Ka Nupepa Kuokoa, Volume LXII, Number 14, 5 April 1923 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

 

HE MOOLELO NO

ALIKA

 

AIOLE

 

Ke Ao Omamalu o Kekahi Karaima Pohihihi Mamuli o ka Manao Lili

 

            “E noho iho e Lola ilalo, aole au mea e inaina ai ia’u. Manao anei oe, e ae aku ana au e ku oe a hele mai kuu alo aku? Aole loa oe e kaawale ana mai kuu alo aku, koe wale mo, a ae mai oe i ko’u mau makemake apau. Ke lilo ka hoi oe i wahine mare na Uilama, e kau aku no ko’u aloha maluna ou, me he kaikamahine ponoi loa la mailoko aku o’u. E malama no au ia oe me ka maikai loa, e hoopakele hoi ia oe mai na popilikia mai, a maluna ae o na mea apau, e lilo no au i anela kiai hou, e kiai ana i ke ao ame ka po, i wahi e hookokoke ole mai ai kekahi mau pilikia ia oe. Aole loa he mea mawaho o kaua i moeuhane, no ka kaua mau mea i ike, a aole loa no he mea e hoohuoi mai ana nou, ke hoolohe oe i ka’u mau alakai ana no kou pono. Ina nae e mau ana kou paakiki, me ke ku-e mau ia’u, alaila e hoao aku ana au ma na ano apau, i wahi e auamo ai oe i na haawina ehaeha,, no kou manao ana, ua oi aku oe mamua o’u.

            Naka haalulu ae la o Lola, iaia i lohe pono aku ai i kela mau olelo ku i ka lokoino a kona makuahine hanauna, me ke hehee ana iho a noho ana iluna o kona noho, nana mai la hoi kona mau maka ma ka helehelena o Mrs. Wadona, a pane mai la:

            “Aole anei ou puuwai; ua nele anei oe ia mea he aloha?”

            “He puuwai keia e noho aku la i hele a piha me ke aloha, ina nei no kou maliu mai me ka maikai, e lilo oe i kaikamahine na’u, ma ka mare ana me kuu keiki?”

            “E ae ana no anei o Uilama e mare i kekahi wahine, i hoowahiwaha iaia?” wahi a Lola, no ka loaa ole iaia o kekahi manao maikai e kamailio aku ai.

            “Ua haulehia o Uilama i ke aloha ia oe e Lola, na ia aloha auanei e kono mai iaia e hooikaika, ahiki i kou aloha ana aku iaia. E hoike aku anei au ia Uilama, e kau mai kona mau manaolana, no ka hoea mai i ka la, e hookoia ai ka iini a kona puuwai?”

            “He mea makehewa wale no kou hoao ana mai e hoomalielie ia’u, ua paa loa ka’u mea i koho ai, aole ia e hiki ke hoololiia, ahiki i ko’u hoi ana aku i ka opu o ka honua.

            “Aia ihea kou hanohano? Aia ihea ka pono ame ka oiaio? Me ko ike no, he wahine au i hoohuoiia me kekahi karaima ekaeka, e aa ana no anei oe e lilo aku au i wahine na kau keiki, me kela kiko eleele maluna o kuu inoa? O kuu ae ana aku i kou makemake, me ko ike no, elike me kau mau kumu imihana, ua hoohuoiia au no ka lawelawe ana i ke karaima pepehikanaka, aole anei e lilo pu ana oe i mea kokua i ka hewa?

            “Ke hooia hou aku nei au imua ou, a imua o na lani, ua maemae kuu mau lima, me ka hawahawa ole i kekahi karaima pepehikanaka. Ua like pu ko’u hewa ole, me kekahi bebe hanau hou. No kela omole o ka laaumake, ua kiola kahiko ia ae e a’u he elua pule mamua aku o ka ma’i ana o Alika. Mahope mai o kela manawa, aole loa au i kuai hou i kekahi laaumake, a ua hoopihaia aku ka omole, me ka wai hu’ihu’i. No kela kiaha aniani o’u, ua ha’oha’o au i ka nalowale ana i kekahi la, a no, kuu manao, ua naha i kekahi o na kauwa, hele aku la au e kuai i kiaha hou. O ke ano i hoea ai o keia mau mea iloko o ka rumi o Alika, aole e hiki ia’u ke hoakaka ae, malia paha, o oe ponoi no ka mea nana i hookomo aku i ka omole laaumake me ke kiaha aniani, me ko manao, ma o kou hooili ana mai i na ahewa ana maluna o’u, pela wale no e hookoia aku ai kou manao lapuwale.”

            “Alaila e kapa mai ana anei oe, owau ka mea e pepehi i ko hoahanau a make?” wahi a Mrs. Wadona me ka leo okalakala.

            “No’u iho aole loa o’u manaoio iki, ua make o Alika, mamuli o ka haawiia ana i ka laaumake. Ina nae i manao oe, owau ka mea nana i haawi aku i ka laaumake i kuu hoahanau, ka mea no a’u i hana ole ia, ua konoia mai au e hoakaka ae i ko’u manao maoli, me he mea la, o oe maoli no e Anate Roke ka mea pepehikanaka.”

            Mamuli o kela mau olelo a Lolo, ua haikea koke ae la ka helehelena o Mrs. Wadona, hoike okoa mai la hoi kona mau maka, i ka hele a hulili, a o ia ka ua wahine nei o ka pane ana mai:

            “Heaha ko’u pomaikai, ina e make o Alika, i manao mai ai oe e Lola, owai ka mea nana i haawi iaia i ka laaumake? O oe wale no e Lola ke hoopomaikai mamuli o kona make ana aku, ma o ka holo ana mai o kona mau waiwai apau maluna ou, nolaila aole loa e hiki ia oe ke hoole mai, no kou lilo ana i mea pepehikanaka.”

            “Aole he maopopo iki ia’u o kou ano oiaio maoli e Anate Roke. He keu no la, i kou lilo ana i makuahine, nana e malama ia Alika mai kona mau la opio mai, a o ka mare wale ae no hoi i koe i ke kane, e komohia iho ana la ke aloha iloko ou, nona, me he kaikamahine ponoi loa la nau. O kela haawina hookahi no maluna o Alika, o kou ano no ia ia’u, a o ke kumu o kou hoowahawaha ana mai ia’u, mamuli no ia o ka hooili ana mai o Anakala Alabaki i kona mau waiwai apau maluna o’u aohe kuu hoahanau, a i hooi loa ia ae hoi ia manao hoowahawaha ou, no ko’u hoole ana, aole e lilo aku i wahine mare na Uilmama, kau keiki.

            “Ina no ka makee waiwai mai, ke kmu o kou makemake ana e hoopilikia mai ia’u, alaila e lilo no au i mea hoopakele ia oe, mai ka lawelawe hou ana aku i kekahi mau hewa ko’iko’i loa, ma kou lawe ana aku i ko’u mau waiwai apau. Ua oi aku kuu hele ana ma na alanui e makilo ai, mamua o ko’u ae ana aku, owau kekahi o kau mau mea paahana, i wahi e hookoia ai kou mau ano lapuwale apau. Ua hooiaio mai oe imua o’u, ua hanaiia o Alika, i ka laaumake, a i pepehi maoli ia, ke kumu o kona make ana, alaila aole loa ou kuleana iki e huna ai i ka mea oiaio, aka e hoike ae oe i na ike apau au e paa nei malalo o kou malu, a e huli pono ia aku ka mea oiaio, ahiki i ke kau ana aku o na ahewa ana maluna o ka mea i pili maoli i ka hewa.

            “I lohe hou oe ea, aole loa i paumaele kuu mau lima, me ke karaima, au i kahihi wale mai nei maluna o’u, no ko’u pepehi ana i kuu hoahanau a make. O ke Akua o ka lani, ke Akua a’u i aloha ai, a i hilinai ai, Oia wale no ka i ike, aole i pili ka hewa pepehikanaka ia’u, a ke waiho nei au ia’u iho, iloko o Kona lima, me ka hilinai piha, no Kona makaukau e hoopakele ae ia’u mailoko mai o kekahi poino, i manaoia e oe. Ua makaukau loa au e ku aku a pane imua o na kiure, no kau mau kumu hoopii apau, e lawe aku ai imua o lakou no ke ku-e ana mai ia’u, aka nae ke hoohiki paa nei au, aole loa au e mare ia Uilama ko keiki.”

            Ke ike la o Mrs. Wadona, he mau olelo oiaio loa kela i kamailioia mai e Lola, nolaila, ua lilo kona mau manaolana apau, i mea ole, a o ia kana o ke kamailio hou ana mai:

            “Heaha la hoi, ina o kena kau olelo hooholo e Lola i manao ai, alaila, aole a kaua kamailio ana maluna o keia kumuhana, i keia manawa: aka nae ke hoike mua aku nei au ia oe me ka hookamani ole aole loa oe e pakele ana mai kuu inaina aku. Ua hiki ia oe ke kamailio no kau mau hana lokomaikai ia’u, ma ka hooili ana mai i kou mau waiwai apau, aka aole nae ia he kumu no’u e lawe mai ai ia waiwai, no ka mea e ala mai ana no manao hoohuoi ma keia hope aku, i ke kumu oiaio, o kou hana ana mai ia’u pela. E hoomanao e ka lede opio, e uku ana oe i kekahi kumukuai kiekie loa, no kou hoao ana mai e hoohoka i ko’u mau manaolana apau ka mea a’u i moeuhane mau ai no na makahiki lehulehut ae nei i hala.”

 

MOKUNA XII.

            I kela koe hookahi ana iho o Lola maloko o ka rumi, ua hookahe hou aku la oia i kona mau waimaka o ka ehaeha ame ke kaumaha, ahiki i kona manao maoli ana iho no, e maule ana paha oia, o kona hilinai aku la no ia ihope o kona noho, me ka holoi ana ae hoi i kona mau waimaka, alaila noho iho la e noonoo i kana mea pono e hana aku ai.

            Heaha nae kana mea e hana aku ai, me kela ao hakumakuma, o ka hoohuoi, e halii la maluna ona. E hele aku anei oia e hui pu me kekahi loio, a hoike aku imua ona, i na mea apau, a e koi aku i kela loio, e huli pono ia ka mea oiaio i wahi e ikeia ae ai ka pili ole o kekahi hewa iaia?

            He mea ehaeha loa, ke noonoo ae, no ke kau ana mai o kekahi hoohuoi ana maluna ona, me ka hiki ole maoli iaia ke hoomanawanui. Ma kona manaoio, aole e hiki ana i na mea apau ke manaoio, ua paele kona mau lima, i kekahi karaima pepehikanaka, koe wale no o Mrs. Wadona, a ina he hana wale no keia, ma ka aoao o kela wahine, i wahi nona e kaa aku ai malalo ona, alaila o ka mea pono wale no, o ia ka noho aku, me ke kakali, o ka hoea mai, i ka hopena o na hana a Mrs. Wadona, i manao ai e hooko aku.

            “Aole e hiki ia’u ponoi, ke noii aku ahiki i ka hua’iia ana ae o ka mea oiaio, no ka mea, aole he kokua ma ko’u aoao, a o kekahi hoi, aole he maopopo ia’u, o ke ano e hoomaka aku ai i ka noii ana; naolila he oi loa ae ka pono, o ko’u waiho malie aku i keia ninau ko’iko’i, a na ke au o ka manawa, e hoike mai i ka mea oiaio loa; a o na hana hoopilikia apau a kela wahine e hoolala mai nei no’u, ke waiho nei au ia mau mea iloko o ka lima o ka Akua.

            “Ia’u e nana ae ai i ko maua kulana oiaio maoli, he hana maikai ole no’u ka noho ana iho maloko nei o keia hale; oiai no nae ua lohe au i kona kamailio ana mai, aole au e kawale aku mai kona home mai, he hookahi wale no paha alahele e kaawale aku ai au no kekahi wahi okoa loa, o ia no ka holo mahuka ana; a ina nei no kona hoike ae i ke akea, i na mea ana i hooweliweli mai ai imua o’u, a i kahihi mai ai i ke karaima pepehikanaka maluna o’u, alaila e manaoio mai ana ka lehulehu, ua pili i’o ka hewa ia’u, nolaila he wahi mea ano maikai ole maoli keia.

            “Aole nae e hiki ia’u ke alo ae; e pono au e haalele i keia home. Owau no ka i ike, no ko’u pili ole i ka hewa, nolaila he mea liilii loa i ko’u noonoo, ka mea a na kanaka e kamailio mai ai nou.

            “O Elioka hokahi wale no ka’u mea e hopohopo nei. Ua ike au, ua haulehia oia i ke aloha no Alika, a ina no ka huai pau aku o Mrs. Wadona imua ona, ina mea apau, a manaoio mai oia i na olelo a kela wahine, alaila ua like pu ia me kekahi pahi e hou okoa mai ana i kuu puuwai. O ka oi loa aku o ka pono, owau ponoi no ka mea nana e hoakaka aku imua ona, me ka ninau pu aku iaia, i kana mau mea apau e kauoha mai ai ia’u e hana, aka nae ma kekahi ano ke kanalua loa nei au i ka hooko ana aku ia manao, malia paha ma ia hana ana, e komo aku ai iloko o Elioka ka hoohuoi o ko’u pili i’o i ka hewa.

            “He oi aku kuu holo mahuka ana, me ka ike hou ole i kona helehelena, mamua o kona nana mai ia’u he mea hana karaima, ke loaa aku ka ike iaia e pili ana i ka laumake me kekahi mau mea e ae e paaia mai nei e Mrs. Wadona.”

            Ma kela wahi o na mea a Lola e noonoo la e pili ana iaia iho, haalele okoa aku la oia i kona noho, a kukui iho la iluna o ka papahele, a hoomaka aku la e pule i ke Akua, e nonoi aku ana, e hoopakele ae iaia mai na poino mai, e hoohalua mai ana i kona ola, me ka uwalo pu ana aku hoi, e alakai aku Oia iaia mailoko aku o ka pouli aaki, o ke kupouli o ka noonoo, a e haawi mai iaia i ka malamalama, i hiki ai iaia ke ike, i kana mea pono e hana aku ai.

            Ma ka hope loa o kana mau leo pule, puana ae la oia i keia mau huaolelo: “O Kou makemake no ke hanaia,” a iaia i noho pono mai ai imua, akahi no oia a ike iho, i ka maha o kona noonoo, no ka loaa ana mai o kekahi manaolana, aole loa ke Akua, e ae mai ana, e lanakila na hana hoopilikia a kona makuahine hanauna maluna ona, oiai aole loa oia i pili iki i ka hewa.

            No kekahi mau minuke kakaikahi wale no kela noho ana aku a Lola maluna o ka noho kikeke mai la kekahi mea mawaho mai o kona rumi, a iaia i hele mai ia e wehe i ka puka, aia hoi, e ku aku ana o Elioka Hakoka mawaho.

            He oiaio, iloko o na la a Lola e waiho ana i ka ma’i, aole he hele mai o Elioka e ike i ke kaikamahine opio, aka nae i kela ame keia manawa, e ninau mau mai ana no oia i ko Lolo kulana, me kona hele ana e kuai i mau huaai, ame na pua a hoouna aku iloko o ka rumi o Lola.

            I ka manawa a Mrs. Wadona e ninau aku ai iaia i ke kumu o kona nohopaa ana maloko o kona keena hana, he hookahi no ana pane, o ia kona paa loa i kana mau hana, oiai nae aole ia ke kumu oiaio, aka mamuli mai o na manao kaumaha iloko ona, no ka loohia ana o Lola i ka ma’i, a no ke kaumaha no hoi, no kela poino i kau aku maluna o Alika.

            “E oluolu mai ana anei oe, e komo aku ai iloko o ka rumi, no ke kamailio pu ana me oe e Lola, no kekahi manawa pokole?” wahi a ke kanaka opio, i ka wa i hamama ae ai o ka puka, a ike mai la hoi i ke ku aku o Lola mamua ona.

            “Ae, komo mai iloko nei!”wahi a Lola me ka lalau ana aku i kekahi noho, a uwai mai la no Eloika e noho iho ai ilalo.

            “Mai hoopilikia wale oe ia oe iho e Lola, oiai aole i loaa ia oe ka ikaika kupono,” me ka hopu okoa ana aku o Elioka i ka lima o Lola. “Ke hopohopo loa nei au nou e kuu hoaloha, a ma ka’u nana he keu a ka haikea o kou helehelena, e hoike mai ana i kou kulana nawaliwali.”

            “Ae, he nalulu ikaika loa ko’u i keia po iho nei, ua ano mama iki hoi i keia manawa,” wahi a Lola, me ka hiki no nae ia Elioka ke ike aku, aole he nalulu wale no ka pilikia i loaa ia Lola, aka he mau mea e ae no kekahi, ana nae i maopopo ole ai.

            “Pehea, ua hele no anei oe i ka holoholo, i kekahi manawa?”

            “Ae, he mau manawa no  ka’u i hele ai i ka holoholo, a ma ka’u ike iho, ke pii malie ae nei ko’u ano maikai.”

            Ke ike aku la nae o Elioka, i ka haalulu o Lola, he hoailona e hiki ole ai i kela kaikamahine opio, ke pulapu mai i kona hoa kamailio, a o ia ka Elioka o ka pane hou ana aku.

            “O ka iini nui iloko o’u, o ia no ka ike aku i ka piha pono mai o kou mau papalina, a hoi pono mai no hoi ka ili kanaka nei, aole hoi elike me keia a’u e nana aku nei ia oe, ua hele maoli no oe a hiakea. E pono oe e hoohala nui i kekahi manawa ma k ahele ana iwaho e honi aku ai i na ea oluolu, aole e noho paa loa maloko nei o ka hale.”

 

NA UPENA LAWAI’A O KA WA KAHIKO AME KA LAKOU HANA PAKAHI

 

(Kakauia e Kawaikaumaiikamakaokaopua)

(Hoomauia mai.)

 

            Ka elima o na upena lawai’a a ka poe kahiko, o ka upena ka’i uhu keia. Ua kapaia ka inoa o na upena ka’i apau he upena laa. Penei ka hana ana o ka upena ka’i uhu:

            O ka laau a ka poe kahiko e kii ai i laau no keia ano upena, he laau i kapaia ka inoa he alahee. Hookahi laau ma ka akau aku nei, a hookahi laau ma ka hema mai, a pela aku no hoi ma ke komohana ame ka hikina, a puo’a iwaenakonu, na poo o na laau, a hikiikii i ke kaula na poo o na laau apau; hana a paa pono; a he kaula alihi no hoi olalo o keia mau laau, i hoopaaia i kela laau ame keia laau.

            O ka maka o ka upena uhu, he makolu, a i ole makolu-a hoene. O ke aho e hanaia ai ka upena uhu, o ke aho hauliuli no. Aia malalo o ke poo o keia mau laau eha, he mau pohaku no eha, elike no me ka nui o na laau, pela no ka nui o na pohaku; a maloko iho o keia mau alihi apuni, ua kapaia ia wahi e ka poe kahiko he H. a maluna no hoi o ke poo o na laau i hoopaaa ai ke kaula pu e huki ai i ka upena iluna, a e hookuu ai ilalo, i kahi maikai, a i kapaia hoi kela wahi he au.

            Ina aole i loaa ka uhu pakahi, alaila, e hele oe i ka luu wana, a ma kahi au i ike ai i ka maikai, alaila pa-ki oe i ka wana malaila, a pela aku ana ua kakahiaka; alaila e pioili ana ka uhu malaila, a ua makaukau oe i ka makau hooloulou.

            Elike no me ke kaili ana i na i’a kaili makau, e nana pono ana ka mea e kaili ana i ka uhu, aole e hoalualu i ke aho, no ka mea, o keia ano i’a, aole elike me na ano i’a e ae ka huki maoli aku no, aole pela keia ano i’a; ina e ai ana i ka maunu, e ake no e holo iloko o na alualua pohaku, a ina no ua puka loa ia alualua pohaku ma kahi aoao, e puka ana no ma ia aoao; nolaila i makaala loa ia ai ka ai ana o keia i’a e k apoe hooloulou makau.

            Ina e loaa, hoihoi oe i ka uhu iloko o ka hinai au i mouo ai a hookuu; o ia hinai, he hinai paa mau ia ma kau wahi i hoopaa ai. He pohaku malalo, a he kaula no hoi i hikiiia a paa i ka mole o ka hina’i, ame ka mouo no hoi maluna e hoopaa ai i ka hina’i, a ua loaa ae la ka uhu, a hookahi mea i koe, o ka pakali aku i keia uhu i loaa ai. Penei ke ano o ka hana ana:

            Aia i ke aho i pakaliia ai ka uhu, he mau pakali a makena wale i hoopaaia i keia aho, elike me kamakemake o ka mea lawai’a uhu; ina uni a oi aku, ua lawa. O ke ano o ka hana ana o ke kaula pakali, ua like me ka hana ana i ka puka ahele moa; ua like loa; a o ka nunui loa ae hoi o ka puka ahele moa, a liilii iho hoi kela; a e hoopaaia ana keia mau kaula pakali apau i ke aho loihi.

            He like ole na kaula pakali i hanaia ai. Nunui a liilii a liilii iki iho, ka mea i hanaia ai pela, he i’a liilii iki iho kekahi malalo o ka uhu, elike me ka halahala, punahunuhu, pakole, a lauia, a ua makaukau mua na pakali; a maluna ae o keia mau kaula pakali, he wahi mouo uuku.

            Aia malalo loa o ka piko o ke aho he kui i hoopaaia a paa; o ka mea i hoopaaia ai keia kui malaila, no ka i’a e komo ana iloko o ka upena, a ua makaukau kela kui i hoopaaia ai ma ke poo o kela aho pakali, hopu no hoopaa i ka i’a  e pakaliia ana; alaila, wehe ae oe i ke kui a hookomo i ka puka o ke kui. A ina ua nui loa ke kaula pakali, e owiliwili ae oe i ke kaula pakali, mawaenakonu aku o ke kui i ole ai e pahemo ke kaula mai ke kui aku.

            Ina e ne’ine’i kau owiliwili ana, e pahemo ana ke kaula mai ke kui aku. O ke ano o ka hou ana i ke kui i ka uhu, e hou aku i ke kui ma ka papalina o ka uhu a puka ma ka waha ke kui, ame ke kaula, alaila hookomo ae oe i ka piko o ke kaula, me ka puka poepoe me he aho pahele moa la, a puka puluniu pahele aama hoi; alaila, huki ae a paa; a hoopaa aku i ke aho e paa ana na pakali. Hana a paa loa i ole ai e hoholo.

            Iloko o keia mau uhu apau, elua uhu huhu loa, o ia ka uhu lauli, ame ka a-a-kole; ina e ikeia ana keia mau uhu, e malama loa ana ka mea e paa ana i ke aho pakali me ka makaala loa, o alualuia mai e nanahu ka uhu pakali; o ia hoi, he nanahu ka uhu pakali; o ia hoi, he uhu pahau paha, a uhu hi’u kole, a ke’o.

            E hookuu ana oe i ka uhu pakali, e hoowalewale i ua uhu lauli nei, e hoowalewale i ua uhu lauli nei, a i ole, a-a-kole. I ka wa e ike mai ai ua a-a-kole nei i ka uhu pakali; huki wikiwiki mai oe i ka uhu pakali a pili i ka waa.

            Elua, a i ole ekolu au hana ana pela, alaila maalili iki ka huhu, alaila hikii oe i ka i’a pakali i ka upena; a ua hana oe he kaula paa maluna mai o ka mole o ka upena.

            E lawe i ka Nupepa Kuokoa i ike i ka hana a kahiko!

 

MALAMA OLE IA KE ANAINA HAIPULE MA PUOWAINA.

 

            He hana maamau i na makahiki aku nei i hala ka malamaia o ke anaina haipule maluna o ka piko o ka puu o Puowaina ma na kakahiaka Easter, ka la i ala hou mai ai ka Haku mai ka lua kupapau mai, e hoomaka ana mai ka hora 7 a 8 a.m., ua hoolalaia e malama hou ia ana no he anaina haipule o ia ano ma ke kakahiaka Sabati i hala iho la, aka mamuli o ka nui o ka ua ua hiki ole e malamaia.

            O ka lunahoomalu o ke komite iaia ia hana oia o Miss Emil V. Warriner, ua pau na hana i ka hoomakaukauia e ia komite ua kauia ke ke’a maluna o Puowaina, ua hoomakaukauia na noho, a ua hoomakaukauia na kukui uwila no ka hoolele ana aku i ka malamalama maluna o ke ke’a, a mamuli o ka ua loa ma ia kakahiaka, ua hiki ole ke malamaia ke anaina haipule no ka nui o ka ua, he mea akeakea loa i ka holopono o ia hana.

 

MONEY JINGLES

 

UA IKE ANEI OE?

 

            O ka mea nune mau ia i keia wa o ia no na BUKE A NA KAMAIKI i hoopukaia iho nei.

            Ua pa’iia me ka noeau—palapalaia me na manao naauao—a ua pa’i pu ia hoi me na kii o na waihooluu like ole.

            E hoike ana he mau manao hoohauoli—e hoike ana i ke ano o ka Hoomakaulii ame na mea e lilo ai i Makaainana maikai.

            He mau ano nui o ke ano hou loa, e nele ole ai ka hauoli o na kamaiki mai ka 3 a ke 80 makahiki.

            Ua loaa mai nei ko makou haawina o ka helu mua, a ke makemake nei makou e loaa i na kamaiki apau e loaa ia lakou keia buke. EIA KE KALI NEI KAU BUKE IA OE—Hele mai e kii i keia wa. E haawi wale ia no ma ke ano makana.

            He hauoli loa makou i ka lawe ana mai i kau mau hoahu liilii.

            He 4 pakeneka ka makou e uku nei no ka makahiki.

Kihi o na Alanui Moi ame Nuuanu.

 

Chinese-American Bank

Kihi o na Alanui Moi ame Nuuanu.                                                                        Honolulu, T. H.

 

Hoao i ke Kope Kona Kamehameha

 

Ke kope maloko olaila kona mau ano maikai kumu apau, i hoomo’aia me ke akahele loa, i wahi e moani ai ke ala, a hookomoia aku iloko o na puolo ame na kini, e komo ole ai ke ea iloko olaila—o ke KOPE KONA KAMEHAMEHA ia. E nana i ka hoailona melemele. He ono a mikomiko ka hoailona Kamehameha i kupono i na Hawaii. Hiki ke loaa ia oe ma na puolo o 1-paona a i ole ma na kini o 5-paona.

 

 

‘O KLEIN KA MEA NANA I HANA’

 

Pinepineka lohe ana o na kanaka i keia olelo. O ka manao maoli ua mahalo loa lkou. Ua loaa ia lakouna meahana maikai loa no ka lakou mau hana i manao ai. Eia ia makou ia mau ano apau loa.

 

UPA OKI UWEA, NA KALA WEHE KO-LU, HAO UMII, LAKO PINANA, NA KUAPO ILI, HAO WEHE UWEA

 

Aole e loaa ka palekana i ka mea hana uwila, a kanaka hoomoe uwea me na meahana e ae.

 

LEWERS & COOKE, LTD.

 

169-177 ALANUI Moi Hema.                                                              Pahu Leka 2930, Honolulu.

 

 

He Manaoio Anei Oe i Ka hoomakaulii?

 

I na he manaoio oe i ka Hoomakaulii, alaila, e hele mai no ko makou hale kuai bipi nei e kuai ai i kau mau i’o bipi. He emi loa na i’o bipi palai, ku, a pela wale aku, ma ko makou hale nei, i loaa ole i na hale e ae apau.

            Aole wale no o na i’o bipi, aka, o na i’o Kamano momona paakai, a i ole hoomo’a uwahiia.

            Na i’o Hipa ku, he oi aku ke emi maanei e koe nui ai kai kenikeni iloko o kou pakeke.

 

O Ke Koe Nui Ana o Kau Kenikeni Iloko o Kou Pakeke e Hiki ai ia oe ke Hoihoi ia Koena i ka Banako o ia ke Keehina Hoomakaulii

 

Metropolitan Meat Market

 

Ma ka aoao Waikiki o ke kihi mauka o na