Ka Nupepa Kuokoa, Volume LXII, Number 38, 20 September 1923 — UA ONI KA NOONOO O KA LEHULEHU. [ARTICLE]

UA ONI KA NOONOO O KA LEHULEHU.

Aole he manawa i hoomaopopoia ai ka oni o ka noonoo o na ir.akaainana koho baloka no ke kulana o ka oihana makai o ke Kulanakauhale a Kalana o Honolulu nei, elike me ia iloko o keia mau la e nee nei; ua ikeia keia mamuli o' ke ku ōkoa ana mai o ka Legiona ame ka Ahahui Kalepa o keia kulanakauhale, a apono me na manao lokahi, e huli a e noii pono aku ke ano o ka hoohanaia ana o keia oihana ano nui o ke aupuni. He keehina maikai ole keia i ka nana aku, iloko o keia marawa e hookokoke aku nei i ke koho baloka no na luna oihana 0 ke kulana kauhale; aole nae e hiki ke alo āe, no ka mea ua ku ka hohona o na hana poholalo i lawelaweia e ae ole aku ai kakou e hoomauia kela oihana maialo o na hoohuoi, no ka hooko ole ia o ke kanawai me ka pololei. Ua loaa i na Demokarata na manao hopohopo; a ua ike aoli, i ke kupono ole e hoomauia aku ka lawelaweia o kela < >:hana malalo o ka Makai Nui Rose, no keia kumu, i oili' ae he ekolu mau moho, no ke kulana makai nui, no ka holo ku e ana iaia ka mea i ike ole ia iloko o na koho baloka wae moho, o na luna oihana kulanakauhale no na makahiki lehulehu aku nei i hala.He hana paakiki nae i ka nana aku, ka loaa ana o na ike maopopo loa, no ka lawelaweia ana o n ahana poholalo maloko o kela keena, no ka mea aole ka poe i haawiia aku na hoopakele ana a ka oihana makai, e hoike mai ana, i ka lakou mau hana hakihaki kanawai. N O ka hoopii hoohalahala a John D. Austin, e ku-e aha i ka Makaikiu McDuf?ie t no ka lawe i na waiwai ki-pe, ka hana nana i haawi aku i ka ike i ka lehulehu, no ke kulana o ka oihana makai; a oiai nae, ua hookuuia aku ka Makaikiu Mcffie me ka pili ole o ka hewa iaia, elike me ke kumu hoopii, e ka hapanui o na hoa o ka papa komisina makai; ua loaa aku ka ike i na mea apau, no ke kaulike ole o ka olelo hooholo 1 hoopukaia ae; me ia ike auanei e konoia ai ka poe makee apau i ka pololei e hoohana aku i ko lakou mana ma ka pahu haloka i keia kau koho wae moho. O na oleloike a na hoike, i waiho ae ai imua o ka aha a ka Lunakanawai Federala De Bolt, ma ka hihia o na ona no laua ke Kalapu Hoohauoli o ke alanui Miller; k amea nana i hua'i hou ae i kekahi mau mea oiaio, no ka lilo ana o,na makai i poe hoopakele i na hana hakihaki kanawai, i lawelaweia maloko o kela kalapu, nolaila ua oni maoli ka noonoo o ka lehulehu, a ua paa ko lakou manao, ua hoea mai i ka manawa kuponō loa. e hooponopono hou ia ai ka oihana makai o Honolulu nei. He eha mau moho e alualu nei i ke kulana makai nui o ke kulanakauhale, ma ka aoao Demokarata, a he ekolu. ma ka aoao Kepuhalika, he hoike maopopo loa keia nui o na moho e a-ualu nei i keia kulana oihana, no ka ikeia, "Ua hewa ka i'a i I'-niamaka, he okea oloko."