Ka Nupepa Kuokoa, Volume LXII, Number 34, 23 ʻAukake 1923 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

EHA NUPEPA KUOKOA HONOLULU, T. H., POAHA, AUGATE 23, 1923.

 

HE MOOLELO NO

ALIKA

A I OLE

Ke Ao Omamalu o Kekahi Karaima Pohihihi

Mamuli o ka Manao Lili

 

            Ua lilo kela hele holoholo ana i mea e hooia ae ai ke kulana maikai o Bese, nolaila ma na la mahope mai, e lawe mau ana ke kauka opio i kana wahine ho opalau i ka holoholo maloko o ka paka, o ka hopena i ikeia mamuli o kela hana, o ia no ka popohe mai o ka ula ohelohelo ma na papalina o Bese, a hoihoi mai la no hoi kona ano apau.

            Me kela mau haawina maluna o Bese, ua hoohauoli loa ia aku o Kauka Vana Dona aole wale no ka lanikila o kana mau ho oikaika pauaho ole ana, e ho opakele ae i ke ola o ke kaikamahine, opio mai ka make mai, aka no ka piha o kona puuwai, me na haawina ilihia o ke aloha oiaio, iaia e nana aku ana, a e hoolohe aku ana i no olelo apau e puka mai ana mai ka waha mai o Bese.

            Me kela mau haawina nae o ka hauoli e hoopuni ana i ke kauka opio, hookahi wale no wahi mea nana i hookaumaha mai i kona noonoo, o ia no ka ike aku i kona makuahine ame kona kaikuahine, i ko laua noonoo nui no Lola, e paa mai la iloko o ka halepaahao, me ke kakali ana, o ka hoea mai o ka la e hooloheia ai kona hihia pepehikanaka.

 

MOKUNA XXIV.

 

            No Elioka Hakoka hoi, ua ikaika maoli ka ma’i i loaa iaia, aohe wa a haalele mai oia i keia ola ana, aka mamuli wale no o na kiai ame na hooikaika pauaho ole ana a Kauka Vana Dona kona hoaloha, pela i hoopakeleia ae ai oia.

            Ma kekahi po, o ka po ia i manaoia ai e haalele iho ana o Elioka i keia ola ana, ma ka aoao o kona moe ma’i o Kauka Vana Dona, ahiki i ke ao ana.  He mau hora loihi, ka waiho maule ana o kela kanaka opio, me he mea la ua make maoli oia, me kela kulana nae, aole loa ke kauka opio i haawipio, aka e haawi mau ana oia i ka laau no ka hoihoi hou ana mai i ka ikaika iloko o kona hoaloha, he mea oiaio, iloko o kela hooikaika ana, ua pohala hou ae la o Elioka, a kaakaa ae la kona mau maka, me ka nana ana mai maluna o kona hoaloha, aole ka hoohewahewa, a uluahewa paha o kono noonoo, aka ua hiki loa iaia ke hoomaopopo i na mea apau e hoopuni ana iaia.

            Mamuli o kela pohala ana ae o Elioka mailoko mai o ke kulana kupouli, nonoi aku la o Kauka Vana Dona iaia, e hookuu mai no kekahi mau minuke uuku, ia wa i komo ae ai ke kauka opio maloko o kekahi rumi kaawale, a hooho ae la i keia mau olelo o ka hoomaikai.

            “E hoonaniia ke Akua!  Ua hala aku la ka poino, a ke olino mai nei na manaolana no ka palekana,” alaila hookahe okoa aku la oia i kona mau waimaka o ke aloha no kona hoaloha.

            Iaia i holoi ae ai i na waimaka mai kona mau lihilihi ae, hoi hou mai la oia noloko o ka rumi a Elioka e moe ana, a o ka mea mua loa a Elioka o ka ninau ana mai, oia no o Lola.

            “He maikai ko Lola ola kino i keia manawa, a ua huli hoi hou mai nei oia,” wahi a Kauka Vana Dona, i hoike aku ai i ka mea oiaio loa, no kona manao, he mea ia e hoauheeia aku ai na noonoo maikai ole mailoko aku o kona hoaloha no Lola, ke kumu nui, nana i halihali mai i ka poino maluna ona.

            Me he mea la, ua lilo paha na olelo a Kauka Vana Dona i kamailio aku ai i mea hooluolu i ko Elioka noonoo, no ka mea onioni ae la kona kino nawilwali, a nui iho la no hoi kona hanu, o kona haule aku la no ia hiamoe, aole he hiamoe o ka mea i nele i ka noonoo maikai, aka he hiamoe ana o ka mea i maha kona uhane.

            I ka wa i loaa aku ai ka lohe ia Lola, no ka manaolana, e hoopakeleia ae ana o Elioka mai ka make mai, ua lilo ia i nuhou hoohauoli loa iaia, lamalama mai la kona helehelena, me he mea la aole he kaumaha iloko ona, o kana mea wale no nae e kahaha loa la, o ia ka loaa ole ana aku iaia he mau olelo hoolana mai ia Elioka aku.

            Ua maopopo loa i ua o Loloa, ua haulehia o Elioka i ke aloha nona, aole nae i loaa aku keia ike iaia, mai ia Elioka ponoi aku, aka mai kekahi mea okoa mai, a ua o Lola no hoi i ke ai nona iho, o kela wale no ke kanaka opio hookahi i aloha ai, me kona hunakele ana nae ia meahuna iloko wale iho no ona.

            “Ina no ke auhee loa aku o ka poino mai ia Elioka aku, alaila e hiki ana ia’u ke ike hou iaia, a nana aku ma kona mau maka, a hoolohe aku hoi i kona leo; he mau mea hoohauoli mai ia i ko’u manao, me ka nana ole i ka hopena e kau mai ana maluna o’u, ma keia hihia,” i kamailio wale ae ai no o Lola iaia iho.

            I ka loaa ana o ka ikaika kupono ia Elioka mahope mai, ua noke mai la oia i ka ninau ia Kauka Vana Dona, e pili ana ia Lola, a hoike aku la no hoi oia, no ka hopuia ana o ke kaikamahine opio, no ke karaima pepehikanaka, ame ka hoopaaia ana maloko o ka halepaahao; aole nae i lilo kela mau hoakaka a ke kauka i ke kumu e hookahahaia aku ai ko Elioka manao, oiai ua maopopo mua no iaia, e hoea mai ana kela pilikia maluna o Lola i kekahi manawa, eia nae ma kona helehelena ke nana aku, me he mea la ua loaa mua kekahi ike iaia, e lilo ana ka poino i kau aku maluna o Lola, i kumu e alakoia aku ai ahiki i ke kaa ana na kekahi mea okoa aku e auamo maoli i na ko`iko`i o ke karaima i kahihi wale ia aku maluna o ke kaikamahine opio.

            Ma kekahi la nae, ia Kauka Vana Dona e pii aku ana ma na anuu o ke alapii e hoea aku ai no ka rumi o Elioka, ua hookahaha loa ia kona manao i ka ike ana aku i kekahi makai e ku mai ana ma ka papahele elua, a i ka hoea ana aku o ke kauka no kahi a ka makai e ku ana, ia wa i kamailio koke mai ai ke kanaka o ke aupuni i ka ninau ana mai:

            “Pehea ke kulana o ke kanaka opio e waiho mai nei i ka ma`i, malalo o kau lapaau ana?”

            Hoomaku’e ae la na maka o ke kauka opio, no kela ninau a ka makai, aka pane mai la no nae oia i ka i ana mai:

            “Ke pii liilii ae nei kona maikai i keia manawa, aole loa he hopohopo i koe no kona palekana mai ka make mai.”

            “Aole anei i loaa iaia ka ikaika e hiki ai i kekahi mea ke hele aku e ike iaia?”

            “Aole i keia manawa.”

            “Pehea ka loihi, alaila hiki i kekahi mea ke ike iaia?”

            “Ma ko`u manao, iloko o ka pule hookahi mai keia la aku, e hiki ai i kekahi mea ke ike iaia; aka heaha kau i makemake ai i kela kanaka opio?”     

            “He palapala pili oihana ka`u i makemake ai e heluhelu aku imua ona,” wahi a ka makai, me ke pa’i ana ae o kekahi lima, ma kona umauma, me he mea la, he hoailona e hoike aku ana i ke kauka, aia maloko o ka pakeke o kona kuka, kahi o ka palapala i waiho ai.

            “Aole e hiki ia oe ke ike iaia i keia la, aole no i kela la aku, e kakali malie oe a hala ka pule hookahi, no ka mea, ke hopohopo loa nei au, i ka wa o kekahi mau hana hoopihoihoi noonoo e laweia ai imua ona, i keia manawa, e lilo ana ia i kumu nona e maule ai, a hoi hou mai kela ano kupilikii ona, o na la i kaahope aku nei .” 

            “Ina pela, alaila e hoomanawanui au i ka hooko ana aku i ka’u hana, ahiki i ka wa kupono, a i hoike aku no au ia oe e Mr. Kauka, ua makemake loa au e kau aku ko’u mau lima maluna o kela kanaka opio, pehea e ku-e mai ana no nae paha oe ia’u, ke hoomaaloalo mau mai mawaho o keia hale ea?”

            “Alaila o ke ano maoli anei o kau misiona i keia la, o ia no ka hopu ana ia Elioka Hakoka?” wahi a Kauka Vana Dona me ka pihoihoi.

            “Ae, o ke ano maoli ia o ka hana a’u i hele mai nei.”

            “Heaha ke kumu hoopii e ku-e ana i ke kanaka opio?”

            “No na mea no ia e pili ana i ka hihia pepehikanaka, i hopuia ai o Lola, a e paa mai nei maloko o ka halepaahao.”

            “Aole a’u mau ku-e ana aku ia oe no kou hooko i kau hana, koe wale no nae keia, e kakali malie oe no kekahi mau la, ahiki i ka ikaika kupono ana o ka mea ma’i a iloko o kela mau la, e hookamaaina aku ai au iaia, i ke ano o ka hana au i makemake ai, i ole ai hoi e hoopilikiaia kona noonoo, i kou wa e hoea kono aku ai imua o kona alo.  Ua hiki ia oe ke holoholo mawaho o keia hale i ke ao ame ka po, a i na manawa no apau au e makemake ai, aka aole loa oe e komo mai iloko nei o keia hale, ahiki i ka loaa ana aku o ka awe mai ia’u aku.”

            “Ua pono ia, o ke kauoha no ia i haawiia mai nei ia’u, e ninau aku, ina oe e ae mai ana, e ike i ka lawehala, a i hoole mai no oe, alaila ua hiki no ke kakali i ka hooko ana i ka palapala hopu, a no kekahi wa okoa aku.  O ke aloha no kou, aia a ike oe ua malaelae ke alahele no ka’u hana, ia wa au e hoea hou mai ai.”

            Me kela mau olelo hope, i haalele iho ai ke kanaka o ke aupuni ia Kauka Vana Dona, a huli hoi aku la no ke keena o ka oihana makai, oiai hoi ke kauka opio i hele aku ai a komo noloko o ka rumi o Elioka.

            He ekolu la mai kela manawa mai i kamailio pu ai ka makai me Kauka Vana Dona, akahi no ahiki ia Elioka ke noho iluna, a ma kela la hope no hoi, akahi no ke kauka a hoike aku imua o kona hoaloha, no kona makemakeia e hopu, no kona komo pu ana iloko o ke karaima pepehikanaka me Lola, aole no i lilo na mea a ke kauka i kamailio aku ai, i kumu no Elioka e maule ai, a i ole hoopilikiaia aku paha kona noonoo, aka hoike mai la oia i kona manao apono, e aeia aku ke kanaka o ke aupuni e hele mai e hooko i kana hana.

            Ma kekahi la ae, ua hoea i’o mai la ke kanaka o ke aupuni, a oiai e heluhelu mai ana oia i ka palapala hopu, aole loa he wahi hoailona iki, o ka hopohopo ame ke kaumaha maluna o ka helehelena o ke kanaka opio, aka o ka minoaka kana i haawi mai ai, me he mea la, he wahi hihia ano ole loa kela i kona noonoo.

            Mahope o ka helehelu ana i ka palapala hopu, i hoakaka pu ae ai ka makai, ua hiki no ia Elioka ke noho maloko o kona rumi, aka nae e hoonoho mau ia ana kekahi makai e kiai mawaho o ka puka o kona rumi, i ke ao ame ka po, ahiki i ka la e hooloheia ai ka hihia pepehikanaka o Lola, ke loaa i ua o Elioka ka ikaika kupono e hoea kino aku ai oia imua o ka aha, no ka mea ua loaa he mau ike hou ma ka aoao o ke aupuni, i makemakeia ai kona hoea ana imua o ka aha.

            I ka hemo ana aku o ka makai iwaho, a koe wale iho la no ke kauka me Elioka, maloko o ka rumi, ua ninau aku la o Elioka i ka i ana aku:

            “Pehea ka loihi a’u e kakali ai, ahiki i ka wa au e ae mai ai ia’u e hoea aku imua o ka aha hookolokolo?”

            “Ina oe e malama i ka’u mau kuhikuhi ana apau, alaila e loaa ana ka ikaika kupono ia oe e hele ai imua o kekahi aha kanaka, iloko o na pule kakaikahi wale no.”

            “Ke hooia aku nei au imua ou e kuu hoaloha, e malama no au i kau mau kauoha apau, no ka mea o ka iini iloko o`u e noho nei, o ia no ka hele koke ana aku imua o ka aha hookolokolo, i

hoauhee koke ia ae ai keia mau ao hoopouliuli e hoopuni nei ia`u ame Lola.  Auhea nae oe e Rokena Wadona, e akahele loa oe ma keia mau hana hoopilikia au i hookau mai ai maluna o maua, e hoea mai ana ka la, au e auamo ai i na hopena awahia o kau mau hana!”

            “Mai hoopihoihoi i kou noonoo e kuu hoaloha, e hoao oe ma na ano apau e hoauhee aku i na mea maikai ole, pela wale no e hikiwawe ai kou maikai,” i kamailio mai ai o Kauka Vana Dona, no ka hoomalielie ana i kona hoaloha.

            “Ua maopopo no ia’u kou manao e kuu hoaloha, e kakali malie ana au me ka hoomanawanui i na hana hoopilikia a kela wahine, aka e hiki mai ana i ka la a’u e pana’i aku ai i ka ino no ka ino.  Pehea ke kulana o kela ma’i au e lapaau mai nei, aole ou wahi mea a kamailio iki mai ia’u nona?”

            “Ke pii mau ae nei kona maikai i kela ame keia la, a ke haaheo nei au, no ke kaa ana o ka lanakila ma ko’u aoao, aole wale ma ka hoola ana iaia mai ka make mai, aka ma ka hoolilo pu ana iaia, i kokoolua no’u no keia ola ana,” wahi a Kauka Vana Dona, me ka hele a pii ka ula ma na papalina.

            “Ke hauoli loa nei au no keia nuhou, a o oe o kaua kekahi kanaka laki, i ka loaa ana ia oe o kekahi wahine maikai loa, me oe ka’u mau hoomaikai ana he nui, aka nae--”

            Aole i pau pono aku na mea a ua o Elioka i makemake ai e kamailio mai, aka nui iho la kona hanu, me ka noho mumule ana iho, a o ia ka kona hoaloha o ka pane koke ana mai:

            “Aole o’u makemake e hoikeike mai oe i kena mau ano ou e Elioka, o hooi loa ia aku auanei ka loihi o kou manawa e noho ai maloko o keia rumi,” wahi a Kauka Vana Dona, me ka pane ana mai nae:

            “Aole au i ike i kekahi kumu maikai o kou hoopau pono ole ana mai nei i kau mau mea i makemake ai e kamailio mai ia`u.  Iloko o na pule lehulehu e waiho ana oe iloko o ka ma`i kupilikii loa, ua noho aku au me ka makaala no kou pono, a iloko o ia manawa, aole au i noho pouiluli, no kou manaolana.  I hoike aku au i ka mea oiaio imua ou e Elioka, i ka wa i loaa aku ai o ka lohe i ka wahine opio e paa mai la iloko o ka halepaahao, no kou ma`i, ua lilo ia, i kumu e emi pu mai ai kona kono, aka ia`u i hoea hou aku ai imua ona, i kela la aku nei, a hoike aku i k anuhou hauoli, no ke auhee ana aku o kou mau pilikia, lamalama ae la kona mau maka, a hoike okoa mai la ia’u, i ka nui o kona hauoli, nolaila e ike mai oe, aole i poho kou mau manaolana no kona lilo mai i kokoolua nou ma keia mua aku.”

            “He mau olelo palaualelo no kena au e noke mai nei i ka haanui, aole au e manaoio aku ana, ahiki i kuu ike maoli ana i ka mea oiaio loa!”

            Aia no ia i kau kapa ana mai, aka no’u iho, ua maopopo ia’u, ua haulehia kela wahine opio i ke aloha nou, a e hoolohe mai oe.  Ia`u i kamailio aku ai iaia, ua hala na la o ka hopohopo no kou palekana, mailoko mai o ka make lalau, okoa mai la oia i kuu mau lima a elua me ka puliki ana iho, a huli aku la kona poo i kahi e no ka huna ana i na kulu waimaka nunui, i hiki ole iaia ke kaohi aku; a ina aole kela he mau hoailona o ke aloha ia oe, alaila ke makemake nei au e lohe i kau pane heaha ke ano o kela mau waimaka i hhookaheia e ka wahine opio?”

            “O e kuu hoaloha, mai hoopihapiha mai oe ia’u, me na manaolana poho.  Heaha ke kuleana o kekahi kanaka ilihune elike me a’u nei ke ano, e manaolana aku ai, e loaa kekahi wahine opio, i kaokoa loa kona kulana mai ko’u ae?  Ma na ano apau, ku nei he awaawa kuhoho nui mawaena o’u ame kela wahine opio.” 

            “O ka hauoli, he haawina like ia i loaa i ka poe ilihune ame ka poe waiwai, a ina he manao makee kou, no ko Lola pono o keia mua aku, a pela hoi no kou pono iho @aila o ka’u a’o wale no ia oe, e hooikaika oe ma na ano apau, e loaa ka oluolu maikai i kou kino.”

            “Pehea auanei e lilo ai ia hana, i kumu hoopomaikai mai ia`u, no ka mea i kulike ai me na hoakaka o na nupepa, aole he manaolana no’u ame Lola no keia mua aku.”

            “Mai nana oe i ka mea a na nupepa i kamailio ai no ka mea, ma na ike e waiho nei ma kou aoao, e hoea mai ana i ka manawa e ikeia ae ai ka pololei ole o kela mau hoakaka a na nupepa.  Ua loihi loa keia kamailio ana o kaua, aole oe e kamailio hou i hookahi huaolelo a hala he manawa loihi, aka e hoi koke oe e hiamoe, a hookuu aku i kou kino, pela me kou noonoo e hoomaha,” alaila kua e la o Kauka Vana iluna, a hemo aku la iwaho, no ka haawi ana i manawa no kona hoaloha e hooluolu ai.

            Ma kahi nae o ka hoi ana e hiamoe, elike me ke kauoha a ke kauka, ua hoomau aku la no o Elioka i ka noho ana iluna o kona noho, a ua hoopilikia maoli ia kona noonoo, no ka mea aole loa he wahi manaolana iki iloko ona, no ka hoea mai i ka wa e hookoia ai ka li’a ame ka iini a kona puuwai.

            Iaia e noho la a noonoo no kona ola ana aku, me he mea la, he pouli pu wale no na mea apau imua o kona alo.  Ina no e hiki ana iaia ke hoopakele iaia iho mai na kumu hoopii mai e ku-e ana iaia, a lilo oia he kanaka lanakila, me ke kau ole o kekahi kiko eleele maluna iho ona, aole no ia he mea e hooiia ae ai kona kulana no ka mea, he kanaka oia i nele i ke dala, a he kino nawaliwali hoi kona, e hiki ole ai iaia ke lawelawe aku i ka hana kahakii, nolaila e hala okoa ana kekahi manawa loihi loa, mamua o ka loaa ana o ka ikaika i kona kino, e hiki ai ke hele e hana i wahi e loaa mai ai ke dala iaia.

            He mea oiaio, ua haulehia oia i ke aloha ia Lola Perekona me kona puuwai apau, aka o ka upu ana aku nae, e lilo mai o Lola nana, o kekahi ia o na ninau paakiki loa, i kona ike maoli iho no i kona kulana nele a ilihune; a aole i lilo na olelo a kona hoaloha, i kamailio mai ai, i kumu nona e manaoio aku ai, aia ka noonoo nui o ka wahine opio ana i aloha ai, maluna ona.

            Me kela manaolana poho no nae iloko o Elioka, aole loa e hiki iaia ke hoopoina i kekahi hiona ana i ike ai ia Lola, ma kela po hope loa ana, o ka hele ana mai, e haawi i kona aloha hope i ke kaikamahine opio, iaiai i haalele iho ai i ke kulanakauhale, a hele aku no kekahi wahi mamao.  Me na maka o ka mea i piha i ke aloha, i nana ae ai o Lola iaia, a me kona mau lima haalulu hoi, i haawi mai ai i ke aloha iaia nei, a me ka hooikaika wale no oia i uumi iho ai i kona mau manao, i hiki ole ai iaia ke hoopuka ae i ka nui o kona aloha no Lola, a e noi aku hoi i kela kaikamahine opio, e lilo mai i wahine nana i kekahi la.

            Aole no nae he kumu nui e ae nana i sila i na lehelehe o ke kanaka opio, mai ka hoopuka ana aku i ka meahuna a kona puuwai imua o Lola, o ia no kona makemake ole e kaualako mai ia Lola, mai kona kulana waiwai a hanohano mai, a i ke kulana haahaa elike me kona; a oki loa aku hoi kona makemake ole loa, e kapaia mai oia he kanaka i kauka’i aku e komo pu iloko o na hauoli ana i na waiwai o Lola.

            Ua maopopo no i ua o Elioka, ina ua aloha i’o aku o Lola iaia, aole ana kela kaikamahine e nana i ko ia nei kulana haahaa, aka e hapai aku ana oia i ka mea ana i aloha ai, a kau ma ke kulana kiekie.  Me kela hoomaopopo no nae i loaa iaia, no ka Lola mea e hana mai ai nona, aole i haalele mai ka noonoo maikai i kona poo, a o ka mea pono wale no hoi ia, o ia ke kaa ana ma ka aoao o ke kane, ka malama ana i kana wahine, ame ka hana ana aku i na mea apau e pono ai oia, aole o ka wahine ka mea nana e malama mai i kekahi kane.

            Ina he kaikamahine nele a ilihune o Lola, ina aole e kala kahiko, i noi aku ai o Elioka iaia e lilo mai i wahine nana, a e lilo i mea nana e haaheo ai, ke komo pu ana aku me kana wahine, iloko o na hakoko ana, me na inea o keia ola honua ana, i wahi e loaa ai ia laua na pomaikai, ame ka noho hauoli ana.

            Ina no paha e kaawale loa mai ana o Lola mai kela hihia pepehikanaka mai, me ke kau ole aku o kekahi kiko eleele maluna ona, he hana hiki ole no iaia ke noi aku i kela kaikamahine e lilo mai i wahine nana.  Aole loa he ae iki o kona lunaikehala, e hele aku oia me na lima nele, a koi aku ia Lola e lilo mai nana, oiai no nae ua hele kona puuwai a piha o ka hu wale ae no koe, i ke aloha no kela wahine opio.

            “He keu aku ka noho nele a ilihune, o ka enemi ino loa,” i namunamu wale iho ai no ua o Elioka, alaila ku ae la illuna, a hoi aku la noluna o kahi moe, no ka hooluolu ana, me ka hoao ana e hoopoina, i na mea e hoopilikiaia ai o kona noonoo.

            Ma kekahi la ae, i ka wa i hele hou mai ai o Kauka Vana Dona e ike ia Elioka, ua ukali pu mai la me ia kekahi kanaka malihini aoo, i hiki aku paha kona mau makahiki ma kahi o ke kanaono.

            Ua kahikoia keia kanaka malihini, me kekahi paalole o na kanaka holomoku, ua hele no hoi kona palule e komo ana a lepo, me kekahi papale kaleponi kahiko ma kona poo, a he mau kamaa buki ili hakumakuma ma kona mau wawae.  Ma kona lima e paa ana oia i kekahi mamalu oma’oma’o, a he eke kapolena i hele a ula i ka lepo ma kekahi lima, a ke nana aku iaia, he ku maoli i ka hoihoi ole, me he mea la, mai kekahi wahi kuaaina loa mai oia i hele mai ai.

            Nana mai la o Elioka i ke kanaka, malihini, me ka piha i ke kahaha, me kona hoike ole mai nae i kona ano hookae i kela kanaka, a no ka hoolauna ana aku i ka malihini imua o kona hoaloha, i kamailio mai ai o Kauka Vana Dona.

            “Ua lawe mai nei au i keia keonimana malihini imua ou i keia la,” wahi a ke kauka opio, alaila haawi mai la o Elioka i kana kunou ana imua o ka malihini, oiai hoi ke kanaka malihini e noii nowelo aku ana i ke ano o ka mea ma’i, alaila hoomau hou mai la no o Kauka Vana Dona, i kana kamailio ana:

            “Ma ka ulia laki wale no i halawai ai au me keia keonimana malihini, ua loaa mai oia ia’u e ku ana mamua pono o ka papa hoolaha i kauia ai kou inoa, a ua ninau mai oia ia’u ina paha ua ike au i kou wahi i noho ai, ae aku nei no hoi au, alaila koi ikaika loa mai nei oia ia’u, e lawe mai iaia imua ou, no ka mea wahi ana, he hoaloha kahiko oia no kou makuahine.”

            “Ke hauoli nei au i ka halawai ana me oe e ka malihini, ina he hoaloha oe no kuu makuahine,” i pane mai ai o Elioka ma ke ano hoihoi.

            “Pela i’o!” i kunokunou wale mai ai no ke poo o ka malihini, a pane mai la: “Ma ka’u mau mea i lohe ai, ua hookauia mai kekahi mau hana hoopilikia maluna ou, he keu aku kela a ka mea maikai ole maoli!”

            “E huikala mai oe ia’u, no ko’u mahaoi, o ia hoi, ma ka’u hoomaopopo aku nei i na hoakaka a kuu hoaloha, he mea oe i kamaaina i kuu makuahine, o ka’u nae e ha’oha’o nei, aole au i ike mua ia oe, i ko’u wahi wa liilii.”

            Oiai o Elioka i kamailio mai ai i kela mau olelo mamua ae la, ke holoholo wale la no ke kanaka malihini maloko o ka rume me ka nana ana i na kii e kau ana ma ka paia, pela me na noho, a o ka hope loa o kana wahi i nana aku ai, o ia ka moe, me ka hou ana aku i kona mamalu ui ka halii uhimoe a namunamu iho la:

            “Aole e hiki ia oe ke hoomanao no’u, aka no’u iho, aole loa au i hoopoina iki i kekahi wahi bebe hoohana i kona makuahine, oia, no oe.  He keu aku kou hoouluhua i kou mama, i kou wahi wa liilii, aka nae ua kanaka makua oe i keia manawa, a o ka mea oi aku o ka pilikia, o ia no kou kulana nawaliwali!”

            “Ae, eia au iloko o kekahi ma’i nui e waiho nei, ua hala nae hoi na la o ka pilikia, aia he manaolana nui, no ko’u lanakila i kekahi la e hoea mai ana.  Pehea ua kamaaina loa nae paha oe i ko’u mau makua ea?”

            “Ua kamaaina au i kou makuahine ia Emalaina Radela, ame kou makuakane ia Alika Hakoka; a e kapa mau mai ana o Emalaina ia’u o Anakala Iopa Tepala.”

            “Alaila o oe anei Aknaala Iopa Tepala?” wahi a Elioka me ka hoihoi, no ka loaa ana aku iaia o kekahi hoomaopopo ana, ua lohe mua oia i kela inoa.

            “O ko’u inoa ia, aka nae, aole au i pili ia oe ma ke koko; mai lilo paha au i ohana nou, ina no ko’u mare i kou makuahine, aka aole a’u mea e kamailio ai no ia ninau; koe wale no keia ua mahalo nui au i na ano maikai he nui o Emalaina, a ua oi aku no kona wawaiio imua o ke gula maemae loa.”

            “Ua lohe mau au i ke kamailio o kuu makuahine nou, no kekahi mau manawa lehulehu, a ua maopopo ia’u, ua aloha oia ia oe, elike me kana e kapa mau ai o Anakala Iopa Tepala, a nana i hoike mai ia’u, ua hala oe no Aferika, a o ke kumu ia o ko’u ike mua ole ana ia oe.  Ke hauoli nei nae au i ka halawai ana me oe,” alaila haawi mai la o Elioka i kona lima akau no ke aloha ana me ke kanaka malihini, me ka hoike okoa ana mai hoi o kona mau maka i ka hoihoi.           

            “O ke ano ia o ke kamailio ana e kanaka opio—ua kulike loa maoli no kou mau ano me ko kou makuahine; aole e hiki ia’u ke hoopoina i kona mau ano, iaia ke minoaka mai,” wahi a ka malihini, me ka hopu ana aku i ka lima o Elioka, a puliki iho la, me ka noke ana i ka lulu.

 

MOKUNA XXV.

 

            Mamuli o ke ano o na hana a keia kanaka malihini, ua hiki ole ia Kauka Vana Dona, ke uumi iho i kona akaaka, nolaila hele okoa aku la oia iwaho, me ka haalele ana iho i ka malihini me kona hoaloa maloko o ka rumi, o laua wale no.

            “E oluolu anie oe e Anakala Iopa Tepala e noho iho ilalo, iluna wale no ka oe e ku ai!”

            “Aole au i maa i ka noho ana ilalo, he oi ae ko’u makemake i ke kui luna,” wahi a ka malihini, me ka leha ana aku i ka noho i uhiia me ka veleveka, a Elioka o ke kuhikuhi ana mai, o kona no ia e noho iho ai ilalo.

            “Eia no au iloko o ke kulana nawaliwali e noho nei i keia manawa, ua lilo ka uwi o kou mau kamaa, i mea hoopilikia mai ia’u, nolaila e ae mai oe e noho ilalo, a kamailio no hoi kaua me ka maikai.”

            “Ua pono kela, ina no hoi paha oe i kamailio mua mai nei, aole au e holoholo wale maloko nei o kou rumi, me ka hoouluhua aku ia oe, me ka nakeke ame ka uwi o ko’u mau kamaa pepeekua,” alaila noho okoa iho la ka malihini ilalo, aole nae iluna o ka noho i uhiia i ka veleveka, aka maluna o kekahi noho, e pili kokoke aku ana i ka moe.     

            Me he mea la, ua lilo na pane a keia kanaka malihini, i mea hialaai ia Elioka o kekahi kumu paha hoi, ua lohe mua oia i na apo o keia kanaka mai kona makuahine mai, a ua maopopo hoi, o kela kekahi o na kanaka maikai loa, aole he kulike o kona mau ano mawaho, me na mea iloko o kona puuwai.

            “Heaha ke ano maoli o keia ma’i ikaika i loaa ia oe?” i hooniele aku ai ke kanaka malihini, i ka ma’i o Elioka.

            “He fiva ka hoomaka ana mai i kinohi!”

            “O kela kekahi o na ma’i maikai ole, a pehea ua loihi anei kou waiho ana i ka ma’i?”

            “Ae, he mau pule lehulehu keia, akahi no nae a loaa iki mai ia’u ke ano maikai iloko, o keia mau la.”

            “He keu aku maoli a ka mea kaumaha, ina paha ke ola nei kou makuahine, ua hiki loa iaia ke malama ia oe me ka maikai, no ka mea ua ike oia i na mea kupono loa no ka poe ma’i.  Ke hoomanao nei au, o Emalaina ka mea nana i malama ia Keoni Hikona, ke kupunakane o kou makuakane hoahanau, ahiki i ka palekana ana.  He ma’i five no kona, o kela kekahi o na ma’i a na kauka i hoike ae ai, aole e ola ana, eia nae me ka maikai wale no o Emalaina i malama ai, me ka hana ana i kekahi mau mea, i hiki ole i na kauka, ahiki i ke kaawale ana o kela pilikia.  Ua aie nui o Keoni Hikona no kona ola ana i kou makuahine, e hiki ole ai i kela kanaka ke uku aku ma ke gula ame ke dala.  Ua hala nae kou makuahine, me ka nui e kona ohana,” alaila kulou iho la kona poo ilalo no kekahi mau sekona, a iaia i aea hou ae ai iluna a nana mai la ia Elioka, aole o kela nanaina uahoa maluna o kona mau maka, aka o ka oluolu, a kamailio hou mai la me ka leo malie:

            “No kekahi mau makahiki loihi ko’u kaawale ana i na aina mamao, a ia’u i hoi hou mai nei, o kekahi wahi mua loa a’u i kipa aku ai e nana, o ia no kela wahi a kou mau makua i noho ai, aole nae he poe i loaa ia’u malaila, he mehameha pu wale no me ka nele i na kanaka,” alaila holoi okoa ae la oia i kekahi mau kulu waimaka o ka hiolo ana mai kona mau lihilihimaka mai, mamuli paha o kona hoomanao no kela mau la kahiko i hala.

            “Ae, aohe poe e noho nei ma kela home,” i pane aku ai o Elioka, me ka nui ana iho o kona hanu.  “Ke kaumaha loa nei au i k ahoike ana aku ia oe, no ka hiki ole ke hoomaemae hou ia kela home kahiko, mamuli o ka pilikia ma ko’u aoao i ka wa i make aku ai o ko’u makuakane, a koe hookahi iho la kuu makuahine me a’u, he kulana nele maoli ko maua, no ia nele, ua konoia mai kuu makuahine, e moraki aku i ka aina ame ko makou home, i loaa ai ke dala e pono ai ko maua noho ana, a i hiki ai no hoi e loaa ia’u he hoonauauo ana; a mai kela manawa mai ahiki wale no i keia wa, o ka ukupanee wale no ka’u e uku mau ana, ina paha he nui ka’u mau loaa, e hauoli loa ana au, i ka hoomaemae hou ana aku i kela home.”

            “Heaha no hoi kou kumu i kuai hoolilo ole aku ai i kela home, a ma ke dala ka malama?” me ka nana pono loa ana aku o ke kanaka malihini ma na maka o Elioka.

            “Elike me ka loihi o ka waiho ana o ka ikaika iloko o kuu kino, e hiki ai ia’u ke huli i ke dala, pela ka loihi o kela home kahiko e waiho malie ai, me ka hoolilo ole ia, no ka mea he home ia o ko’u mau makua i noho ai me ke aloha, no na makahiki loihi, a maloko no hoi o ia home au i hanaiia ai, ahiki i ko’u kanaka makua ana, nolaila he hana ku i ka lokoino ko’u hoolilo ana aku i kela home, no kekahi mau dala, e pau wale ai no i ka uhauhaia.”

            “Heaha kau hana i wahi e pono ai kou noho ana?” wahi hou a ke kanaka malihini me he mea la, ua kupono ka pane a Elioka i kamailio mai ai i kona manao, no ka makemake ole o ke kanaka opio e kuai i kona home.

            “He kahakii ka’u hana!”

            “No kela hana, aole he mea i maopopo ia’u, koe wale no keia, malia paha he poe kekahi i makemake e hanaia i mau kii no lakou a hookomo iloko o ke tini!”

            Ma kela pane a ke kanaka malihini, noonoo iho la o Elioka aole i hoihoi kela kanaka i ke ano o kana oihana, eia nae aole ona pane hou mai, a ia wa i kamailio hou aku ai ka malihini:

            “Ke ole au e kuhihewa, he noho hookahi no kou ano e noho nei i keia manawa, aole oe i lawe mai i kekahi wahine, i kokoolua nou e hauoli ai ma keia honua.”

(Aole i pau.)