Ka Nupepa Kuokoa, Volume LXII, Number 13, 29 March 1923 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

O MR. WM. WAIOLAMA KAAHANUI UA MOE AKU LA I AKU O HOOILO.

 

     E ke kapena ahonui o ke Kilohana, Aloha malihini kaua: - O kou oluolu nui kaʻu e noi aku nei i rumi kaawale no kaʻu puolo kaumaha i haule aku la i ka aina moe kokolo ka uwahi o Kula, he hau e, alualu hele a ke kula noho mai.  Auwe kuu ike ole ia oe e!

     Me ka haupu mua ole, a e noho ana hoi me ka walewale, i ka ike @@o i ka leta e hai mai ana, ua maikai loa au, a puiwa i ka hiki ana mai o Mrs. Munro, a hoike mai la ia maua, ua make o Mr. Wm. Waiolama Kaahanui, ma ka haukapila o Kula, Maui, i ka la 4 o Maraki nei; pela mai nei ka lono kelekalapa mai Maui mai.

     O ka poha koʻikoʻi iloko o Makalii, o ke aloha o ke keiki iloko o ia minute, ua like, me he waipuna la ke aloha o ke keiki, ka huai ae a piha pu ka houpo, kupouli mai la ke aloha o ke keiki, na ka waimaka no e iho.

     Kuka iho la me ke kane, a hooholo ka manao, e kii i ke kino o ke keiki a hoihoi mai i Molokai nei, maluna o ka ailaea o ka haole, o Moanui, i kau aku ai ka makuakane ame kekahi mau ohana ahiki i Lahaina, kau ma ke kaa no Wailuku, moe ia po ma kahi o Mr. Pia Cockett, ia kamaaina pu wai oluolu, ia ao ana ae, ua pii i kahi o ka haukapila, oiai ke kino o ke keiki e kau ana.

     O ka manao no ka hoihoi mai i ke kino ua hiki ole, a homoe aku la kona luaui iaia i kela aina kaulana, oiai nae ka ohana e kali aku ana, me ka manao e hoi mai ana ke kino, eia ka aole!  Auwe no hoi kuu keiki e!  Kuu ike ole ia oe a!

     Eia au ke nana aku nei i ke kua o ka moku o Kama, i ke ku kohana mai a na Hono-o-a-piilani, ilaila ka kahi e moe ai o kuu lei, moe okoa no ke kanaka iluna o ka la:

     Haalele i ka nui lehulehu o ka aina,

     Pale ka ike i ke alakahi o Molokai.

     Aloha ia ala hili ole a ka malihini

     A maua e hele ai me kuu lei,

     Me kuu keiki hele loa e--.

     Auwe kuu keiki e--.

     E na kini o maua e noho mai la i ka la peʻa i Kumukahi, ahiki i ka la kau i ka mole o Lumahai, ua ua hele aku la o Waiolama e ike ia Puna paia aala i ka hala, i ponuhu amu ia e ka hinano, puia ka poli o Kooloolau i ke onaona, o  @a poli moe ipo o Hopoe i kai o Nanahuki e.

     E Hilo aina Ua kinakinai, he la ua no Hilo a po ka la, he ua kaee pua iʻa i ka moana, he Kanilehua ia Ua no Panaewa, he onini pua iʻa i ke kai o Paikaka, he hoahele ia ua, no kuu lei i ke one o Ohele, a moe i ka poli o Kulukulua e, kulu ka lihilihi, hiolo ka waimaka, he maimaka uwe no kuu keiki, auwe kuu keiki e!

     Aia paha kuu keiki i Honolulu, e kilohi ana i na halelaau kuʻi ae, i hele aku la e ike kinowailua i ka hanaumua ona, ia Nakoapukolu a Kaenaokane; ua eena kuu keiki ua maka kai, ua kinolau kino paee, ke kino o kuu keiki e!

     O ke aka kinolau maewa paha ia o kuu lei.  e ku kohana mai la i ka Lae o Kaena, e nana ana ia Muliwaiolena, ike ia Muliwai holo a ka iʻa.  e holo ana ka oopu he iʻa iki e!

     I ke ia Pohaku o Kauai i ka ehukai, ke kuhikuhi la na lima i Manokalani, aia ka paha ka uhane o kuu keiki i ke one o Luhi, ua kailiia e Kilioe wahine i ka pua i ka pali o Haena, e nana ana i ka pali kuʻi e, Kuʻi o Makana, he makana ka, ka Honopuwaiakua iaʻu o ko aloha, e aloha ana i ke alahaka o Nualolo, ke hapapa la ka malihini i ke kumu o ka pali, alanui ole iho la na pali a Ola, ola iho la kuu mau la, hapauea i ko aloha auwe no hoi kuu keiki heleloa e!

     O ke aka o ka la ka i Mana, e hoale ana i ka wai a ka liula, i hoopiha, e piha ke Kaha o Kaunalewa, piha a hu, hanini i Lolomauna.  pulupe ke kapaohai o Kalehu, Holi Limaloa ke konohiki o Ainaike i ke anu, ike au i ka eha lima ole a ke aloha, ke pu-o nei i ka lau o kuu manawa, ke lalawenei i ka pili o kuu houpo, me he lima ka naka la ka lou iloko, e oʻe ana i ke kiionohi o kuu ike, aole kuu mea aloha he keiki, kuu lihaliha e!

     Ua hanauia o Wm. Waiolama Kaahanui Jr., ma Waialua, Molokai i ka la 29 o Sepatemaba A. D. 1898, mai ko maua puhaka aku kona mau makua, i kona mau la kamalii, ua hele i ke kula olelo malihini o keia apana, a i ka nui ana, ua pau iho la ka imi ana i ka naauao, ua loaa no nae kahi okumukumu namu a na kupuna, o Hikapalale, Hiolowaiki.

     I keia mau la opio ona, ua lawelawe i na hana maamau me ka makua, ka mahiai ame ka lawaiʻa, a mahope ua noho aʻo me ke kaikoeke o kona papa iluna o ka moku ailaea i ka oihana wiliki, a ua loaa no ka makaukau, a o kana hana no ia, e alo ana i na ale kuehu o Pailolo, e haulani ana i ke kai o Naeheehe, e hehihehiku ana i ke kai o Kaiwi, ua pulu hoi i ka hunakaio o Mamala, hoopumehana aku i ka la o ke Kaona.

     Ua kaapuniia ka loa o Molokai Nui a Hina, ua helewawaeia ke ala kuahiwi o ke Koolau, ua nohoia ke Awawa o Wailau a kupa.  Kupa i ka pali haawekua o ua aina aloha nei, me he keiki la e kaualupe iho ana i ka lono hookuʻi o kuu keiki, me ke lupe lele la ka ohu poipu, o ke Koolau, ka uhi paapu poele Kawainui, ua nui na mea apau aʻu e noonoo ae ai, ua hoalaia mai e ke aloha o ke keiki, auwe kuu keiki e!

     I ka holomoku ailaea no oia, ahiki i ka loaa ana i ka maʻi, he puuoloolo ma ka a-i, ka hoomaka ana mai, mai ka uuku mai a pehu, kaha limunui, i ke kii ana i ke kauka ma kana olelo ike, he maʻi pilikia keia, e pono e lawe i ka haukapila, no laila hooholo ka manao e hoihoi i ka Halemaʻi o Kula, a ua hookoia pela.

     Iaia ma ka halemaʻi ua kakau mai la oia i leta ia maua, e hai mai ana i ka huaolelo hoolana manao, ua maikai loa au, a he wa wale no na ke kauka e hookuu@@ai iaʻu.

     Mamuli o ia mau olelo o ka leta, ua palaka pu ka noho ana ahiki i ka lohe ana i ka hua make, akahi no a puiwa hikilele ae ka leo paiauma o ke kaumaha i kuu houpo, no kuu keiki heleloa.

     E uwe aku ana au ia oe e Waiolama,

     Kuu keiki i ke one o Manaki,

     Aloha ia one nuʻa i ka aluwawae,

     E uhai ai i ka iʻa, hoanu ili o ka aina,

     He anae holo e!

     Holo ka lono uweaolelo kelekalapa,

     E hai mai ana i ka hua o ke kaumaha,

     Ua pili iho la na lihilihi o kuu aloha,

     Ua koekoe i ka hau anuanu o Kula,

     Kela aina hoeepa a kolaila kini,

     Nou ka ka pihe uwe i Kakanilua,

     Uwe kamalii uwe ka hanehane,

     I ke kula i ke pili o Kamaomao,

     Ke wa mai la ka pihe i ka lae o Kaihuwaa,

     Ua lilo paha kuu lei ia Makokolewahine,

     Ke hooipo mai la i ke kai o Makawela,

     Ke koia ae la i ke one o Kahului,

     Hului paia lilo ia Kauakahimaikulani,

     Hoaa iho la au i ke kaha,

     O Molokai Nui a Hina ko ewe e,

     He ewe oe no Halawa Nui Halawa iki

     He kupa poowai no Moaula,

     He kipea no ka lae o Kauhuhu,

     No kuikui kolikoli i Lanikaula e,

     Kolikoli ko aloha iloko oʻu e noho nei,

     Ka maawe kahi i ka pili o kuu houpo,

     I ka hele o kuu mea aloha he keiki e!

     Auhea ana oe, hoi mai kaua he au Koolau aku ia e. Ua piha kona 25 makahiki me na mahina keu, a hele aku la i kana huakai heleloa.

     O ke kanaka i hanauia e ka wahine hapa io no na la, a piha i na popilikia. E hoonani mau loa ia ke Akua.

     Ke pahola aku nei maua i ka maua hoomaikai nui i na lima kokua aloha o ka ohana ame ka lehulehu o ua aina nei, a ia M. Pia Cockett ke kamaaina nana i pulama i koʻu haku kane ma kona home, oiai oia ma keia huakai kaumaha; a pela hoi ia Elder O. H. Barlou, Elder A. J. Cordery, Elder W. W. McCune, i ko lakou kokua ana mai i ko lakou kaa otomobile, no ka lawe ana i ka pahu o ke keiki mai Wailuku ahiki i kahi o ke kino o ke keiki e waiho ana, me ko lakou ukali pu ana ia huakai loihi o ke alahele; me ka manao kokua aloha hoa kanaka.

     E lawe aku i keia mau huaolelo liilii, a na ka mea maluna e hoonui ae i ka maikai a piha a hu iloko o kona aloha puni ole.

     Ke hooki nei me ke aloha i na lima hoomanawanui o na keiki hoonohohua ame ka L. H. Hanohano.

     O maua no me ke aloha keiki,

           IOPA K. KAAHANUI,

           MRS. KEKILIA KAAHANUI

     Na Makua ame kona ohana kaumaha

 

E HOEA IʻO MAI ANA KA HOPENA O KE AO NEI

 

(Hoomauia mai.)

     Mr. Lunahooponopono, a imua o na tausani e heluhelu ana i ka Nupepa Kuokoa; mamuli o na anoai ame ka liʻa o kuu uhane, e hoomohala aku i na mea iloko oʻu no akahi makahiki ka holoholo pu ana, me na paona koko he 35 iloko o na pale o ke aakoko, a akahi no a hoohemo iwaho.

     ua hoolohi oia i kona hiki ana mai no 1923 keia; ua kokoke loa mai no e hoopihaia ai, ka elua o kona 1000 makahiki milenio, elike pu hou ana ka honua me ka manawa o kela honua mua o ke Kaiakahinalii; ua hiki mai no ia i ka hora i manao ole ia. Ke hoike mua e ia nei ka nalo ana aku o keia honua, o ka pilikia, elike pu ana no paha me na la ia Noa, aole no e manaoioia mai ana, a oiai, o ke kau hope keia o ka hokoia ana, o ua mea apau. Ua olelo ae o Iesu, penei:

     "He manawa pokole koʻu me oukou, ma Koʻu wahi e hele aku ai, aole loa kekahi e hiki ke hele ilaila." Ioane 13:33-37.  I aku la o Petero iaia: "E ka Haku, heaha ka mea e hiki ole ai iaʻu ke hahai aku ia oe i keia wa? E waiho aku au i kuu ola nou?"

      Ma keia wahi i ikeia ai ko Petero hoole ana, no ekolu manawa, a kani pakolu mai ai ka moa, a oiai, o Iesu e hookolokoloia ana imua o Pilako, ua pane mai kekahi, Oia nei kekahi o ia poe; ua pakolu kana hoole ana, ame kona hoinoino ana aku i ka Haku, ua ikeia nae oia e na hoike elua, a mahope o Petero i haupu ae ai i ka Iesu olelo ana aku iaia, i ka manawa a ka moa e kani pakolu ana. Uwe iho la oia.

     Aka, oia ka haumana ana i haawi aku ai i na ki o ke aupuni o ka lani.

     Nolaila, a mahope o keia mau mea, a i keia manawa, a mau aku, e noho mua ai ka hookolokoloia i ko keia ao nei, a i ka hopena loa o na la, ke kau nui o ka hookolokoloia ana, e hoalaia mai ai ka poe e moe ana i ka lepo a ka honua, no ka pono ame ka hilahila e holo ana kekahi poe malalo o na pohaku, e manao ana e haule mai maluna o lakou, e noho mai ana na haumana i mau lunakanawai kiekie, he mau aha hookolokolo hou malalo iho e hiki mai ana Oia me ka umi tausani o ka poe hoano e hookolokolo i ko ke ao nei, a heaha hou no kekahi e hookolokolo i ka poe i hoopiiia imua o na luna ekalesia. He aha hookolokolo hou no malalo loa, ina i hewa ke kane, ka wahine paha, alaila e mihi kekahi e kala aku ke kane, ina ua hewa ka wahine, a mihi aku oia, e pono ke kane e kala aku, a pela ka hoaloha i ka hoaloha.

     Ke i aku nei au ano ina i manao oe, ma ka aha kiekie wale no kou manao ana, he mea ia nou e pono ai, he lapa manu aku ia, o na hewa liilii i mihi ole ia, a ku a poina a palaka loa ia oe, o ia ka ilo make ole e popopo loa a mihi ole ia ka mihi ola i mihi make, aole poina iki ke Akua, e kahea mau mai nei a kakou e mihi hooki ole.

(Aole i pau.)

 

KUU WAHINE ALOHA UA HALA

 

           Mr. Lunahooponopono o ke Kuakoa; Aloha oe: E oluolu mai i kekahi rumi kaawale o ka kaua hiwahiwa, no kaʻu puolo waimaka, no kuu wahine aloha, hele i ke ala hoi ole mai, me ka luuluu!

     Mahope o kona kaamaʻi ana no na pule elua, ua kikoo mai la na lima menemene ole o ka make, a  lawe aku i ka hanu ola o kuu mea aloha, ma ka Halemaʻi Moiwahine, ma ke kakahiaka Poalima, Mar. 9, 1923.  Malalo o ka hooponopono ana a Dr. H. Hayes ame Dr. T. F. Alsup.

     Ua oluolu ka Makua Lani i ka lawe ana aku i kana waiwai makamae he uhane, mai ka hale kino aku o kaʻu wahine aloha, Mrs. Aukai Kualii, a waiho iho i ke kino wailua naʻu ame kona mau pokii aloha oia, hoi o Mrs. A. J. Akina, Mrs. G. McCrug, Mrs. E. E. Crawford, Jr., L. Babosa, kona mau kaikunane, Mr. A. L. M. Keaunui, Earnest K. Keaunui, Jackry Keaunui Jr., ame ka ohana no hoi apau e auamo aku i ka ukana nui me ka luuluu.

     Ua hanauia kuu mea aloha maluna o ka mokuahi Iwalani, ma ke kai o Kaieiewaho, i ka mahina o Feb. 1, 1884, mai ka puhaka mai o kona makuahine Kaluailahaina ame L. M. Kekuanui, a kapaia kona inoa piha Wahine Aukai o Kaieiewaho.

     Ua piha iaia na makahiki he 39 o ka hanu ana i na ea huihui o keia ola honua ana. Ua beritaia maua i ka mare i ka mahina o Feb. 1, 1913; ua like hoi ia me 10 makahiki, a nana no hoi i haalele mai la iaʻu, o ia hoi na ka make i hookaawale mai la i ko maua noho hauoli ana.

     Ia oe e na pali hauliuli o ke Koolauloa, Kaaawa, a hala loa aku i Hauula, kahi hoi i hanaiia ai o kuu mea aloha he wahine, ka hoa kukakuka o keia noho ana, ua hala i ke ala hoi ole mai. Minamina wale!

     Ua pau ko oukou ike hou ana iaia, ma ko oukou mau alanui, ua pau kana hana me oukou. E na ohana apau o kuu mea aloha i hala, e noho ana, ma ke Koolauloa, ua pau ko oukou ike ana iaia, ma ko oukou mau alanui, a i ole kauhale kahi a maua i kaahele ai i ka po ame ke ao, mea ole ka loa, o na kuahiwi i ke kono uilani a ka wahine, a o kona ike hope ana no hoi ia ia Hauula, i ka la La Karisimaka, o ka 1922.

     E Hustace e, kahi hoi o kuu wahine aloha i noho ai a kupa me na ohana, hoaloha aikane, ua pau ko oukou ike hou ana iaia ma ko kakou mau alanui i hele a kamaaina, a oi loa aku hoi o Mrs. Naone ame Mrs. R. Kalauawa, ua poho wale ka luhi o ka hooikaika ana, aka nae, na ka Makua Lani e hoomama mai ia kakou, me ke aloha nui.

     E na hoaloha ame na makamaka, ke haawi aku nei au i na mahalo he nui no ka oukou mau kokua boke pua, aole o ia wale, ke komo pu ana mai no ke ku kiai ana i kaʻu mea aloha i ka po a ao, ame ka hoohanohano a ka hui H.H.C., ma kahi o H. H. Willams ame na kokua kaa oto, no ka huakai hope loa o kaʻu mea aloha no kona homelua.

     Ua malamaia kona anaina haipule ma kahi o H. H. Williams e kona hanaumua Mr. A. Keaunui, na hoaloha ohana me ka maikai.

     Ke hoomaikai nui nei au i ko makou Uncle Joe Kiakahi, ka mea nana i malama na hana haipule ma kona halelua Kawaiahao, me ka hoomaikai ana aku i ke Akua mana loa ma ka lani. Na ke Akua no e kiai mai, a malama ia kakou apau loa.

     Me ka Lunahooponopono ame kou mau keiki oniuhua mekala o ka papapaʻi koʻu welina pau ole.

     Me ka haahaa,

WM. K. KUALII, JR.,

me ka ohana apau.

 

HE ALOHA PAUOLE NO KUU HOAHANAU MISS MARIA PIKO.

 

     Mr. Lunahooponopono o ka Nupepa Kuokoa; Welina kaua: E oluolu mai kou ahonui ame kou lokomaikai, nou hoi kekahi wahi keena kaawale o ka kaua hiwahiwa, ka mea nana e hiihele aku, ma na aekai ou e Hawaii aloha, no kahi puolo waimaka a ke aloha, e kau ae la maluna, i ike mai ai ka ohana na hoaloha, na makamaka mai Hawaii moku o Keawe, ahiki aku i ka la welo i Lehua.

     Ua haalele mai i keia ola honua ana ka makou mea aloha, kuu hoahanau kaikuaana kuu io, kuu iwi, ame kuu koko, o kona kupunakane ka mua i hanau mai ai, a o koʻu kupunawahine ka muli loa; no ka aina kaili la o ia o Kauai o Manookalanipo, ko maua mau kupuna, o ko laua aina hanau ia.

     Mare aku kona kupunakane i ka wahine, no ka aina e haaheo nei o Maui no ka oi.  Hanau mai kona makuakane e ola nei, o ia o Mr. John Piko Sr., a o koʻu kupunawahine, mare no oia i kana kane no Kauai; hanau mai koʻu mama aloha, e ola nei, a e noho mai la i ka aina e kaulana nei i ka lei pupu o ia o Niihau, Mrs. K. Huluaulani.

     Ma kona home aloha, Helu 1428 Kulika Ave., Kalihiwaena Honolulu, Oahu, i kipa ae ai ka anela menemene ole o ka make, a kaili aku la i ka hanu ola o kuu hoahanau kaikuaana i aloha nui ia, Miss Maria Piko, a niau palanehe aku la oia i ke ala o na mea hanu ola apau; no ka wa mau loa. Ua maha, ua kuu ka luhi, ua hoi aku oia i ka home puanuanu i ka opu ana ole o ka honua he lepo, i kona mau la opiopio; a waiho iho la i ka ukana luuluu he aloha, naʻu na kona hoahanau pokii, ka mea nana keia aloha pauole e hoopuka nei maloko o ke Kuokoa, ame ka nui ohana, makuakane hoahanau, makuahine hoahanau, mau kaikuaana hoahanau, mau pokii hoahanau, mau kaikunane hoahanau, ame na keiki a kona mau hoahanau, kona mau makua aloha Mr. ame Mrs. John Piko Sr., i hooneleia i ke kaikamahine, ame hokahi kaikunane i hooneleia i ke kaikuahine Mas. John Piko Jr., ame na hoaloha he lehulehu, ame na makamaka, e kumakena aku nona me ka minamina pauole.

     Auwe ka mea ehaeha o ka naau e ame ke kaumaha i ka hana mao ole a ke aloha, no ka makou mea aloha i lala i ke ala hoi ole mai, i ka Poakolu, Maraki la 7, 1923.

     Ua hanauia kuu kaikuaana hoahanau ma Waikiki, Honolulu, Oahu ma ka la 26 o Iune, 1907, mai ka puhaka mai o kona mau makua, Mr. ame Mrs. John Piko Sr., ua piha iaia na makahiki he 15 a oi o kona hanu ana i na ea huʻihuʻi o keia ola ana. Auwe ka mea manaonao e!

     He lehulehu no lakou i hanauia mai ai, ua hala aku no ka nui o na keiki, koe mai no elua, eia ka e hele aku ana kuu hoahanau kaikuaana ia alahele hookahi, auwe ke aloha pauole e!

     He ike ohana, he lokomaikai, he heahea, he puuwai hamama, aole ana mea paa.

     E Kalihi-waena i ka ua Poolipilipi e, nau i hiipoi iho la kuu hoahanau kaikuaana, a hala iho la.  Aloha ia mau wahi i pili ia.

     Eia o Waikiki ke uwe helu mai nei nou e kuu kaikuana, auwe ke kai o Kawehewehe e, ua pau kou hoopulu ana i ka ili o kuu mea aloha, ua pau kona maalo hou ana ma kou aeone, ua nalo, ua pau kana hana ma keia ao, ua hoi aku oia me kona Haku aloha.

     Aole no au kona pokii hoahanau i ike i kona hanu hope ame kona kino. Hiki mai ka lohe ua nalo, ua pau koʻu ike hou ana i kona helehelena, ua pau koʻu lohe hou ana i kona leo; auwe ka luuluu me ka ehaeha ame ke kaumaha.

     Me keia mau kanaenae aloha pau ole no kuu hoahanau kaikuaana hele loa; ke haawi aku nei au i koʻu mahalo nui ia oe e Mr. Solomon Hanohano, ame kou mau keiki limahei o kou papapaʻi

     Owau no me ka luuluu,

MRS. DORA CRAIG,

2004 Noth Queen St., Kalihi-kai.

 

HOOPAAHAOIA KE KEIALII KELEMANIA E NA PALANI

     WERDEN, March 23 - O ke Keikialli Frederich Wilhelm i hoopaiia ai ma ke dala ma kekahi manawa kokoke i hale aku nei 7,000,000 marks e na Palani no ka hewa hoeueu haunaele no ke kue mai i na koa o na aupuni hui i komo aku iloko o Kelemania, ua hoopai paahao ia e ka aha hookolokolo kivila ewalu mahina me ka hoopai dala hou o 500,000 marks.

 

     BERLIN, Mar.23 - Ma ka haiolelo a Chancellor Cuno o ka po nei i hoakaka ae ai oia o ke kamailio ana e pili ana i ka hoopau ana i ka paio ana me Palani he pono ke hoomauia aku maluna o ke kahua oia ka waiho hakahaka ana iho i na apana aina i komoia mai e na pualikoa o na aupuni hui me kekahi kumu aelike ola.

 

     LONDON, Mar. 23 - Ua oleloia ma kekahi lono kelekalapa o keia la mai Cologne mai, ua hoike aku ke Kenerala Payot ka mea nana e hooponopono ana na alanui kaaahi a na aupuni huiia maloko o Ruhr i na luna aupuni o na alanui kaaahi Kelemania no ko Palani ame Belegiuma manao e hoomoe i mau alanui kaaahi ma ke aoao hema o ka Ruhr no na makahiki he 25 e hiki mai ana, a ua hiki ole ke hoomanawanui hou aku i na akeakea mai Berelina mai.

 

     ESSEN, Mar. 23 - Ua hoikeia ae i na Palani i keia la no ka haawi ana aku o ke aupuni ma Berelina i kekahi hoaie dala nui i na alakai o na hana imi pomaikai Kelemania maloko o ka apana Ruhr no ke kokua ana i na hana kue mai i ke komoia ana aku. Ma ka oleloia ua komo pu maloko o ia hoaie dala ana ka 400,000,000,000 marks i hoaieia aku i ka hui lanahu Kelemania.

 

     PARIS, Mar. 23 - O ke Kuhina Kaua Maginot ka i hoike aku i keia la i ka hale o na lunamakaainana he 20,000 mau koa Palani hou e hoouna koke ia aku ana i ka apana o Rubr.

 

     LONDON, Mar. 23 - Ua hoikeia mai he lono ianei i keia la o Holani ame Switzerland, na aupuni i komo ole i ke kaua i oi aku ka poino no ke komo ana aku o na Palani iloko o ka apana o Ruhr ma ka mea e pili ana ike keakeaia o ka oihana kalepa, a ua hooholo laua e hoao e loaa kekahi mau pono i hoohaiki oleia ma ka Rhine.

 

     ROME, Mar. 23 - Maloko o ka haiolelo a Fred Kent, ka hope-peresidena o ka Bankers Trust Co., o Nu Ioka mamua o ka ahaolelo a ka ahahui Kalepa ma ka halawai maanei, i hoolhha mai ai oia i keia la e hoolala na kanaka lawelawe oihana Kalepa i kekahi hana no ka hooponopono ana i ka aie kaua, i hookahuaia maluna o ko Amerika hui a hana pu ana maluna o ka mea e pili ana i ke dala.

     Ma kona manao hoakaka e hoaieia aku kekahi huina dala ia Kalemania no ka hoopau ana ae i kona mau pilikia maloko o ke aupuni.

 

     ESSEN, Mar. 24 - Ke hooweliweli mai la na ahakanaka nele i ka hana, a e aahu ana hoi me na papule omaomao, maloko o ka apana Rothausen ma ka po. Ke hoouna mai la na luna Palani he mau pualikoa no ka hoopau ana i na hana hooweliweli a kela poe malaila.

 

     COBLENZ, Mar. 24     - Ua kohoia e na luna aupuni Kelemania onei i keia la aia ma kahi o 8000 ka nui o na Kelemania i kipakuia mai na apana mai i paaia e na aupuni huiia ahiki i keia la.

 

     DUSSELDORE, Mar 24 - He umikumamakolu tona mikini ame na lako meahana i laweia mai Weisbaden mai mamuli o ke kauoha a na aliikoa a na aupuni huiia. E mahele like ia ana ia mau waiwai i laweia me ka lima ikaika mawaena o na Palani ame na Belegiana

 

INA ELIMA AU MAU DALA, HOOKAAWALE I HOOKAHI

     Ma ka hookaawale ana i hookahi mailoko ae o kela me keia elima dala, o kou hoomaka ana ia ma ke alahele o ka holomua. Ma ka hoomau ana aku ia mea me ke akahele loa, ua maopopo loa kou holomua.

INA AOLE AU MOOHELU HOAHU I KEIA WA       E HOOMAKA KOKE

     The Bank of Bishop & Co., Ltd.

Ka Banako Kahiko Loa ma Hawaii nei.

Kukuluia i ka 1858.

HUINA WAIWAIPAA HE 16,000,000.00 A OI.

 

 

E KUAI I KOU MAU

Pono Hale

ma ka

Hawaii Furniture Co.

Helu 469 Alanui Moi

kokoke i ke kihi o ke Alanui Liliha

He oluolu na kukai olelo ana

 

 

Na Omoomo Palaoa Emi

2 i ka 15c

Na Meaono

O NA ANO LIKE OLE

ame ke

Kope Ono

GRAND CAFE & BAKERY

Alanui Moi me Maunakea

 

 

Hoao i ke Kope Kona Kona Kamehameha

Ke kope maloko olaila kona mau ano maikai kumu apau, i hoomoʻaia me ke akahele loa, i wahi e moani ai ke ala, a hookomoia aku iloko o na puolo ame na kini, e komo ole ai ke ea iloko olaila - o ke KOPE KONA KAMEHAMEHA ia. E nana i ka hoailona melemele. He ono a mikomiko ka hoailona Kamehameha i kupono i na Hawaii. Hiki ke loaa ia oe ma na puolo o 1-paona a i ole ma na kini o 5-paona

AMERICAN FACTORS, LIMITED.

 

ʻO KLEIN KA MEA NANA I HANAʻ

Pinepineka lohe ana o na kanaka i keia olelo. O ka manao maoli ua mahalo loa Ikou. Ua loaa ia lakouna meahana maikai loa no ka lakou mau hana i manao ai. Eia ia makou ia mau ano apau loa.

UPA OKI UWEA, NA KALA WEHE KO-LU, HAO UMII, LAKO PINANA, NA KUAPO ILI, HAO WEHE UWEA

Aole e loaa ka palekana i ka mea hana uwila, a kanaka hoomoe uwea me na meahana e ae

LEWERS & COOKE, LTD.

169-177 Alanui Moi Hema.    Pahu Leka 2930, Honolulu.

Papa ame Lako Kukulu Hale

 

He Manaoio Anei Oe i Ka Hoomakaulii?

     I na he manaoio oe i ka Hoomakaulii, alaila, e hele mai no ko makou hale kuai bipi nei e kuai ai i kau mau iʻo bipi.  He emi loa na iʻo bipi palai, ku, a pela wale aku, ma ko makou hale nei, i loaa ole i na hale e ae apau

     Aole wale no o na iʻo bipi, aka, o na iʻo Kamano momona paakai, a i ole hoomoʻa uwahiia.

     Na iʻo Hipa ku, he oi aku ke emi maanei e koe nui ai kau kenikeni iloko o kou pakeke.

 

O Ke Koe Nui Ana o Kau Kenikeni Iloko o Kou Pakeke e Hiki ai ia oe ke Hoihoi ia Koena i ka Banako o ia ke Keehina Hoomakaulii

Metropolitan Meat Market

Ma ka aoao Waikiki o ke kihi mauka o na

Alanui Moi and Bekela

 

Money Jingles?

UA IKE ANEI OE?

     O ka mea nune mau ia i keia wa o ia no na BUKE A NA KAMAIKI i hoopukaia iho nei.

     Ua paʻiia me ka noeau - palapalaia me na manao naauao - a ua paʻi pu ia hoi me na kii o na waihooluu like ole.

     E hoike ana he mau manao hoohauoli - e hoike ana i ke ano o ka Hoomakaulii ame na mea e lilo ai i Makaainana maikai.

     He mau ano nui o ke ano hou loa. e nele ole ai ka hauoli o na kamaiki mai ka 3 a ke 80 makahiki.

     Ua loaa mai nei ko makou haawina o ka helu mua, a ke makemake nei makou e loaa i na kamaiki apau e loaa ia lakou keia buke. EIA KE KALI NEI KAU BUKE IA OE - Hele mai e kii i keia wa. E haawi wale ia no ma ke ano makana.

     He hauoli loa makou i ka lawe ana mai i kau mai hoahu liilii.

     He 4 pakeneka ka makou e uku nei no ka makahiki.

Kihi o na Alanui Moi ame Nuuanu.

Chinese-American Bank

Kihi o na Alanui Moi ame Nuuanu.   Honolulu, T. H.

Pahu Leka 2000 Kelepona 6119