Ka Nupepa Kuokoa, Volume LXII, Number 13, 29 March 1923 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

He moolelo no Alika A I Ole Ke Ao Omamalu o Kekahi Karaima Pohihihi Mamuli o ka Manao Lili

 

            Ua noke oia i ka uwe, me ka walania maoli, no kona lilo i wahine ilihune, a e lilo ana oia i mea paheneheneia mai e kona pohai, o ka poe hanohano, a no kana mau keiki hoi, e hoaa ana, me he mau keiki la na kekahi mau makua ilihune o ke kulana haahaa loa.

            Ua lilo na leo hoomalielie a kana mau keiki i ko laua makuahine, i mea maliu ole ia aku e Mrs. Wadona.  Oiai ua @anaka makua maoli kela mau kanaka opio, ua hooia mai la laua imua o ka makuahine, ua hiki ia laua ke hele i ka hana, me ka ike ole o ko laua makuahine, ua hiki ia laua ke hele i ka hana, me ka ike ole o ko lau makuahine i ka nele ame ka pilikia; me he me la nae, he mau olelo kela, i pa aku ma na pepeiao o kekahi wahine kuli.

            Mai na la kaikamahine opio mai o Mrs. Wadona, he hookahi mea nui iloko o kona noonoo, o ia no ka noho i loko o ka hanohano ame ka waiwai; aole on a hiohoi iki e halawai oia me ke kaulana nele a ilihune, a i ole e kaupalena ia paha kona mau makemake, aka o ka iini nui a kona noonoo, o ia no ka nui o ka waiwai, e hopu ae ai no ka lima hema, kiola, pela hoi ka lima akau; no laila i ka hoike ana mai la o ka loio no kona kualana nele a ilihune, he puupuu ikaika loa kela i ku'iia aku iaia, i oi aku ka ehaeha mamua o ka make ana o kana kane.

            Ua maopopo no i ua wahine nei, in a no ke kuai hooliloia aku o kona home ame na lako hale apua, e loaa ana iaia he huina dala mahuahua, e ike ole ai oia i ka nele, aka nae o ka loheia ae, ua kuai aku oia i kona home, i wahi e loaa ai kana dala, o kekahi ia o na hana, ana i makemake ole ai e hoohaahaa i kona kulana.

            No ka pule holookoa, maloko wale no o Mrs. Wadona o kona rumi e noho ai, e hoao ana e hoomalielie i kona mau manao ehaeha he nui, a iaia i oili mai ai iwaho, no ka halawai ana me ka poe maloko o kona home, aia maluna o kona helehelena kekahi mau hiona e hoike mai ana, aole oia i noho wale iloko o kela mau la moloko o kona rumi, aka ua piha kona noonoo, me na mea like ole, ana e haku ai, i wahi noho e pono ai ame kana mau keikikane elua.

            I kekahi la, hele aku la ua o Mrs. Wadona noloko o ka rumi o Lola, ua maikai loa ae kela kaikamahine, eia nae he o ia mau no ka nawaliwali o kona kino, me ka nananakea o kona helehelena.  Aole no o Lola ike iki ia Mrs. Wadona mahope iho o ka haalele ana mai o ka mea malama ma'i, o na kauwa wale no na lakou e lawe aku ana i kana mau meaai, kana poe ike mau i na la apau.

            Aole no hoi he manawa a Uilama ame Peleka i hele aku ai e ike ia Lola, o ko Uilama kumu o ka hoomamao ana iaia iho mai kela kaikamahina aku, no ka hooleia ana aku o kana noi, e lilo aku o Lola i wahine nana; a o ko Pelekane kumu hoi o ka hele ole ana mai e hui pu me ia, no kona manao, aia o Lola iloko o ke kulana kaumaha e noho la iloko o ia mau la.

z  Ia Mrs. Wadona i komo aku ai maloko o ka rumi o Lola, e kulou ana ua kaikamahine nei ilalo, me ka honihoni ana i kekahi bo-ke pua, e paa ana iloko o kona mau lima.  He keu aku maoli ka u'i o Lola, i ua wahine nei e nana aku la i ke kaikamahine opio, me kona lole keokeo e noho ana, me ka milikaa ana i na pua, a ua lilo kela hiona a Mrs. Wadona e ike aku ana, i kumu nana e hookomo mai i ka manao lili iloko on a, o kekahi kumu nui paha hoi, no kona ike ana, aole e lilo mai ana kela wahine u'i, na kana keiki.

            Mahope iho o kona ku malie ana, no kekahi mau sekona me ka pane ole, alaila, ninau aku la oia ia Lola:  "Nohea mai kena bo-ke pua i loaa ai ia oe?"  wahi ana, no kona manao, pela iho la oia e hoohele aku ai i kana ninau, i wahi e loaa ai he kamailio pu ana me Lola, ahili i ka oili okoa ana aku o kekahi manao nui, ana i makemake loa ai e hoike aku i kela kaikamahine.

            "Na Elioka keia bo-ke pua o ka hoouna ana mai na'u, ma o kekahi la o na kauwa lawelawe," i pane ai o Lola me ka pii ana ae o ka ula ma kona mau papalina.

            "Pela iʻo ka ohi!" i pane aku ai o Mrs. Wadona, me ka aaki ana iho o na niho ma kona mau lehelehe.  "Aole au i manao mua, he nui ka Elioka dala, e hoomaunauna wale ai oia, ma ke kuai ana i kekahi bo-ke pua nani elike me kena.  Aole me na dala uuku e loaa mai ai kena bo-ke pua, aka me na dala mahuahua."

            Aole a Lola pane no keia mau olelo kohu ole a Mrs. Wadona, aka ua oi loa ae la nae ka ula o kona mau papalina, a ke hoohuoi la o Mrs. Wadona, malia aia ka manao hoohihi iloko o Lola no Elioka, a o ke kumu ia, i ae ole ai kela kaikamahine i ke noi a Uilama e lilo aku i wahine nana.

            "I hele mai la au no ke kukakuka pu ana me oe e Lola, no na mea e pili ana i ko kakou noho ana, o keia mua aku" wahi a Mrs. Wadona, mahope o ka hala ana o kekahi mau sekona loihi o ka noho hamau ana o ua wahine nei.

            No kekahi mau olelo a Mrs. Wadona, akahi no a ea mai ke poo o Lola iluna, me ka nana ana mai i kona makuahine hanauna, no ka mea ua loaa aku ka hoomaopopo ana ia Lola, no ka nui maoli o na haawina hoehaeha i kau aku ma luna o Mrs. Wdona, no ka maka ana o kana kane, a o ke kuleana hoi i noho aku ai ua o Lola maloko o kela home.  No kela noonoo o ke ala ana mai iloko o ke kaikamahine opio, ua halo'ilo'i mai la na kulu waimaka ma kona mau lihilihi, eia nae aole oia i pane mai, a oia ka Mrs. Wadona, o ka hoomau hou ana aku i ke kamailio ana.

            "Malia paha, aole i loaa aku ka lohe ia oe, i ke kulana oiaio o ko'u noho ana, pela au i hele mai la e kamailio ia oe; o ia hoi, ma hope o ka make ana aku nei o Mr. Wadona, kou makuakane hanauna, ua hoikeia mai la ka lohe ia'u e kona loio, ua poho kana oihana, a he wahine makilo au i keia la, me ka nele ma na ano apau.

            "O keia maoli ka mea oiaio loa a'u e hoike aku nei imua ou e Lola, ua nele au, aohe wahi e hopu ai, e loaa ke dala, koe wale no na pono hale apua e waiho nei maloko o keia home, a ua nele au i ke dala, no ka uku ana aku i ka auhau, a i ka uku inisua o keia hale, i ka wa kikooia mai ai, iloko o na pule kakaikahi wale no, mai keia la aku."

            "Ke kaumaha loa nei au, no keia pilikia i kau mai maluna ou e kuu makuahine!" wahi a Lola me ka leo oluolu loa, o ka mea i loaa i'o ka manao kaumaha.  "Ua manao loa au, i ka make ana aku o kuu makuakane hanauna, akahi nae hoi a pau ko'u pohihihi, ke hoakaka mai nei oe i ka mea oiaio loa.  Auhea nae oe e kuu makuahine, mai hoopilikia i kou noonoo, no na mea pili dala, no ka mea ke hauoli loa nei au e haawi aku i na kokua ana, i wahi e ike ole ai oe ia mea he pilikia.  Ina he makemake kou i ke dala, ua hiki ia oe iloko o na manawa apau ke hele mai mua o'u, e haawi aku no au, elike me ka nui au i makemake ai."

            "Alaila e manao ana anei. oe, he wahine au e ae ana e hoohaahaa ia'u iho, ma ke noi ana aku i kau mau kokua ana mai iloko o ko'u wa o ka pilikia?  Aole loa!  Aole au i makemake e hoopaa ia'u iho malalo o kekahi mau mea, e koiia mai ai au mahope aku, e panai aku i ka maikai, no ka maikai i hanaia mai no ko'u pono."

            Hilinai pono mai la o Lola i hope o kona noho, a nana aku la i kona makuahine me ka manao kahaha, a o ia kana o kapane aku:

            "E noi aku ana au ia oe, e huikalama mai ia'u, in a ua hoopilikia aku kou noonoo ma kekahi ano.  O ka mea oiaio no ea, i lohe oe i ka iini maoli o'u, o ia no ke ake ana e hoomama i kou mau manao kaumaha apau."

            "Malia paha o kena maoli no ka mea pololei, aka nae, aole au i hoea mai la imua ou, no keia hana, he hana okoa no ka'u i makeamake ai e ike ia oe, he hana oi ae o ke ano nui ame ke ko'iko'i.  Malia paha aole oe i hoopoina, i kela mau kamailia a kau maloko o kou rumi, iloko o kekahi manawa ae nei i hala," me ke kuhikuhi ana aku o kekahi lima o Mrs. Wadona, i ka rumi o Alika.

            I kela lohe pono ana aku o Lola, i na hoakaka a kona makuahine hanauna, no ke ano o kana mea i makemake ai e hui pu me ia nei, puliki ae la kona mau lima i ka bo-ke pua ana e paa ana, no ka mea aole loa oia i hoopoina i na olelo i kamailioia mawaena o laua, a o ka mea oiaio maoli, ua lilo na olelo a Mrs. Wadona, me he akua lapu hoomaka'uka'u la, e olelo e holapu mai ana imua o kona alo, i kona wa e ala ana, a e hiamoe ana paha.  Aole a Lola pane no kela mau olelo a Mrs. Wadona, a o ia ka ua wahine nei, i hoomau hou mai ai i kana kamailio ana:

            "He mea makehewa wale no, ka hoonui olelo ana mawaena o kaua, aka e hoike aku no au i ka mea oiaio loa.  Ma kela kamailio hope ana a kaua, i hoakaka aku ai au i ko'u manao, e noho hamau no au, me ka hua'i ole ae i ka'u mau mea apua i ike ai e pili ana i kau hana, ke maliu mai oe, e lilo i wahine na kuu keiki.  Malia paha ua lwae mai oe ia mau olelo a'u ma ke ano he mau olelo palaualelo wale no, oaia nae o ka mea oiaio loa, he mau olelo kui'o ia e hiki ole ai ke hoihoi hou ia mai.

            "Nolaila o ka manao nui o keia huakai a'u i hele mai la e ike ia oe, no ka hooponopono ana no ia i keia kumuhana, no ka manawa hope loa.  Ina e ae mai ana oe me ka maikai, e lilo i wahine mare na Uilama, alaila e noho hamau no au me ka hua'i ole ae i ka meahuna a'u i ike ai nou, oiai aole he hana maikai ma ko'u aoao, ka hoao ana e hookomo aku i ka wahine a ka'u keiki i loko o kekahi poino nui.

            "He ohana nele a ilihune ko'u; o ka pono wale no o Uilama kuu keiki, o ia kona hooikaika aku ma kekahi mau hana e pono ai oia, oiai nae, i ka wa e olo ana o kona makuakane, aole on a mau mea hemahema, ua lako oia ma na ano apau, no keia kumu, he pono e loaa aku kekahi mau kokua ana iaia ma keia ola honua ana.  Ina nei no kou ae me ka maikai e mare aku iaia, me ka loaa pu o ke kuleana iaia e hoohana ai i kau mau dala, alaila e noho aku ana kakou apau iloko o kela mau la, mamua aku o ka make ana o Mr. Wadona."

            "No'u iho, aole loa au e ike hou ana ia mea he hauoli!" wahi a Lola me ka haalulu o kona leo.

            "He mea oiaio loa kena, no ka mea eia na ao hakumakuma o ka hoohuoi ke kau keha nei maluna iho ou, aka na--."

            "Pehea la oe e Anate Roke, i piha ai me na manao lokoino, o ka hookau ana mai i na hoohuoi ana maluna o'u, owai ka mea nana i hoopoino aku i ko Alika ola?"

            "Pehea auanei e hiki ai ia oe e Lola ke hoole ae, no ka mea ke ku okoa mai nei na mea oiaio, no ka hohaewa ana mai ia oe, no kekahi karaima ekaeka loa au i hana ai?  Ke hoomanao nei oe no kela omole laaumake, ke kiaha aniani, a me na haneri kaukani dala ekolu a Alika, o ka ili ana mai maluna ou, mahope iho o kona make ana.  He mea uuku anei kela?"

            "Ua phia anei kou naau e Anate Roke me ka lokoino, ame ke aloha ole?  He oi aku kuu hauoli, in a owau pu kekahi i make, aole au e lohe i keia mau olelo pili i ke dala mai kou mau lehelehe mai, me he me la, o ke dala wale no ka mea nui i loko o kou poo, i ke ao ame ka po.  Heaha auanei ka'u e makee wale aku ai no i ko Alika mahele o ke dala, oiai ua nui ka'u dala, e maopopo ole ai ia'u ke ano o ka hoolilo ana aku?"

            "O keia ka manawa mua loa a'u i lohe ai i kekahi mau olelo hupo loa, e like me keia au e hoakaka mai nei e Lola, no ka nui loa o kau mau dala.  No'u iho, pehea ka nui o ke dala, e loaa ana ia'u, aole no ia he mea e lawa ai ko'u makemake, a ua makaukau loa au e hoolilo aku i ka'u dala, ma na mea e hoohauoliia mai ko'u noonoo."

            "A laila o ke kumu nui ane o kou manaoino no'u mamuli no ia o ka nui loa o ko'u dala, ke hui pu ia me ko Alika kuleana?  He oiaio ka ka Palapala Hemolele i hoakaka mai ai, o ka puni dala, o ka mole ia o na hewa a pau.  Ina o ke dala kou makemake e Anate Roke, ea, alaila ke haawi aku nei au i ka'u mau dala apau nau, me ko'u lawe ole i hookahi keneka no ke kokua ana mai ia'u.  O ka mea nui i loko o ko'u noonoo, o ia no ka loaa o ka maha ia'u, me kou hele hou ole mai e hoouluhua i kuu noonoo, me keia mau me ku i ha hooweliweli.

            "Ua hiki ia oe ame ko keiki, ke lawe aku i na haneri kaukani dala ekolu, a Alia, a aia a loaa he manawa kupono no'u e hele aku ai e hui pu me ko'u loio, alaila ia wa au e kakauinoa ai i na palapala apau, e hookuu, a e haalele loa ana i ka'u mau koi ko'u mau waiwai ponoi."

            "Me ka mahalo a nui ia oe e Lola no kena mau hoakaka, aka nae auhea oe, aole au i lawa iho la i ka ekolu haneri kaukani dala, eia au ke paanei i ka'u pepa hahau, no kekahi pomaikai oi aku."

            "Alaila e koi pu mai ana anei oe, e haawi aku au i ko'u mahele apau loa ia oe?  Ina o kou makemake ia ea, e lawe aku ia mau waiwai apau, a e ku no au a hele mai keia wahi aku, me ka noho ana me kekahi kaawale loa e loaa ai ka maha i kuu noonoo, me ka hoouluhua ole ia mai, me keia mau hana hoohuoi o ka hilahila ole maluna o'u."

            "Alaila e manao ana anei oe, e loaa kekahi wahi maluhia ma ka honua nei no'u?  Aole loa"

            "Nawai hoi e ole ka loaa o kekahi wahi maluhia ia'u; no ka mea o ko'u kaawale mai ia oe aku, o ka loaa ana ia o ka noho maluhia ana ia'u, a maha no hoi ka noonoo.  Aole loa au i hoopilikia aku ia Alika kuu hoahanau ma kekahi ano, aole loa no he wahi noonoo iki iloko o'u, e hookau aku i ka poino maluna on a, ua ike no oe e Anaka Roke, ke kamailio aku nei au i ka mea oiaio loa."

            "Alaila pehea i loaa aku ai ka omole laaumake ia'u iloko o ka lehu?  Pehea i paku'i ai ke kiaha aniani i ka hohono o ka laaumake?  Aole he mea i maopopo ia'u, a aole no au i ike iki, i kela mea, ahiki i ho hoikeike okoa ana mai imua o'u.  Ua oi aku kau mau hana hoehaeha e kuu makuahine hanauna, mamua o ka mea hiki ia'u ke hoomanawanui, a ua konoia mai au, e ku au a hele mailoko aku nei o keia hale, me ka noho hou ole iho i hookahi la me oe maanei nei," wahi a Lola me kona ku okoa ana ae iluna, me ka hele a piha me ka inaina.

            Pahola ae la ka minoaka ma na papalina o Mrs. Wadona, me ka i ana mai:

(Aole i pau)

 

Makalei, ka Laau Pii Ona a Ka I'a o Moa-Ula-Nui-Akea i Kaulana

 

He Moolelo Kahiko no ka Huli Koolau o Kailua ame Waimanalo, ka Nanea o ke Au o ka Manawa

 

            Eia nae aole no i nele oia i na manao hoopoaiai no ke alahele e ku ai o Kahinihiniula i ka moku o Oahu, a ua hiki mai hoi i ka wa e hoolaia ai ia iini.

            Oia na kanaka o Olomana e noho nei i ke alo o Ahiki, ua hoomakaukauia na mea apau e pono ai o ka hoao o ka punahele o Olomana.

            Ua kukuluia keia halau hoao o ka punahele a ke alii i kahi e heaia nei ka inoa o ke kula o Alele, i heaia hoi ia inoa mamuli o ka lele ana o Kaneipolu, ia wahi haalu a make loa, oiai nae o ke kanaka ia nana i lele na pali kiekie o keia mau mokupuni, mai Hawaii ahiki i Oahu nei, ia wahi haalu wale no e waiho la, make keia lelepali kaulana, a panaia ka inoa o ia wahi, ke kula o Alele.

            Maopopo mai la ia oe e ka mea heluhelu, aia ilaila ka halau o hookoia ai o na hana hoepa a ke aiwaiwa, a he kahua laula palahalaha hoi no na lii, ame na maka ainana, e kuupau ai i na hana hoohauoli, no ka punahele a ke alii i lilo i mea nui i na lii ame na makainana o Olomana.

            I ke kokoke ana mai i ka wa hoao, ia wa i eu kino mai ai o Olomana, me kona alo alii, mamua o kona haalele ana aku ia Kau'ilehua, kona halealii i Waialee, ua hoouna mai la oia i ke kukini e ha'i mai i ka lono ia Ahiki eia oia ahikimai me kona alo piha kanaka.

            Oiai ka elele a ke alii i ke ala, ua hoomaoe aku la o Lupea (Haumea) i ka laua kane:

            "E ke kane alii a maua e, he ha'o hoi keia kapuai halulu o ke alaloa, e pahupahu nei, o ke pahupahu no o ke kapuai o ke kukini a ke alii a e ao, he ane paha oia no, heaha la keia huaka'i@"

            "Lolohe no ka hoi kou pepeiao, aohe loheia oia mea la, e ko'u pepeiao!"

            "Ina aku a hoea iho," wahi a Haumea, "o ka elele no keia a ke alii, aohe kapuai e ae."

            Ia lakou nei o nune ana no keia mau olelo, ku ana ke kukuni ma ka puka.

            "Mama wale ka huakai a ke kukini, maloko hale, a kuu ka nae, wahi ka huaolelo a kuu lani au i lawe mai la na'u."

            "Aohe no he olelo nui, e kaumaha ai oe, anoai paha o hele mai a paa i na hoa aina o ke alii aohe nae he hewa o kou makaukau, anoai o ka hele mai keia o ko aikane, pau pu mai me na konohiki, ame ko lakou mau alo kanaka o ke Koolauloa, a ku mai i ou nei, oiai o oe iho ke-na mai nei ke alii ia'u,e ha'i e mai i ka lono ia oe, ua lono aku la oe i ka olelo, ke hoi nei au."

            Huli akula ke kukini no kona alahele, a noho iho la ke alii konohiki me ka nalu ana iloko on a, no ka himi mai o ke aikane, aole hoi ka momona o ka aina; ua haoia e keia kalohe nui e noho nei i ke alo o Ahiki, ana nae o kuhihewa nei, o Halau Lahaina mapuna ka noe, He noe na ka makani kiu wailehua,

            Ua akaka nae ia mau ano apau o ke konohiki ia Lupea Hoepa, nolaila olelo hookalohe mai la ua u'i nei o ke ala anuenue i ke konohiki:  "Hookahi no ka hoi kaula nui e ke kana alii la, hiolo na makaha wai o na Koolau nei, o ko aina me kuu aikane, o ka noho no hoi a ka punahele la, liilii na mea apau, he ui wale ae n oua loaa."

            He oiaio ia olelo au e ka wahine, i na la mamua o ko'u hoi ana mai a noho i ka aina o kuu aikane," wahi a Ahiki, "ua ai a kena i ka momomna o ka aina o kuu aikane, i aha ia iho la hoi, o ka nalo ia o ka anae aloalo lena o Kawinui ame ke awe kuaehe o Kaelepulu, p ia au e aloha ae la i kuu lani alii."

            "Alaila aohe i'a o kela mau loko e waiho mai la?"

            "Aohe," wahi a ke konohiki.  "Eia nae i ka ike a ke kahuna o maua, he wahi keiki ka ka mea i nalowale ai o ka i'a, aia ka i ka wai kehau o ka pali o hea la kahi i hunaia ai; ua hoopuka nae maua i ka olelo, e imi ana a iaia a loaa lawe maua me kuu aikane iaia, i keiki hanau kama na maua, a o ia au e aloha ae la i ke kane alii a olua, i ka hiki mai me kona alo alii, o ka ihu o ka puaa me kahi i'a laulele o ka aina, ka mea e paa ai ka houpo o ia iho la no ka mea i ka lima o ka olua kane."

            "Aia ha ua mea nui, anoai no hoi ua pono ole ka manao o kahi poe nou, na ha'i i hana ka hewa, ia oe nae ke kaumaha o ka inaina e ili ai, hookaeoeo no hoi ka hana a ke kalohe."

            Ku ae la ke konohiki iluna, me ka olelo ana iho i na wahine:  "E noho olua, a e iho ae au i kai o ke kula e nana ai i ka hana a na kanaka o ke lii, oiai ke hoomakaukaa mai nei no hoi ko kakou alo kanaka i mea no ka huakai a ke alii e hiki mai ai, no ka mea, i hoouna mai ke alii i kona poe no kala nui o olua @ @@ wahine."

            "O hele," wahi a Kahauolopua, "a hoi mai, in a hoi e loaa ana ia oe he manawa, hoouna aku hoi oe i kanaka e iho i kahakai i pipipi, ono wale mai la no hoi i ka i'a maka hauli o ke alo pohaku."

            "Ua pono," wahi a Ahiki, "e Paku'i, e kahea aku oe ia Nuhi e hele mai!"

            A lohe o Nuhi i ka lea o Ahiki, hele mai la oia ahiki i ke alo o ke Konohiki, me ka ui ana aku: "Eia ke kanaka, heaha ka leo o ke alii a'u e hooko aku ai?"

            "E holo oe i kai o Makapu i pipipi, alealea, unauna holoholo kakakai no ka ono o ke alii a kaua, a hoi mai oe loaa mai au ia oe i kai o Alele, alaila hoi mai kaua."

            "Ua pono ia," wahi a Nuhi, o ka huli aku la no ia, hooko i ka leo o ke alii.

            Oiai nae o Nuhi e holo la no Mokapu, eia hoi o Ahiki ke hele nei no Alelem ia wa i ano mai ai ka hiamoe i na maka o Kahauolopua, a lilo aku la oia me

Nipo au ilaila luhe i ka wai,

I ka umii wela a Maselina,

Eha au ilaila pulu i ka noe,

I ka holu malie a ke kaomi.

            Oiai ua ike iho la ua eueu nei, ua malaelae ke alahele nona, e hoopahulu ai i ke aloalii o Olomana ke hiki mai.  A i kona ike ana ua hala ke alii konohiki kane a lau, o kona wa ia i hookau aku ai i ka hiamoe nipo me Kahauolopua; a lilo aku la me

Moe kokolo ka auhau o na pali,

Ke hoakaka la i ka maka o ka Papala,

E nihi ana i ke alo o Makuaiki,

Ke kuehu mai la luna i ka momoku,

Malamalama ke kai o Kahala nui,

Waiho wale ka hene o Aneki e,

O ka ne-ki hoonaue a ka makani

Nane ke kalukalu moe ipo o Kewa,

Wa iho la i ka leo nunu ka olelo,

Olelolehala ia'u me ia nei e,

O maua e!

            I ka ike ana o Haumea ua moe ka makani olalo ua ahiahi, ua kau ka malama a ka ikioe ia Kahauolopua, o kona oili aku la no ia iloko o kona kina papalua, a kua ana iwaho.

            Eia na kanaka o ke alo ka laua kane ke hi-o mai nei, i ka hana i na meaai, no ka huakai alii ke hiki mai, ke kauluwela nei na imu no ke kalua ana i na mea apau, aole nae o lakou ike mai i ke kupu, ka eu o Nuumealani e ku nei, a nana ia lakou, ame ka lakou hana.

            Nolaila huli aku la ka nana ana a ua aiwaaiwa nei i ka moana kai akea, ike aku la oia i ka noe me ka punohu ua koko e halii ana i ke kai.

            Luliluli iho la ke poo o Haumea me ka olelo ana iho me ka leo nui:  "He keu hoi keia poe elemakule haae nui hoopauha, o ka lakou olelo iho la ka hoi ia e aoao mai ai i ka pulapula, ka i no o ka haawi mai i ke ake o Laukapalili, eia ka o ka ula leo iho la ka makana.

            "Eia au ahiki aku ma ka lihilihi o Laumiha kuu alanui," ia wa oia i o ae ai i kona lima, a moe ana ke anuenue i ka lewa, o kekahi wawae i ka ipuka hale, kahi a ianei e ku nei.

            Oiai nae na kanaka e lohe nei i keia leo wahine e olelo nei ma kahi kokoke ia lakou, huli mai la lakou ma kahi o ka leo i pa-e aku ai, aohe a lakou mea i ike, o ka wa nae ia o ka wawae o ke anuenue i hehi iho ai i ka honua ma ka puka o ka hale o ke konohiki, a kau aku la ua eu nei o Nuumea no ka aina lewa.

            I ka ike ana o na kanaka i keia anuenue ua ole o ka la ku haoa, ua hooho ae la na mea apau: "Auwe no hoi ke kupanaha e!  Ike no hoi ka po i ka hoao o ke aikane punahele a ke alii, hokai no hoi ua mea i pili aku i ke alii la, ike ka po, pehea no la ka nui o ka punahele o keia kanaka i ke alii, eia ka he mamo alii no mai ka po mai, ke ike pu ae la kakou apau, ke hikii la ke anuenue i ka ipuka o ka hale."

            Ke wa nei ke alo kanaka o Ahiki i keia mea a lakou i ike ai, aia hoi o Ahiki i ke kula o Alele kahi i hoonanea ai i ke kukahekahe me an kanaka o kau aikane, a e kali ana hoi a hoi mai o Nui me ka ono a ke aliiwahine.

            Hele no hoi a ahiahi, hiki o Nuhi i kahi a ke konihiki e noho nei, eia nae ua poina palaka oia, aohe on a hoomanao ae, he kanaka kana i hoouna ai, e hele i ka ono o ke Alii Kahauolopua.

            Ia Lupea hoepa no a hehi i ke ala anuenue, o ka wa no ia i ekekei ae ai o ke anuenue mai ka ipuka ae o ka hale, a nalo aku la i ka lewa, me ke kiei aua aku o Haumea iloko o ka hale a Kahinihiniula e noho ana i ka papaaina imua o ke alo o na kanaka eha, a ike aku la oia i ka niu wai e paa ana i ka lima o Kahinihiniula

            Iaia nae i hapai ae ai i ka waha e inu, ia wa i kikoo mai ai ka lima o Haumea me ka hopu ana iho a paa, lele ana iwaho.  Lohe pu aku la no hoi i ka leo i ka lua o ka puniu wai, ua lalau hou aku la no o Haumea a lele i waho me ka olelo pu no, o ko lakou mimi hohono ka la, o ka wai iho la ia e hoainu ai, waiakua no hoi, a na ka puia i ke onaona wailukini o Kamapuaa i ka ihu o Kahinihiniula, na ia mea i hooiaio mai iaia, ua pololei ka hoike a ka leo kino ole.

            Iaia i ike ai ua pau na hana hoao a na kumuhonua ia Kahinihiniula, o kona wa no ia i huli mai ai e hoi no ke alo o ke aikane, e nanea nei i ka hiamoe, oiai nae aohe ana mea i manao hou aku ai e hakilo, ua hookoia hoi kana upu e hehi na wawae o kana hookapuhi i ka Pe'akapu o Kukulu o Kahiki.

            Iaia no a a noho iho ma ka aoao o kana aikane, kikoo ae la na lima o Kahauolopua, me ka huli ana mai o ke alo o ke aikane ma kahi a Haumea e noho nei; kaakaa ae la na maka a olelo mai la i ke aikane:  "Eia no ka oe ke ala nei?"

            "Makena ua nanea o kou hiamoe o ka po no ia o ka la," wahi a Haumea.

            "Ae hoi," wahi a Kahauolopua, "eia ka ua ahiahi ia e moe nei; auhea ke kane a kaua?"

            "Aole i hoi mai nei," wahi a Haumea.

            "Makena no hoi ua hele ana, noonoo ole mai e o kaua, non hoi ka noho ana mai, eia ka hoi he haalele kona ia kaua i ka hale nei i mau pohaku kaomi moena."

            "Mai namunamu oe i ke kane a kaua, pia he hana nui kana o ka hooponopono aku i na mea e pono ai ka huakai a ke alii ke hiki mai, in a aku paha ke hoi mai la!"

            E aui liilii ae hoi kaua e kuu hoa heluhelu ia Nuhi e ohi mai la i ka pipipi.

            Ia Haumea i kau aku ai iluna o kona alahele, ua kilohi iho la oia ia Nuhi e poaipuni nei i ke alo pohaku, e ohi ana i ka ono a ka wahine a ke alii, a i wahi nae no Nuhi e hoi koke ole ai, ua hana iho la ua kalohe nei i ka hana epa ia Nuhi.

            Ike iho la oia i ka ipu pipipi e kau ana iluna o ka pohaku, a ua kaele hoi (nui) ka pipipi, no laila i wahi nona e hoi (nui) ka pipipi, nolaila i wahi nona e hoi koke ole ai, ua kahea ae la ua eu nei i keia mau olelo:

            "E Kualakai o Polopoliea e, i uka i ka pohuehue ha-kanu," o ka wa no ia i ohe ae ai kekahi puu kai a hoee aku la i kahi a Nuhi e ohi pipipi nei.

            Ia Nuhi i ike aku ai i keia o-hu kai e pii mai ana, ua holo aku la oia a mama iuka, me ka huli ana mai e nana i ke kai pii o Makalapa, hookahi no ia hoee ana, loaa mai la kahi ipu ianei, palahuli ana ka waha uhao pipipi ilalo, kahi ka neo i ko ipukai.

            Paialewaia mai la kahi ipu a ianei a kokoke i kahi a ianei e ku ana, emi honua iho la ke kai a maloo.

            Kii aku la o Nuhi i kahi ipu a hopu iho la me ka olelo ana iho: "He keu ka hoi keia kaihoee ku honua, mai ka lani mai ka honua no ka hoi a ka'u mea i hoiliilii ai, wikiwiki ka nininni, aole i ikea ka phi pu ana!

            "Hooluhi no hoi na hana au e ke kai ia'u, ke kali mai la paha kuu konohiki ai aina, o kuu hoi aku me ka ono a ka wahine hoao ana, ia oe hoi keia nininiia aku la; aloha ole no hoi oe, a e luhi hou ana ka hoi au i ka noii."

            A pau neia mau olelo kepakepa a Nuhi, lalau iho la oia i ka ipua, a hele hou aku la e ohi, eia nae, aole elike me mamua ka ee o ka pipipi, ke ike la keia i ke kau ole o ka pipipi, he kiei hale la ma o maanei, he ole ka ike aku, me anei ame , loaa ae la na wahi hua pipipi, pela no ka none ana a ahiahi no hoi, hiki i kahi a ke konohiki e noho palaka nei.

            Iaia nae i ike aku ai ia Nuhi e hoi mai ana, akahi no oia a hoomanao ae, he mea kana i hoouna ai ia Nuhi e hele e kii.

            Ahiki o Nuhi imua o ke alo o Ahiki, ninau mai la ke konohiki: "Pehea kau huaka'i o ka hele ana i ka ono a ke alii, a o ka po no ia o ka la@  Me he i'a holo la ka hoi o luhi oe i ke alualu, ei aku e loaa, i po ai ka la!"

            "He pololei no ia olelo au e ke alii, in a na kaua i hana ia mea, mau ka noho akoakoa, a loaa aku ia kaua, aole, na ha'i i hanai, i kii aku nei ko'u hana e ohi, a ua kaele no hoi kahi ipu nei, hookahi no ia hoale ana a ke kai, a loaa ka ipu iluna o ka pohaku i kulakula, palahuli ana ka waha ilalo, a pau loa ka mea i loaa mua.  Ia hele hou ana aku, aohe iho la he ee o ua pipipi nei; noii mai a loaa na wahi kauna po no hoi ka la, hoi mai la.

            "Ua loaa no nae hoi ka ono a ke aliiwhine,  Manao mua mai nei no au e huhu ana oe e ka alii ia'u, no keia po o ka la, aole nae ia mamuli o ko'u manao lohiau a hoopauha hoi hoi, oiai ua ike au he nui ka hana o kou alo e ke alii i keia mau la; aole hoi e hihi, o ka ono o ke alii, o ua i'a holo ole nei hoi, a i keia la, weliweli ka hoi ua ahiu, a ike no hoi au i na hana epa a ke kai, e ole au e holo a kula loa, pakele mai ilio i ke kai.

            "E ike ole au i ka wa i hoee mai ai o ke kai, in a ua noho kahi pauku kino i ka waha o Aimano ole, a o kahi kinowailua, he hopuhopu aama ka hana i na moku manu."

            Auwe no ka hoi kou pilikia e!  Eia ka keia kena a'u ia oe he pilikia, ua kala mai la no nae hoi, nolaila e hoi kaua, ke kakali ma la paha kauhale." 

            Hoi aku la laua nei ahiki, e noho hoolaʻi mai ana no o Puakinamu ma, me ka pua aniani hoopunipuni i ka poli o ke aiwaiwa, a o ka mea hoi i kaulana ai o Waolani i ka hana epa.

            "Pehea olua e a'u mau puloku?" i ninau aku ai ke konohiki i kana mau leihulu.

            "Maikai," wahi a Lupea. "Heaha auanei kau ui mai i ka noho hale, he pohaku kaomi moena paha ia, i ole e puha'u i ka makani," wahi a Kahuaolopua, i ke kane a laua, "o i kali aku nei ka hoi ka ono o ka pipipi, a-wa, no hoi a pupuhi kukui hiki i ka hale nei, he pololi ia o ke kiinohi la e noho aku nei, aia no a ike aku maona ae, a ai no hoi i ka i'a maka hauli o ke alo pohaku pau ka ono."

            "He oiaio ia a olua e na wahine e olelo mai la, o ka noho hoi ko'u kakali aku o ka hoi mai o ke kanaka me ko ono, o ka hele no ia a o ka po wale aku no hoi koe, hoea mai nei; a o ko maua hoi mai nei no ia, pakele mai nei nae oia nei mai lilo ka i ke kai."

            "U," wahi a Lupea hoepa, me ka hopu ana aku i ke aikane a puili mai la i ka poli, me ka honi ana iho i ka papalina o ke aikane, a olelo iho la, "i kau ono no e ke aikane la, a mai lilo ke kanaka o ke alii i ka i'a waha nui o ke kai."

(Aole i pau.)

 

KO MAKOU POKII ALOHA O PETER K. DAVIS UA HALA

 

            Mr. Lunahooponopono, Aloha oe:  --E oluolu oe no makoua kauwahi kaawale o ka kaua hiwahiwa, no ka makou puolo waimaka luuluu a paumoko no Peter Kliiahonui Davis, ko makou pokii hele loa.

            Ma hope iho o ke kaama'i ana no na makahiki elua a oi, a ma ke ahiahi Poalua ka la 27 Feberuari, ma ko makou home aloha ma Kainalu, Molokai, i pauaho mai ai ko makou pokii i keia ola ana, a lawe aku la ka Makua Mana Loa i Kana o ka uhane, a waiho iho la kona kino puanuanu na makua na ka ohana e kanikau aku.

            Ua hanauia o Peter Keliiahonui Davis ma Kiliula, Molokai, mai ka puhaka mai o ko makou mau makua, oia o George Davis and Makeaa Davis, ua hala mua no ko makou papa, oiai ko mkou pokii e uuku ana no.  Eia no ko makou mama me makou me kana poe keiki i koe.

            Ua haalele iho oia mahope nei he wahine kane-make, he kaikamahine makuakane ole, he mau kaikuaana elua, he kaikuahine hookahi, he mau pokii elua, a he makuahine me ka ohana he nui, e hoomanao aku ana nona.  Aloha no!

            He kanaka oluolu oia, he puuwai hamama, aole ana mea au'a in a ua loaa iaia e haawi no oia.  Ua piha iaia he 27 makahiki o ka hanu ana i na ea o keia ola honua ana.

            Molokai nui a Hina e, ua pau ke kilohi hou ana o Peter Davis i kou mau kualono.  E ka wai hu'i ana o Moaula e, ua pau kona auau hou ana i kou wai hu'ihu'i.

            E ke kula hoi o Moanui e, kahi o kuu pokii e hele ai i ka uhai pipi, ua nalo aku ia no ka wa mau loa, ua pau ka ike ana iaia e holo ana ma kona mau kualapa.

            Ua hooikaika ko makou makuahine i ka imi ana i ke ola, aole no nae i loaa mai ka maha, no ka mea, ua ikaikia loa ka ma'i, aka, hoomaikaiia no ke Akua, no ka mea o Kona kuleana ke hookoia, aole koi o ko ke kanaka.

            Nolaila ke hoomaikai pu aku nei makou ka ohana apau ia Jim Maunaloa no kana kokua ana mai ia makou no ko makou pokii.  Pela no hoi me na mea apau i haawi i ka lakou mau kokua ana i na mea apau o ko makou la o ke kaumaha, pela hoi me na makana pua, pela pu hoi me ka makuahine Mrs. Mary Kaai, no kona komo pu ana mai me makou no ke ku kiai ana i ka makou mea aloha ko makoua kaikaina hele loa.

            Ke hoomaikai pu aku nei no hoi makou i ko makou kupunakane Kiohinu, i kona lilo ana i mea hoomaikai i ko makou pokii aloha, e oluolu e lawe i ka makou ma hoomaikai ana, o na mea apau i akoako mai me makou i ka wa o ka luuluu, a na ke Akua no e hoomaikai mai i ka oukou mau kokua ana ia  makou.

            Pela pu hoi matou e hoomaikai ae nei i ko kakou Makua Lani i Kona haawi ana mai, a Nana no i lawe kou aku, elike me ka mea i palapalaia, mai ka lepo mai ke kanaka, pela no e hoi aku ai ka lepo i ka lepo.

            Ke hooki nei au i keia kanaenae, a na ke Akua e hoomama mai i ko makou mau manao kaumaha, no ka mea o Kona makemake ke hookoia.

            O makou iho no ka ohana me ka naau luuluu me ko makou mama aloha.

            MRS. MAKELA DAVIS,

            MR. & MRS. JOS. DAVIS,

            MR. & MRS. KALEI DAVIS,

            MR. & MRS. AH NEE SING,

            MRS. LILIAN DAVIS

            MAS. GEORGE DAVIS

            MAS. JAMES DAVIS

 

NA LEKA I KII OLE IA MAI AHIKI I MAR. 24, 1923

 

Auna, Edward                        Kipi, H.

Haia, Moses                Kueleku, Mrs.

Kaehu, H. E.                           Laulele

Kamakaia, Mrs.           Kekahuna, David

            Lahela             Kekahuna, I.

Kealakai, Mrs.             Makini, Mrs.

            Mary                            Maria

Kialoa, Henry              Pa, Mrs. Mary

Kipi, Daniel

            E ninau mai ma na leta i hoolahaia ke kii mai.

            D.H. MacADAM,

            Lunaleta.

 

            NEW YORK, Mar. 23 --O ka hoaie dala a na kanaka Amerika ia Kalemania o $50,000,000 ua hookauluia e na hui banako a Farson & Son no ke kali ana a pau ka ninaninau ana a ke komisona maluna o na hana hookaa aie kaua.