hoomau hou aku ai no ka loio pale i ke kamailio ana. “Ke ike nei oukou no oukou iho me ka hoohewahewa ole ia Miss Alika Wadona, me ke ola imua o ko oukou mau alo, aole oia i make, elike me na mea i manaoioia, a e ola aku ana oia no kekahi mau makahiki loihi.

            “I lawelawe wale mai nei no au iaia imua o oukou, no ka hooiaio ana i ka’u mau mea e hoakaka aku ana imua o keia aha, mahope iho o kona haalele ana mai i ka noho hoike, ke aeia mai ka’u noi, no ka hookuu ana aku iaia e hoi. Ua lawa loa na hooiaio, no ka manao hoohuoi iloko o Kauka Vana Dona, aia po he uwiuwiki o ke ola iloko o Miss Alika Wadona, oiai oia e waiho oni ole ana ma ka home o Mrs. Wadona aka nae he uuku loa kela wahi hoailona, e hiki ole ai i ke kauka opio, ke kalele maluna o kona mau manaolana, a ke hoike ae paha i ke akea i kana mea i manao ai, o lilo ia hana, i kumu e holopono ole ai kana mau hooikaika ana no ka hoihoi ana mai i ke ola iloko o ka mea i make.

            “Eia hou kekahi kumu e hiki ole ai iaia ke hana aku pela, mamuli o ha hoailona o ka laaumake i ikeia ma kona helehelena, i ina ua makemake maoli ia e hoopoino i kona ola, alaila aole ana e nele ka hoaoia mai o ia hana no ka elua o ka manawa. O na keehina i laweia ae e Elioka Hakoka ame Kauka Vana Dona, ke ike maka nei oukou i keia la me ka hoohewahewa ole; a ke nonoi hou aku nei au i keia aha, e ae mai i hookuu i ka hoike, oiai aole i loaa iaia ka ikaika kupono e kamailio ai i kekahi mau mea i pili iaia; aia hoi oia a kaawale aku, alaila e hoike aku no au ma ke ano neepaa, i na hana i lawelaweia no kona palekana.

            “Mamuli o na hooikaika pauaho ole ana a Kauka Vana Dona; kona hoohana ana i ka ike o ka oihana lapaau me ka noeau, ame kona lawe ana i ke kanawai iloko o kona mau lima; a mamuli hoi o na hana apuhi a Elioka i hana ai me ka holopono, pela i hoopakeleia ae ai ke ola makemae o keia wahine opio, ka mea hiki ole ke kuaiia me ke dala ame ke gula.”

            Me kela mau hoakaka, i hoomaha iho ai ka loio pale, me ka haawi koke ana mai o ke kahu o ka aha, i ka ae no kana noi, a ka poe apau maloko o kela keena e ike okoa mai la no i ke kulana nawaliwali o Miss Alika Wadona, e hiki ole ai iaia ke noho e hoolohe i na olelo e hoopihoihoiia aku ai kona noonoo, nolaila ua hoihoi hou aku la o Mrs. Vana Dona iaia noloko o ka rumi ana i lawe mai ai ia alika.

            Mamua nae o ka haalele ana iho o Alika i ka noho hoike, alawa mai la oia no kahi a Lola e noho ana, a i ka halawai ana ae o ka ike a ko laua mau maka, ua haawi like aku la laua i na kunou ana, he hoailona e hoike aku ana kekahi i kekahi no ko laua hauoli, no keia halawai hou ana.

            Hakalia no a kaawale aku o Mrs. Vana dona me Alika mailoko aku o ke keena hookolokolo, ua hoomaka ae la ke anaina kanaka i ka huro, me ka pa’ipa’i ana i na lima, a ke hehihehi la hoi kekahi poe i ko lakou wau wawae. He mau hoailona kela i hoike okoa ia ae e ka lehulehu, no ko lakou piha hauoli, i ke kaa ana o ka lanakila ma ka aoao o ka mea hewa ole, a i ka hoka ana hoi o na hana, i hoalaia mai mamuli o na manao lili kohu ole.

            Ua hookuu laelaeia o Lola mai ke karaima mai i hapala wale ia aku maluna ona, a ua loaa pu hoi ka lanakila ia Elioka Hakoka ame Kauka Vana dona, ma kekahi hana kilakil aloa a laua i mauna aku ai ia laua iho, ka mea i ike ole ia ma ka moolelo o na hihia ano nui elike me keia.

            Me na huaolelo moakaka, i hoakaka aku ai ka loio i na mea i hanaia e Kauka Vana dona, elike me ia i kamailioia aku ai iaia, a iloko o na minuke helu wale no, i hoopuka mai ai ke kiure i kana olelo hooholo, e hookuu ana i ke kanaka opio, mai ka hoopii mai i hookolokoloia ai oia.

            Ua hookuuia o Elioka Hakoka, pela me Kauka Vana Dona, ia wa i hoopuniia ae ai na kanaka opio e ka lehulehu, me ka haawiia ana o na lululima, me na hoomaikai mai ia lakou mai, me ke komo pu o ka lunakanawai ame na kiure, iloko o ia mau hoomaikai ana i na lawehala, no ka laua hana kilakila loa.

            I wahi nae e maopopo pono ai ia oe e ka makamaka heluhelu, ke ano o na hana i lawelaweia maluna o Alika, oiai oia i laweia mai ai mailoko mai o ka pahu kupapau e hoihoi hou aku ka mea kakau moolelo ia oe ma kela po, i hoonohoia aku ai o elioka Hakoka, e kiai i ke kino wailuna o Alika.

            Ma kela noho hookahi ana aku a Elioka Hakoka maloko o ka rumi, e nana mau iho ana oia maluna o ka helehelena o Alika Hakoka maloko o ka rumi, e nana mau iho ana oia maluna o ka helehelena o Alika, me he mea la aole oia i make, aka e hiamoe maikai ae ana no, a no kela ano, ua uluhua maoli kona manao, me ka hiki ole iaia ke noho kaawale mai ka pahu kapapau aku, a e pii mau ae ana hoi no manao hoohuoi iloko ona, aole o Alika i make.

            I wahi nae nona e ike ai i kekahi hoailona o na mea ana o ka hoohuoi ana, wehe okoa ae la oia i ke aniani i kauia iho maluna o ka helehelena, lalau aku la i kekahi lima o Alika, he hu’ihu’i pu wale no, eia nae aole he oole’a elike me ka lima o ka mea i make, aka he palupalu no elike me kona lima.

            Haha iho la kona mau lima maluna o ka lae, na papalina, he hu’ihu’i pu wale no kohu mabla, kulou iho la oia iloko o ka pahu me ka manao e honi i ke ea o ka laaumake, alaila hooho ae la:

            “Aole e hiki ia’u hookahi ke hooiaio i ka pololei o ka’u mea e koho nei, aka e kii au i kuu hoaloha ia Kamaki Vana Dona, oia wale no ke kanaka hiki ke hooia mai i ka hopena i kau aku maluna o kuu hoaloha nei.”

            Me kela manao paa’iloko o Elioka Hakoka, i haalele awiwi iho ai oia laloko o kela rumi, no ke kii ana ia Kauka Vana dona, a iloko o na minuke helu wale no he umi, ua hoea mai la oia me ke kauka opio.

            Ia laua maolok o kela rumi, i hoike aku ai o Elioka ia Kauka Vana Dona, i kana mau olelo apau i lohe ai i kamailioia aku e Mrs. Wadona ia Lola ma ka po mamua aku, me kona hoikeike okoa ana aku i ka omole o ka laaumake, pela hoi me ke kiaha aniani uuku me na kulu o ka laaumake iloko, me ke koi ikaika ana aku o Elioka iaia e nana i ke kino o Alika, ina paha ua hanai i oia kela kaikamahine i ka laaumake, a o ke kumu ia o kona make ana.

            Ua hooko i’o aku o Kauka Vana Dona i ka makemake o kona hoaloha, a elike no me kana o ka hoike ana aku imua o ka aha, aole wale no, ka hooiaio ana i ke kumu o ka make ana o ka wahine opio, aka no ka nana pu ana kekahi, ina paha aia no he uwiuwiki o ke ola iloko ona, oiai ua hoomaopopo oia, i ke kaokoa o na ano maluna o ke kino make, mai na kino make e ae.

            Ua haha oia i ka pana o na lima, aole ona ike, ua hookomo i kona lima ma kahi o ka puuwai, aole no ona ike i ka pana, aka aia nae kekahi mea ana i hoomaopopo i kekahi mea o ia no oe o ke kikoni ana a ka uwaki nawaliwali loa.

            Me kela ike i loaa ia Kauka Vana Dona, aole oia i hoike aku imua o kona hoaloha, no kona hopohopo o lili auanei kana mau mea e kamailio aku ai, i kumu e hoopioiolokeia ai ka noonoo o Elioka, a o kekahi no hoi, he mea makehewa nona ka hoala ana aku i kekahi manaolana poho iloko o kona hoaloha, nolaila huna iho la oia i kana mau mea i ike, me ka hoakaka ana ae nae i kona manao, he mea pono e kahaia ke kino, pela wale no e loaa aku ai kekahi ike maopopo loa no ke kumu o ka poino.

            Ua ku-e loa nae o Elioka i kela manao, me ka hoakaka ana mai, e lawe laua i ke kino make no kekahi wahi okoa, a e hookomo i kino kii o Alika iloko o ka pahu. I kinohi ua ku-e ke kauka opio i kela hana, no kona hopohopo, ina laua e lawe ana i ke kino no kekahi wahi okoa, a mahope iho o ka nana ana ame ka hoao ana e hoihoi hou mai i ke ola iloko ona, e holopono ole ana ia hana, alaila e kau mai ana na poino maluna o laua.

            Mahope mai nae, i kona ike maka ana i ke kii a Elioka i hana ai, ua kulike loa ma na ano apau me ke kino o ka mea make, akahi no oia a haawi aku i kona ae, nolaila i kela manawa a Elioka e hoohana ana i kana hulu pena maluna o ka helehelena o ke kii e kulike loa ai me kela helehelena haikea o Alika, aia no o Kauka Vana Dona maloko o ke keena o ka mea i make kahi i noho ai, a ke hoomaopopo loa la oia, i ka pii malie ae o ka pana o ka puuwai i ka ikaika, aole hoi elike me ia mamua aku.

            Me na lima palenehe loa, i lawelawe aku ai o Kauka Vana dona, i ke kino o Alika, me ka hapai ana mailoko mai o ka pahu, a iluna o ka moe, a i ka hoea ana mai hoi o Elioka me ke kii, ua kokua pu aku la oia ma ka hana ana i ua kii nei a kulike me kela ano e waiho ana o ke kino maoli o alika, a ke ha’oha’o la o Elioka i kona hoaloha, aole ka hopohopo ame ka maka’u iloko ona, no keia mau hana kolohe a laua.

            I ka holopono ana o kela hana hoololiloli i ke kino a na kanaka opio, owili iho la laua i ke kino make o Alika i ka huluhulu, a hapai aku la mailoko aku o ka rumi, me ko laua hemo ana aku ma kekahi puka mahope o ka hale, a komo aku la maloko o ka pa, no ke keena o Kauka Vana dona, e ku kokoke mai ana ma kekahi aoao aku o ka home o Mrs. Wadona.

            I ka hoea ana aku no ke keena o Kauka Vana Dona, ua waiho aku la o Elioka i kona haoloha e lawelawe i kana hana huli hoi awiwi mai la no ke ku kiai ana aku, i ke kino kii ana o ka waiho ana iloko o ka pahu, ma ke ano kolohe.

            No ka hoopokole ana ae i kekahi moolelo loihi, aole i hoohakalia iho o Kauka Vana dona i kana hana, aka haawi iho la oia i kekahi laau hoikaika kino, i ka mea make, ma ka hookomo ana he mau kulu iloko o ka waha, a no ka hora hookahi kona kakali ana me ka hoomanawanui, me ka paa mau hoi o kona lima ma kahi o ka puuwai, ua hoopuiwa loa ia mai oia, i ka ike ana iho i ka ikaika o ka pana ana, o ka mea kupaianaha nae, he manawa pokole wale no kela o ka pana ikaika ana, alaila pio iho la, oia no oe o ka mea aole he ola i koe iloko, aka nae aole ia he kumu e hoopau ai ke kauka opio i kona mau manaolana, no ka mea ke hoomaopopo la no oia, i ka nawe malie loa o ka pana, ke mea hiki ole i kekahi poe i makaukau ole i ka oihana lapaau ke ike.

            Ua hooikaika hou aku la no o Kauka Vana Dona ma kekahi mau ano e ae, e hoihoi mai i ka pana ana o ka puuwai, aole oia i hiamoe iki ma kela po ahiki i ke ao ana, aole mai la ona ike i ka pololi, a mai kela la holookoa ahiki i ka po ana, maloko wale no oia o kona keena kahi i noho ai,e haawi ana i kona ike lapaau, no ka pono o ka mea poino.

            O ka hele hoi ia ahiki i ka po ana o kela la mahope iho o ka laweia ana aku o ke kino kii o Alika e hoomoe maloko o ka luapao, o ka ohana Wadona hoea aku la o Elioka Hakoka me kona helehelena i hele a kunahihi, no ke keena o kona hoaloha, a iaia i kikeke aku ai i ka puka, ma ke ano a laua i hooholo ai, pela iho la o Elioka e kikeke aku ai, i maopopo i kona hoaloha oia ka mea mawaho, ua weheia mai la ka puka me ka hemo ana mai o ke kauka opio iwaho, a alakai aku la iaia noloko o kekahi keena okoa aku, me ke paniia ana mai o ka puka a paa, e hiki ole ai i kekahi mea ke hele aku e hokai ia laua.

            I ka noho ana iho o na hoaloha maluna o ko laua mau noho, nana aku la kekahi i ka helehelena o kekahi, a oiai ua hele ka helehelena o Kauka Vana Dona a haikea, ke ano o ke kanaka i halawai me kekahi mea maikai ole, ua ninau aku la o Elioka iaia i ka i ana aku:

            “He nuhou kaumaha anei kau e hoike mai ana ia’u?” wahi ana me ka leo hawanawana.

            “He nuhou hoohauoli manao ka’u e hoike aku ana ia oe, ina ua makaukau oe no ka hoolohe ana mai,” i pane aku ai o Kauka Vana Dona.

            “E hoomaikaiia na lani!” hooho ae ai o Elioka a i hou aku la: “Alaila ua loaa aku anei ma kau huli ana, aole he laaumake i hanaiia ia Miss Wadona?”

            “O ka mea oiaio maoli no ia, aole i hanaiia ke kaikamahine opio i ka laaumake.”

            “Alaila ua make maoli no anei oia mamuli o ka ma’i?” wahi hou a Elioka me ka nui ana iho o kona hanu, me he mea la, ua hoomama loa ia mai kona mau manao kaumaha, no ka mea ua kaawale loa o Lola mai ke kau ana aku o na hoohuoi ana maluna ona, no kekahi karaima pepehikanaka.

            “Aole o Miss Wdona i make, o keia ka nuhou hoohauoli, a’u i kamailio mua aku nei ia oe e hoomakaukau nou iho,” wahi a Kauka Vana Dona me ka leo malie.

            “Auwe no ka hoi e!” i hooho ae ai o Elioka me kona piha me ke kahaha, me ka pupue wale ana iho no i kona noho, i kau a mea o kona piha loa me ka puiwa ame ke kahaha pu, i ka lohe ana i kela hoike mai kona hoaloha aku.

            “Aole i’o i make ka wahine opio, aka nae ke waiho mai nei no oia iloko o ke kulana kupilikii loa, me ke akahele wale no oia e malamaia ai, a’u no e hopohopo nei, ina e malama ole ia oia me ka kupono, e poho wale ana na manaolana no kopalakana mai ka make mai> Aia iloko o ka puuwai kona @ kia maoli; ua hala aku nae ke kulana ikiiki loa, ua @ mai ka papa ana o kona puuwai, mamuli o kekahi @ ika a’u i haawi aku ai iaia.”