Ka Nupepa Kuokoa, Volume LXII, Number 17, 26 April 1923 — Page 6

Ka Nupepa Kuokoa

 

 

HE MOOLELO NO

ALIKA

A I OLE

Ke Ao Omamalu o Kekahi Karaima Pohihihi

Mamuli o ka Manao Lili

 

Aole i hoike aku o Mrs. Wadona i ke kumu oiaio o ko Lola haalele ana mai i kona home, aka ke uhiuhi wale la no oia me na olelo hoolalau, i wahi e loaa ole mai ai ka manao hoohuoi i ka loio, aole he maikai o ko laua nei noho ana, oiai nae aia iloko o ua wahine nei, kekahi manao lapuwale kahi i lapuu ai, no ka hookomo ana aku ia Lola iloko o ka poino, ke maopopo pono iaia, kana mau mea e hana aku ai.

Ke noonoo la ua o Mrs. Wadona, ua like pu oia ame kana mau keikikane me na mea makilo, oiai hoi o Lola e kaahele ana mai kekahi wahi a i kekahi, me ka hanohano, a no ka hoihoi ana iho i kela kaikamahine, a i ke kulana, i oi iho ka haahaa, malalo o ko lakou kulana, ua ho-a maoli ia aku ke ahi o ka inaina iloko ona.

 

MOKUNA XIV

 

He hookahi mahina mahope mai o kela mahuka ana o Lola mai kona makuahine hanauna aku, ua oili ae la maloko o kekahi o na nupepa o ke kulanakauhale o Kikako keia hoolaha:

“Ua makaukau ka Mademosele Peretoni, he puukani himeni, a he loea ma na meakani, e hooko aku i na makemake apau o ka lehulehu, ma kekahi mau aha hoohauoli, ma ka himeni ana ma na hora o ke ahiahi; a ua makaukau pu no hoi oia e hookipa mai i kekahi mau haumana, e makemake ana i ka ike himeni ame ka ike hookani pila, me ka uku oluolu loa. E loaa no ka mea nana keia hoolaha ma kona rumi ma ke alanui Elima mawaena o ka hora 9 a.m. ame ka hora 4 p.m.  Hele mai e hui kino, a i ole kakau mai paha ma ka leka.”

“He hoolaha ano hou loa hoi keia maloko o ka nupepa!” i hooho ae ai kekahi wahine opio o ke alanui Wabaki, me ka waiho ana aku i ka nupepa puka kakahiaka ana i heluhelu iho ai i ka hoolaha, a hohola ae la i ke kawele lima mamua o kona u-ha, no ka hoomakaukau ana aku e ai i kona aina kakahiaka.

“Heaha kena mea ano hou au i ike iho la maloko o ka nupepa?” i ninau mai ai ka haku wahine o kela home, oiai oia e noho ana ma ke poo o ke pakaukau, me ka panee ana ae he poa kikoko, i kekahi kaikamahine uuku, e noho ana ma kona aoao. 

O keia hakuwahine, o Mrs. Vana Dona kona inoa, he eono makahiki mamua aku, i make ai kana kane, me ka waiho ana iho i kekahi waiwai nui o hookahi miliona me ka hapa; a mamuli o kona wahine u’i, ka ike paa rula, ka oluolu me ka waipa-he, ua lilo maoli oia i wahine mana nui ma kana mau mea apau e hana ai.

O ka wahine opio hoi, nana na olelo i kamailio ae no ka hoolaha ana o ka lehulehu ana maloko o ka nupepa, o ke kaikamahine hiapo no ia a keia wahine nona ka inoa o Akeneki Vana Dona, a ua ku no oia i na ano o kona makuahine, ka u’i ame ka oluolu, eia nae oia kekahi o na kaikamahine, ka u’i ame ka oluolu, eia nae oia kekahi o na kaikamahine puukani i ka himeni, me kona hialaai nui i na hana hoohauoli, a no na kikina ekolu, maloko o kela kulanakauhale, ua nanaia aku oia, ma ke ano he ho-kuhele no ka poai anu.

O ke kaikamahine hoi e noho la ma ka aoao o Mrs. Vana Dona, o Liliana Vana Dona kona inoa, he umi-kumamaha no ona makahiki, a ua lilo oia i punahele, a i milimili na kona makuahine ame ka ohana holookoa oloko o ka home.

He keikikane no ka kela wahine, i oi aku na makahiki i ko Akeneki, eia nae ua hala aku oia no kekahi wahi okoa, nolaila aole e ike nui ia ana oia ma keia nee ana aku o ka moolelo, ahiki i kona huli ana mai imua o kona makuahine.

No ka pane ana aku i ka ninau a ka makuahine, lalau hou iho la o Akeneki i ka nupepa, a heluhelu ae la i ka hoolaha me ka leo nui, alaila pane mai la.

“O keia ka mua loa o kekahi hoolaha o keia ano a’u i ike ai. a ina i kulike i’o ke ano o ka Mademosele Peretoni, elike me na hoakaka ma keia hoolaha, aole hoi he mea akena wale iho no, alaila o ka hoea ana mai keia i ka hookoia ana o ka iini o kekahi poe o kakou e noho mai nei.”

“Aole i kulike ko’u manao me ko’u,” wahi a kamakuahine i kana kaikamahine. “I ka manawa o kekahi mea e hulahula ai me kona paka-na, me kekahi poe hookani piha maikai, e houhene ana maluna o ka lakou mau pila, aohe hoihoi ia aku o ka himeni ame ka hookani ana i kekahi mea maluna o ka piano. O kekahi no hoi, pehea e loaa ai ka ike i ka lehulehu, no ke kupono o kekahi mea e hoolaunaia iwaena o na hoaloha ina aole he poe i ike mua iaia ame kona mau ana?”

“No kena manao ou e mama, aole loa o’u manao, e komo ana ka noonoo iloko o kekahi puukani e makemakeia ana no na aha hoohauoli. He mau manawa lehulehu kau e mama i hoolimalima ai i kekahi poe hookani pila, no ka hooilo aku la i hala, a ke manao nei au, aole i maopopo iki ia oe ka moolelo i pili aku i ke ano o kela poe, a i ole o kekahi paha o lakou.”

“He mea oiaio no kena e Akeneki,” wahi a ka makuahine me ka pii ana ae o ka ula ma kona mau papalina. “No na mea e pili ana i kekahi poe hookani pila ua hoolimalima wale ia aku no lakou, no na hana hulahula, aole ma ko kakou nei home wale no, aka ma na wahi no apau o ka honua nei. Ua like kela, me ka lawe ana mai i kekahi wahine i malihini loa ia kakou maloko nei o keia home, a himeni aku imua o na malihini, o kela ano hana, he mea ano hou loa ia, he mea i hana ole ia e ka pohai o ka poe maikai.”

“Ae, ua makemake au e hoololi i na mea i kamaaina ia kakou e mama. Elike no hoi me ka poe hookani pila, aia maluna o na pila, ko lakou pono o ke ola ana, malia pela no hoi keia Mademosele Peretoni, nolaila he hana maikai ma ko kakou aoao, ke kokua ana aku iaia, me ka hoohauoli pu ia  o ko kakou mau hoaloha, ma ka hoololiloli ana ae i na mea e hanaia ana maloko o na aha hoohauoli, aole hoi o kela ano mau i kamaaina ia kakou.

“Ma ka po koke aku la no i hala i lohe ai au, i ka hoohalahala o Konela Akibolo, no kona hele a pakuwa i ka ike mau i na aha hulahula, a wahi ana he oi aku kona hauoli, ina e hiki ana iaia ke noho malie, a hoolohe aku i na mele nani mai kekahi puukani mai.”

“Ua kamailio i’o mai anei o Konela Akibolo pela?” wahi a ka makuahine me ka piha hialaai, no ka mea he kanaka o Konela Akibolo na Mrs. Vana Dona i makemake loa ai, a o kela no hoi ka hoa pili mau o kana kaikamahine, ma na manawa apau e haawiia ai o na aha hoohauoli.

“O ka mea oiaio maoli ia e mama, a i hoike aku no au i ko’u manao ea, ua hele au a makemake e ike i keia puukani himei malihini. O ke ano kekahi o kana hoolaha ana, he kaili noonoo maoli no, a ua kono mai ia ia’u, e hele aku e hui kino me ia.”

“Eia hoi paha, aole ona hoakaka maloko o kana hoolaha, no kana mau wahi i kaahele mua ai,” wahi a Mrs. Vana Dona me ke ano kanalua, no ka ae ana aku e hookipa mai i keia puukani malihini ma kona home, a i ole hookamaaina aku paha i kana kaikamahine me ia, me kona lalau okoa ana aku i ka nupepa no ka heluhelu ana i ka hoolaha.

“O kena mea au i kamailio mai la e mama, kahi o ko’u makemake loa i kena hoolaha,” i pane mai ai o Akeneki, me ka noke okoa ana ae i ka akaaka. “O ka mea nana i hookomo i kena hoolaha, o ka mea koa loa kela a’u i ike ai, me ka lawe ole mai i na mea maamau, ma na hoolaha, i kumu no ka lehulehu e makemake aku ai iaia; aka ua lawe ae oia i ke ko’iko’i maluna iho o kona mau poohiwi, ma ke ku ana aku imua o ke ao holookoa, a hoike aku i kana kalena me ka hilahila ole.

“Ma ko’u ike maoli iho no ia’u, me he mea la ua hiki ia’u ke heluhelu aku i ke ano o na kanaka ma kekahi ano, a ma ko’u manaoio, o ka hapalua o na hoolaha, me na olelo hoomaikai a mahalo mai na haku hana mai, na kumu a’o himeni mai paha, he mau hana apuhi wale no ia. Pehea kou manao e mama, e hele kaua i keia kakahiaka no ka hui pu ana me ka Mademosele Peretoni, a hoolohe aku kaua i kona himeni ana, ina e ku i’o ana i kou makemake, alaila kono aku iaia e hele mai no ko kakou home nei, no ka hoololi ana ae i ke ano o ka kakou home nei, no ka hoololi ana ae i ke ano o ka kakou mau hana hoohauoli.”

“He manao maikai kena ou e Akeneki, heaha auanei hoi ka hewa, o ka hele wale ana aku no e hui pu me keia puukani malihini, a ina nei no ka loaa ole he mea e hoohalahala aku ai nona, malia o keia ke kumu kupono loa nana e a’o mai ia Liliana, i ka ike himeni, me ka hookani piano,” me ka alawa ana iho o ka makuahine ia Liliana, e hoolohe ae ana i kana kamailio ana.

“E mama, aole o;u makemake iki i ke ano o ka’u kumu, e a’o nei ia’u i ka hookani piano,” i pane koke ae ai o Liliana, me he mea la, ua komo aku la iloko ona ka makemake, e kaa aku oia malalo o ke a’o ana mai a kela wahine malihini. “I kekahi manawa, e koi okoa mai ana kela kanaka ia’u, e paani me kekahi kilina lepo, mahope o kuu lima, me kona noke mai i ke kikonikoni i kana penikala ma kuu kuli.”

Ua manaoio aku la ka makuahine i kela mau hoakaka a kana kaikamahine, me kona hoike ole aku nae, no kona hoihoi ole i ka hana a kela kumu, ke kakali la oia a ike pono i keia puukani malihini, malia ina no ke ku i kona makemake, alaila e waiho aku ana oia ia Liliana, malalo o kana mau a’o ana mai i ka ike hookani piano.

Ma ka hora umi-kumamakahi o kela kakahiaka, ua haalele iho la ka makuahine me kana mau kaikamahine elua, maluna o ko lakou kaa nani, e hukiia ana e kekahi paalio eleele, a kamoe aku la ke alahele no ka rumi o ka Mademosele Peretoni, ma ke alanui Elima.

No ka hapaha hora wale no kela holo ana aku o ke kaa, hoea aku la no ka hale e noho ana ka wahine puukani nana ka hoolaha, a i ka lele ana iho o ka Madame Vana Dona me na kaikamahine mailuna mai o ko lakou kaa, ua hookipaia aku la lakou noloko o kekahi keena hookipa nani; a hoike mai la ke kauwa lawelawe, aole ka Mademosele Peretoni, i kaawale aka e kakali iki lakou no na minuke elima, alaila kana hana ma kekahi wahi.

Oiai e kakali ana ahiki i ka hoea ana mai o ka Mademosele Peretoni, ke nana la ka makuahine me kana mau kaikamahine ialoko o kela keena hookipa, aia hoi he hookahi piano nani e ku ana ma kekahi kihi, me ka huli ana mai iwaena o ka rumi a e waiho ana hoi kekahi mau pepa leo mele iluna o ka piano, a he pila hapa ke ku ana ma ka aoao o ka piano.

Aia na manao mahalo iloko o ka Madame Van Dona, no ka u’i ame ka nani o ke ano o ka hoolakoia ana o kela rumi, e hoike mai ana, i ka maiau maoli o ka mea i kuleana i ua rumi nei, a o ka mea nana i hooi loa aku i kona manao hoohihi, o ia no ke ano o ka hoonohonohoia ana o kekahi mau bo-ke pua, maloko o na pika pua, ma kela ame keia wahi oloko o ua keena hookipa nei.

He elima paha minuke o kela kakli ana o na malihini, ua weheia mai la he puka ma kekahi aoao mai o ke keena hookipa, a komo ana no ka Mademosele Peretoni iloko aia ma kekahi lima, e paa ana oia i na pepa inoa o na malihini i makemake e ike iaia, a ma kekahi lima hoi, e paa ana oia he pu-a pepa leomele.

Iaia i ike mai ai i na wahine malihini e noho aku ana, haawi mai la oia i kana kunou ana imua o lakou, me ke noi pu ana mai, e huikala aku iaia, no kona lohi loa o ka hele ana mai e hui pu me lakou, oiai ua paa oia i kekahi hana e hiki ole ai iaia ke haalele aku.

Aole paha i nele ke komohia ana aku o ka manao hoohuoi iloko ou e ka makamaka heluhelu no keia Mademosele Peretoni, aole no oia he mea okoa aku, aka o Lola no ia, ke kaikamahine i holo mahuka mai ke alo aku o kona makuahine hanauna, elike me ka kaua i ike ai ma ka mokuna aku la i hala.

I ka noho ana iho o ka Mademosele Peretoni, a o Lola hoi maluna o kekahi noho, ua kaa mai la ma kona aoao, ka wehe mua ana i na kamailio mawaena ona me na malihini, no ka hoonanea ana , mamua o ka hoea ana mai, i kahi e hoomaopopoia ai ka hana a keia poe o ka hoea ana aku e ike iaia ma kela la.

Mamuli o ka piha paa rula maoli o ka Lola kamailio ana, a hui pu iho no hoi me ka u’i o kona helehelena ame ka hiehie o kona kulana, ua umeia aku na manao mahalo o ka makuahine ame kana mau kaikamahine no ka puukani himeni.

Ma kela kau ana mai o Lola maluna o ke kaaahi e holo ana no Kikako mai Nu Ioka mai, he lehulehu wale na noonoo i ala ae iloko ona, no ke ano o kana hana e lawelawe aku ai, i ole ai oia e ike i ka nele ame ka pilikia.

Ina no kona koho i ka oihana kumukula, he hana hoihoi ole loa nana kona noho hana aku malalo o kekahi no kekahi mau hora lehulehu o ka la, me ka lawa ole o ka manawa hoomaha, a nolaila aole ona makemake e lilo oia i kumukula. Ina hoi no ka noho hana aku me kekahi ohana, no ke a’o ana i kekahi mau haumana, o kekahi no kela o kana mau hana hoihoi ole, a aole ona ike i ka humuhumu, nolaila he hana pohihihi no, ka loaa ana he hana iaia o kela ano iwaena o kekahi mau ohana maikai.

Oiai nae, he makaukau oia ma ka ike mele, me ka hookani pila, a he leo u’i no hoi kona i ka himeni, me kona ku ole nae imua o na anaina akea e himeni ai, hooholo iho la oia i kona manao, he oi aku ka pono, e hoohana oia i kana kalena ma ke ano, oia ponoi iho no kona haku, aole hoi e noho hana aku malalo o kekahi, me ka paa loa o kona manao, e holomua ana no oia, oiai ua kamaaina no oia i na rula iwaena o ka poe o ke kulana hanohano a kiekie.

Ua oi aku mamua o ka umi-kumamalima haneri dala. a Lola malalo o kona malu, iaia i haalele aku ai i ka home o Mrs. Wadona, o kela no na dala a kona loio o ka hoouna ana mai nana. Ua ike o Lola, ua lilo kela nui dala i mea ole ina nei no ka hoohana ole ia ma ke ano naauao, a o ka hopena, o ia no kona halawai me ka pilikia.

Iaia i hoea ai no Kikako, ua hoi aku la oia maloko o kekahi hokele oluolu o ka uku, e noho ai no kekahi mau la kakaikahi, aole ana noonoo koke ana ae no kekahi hana, aka o hoomaha ame ka makaikai i kaaina kana hana nui, no ke ake no e loaa he wahi kupono nona e noho ai.

 

He Moolelo no

KA MEAHUNA POHIHIHI

A I OLE

Ka hoohokaia Ana o ka Manao Puuwai o ka

Mea Lili-He Moolelo i Piha me na

Wiliau o ke Aloha

MOKUNA XVIII.

 

Oiai o Mr. Kaapuni e lawelawe ana i kela mau hana ae la, aia no o Keoni Naika, ma Ladana kahi i hoohala ai i kona manawa.

Ua loaa aku ka ike i ka Loio Kelekolio, no ka hoea ana o Mr. Naika i Ladana me kona hakilo loa ana i kela kanaka ma kana mau hana ame kona wahi e hele ai, ua hunakele loa oia i kana mea i ike ai, mai ia Tiodora mai, no kona manao he mea hoopilikia wale aku no paha i ka noonoo o ke kaikamahine opio, ina e ike aku ana oia, aia ke kanaka nana i hoopilikia iaia ma Ladana kahi i noho ai.

Ma kekahi kakahiaka, oiai o Mr. Kelekolio e hoomakaukau ana e hele no kona keena oihana, ua hele mai la o Tiodora a kamailio aku la iaia:

“Ke makemake nei au ia oe e Papa Kelekolio, e hele i ka nana keaka ma keia po, oiai e himeni ana o Peti, elike me ka’u mea i lohe mai ai.”

“Ina o kou makemake ia ea, alaila o oe pu kekahi e hele ana me a’u. Aia au a hoi mai i keia ahiahi, e paa mai ana au i elua tikiki no kaua.”

“Ina hoi ha pela, alaila e kuai pu mai oe i tikiki no Mrs. Kalakona, a i hookahi no Josepine.”

Aohe makemake o Tiodora a Mr. Kelekolio i hoole, nolaila i ke kauoha ana aku o ke kaikamahine opio e kuai mai oia i elua mau tikiki hou ae, ua hooko aku ka loio ia makemake o kana kaikamahine, a i kona hoi ana mai i ke ahiahi, he eha ana mau tikiki, no kekahi wahi i hookaawaleia maloko o ka halekeaka.

Mamua ae o ka hoomaka ana o na hana keaka ma kela ahiahi, ua hoea aku la o Mr. Kelekolio me kona mau hoa, a ua loaa ia lakou kekahi mau noho kupono loa, me ka hoohalaia ana o ka hapamua o na hana keaka ma kela po, e na mea apau iloko o ka hauoli; aka i ka mahele elua o na hana o kela po, a oiai e kokoke aku ana i ka wa e pau ai o kekahi hana keaka, ua loheia aku la ka leo hooho o kekahi poe maloko o ka hale, no ka pauahi.

Na kela leo pauahi, i hoopioloke aku i ka noonoo o na mea apau, ke hi-o la na kane na wahine, me ke ake e hemo aku iwaho, aka no Mr. Kelekolio, aia wale no oia ma kahi hookahi kahi i noho ai, me ka hele o kona helehelena a piha i ke kaumaha, aka elike me kekahi aliikoa, iloko o ka pilikia, pela iho la o Mr. Kelekolio e noho la, me ka pane ana mai imua o kona mau hoa:

“Mai pioloke ko oukou mau noonoo e kuu mau kaikamahine, a oiai eia kakou ma kahi kokoke i ka puka mahope, mamua o ka nui ae o ka poe maloko nei o keia hale, e hoao kakou, e puka mahope me ka hele ole aku mamua,: o kona ku ae la no ia iluna me ka hopu ana aku o kekahi lima ia Tiodora, a o kekahi lima hoi ia Josepine, o kona alakai aku la no ia i na kaikamahine opio, me ke kauoha ana mai ia Mrs. Kalakona, e pili mau aku mahope o lakou.

O ka hoea aku no hoi ia o Mr. Kelekolio me kana mau kaikamahine no ka papahele olalo loa, ua loaa mai la lakou i ka nui o na kanaka e holo mai ana mai na wahi like ole mai o ka hale, no ka palekana o ko lakou mau ola, no ka nui loa o kela poe, ua hina aku la o Mr. Kelekolio ilalo, me ke kaawale ana ku o Tiodora mai iaia aku, pela hoi me Josepine.

Ke kulakula’iia la o Tiodora me he wahi kaikamahine uuku la, i o a ianei, a u aaneane maoli no oia e maule, paa ana no kekahi mea ma kona poohiwi, me kona hukiia ana kau no kekahi wahi, e hiki ai iaia ke hilinai aku ma ka paia o ka hale, me ka pilikia ole, a iaia o ka hilinai ana aku i ka paia, lohe ana no oia i ka pane ana iho o kekahi mea:

“E hiki ana anei ia oe e Miss Lanada ke hilinai mai maluna o’u? E hoao no au elike me kahiki ia’u, e hoopakele ae ia oe mai ka poino mai.”

Leha mai la ka Tiodora nana ana ma kahi o ka leo i pane aku ai, aia hoi, ike mai la oia ia Gai Wakona e ku aku ana, me kela kulana kilakila o ke kanaka kino ikaika, a o ia kana o ka pane koke ana mai:

“Auwe, o oe no ka keia e Gai!” wahi a Tiodora me ka puliki ana iho i ka lima o ke kanaka opio. “Ke hilinai piha aku nei au maluna ou e Gai. Pehea oe i hoea mai ai iloko nei o keia huikau o na kanaka no ka hoopakele ana ae ia’u?”

“Owau kekahi mea maloko nei o ka halekeaka i keia po, pela iho la i hiki ai ia’u ke haawi aku i na kokua ana ia oe,” wahi a ke kanaka opio, oiai, no kona ake wale no e nana aku i ka helehelena o Tiodora ke kumu o kona hele ana e nana keaka ma kela po, mahope o ka hoike ana aku o kona kaikuahine iaia, e hele ana oia me Tiodora ma i ka nana keaka.

Iloko o ka hele a hookeke, ke alakai malie la no o Gai ia Tiodora me ka malie, ahiki i ko laua puka ana aku iwaho, a lawe aku la i ke kaikamahine opio no kahi e maluhia ai, ma kela aoao mai o ke alanui:

“E paa mai oe i kuu lima e Miss Lanada, a e hele kaua e nana i kekahi kaa kaawale no ka hoihoi ana aku ia oe i ka hale,” wahi a Gai Wakona, me ko laua hele ana aku e huli i kaa; o ka mea apiki nae, e nanea ana no laua, i ka pane ana mai:

“Ke kauoha aku nei au ia oe e Mr. Wakona, e hookuu mai ia Miss Lanada, owau ka mea nana e hoihoi aku iaia no kona home,” wahi a Keoni Naika, me he mea la he kuleana a he mana kona maluna o ke kaikamahine opio.

Huli iho la o Gai ia Tiodora, ina paha e ae ana oia i ka manao o Mr. Naika, ua oi loa iho la nae ka pilikia ana o Tiodora i kona lima, me ka hoole ana ae, aole ona makemake e hele pu me kela kanaka, a o ia ka Gai Wakona i pane aku ai.

“Aole au e ae aku ana e hookuu ia Miss Lanada me oe. aka owau ponoi no ka mea nana e hoihoi aku ana iaia, a waiho aku ma kona home,” wahi a ke kanaka opio me ka leo kuoo.

“Aole loa au e ae, o oe ka mea nana e hoihoi ia Miss Lanada, e hookuu koke oe iaia!”

“Ua lohe mai nei no oe e Mr. Naika, aole o Miss Lanada i makemake e hookuu aku au iaia me oe, malalo o ia kumu, e lilo ana au i mea nana e hoihoi aku iaia no kona home. Ua konoia mai au, e ninau aku ia oe e Mr. Naika, ma ka mana hea i loaa ia oe, e hiki ai ke hookikina wale mai i keia lede opio e hana elike me kou makemake?”

“Malia paha aole i’o o’u kuleana, aka nae ke lawe nei au i ke ko’ilo’i o na mea apau maluna o kuu poohiwi. E lilo owau ka mea nana e hoihoi aku ia oe e Miss Lanada imua o Mr. Kelekolio!”

“Aole loa o’u makemake e hele aku me oe,” i pane ae ai o Tiodora me kela mau no o kona puliki ana ia Gai Wakona.

“O kena iho la anei kau pane ia’u e Miss Lanada?”

“Ae,” alaila pane iho la oia ia Gai. “Aohe a kaua hoolohe hou ana aku i na olelo a keia kanaka, aka e hele aku kaua imua, malia paha aia o Mr. Kelekolio ke noke mai la i ka huli ia’u, iwaena o ke aluka o na kanaka.”

Ma kahi nae o ko laua hoomau aku i ka hele ana imua, ua ku okoa ae la o Keoni Naika mamua, me ka pane mai me ka leo okalakala.

“Ua hiki hoi paha, e hoea mai ana i ka la a olua e mihi ai me ka walania no ko olua hoole ana mai i ka’u kauoha ame ko’u makemake.”

Ua makaukau loa o Gai Wakona, e haawi aku i kekahi o kana mau puupuu peku hoki i kela kanaka, a ka hilahila ole, ina aole o Tiodora kekahi me ia, no ka mea ua hu wale aku na olelo ame na hana a kela kanaka mawaho o na palena kupono, aka me ka hoomanawanui wale no i hiki ai ia Gai ke uumi i kona manao inaina, o kona huki aku la no ia ia Tiodora, a kaha aku la hele ma kekahi aoao, me ka nana hou ole mai i kela kanaka.

Ua noke o Gai me Tiodora i ka huli i kekahi kaa, aole he loaa iki, ua pau wale no na kaa, i ka hoolimalimaia e ka poe ihoea mua aku, nolaila o ka hana pono wale no ia laua nei. o ia ka hoi wawae ana, me ka nui nae o ko Gai kaumaha no ka hiki ole e loaa kekahi kaa no laua:

“Aohe au mea e kaumaha ai e Gai, ua hiki ia’u ke hoi wawae pu me oe, me ka pilikia ole ahiki i ka hale.”

Ia laua e hoi wawae la, aia mau iloko o Gai ka hoohuoi, ke ukali aku la no o Keoni Naika mahope o laua, aole no nae ona nana mai ihope, a ke noke la oia i ke kamailio ma na mea like ole, i lilo ai o Tiodora i ke kamailio pu me ia, a hoopalaka kona noonoo, no ke kanaka nana i hoopilikia mau iaia.

Me ka maikai wale no nae kela hoi ana a laua ahiki i ka hale, a e pii aku ana na opio ma na anuu o ke alapii, huli mai la o tiodora ihope, alaila hawanawana aku la ia Gai:

“O ka’u no ia i hoohuoi mua ai, ua hookolo mai nei o Keoni Naika mahipe o kaua, eia ka ua pololei ia manao hoohuoi o’u, oiai aia ua kanaka nei ke hele la ma kela alanui.”

“Ua loaa pu no ia’u ka manao hoohuoi, nona, a ina aole oe, ma ua haawi kahiko aku nei au i kekahi puupuu mahanahana ma ke kumu pepeiao o ko kumu himeni, a o ka manawa aku paha keia e hooko ai ia hana!”

“O, mai kamailio wale aku oe i na olelo hoonaukiuki i kela kanaka, e waiho malie aku iaia pela! Aole au e hookuu aku ana ia oe e hoi, aka e komo ae kaua iloko o ka hale, ke hopohopo loa nei au i ko’u noho hookahi iho, oiai kela kanaka e hoohalua mai ana mawaho, malia paha aole i hoi mai nei kuu kahuhanai.”

Ia laua e kamaiilo nei, ua weheia mai la ka puka, a ku ana no o Mr. Kelekolio iwaho, ua hele no hoi ka helehelena a haikea, a iaia i ike mai ai i kana kaikamahine, holo mai la oia imua, a puliki mai la, me ka pane ana ae:

“Nani ka hauoli o kuu naau, i kou hoea ana mai la me ka maikai,” me ka hoopili ana aku iloko o kona poli, o ia no oe o ka hana a ka makuakane ponoi, ka mea nana i hookahaha aku i ka manao o Gai Wakona.

“Ua kakali makou nou, me ka noke ana i ka huli ma na wahi like ole, aole ou wahi mea a loaa iki, a o ko makou hoea ana iho nei no ia. Aole no ko’u he manao hoi mai, me ka maopopo ole ia’u o kou wahi i nalowale ai, ina aole i kamailio mai nei kekahi keonimana, no kona ike ana ia oe, malalo o ka malu o kekahi mea hoopakele; ua loaa oe iaia, i kela manawa o kou hemo ana mai ia’u aku, a ua laweia aku oe no kekahi wahi palekana.

“I ko’u lohe ana i kela hoakaka, o ka noonoo mua i ala ae iloko o’u, o ia no kou hoolimalima ana i kekahi kaa, a hoi pololei loa mai i ka hale nei, nolaila o kekahi kumu ia o ka awiwi ana mai nei o ka makou hoi ana, me ka manao nei, ua hoea mua mai oe, eia ka aole. Ua hoopihoihoi loa ia mai ko’u noonoo, no kou loaa ole ana mai nei ia makou, a e hoomakaukau ana au e hele hou aku e huli ia oe, nunui ana no ko olua mau leo mawaho nei, aka ua pau ae la nae hoi ia pilikia, ua hoea mai la kakou apau, me ka poino ole.”

“Heaha auanei, ua pomaikai loa au i ka hoea koke ana mai o Mr. Wakona nei, a hoopakele ia’u, a ua aie nui au iaia, ma na ano lehulehu,” wahi a Tiodora, a e makaukau ana oia e kamailio ho mai, ua poha koke mai la nae kekahi leo, i ka pane ana mai:

“Me ka mahalo a nui ia oe e Miss Tiodora! Malia paha o ka manao o kau mau olelo mua i kamailio aku nei, o ia ko Mr. Wakona lilo ana he mea hoopakele ia oe mai ia’u aku.” alaila komo ana no o Keoni Naika iloko o ka hale, me kona kauka’i ole a konoia mai e komo aku iloko, a ua ku maoli kela ano hana a Keoni Naika i ka mahaoi.

“Ke makemake nei au e ike, ma ke kuleana hea, i hiki ai ia oe e Mr. Naika ke komo mai iloko nei o keia hale, me ke kauoha ole ia aku?” i pane mai ai o Mr. Kelekolio me kaleo, okalakala, o ka mea i piha me ka hoonaukiuki no ka mahaoi o kela kanaka a ka hilahila ole.

“Eia no ka pane no kena mau olelo au, mamuli o ka manao aloha a makee no kuu keiki, ka mea i hoopalauia me Miss Lanada no kekahi mau makahiki loihi, ke koi aku nei au, aole loa e ae hou ia keia kanaka pepehikanaka e hui pu me Tiodora,” wahi a ua o Keoni Naika, me ke kuhikuhi ana aku o kona manamanalima i ke kanaka opio e ku kokoke mai ana mai iaia aku.

Ua hele na papalina o Gai Wakona a pii ka ula, iaia i lohe mai ai i na olelo hoohaahaa a Keoni Naika, a i ke auhee ana aku o kela hiona mai kona helehelena aku, halii iho la ka haikea. Ua makaukau loa oia e hoopuka mai i kekahi mau huaolelo, no ka pane ana mai i ke kanaka nana i hoehaeha aku i kona manao, aka nae, uumi wale iho la no oia, me ke kulou ana o kona poo ilalo, me ke kakali ana, o ka lohe hou mai i ka hoopukaia ae o kekahi mau olelo awahua mai na lehelehe aku o Keoni Naika.

Aia hoi o Josepine kona kaikuahine ke ku mai la ma kekahi rumi okoa aku, i kona lohe ana mai i na mea apau i kamailioia a ike pu mai la hoi i ke kulou o ke poo o kona kaikunane ilalo, ia wa i hele mai ai oia, a ku iho la ma ka aoao o Gai, me ka huli papu ana aku imua o Keoni Naika, me he mea la, e hoike okoa aku ana imua o kela kanaka, ua makaukau loa oia, e kupale i ka inoa maemae o kona kaikunane.

Aole nae he hookahi huaolelo i hoopukaia mai e Josepine, aka ke nana mau la oia maluna o na maka o Keoni Naika, ka mea nana i hookau aku i ka weli i ua kanaka nei, no ke ahuwale o kona mau ano epa apau, imua o kela kaikamahine opio ana i hoihoi ole ai.

“Ke manaoio nei au, owau wale no ka mea kuleana maluna o keia lede opio, oiai, owau kona kahu,” wahi a Mr. Kelekolio, me ke kuhikuhi ana ae o kekahi lima ia Tiodora, aia hoi kona mau maka imua o Keoni Naika.

“Ke apono aku nei au i kena mau olelo au. aka nae, o oe kekahi kanaka kumakaia ia oe iho, ina e ae ana oe e halawai aku keia kanaka hana karaima me kau kaikamahine, a e hookipa mai iaia maloko nei o kou home, no ka hooipoipo ana me ko kaikamahine, me kou ike maopopo no, aia na kikohukohu o ke karaima pepehikanaka maluna o kona inoa.”

“Aole loa au he mea kumakaia ia’u iho, a aole loa no o’u wahi manaoio iki i kau mau mea e kahihi wale mai nei maluna o keia kanaka opio. Aia maluna o Mr. Wakona ka’u mau hilinai piha ana, no kona hoao ole ma kekahi ano, i wahi nona e hui mai ai me Miss Lanada.

(Aole i pau.)