Ka Nupepa Kuokoa, Volume LXII, Number 40, 4 October 1923 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

HE MOOLELO NO

ALIKA

A I OLE

Ke Ao Omamalu o Kekahi Karaima Pohihihi Mamuli o ka Manao Lili

Ma na ano apau ke nana aku i na hoaloha o Lola, aole ke pihoihoi a me ka hopohopo iloko o lakou, no ka hopena e kau mai ana maluna o ke kaikamahine opio, a ua lilo no hoi ko lakou mau ano, i kumu e kokmo aku ai ke kahaha iloko o kekahi poe maikai, me he mea la, he wahi hihia ano ole ka lakou e hele aku ai e hoolohe, aole hoi he hihia ano nui, i pili aku e i ke ola ame ka make.

Ke noho la o Lola, me ka wehe i kona uhimaka, aole kela hopohopo iloko ona, a ma kona helehelena hoi, ua kukuni paa ia ka maemae, ka oiaio ame ka hewa ole.

O Iopa Kepala no kekahi maloko o ke keena hookolokolo, eia nae ua noho mamao oia mai ka poe aku i kuleana loa i ka hihia, aia oia ma kahi e hiki pono ai iaia ke ike mai ia Mrs. Wadona, a mai ka hoomaka ana e hoolohe i na oleloike ahiki wale no i ka pau ana, aole he manawa a ua kanaka nei i nana ae ai ma kekahi mau wahi okoa, aka maluna wale no kona mau maka o kela wahine.

Aole o Elioka Hakoka, maloko o ke keena hookolokolo, aka ala oia malalo o ke kiai ana a ka maikai, a o Kauka Vana Dona pu kekahi me ia.  Ua hoonohoia o Elioka ma kahi kaawale loa, i ole ai oia e lohe aku i na mea apau, e kamailioia ana e Lola, aia a pau a hoakaka ana a kela wahine opio i kana oleloike imua o ka aha, ia wa oia e kaheaia aku ai e hele mai.

I ka wa i hoomaluia ai ka aha, ia wa i heluhelu mai ai ka loio o ke aupuni i ka hoopii hoahewa e ku-e ana ia Lola, alaila kaheaia mai la o Mr. Wadona, oia ka hoike mua ma ka aoao o ke aupuni.

Wahi a Mrs. Wadona oia ame ka wahine malama ma’i na laua i hooponopono i ke kino o Alika i kona wa i make ai, a mahope o kela hooponopono ana, i kauoha aku ai oia i ka wahine kahuma’i, e hoi e hooluolu, a e waiho mai nana e malama i ke kino kupapau.

Ma kela noho hookahi ana aku a ua o Mrs. Wadona, hoomaka aku la oia e hoomaemae iloko o ka rumi me ka hoakoakoa ana i na mea liilii e waiho mokaki ana ma kela ame keia wahi, a i kona hoea ana mai, ma kahi e waiho ana o kekahi aniani uuku, honi iho la oia e ke ea o ka laaumake, a i kona nana pono ana i ua kiaha la, ike koke iho la no oia, o kela ke kiaha a Lola e malama mau ana maloko o kona rumi, o ke ano nae o ka hoea ana maloko o ka rumi o Alika, he ninau pohihihi loa ia iaia.

I kinohi, aole no oia e noonoo nui no ke ano o ka hoea ana o kela kiaha malaila, aka iaia nae i hoea aku ai ma kahi o ke kapuahi hoopumehana, ua ike aku la oia i ka waiho mai o kekahi omole uuku iloko o ka lehu, a i kona nana ana iho, eia ka he omole laaumake, me ke koena laau no iloko.

Ma kela wahi o na hoakaka a Mrs. Wadona imua o ka aha, ua ninau mai la ka loio pale, i ka i ana mai:

“Mahole iho o kou ike ana i na mea au i hoakaka ae nei, heaha ke kumu o kou hele ole ana aku e ike i kou kauka, no kona manao e pili ana i ka laaumake?”

“Aole he maopopo ia’u o ka mea pono e hana ai, mahope o ko’u ike ana i kela mau mea, ua hele au a piha maoli me ka pihoihoi, me ka weliweli pu!”

Me kela pane i hoomau aku ai ua o Mrs. Wadona i ka hoakaka ana, i kona piha loa me na manao kupouli, ina nei no ka ikeia ae o kekahi karaima i hanaia, alaila e hookauia aku ana ka hilahila maluna o kona ohana, a o ka mea oi loa aku, o ia no ka hu’e hou ia ae o ke kino make, no ka nanaia, ina aia he laaumake i hanaia i kana kaikamahine.

Oiai nae e maopopo ole ana iaia ka mea pono ana e hana aku ai, ala ae la kekahi manao iloko ona, he hana hewa loa nana ka huna ana i ka mea oiaio i loaa iaia, nolaila i kona noonoo ana me ke akahele loa, akahi a maopopo iaia, ua hooko i’o ia no kekahi hana, mamuli mai o ka makee waiwai, a koho iho la oia, o Lola wale no ka mea e hoopomaikaiia mamuli o ka make ana o kona hoahanau.

Ua noke ia o Mrs. Wadona i ka niele e ka loio pale, aole nae he loli ae o kana mau pane, mai kana oleloike i hoike ae ai mamua iho; a oiai ua hoole ae oia no ka maopopo ole ana iaia o ke ano i hoea ai ka laaumake maloko o ka rumi o Alike, aka nae he manaoio loa kona o Lola wale no ka mea nana e lawe mai ia mea malaila, aole na kekahi mea e aku.

Ua kaheaia kekahi mau kauwa lawelawe oloko o ka home o Mrs. Wadona, a ma ka laua hoike, ua ike laua i ke kiaha aniani uuku maloko o ka rumi o Lola, a ua ike pu no hoi laua, i ka maikai ole o ka noho ana o kela mau kaikamahine, no kekahi mau mahina mamua aku o ka make ana o Alika.

O Uilama Wadona kekahi i kaheaia e hoakaka mai i kana mea i ike e pili ana i ka hihia, o kana ike wale no, o ia ka maikai ole o ko Lola noho ana me Alika, a ua hookahahaia aku hoi kona manao, i ko Lola lilo ana i mea kiai aku ma ka aoao o Alika oiai he kumu ia e hookoia ai kekahi manao lapuwale iloko ona.

Ma ka hoakaka hoi a ka wahine malama ma’i, ua haalele aku oia ia Alika malalo o ka malama ana a Lola, aole no kona manao e hana pela, aka mamuli o ka hookikina a Lola iaia, e hele noloko o ka halekuke, a i kona hoi hou ana mai, ua make o Alika; a ua hookahaha loa ia mai kona manao, no ka mea wahi a ke kauka i hoakaka ae ai, aole he pilikia i koe iloko o ka mea ma’i, o kona puuwai wale no ka mea nawaliwali.

Ua hoomaopopo oia i ka uwe kapalili maoli o Lola, e hoike mai ana i ka nui o kona minamina ame ke kaumaha no kona hoahanau, i kinohi, ua manao oia he kaumaha maoli no kela o Lola, aka nae i ka wa i loaa aku ai kekahi mau ike, a hui pu iho hoi, me kona ike ana, i ka hauka’e o ka lolemoepo o Alika i ka laaumake, noonoo iho la oia, he mau hana hoomaalea wale no kela ma ko Lola aoao.

Mamuli no o ka Mrs. Wadona noi, e ae hou ia mai oia e hoike i kekahi mau mea ana i poina, ua kahea hou ia oia, a ia wa i hoakaka aku ai ua wahine nei, i kona hele okoa ana aku imua o Lola, a kapa aku iaia, no ka hanai i ka laaumake i kona hoahanau, eia nae e hoole mau aku ana o Lola, me ka olelo ana, no ka pili ole o ka hewa iaia ma kekahi ano; o keia kekahi kumu o kona hoohakalia ana, i ka hoike ae imua o ke akea, i kana mea i ike ai.

O kekahi kumu no hoi o kona manao ana e hoomanawanui, i ka hoike ana ae i ka mea oiaio, no ka nui o kona manao aloha no Lola, oiai ua loihi ka noho ana o kela kaikamahine imua o kona alo, a ua like pu maoli me he kaikamahine ponoi nana; ua kakali aku nae oia, o ka hele mai o Lola imua ona, a hoike mai i kana mau mea a pau i hana ai, aole nae he hana o kela kaikamahine pela, no ia kumu, i hiki ole ai iaia ke huna hou iho, pela oia i waiho okoa ai i na hana apau iloko o na lima o ke aupuni.

Ua kaheaia ke kauka nana i lapaau ia Alika, no kana ike. Wahi a kela kauka, ma ka ike ame ka makaukau i loaa iaia ma ka oihana lapaau, o ka pilikia nui o ke kaikamahine opio aia ma kona puuwai, a ina aole e akahele ka malama ana, ua maopopo loa, he wa wale no e make ai oia, a ua manaoio no oia, a make o Alika mamuli o ka ma’i puuwai; me kona noonoo ole, no ka hanaiia ana o kela kaikamahine i ka laaumake.

No kona manao hoohuoi no ko Lola mau ano, aole ana mea i hoomapopo, a ua manaoio maoli no oia, mamuli ma o a make hikiwawe loa ana o Alika, pela i kau aku ai na manao ehaeha me ke kaumaha maluna o ke kaikamahine opio, a ua ike maoli no hoi oia, i ke ku’io o kela kaikamahine, ma ka makaala ana i kona hoahanau, ana e hoohuoi ole ai, aia kekahi hana maalea ma kona aoao.

He nui a lehulehu wale na ike i waihoia ae e ka aoao o ke aupuni, eia nae aole he hookahi o ia mau ike, e hooia ana, no ko Lola hana maoli ana i ke karaima, koe wale no, na manao koho aku, o Lola hookahi wale no ke hoopomaikaiia ina ne no ka make o kona hoahanau.

Aole ma na mea wale no mamua ae nei, pau na ike i laweia ae e ka aoao o ke aupuni, aka ua hoakaka pu ae o Mrs. Wadona, no ka ae okoa ana aku o Elioka Hakoka imua ona, no ka haulehia ana o ke kanaka opio i ke aloha no Lola, a ke hoolohe mai la hoi o Lola i kela mau olelo, me ka pinapina’i o kona hanu, me ka hoopuka okoa ana aku o Elioka i kekahi mau olelo hooweliweli, ina oia e hoao ana e hoopilikia aku ia Lola ma kekahi ano.

O ka hele hoi ia ahiki i ka pau ana o na hoike ma ka aoao o ke aupuni, ua kaheaia mai la o Lola, e lawe ae i ka noho hoike, a me na kainawawae kaumaha i hele aku ai oia a noho iho la ilalo, aole no kona ike i kona hewa, aka mamuli o na mea apau ana i lohe aku ai i kamailioia ae e na hoike, e ku-e ana iaia.

Me na huaolelo hoakaka, me ka leo kuoo hoi, a me ke kulana o ka lede oiaio i hoomaka mai ai o Loa e hoike i na mea e pili ana i kona hihia i hoopiiia ai, a iloko o ka noonoo o na mea apau, a lakou mau mea e ae e koho aku ai, koe wale no, ka hoopukaia ana mai o kela ame keia huaolelo me ka oiaio loa, ma ka hoopunipuni ole iloko o kekahi o ia mau huaolelo.

O na helehelena uahoa keia o ka hapanui o ka poe makaikai, ua auhee aku i ka lohe ana i na olelo a Lola, a o ka poe i loaa na manao inaina a hoonaukiuki nona, ua huli mai la lakou ma ko Lola aoao, me ka mihi ana iho, i ko lakou pupuahulu i ka hooili ana i na ahewa maluna o Lola, mamua o ko lakou lohe ana i na aoao a elua; a ua komo aku hoi ka mahalo iloko o lakou, no ke koa ame ka wiwoole o Lola e kupale la iaia iho mai na ahewa wale ana aku a ka poe e ku-e ana iaia ame kona inoa maemae.

I kinohi, ua hookuuia aku o Lola e hoakaka i na mea apau e pili ana iaia iho no ka hihia i hoopiiia mai ai oia, me ka hoopaia ana aku o ka manao o ka lunakanawai o ka aha, no kana mau olelo, a pela pu hoi me na kiure, alaila nokeia mai la oia i ka niele e ka loio aupuni, aole nae ia he kumu, e loli ae ai kana mau mea i hoakaka mua aku ai.

Ua hoike aku oia i kona piha loa me ka hauoli, i kona aeia ana mai e lilo i mea kokua aku ma ke kiai ana i kona hoahanau, a o ka hauoli oi aku nae i loaa iaia, o ia no ka nuhou no ka hala ana aku o na la o ka hopohopo, a ua oili mai na manaolana no ka palekana o kona hoahanau mai ka make mai.  Ua ae okoa aku oia imua o ka aha i kona kauoha ana i ke kahuma’i, e hele noloko o ka halekuke e inu ti ai, aole no kekahi mau kumu e ae, aka no kona ike, ua hele oia a maluhiluhi loa e pono ai e loaa kekahi mau meaai iaia, a e loaa pu no hoi he wahi manawa hoomaha.

Hoakaka pu aku la oia i kona kamailio pu ana me Alika, ia laua i noho kokoolua aku ai, me ka hoike okoa ana mai o kona hoahanau iaia i ka umii, ma kona umauma, a hala ae ana he manawa, hoi hou mai la ka oluolu, me kona hapai okoa ana mai i ke poo o Alika iluna o kona lima, aka i ka hoea hou ana mai o ka eha umii, o ka pau loa ae la no ia o kona hanu.

Iloko o kela mau hoakaka ana a Lola, no ka hopena i kau mai maluna o kona hoahanau, ua hookahe okoa ia na waimaka o kekahi poe maloko o kela keena, no ke ku maoli i ke aloha, o na hiona a Lola e kukulu aku la imua o lakou.

Ua ninauia mai la oia, ina paha ua haawi oia i ka laau ia Alika, i kekahi manawa ana e kiai ana iaia; o ka Lola pane, aole loa he hookahi manawa ana i hoopa ai i ke puna laau, a haawi aku ia Alika.

Ua ninauia mai oia no ke ano o ka hoea ana o ke kiaha aniani uuku maloko o ka rumi o Alika, o kana pane aole i maopopo iki iaia, o ka mua loa o kona manawa i ike ai i ua kiaha nei maloko o kela rumi, ma ka manawa no ia a Mrs. Wadona i hoikeike aku ai imua ona.  He oiaio wahi ana, maloko no kela kiaha o kona rumi ma ke kakahiaka i pauaho mai ai o Alika i keia ola ana, aole nae oia i ike i ka mea nana i lawe mai i ua kiaha nei maloko o ka rumi o kona hoahanau.

No ka hoahewa wale ana aku a Mrs. Wadona iaia, oia ka mea nana i hanai ia Alika i ka laaumake, aole o Lole i hoohakalia iho i ka hoakaka ana mai i na mea apau, aka nae, ma kahi a Mrs. Wadona, i olelo ak ku ai iaia aia wale no a ae mai ua o Lola e lilo i wahine na kana keiki, alaila hoopau oia i ka manao hoopii iaia, aole o Lola i hoike ae, no kona makemake ole, e lilo ia wahi o kana oleloike, i mea na ka lehulehu e kamailio ai, oiai no nae ua ike kona loio ia mau hana a kela wahine, a ua hiki i na manawa apau ke huaiia ae imua o ke akea, ke makemake ua loio la e hana pela.

No na mea hoi e pili ana i ko Elioka hookomo ana i ke kii o Alika maloko o ka pahu kupapau a lawe i ke kino mailoko ae o ka pahu, ua nokeia mai oia i ka niela i kana mau mea i ike ha hookahi no ana pane, aole he mea i maopopo iaia mai ka maka ana aku o kona hoahanau, ahiki i ka la mamua aku, akahi no oia a maopopo.

Ua hele a pii ka ula o na papalina o Uilama Wadona i ka lohe ana aku i kela mau olelo, no ka mea mai iaia aku i hoikeia aku i ka lohe ia Lola, no ko Elioka paa pu ana i ka hopuia, no ka aihue ana i ke kino o Alika, a hookomo aku i kona kii iloko o ka pahu kupapau.

“Pehea aole anei oe i ike mua i ke kii o kou hoahanau a Elioka Hakoka i hana ai?”  i ninau mai ai ka loio o ke aupuni.

“Ua ike mua no au, a ua hookahaha loa ia mai ko’u manao, no ke kulike maoli o kela kii me kuu hoahanau ma na ano apau,” wahi a Lola me kona koiia ana ma e hoakaka aku i ke ano o ka loaa ana iaia o ka ike no kela kii.

“Ina aole i pili ka hewa ia oe, alaila heaha ke kumu o kou holo ana no kekahi wahi mamao?  Heaha ke kumu o kou noho ole ana, a paio aku imua o ke kanawai i kou pono?”

He hana maalahi loa na Lola ka pane ana aku i kela ninau no kona makemake ole i ka hookikina aku a Mrs. Wadona e mare oia me ke keiki a kala wahine, o ke kumu ia o kona holo mahuka ana, aka nae aole oia i makemake e hookaulana wale ae ia hana i ke akea, nolaila huna iho la oia i ka mea oiaio, a pana mai la nae i ka i ana mai:

“O ke kumu o ko’u hele ana a noho ma kahi mamao, no ka hiki ole ia’u ke noho pu me kekahi wahine, i hooili mai i na hoahewa ana maluna o’u, no ka mea a’u i hana ole ai.

(Aole i pau.)

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea manao Ino---Kau i ke Aki i ka Manawa Hope

“Ka, koe aku ia, aohe maopopo ia’u. Ma ka la no i nehinei ko’u halawai ana me ia ma ka halekuai Okafoda, a nana no i hoike mai ia’u aia iaia ua wahi buke la, me kona hoakaka pu ana mai i ke kumu o ka loaa ana iaia, a ua olelo mai ia’u e hoihoi mai ana oia i ua wahi buke la i ka manawa kupono ana e ike ana.  Aole oia i olelo mai he buke ka iaia na’u, o kana i olelo mai ai he opepepa aia iaia, a ua hoakaka pu mai no hoi i ke kumu o ka loaa ana o ka ike iaia na’u ia buke mamuli o kona ike ana i ka hoailona e kau ana ma ke pani o kuu kaalio ma kela po a kakou i akoakoa ai maloko o ka home o na Danafoda, au no e poina ole la.”

“Ina aole oia i wehe i kela opepepa o ko’u palekana ia, aka hoi, ina ua weheia a ua ike oia i na mea a pau i kakauia maloko, aohe o’u luakupapau e ae, o kela buke wale no, a hookahi ka hoi mea aloha o maua, i ke kuewa hele aku me kahi opeope i ke ala ame ka waimaka.  O ka’u e welliweli loa nei, ina no kona hui me Sa Wilaiama a huiia mai imua o Sa Wiliama na hana a apau a kaua i hana aku ia Mrs. Alekanedero, aloha wale!  Ina e ike ana oia i ke kupono o ke kumakaia ana mai ia’u me ka huaai mai i na mea apau ia Sa Wiliama, e lilo ana ia la ana e hoike mai ai i la kumakena loa no’u.”

“Naaupo maoli no paha oe i kou kakau ana i na mea apau o kela ano maloko o kekahi apana pepa a buke paha e pili ana i kau mau hana ino apau no kela wahine Amerika, aole oe i ike aku i ka manawa e haule ai ia buke a loaa i kekahi mea, elike iho la me keia, o kou pilikia no ia,” wahi a ke aikane o ka nuku ana mai me kona hoahewa loa nae oia pu no hoi kekahi i komo pu iloko o ia lua auhuhu like a i hoomakaukau like i ka apu koheoheo i mea no Vekinia e hoopilikiaia ai.

“Ae; ke ike io nei au i ko’u naaupo; eia no hoi ke kumu o ko’u hana ana pela he malama mau no au i buke hoomanao, no ka mea he nui na mea waiwai e kupono ai e hoomanaoia me ka pololei loa, ina ma ka noonoo wale no e malamaia ai ia mau mea ano nui a waiwai ea, e poina ana no i kekahi mau mea, o ka buke hoomanao hoi ea, he hikiwawe is ke huli iho, me ia ano i hoopakeleia ae ai au mai na hana kuhihewa mai he nui i na wa aku la i hala.”

“Mai oi loa aku ka maikai nou ina i haehae a i ole i puhi i kela buke hoomanao i ke ahi, ma kahi o ka buke au i kakau ai no na mea e pili ana ia Mrs. Alekanedero, e like me ia a’u i ao aku ai ia oe,” i pane mai ai o Mrs. Fanamu.

“Eia no hoi ke kumu o ko’u hana ole ana pela ua piha kela wahi buke i na mea kupono a waiwai loa e hoomanaoia ai a aole no hoi au i moeuhane mua e hoohaule ana la hoi oe ia wahi buke a e loaa aku ana i ka lima o kuu enemi, ina paha i loaa mua ia’u na halia ana no ia mea, ina no la hoi pau mua ia wahi buke i ka haehaeia, a i ole no hoi au e haawi aku ana ia oe no ka malama ana; hookahi mea maopopo loa ia’u i nei manawa o ia hoi, ua hoohemahema maoli no hoi oe ia wahi buke, a ke ike e nei no au i ko’u poino, no ka mea, ina no ka haawiia aku o ia wahi buke, a ke ike e nei no au ia Sa Wiliama, ehia ka hoi mea aloha owau hookahi wale no, i ke kaiehuaia mai a kuewa aku i ke ala me kahi opeope,” i pane aku ai ka Lede Linetona me ka hooili ana i na ahewa a pau maluna o ke aikane no ka haule ana o ka buke hoomanao e lilo ai ia i moo nahesa e huli mai ana a nanahu iaia me kana waiawa o ka make.

“Ua maopopo ia mea ia’u ua piha ia wahi buke me na mea ano nui a waiwai; ina o na mea maikai wale no a i kupono ke hoomanaoia ke hoopaaia maloko o ia buke ina ua pono; aole nae he mau mea maikai ole kekahi au i kakau ai maloko o ia buke, a oia mau mea ke huli mai ana a nanahu ia oe i kekahi la, a laki loa ina aole e haawiia ae ana ia wahi buke ia Sa Wiliama mahope iho o ka hui a halawai hou ana o Mrs. Alekandero me Sa Wiliama.

“A eia hou, aole o oe wale no ka i hoopihaia me na manao pihoihoi, aka owau pu kekahi e hoehaehaia ana, ua mihi no au me ka walania loa no ka haule ana o ia buke me ka piha pu o ko’u naau i ka weliweli no ka hopena e hiki mai ana i kekahi la.

“Ua ahewa loa no hoi au ia’u iho no ko’u komo pu ana a kokua aku ia oe ma kela hana, a ua olelo iho au iloko o’u, “heaha no la ko’u mea o ka hoao ana e hookomo i ko’u mau manamanalima iloko o ke ahi e pau ai o’u manamana i ka mumuu?

“O ko’u kumu maka’u loa, elike me kau i hoike mai ai, no na inoa au i kakau ai maloko ame na la o kela ame keia mea hoomanao au i kakau ai, aole i kaawale loa ae kou hewa mai ko’u ae, ua like a like kaua ma ia mea. 

“Hookahi wale no kumu o ko’u ae ana aku e huipu me oe ma ia hana, no kuu manao oia wale no ke alahele e kaawale loa mai ai ke Sa Wiliama mai kela wahine mai ana i mare ai a lilo oia i kane na Sede Fanamu, eia nae, ua ike au mahope iho he moeuhane palaualelo wale no ia, he hana hiki ole ke hookoia, a ua ike kaua ia hopena. 

“I mea e loaa ai kela buke ia oe no keaha no hoi kou mea hele ole aku i kahi o ka hale a Mrs. Alexanedero e noho nei, ka hoi aku iaia e haawi mai ia oe, no ka mea ua hoike mai la no ka hoi oia me ka maopopo loa nau ia wahi opepepa ana i ike ole ai i ka waiwai oloko.  Mai hele aku no hoi paha oe me na olelo kalakala, aka ilalo kau mau olelo e kuu aku ai i ka nahe me ka leo mali, a ke loaa mai ka hoi la, o ka loaa ana no ia o ka maha i kou uhane.  Ina aole i hahaeia ka uwepa i hoopaaia ai, alaila ua palekana oe ma he mea la aole i nalowale ia wahi buke,” wahi a Mrs. Fanamu.

“He manao maikai loa kena au i hoakaka mai la, e Maria e hele io aku ana au i ka hale ana e noho mai la, a ina no ka loaa mai, o ka loaa ana no ia o ka maha i kuu uhane,” wahi a ka Lede Linetona.

Pela ka laua nanea ana a hala kekahi hora, ma ke kamailio ana maluna o na kumuhana like ole, a i ka hala ana o ia manawa, ku ae la ka Lede Fanamu a hoi aku la no kona hale, me na manao hakukoi like ole e hana ana iloko o kona waihona noonoo.

Ma kekahi la ae, no ka hooko ana aku i na oleloa’o a ke aikane, kamoe pololei aku la ka ka Lede Linetone hele ana no ka hale kahi a Vekinia Alekanedero ma e noho ana ia manawa, a iaia i hookani aku ai i ka bele mamua o ka hale, o ke kauwa ka i pane mai i kana bele, a hookipaia aku la oia iloko o ka rumi hookipa malu o ia hale.

Aohe poe e ae oloko o ka hale o ke kauwa wale no, a mahope nae o ko ke kauwa hele ana aku e huli ia Veki, hoi mai la oia a komo mai la iloko o ka rumi a ka Lede Linetona e koho ana kakali o ka oili mai o kana mea i makemake loa ai e hui, a e noi aku i kahi buke, kahi mea, “haule wale i ka lai o Lele.”

Ia komo ana mai o Veki a ike mai la i ka Lede Linetona haawi mai la i ke aloha kakahiaka, a i pu mai la:

“O mama anei kau mea i makemake ai e ike i keia kakahiaka?  Aole oia ma ka hale nei i keia manawa, ua hele aku nei no kekahi wahi no kekahi hana, a oiai aole oia maanei no ka hookipa ana mai ia oe ke hookipa mai nau au ia oe me ka hauoli.  He mea anei kekahi e hiki ai ia’u ke hana aku nou, e ka Lede Fanamu?” me ka paarula loa keia hookipa ana a Veki a me na olelo kupono hoi i olelo iho ai ka lede iloko wale iho no ona no ko Veki kulana lede oiaio a he wahine opio hoi i pakaia ma na ano naauao a pau, e kupono ai e lilo i makuahine no kekahi home.

“Ae, ua makemake au e hui a e kamailio pu me ia no kekahi mea, aka nani hoi ia aole oia ma ka home nei ua hoohoka nui loa ia iho la ko’u manao.  Pehea la, e hoi koke mai ana no anei oia?”

“Ke kanalua loa nei au i ka ae aku, a no keia kumu, olelo mai nei ia’u he hana kekahi ana i makemake ai e hui me ka Madame Gabeia, kona wahine kelalole, ma ka hola 11 o keia kakahiaka, a ma ka hora ekahi o ka auina la e hele aku ana oia i ke keena loio o ka Loio Kakina,” wahi a ka Veki hoakaka.

Noonoo iho la ka Lede Fanamu no kekahi minuke a i hou aku la:

“Hookahi a elua la paha i hala aku nei ua hui au me ka Lede Alekanedero ma ka halekuai Okafoda, a ua hoike mai oia ia’u he opepepa ka kekahi a’u aia me ia kahi i waiho ai.  Ua maopopo no anei ia oe ia opepepa?”

“He opepepa?” wahi a Veki o ka ninau ana mai no kona pohihihi.  Eia nae, i kona haupu ana ae i kou mai la: “O, o kela wahi opepepa anei la ua uwepaia i loaa ai i ka anakala o mama he mau makahiki lehulehu i hale aku nei, a i kauohaia mai ai o mama e malama ahiki i ka loaa ana o ka ona nana ia wahi ope?  Alaila, nau anei ia wahi opepepa, e ka Lede Linetona?”

“Ae.  Ua siliia!  Oia anei kau i olelo mai ne ua silaia?”  I ninau aku ai ka Lede Linetona no ka hoomaopopo ana. 

“Ae.  Ua siliaia, o oa hoi ua hoopaaia me ka wepa, me kekahi hoailona Kea a mau huaolelo makia, i hoakaka mai ai o Veki.

“A pela, aole anei e weheia ia opepepa?” wahi hou o ka ninau a ka lede, me ka iini nui iloko o kona naau e lohe aku ua weheia paha a aole paha, no ka mea, ina e hoike mai ana o Veki ia manawa i ka lede ua weheia e ike iho ana oia i ua kolekole kana noahuna, a ina aole o kona palekana loa ana ia, ke loaa hou mai nae iaia.

“Aohe i weheia.  O ia mau no elike me ia i loaa mai ai ia mama mai ka anakala mai ona,” i pane aku ai o Veki me ka hoopinana  ana ae i kona mau lehelehe me ka pii pu ae o ka ula o ka inaina nui ma kona mau papalina, mamuli o ka ninau hoohuoi a hoomaoe hoi a ka lede.  “Ua papa loa ia mai o mama e ka anakala ona aole e wehe ia opepepa ahiki i ka haawi pololei ana aku i ka ona nana ia waiwai no laila ua hooko o mama ia kauoha, aole i weheia ahiki mai o i keia la.”

Aneane loa ka Lede Linetona e uwe iho no ka piha loa i ka hauoli no nei pane a Veki, Ua hoopakeleia oia, wahi ana.  O kana mau mea huna lapuwale a pau e nalo ana oia wale no ke ike; ina nei no ka loaa hou o ia wahi buke hoomanao iaia he la hauoli loa ia nona aohe ana mea e makau hou aku ai.  I ka manawa e loaa mai ai o ia wahi buke iaia e puhi kokeia aku ana eia i ke ahi, a o ka lehu e lulu heleleiia aku ana maluna o na alanui o Endlani.  He moeuhane palaualelo wale no nae keia nana, no ka mea he okoa ka ke au o ka manawa e halihali mai ana, no ka mea, he makemake ke Akua e huaiia ae kana mau hana ino i ke akea.

“Ke kaumaha loa nei au no ko’u ike a halawai kino ole ana me Mrs. Alekanedero i keia kakahiaka; aka oiai hoi ua hele aku la oia, malia paha ua ike no hoi oe i kahi o ia wahi opepepa i waiho ai, a ina pela ea, e oluolu hoi ha oe e kii aku a haawi mai ia’u, a hoi ae hoi au?” wahi o na olelo mali a ka Maluakele.

“Ke ike nei au no’u iho i ka hiki ole ia’u ke hooko aku i kau noi, e ka Lede Linetona, a no ka mea aole o’u makemake e hana aku i kekahi mea me ka ike a apono ole mai o ko’u mama; he hewa koikoi loa ia a’u e hana aku ai me kona ae maikai ole mai,” i pane aku ai o Veki.  “Hookahi mea hiki ia’u ke hana nou oia keia, e hoike aku ana au iaia ianei mai oe no ke kii ana mai i kahi opepepa, a ke lana nei no kuu manao e hoihoi aku ana no oia ia mea ia oe i ka manawa kupono ana e ike ana, no ka mea heaha auanei kona waiwai e paa hou iho ai mahope o kona maopopo ana o oe ka ona nana ia waiwai.”

“Ina hoi ha pela pau ae la no.  Ina no kona hoi mai a makemake oia e hoihoi ae i ua wahi opepepa waiwai ole iaia owau wale no, hoouna pololei ae i ka hale o kuu kaikunana.  O ka helu o ke alanui ame ka pahale aia maluna o ka apana pepa hoolauna a’u i haawi aku nei ia oe.  Maikai no hoi paha owau ponoi no ke kii mai, eia hoi, e hoi aku ana au i ka Hitadela a e haalele iho ana i ke kaona nei ma ke kaaahi mua loa o ke kakahiaka, o kuu makemake nui e loaa ae ia wahi opepepa mamua o kuu hoi ana, ke hiki.

Hooia mai la o Veki no ka hoihoiia aku o ia wahi opepepa me ka leka pu e hoakaka ana no ia mea, a i ka pau ana o nei mau kamailio mawaena o laua, ku ae la ka lede a hoi aku la, aole me ka mama o na kaina wawae, ame ka maha hoi o kona uhana, aka, ma ka naau kaumaha. 

Ma kekahi kakahiaka ae aole i loaa aku ke opepepa a ka lede i makemake nui ai ahiki i kona kau ana maluna  o ke kaaahi e lawe ana iaia no ka Hitadela, ka home o ke Sa Wiliama Hita elike me kana i manao wale ai e loaa aku ana.

Ua hoolala mua ua lede nei no kona hoi aku i ka Hitadela ma ka la umi-kumamalima, me ka hoihoi pu ia Liliana me ia, a oiai ua kakali mai oia ahiki i ka minuke hope loa, me ka lana mau o kona manao e loaa aku ana iaia kana buke i piha me ka lepo i ka manawa kupono mamua o kona kau ana i ke kaa, ua hiki ole nae iaia ke hoopupu hou iho, a hoi aku la me ia nele no ka home o ke kaikunane.

Eia nae, no ka hoikeia ana aku paha hoi e hoihoiia aku ana ia wahi buke iaia, aole i hoohakukoi loa ia kona noonoo elike me na manawa lehulehu mamua aku, no ka mea olelo wale loaa houana aku iaia, me ka wehe ole ia o ka wepa i hoopaa ia ai iho la no oia iaia ina ua malama maikai ia ia wahi buke iloko o na makahiki lehulehu i kaahope aku, pehea la hoi e nele ai kona malama maikai ia iloko o na la pokole wale no i koe ahiki i ka @

Iaia e aneane loa ana e ee aku iluna o ke kaalio nana e lawe aku ia laua no ka hale hoolulu kaaahi, loaa mai la he kelekalapa iaia mai ke kaikunana Sa Wiliama mai, a e hoakaka ana malolo nei, penei:

“E haalele iho ana mau i ka Enegelawuda  ei (ka home o ka Haku Noatona i make) ma ke awakea o ka Poakolu, a e hoea aku ana i ka Hitadela ma ke kaaahi o ka hora 7:30 p.m.  Ina he makemake oe hui ae me maua ma ka hale kaaahi.”

“Eia, he manawa pokole loa maoli keia no ka hoomakaukau ana i kekahi papa ahaaina a no ka hookipa ana mai ia laua,” wahi ana i namunamu iho ai, me ka hoikeike ana ae i ke kelekalapa i ke kaikamahine.  Aka nae, aole i lilo ka pokole o ia manawa i mea hookaumaha loa iho iaia no ka mea, o ka mare koke o ke kaikunane i ka wahine o kona kaawale loa ana ia mai ka nui hou ana aku me Vekinia i ka wahine ana e inaina mau ana ahiki ia hora, a he lanakila ana hoi ia nona maluna o kona enemi.

(Aole i pau.)