Ka Nupepa Kuokoa, Volume LXII, Number 43, 25 ʻOkakopa 1923 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA HONOLULU, T. H.,  POAHA, OKATOBA 25, 1923. EKOLU

 

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea Manao

Ino---Kau i ke Aki i ka

Manawa Hope

 

Ua @oaa no he manawa no Mrs. Alekanedero e kukakuka ai me Mr. Kakina mamua mahope iho o kona hoea ana maii Ladana, a mahope o ka hoouluulu ana mai o Mr. Kakina i na ike a pau e pili ana i kana moolelo, hoike mai la ka Loio Kakina iaia aohe hana nui ma ko Vekinia aoao ma ke koi ana i ko Veki kuleana iloko o ka waiwai o Sa Wiliama Hita, olai he kaikamahine ponoi o Veki na ka ona nona ka Hitadela, a ma kela kakahiaka a ka Loio Kakina o ka hoea ana ae, i hele ai oia e ike a e hoike ae ia Vekinia ua makaukau oia no ka hoolauna ana aku i ua o Vekinia imua o Sa Wliama Hita ina ua paa kona manao no ka hapaiia aku o ka hihia imua o ka aha.

“Alaila, he mea pono anei ia no’u ka hele ana aku e hui me @@@” i ninau ae ai o Vekinia ia Mr. Kakina.

“O ka hana maikai loa a olua me ko kaikamahine e hana ai i kuu manao, oia no ka hui a hooponopono ana me ke Sa Wiliama Hita mawaho o ka aha hookolokolo, a ina e ku-e mai ana ola i kau koi a e aa ana hoi e paio mai e koi mai ana oia no kekahi hooiaio ma kou aoao no ko olua mareia ana ma ke kanawai a o ko kaikamahine he keiki oia i loaa ia olua iloko o ko olua manawa i mareia ai,” i pane mai ai ka Loio Mr. Kakina, me ka loaa o ka mamao maopopo loa iloko ona, ina no ka hui kino nei o Vekinia me Sa Wiliama Hita, aohe lawe ana aku i keia hihia koi waiwai imua o ka aha.

He manao maikai keia o ka loio o ka hoakaka ana aku, aka nae, i ko Mrs. Alekanedero manao he hoao ikaika loa keia i hoakakaia aku la imua ona e loaa ole ai ka ikaika iaia mamua o kana mea i hoolala mua ai.

Aohe makemake o Mrs. Alekanedero e hui me ke kane, a eia nae, ia manawa like ke hana pu la no kekahi manao hoouluku iloko ona i hiki ole iho la iaia ke hoomalu iaia, me ka iini loa e ike hou aku i na maka o kana kane i aloha ai no hookahi manawa hope loa.

Ina e hiki ana iaia ke ike aku i ke kane me ka ike ole mai o ke kane iaia oia wale no kana mea e noi ae ai. Aohe ona makemake oia no ke ku okoa aku imua o ke kane a hoike aku i kona makemake.

Aka nae, ina e hiki ana ia mea ke hanaia, ua hooholo oia e koo ae iaia me na manao koa apua, me ka maka’u ole e hui aku a kamailio pu me Sa Wiliama Hita. Ua hooholo oia me ka paa o kona manao he pono ia Sa Williama Hita e ike mai ia Veki ma ke ano oia kana kaikamahine ponoi, aohe mea nana e hoopuhili mai iaia mai ka hooko ana aku i kona manao.

“Ina pela alaila ua pono; e hoomalu holookoaia au e kau oleloa’o.” i pane aku ai o Vekinia. “A heaha keia owili pepa?” wahi ana o ka ninau ana ae i ka manawa a ka loio i waiho ai i ka pepa mamua one.

“He pepa kena a’u i  makemake ai e kakau inoa iho oe, ua pau mua na manao i ka hoomakaukau ia e a’u, i hakalia wale no i kou kakau iho i kou inoa,” i pane aku ai ka loio.

Hopu mai lao Mrs. Alekanedero i ka peni, a i ka pau ana o kona inoa i ke kakauia haawi hou mai la i ka pepa i ka loio Kakina, a heluhelu iho la no hoi ka loio me ka leo nui, “Vekina N. Alekanedero.” a i ka ike ana iho i ka huapalapala “N” mawaena o ka inoa ninau mai la.

“O Noatona. He wahine Pelekane kuu kupunawahine a mamua o kona mare ana i kuu kupunakane ma ia inoa e hea mai ia ai.”

“Owai kona inoa i bapetizoia ai?”

“O Nora.”

“Owai ka inoa o ke kane ana i mare ai?”

“He kanaka ma ka inoa o Kale Boroda. Mahope iho o ko laua marela ana ua holo aku laua no Amerika a noho ma ka mokuaina o Kaleponi,” i wehewehe aku ai o Mrs. Alekanedero, me kona haohao iho la iloko ona no ko ka loio noii loa aku ma ka mea e pili ana i kona ohana.

“Aha! He mau hoahanau kane a wahine no anei kona, ina ua hoike mai kou kupunawahine ia oe ia mea?”

“Ke manaoio nei au no  kona kamailio ana mai ia’u he kaikunane kona o Alabati kona inoa – ua lohe au i kona kamailio no ke kapaia ana o kona inoa o Alabati, mamuli o ka inoa o kona anakala; aka nae aohe a’u moolelo piha i maopopo nona, oiai  i Enelani nei no oia kahi i noho ai, a mahope o ka make ana o kuu kupunawahine, o ke oki ana no hoi ia o ka holo leka ana mawaena o ke kaikunane ame ke kaikuahine, kuu kupunawahine. I kekahi manawa e kahea mau mai ana kuu kupunawahine ia’u o Vekinia Noatona, no ka mea, wahi ana aohe ona makemake e nalowale ka inoa o ka ohana.”

“O, maikai maoli kena moolelo au i wehewehe mai la,” me ka pii ana ae o ka ula ma kona mau papalina a helehelena hoi o ka, mea i hoopihoihoiia ma kona mau maka.  Unuhi ae la oia i kekahi mau buke hoomanao mailoko ae o kona pakeke, a i ka wehewehe ana ae nana iho la i kekahi mau mea hoomanao i kakauia eia maloko o la mau apana pepa, a ua hala okoa iaia kekahi mau minuke mamua o kona aea ana ae iluna a nana mai la ia Mrs. Alekanedero, a i mai la.

“E Mrs. Alekanedero, ke manaoio loa nei au ua wehewehe ia mai nei e oe me ka paanaau loa, elike me ka hiki ia oe ke hoomanao, kekahi mea pohihi loa hoi a’u ame ko’u kokoolua o ka huli ana no na makahiki elua i hala aku nei, he hana hoi nana i hoohihia i ko maua mau noonoo me ka maopopo ole o kahi e huli hou aki ai, ahiki i ka waiho pu ana o maua ia hana me ka pau ole, me ka loaa ole he manaolana no ka loaa ia mea a maua i huli ai.”

“Peia? Pehea iho la i lilo ai keia mau hoakaka aku nei a’u i mea nana e haawi aku ai la oe i kekahi moali ike?” i ninau aku ai o Mrs. Alekanedero me kona kahaha loa.

“E hoolohe mai a e hoakaka aku au ia oe,” wahi a ka loio. “Ala ke noho mai la maloko o ke Kalana Cheshire he kanaka nona ka inoa Haku Alabati Noatona.

“O, aole o’u manao he inoa Haku a inoa kiekie e ae kekahi i kapaia i ko’u ohana!” wahi a Mrs. Alekanedero.

“Ma ka’u mau mea e hoomanao nei, elike me ia a’u i lohe mai ai mai kuu kupunawahine mai, he poe ilihune a haahaa no ka ko’u ohana, a no ka nawaliwali o kuu kupunakane, a no ka hoao ana e loaa ke ola kino maikai iaia, pela oia ame kuu kupunawahine i holo ai i Amerika a noho ma ka mokuaina o Kaleponi,” i kahamaha koke mai ai o Mrs. Alekanedero, me ka akaaka pu ana mai.

“He kanaka ilihune a liilii io no o kana wahi loaa ka Haku Alabati Noatona, eia nae, elike me ka’u i lohe ai i kona moolelo, ahiki i ka piha ana iaia o na makahiki i ke kanalima, mai ia manawa mai i hoomaka ai e pii kona waiwai, i ka manawa ana i hoomaka ai e kakau i kekahi mau buke moolelo,” wahi a Mr. Kakina i hoakaka mai ai.

“Aneane pu ma ia manawa ua hoomaka aku oia e komo kuhohonu loa iloko o na hana kalaiaupuni, a ua nui kona makemake ma na oihana pili aupuni, a ua lilo oia he alii iloko o ka hale ahaolelo o Enelani i ka 1840. He kanaka kupanaha loa oia i ka nana aku, no ka mea aole ona makemake e mare wahine, mamuli o kona pauakaia ana e ka wahine ana i makemake ai e mare, o ka makaukau aku hoi ia o ka mare e lilo aku ana ka wahine ana i hoopalau ai i ke kanaka okoa, a mai ia manawa mai kona hoohiki ana aole loa oai e punihei i na wahine.

“Iloko o kona mau la oo ua haawi nui oia i kona manawa ma na hana kalaiaina a ma ka hana ana i na buke moolelo. Iloko o  na makahiki hope mai o kona ola ana ua nui hewahewa kana mau dala i hoahu ai, a ua pii ino loa no hoi kona waiwai aohe ona ohana e nui ai na hoolilo, nolaila o kona mau loaa makahiki apau ua pii mau ae i ka mahuahua a i ka mahuahua loa, a i keia la ua heluia aku oia kekahi o na Haku waiwai nui maloko o ke Kalana o Cheshire.

“O ka mea kamahao loa i ikeia no kela Haku Noatona aole ona huikau ma na anaina a ka poe waiwai, he kakaikahi loa kona manawa haawi i  na anaina hoolaulea maloko o kona home.  He aneane e piha ke kanaiwa makahiki iaia i nei manawa, a oiai, ua nawaliwali mai kona kino, aka nae, o kona noonoo oia mau no ka ikaika elike me ko ka wa opio.”

“Elua makahiki i hala aku nei ua noi mai la ia maua e huli aku i na pilikoko ona e ola nei a i holo ai i Amerkia he mau makahiki lehulehu aku nei i hala.  Ua haawi mai oia ia maua i ka mana piha e hoopuka aku i na hoolaha maloko o na nupepa me ka nana ole i ka nui o na hoolilo, no ke kumu, ua makemake loa oia e loaa kekahi o kona mau pilikoko, i holo aku ai kona mau waiwai a pau ia pililoko a mau pililoko paha mamua hoi o ka lilo wale aku i ke aupuni moi mahope o kona make ana.

“Ua hookoloia aku e maua o Nora Noatona Barafoda ahiki i Kaleponi, eia nae, ua make mua aku oia he mau makahiki lehulehu mamua aku. Ilaila i loaa mai kekahi ike ia maua he kaikamahine kana, o Alabati ka inoa, a ua mare aku oia i kekahi kanaka ma ka inoa o Alekanedero. Ua make pu laua a elua, a  ua ikemaka maua i ko laua mau he maloko o ka Pa Ilina Mauna Kuhookahi, maloko o ke kulanakauhale o Kapalakiko.

“Ua loaa pu ia maua ka ike he kaikamahine hookahi ka laua ma ka inoa o Vekina, a eia nae, ua nalowale honua oia me kona makuakane mailoko aku o ke kulanakauhale o Kapakiko he mau makahiki lehulehu mamua aku; ua hookolo maua ma kela a ma keia wahi o Kaleponi, aohe nae he maoli ike i loaa mai ia maua ma ia huli ana; he elua makahiki kela i hala aku nei; mai ia manawa mai ko maua noho pohihihi loa ana, a e ole e ike iho nei au i kou inoa maluna o ka apana pepa au i kakau iho nei i kou inoa i keia kakahiaka, haupu koke ae la au no hana i waihoia mai ai ia maua, a olelo iho la au akahi no a loaa ka hooilina o ka Haku Noatona i haawiia mai ai ia maua e huli no na makahiki lehulehu i kaahope aku nei.”

Alaila me ka helehelena haikea a pahahao nana ae la o Vekinia i ka loio a i ae la:

“Alaila o kau anei e manao ala owau ka mea i pili i ka Haku Noatona, owau hoi kona hoolina?”

“Ae’ oia maoli no ko’u manao,” i pane ae ai ka Loio. “Ma kau mau mea a pau i hoakaka mai nei i loaa iho nei keia ike ia’u o oe ka pilikoko ponoi loa o ka Haku Noatona, aohe kanalua ana no ia pili ou. Ke manao pu nei au aia pu no me oe i nei manawa kekahi mau mea e hooiaio mai ana i kou pili i ka Haku elemakule a’u i hoakaka aku nei ia oe, ke huna ole mai nae oe ia’u.”

“Heaha auanei ka’u mea e hoole aku ai, a i ole e huna iho ai hoi, no ka mea, ua kulike loa no hoi kau mau mea i hoakaka mai la me na mea hoomanao a’u e paa nei i nei manawa.  Eia no me a’u ko maua palapala mare ame kekahi buke Baibala kahiko a kuu kupunawahine; aia maloko olaila e ikeia iho ai kona lima kakau, ka la o kona hanau ana ame kona mare ana, a pela hoi me ka la i make ai kana kane me ka la hanau o kuu makuahne.”

“O, ua lawe loa ia mau mea e hooiaio mai ai nou no kou i ka Haku Noatona! A nolaila, e Mrs. Alekanedero, oiai ko kupunakane aia iloko o ke kulana nawaliwali loa i maopopo ole kona hopena, he la wale no nona e haalele mai ai i keia ola ana, e ae mai oe e holo koke kaua i Chester, kahi o ko kupunakane e noho mai la i nei manawa, me kou hoohakalia hou ole iho. I ka manawa hea oe la e makuakau ai no ka holo aku?”

“Manao au e makaukau ana maua malojo o hookahi hora mai keia manawa aku, ke loaa ole kekahi kuia; o ka’u mea i kunana iho la, i ko’u nana aku aole paha o’u pili i kela keonimana! Aole hiki ia’u ke hooiaio iho ia mea i nei manawa, oia hoi he alii oai no ka hale ahaolelo o Enelani nei,” me ka luli ana iho o kona poo.

“Ilaila aku kaua e ike ai i ke au nui ame ke au iki; aia kaua ahiki aku a weheweheia na moolelo mawaena o olua, ia wa kaua e ike iho ai ua pili oe a ua pili ole paha iaia, aole i nei manawa, a mai hookanalua mai oe.”

“E haalele iho ana ke kaaahi o keia auwina la ia anei no Livapulu ma ka hora 2 p. m. He mau mile kakaikahi ke Kalana Chester ma keia aoao mai o Livapulu, aole no i mamao loa kahi e holo mai ai a hoea i ka hale, a he hana hiki wale no ia ia kaua, ina ua pono keia i kou manao.”

“Ina pela ana alaila ua pono iho la ia i kuu manao. Oiai he malihini au ia Enelani nei, nolaila ke waiho aku nei au ia’u iho malalo o kau alakai ana, a oiai au e lilo ana kela hana au e paipai loa mai nei, e hoomoe hoi au i ka’u mau hana e ae ahiki i ka wa pono,” i pane aku ai o Mrs. Alekanedero.

“E pono oe e hana pela. Oiai ka Haku Noatona aia iloko o ke kulana nawaliwali, o ka hopena elemakule he mea waiwai loa kela ame minuke, e kupono ole ai e hoololoiahili wale ia, he hana hiki kau e hanaia i kahi manawa aku, aka no keia hana aole pono e hoohakalia ia. He oi aku ka pono nona e ike mai ia oe ma ke ano o oe kona pilikoko a o kona hoolina hoi, mamua o ka hooiaio ana i kou pili mahope aku o kona make ana, a eia hou, e ka madame maikai, o oe aku ana kekahi o na wahine waiwai ina e lilo ana oe i haku wahine no ka Enegelawuda, o ia ka inoa o kela home ame na aina nui waiwai loa o kela mau kalana o Chester.”

I ka holopono ana iho la o keia mau kuka ana mawaena o Mr. Kakina ame Mrs. Alekanedero, haalele mai la ka loio, me ka olelo mai e kipa hou mai ana oia i ka manawa kupono no ka hele pu ana aku me ia i ka hale hoolulu kaaahi, a i kona hala ana aku, alaila hele aku la o Mrs. Alekanedero e huli ia Veki ma kekahi rumi aku a hoakaka aku la iaia i ka moolelo kamahao loa a Mr. Kakina i kamailio mai ai iaia.

O kei iho la ka hana nana i kahea koke mai ia laua e haalele koke iho i ke kulanakauhale o Ladana, a o ke kumu hoi i ikeai ai na loli ano nui iloko o ko laua ola ana mamua o ko laua hoi hou ana ae i Ladana.

Ma ke ahiahi loa ana iho o ia la i hoea aku ai lakou i ka Enegelewuda, ka home o ka Haku Noatona, a ia lakou i lele aku ai mailuna aku o ke kaaahi a komo aku la i ka hale hoolulu kaaahi, loaa koke aku la no ia lakou kekahi kaalio e kakali mai ana ia lakou o ka hoea aku, no ka mea ua kelekalapa mua ia e Mr. Kakina i ka Haku Noatona e hoea aku ana oia me kekahi mau malihini he mau he mau lede.

(Aole i pau.)

 

HE MOOLELO NO

ALIKA

A I OLE

Ke Ao Omamalu o Kekahi Karaima Pohihihi

Mamuli o ka Manao Lili

“Ua ike i’o au i na hoailona maopopo loa o ka laaumake ma kona a-i, ma ka auwae, a ma na lehelehe, eia nae aole he hookahi kulu o ka laaumake i komo maloko o kona waha.”

“Ua makaukau anei oe e lawe i ka hookahi, aole i make ka wahine opio, mamuli o hanaiia ana i ka laaumake?”

“Ae, ua makaukau au e lawe i ka hookahi, no ka oiaio o keia mea a’u e hoike aku nei.”

“Ailaila ma kou manaoio maoli, aole i pili ka hewa ia Miss Perekona elike me ia i hokauia aku ai maluna ona, o ka mea poolei anei ia?”

“Ae, ua manaoio loa au aole loa i pili ka hewa ia Miss Perekona ma kekahi ano elike me ka hoopii e ku-e ana iaia, a aole loa no he mea nana i hanai i ka laaumake i ke kaikamahine opio, a aole loa no oia i make mamuli o ka laaumake.”

No keia mau hoakaka a Kauka Vana Dona, ua hooi loa ia ae la ke pioloke oloko o ke keena hookolokolo, a no ka aneane e piha ka hapaha hora, akahi no a nohoalii mai ka maluhia maloko o kela keena.

“Ina o kena ka mea oiaio loa au e hoakaka mai nei, alaila pehea iho la i hoea aku ai ka laaumake, au i ike ai maluna o ke kino o ka mea make, a maloko hoi o ke kiaha liilii i loaa aku ai ia Mrs. Wadona maloko o ka runi, e waiho ana o ke kino make maloko o kona home?”

“Aole e hiki ia’u ke pane aku i kena ninau, aka nae he manao koho wale no ko’u, no ke ano o ka loaa ana aku o ka laaumake maluna o ke kino make, a moloko o ke kiaha aniani.”

“E oluolu anei oe e hoike ae i ua manao koho nei ou?”

Aia na maka apau o ka lehulehu maloko o kela keena ke kaulono pono mai la maluna o ke kauka opio, ke kulou okoa mai la kekahi poe imua, me he mea la, e aka ana e lohe pono i na huaolelo apau e puka mai ana mai kona waha mai, alaila owaka ae la ka waha o Kauka Vana Dona, a pane mai la.

“Ma ko’u manaoio, na kekahi mea, a i ole ia na kekahi poe paha, i loaa ka manaoio no Miss Perekon, nana, a i ole na lakou i waiho o ka laaumake ma na wahi i ikeia ai, me ka manao, pela iho la e hookoia ai ka manao hoopoino i ke kaikamahine hewa ole. Ua hiki loa ke hookauia aku na ahewa ana maluna o Miss Perekona, ma ka manaoio o ka poe kolohe oiai o kela wahine wale no ka mea hookahi, i ka wa i make ai o kona, hoahanau, a oia hookahi wale no hoi, ka mea e hoopomaikai ia ke make aku o Miss Wadona.”

“Aia anei kekahi kahua oiaio, i ku ai kou mau manao hoohuoi, maluna o na mea au i hoakaka mai la?”

“Ae, ua loaa ia’u he kahua no ko’u mau manao hoohuoi.”

“Heaha ua kahua la?”

“Eia no ia. O ka laaumake i ikeia ai ma ke kino o ka mea i make, a maloko hoi o ke kiaha aniani, o ka laaumake hookahi no ia o kekahi omole liilii, i nalowale mailoko aku o ko’u keena oihana he mau la mamua aku o make ana o Miss Wadona.”

“Pehea e hiki ai ia oe ke hooia mai imua o keia aha, o kela laaumake i loaa ai, o ka laaumake hookahi ia o ka nalowale ana mailoko aku o kou keena?”

“Eia ka hooiaio nui, o ia no ka loaa ana aku o ka pepa i kauia mawaho o ka omole o ka laaumake, i kakauia me ka huaolelo laaumake, a owau ponoi no ka mea nana i kakau i kela huaolelo.”

“Ihea kela pepa kahi i loaa ai?”

“Maloko o ka rumi o Miss Wadona.”

“Ia oe anei i loaa ai kela pepa?”

“Aole, aka ia Mr. Hakoka i loaa ai.”

Ua kahea hou ia o Elioka Hakoka e hele ae no ka noho hoike no ka hoakaka ana mai i ke ano o ka loaa ana o ka pepa iaia.

Oiai e kakali ana ka aha o ka hoea ae o Elioka no kahi o ka noho hoike, ua kulou mai la o Uilama Wadona imua, a hawanawana aku la i ka loio aupuni, me ke kunokunou ana aku o ke poo o ka loio, alaila ku ae la ke kanaka opio iluna, a hoi aku la e noho ma kekahi puka aniani.

No ke ano o ka loaa ana o ka apana pepa ia Elioka ua hoakaka ae la oia i ka loaa ana o kekahi noonoo ano-e iaia, e komo maloko o ka rumi o Miss Wadona, ma ka po mamua iho o kona haalele ana i ke kulanakauhale.  Ua huli oia  ialoko o kela rumi me ka manao e loaa mai iaia kekahi mai mea ano nui, a maloko o ke eke lole lepo, i loaa aku ai iaiai he epane, e waiho ana he haina-ka ame ka pepa o ka omole laaumake.”

“Ua hiki anei ke laweia mai kela mau mea a ka hoike i hoakaka mai la imua o keia aha?” i ninau mai ai ke kahu o ka aha.

“Ke manao nei au, aole no ia he hana pohihihi, no ka mea aia kela mau mea malalo o ka malu o ka loio o Miss Perekona.”

“Ke makemake nei ka aha e ike i na mea a ka hoike i hoakaka mai nei o ka loaa ana iaia maloko o ka rumi o Miss Wadona.”

Ua hele ka helehelena o Mrs. Wadona a haikea, a ke kulou mai la oia imua, me na manao pihoihoi, no kona hopohopo loa, no ka ili aku o na ahewa ana maluna o kekahi mea ok@@ ae, a ke kakali mai la hoi oia, a pela me ka lehulehu pu, o ka ike i ka haina-ka ame ka apana pepa.

No kela ninau a ka lunakanawai, i ku ae ai ka loio o ka aoao pale, me ka lawe ana aku i kekahi puolo imua o ke pakaukau o ke kakauolelo o ka aha, alaila wehewehe ae la i na ukana oloko o ua puolo nei, o ia hoi, he epane, he haina-ka ame ka apana pepa.

Lalau iho la nae oia i ka apana pepa a paa ae la iloko o kona lima, me ke kamailio ana aku imua o ka lunakanawai ame na kiure:

“O keia apana pepa, aole kou hanohano e ke kahu o keia aha, e hoohewahewa ana no na hoailona o ka laaumake maluna olaila, o ke ano no ia o ka laaumake hookahi i loaa aku ai iloko o ka omole ia Mrs. Wadona maloko o ka lehu o ke kapuahi hoopumehana maloko o ka rumi o Miss Wadona.

“No keia epane hoi, ua hoike mai o Elioka Hakoka, no Miss Wadona no ia, a no keia haina-ka hoi, i loaa pu aku ai me ka apana pepa, ua kuniia me na huakumu o kekahi inoa, a ma ko’u manaoio maoli, o ka ona nona keia haina-ka, oia maoli ka mea nana na hana imihala a hoopilikia i kuu haku.”

“Heaha na huapalapala i kakauia maluna o ka haina-ka?” wahi a ke kahu o ka aha me ka leo kuoo, oiai hoi ka lehulehu e noho hamau loa ana, m@ ke ake e lohe aku i ka hoopukaia ae o kekahi inoa.

“O na huapalapala i kuniia maluna o keia hainaka, o R. Wadona; a ua kulike loa ke kuniia ana o keia haina-ka, pela hoi me na huapalapala me kekahi haina-ka e waiho nei malalo o ko’u malu, o ua haina-ka nei, no Mrs. Rokena Wadona no ia.”

Ma kela wahi o na hoakaka a ka loio pa@e, ua uwe kapili okoa ae la @ Mrs. Wadona, alaila kulou iho la kona poo ilalo me ke ku i ka hoka e hiki ole ai iaia ke nana mai imua o ka poe makaikai.

Akahi no a ala mai iloko o na hoomanao ana a ua wahine nei, no na olelo a Elioka i kamailio mua aku ai iaia, no ka pili olelo o ka hewa ia Lola, eia ka auanei, ua loaa kekahi mai ike maopopo loa i kela kanaka opio, e hooiaioia ka pili ole o ka hewa ia Lola.  Ke hoomaopopo pu la no hoi oia, i ka huliamahi ana o ka poe maikaikai, mahope o Lola no kona pili ole i ka hewa, nolaila o ka hilahila, ke kaumaha ame ka hoka, na haawina i hekau iho maluna o Mrs. Wadona, i ka wa i hoea mai ai na ike no ka hihia o Lola, ma kela wahi.

Me kela mau ike nae, no ka pono o ka mea hoopiiia, aole ia he kumu no ka loio aupuni e haawipio ai, aka ku mai la oia iluna, a hoakaka mai la, he hana hiki wale no i kekahi mea ke kii ana i kekahi o na haina-ka o Mrs. Wadona, pela hoi ka hookulu ana i ka laaumake maluna o kekahi apana pepa, a hookomo aku maloko o ka pakeke o ka epane. Nolaila aole i hooiaioia mai, ka loaa ana aku o kela mau mea maloko o ka rumi o Miss Wadona, malalo iho la o kela kumu, ua noi mai oia i ka aha e kapae loa ia kela ike mai ka moolelo aku o ka hihia.

Ma ka aoao hoi o ka loio o Lola, ua hoakaka aku la oia imua o ka aha, no ka hiki ke hooiaioia na hoakaka a Elioka Hakoka, nolaila kahea hou aku la oia ia Kauka Vana Dona.

Wahi a ke kauka opio, ua hooiaio mai oia, o ka apana pepa i loaa aku ai, oia ponoi no ka mea nana i kakau i ka huaolelo laaumake, me kona limakakau ponoi, a kapili mawaho o ka laaumake.

Ua kaheaia ka wahine malama ma’i, a ma kana hoike ua ike oia ia Mrs. Wadona e komo ana i ka epane o Miss Wadona, ma kela la i make au ke kaikamahine opio, aole oia i poina iki, i ka hanini ana o ke puna laau, a Mrs. Wadona e hoohainu aku ana i ka meaa ma’i, a huaka’e omua o ka epani i ka laau.  Ua nana pono ia ka epane, a ikeia iho la ka hapala o kahi i hanini ai ka laau.

Aole malaila wale iho la no pau kana mau mea i ike, aka, ua hoike pu ae la oia, i kona ike ana ia Mrs. Wadona, i ka wehe ana ae i kona haina-ka, a holoi i ka laau, me ka hookomo ana i ua haina-ka nei maloko o ka pakeke o ka epani; @ ua ike pu no hoi oia i ka wehe ana o Mrs. Wadona i kela epani a kau iluna o ke kui, maloko o kahi waiho lole.  No ka pepa nae aole oia i ike mamua, ahiki i kela wa i hoikeikeia ae ai imua o ka aha.

No ka pono nae o Mrs. Wadona, ua ku mai la ka lolo, @ hoakaka no ka hooiaio ole ia ana o na mea e pili ana i ka loaa ana o  ka apana pepa maloko o ka epane, a o ia kana i olelo mai ai, he mau hana hoao wale no ka na hoaloha o Miss Perekona i lawelawe ai i wahi e pakele ai oia, a e kau aku ai na ahewa ana maluna o Mrs. Wadona, nolaila aole he pono e aela aku na hoakaka mamua iho.

Ua ku hou aku la ka loio o Lola, a hoakaka no ka hiki iaia ke hooiaio, ma ka po hookahi no i make ai o Miss Wadona, i hookomoia ai ka apana pepa iloko o ka pakeke o ka epane, no ka mea aia pu maluna o ka apana pepa, kekahi hapala mai ka laau aku, o ka holoiia ana e Mrs. Wadona me kona hainaka, a i hookomoia ai iloko o ka epane, me ka waiho okoa ana aku o ka loio i ka pepa imua o ka lunakanawai.

Ua kahea hou ia o Kauka Vana Dona, e hele mai a hoakaka no na mea ana i kamailio mua aku ai, no ka nalowale ana o ka omole o ka laaumake mai kona keena aku.

Wahi ana, o ka omole laaumake o ka nalowale ana mai kona keena aku, ua loaa mai ia iaia mai na aina mamao mai, ma kela la hookahi no i nalowale ai.  O kona kakau ana iho no ia i ka huaolelo laaumake, a kapili aku mawaho o ka omole, iluna o ke pakaukau, a hele mai la e wehe i ka puka.

O ka mea nana i hookani mai i ka bele kahea, he kanaka oia i eha kona niho, a ua makemake e hukiia ma kela po, nolaila lawe mai la ke kauka i k apapale o keia mea a waiho iluna o ke pakaukau, a hoonoho ae la i ka mea i loohia i ka niho eha maluna o ka noho, a i ka hukiia ana o ka niho a hemo, hele aku la oia e holoi i kona lima, a kii aku la no hoi kela kanaka i kona papale, o ka haalele mai ia no ia i kona keena, me ka noonoo hou ole nae o ua kauka nei no ka laaumake.

I ka hala ana he manawa mahope mai, akahi no oia a hoomanao mai la no ka omole laaumake ana o ka waiho ana maluna o ke pakaukau, ua noke oia i ka huli no kekahi manawa loihi, aole he loaa iki, a ua hookahaha loa ia mai hoi kona manao i ke ano pohihihi o ka nalowale ana o ka laaumake, aka nae ma kela po a Elioka i kii mai ai iaia, e hele e nana i ke kino make o Miss Wadona, akahi no oia a ike, o kela ka laaumake i nalowale ai mailoko aku o kona keena.

Hoakaka hou aku la o Kauka Vana Dona, o kekahi kumu nui o kona ake ana e ike i ka mea oiaio, mamuli no ia o keia laaumake, a i ka lawe ana aku o Elioka a haawi iaia i ka pepa o ka loaa ana aku maloko o ka pakeke o ka epane, keia pepa ana i kakau ai, a kapili mawaho o ka omole lauumake, akahi no a hoopauia kona pohihihi, a maopopo iho la hoi iaia, ka mea nana i lawelawe i ke karaima, i kahihi ia aku ai  maluna o Miss Perekona.

Ma kela wahi o na hoakaka a Kauka Vana Dona, i komo mai ai kekahi mea iloko o ke keena hookolokolo, me ka lawe pololei ana aku he apana pepa, a haawi aku la i  ka lunakanawai.

“O kela kanaka o ka hele ana aku no kou keena, no ka huki ana i kona niho eha, ua kamaaina mua no anei oe iaia, a i ole he kanaka malihii paha oia?”

“He kanaka oia a’u kamaaina loa ai.”

“Ina pela, e hoike ae oe imua o ka aha i ua kanaka la ame kona inoa.”

“Alia!” i pane mai ai ke kahu o ka aha me ka paa ana i ka apana pepa iloko o kona lima, a hoomau hou mai ia i kana kamailio ana.

“Aole e hoomauia aku ka hoolohe ana i na oleloike ma keia hihia, no ka mea eia me a’u ka ike ano nui loa, nana e hoopau ae i ko kakou mau manao pohihihi, a e hoauhee aku hoi i na kiko eleele o ke karaima pepehikanaka i hookauia aku ai maluna o Miss Perekona.

I ka lohe pono ana o ka lehulehu o keia hoakaka a ke k@@@ o ka aha, ua hoomaka ae la na mea apau e huro, no ka mea ua hiki ole ia lakou ke kaohi iho i na manao hauoli, no ka hoea ana mai i ka hopena o kela hihia, o ia ka pili ole o ka hewa i ke kaikamahine opio, a me ka hana nui ka lunakanawai i hoomalu mai ai, ahiki i ka maluhia hou ana o ke keena hookolokolo.

I ka wa i nohoalii hou iho ai ka maluhia maloko o ke keena hookolokolo, ua hoomaka mai la ka lunakanawai e heluhelu i na mea i kakauia maloko o ka palapala i haawiia aku ai iaia, a o keia na mea maloko o ua palapala nei:

“Ke hoike aku nei au i ka mea oiaio loa, owau ponoi no ka mea nana i waiho i ka laaumake maloko o ka rumi o Alika Wadona,  mamuli mai keia o ka manao e panai aku i ka ino. He mau po, mamua aku o ka make ana o Alika Wadona, ua hoea aku la au no ke keena o Kauka Vana Dona, no ka huki ana i ko’u niho eha, a ia’u i lalau aku ai i ko’u papale, maluna o ke pakaukau, ike iho la au i ka waiho o kekahi omole uuku, me ka huaolelo laaumake e kau ana mawaho. No kekahi manao i komo koke mai iloko o’u i kela manawa, e hiki ole ai nae ia’u ke hoakaka ae i keia wa, ua lalau aku la au i ua omole uuku nei, a hookomo iho la maloko o ka pakeke o ko’u kuka.

(Aole i pau.)