Ka Nupepa Kuokoa, Volume LXII, Number 16, 19 ʻApelila 1923 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA HONOLULU, T.H. POAHA APERILA 19, 1923   ELIMA

 

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea Manao

Ino --- Kau i ke Aki i Ka

Manawa Hope

 

            "O , ua koikoi loa na manao kaumaha i loaa ia’u i ka manawa e noho ana ma kela home, e loaa ole iho ai ka manao aloha e minamina no ia home, mamuli o ka nui o na moraka i hanaia, na nota hoopaa aie no hoi a pela aku, a pela aku!" i pane aku ai ka makuahine me ka pikanana, me ka ula ma kona @au papalina e hoike ana ua piha oia i ka inaina.

            I ka ike ana mai o Sa Wiliama i ka pii o ka ena o ke kaikuahine ame ke ano kikoola o kana mau olelo ku-e i ke keiki, @ahamaha koke mai la oia i ka i ana mai:

            "E Miriama, ke ike aku nei au i ka naauao o ko Pase Line@@na manao ke ano o ke kanaka makua mai hoao aku oe e ki@ai i ka manao ikaika no ka hana iloko ona he mea hoopau @ku ia i ka manaolana iloko ona e hoomanaka a hoopauia aku ai ka lana o kana manao.  No'u iho, he mea oiaio, he mea kaumaha a minamina no hoi ka hoolilo ana aku i kela home kahi@o kela home i kaulana mai mua mai oiai no e mau ana ka manaolana iloko o ke keiki no ka hiki iaia ke hookaa aku i kela moraki.  Ua pololei o Pase, e Miriama ; he oiaio he hana koikoi no ke hanaia aku ana, ua like no ia hana koikoi me kekahi kanaka e hapai ana i kekahi mea kaumaha a e pii ana iluna @ ka puu, a elike no hoi me kekahi lio e huki ana i kekahi kaa @ piha i ka ukana a e pii ana i kekahi puu.  

            "E lilo ana ia i hana koikoi no kekahi mau makahiki aka @au, me kela manao ikaika e hoaaaia ana iloko o Pase, he kanalua ole ko'u ke olelo ae, he la no e kaahope ae ai ia mau kaumaha, o ka uku e loaa ana he ono a he momona, a e ukuia @na no ka hou o ka lae," a hooki iho la ke Sa Wiliama Hita i kana kamailio ana me ka paa o ka manao iloko ona no ka holopono o ka Pase mau hana ma ia mua aku, iaia i ku ae ai iluna a haalele iho la i ke pakaukau.

            Iaia i huli ae ai e nana i ke keiki, hoomau hou aku la i kana kamailio ana i ka i ana aku:

            "Maloko o na hora elua mai keia manawa aku e holo pu aku ana oe me a'u i kela home kahiko, ka Linetona Hale, a oiai kaua malaila e kamailio hou ia ai e kaua na mea au i hoo@la mai ai ia'u ma ka la i nehinei no keia hana nui au e auamo aku ana maluna o kou mau poohiwi, a e hoomanao mau i keia, e ku aku ana au mahope ou no ke koo ana aku i mea e holomua a e holopono ai hoi kau hana."

MOKUNA XXXIV

            Ka ike Lihi Ana i Kahi Meahuna Iloko o ka Puuwai

            "E Rupata, ua ike no anei oe i kuumau kumulaau ohia mai ko lakou manawa mai i pua ai?"  O keia ka Liliana Linetona o ka ninau ana ae i ke keikikane hanai a ka anakala ona, mahope iho o ka haalele ana o ka ohana i ka rumi aina. 

            "Aole la.  Alaila ke haawi nui mau nei ka paha, oe i kou noonoo maluna o ia mau kumulaau ohia , e Liliana?"

            "Ae, he nui ko'u makahehi no ia mau kumulaau.  Ma kuula hanau hope aku nei i hala he lehulehu na kumulaau a anakala Wile i haawi mai ai na'u, a ke ulu maikai loa mai nei lakou i nei manawa, au no e nele ole ai ka hoohihi, ina no kou ikemaka aku ia lakou.  E hele kaua iloko o ka hale o na meakanu i hoikeike aku au ia lakou ia oe."

            "Ua pono ia i kuu manao," me kona ike ole nae ia manawa @ ke mea huna iloko o Liliana; "owau kekahi mea makemake nui i na mea kanu maikai," a hoomaka aku la oia e hahai mahope o ka nananana me he nalo la e alakaiia aku i kahi o ka upena.

            Ia laua e u haele la, aia nae o Liliana mamua a o ua o Rupata Haminetona mahope aku, ke mahalo wale la no oloko ona i ke kulana hiehie o Liliana iloko o kona kahiko kakimea nani, he mau aahu nani hoi o ka wahine opio e aahu ana i kulike me ka nani o kona helehelena.

            Lawe aku la o Liliana iaia a ma kekahi kihi o ka hale meakanu (hothouse) ma ka aoao o na kukuna o ka la e papa pono mai ana, he wahi i hanaia e Sa Wiliama Hita i kaawale mai na wahi e mai o ka hale kanu pua no ka pono o Liliana, a o kahi hoi i lilo i wahi punahele loa ia Liliana, a o na mea kanu maikai loa aia malaila kahi i waihoia ai.

            No ka hapalua hora ko laua hoohala ana malaila ma ka nana ana i na mea kanu nani, a ua like ko Rupata ohohia ia mau meakanu ia manawa me ko Liliana.

            Eia nae, e makaala mau ana o Liliana ia manawa, i ole e lilo nui ka noonoo o ke kanaka opio maluna o ia mau pua a ia mau mea wale no, aka,  nona pu kekahi, me kona kamailio mau mai ma na olelo ku i ka ii a loko.  Aole no na meakanu ke kumu nui o kona alakai ana ia Rupata ma kela wahi, aka, no ka mea i oi ae mamua o ia mau mea, oia no ka lilo aku o ka noonoo o ke kanaka opio, ka puuwai o ke kanaka opio, ke aloha, o ke kanaka opio iaia a nona wale no, i holo aku ai ia o Rupata i Amerika ea, o kona kino wale no ia e hele hookahi la, a aia no i hope ia ua o Liliana ke kau nui ana a ka manao.

            Oiai laua malaila, a e aneane ana hoi e haalele aku ia hale kanu pua, alaila hoohele ae la ka Liliana kamailio ana ma ke kumuhana okoa, i ka ninau ana mai:

            "Alaila, ua paa ia no anei kou manao no ka holo aku i Amerika, e Rupata?"  Mahope iho keia o ko Liliana hahaki ana iho i kekahi pua a omou mai la ma ka umauma o ke kuka o Rupata, me he mea la e i oko mai ana no, "e lei oe i kuu aloha, a mai molowa oe haalele."

            "O, e Liliana, o kou hahaki ae la ka hoi ia i keia pua, kona mea e kau ana iluna o ke kumu; he hana minamina ole maoli kau i hana iho la!"

            "Mai minamina oe ia mea, he pua wale no, e loaa ana no @e pua hou i le me kena.  Heaha kau mea o ka minamina ana iho, "ame ka nana ana ae o Liliana iluna i na maka o Rupata,"ino no kou makemake i pua hou ua hiki e loaa aku ia oe i na manawa apau."  Nona iho no kana i manao ai ma ia olelo ana aku ana.

            "O, lokomaikai maoli oe," i pane aku ai ke kanaka opio, me kona nana pono ana iho 'ia manawa i ka pua me ka piha noonoo, a ke haohao la nae oloko ona no ke kupanaha o ka ula o ko Liliana helehelena i kona manawa e hele pu ana me ia."

            "No ka'u huakai makaikai e holo aku ana no Amerika, he mea oiaio ia, ua hooholo au i kuu manao no ka holo a e hooko @ku ana au ia manao."

            "I ka manawa hea oe e holo ai?" wahi a ka Liliana ninau.  "He pule mai keia la aku.  Ua kakau aku au he leka m ka ia aku la i nehinei ia Mr. Remona i hoopaa iho i kuu inoa @wau pu kekahi."

            "Hikiwawe no ka hoi kou holo aku," me ka haikea loa ae la @ ko Liliana helehelena ia manawa.

            "Ae; no ka mea ina no ko'u hui pu aku me kela poe no ka hoea pu aku ma kela huli o ke kapakai Pakipika o Amerika ma ka la 12 o keia mahina, e pono au e holo koke aku, ina e haule hope ana aole au e holo pu ana me lakou."

            "Ea, elike ana ka home me kekahi hale mehameha ku hookahi a kanaka ole i kou manawa e holo aku ai, a no ka mea o oe wale no ke ola ame ka uhane o na mea apau maanei, e nele ana au i kekahi hoakamailio ole e kohu ai ke kaunu ana," wahi a Liliana, me ka pii ana ae o ka ula ma kona mau papalina, he nanaina hoi ona a ke kanaka opio i nalu nui iho ai iloko ona.

            "O, me ka mahalo nui ia oe.  Aole au i manao ua lilo au i mea nui loa i kou noonoo," i pane aku ai ke kanaka opio, me ka hoohuoi iloko ona n ko Liliana manao nona ia manawa.

            "Pela?  Aole anei oe i hoomaopopo?  Ina pela, ina aole oe i maopopo, e loaa aku ana ka ike ia oe no ia mea.  Pehea ana ka loihi o kou manawa e kaawale aku ai, aole paha e oi aku ana mamua o eono mahina, elike me ka Anakala Wiliama o ke kamailio ana mai nei i keia kakahiaka, oiai kakou ma ka papaaina, o ia paha ea?"

            "Pela ko'u manao, no ka mea, aole hiki ia'u ke pale ae i kana kauoha, koe keia, aole i ikeia aku na ulia mamua o ke alahele.  No'u iho aohe o'u makemake e hoohikiwawe i ka'u huakai makaikai i kumu e hoi koke mai ai, no ka mea, he makemake au e makaikai ma kela ame keia mau wahi kaulana o Amerika, me kuu makemake pu e ike maopopo aku i ke ano o ka noho ana o kela lahuikanaka, ka lakou mau hana hoonaauao, ka lakou lawelawe oihana ana a pela aku, ma kuu manao, ke ole e loaa kekahi mau ulia, e kaawale aku ana au ahiki i ka mahina o Iulai a i ole Augate paha, alaila hoi mai."

            "O, loihi maoli no ka kela manawa au e kaawale aku ai!  E mehameha loa ana ka home nei ke kaawale aku oe, a e lilo ana no hoi oe i mea hoomanao mau aku na kekahi mea oiai oe e kaawale aku ana!"

            "Heaha iho la kou mea a mehameha ai, owau hookahi wale no hoi ke kaawale aku ana, a eia no ihope nei ka hapanui o kakou, a loaa no hoi ka poe na lakou e hoolaukanaka mau mai ia oe, e loaa ole iho ai ia mea he mehameha ia oe?  E lilo ana anei ko'u kaawale ana aku i mea nou e mehameha ai?"  i ninau aku ai o Rupata me ke kahaha nui iloko ona, no keia mau olelo a Liliana, he kaikamahine ana e noonoo mau ana iloko ona he kaikuahine nona, aole ma ka pili ana ma ke koko, aka, mamuli o ko laua hanai like ia ana malalo o ke kaupaku hookahi, a ua nana mau aku no hoi oia iaia ma ia ano, aole ma ke ano he ipo, aka, mamuli o nei mau olelo a Liliana, i komohia iho ai ka manao hoohuoi iloko ona e manao mai ana no ka paha o Liliana iaia i ipo nana.  Kupanaha!" wahi ana iaia iho.

            "Ua manao no ka paha oe e hiki ana ia oe ke hele aku no kela manawa loihi me kou noonoo ole ia aku?  Owai auanei kekahi mea i aloha ia a i kaawale aku no kekahi manawa loihi i nele ka noonoo ole ia?"  i ninau aku ai o Liliana me ka hoolulu o kona leo.

            "E Liliana, aohe au il noonoo nui no ia mea, o ka'u e noonoo nei, ua hanai like ia kaua malalo o ke kaupaku hookahi, a no ko kaua ike mau a kamaaina loa kekahi i kekahi, o ia paha ke kumu e noonoo nui ia ai au ke kaawale loihi aku; eia hoi, eia no o Kunane Pase ihope nei me oe, a e lilo ana no kou ike mau aku iaia i mea nau e noonoo nui ole ae ai no'u."

            " Ka, e hoi aku ana o Pase i kela home kahiko ma Gerane, aole e liuliu loa, a oiai oia malaila e lilo nui ana kona noonoo ame kona manawa ma na hana e pono ai kieia wahi, a e kakaikahi loa ana ko maua manawa e halawai ai iloko o kou manawa e kaawale aku ana, ino no kona noho mau iho maanei, aole io no paha au e mehameha loa, aka e hele aku ana ho hoi oia.  O, e Rupata, o ka'u e makemake nei aole kekahi wahi elike me Amerika ma keia ao, no ka mea, he wahi hoowalewale nui maoli kela i na noonoo o na kanaka opio o Enelani nei, e huki mau ia ana ko lakou mau noonoo e holo ilaila!" a hooki iho la o Liliana i kana kamailio ana me ka ha'uha'uwe ame ka haalulu o kona mau lehelehe. 

            "E hoomaikai aku ana au ia oe, e ke kaikuahine uuku!  Aole au i manao e lilo ana keia huakai makaikai a'u e manao nei e holo aku i Amerika i mea nou e eha a e hookaumahaia ai elike me keia; e hoi mai ana no hoi au maloko o na mahina eono mai keia pule ae, a e hui hou ana no kaua elike me keia, no laila, e hoopau oe i kou manao kaumaha no ko'u kaawale aku no kekahi manawa pokole," wahi a Rupata o ka hoonana ana iho i ke kaikamahine i hiolo kona mau waimaka ia manawa, me ke kau ana iho i kona mau lima ma kona mau poohiwi , me ka hooni pu ia o kona uhane ia manawa, no ka ike iho i ka helelei o na waimaka o Liliana. 

            "Kaikuahine uuku!" wahi a Liliana o ka pane ana ae, me ka mau no o ka ula ma kona mau papalina, me kona ku ana ae a pololei a pau kona loa, i mea paha no Rupata e ike aku ai aole oia he kaikamahine uuku, a ua kupono ole e lilo i mea aloha na kekahi kanaka opio.

            Ia minuke aohe manawa e ae a Rupata i ike ai ia Liliana i ka nohea o kona helehelena elike me keia, ua lilo no hoi i mea noonoo nui nana ka loli mau ana o kona helehelena ma kekahi mau la kakaikahi mamua iho, mahope o kona hoi ana mai ke kula mai; o na hana a Liliana, kana mau olelo ame kona ano laiwale i na la i hala aku, ua lilo i mea hookahaha nui mai iaia, a i keia la, akahi no a loaa iaia ka ike no ke kumu o ia mau ano ona mamuli o keia lohe ana iho la ona i ko Liliana manao, koe nae ka hoikeamaka okoa ana mai ua aloha oia iaia.

            "Ua lilo anei ko'u olelo ana aku nei iaoe, "ke kaikuahine uuku" i mea nou e eha ai?" i ninau iho ai ke kanaka opio, me ka helehelena minoaka.  "Ma ka mea oiaio aole au i manao e lilo ana ia olelo i mea hoeha aku lunaikehala.  He oiaio aole io no oe he kaikamahine uuku i nei manawa, a ke ike nei au i ka maikai ole o ke paniinoa "uuku" a'u i kapa aku nei ia oe, eia nae, ia'u i hoea mua mai ai ianei ewalu makahiki i hala aku nei he wahi kaikamahine uuku wale no oe, no ia kumu pahya i manao mau ai au he uuku oe, oiai nae ua nui oe i nei manawa, a ua aneane loa e mo-a ka pulehu."

            "Aole no au he kaikuahine nou ma na ano apau; aole kaua i pili ma ke koko, ma ka hanai wale ana no o kuu anakala ia oe, ma ke ano he keiki hanai oe nana," wahi a ka Liliana pane, me kona nana pono ana ae iluna i na maka o Rupata.

            Hikilele ae la ke kanaka opio no nei mau olelo a Liliana, alaila kulou iho la oia ilalo, oiai he kanaka opio niape oia o ka oiwi kino, a nana pono iho la i na maka o Liliana.  E ku papu pono mai ana o Liliana mamua ona ia manawa, me ka aneane loa e pa mai kona mau lehelehe i na papalina o ke kanaka opio, a ke hapai pu la hoi kona umauma me ka ikaika o ke pana ana a kona puuwai.

            "He mea oiaio nno ia au i olelo mai nei aohe ia no o kaua pili ma ke koko, a e noi aku ana au ia oe no kau huikala ana mai no ia olelo a'u, no ka oi loa ana aku o ia mau olelo mamua o ka mea oiaio; aka, e Liliana, e pono e loaa aku keia manao maopopo ia oe, he mea maa mau ia no ia mai kinohi mai, ina e lawia ana kekahi keiki, elike me a'u i laweia ai e ko anakala i keiki hanai, e nana mau aku ana au i kana mau keikikane a mau kaikamahine paha, ina nana ponoi ia mau keiki a na kona kaikuahine paha, he mau hoahanau no'u kana mau keikikane, a he mau kaikuahine hoi no'u kana mau kaikamahine, elike me oe i keia la, oiai aohe hiki i kekehi mea i noho pu malalo o ke kaupuku hookahi, a iloko hoi o ka ohana hookahi, ke ole ae i ke kapa ana aku pela, a aole no hoi e nele ana ka pipii o ke aloha o kekahi lala o ka ohana i kekahi.

(Aole i pau)

 

E HOO-KANAKA KAKOU NA HAWAII

(Hoomauia mai)

            O na manao maikai i kukuluia mai e na loea, i hoikeikeia maloko o na nupepa o kakou nei, i kaahope ae nei, he mau loina ia o ka nee ana mai o ka poino i hookumuia i kinohi loa e ka lahui Hawaii.

            O na huaolelo a na'lii o kakou i moe aku, a i oili mai i keia la, ka awahia, ame ka mulea, o ka poino iloko o ka lahui Hawaii ponoi; a i kukuluia mai keia mau manao paa:  O ke kanaka pono, a o ka wahine pono, o kona kanaka ia; ua pale wale ia ae ia mau huaolelo mahope, e na alii o kakou, a haule pu aku me na makaainana i ka poino mauwale.

            Pehea la kakou na wahi Hawaii kakaikahi i koe mai e ulupa ia nei i keia mau la e nee nei.  He wahi leo anei ko kakou e uanaia mai ai e ka mea nona ke aloha i kaulia ia ma ke ke'a o Kristo ia;  nona ka leo i Kona Makua e ola io ana keia lahui Hawaii.  Penei o ka mea manaoio ia Kristo e ola ia a o ka manaoia i ka Palapala Hemolele e ola ia.

            Ua hiki io mai kaua e ka Hawaii ponoi i kahi e hoo-kanaka ai, elike me ka poomanao maluna ae.  Eia paha ka namao o keia huaolelo e hookanaka ana, penei.  E ano hou kakou na Hawaii ponoi apau, o ka'u mahele ana keia.  Koikoi no ka manao o keia huaolelo i kakaula ai, a i mea paha e nani loa ai, a'e lilo ole ai i mea hoino wale i ka Palapala Hemolele o ka olelo no ia a ke Akua Kahikolu.

            Penei io e ola ai ka lahui Hawaii, mai ka make ae e lumilumiia nei i o a ianei, e komo kakou a noho pu me Kristo Iesu, a e ola oe ke kane ame ka wahine ame kau ohana o kou home; penei ka mea i palapala ia:  Ina iloko o Kristo kekahi mea, he mea hou ia; a e hoihoi pono ana ia kakou na Hawaii kakaikahi i koe a hookupono iho ia kakou iho.  E pau ka hoino misiona, e pau ka huaolelo aihue aina ame na olelo hoino e ae; e olelo ana kahi haole ino; uwoki, a e hoopau loa oe ia mau hoino ana; a no ka mea o ka mamo ia a Aberahama; o ke Akua pe me ia lahui kanaka, aole oe e pakele ana i na hoino wale oe i kona pe kanaka, o ka poe no na lakou e hanai mai nei ia oe ma kou home, ame kou uhane, o ia ka olelo a ke Akua. 

            Nolaila he ola ano nui loa keia, ina e malama pono ia; a e hauoli ai mai o a o o  ka pe'a o ka aina, a ua paa loa ka olelo a ke Akua ma kahi o na mamo a Aberahama e keehi ai, e hoolilo ia wahi no lakou, ua hookoia ka olelo o ka Palapala Hemolelo i keia la.

            O na oleloa'o maikai apau a na misiona, aole i hoi nele, ua hooko mau ia no;  no ka mea, he ikaika he mana hoi ko ka olelo a ke Akua, he oi nui kona mamua o ka pahi kaua oilua, e o ana e kaawale ke ola ame ka uhane, o na ami ame ka lolo: o ia ka lunakanawai no ka  noonoo ame ka naau.

            O a na olelo i ha'iia imua o na'lii he ahi ia c hoopau ana, no ka. mea he ahi o Iehova o na kaua aole mea pakele mai Kona lima ae, i ko la kou manawa i hailiili wale ai i na mlsiona, ma ke ano imihala, wale.  He poino ka mea i ike ia i ka lahui Hawaii!

            Penei kekahi

mau olelo hoopo

maika ia Aberahama:

            E hoopomaikai aku hoi au i ka poe hoomaikai mai ia oe, a e hoino aku au i ka mea hoino ia oe, a ia oe o pomaikai ai na ohana apau

ka honua.

            Nolaila, na ka anela o Iehova i luku i keia lahui Hawaii, aole na kekahi mea okoa aku;   no ka mea, ua kuulala hou ka lahui Hawaii iloko o ka ehu me he moi la, he i'a kupanaha, aole e alo ae na olelo hoino wale i na mamo a Aberahama ma, oia no o Likana ma, Balawina

ma, Kakela ma, Rike ma, Wilikoki ma, a pela wale aku he mau Aberahama lakou; o ka poe apa i pae mai i Hawaii nei, a i noho ulakolako

i keia la he mau Aberahama lakou elike me ka Iehova ia Aberahama.

            Ke makemake nei keia makaponi o weheia ae, a e pau ai na pohihihi ame ka makee i ka noho 1ahui ana, i hookahi kakou iloko o Kristo Iesu, e kaupalena ana i ka kakou mau huaolelo kupono, me ka oluolu ma ko ana haahaa.

            E kuai i mau buke Baibala me buke himeni no kou home, ame buke Baibala ili lahilahi no koa hele ana ma na wahi apau o ka paeaina, he kukui malama ia no kou mau wawae, i ole e kuia i ka pohaku mamua o kou alo; e ui ana a ninaninau ana i kekahi poe kupono i na olelo paakiki o ka Palapala Hemolele; a e noi ana ma ka pule, ma kahi mehameha ia Kristo ka Hoola, e haawi mai i ka naauao loa me ka haahaa, a e loaa no ka lamaku olino mau o ke ola nui loa, ma ke ano kupono, elike me kau noi ana; aia no he manaolana mau no ka ulu hou ana mai o ka lahua Hawaii, a hookawowo hou a hoopiha i ka aina me na pulapula hou.

            Aole o ka make mamua, o kou hoopili pu ia ia ka paia, e auwana hele ai i ne mahiko iluna o na moku, a noho ae la iloko o na hale hoolimalima huikau, apoo aku, apoo mai, hui kala i ka nawao hoopukaia mai, o poino mauwale, elike me ia a kakou e ike nei iloko o na nupepa. 

            I paipai maoli ia aku no o Lota e ka anela o Iehova e holo i ka mauna i pakele, aole nana ihope.  Hooko o Lota, nana ka wahine ihope i ka waiwai, a lilo i kiapaakai ahiki i keia la.

            Nolaila o ka lohe a hoomaopopo, imi huli, a mamuli loaa io, o ke ola no ia elike me Lota, nui ka hauoli iloko o ko kakou noho lahui ana.

(Aole i pau)

 

            E lilo ana keia huakai aku nei a na lala o ka Ahaolelo i mea hele mau ia e na Ahaolelo o keia mua aku.  A he mea maikai keia, no ka mea, ua pono no e ikeia na hana a ke Komisina e lawlawe nei, a he mea pono no hoi e ikeia mai ka holomua o na hana e lawelaweia mai nei e na kanaka ma keia mau aina a koi mai ke kanawai he elima makahiki a na kanaka e honoia ai, a iloko o keia mau makahiki e ikeia ai ka holomua o keia kanawai ame kona haule ana.  O ka ike mau ia aku o na hana kekeahi alanui e loaa ai keia holomua, a e lilo ole ai i mea hoopunipuniia e ka poe e ku-e mai nei i keia mau hana no ka pomaikai wale no o na kanaka Hawaii.  Eia na lahui e ke ku mai nei me ka makemake nui e hoohiolo i keia mau hana no ka pono o na kanaka Hawaii, a e loaa pu aku ia lakou.

 

_____________________________________________________________________________________________________

Money Jingles?  Ua Ike Anei oe?

            O ka mea nune mau ia i keia wa ia no na BUKE A NA KAMAIKI i hoopukaia iho nei. 

            Ua pa'iia me ka noeau - palapalaia me na manao naauao - a ua pa'i pu ia hoi me na kii o na waihooluu like ole. 

            E hoike ana he mau manao hoohauoli - e hoike ana ike ano o ka Hoomakaulii ame na mea e lilo ai i Makaainana maikai.

            He mau ano nui o ke ano hou loa, e nele ole ai ka hauoli o na kamaiki mai ka 3 a ke 80 makahiki.

            Ua loaa mai nei ko makou haawina o ka helu mua, a ke makemake nei makou e loaa i na kamaiki apau e loaa ia lakou keia buke. 

 

EIA KE KALI NEI KAU BUKE IA OE - Hele mai e kii i keia wa.  E haawi wale ia no me ke ano makana.

            He hauoli loa makoua i ka lawe ana mai i kau mau hoahu liilii.

            He 4 pakeneka ka makou e uku nei no ka makahiki.

            Kihi o na Alanui Moe ame Nuuanu.

            Chinese-American Bank

Kihi e na Alanui Mei ame Nuuanu.      Honolulu, T.H.

Pahu Leka 2000              Kelepona 6119

______________________________________________________________________________________________________

 

Hoao i ke Kope Kona Kamehameha

            Ke kope maloko olaila kona mau ano maikai kumu apau, i hoomo'aia

            me ke akahele loa, i wahi e moani ai ke ala, a hookomoia aku iloko o

            na puolo ame na kini, e komo ole ai ke ea iloko olaila - o ke KOPE

            KONA KAMEHAMEHA ia.  E nana i ka hoailona melemele.  He

            ono a mikomiko ka hoailona Kamehameha i kupono i na Hawaii.  Hiki

            ke loaa ia oe ma na puolo o 1-paona a i ole ma na kini o 5-paona.

AMERICAN FACTORS, LIMITED.

______________________________________________________________________________________________________

 

KE NOONOO KE KANAKA

i na meahana e manao ana oia i mea maikai

NA MEAHANA STANLEY

ka maikai loa e kuai ai, nolaila o na m@ahana ia ana i makemake ai.

Koikahi, Na Umii, Na Mea Ana,

Na Hao Umii, Mikini Umii,

Wili Lima, Wili Umauma,

Iliwai Aluminum me Hao,

Na Hamare me Pahiolo,

Na pahu Meahana.

Aole lua elike me na meahana o keia ano.  He helu kiekie loa

lakou.  Ua loaa lakou apau ke kuaiia ma kahi o

LEWERS & COOKE, LTD.

169-177 Alanui Moi Hema.       Pahu Leka 2930, Honolulu

Papa ame Lako Kukulu Hale

______________________________________________________________________________________________________

 

He Manaoio Anei Oe i Ka Hoomakaulii?

            I na he manaoia oe i ka Hoomakaulii, alaila, e hele

            mai no ko makou hale kuai bipi nei e kuai ai i kau

            mau i'o bipi.  He emi loa na i'o palai, ku a pela

            wale aku, ma ko makou hale nei, i loaa ole i na hale

            e ae apau.

                        Aole wale no o na i'o bipi, aka, o na io Kamano

            momona paakai, a i ole hoomo'a uwahiia.

                        Na i'o Hipa ku, he oi aku ke emi maanei e koe nui

            ai kau kenikeni iloko o kou pakeke.

 

O Ke Koe Nui Ana o Kau Kenikeni Iloko o Kou Pakeke

            e Hiki ai ia oe ke Hoihoi ia Koena i ka Banako

                        O ia ke Keehina Hoomakaulii.

 

Metropolitan Meat Market

Me ka aoao Waikiki o ke kihi mauka o na

Alanui Moi and Bekela