Ka Nupepa Kuokoa, Volume LXII, Number 11, 15 Malaki 1923 — HOALOHALOHA NO JAMES KUHAU KAIWI. [ARTICLE]

HOALOHALOHA NO JAMES KUHAU KAIWI.

O makou, o ka ekalesua, Kula Sabati ame Ahahui C. E., o ka Ekalesia o Hanapepe, ma o ko makou komite la, ke komo pu aku nei iloko o kou luuluu, kaumaha, a kumakena pu me oe e Mrs. James K. Kaiwi, ame ka olua kaikamahine aloha, Mrs. E. Maemae Keahi, a pela hoi me na keiki, ame na moopuna apau, a ka mea aloha i hala. Oiai ua kau mai la keia ao omamalu maluna iho o ko oukou home ohana, mamuli o ka hala ana aku o ka makua James K. Kaiwi, a ua waiho iho la ia oukou iloko o keia kaumaha nui, a pela pu hoi i na makamaka, na hoaloha, ame na kini haipule apau i kupa a kamaaina i ka makua aloha i hala aku la, ma kona ano he kakauolelo no ka ahaolelo o ke Akua ma kela mokupuni, a i na aha paeaina, aole no oia he mea uuku, aka, ua haule he kanaka nui iloko o ka ke Akua hana, ana i malama ai me ka maemae, ma na wahi apau o na aha o keia mokupuni e noho ai. Ua kiai, ua hoomanawanui i na hana, aneane no hoi e hoea mai ke kau o Aperila 1923; aka, ua pau e iho la! Aloha no ke kanaka o ka hale o ke Akua. E Lihue i ka ua Paupili, pili iho la na maka o James K. Kaiwi, ma kou poli no ia, na ka make i hookaawale aku la, E ke kula mahiki pi'o i ke one o Niumalu, ke kiei iho la Kalanipuu ia Papa J. K. Kaiwi, aohe ike iho. Aloha wale Haupu, mauna kilohana i ka lai, i noho a kupa a kamaaina i ke alo, waiho no hoi

na iwi o kamahele, hele no me ka manaolana. Pomaikai wale ka poe i kiai, A hoea mai Iesu, Ina i ke ao, ina i ke aumoe, E kiai ana no kakou. E hoomalu mai ka mana o Iehova Sabaota maluna o ka makuahine aloha, me na keiki na moopuna a ka mea i hala, a na Kona aloha ame Kona lokomaikai, e hoomama mai i na kaumaha ame na luuluu. E hele ae ka mea luuluu, E hele i o Iesu, A nona mai ka maha ou, Ame ke aloha pu. Makou iho no, Komite Ekalesia— D. K. KAPAHEE, Komite Kula Sabati— SAM MAILEKAI, Komite Ahahui C. E.— MARY KAPAHEE, Lunahoomalu o ke Komite— NORA K. CHANG,