Ka Nupepa Kuokoa, Volume LXII, Number 24, 14 June 1923 — E HAAWIIA NA MAHALO ANA. [ARTICLE]

E HAAWIIA NA MAHALO ANA.

Ua hala aku la ka la o ka Na'i Aupuni Kamehameha, me na hana hoohiwahiwa apau i hoomakaukauia; ua waiho iho nae ia mahope nei, i kekahi kiahoomanao, na ka lehulehu e poina ole ai, ma o na hana hoikeike ku i ka nani, i malamaia e na Hawaii maloko ae nei o ke awa. O na hana hoikeike hookahakaha ma ka po o ka Poakahi nei, ua hoike mai ia, i ka nui o na hana i hoomakaukauia me ka hoomanawanui, e na ahahui like ole, a maluna o ka poe na lakou i hana a hoolilo, i kela mau hoikeike, i mea ku i ka nani me ke kilakila, na mahalo ame na hoomaikai ana e pono ai. Eia na hoailona maopopo loa, no ka holomua o na Hawaii kakaikahi e noho mai la ma na aina hoopulapula ma Kalamaula, Molokai, ke hoea mai nei no keia kulanakauhale. Ua ai na hoa oloko o ka ahaolelo lahui i ka ipu momona i kanuia e kela mau Hawaii, ua hoea mai na ipu i Honolulu nei, me kekahi mau meauīu e ae; e pau anei na manao hoomaloka me hoopohala o ka poe hoonaikola? O. ke a'o i na Hawaii i loaa ole ia lakou na aina hoopulapula i keia manawa, o ia no ka hoomakaukau ana no lakou iho, e malama i ke dala, ma kc ano hoomakaulii, a hoea mai i ka wa pono, alaila e hooikaika e loaa he aina hoopulapula, ke weheia aku he mau aina hou aku e na Komisina Home Hawaii. Ke paila nei ka ipuhao kalaiaina iloko o keia mau la, he mau inahina helu wale no koe, alaila hoea mai i ka wa koho baloka, no na luna oihana o na kalana lehulehu o kakou. E wae i na kanaka i hiki ke hilinaiia no ko lakou kulana hoopono, a makee i ka pololei, o lilo auanei ke koho'ana i ka poe kupono ole, i mea e mihi ai mahope aku! Ina elike me ko ka Lunahoomalu David Trask, o ke komisina makai ano, ke kulana o na luna oihana na lakou e hooko nei i ke kanawai, he mea maopopo loa, e hoemiia mai ana na hana hakihaki kanawai, ma keia kulanakauhale, a e wiwo ana hoi ka poe hana karaima, aole elike me keia manawa, ka loaa ole o ia mea he maka'u iwaena o kekahi poe e lawelawe mai nei i na hana ku-e kanawai.