Ka Nupepa Kuokoa, Volume LXII, Number 11, 15 March 1923 — Page 8

Ka Nupepa Kuokoa

KE KILOHANA POOKELA NO KA LAHUI HAWAII.

 

AOAO NO NA MANAO PEPA SOLOMON HANOHANO, LUNAHOOPONOPONO

 

KO L.A. KAKINA MANAO HOAKAKA NO KA LAHUI HAWAII

 

            Ma ka nupepa Advertiser o ke Sabati iho nei i hoopuka ae ai o Mr. L. A. Kakina i kona manao hoakaka e pili ana i ke kulana o ka lahuio kanaka Hawaii e nee nei i keia la, ame ka hana e ulu mahuahua hou ai keia lahui kanaka; a no ka pomaikai o ko ke Kuokoa poe heluhelu, ke hoopukaia aku nei kekahi mau mea ano nui iloko o keia manao hoakaka, malia o hookaakaaia ko kakou mau maka, a ike aku i ke alahele e pono ai ko kakou nee ana aku imua, ma ke ano he lahui.

            Eia ka lahui Hawaii ke make nei! Ua hoike mai na moolele helu kanaka ia mea. Ua haiolelo mai na kahunapule pela. Ua kukula mai na kanaka kalaiaina ia mea.

            Ua lilo ka make iwaena o keia lahui kanaka, i ninau ano nui, a ua lehulehu wale ne mea i hoaoia, i waji e kaohiia mai ai, mai ka holomuku ana i ka make. Ua lilo no keia mau hoao ana i mea hoopakele mai, ma ke ano pili-kahi, aka nae ma ke ano lahui, he o ia mau no ka nee ana imua.

            Aohe hoakaka kupono no ka hookahua ana i keia mea oiaio. Ke hooiaio mai nei na moolelo helu kanaka pili oihana ia mea. Eia lakou:

KA MOOLELO HELU KANAKA O NA KAWAII KOKO PIHA MAI KA 1823 MAI AHIKI I KA 1920.

           

Makahiki                                 Heluna                                                 Averika Emi ma ka Helu-Emi  Mahope no na ka Mamai o ka                                                                                                     Helukahiki Maho-Kanaka Hope pe mai o ka Helu Kanaka                                                                                                                      Hope.

 

1823........................................142,000                                               ......................              ........................

1832........................................130,313                                               11,687                         1,298

1836........................................108,579                                               21,734                         5,433

1853........................................71,019                                                 37,560                         2,209

1860........................................66,984                                                 4,025                           575

1866........................................57,125                                                 9,859                           1,643

1872........................................49,044                                                 8,081                           1,346

1878........................................44,088                                                 4,956                           826

1884........................................40,014                                                 4,074                           679

1890........................................34,436                                                 5,578                           929

1900........................................29,787                                                 4,709                           470

1910........................................26,041                                                 3,746                           374

1920........................................23,723                                                 2,318                           231

 

            Mahalo iho la o keia mau ano, he nui wale ka poe i olelo ae e pili ana i keia ninau "lahui make" : "He hana hoopau manawa a hoolili dala ka hoao ana e hoopakele i na Hawaii, no ka mea aole o lakou lawelawe i kekahi mea e hoopkele ana ia lakou iho."

            O ka mea hookahaha manao ma keia kulana, o ia o ka lawe ana mai o ka hapanui o na Hawaii a apono aku i keia manao, a iloko o ka manaolana poho, i mau aku ai no ko lakou nee ana no ko lakou hopena!

            Ke ae aku nei au, ke emi nei na Hawaii, no ka mea he makehewa ka hoole ana, a kapae ae i na mea oiaio, he mea paa na moolelo helu kanaka.

            Aka nae, ke olelo ae nei au, me ia ao hakumakuma no o ka moolelo helu kanaka, aia he manaolana imua. Ma ke kuekaa ana i na moolelo helu kanaka, ma ka huli ana i na kumu o ke emi, a oi loa aku, ma ka noonoo ana i ka uilani hou o ka manaolana, a me ka nana aku iamua, i loaa i kekahi mau alakai Hawaii, ame na loina a lakou i lawe ai no ka hooko ana aku, aia he kumu maikai e manaoio aku ai, e kaohiia mai ana ka holomuku ana i ka make, a ma kahi o ka "lahui make" ua hiki ke hooliloia ae na Hawaii lahui ola a mahuahua--INA!

            Ina e aha? Ina e hiki ana i na Hawaii no lakou iho, ke kaohi mai i keia mea ka "lahui make," e ku-e aku ia ka pomaikai.

            O ka hana kupono mua loa e lawelaweia i wahi e hookoia ai keia mea, o ia no ka hooluliluli ana i na Hawaii mai ko lakou noho nanea wale ana o ke apono ana aku i keia manao, ka "lahui make"!

            Pehea nae e hiki ai keia mea e hanaia? O ka ninau ia au i makemake ai e hoakaka maloko o keia manao. Aole au e haiolelo aku ana, a i ole olelo aku paha i na Hawaii, e pono lakou e hana i keia, a i kela mea! E alakai wale aku ana no au i ko lakou noonoo i kekahi mau mea oiaio, me ka hoakaka ana i kehahi mau manao, na lakou e noonoo ai; alaila na lakou e hooholo no lakou iho i ka lakou mea e hana aku ai.

            I ka mea oiaio mua loa au e hoikeike aku nei, o ia hoi ke hoikeike mai ne na papa hoike, aole i emi iho ke ana hanau o na Hawaii, malalo o na lahui eae: aka nae ua oi kela aku ke ana make, a iwaena o na kamalii, he ana mai ahulau maoli, i ka wa o kekahi mai luku e pahola ana.

            Heaha nae ke ano o keia mea? Eia no: i ka wa e ikeia ai ke ana make kiekie iwaena o kekahi papa, a lahui kanaka paha, i oi aku ke kiekie mamua o na papa a mau lahui kanaka e ae paha, e hoike mai ana ia, ua nawaliwali, a mai maoli lakou mai ke kumu mai, a ina aole pela, alaila ua kupono ole na kulana o ko lakou noho ana: a i ka wa e ikeia ai ke ana make kiekie iwaena o kau mau keiki, e hoike mai ana ia, aole he kupono o ko lakou hanaiia ana ame ka malamaia ana!

            Aole i pili ka "nawaliwali ame ke oma'ima'i kumu" i na Hawaii, no ka mea, ua loaa ka ike maopopo ana, he poe kanaka kino nunui na Hawaii o kela mau la kahiko, he ikaika, he komo ma na hana hooikaika kino a he ola loihi!

            I keia la, me ka nana ole ae i na mea apau, ina e waeia ana na kanaka opio, o na kama a elua, a hookuku aku me na puulu like o ia ano hookalii o na lahui e ae, e oi ana no na Hawaii ma ke kulana kino ikaika, a ma na hana hooikaika kino no o na ano apau: oia ma ka au--kekahi o na hana hooikaika kino paakiki loa--o lakou ke alakai mamua o na lahui e ae!

            Pehea hoi ke "kupono ole o ke ola ana" ame ka "Maikai ole o ka hanai ana ame ka malama ana i na keiki?" Ua pili pono anei na mea oiaio me keia hoomaopopo ana? O ka pane, pela i'o no!

            He poe lawai'a na kanaka Hawaii a he poe mahiai, e noho ana ma na wahi akea ma na kuaaina, maloko o na hale haahaa no lakou iho i lawa me na puka ea.

            Heaha nae ke kulana i keia wa? Ua haalele aku na kanaka Hawaii i ka lawai'a, me ka hele ana i ke kai! Ua aneane loa e haaleleia na oihana mahiai ame ka noho ana ma na kuaaina, a ua momuku mai iloko o Honolulu nei, ame na toana ano nui, kahi i akoakoa ai ka hapanui o lakou maloko o na hale hoolimalima huikau, loaa ole o ke ea maikai, a maloko o na papa'ihale.

            He palanaiki wale no ka lakou ai mamua me ke kupono, o ia ke kalo, uala, na huaai ame ka i'o holoholona me ka i'a ma ke ano hoonoono.

            I keia la o ka ai ano a na kanaka Hawaii maloko nei o ke kulamnakauhale ame na kaona, ke hoolakoia nei e na haleaina emi me ka lepo, o ia ka palaoa haahaa ame na meaono, ke kope holowai ame ka poi, he ai kupono ole maoli--ua like no ka ai ana o ka poe nunui me ka kamalii. O ka maamau a na keiki a na kanaka Hawaii opio o ke kaona, me ke komo pu o na bebe liilii, o ia ke kope inoino ame ka meaono, he meaai i kupono ole e loaa ke ola maikai i ka ilio keiki!

            He nui kekahi mau kumu liilii e ae no ke emi ana o ka lahui, i hiki ke helu papa ia aku--ka inu waiona, ka ma'i i laha ae mai na lahui e mai, ka noho pelepela , mamuli o ka huikau o na hale hoolimalima ame kekahi mau kumu e ae; a ke hoo@ui ae ia lakou apau, ua hiki ke hoopoinaia, ina e hiki ana na kumu nui elua maluna ae nei ke ulaaia ae!

            Heaha nae ka mea hoopakele? He lehulehu wale na alahele hoopakele liilii. He elua nae a'u mau mea ano nui e hoa'ia'i aku nei: Ka mua, e a'o i na wahine Hawaii i ka hoomo'a a me ka hoomauhaukau ana i ka ai emi, a kupono no ko lakou mau hana. Ka lua, e hookaawale i na Hawaii mai ke kulanakauhale a kaona ae , a e "hoi iluna o ka aina," kahi e pakele ai lakou mai na wiliau mai o ka noho ana o ke kaona, e kanu maoli aku hoohua mai i ka lakou ai maikai, ma ke ano o ka hapanui ia o ka lakou ai, a hoopulapula aku i ka lakou mau keiki me na mea apau e loaa ai ke ola kino maikai!

            Pehea e loaa mai ai keia mau mea nui i manaoai? Ma keia manao hoakaka hou aku e hoakaka aku ai au no keia ninau.

_________________________________________________________

 

E HOEA MAI ANA ANEI I KA HOONOAIA O KE SABATI?

 

Eia iloko o ka hale o na lunamakaainana, ma keia kau o ko kakou ahaolelo kuloko, he bila kanawai i hookomoia aku e ka Mea Hanohano Fernandez o ka apana elima, e a ana i ka wehe hamama ia o na hale kiionioni, ma na auwina la Sabati, pela na hana hoikeike hoohauoli ame na hana keaka, a o ia ka ke Kuokoa nei e hoomaoe wale ae la no, e hoea mai ana anei i ka wa e hoonoaia ai ke Sabati, a e wehe hamama ia aku ai, no na hana apau e lawelaweia nei ma na la e ae iloko o ka pule?

            Aia he elua mau aoao ma na ninau apau. Ua hoea aku kekahi mau makaainana o Honolulu nei, imua o ke komite hookolokolo, o ka hale o na lunamakaainana ma ka po o ka Poakahi nei, a waiho aku i ko lakou mau manao hoakaka e ku-e ana, a e apono ana i ka aeia aku o na hana i hoakakaia maloko o ka bila kanawai, a o ka hooholoia o ka bila ame kaole, aia maluna o ka hoike a kela komite hookolokolo, a me ke koho ana a na hoa o ka hale.

            I ka hoihoi ana aku i ko kakou noonoo ihope i ke au o ke aupuni moi o Hawaii nei, i ka manawa a na makua misionari i lawe mai ai i ka euanelio, i keia lahui kanaka no lakou keia mau mokupuni, ua hooliloia ka la Sabati i la hoano, i la hoomaha, a i la hoomaikai a hoonani i ke Akua, aole wale no ma ka hele ana o na kanaka maloko o na luakini e hoomana ai i ke Akua, aka ua kapae loa ia aku na hana apau, i ku-e, i ka ihiihi, ke kapukapu ame ka maluhia o ke Sabati.

            He kui'o maoli ka hoomana ana a na kanaka ia au i ke Akua, ua apoia aku na a'o ana a na kumu misionari, i ka euanelio, me na manao hiipoi; a o na mea oiaio i ikeia, o ia no ka nohoalii ana mai o ka maluhia maluna o ka aina.

            Ua lilo kela kui'o o ka hoomana Akua ana o na Hawaii: kela kulana Kristiano iloko o na kanaka o ia au i hala, i kahua onipaa, e malamaia ai ka maluhia o ke Sabati me ka ihiihi.

            Elike nae me ka nee ana o ke au o ka manawa, ua komo mai na lahui e i Hawaii nei, ua ulu ae na hana imiloaa iloko nei o ka aina, na hana hooholomua like ole; ua lilo ia mau oihana lehulehu, i mau mea koi mai, e aeia aku ka hoopakeleia ae ai mai na poino mai.

            He mau oihana ia, no ka holomua o ke aupuni, a no ka pomaikai o na makaainana, nolaila, me ia mau pomaikai e kau mai ana imua o na maka, ua kapaeia ae la kela manao hiipoi i ka la Sabati i kinohi; kapae pu ia ae la kela manao hoomana Akua oiaio, a maka'u Akua hoi, a hanaia iho la he kanawai, e wehe ana i kekahi mau hana ma ka la Sabati.

            I keia la, eia ka Paka Aloha, me kona mau hana hoohauoli he nui ke ku mai nei, a oiai ua kapu ka wehe ana i kela paka, ma ka la Sabati, pela hoi ka hoikeike ana i na kiionioni, ma na hora o ke ao o ke Sabati, ke koi mai nei keia bila, e hoonoaia ae na hana i ae mua ole ia ma kela mau wahi, ma na hora o ka auwina la.

            O ka ninau ko'iko'i paha, e noonooia, no ke kupono a kupono ole e aeia aku ka wehe hamama ana o na hale kiionioni, na paka hoohauoli, na hana keaka, ame kekahi mau hana e ae, apoia e ka manao o keia bila kanawai, ma ka la Sabati, o ia no ka lilo ana o ia mau hana i mea hoopomaikai aku i ka lehulehu ma kekahi ano.

            Ke koi mai nei ka poe ma ka aoao e kakoo ana i keia bila, no ka pomaikai o na limahana me ko lakou mau ohana, ke kumu nui, i makemakeia ai e wehe i na hale kiionioni ma na auwina la Sabati, pela me na paka o na hana hoohauoli, na hana hoikeike a mau hana keaka paha; no ka mea, wahi a lakou, o ke Sabati wale no ka manawa e hiki ai i nalimahana ke hoohala i kekahi manawa, ma ka hoohauoli ana ia lakou iho, me na mea i hooneleiaai lakou i ka ike, ma na la e ae.

            I wahi paha e ikeia ai ka oiaio ame ka oiaio ole o kela kumu koi, ma ka aoao o ka poe e kakoo ana i kela bila, ua hiki no ia kakou ke hoomaopopo, ma na la kulaia aupuni, na la i waiho aku ai na limahana i ka lakou mau hana; he mahele uuku wale no o lakou ka i hoohala i ko lakou manawa ma kela mau la, ma na wahi e malamaia ana o na hana hoohauoli; o ka mahele nui o ka poe na lakou e hoopiha ana ia mau wahi, o ia no ka poe, aole lakou he mau limahana, aka he poe iloko o na papa like ole o na makaainana, ka poe no i hiki ke hele e nana ia mau hana, ma na manawa e ae o na la o ka pule.

            Ina e weheia ana na hale kiionioni, ma na auwina la Sabati, pela hoi ka Paka Aloha ma ia manawa hookahi, aole o na limahana, me ko lakou mau ohana ka poe no lakou e hoopiha ia mau wahi; aka o ka poe puni lealea no, ka poe makemake i na hana hoohauoli, iwaena o na makaainana, aole lakou he mau wahi, me ka nana ole, i ko lakou hele mau ana, ma na la e ae o ka pule.

            Ma ka manao o keia pepa, o kela kekahi o na kumu ano ole loa, e hiki ai e aeia ka hoikeike ana ae i na hana i papaia e ke kanawai, ma na auwina la Sabati.

            Aole no ka pomaikai o ka lehulehu, i kukuluia ae ai na hale kiionioni; pela ka Paka Aloha! Ua laweia mai kekahi mau hana hoikeike i Honolulu nei, malalo o na hooilo nui hewahewa, aole no ka pomaikai o ka lehulehu, aka no ka pomaikai o ka poe i komo iloko o ka hui o na hale kiionioni, ka poe iloko o ka hui Paka Aloha.

            Ina aia na hale kiionioni ame ka Paka Aloha ma ke kulana poho i keia wa, e ae ana anei ka poe iloko o kela mau hana imi dala, e hoomau aku ia hana poho? E ala mai anei he koi ana, e aeia aku ka hoikeike ana i na kii, ame na hana hoohauoli apau, ma ka auwina la Sabati? Aole!

            Ua lawa ole anei na la eono o ka pule ame na po ehiku, no ka huli dala ana, i akeia mai ai, e komo iloko o kekahi hapa o ke Sabaai? He mau hua kakou apau e ola nei, no na anoano o ka pono Kristiano, i kanuia e na misionari na lakou i lawe mai i ka malamalama o ka euanelio i Hawaii nei; ua moe aku lakou ame ko kakou mau kupuna, na kakou anei e hapala ae i ko lakou luhi, ma ka hoonoa ana i na hana hakihaki Sabati?

            E hoomanao i ka makia o ko kakou aupuni e o nei, mai ia hanauna aku, a ia hanauna aku! "Ua mau ke ea o ka aina i ka pono."

            Maluna o oukou e na hoa o ka ahaolelo, ke ko'iko'i o ka noonoo ame ka hooholo ana i keia bila kanawai. Ina ua manao oukou, he bila kupono ole keia, alaila e koho ku-e aku ia mea; a ina he bila maikai ia, alaila e hooholo aku: a o ka oi aku paha o ka pono, e hoonoa maoli ae no i na hana apau ma ia la, no ka mea o ke kino o ka elepani ka i komo iloko o ka hale, a o ka huelo wale no koe iwaho.

___________________________________________________

Nuhou Kuloko

 

Mamuli o ka hala ana aku o ka meakakau o ka moolelo o Makalei no Molokai, pela i hiki ole ai ke hoopuka aku i kela moolelo no keia pule.

 

Ma ka Poalua iho nei, i huli hoi mai ai ka Elele Baldwin me kona ohana, a he malihini hanohano oia o ke kipa ana ae i ka ahaolelo ma kela la.

 

I kulike ai me ka lono kelekalapa uwea ole i loaa mai i Honolulu nei, e ku mai ana ka mokuahi Haleakala, ma kekahi manawa o keia auwina la.

 

O ka huakai o Molokai, a na hoa o ka ahaolelo i manaoia ai, ma kekahi manawa o keia mahina, ua hoopaneeia aku la, a ka la 6 o ka mahina ae nei o Aperila.

 

Maloko o kekahi puolo o ka loaa ana aku, ma kahi kokole i ka hale auau o ka lehulehu ma Waikiki, ma ka Poakahi nei, kekahi bebe hanau hou loa ua make, me ka maopopo ole o ka makuahine nana kela bebe.

 

E malama hou ae ana ka Ahahui Hawaii Holomua he halawai ma ka hapalua o ka hora ehiku o keia ahiahi, Mar. 15, ma ka home o Mr. Wahilani, ma ke alanui Hustace, ua makemakeia na lala apau o kela ahahui e hoea ae ma ia halawai.

 

Maloko o ka luakini o Kawaiahao, ma ka hora ekolu o ka auwina la o keia Sabati iho, e malamaia ae ai ke anaina haipule, maluna o ke kino wailua o Mrs. Deborah Kamanoulu, kekahi o na wahine kamaaina o keia kulanakauhale, i pauaho mai i keia ola ana.

 

Ma ka hora ekahi o ka auwina la o keia Poaono, e weheia ai ke kino wailua o Mrs. Deborah Kamanoulu, no ka ike ana iho o na hoaloha, na makamaka ame ka ohana ma ka hale waiho kupapau o Silva, ma ke alanui Nuuanu me Kukui.

 

He malihini na hoa o ka ahaolelo, na ka Meia ame ka papa o na lunakiai o ke Kulanakauhale a Kalana o Honolulu nei, ma ke Sabati aku nei i hala, ma ka holo makaikai ana, i ke alanui holopiuni.

 

Ma ka Poalua iho nei, i loaa mai ai ka hoike i na aliikoa ma Honolulu nei no ka hiki i na koa ame na alii koa, ke komo i na lole o makaainana, i ko lakou manawa, e kaa ole ana, malalo o na hana o ka oihana koa.

 

Ma ka Mauna Kea o ka Poalua iho nei, i huli hoi mai ai ke Senatoa Desha mai Hilo mai, kahi ana o ka holo ana aku ma ka Poaono i hala, no ka malama ana i ke anaina haipule hoolewa o Mr. Brown, kekahi o na kamaaina kahiko o Hilo, i pauaho mai i keia ola ana.

 

He 9,752 ka nui o na laikini i hoopukaia e ka Puuku Conklin, o Kulanakauhale a Kalana o Honolulu nei no kaa otomobile, iloko o keia mau mahina mua o ka makahiki.

 

He wawahi hale ke kumuhoopii a ke Kapena Makai Poaha o ka hookomo ana ae i ka aha homalu ma ka auwina la Poalua nei e ku-e ana ia Willie Cockett ame Charles Molani no ke komo ana i ka halekuai o Leong Kee ma ka po o Feberuari 26 ma Ka@.

 

Hookuuia o Usabura Kashiwamura, he Kepani i hpuia e na kanaka hooko kanawai waiona, e ka aha federala ma ka Poalua nei, no ka hope ole ia ana o keia Kepani me kekahi palapala hopu i hoopukaia ae e ka aha.

 

Ma ka manawa e hoonohonoho ana na loio i na oleloike imua o ka papa kiure ma ka Poalua nei ma ka hihia o na keiki o Kakaako na lakou i hoopoino i ke kaikamahine opio, ua uwe kela kaikamahine i hoopoinoia ai maloko o ka aha.

 

He moopunakane na Mr. ame Mrs. D. H. Kahanu o ke alanui Ilaniwai, ka i nalowale ma ka auwina la Sabati mai, a ua huliia a ua ninaninau ia hoi maloko o ka apana o Kakaako, aohe nae he mea i hoikeia ae nona, a nona hoi na makahiki he 8.

 

Iloko o na manao oolo-ku i ala ae iloko o keia mau la, no ka hookohu ana ae o Kiaaina Farrington, ia Edgar Wood, i mea kokua aku iaia, ma ke kuekaa ana i na hana a ka papa hoonaauao, ua manaoia, aole e ae hou ana ke Kuhukula Nui MacCaughney, e lawe i kela kulana, ke hookohu hou ia aku oia.

 

------------------------------------------------------

Nuhou Kuwaho

 

LIHUE, Kauai, Mar. 10. -- Ua ahewaia o James D. Ward no ka hewa lawe i ka waiwai i haawiia iaia e malama ma ka mea e pili ana i kona kuai ana i ke kaa otomobile i ona ia e kekahi Kepani nona ka inoa o Kiota, maloko o ka aha kaapuni ma ka la i nehinei, e ke kiure, elua makahiki paaheo.

 

BERLIN, Mar. 12. --He palapala hoopii i kakauinoaia e 460,000 poe koho baloka mailoko mai o 20 mau kulanakauhale ame na kaona ka i hookomoia ae i ka ahaolelo i keia la, e noi ana no ka hoopau loa ana i ka ninau hookapu waiona maloko o Kelemania ma ke koho ana a ka lahui.

 

ATHENS, Mar. 11.--He hoolewa i malamaia e ka lehulehu mai o a o ka i malamaia i keia la ma Salamins no 10 mau aliikoa o na mokukaua ame 104 mau luina, ka poe i piholo ai a make ma ka la aku la i nehinei, ma ka manawa i ili ai ka mokuahi a nahaha nana i hoihoi mai i na koa ma Salamis i Atenai nei no na la hope o ka pule.

 

DUSSELDORF, Mar. 12--Mamuli o ka poino ana o na meapaahana kelepona, he hana i hooiaioia mai ua hoopoino maoliia, ua nele ka loaa mai o ka moolelo piha no keia haunaele ma R@@klinghausen ma ka po nei. Ua hoomahuahua ia ae ka heluna o na koa kiai maloko o ka apana o Ruhr.

 

NASHVILLIE, Mar. 12.--O ka huina o ka poe i make i ka ino ma Pinson, Tenesi he 16, elike me ia i hoikeia mai, he 75 i hoehaia. O ka hapanui o ka poe i eha aia maloko o na halema'i.

____________________________________

KA HIMENI HOOKUKU

 

Ma ka noho ana o ka Papa Hooko o ka Ahahui Kula Sabati oo Hawaii, ma ka la 9 o Mariki, 1923, no ka noonoo ana i na mea e pili ana i ka Himeni Hookuku o na Kula Sabati o Hawaii ma keia Kau o Iune 1923, e noho ana ma Kawaihao, ua hooholoia penei:

            1. Na kela ame keia Kula Sabati e wae i himeni nana.

            2. Hookahi himeni mawaho ae o ka himeni hookuku.

            3. Na points.

            a--Ka hoomaka ana o ka mele.

            e--E malamaia ka manawa.

            i. E moakaka ka olelo o ke mele ana.

            o. Ka uhane o ka mele ana.

            u. Ka hoopau ana ma kela me keia mahele ame ka hopena

            4. Ka Makana:

            He Hae, o ia ka hae o na Ekalehia Kristiano apuni ke ao nei.

            E loaa no ka makana i ka mea kiekie o na pakeneka, elike ma ka hooholo ana a na lunakanawai.

Ma ke kauoha, JAS. H.S. KALEO, Kakauolelo A. K. S. Hawaii. Honolulu, Mar. 13, 1923

_______________________________________

NA MARE

 

David M. Johnson ia Julia Akeau, Mar. 7

Isaac N. Stant ia Mary Smith, Mar. 7

John. H. Hoomanawanui ia Ruth K. Lilikalani, Mar. 10

________________________________________

NA HANAU

 

Na John Akamu Awana ame Rachel Crawford, he keikikane, Mar. 8

Na John Kahikikolo ame Kealoha Lapakuu, he keikikane, Mar. 7

Na August Markham ame Hilda K. Peck, he keikikane, Mar. 10

Na Mr. ame Mrs Kealoha Kahoe, he kaikamahine Mar. 13

_________________________________________

NA MAKE

 

Abbie Kaamona, ma ka alanui Kula, Mar. 5

Kaohoniokala Malama, ma ke alanui Auld. Mar. 5.

Sarah Kailihiwa, ma ke alanui Kawaihao, Mar. 6

Fuller, he bebe hanau hou, ma Makiki, Mar. 7.

Harbottle P. Thompson ma ke alanui Moana, Mar. 7.

Mana Piko, ma ke alanui Kulika, Mar. 7.

John Lono, ma luna o ka mokuahi Manoa, Mar. 8.

Isaac Kaluna, ma Pawaa, Mar. 9.

John Paakaula, ma ke alanui Paka, Mar. 9.

Ed P. Kekaula, ma ke alanui Moiwahine, Mar. 9.

A Kualii, ma ka Halema'i o na kamalii, Mar. 10.

Nelson Kaopua, ma ka Halema'i o na kamalii, Mar. 10

Mrs. Deborah K. Kamanoulu, ma ka Halema'i Moiwahine, Mar. 12.

__________________________________________

 

Mamuli o ke noi a Charles M. Hite, kekahi o na loio ma ko Kennedy aoao ua hoopaneeia mai ka hoolohe ana i ka hihia o Kennedy a keia Poalua ae, Maraki 20.

__________________________________________

KE HAHANA LOA MAI LA NA HANA A NA PALANI

 

RECKLINGHAUSEN, Mar. 11.--Elua mau kanaka Palani he makaainana kekahi a o kekahi he aliikoa, i pepehiia a make ma po nei ma Bauea. Elima mau puka poka i ikeia ma na kino pakahi. Hookahi o na kanaka i make oia ka Lukanela Konela Tim, o kekahi o M Jely, ke poo o ke alahao kaaahi o Buer. Kiekie loa na manao ooloku mawaena o na kanaka. Ua hoopuka aku ke Kenerala Laingelot, ke kenerala nana e hoomalu ana i ka apana i ke kauoha e hopuia ka lunakanawai ame ka hope, ke poo o ka oihana makai ame elua mau luna aupuni e iho, a ke paa ia mai la e na luna aupuni Palani lakou apau ma ke ano he mau pio. Ma ka hoakaka a na Palani he hoopa'i o 100,000,000 marke ke kauia aku ana maluna o na kanaka o ka apana.

            Ke kukulu mai la na Kelemania he mau ahahui malu no ke ku-e ana aku i ka noho ana o na Palani a no ka hoolala ana i kekahi mau hana no ka paio ana mai. Lehulehu na kanaka i hpuia ma Bocchum ma ka mea e pili ana no ka loaa ana aku o kekahi pahu poka e hoonouia ai me ka lima maloko o ka halepaahao Kelemainia.

______________________________________________

 

PARIS, Mar. 11.--Ua hoopukaia ae kekahi manao a ke Kuhina Nui Raymond Poincaire maloko o ka nupepa Associated Press o keia la e hoakaka ana o ka hoohalahala a ke aupuni o Kelemania ua ku-e i ke kanawai ke komo ana aku a na Palani a paa i na apana o Ruhr ame Rhineland, i ka nana aku ua hookahuaia ia me ka manaoino i ka manawa a ke ao holookoa e hoala ae ai i na hoomanao ana no ka Kelemania mei i hoomaukaukau ai e hana mai i ka 1871, ina aole o Palani e uku aku ana i na koi poho i koiia mai ai.

 

______________________________________________

 

BERLIN, Mar. 11--Ma ka pane a Otto Gessler, ke kuhina kaua maloko o ka aha kuhina o Cuno i na hoakaka a ke Kenerala Palani DeGouette, ma kekahi manao i hoopukaia maloko o ka Associated Press: "Aohe makou i makemake no ke aloha ia mai, elike me ka DeGouette i manaoio ai, o ko makou mau pono wale no ka makou e koi aku nei. He hiki no i ka puupuu lima hao o ke alakai o na koa Palani maloko o ka apamna o Ruhr ke ku-e i ka pono kaulike no kekahi manawa, aka nae o ka pono kaulike ame ka oiaio he oi aku ka ikaika mamua o ka mana o keia ao."

            "Mamuli o ke kokua i lako me na mea kaua i hiki pono ai ia Palani ke hoohoka ia Kelemania iloko o ke kaua nui o ke ao, i nei manawa ua loaa iaia ka manao ua ikaika oia no ka lako i na pualikoa e kaua mai ai i kekahi lahuikanaka i nele i na lako kaua. E waiho aku ana au nau e hooholo ina o keia komo limanui ana mai la a oukou, mahope o ka hala ana o kekahi mau makahiki o ka hoopauia ana o ke kaua a hooholo ana no ka maluhia, he hana maikai ia."

 

______________________________________________

 

LONDON, Mar. 11--Ua a'oia aku na luna aupuni Pelekane maloko o ka Rhineland e ninaninau a noii pono aku no ka oiaio o na lono i hooiaioia mai no ka paaia ana o na lako meaai i onaia e na Pelekane maloko o Rhine e na Palani ame na Belgians, elike me ka hoike a ka hope kaukauolelo McNeill e pili ana i na hana o na aina e. Ma ka pane ana aku i kekahi ninau iloko o ka hale o na lunamakaainana, ua hoike aku o McNeill no ke a'oia ana aku o na luna Pelekane no ka lawe ana i kekahi keehinahana elike me ia e ikeia ana he kupono, e hoopakele i na waiwai o na hui Pelekane maloko o na wahi o Kelemania e paaia ana e na Palani.

 

______________________________________________

 

BERLIN, Mar. 11--Maloko o ka Nupepa Tages Zeitung i hoopuka ia ae a kekahi mau olelo a ka @amuku von Hindenburg o ke kamailio ana maloko o kekahi halawai i malamaia e ka Hui Mahiai Hanover e hoakaka ana penei:

            "Mai poina iki kakou he poe Kelemania kakou, a he mea pono ia kakou ke hana i ka hana i pili ia kakou, o ia hana, ina he pono e hakaka aku kakou ahiki i ka nahaehae ana o ka hoe hope loa ame ka hakihaki ana o ka pahikaua hope loa. He oi ae ka maikai ke make iloko o ka hanohano mamua o ke ola ana me ka hilahila."

BERLIN, Mar. 12--Mahope o ka hakaka ana maloko o ka haleaina ua ki aku la na koa Palani i na makaainana Kelemania a make hookahi a eono i eha, elike me ka hoakaka a kekahi lono mai Dortmund mai.

 

_____________________________________________

 

LONDON, Mar. 12--O na kanaka Palani i make ai na na Palani no i ki, elike me ka lono mai Berlin mai i ke Central News ma ke kelekalapa.

_____________________________________________

 

NUI NA KU-E I KA HOONOAIA O KE SABATI

 

            Imua o ke komite hook@@@ ka hale o na lunamakaainana @@@ ahaolelo kuloko, ma ka @@@ Poakahi iho nei, i hoea @@@ heluna nui o na Hawaii @@@ ole, no ke ku-e ana i ka @@@ ainana Fernandez, e hoon@@@ na hale kiionioni, ma na @@@ auwina la Sabati, pela hoi @@@ hoikeike, ame na hana kea@@@.

            He heluna nui no o keka@@@ hoakaka ae i ko lakou mau@@@ apono i kela bila, me ka o@@@ he mea maikai, ka aeia @@@ mau hana hoikeike ma na @@@ la Sabati, no ka pono o @@@ hana ame ko lakou mau o@@@.

            Ma ka aoao nae o na Ha@@@ nui ka poe i waiho aku i @@@ mau manao hoakaka e ku@@@ ana i ka hoonoaia o na han@@@ kakaia maloko o ka bila, @@@ wina la Sabati, me ke koi @@@ aku imua o kela komite, @@@ naoia, he hana pono no @@@ ua oi aku ka pono e hoonoaia @@@ bati holookoa.

            Ma ka aoao hoi o kekahi @@@ ole, ua hoakaka ae lakou i@@@ nao e apono ana i kela @@@ ana i ke komite, e noo@@@ pono ame ka makemake o ka @@@ nui o na makaainana.

            Ma ka manao o ka Rev. @@@ he hana imiwaiwai, ka ae @@@ e hoonoaia na hale kiionioni @@@ hana keaka ma na auwina @@@ bati; a o ka ae ana aku i k@@@ make o ka bila, e lilo na @@@ o ka pule, i mau la hana @@@ no kekahi mau limahana @@@ hoomaha ole.

Kakoo i ka Bila

            O George P. Cooke keka@@@ kakoo loa i kela bila, me kona @@@ kaka ana ae, o ka manao @@@ a@ ana e hoonoaia na hana @@@ oli maloko o ka paka ma ka @@@ la Sabati, no ka haawi ana @@@ ia i manawa no kekahi @@@ lehu e hoonanea ai, me ka @@@ ana ae i kekahi mau leka @@@ i kakauia aku e kekahi poe @@@ no ana i ka wehe hamama ia o @@@ paka ma ke Sabati.

            Ua hoakaka pu ae oia, no @@@ kua loa o ka oihana koa, @@@ oihana kaua, i ka weheia o @@@ ma ke Sabati, a wahi ana, @@@ loa mai na hihia maloko o ka @@@ lelo o ka oihana makai, @@@ mai o ka weheia ana o ka p@@@ ke Sabati, a o ka mea wale no @@@ i kaohi mai i ka hoomau ana @@@ o na hana hoohauoli malaila @@@ muli o ke paniia ana e ke @@@ ka loio kalana. O ka Makua @@@ lentine kekahi mea kakoo n@@@ hooholoia o kela bila, pela h@@@ J. Belknap, a o ka hui kiionioni @@@ solidated Amusement Company.

            Ua kakoo pu ae ka Loio @@@ son, no ka hoonoaia o na @@@ makemakeia maloko o ka @@@@ ka auwina la Sabati, a ma @@@ manaoio, e oi aku ana ka p@@@ i kekahi heluna nui o na @@@ ma ka hoohala ana i ko la@@@ nawa maloko o na wahi e @@@ ana, me ka hoopilikia ole ia @@@ kahi ano o ke kulana o ka @@@ ana o na kanaka.

Ma ka Aoao Ku-e

            Ua nui a lehulehu wale@@@ ma ka aoao e ku-e ana i ka @@@ loia o kela bila. O Mr. T R@@@ ka i hoakaka i kona manao @@@ ikaika i kela bila, malalo o @@@ mu pili hoomana, e uwalo @@@ imua o na komite, aole e @@@ hoonoaia o ke Sabati, me @@@ hikuhi ana i ka hopena @@@ Wahi ana, aole i kukuluia @@@ Amerika, maluna o ke ka@@@ noa Sabati.

            O ka Rev. Akaiko Akan@@@ ka Rev. White kekahi mau @@@ hoike ae i ko laua mau man@@@ i kela bila, e kuhikuhi ana i@@@ pena poino, ma ka ae ana @@@ noaia ke Sabati.

            Ma ka mea oiaio i hooma@@@ ma kela po, ua pakela loa @@@ nui o ka poe ku-e i kela @@@ manao hoakaka o kekahi @@@ kou, o ia no ke kukulu a@@@ ka ninau hoomana, ame k@@@ maoli o ke Sabati, i hoo@@@ ai mai na la noa ae.

            Mamuli o ka pau e ana o @@@ nawa, ua hookuu ka halawa@@@ komite me ka pau ole no o @@@ ma ka aoao e ku-e ana i @@@ i ka hoakaka i ko lakou mau @@@.

_________________________________

 

E noho ana ka Ahanui M@@@ o Oahu ma Kahuku ke hiki@@@ ka pule mua o Aperila, e @@@ ana ma ka Poalima la 5, 6, 7 @@@ 8; ua makemakeia na hoa apa@@@ aha e hoea ma ka manawa @@@ ai na halawai.

 

__________________________________

HALE O NA ALII O HAWAII

(Ahahui Poo)

            E malamaia ana ka halaw@@@ mau o ka (Ahahui Poo) o k@@@ o na alii o Hawaii, ma ka @@@ Hall, i keia Sabati iho, Ma@@@ 1923, ma ka hora 2 p.m.

            Ma ke kauoha a ka Iku @@@

            W.J. Coehlo, Iku Ka@

            6547--Mar.15.