Ka Nupepa Kuokoa, Volume LXII, Number 19, 10 May 1923 — Hookauia na Ahewa Maluna o Na Aliimoku o ka Mauna Kea Pili ka Hewa i ke Kapena Ame ka Malamamoku no Kela Hooku'i Ana o ka Mauna Kea me ka Mokukuna Mary E. Foster [ARTICLE]

Hookauia na Ahewa Maluna o Na Aliimoku o ka Mauna Kea

Pili ka Hewa i ke Kapena Ame ka Malamamoku no Kela Hooku'i Ana o ka Mauna Kea me ka Mokukuna Mary E. Foster

Mahope iho o ka ninaninau ame ka huli pono ana, i ke kumu o ka hooku'i ana o ka mokuahi Mauna Kea, me ka mokukuna Mary E. Foster, ma ka po o ka Poalima, ka la 20 o ka mahina aku nei o Aperila, i hala, i hookauia ae ai na ahewa ana maluna o ke Kapena J. W. Sack ame ka Malamamoku Henry Makee o ka mokuahi Mauna Kea, ma ka Poaono aku la i hala, me ko laua kapaeia ana mai ko laua mau kulana aku, maluna o kela mokuahi. Ua hala okoa kekahi mau la, ma ka aoao o Kapena Thomas Heeney ame Robert T. Bain, na lunanana o na moku, o ke aupuni federala, ma ka ninaninau ana i na kanaka oluna o na moku a elua, a o ka hopena O kela ninaniau ana, o ia no ka hooiliia ana aku o na ahewa ana maluna o na aliimoku, o ka Mauna Kea, me ke kaawale loa hoi, o ke kapena ame kona mau kanaka, o ka mokukuna Mary E. Foster, mai na ahewa mai. Wahi o na hoakaka ano nui, i hookahua ai na lunanana moku federala i ka laua olelo hooholo, i pili i kela hooku 'i ana o na moku elua, ua pili i na aliimoku oluna o ka Mauna Kea ka hewa, no ka hoohemahema, me ka makaala ole i ka laua hana, i kauohaia ai ma ke kanawai, pili i na mokuahi ohua, o ia ka hoonoho nna i mau kiaipo maluna o ka moku. Ua pili aku ke ko'iko'i o kela hooku'i ana, ma ka aoao o ka mokuahi Mauna Kea. no ka mea ua

hiki i ka Mauna Kea, ke hoololi i kona alahele, i na manawa apau e ikeia ai he poino mamua, aka no ka mokukuna, aole e hiki, oiai e kauka'i ana ma ke ano o ka makani, e hiki ai ke hoololi i kona ihu. Ua kauia ka hoopa 'i o ekolu mahina maluna o ke Kapena Sack, he ekolu mahina, e noho ai oia, me kona lawelawe ole i ka hana hookele moku, a he eha hoi mahina o ka malamamoku e noho ai, me ka nele i kana oihana. Ua hoounaia aku ka hoike i ke kapena o ka moleukuna Mary E. Foster, e hoakaka ana, no ka pili ole o ka hewa iaia ame kona poe kanaka, no kela hooku'i ana o na moku elua i kahi hookahi. Hookomo i ke Koi Ma ke kakahiaka o ka Poaono iho nei, i hookomoia aku ai iloko o ka aha, he hoopii koi o iwakalua kaukani dala, e ka Hawaiian Dreding Company, e ku-e ana i ke kapena ame ka mokukuna Mary E. Foster, no na hooikaika ana ma ka aoao o kela hui, ma o ke kao hoolana la, ma ka huki ana i ka mokukuna oiai e kau ana iluna o ka puko'a mawaho ae nei o Waikiki; pela pu me ke kolo ana mai ahiki i ke awa ae nei. Oiai nae, ua kau aku na ahewa ana no ka hooku'i ana o na moku a elua, maluna o ka mokuahi Mauna Kea, he mea maopopo loa, e ala mai ana kekahi hoopii koipoho ma ka aoao o na ona o ka Mary E. Foster, e ku-e ana i ka hui mokuahi holo pili aina, me kekahi huina dala kanono, ma keia mu. aku.