Ka Nupepa Kuokoa, Volume LXII, Number 43, 25 October 1923 — KE KALAIAINA NAAUAO. [ARTICLE]

KE KALAIAINA NAAUAO.

He mea kamaaina loa ia kakou iloko o na wa hakoko kalaiaina, elike me ia e nee nei i keia mau la, ka hailuku wale ana aku o na moho o kekahi aoao kalaiaina i na moho o kekahi aoao, me ka manao pela iho la e loaa ai ka baloka, no ko lakou lanakila ma ka la koho baloka. O ka poe naaupo he mea lealea loa ia lakou ka hoolohe ana i na haiolelo o keia ano, a ua loaa nui no hoi na baloka i kekahi poe moho. E pau ko kakou noho naaupo ana e pono ai. Ina he mau haiolelo hailuku, a kipehi kekahi a na moho, i ko lakou mau hoa paio, he mea pono e kukuluia mai na hooiaio aau no ka pololei o ka lakou mau hailuku ana, aole o na mea hiki ole ke hooiaioia, o ke kalaiaina o kela ano, o kekahi ia o na kalaiaina i hoike okoa mai ai na moho, i ko lakou kulana haahaa. He nui a lehulehu wale na mea i noho pouliuli ai na mana koho ba!oka, me ka maoopo ole no i ka lakou mau moho kupono e koho aku ai; nolaila o na hoonaauao ana i na mana koho, no na kumu e koho ole ia aku ai kekahi mau moho, i mau kauwa na ka lehulehu, o ke kalaiaina maemae ia, a ku i ka naauao; a e kapae loa ia ae na ano kalaiaina lepo, i maa ia kakou ika lohe mau ana ma na wa hakoko kalaiaina i kaahope aku nei.' .+♦