Ka Nupepa Kuokoa, Volume LXII, Number 21, 24 May 1923 — Page 6
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
He Moolelo Walohia
Ko Vekinia Waiwai Hooilina
Hoopuhiliia na Hana a ka Mea Manao
Ino---Kau I ke Aki I ka
Manawa Hope
“No kou pono, a no ka pono hoi o Miss Alekanedero, elike me kau i makemake mai ai ia’u e hana aku, i hooili ole ia na ahewa ana maluna ou, ke hoike aku nei au i kuu manao imua ou i nei manawa e hoao ana au e hoahiuhiu mai iaia mai oiai nae, e hoike aku no au ia oe i nei manawa, ua nui kuu makemake ame kuu aloha iaia iloko o keia manawa pokole loa a maua o ka hui ana; he nui a he lehulehu na kaikamahine u’i a’u o ka ike a halawai ana, eia nae, aole hookahi o ia mau kaikamahine I hoohilia mai i kuu puuwai aole no hoi hookahi o lakou i kaili aku i ke aloha mailoko aku o kuu puuwai elike me ia ia Miss Alekanedero, a o ka makamua loa no hoi oia o na kaikamahine nohea loa o ka helehelena ame ka waipahe o na olelo a’u i halawai ai.
“Me kuu hunahuna ole iho i kela manao, a oiai o kaua wale no hoi maanei, a o oe hookahi wale no ke lohe aku ana i keia mea ke hoike aku nei au ia oe he kaikamahine huapala maoli oia a’u i ike ai, a ina o oe kona makuakane nana mai oia ma kahi o kou lilo wale ana no he kahu malama ipu poki nona, ua loaa ia’u keia manao e nonoi aku ia oe no kona lima ma ka mare, me keia manao nae, i kekahi la o hiki mai ana e lilo ana kona aloha ia’u mahope o ko maua hui mau ana,” a hooki iho la ke kanaka opio i kana kamailio ana, me ka pii ana ae o ka ula ma kona mau papalina.
Nana mai la o Mr. Naika iaia me ka helehelena hoihoi no nei hunahuna ole o ke kanaka opio i kona manao, a i mai la.
“O ka’u mea i noonoo iho la e hoahewa mai ana paha oe ia’u no ko’u hoike ole ana aku ia oe i keia manao mamua, a i ole ua hikiwawe loa paha keia hoike ana aku nei au i nei manao ia oe,” wahi ana. “aka e ike mai no nae oe ua oi aku ka hana a kahi anela liilii Kupida maalea ma ke pahele ana i na noonoo o ka poe opio, a ua oi aku no hoi kana hana hewa ana mamua o ka mea kupono i na kanaka o keia ao, nolaila mai na karaima lehulehu ame na hana hoopoino e ae mamua o ka hiki ke lapaau aku.
“No’u iho, he nui ko’u makemake ia oe, e Mr. Hamiletona, no kou mau ano maikai a pau a’u i ike aku ai me ka hoohewahewa ole, he mau ano maikai e hiki koke ai no i kekahi mea ke ike mai he kanaka opio oe i hoonaauao kiekie ia, ua ike i na loina maikai apau o ka hoolauna ana, ua pakaia a a’oaia ma na ano maikai apau e, lilo ia i keonimana oiaio.
“A eia hou, ina he makemake oe e loaa ka hookamaaina loa ana ia oe ame Miss Alekanedero ea, ma nei hope aku, alaila e haawi aku ana au ia oe i ka inoa o kona wahi i noho ai, a ia wahi oe e hele ponoi ae ai, ke makemake oe e launa me ia maloko o kona home ponoi, a imua hoi o kona makuahine, a ina no kou makemake e lilo oia i wahine mare nana, imua no @ kona makuahine ponoi o e noi aku ai, ka mea i kuleana iaia @ loaa ole ai kekahi akeakea a i ole kekahi pohaku paha e okupe ai oe ma kou alahele.
“Me ka mahalo nui ia oe, e Mr. Naita no kena mau hoakaka maikai au, a mai hoahewa oe ia oe iho,” i pane aku ai o Rupata me ka helehelena e haawi aku ana i kana hoomaikai me ka mahalo pu i ke keonimana aoo. “Ua ike au a ua hoomaopopo o kau mea i hana mai ai imua o’u i keia manawa ua hana wale mai no oe ma ka mea au i manaoio ai oia ka pololei ame ka maluhia, aole ma ko’u aoao wale no aka no kela kaikamahine hanai kekahi au.”
“O, me ka mahalo nui ia oe,” a ia manawa hookahi, hopu mai la o Mr. Naita i ka lima o Rupata a puliki iho la me ka lulu ana iho, e hoike ana hoi i ka pumehana loa o ke aloha ona no ke kanaka opio ana e mahalo nui ana ia manawa, no ka paa rula ame ke kaulana keonimana maoli no; “ina o Veki a he kaikamahine ponoi na’u e haawi koke aku ana au i ko’u ae i ka manawa au, e Mr. Hamiletona, e noi mai ai iaia i wahine. Ina no ko hoi hou aku I Nu Ioka e hooikaika ana au ma na ano apau elike me ka man ai loaa ia’u e kokua aku i kou manao, e ke kanaka opio, me ka oiaio loa, ina nae e mau ana ka paa o kou manao ia manawa elike me ia iI nei manawa, no Veki.”
“O, lokomaikai wale no ka hoi oe, e Mr. Hita i kekahi kamaka malihini loa ia oe,” i haawi aku ai o Mr. Hamiletona i kona mahalo,” a oiai aohe paha e loaa ana ia’u kekahi manawa kupono hou e noi aku ai o keia wale no, nolaila e hoike mai oe ia’u i ko Miss Alekanedero wahi i noho ai ma Nu Ioka, a ke loaa mai ia alaila e manao iho ana au o kekahi hana kokua maikai loa ia au e hana mai ai no ko’u pono.”
Alaila huki ae la o Mr. Niata i kekahi pepa a kakau iho la i ka inoa o ke alanui ame ka helu, a ia manawa hookahi ke noonoo pu la oia i ke kumu o ko ke kanaka opio olelo ana aku iaia aohe manawa kupono e ae e loaa ai iaia hoike no kahi o Miss Alekanedero i noho ana, o keia manawa wale no, me he mea la i ka Mr. Naita noonoo iho e hoi loa ana no paha auanei ke kanaka opio i kona wahi mea ka loaa ole he manawa nona e hui hou ai me lakou ma ia hope aku.
He manawa liilii ma ia hope iho, mahope o ko laua kamailio liilii ana maluna o kekahi mau kumuhana like ole, ua hoi like aku la ia ka hokele, a ia hoea ana aku a laua hele koke aku la no o Rupata e huli i ka luna nui o ka huakai makaikai, a aole oia I hui hou ae me Mr. Naita ma a hala he hora hookahi ma ia hope iho.
Ua ike ae nei kaua, e ka makamaka heluhelu, i ke kumu nui o ko Rupata hele koke ana aku e huli i ka luna nui Remona, no kona iini loa ia manawa e hookaawale koke iaia, i ole ai oia e hui hou me Miss Alekanedero, ka mea ana e makemake ole ana e hui hou elike me ko laua hui mau ana i na la mamua aku.
Ma ia hoi ana mai a Rupata ua ikeia aku kona loli loa mai ko ka manawa mua mai. Kela ano hoihoi a laiwale ona aole ia, ua kukule oia i ka hapanui o ka manawa, me he mea la aohe uhane ola iloko ona. O Veki ka mea mua loa i ike aku ia loli loa o Rupata, a ua lilo hoi ia ano kukule o Rupata i mea nui ana e nalu ai me ka ninau mau iho heaha la ke kumu. Ma ia manawa he kakaikahi loa kona manawa hui mai me Veki, aole hoi elike aku me mamua ka pinai mau i ka makaha, oiai nae aole oia i mamao loa mai ka hokele aku a lakou e noho ana ia manawa.
Mahope o ka pau ana o na hana, hoohauoli o ia ahiahi iho a hoi kela ame keia no kona rumi iho, hele aku la o Rupata a hui me Veki me ka naau kaumaha, a ia hui ana ae o laua nana ae la o Veki iluna iaia me ka helehelena kahaha, me ka minoaka nae ma kona mau papalina, a i lilo ai hoi ia nana ana ae ana iluna i hana e aneane loa ai no ke kanaka opio e hahaki i kana olelo hooholo i hana ai mai ka manawa mai o kona ike hope ana iaia, a i ae la:
“E Mr. Hamiletona, heaha ke kumu o ka loli ana o kou mau ano i maa ia’u mamua aku nei, ua kukule maoli oe i ka’u nana aku me kekahi manawa i hala ae nei, he nu hou kaumaha anei ka i loaa mai ia oe, aiI ole aohe paha he maikai o kou ola kino?”
“Aole no kekahi o ia mau kumu au i ninau mai la,” i pane iho ai o Mr. Hamiletona, oiai kona mau maka e hakapono iho ana maluna o na maka o Veki.” Hopokahi kumu nui a o ia no ka’u makemake ai e hoike aku ia oe i nei manawa. O kela mau hui mau ana a kaua me na manao hauoli o na la i hala aole ana la pela ma nei mua aku, a no ia hooneleia i loaa iho ai ia’u ke kaumaha me ka minamina nui no ka loaa ole o kekahi launa maikai hou ana me na hoaloha ma nei mua aku. Ua hooholo au i kuu manao e holo pu me kela poe e holo ana no Mekiko a e holo koke aku ana au me lakou, a o ko kaua kaawale ana ia.”
“Auwe no ka hoi e! E holo io ana anei oe?” i ninau ae ai o Veki me ke kahaha, me ka haikea koke ae la o kona helehelena ia manawa. He mea kahaha loa i ko Veki manao ka hoike mua ole ana aku o Rupata iaia no keia holo koke aku ana i Mekiko. Ua maopopo iaia ko Rupata manao mamua e holo no ka Hema aole nae i maopopo iaia e holo koke aku ana iloko o ka manawa pokole loa.
“Ae, o keia ka mea oiaio,” i pane iho ai oia me ka kaumaha o kona noonoo no ka ike iho i ko Veki helehelena kaumaha. Ua hoolala mai nei kekahi mau keonimana o ka huakai a Remona e holo no ka Hema, e hoea mua aku ana keia poe i na Mokupuni Sana Barbara a lele aku iuka ma San Diego, a mailaila aku e holo ai ma ka kaaahi no Mekiko loa e holo pu ai me lakou, a pela au i hooholo ai i kuu manao no ka holo, a e holo aku ana au me lakou.”
“Hikiwawe no ka hoi, aole no hoi e hiki ia oe ka kali iki iho a kahi manawa kupono alaila holo? O, e mehameha hou ana ka hoi au, aohe hoahele a hoakamailio e hauoli ai ka noho ana o keia wahi, a i ole, e loaa ai ka hoa nana e hoolaukanaka mai!”
Ia manawa, elike me ka pua nani i mae i ka pa ana a ka makani wela mai ka Hema mai, a elike hoi me ka malamalama o ka la a o ka mahina paha, i hunaia ae a nalowale, pela no ka Veki hoomaopopo iho ai manawa ke kaawale aku o Rupata. I kona noonoo iho ia manawa aohe meia i koe a hoohauoli mai ai iaia iloko o ke koena aku o ka lakou huakai makaikai.
Aole o Veki i hoomaopopo mamua i ka nui o kona kaukai aku i kona hauole maluna o Rupata ahiki iho la i keia manawa, e eia o Rupata ke hele nei, e hele ana paha a hoomanao hou mai iaia i kekahi manawa aku a aole paha. Malia paha o ko laua hui hope loa ana iho la no keia; me ke kanalua ole iloko ona i ka manawa e pau ai o ko Rupata manawa i aeia mai ai no ka hele makaikai ana e hoi hou aku ana oia i Enelani, mahope o kona hoi ana mai Mekiko mai, a o ka pau ana ia o na la hauoli loa o kona ola ana.
Ke uwe la oia maloko o kona naau no keia hookaawale ia ana o laua, a ke noonoo iho oia nona ua lilo ke kanaka opio Pelekane i mea i oi aku ke alohaia mamua o ka hoaloha wale no.
Ia mau minuke ua hiki ole iaia ke ike iho no kana mea e pane mai ai ia Rupata. Ke ku la no oia me ka puai leo ole, a elike me ke aiai o kona mau lihilihi lole ia manawa, e elike hoi me ke aiai o ka hau i ke kau hooilo, pela ke keokeo pu o kona helehelena a ke kanaka opio e nana aku ana, a i ka hala ana nae o kekahi manawa iaia o ke ku mumule ana I mai la:
“Hikiwawe loa maoli no ka hoi kou hoololi ana i kau papahana, aole anei pela?”
“Pela no, aka he hana keia a’u i moeuhane mua ole ai penei iho la ka hikiwawe loa o ko Mr. Remona nee ana aku no Mekiko, a oiai, he nui kela poe e holo ana e laukanaka ai no hoi ka hele pu ana, pela au i hooholo ai i kuu mamao e hele koke me lakou.” Ua hoao o Rupata e kamailio aku me kona ano leo i maa mau mamua aku, eia nae, aohe hiki, ua haalulu kona leo; “hookahi no kumu nui o ko’u makemake ana e holo koke me kela poe, a o ia keia, malia aole paha e loaa ana ia’u ka hookuuia mai no kekahi manawa hou aku, o keia iho la no ka manawa i maopopo loa ia’u nolaila oiai au i Amerika nei, o keia wale no ka manawa kupono no’u e holo aku ai e makaikai i na wahi apau o keia aupuni, a i ko’u nana iho o keia io no ka manawa kupuno, aole i ikeia aku kekahi manawa hou aku.”
He liilii loa kahi manao kupaa a kuokoa me Veki ia manawa e hiki ai iaia ke hookuoo a o kona maule iho ka hope. Iloko o kona mau la o ke ola ana o keia ka makamua loa o ka loaa ana o na hoao ikaika loa iaia, aohe ona makemake i hooko ole ia, o keia kaawale ae o laua ua like me kekahi popo uwila i lele mai ka lela mai a pa oia e hiki ole ai iaia ke aolo ai i ka chacha.
Ua ike a hoomaopopo oia nona iho ia manawa aole, pono iaia e hoike mai i kekahi hoailona o kona aloha i ke kanaka opio e ahuwale aku ai kona mau manao, eia nae, he hana paakiki loa ia iaia ia manawa ka uumi ana iho e poe maloko oiai ka waimaka e haale mai ana ma kona mau lihilihi, he mau waimaka kumakaia i ka meahuna iloko lilo o kona puuwai.
Haalulu kona mau lehelehe, a e holowai mai ana hoi kona mau maka i na waimaka i ka manawa ana i aea ae ai iluna ia Rupata a i ae la:
“Ke kaumaha loa nei au no kou kaawale aku, e Mr. Hamiletona, ke uwe nui nei kuu uhane nou, e nalohia ana kou mau maka mai ka ike mau ia ana aku. Aole no hoi anei e hiki ia oe ke hoopanee aku i kou holo a kekahi wa aku?”
“Pela ana anei? E lilo ana anei ko’u kaawale aku i mea hookaumaha loa aku i kou noonoo? Ina owau pu kekahi e hookaumahaia iho ana no ko kaua hookaawaleia, aka nae, e Miss Alekanedero, e hoea hou aku ana no hoi au i Nu Ioka iloko o na la mua o ke kupulau. Pehea ia, e hiki ana anei ia’u ke manaolana iho e hookipaia aku ana au i kou home a hookamaaina hou ia kaua? E hiki ana anei ia’u ke ike aku ia oe maloko o kou home? Ina pela, e hoomama hoi ha oe i kou noonoo, no ka mea, e hui hou aku ana no hoi kaua i ka wa pono,” i pane iho ai ke kanaka opio ma ke ano e hoonana iho ana i ka noonoo o ke kaikamahine i helelei na waimaka ia manawa.
No keia mau olelo hoolana loa a Rupata lamalama ae la ko Veki helehelena no ka hauoli. Me he mea la ua helelei aku kekahi mea kaumaha mai kona puuwai aku ia manawa, a he manaolana hauoli hou ka i loaa aku iaia a i hoomaka ae ka opuu ana, me he pua la iloko o kona naau.
“Ae; me ka oiaio loa, kipa ae i ka hale, e Mr. Hamiletona, a mai hoomakae no ka mea, ke maopopo loa nei ia’u, e hauoli ana ka madame, kuu mama, ke hoike aku au iaia no kou kipa ae i ka hale, a e hauoli pu ana no hoi oia ke halawai pu oia me oe,” i pane mai oia me ka oluolu ame ka hauoli pu.
“O, ina pela ana ea, ke haawi mua aku nei au i ko’u mahalo ia oe a iaia pu. A pehea ana oe e Miss Alekanedero, e hauoli pu ana no anei oe ke ike mai ia’u?” I ninau aku ai o Rupata me kahi leo liilii, a me ka haka pono iho hoi o kona mau maka i ka helehelena o Veki.
“O, owau ana paha ka mea oi aku o ka hauoli, no ka mea, ua kamaaina mua iho nei hoi au ia oe,” wahi a Veki me ka pii ae la o ka ula ma kona mau papalina.
No ka hookokoke ana mai o kekahi mea ma kahi a laua e ku ana, a ua ike iho la hoi ke kanaka opio he hana maikai ole nana ke ku hou ana iho e kamailio me Veki, i kau la:
(Aole I pau.)
He Moolelo no
KA MEAHUNA POHIHIHI
A I OLE
Ka hoohokaia Ana o ka Manao Puuwai o ka Mea Lili—He Moolelo I Piha me na
Wiliau o ke Aloha
“O, he keu keia a ka apana lole uaua me ka paa, a ua lawa kona ikaka no ka li ana i kekahi kanaka iluna o ke kumulaau,” wahi a Keoni Naika, me ka hoao ana mai e minoaka. Eia nae ke mau la no ka haikea maluna o kona helehelena.
“Aole o’u wahi noonoo iki, he mea hiki keia ke hoohanaia no kela hana,” me ka imoimo ana iho nae o kekahi maka, a i hou mai la: “Ua lohe wale no au no ka hiki i ke kaula silika, ke hoohanaia e na kanaka o ke aupuni, no ka li ana i kekahi poe hana karaima; aka ina owau kekahi mea I manao e li i ko’u enemi me kekahi kaula, aole au e lawe mai ana i kekahi apana lole hauliuli o keia ano, no ka mea he waihooluu hoomaka’uka’u kawaihooluu eleele.”
Ua koho pono no keia mea ia’u, oiai ke nana mai la no hoi oe, he hauliuli ko’u ili, a he inoa ko’u i kupono loa e lawe i na mea hauliuli apau,” i pane hookanaaho wale ae ai no o Keoni Naika, ma ke ano e ike ole aku ai kona kokoolua, i kona ano pihoihoi a haalulu.
Aia no o Simona Kaapuni ke nana pono la i kekahi piko o ua apana lole hoopumehana la, a ike iho la oia i kekahi wahi ua apana lole hoopumehana la, a ike iho la oia i kekahi wahi ua nahae, a o ia kana o ka ninau koke ana mai:
“Ea, ua ike no anei oe ua nahae keia wahi o ko mea hoopumehana a’i?”
“He keu aku no ka hoi kou nowelo,” I pane mai ai o Keoni Naika, me ka huki ino ana aku i ka apana lole loihi. “Ua ike mua no au i kena nahae, ua lou i kekahi wahi ia’u i hele ai i ka holoholo, i kekahi po, o ka hooilo aku nei i hala, a pela kena puka au o ka ike ana iho nei.
“Alaila eia ihea kela apana o ka nahae ana mai keia wahi aku?” wahi a Simona, me he mea la, e hoike okoa aku ana kona ano, aole he wahi manao iki iloko ona, no kekahi mea e kau aku ai na hoohuoi ana maluna o Keoni Naika.
“Aole au i ike, malia paha aia no ma kela wahi i lou ai, a nahae, aole nae au i hele aku e nana hou,” wahi e Keoni Naika me ka oni ino ana ae, o ka hina hou aku la no ia o ke pakaukau ilalo.
“Ua lawa ka kaua paani ana no keia la, akahi iho la ka hoi ko’u hoonaukiuki i keia pakaukau,” wahi ana, me ka lalau ana iho i ke pakaukau a hoopili ae la ma ka paia, me ka noke ana iho i ka namunamu i kekahi mau olelo a Simeona Kaapuni e hiki ole aku ai ke maopopo, alaila kulou iho la ilalo, no ka ohi ana i na mu, a ke hiolo la hoi ka hou ma kona mau papalina, me he mea la he hana ikaika loa kana e lawelawe la ia manawa.
“Heaha la hoi, ua lawa keia paani ana o kaua, a ke hopohopo nei au, aole he maika o kou ola kino i keia la, elike me na la aku nei i hala. Malia paha no ko kaua noke mau i ka paani a hala kekahi mau hora loihi o ka la, me ka uuku loa o ka hoomaha, pela i ano e mai ai kou ola kino, nolaila he mea maikai no ia kaua ke hoalo i ka paani ana no kekahi mau la, ke lilo ia i mea maikai i kou manao.”
“O ka mea oi loa aku paha ia o ka pono, ua ike maoli iho no au i ko’u maluhiluhi,” me ka holoi ana ae o ua o Keoni Naika i ka hou ma kona lae.
“Ma na mea i kamailioia mai ia’u” i hoomau aku ai no o simona Kaapuni i kana kamailio ana, me ka haka pono hoi o kana nana ana mai ma na maka o Keoni Naika,” ua lilo ka paani mu ana, i mea hoopilikia aku i ka noonoo o kekahi poe elike me kekahi ninau hehunaau paakiki loa. Ma ka’u hoomaopopo iloko o keia mau manawa a kaua e paani nei, ua oi ae na lanakila i loaa ma ko’u aoao mamua ou, a ina oe e makaukau ana no ka paani hou ana, iI hakalia wale no i kou kamailio mai ia’u, ua hiki ia’u ke hele mai in na wa apua e loaa ae ai ke kono mai ia oe mai.”
He ano ole wale no kela mau olelo i kamailioia aku e Simona Kaapuni, eia nae, iloko o ka noonoo o Keoni Naika, me he mea la, he mau olelo kela e hoike okoa aku ana, no ka hoea mai i kekahi manawa, e lilo maoli aku ai oia i pio na keia kanaka elemakule, a o ke mea wale no nana i hoomama ae I kona manao, aole ona wahi mea a ike mai, aia he hoailona ana e hoohuoi ai no ko Simona Kaapuni ano maoli, koe wale no kela kulana elemakule, a noho malie.
I ka haalele ana aku o Simona Kaapuni I ka rumi o Keoni Naika, hoi pololei aku la oia noloko o kona rumi, ki mai la I ka puka a paa, alaila noho iho la maluna o kekahi noho, hoike mai la hoi kona helehelena i ke kuoo, alaila hapai ae la I kona lima hema iluna, me ka noko ana I ka helu, elike me kana hana mau, a ke nana aku, ua hele na maka o ua kanaka nei a hulili.
Mahope o kona-namunamu ana iho i kekahi mau huaolelo, lalau ae la oia i kekahi buke pakeke hoomanao, alaila mailoko mai o kela buke, i wehe ae ai oia i kekahi wahi apana lole silika uuku, i hele a alu’a, a iaia i paa ae ai iloko o kona lima, hooho ae la i keia mau olelo:
“Aole i maopopo ia’u, ka hiki ana i ka apana lole silika a Keoni Naika ke li i kekahi kanaka, aka nae ke ole au e kuhihewa, e hoea mai ana i ka manawa a kela apana lole hookahi, e li aku ai i ka ona nona ia waiwai, a o ia ka’u e kaena ae nei, aole i poho wale kau mau hooikaika ana e Simona, eia nae ma ke anuu @ e nee malie nei.”
MOKUNA XXL
Iloko o ka hapa hope o ka mahina o Augate, hooholo iho la o Mr. Kuene, kela hoaloha maikai loa e noho pu ana me Gai maloko o ka hale hoolimalima hookahi, a o ke kanaka hoi, nana i kokua mai, ma ka hoonani ana i na puka aniani o ko Gai rumi, a uluwehi maoli, e hele holoholo maluna o kona moku, i kau a mea o ka nui o ka wela.
Ua lilo maoli keia kanaka opio, i hoaloha maikai loa no Gai ame kona kaikuahine, a he mau manawa lehulehu, ka Mr. Kuene, o ka lawe ana ia laua maluna o kona moku, no ka makaikai ana ma kekahi mau wahi o na aekai o ke kulanakauhale, ma ia mau huakai makaikai a lakou, ua ike maoli iho ke kaikunane ame kona kaikuahine, i ka maikai o ko laua mauola kino.
Aole nae ia Gai ame Josepine wale no o Mr. Kuene i pahola aku ai i kela hana maikai, aka ua kono pu aku no oia ia Mr. Kelekolio ame Tiodora, e hele pu me ia, i ka holoholo maluna o kona moku, a i kekahi manawa, ua hui pu mai o Gai ame Josepine ma ia mau huakai, me ka hooliloia ana o kekahi manawa, e lakou apau iloko na hana e hoohauoliia mai ai ka manao.
Iloko nae o keia mau manawa a lakou e hui mau nei, aole loa o Gai i kamailio aku he hookahi huaolelo imua o Tiodora, o ke ano hooipoipo, aku ua malama mau oia i kona kulana keonimana, me kona nana ole, i ka hoike okoa ana aku o Tiodora iaia, ma kela po, a lakou o ka hoi ana mai, mahope o ka pau ana o na hana keaka, aka nae aia iloko o ua kanaka opio nei ua manao mahalo, me ka haaheo, iaia i ike ku ai, i ka hooiia ae o ka wahine u’i o Tiodora.
Ua hoea mai nae i ka pau ana o kela mau huakai makaikai a lakou, no ka mea ua hooholo o Mr. Kuene, e holo aku no na aina mamao, e hala ai iaia kekahi mau mahina, mamua o ka huli hoi hou ana mai no Ladana. Ua koi ikaika mai oia ia Gai Wakona, e hele pu ma kana huakai, ua inoole paakiki nae o Gai, mamuli o kona noonoo ana iho, he hana maikai ole nana, ka holo ana no na aina mamao, me kona maopopo no, aia ke kau mau la na hoohuoi no ke karaima pepehikanaka maluna ona.
Iloko no hoi o keia Manawa hookahi, a Mr. Kuene e hoolala nei no kana huakai no ka aina mamao, o Mr. Kelekolio kekahi i hoolala no ka lawe hoomakaikai ana ia Tiodora no kekahi mau wahi, e hala ai ka mahina hookahi. Ua koi ikaika mai la o Tiodora ia Josepine e hele pu lakou ma kela huakai makaikai, aole nae he ae o Josepine, mamuli o kona manao, e lilo ana kona haalele iho i kona kaikunane mahope, l kumu nona e mehameha loa ai.
I ka hoea ana mai i ka manawa e kaawale aku ai o Mr. Kelekolio me Tiodora a pela hoi o Mr. Kuene ma kana huakai, ua ku a mehameha maoli o Gai Wakona me kona kaikuahine, o ka mea wale no nana i hoomama ae i ko Gai noonoo, o ia no kona hoopapau ana i kona namawa, ma kaihuli ikaika ana i na haawina hoonaauao maloko o kana mau buke lehulehu.
No ko laua mehameha loa I ka noho kokoolua, hooholo iho la o Gai, e hele laua i ka holoholo, ma kekakhi kakahiaka iloko o ka paka, malia he mea ia e hoolanaia ae ai o na manao; nolaila ma ka hora ewalu o ke kakahiaka, ua haalele iho la na opio i ko laua mau rumi, a aole no hoi laua i hoi koke mai ahiki i ka hora eono o ke ahiahi.
He ahiahi ano hu’ihu’I kela a laua o ka hoi ana mai, eia nae ua hoopihaia laua I na manao hauoli, me ka kamailio ana me he mea la, aole loa laua I halawai iki me kekahi mau pilikia o keia noho ana.
Ia laua nae i hoea aku ai no ka puka o ko laua rumi hoolimalima, ua hookahaha loa ia mai ko laua manao, i ka ike ana aku i kekahi kanaka malihini e ku mai ana, a haupu koke ae la no o Gai Wakona, malia paha e kakali ana kela kanaka ia laua, a o ia kana o ka ninau ana aku:
“E kakali ana anei oe i kekahi mea ma keia wahi.”
“Ae, e kakali ana au i ke kanaka e noho nei maloko o keia mau rumi hoolimalima,” wahi a ke kanaka malihini, me ka haka pono ana mai o kana nana ana maluna o ke kanaka opio.
“Ina pela, owau ka mea au i makemake ai e ike. O Mr. Wakona ko’u inoa, heaha kau i makemake ai ia’u e hana aku nou?” wahi a Gai, me ka hookomo ana aku i ke ki iloko o ka puka, no ka wehe ana ae, i hookipa aku ai oia i ke kanaka malihini iloko.
“He hana ano nui ka’u o ka hoea ana mai nei,” wahi a ke kanaka malihini, iaia i komo aku ai iloko o ka rumi, me ka alaalawa ana ae o kana nana ana mao a maanei o ke keena hookipa.
“E noho iho iluna o keia noho,” me ka uwai ana mai o Gai Wakona i ka noho imua o ka malihini, me ka pane hou ana mai nae: “E loaa anei ia’u ka oluoluia mai, no ka inoa o ka’u malihini i keia ahiahi?”
“O Pita ko’u inoa, ka Makai Pita, o ka oihana makaikiu, o ke aupuni o ka moiwahine, a ke noi aku nei au i kau mau huikala ana mai e ka kanaka opio. Eia me a’u kekahi palapala huli, e haawi ana ia’u i ka mana, no ka huli ana aku ialoko nei o keia mau rumi, no kekahi mau ike, I piliiI kekahi hihia ano nui, i hoea ae imua o ka aha, he mau mahina aku nei i hala.
Hakalia no a pau ke kamailio ana mai a ua kanaka malihini nei, hookomo ae la oia i kekahi ulili iloko o kona waha, o ke kani kapalili aku la no ai, aole i emo iho, ku ana no kekahi kanaka ma ka puka:
“E ku kiai oe ma kena puka, oiai au e hooko ana i ka’u hana.” Alaila huli ae la ka makaikiu imua o Gai, a kamailio hou aku la.
“O ka’u a’o wale no imua ou e ke kanaka opio, e noho malie oe, me ke ku-e ole mai, i ka’u hana, no ka mea aole he hana maalahi, ka hoao ana mai o kekahi mea, e ku-e i ka hana a ka makai o ke aupuni.”
Aole a Gai pane no kela mau olelo ku i ka hoohaahaa a ka makaikiu, aka no Josepine nae, ua hele oia a piha loa i ka inaina, i kela kanaka, i ka paa rula ole, a o ia kana o ka hele ana mai @ ku iho la ma ka aoao o kona kaikunane, me ka pane ana aku oiai hoi ka makaikiu, e noke ana i ka huli ialoko o ka rumi hookipa:
“E ku malie wale aku ana no anei oe e Gai, a nana i ka hana a kela kanaka, me kou ku-e ole aku?”
“E hamau e Josepine,” wahi a Gai, me ka paa ana mai o kekahi lima maluna o ka poohiwi o kona kaikuahine. “Aohe mea hiki ia kaua ke hana aku, a hoi iho no hoi, aole a kaua mea e maka’u ai, a hopohopo ai paha, ina e huliia ana na wahi apau oloko o ko kaua mau rumi.”
“Aole he mea okoa aku nana i hoouna mai nei i keia makaikiu, o Keoni Naika no ia,” i hawanawana aku ai o Josepine ma ka pepeiao o kona kaikunane.
“Malia paha pela, aka aohe mea i maopopo ia’u,” wahi a Gai, me ka nui ana iho o kona hanu.”
“Ua ku maoli keia ano hana i ka hoopilikia ia kaua, pehea la ka loihi o keia mau hana hoohaahaa, au i koho ai, e hana mau ia mai maluna o kaua? No’u iho, ua aneane pau maoli ko’u hoomanawanui, no keia ano hana.”
“Auhea oe e kuu kaikuahine, mai haawipio wale oe i kou manao koa apau, no ka mea iloko o keia mau mahina loihi i kaahope aku nei, ua ku pu mai oe me a’u, me ka uumi hoomanawanui ana, i na hana hoohaahaa a hoohilahila, i kipehiia mai maluna o’u, e haalele mai ana anei oe i ke ku pu ana me a’u i kei, Manawa?
“Ua loaa mau ia’u ka haupuupu ana no kekahi mau mahina ae nei i hala, e hoea mai ana kekahi hana ano nui, eia ka e hooko i’o ia ana ia mea, ke ike nei kaua i keia la.”
Aia no ke kanaka o ke aupuni, ke hoomau la i ka huli ana ialoko o ka rumi hookipa, me ka loaa ole iaia o kekahi mea ano nui, ana i makemake ai, o ka poki humuhumu keia a Josepine, ua noke ia i ke kuekaa, a pela hoi me ke pakaukau kakau a Gai.
He pakaukau kahiko loa kela, i hanaia ma ke ano paa loa he waiwai hooilina mai kona makuakane mai, a o keia wale no ka waiwai hookahi, a laua o ka lawe pu ana mai, i ka wa i haalele aku ai i ka home o ko laua mau makua ma Auseteralia. He hookahi paha kumu ano nui loa o ko Gai malama ana i kela pakaukau, i mea hoomanao no kona makuakane.
I ka Manawa a ka makaikiu, i noi mai ai i ke ki o kela pakaukau, aole o Gai, i au’a iho, aka haawi aku la no oia me ka maikai, ka mea hoi nana i hookahaha aku i ka manao o ke kanaka o ke aupuni, no ka mea ua loaa iaia kekahi manao hoohuoi, e loaa ana iaia kana mea i hele mai ai e huli maloko o kela pakaukau.
I ka hemo ana ae o ke pakaukau, nana iho la oia iakoko @ na ume, he o ia mau no ka waiho maikai o na palapala apau aole ana mea i ike maloko olaila, e waiwai ai kona huli ana; nolaila haalele iho la oia ialoko o ka rumi hookipa, a komo aku la noloko o na rumi moe, me ka hu’e ana i na ukana o na pahulole iwaho, pela ke kuekaa ana ialoko o na wahi waiho lole, a ma ke ano nui ke olelo ae, aole he wahi i koe, i nele iika huliia eia oloko o kela mau rumi.
(Aole I pau)