Ka Nupepa Kuokoa, Volume LXII, Number 11, 15 March 1923 — Page 4
| This text was transcribed by: | Maryann Acker |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
EHA NUPEPA KUOKOA HONOLULU, T. H., POAHA, MARAKI 15, 1923.
HE HOALOHALOHA NO KUU WAHINE ALOHA MRS. HANNAH KEOLA KINOULU
Ua moku ke kaula gula, ua naha ka pakeke ma ka punawai, ua paniia na puka ma ke alanui, a hele ka poe kanikau ma na alanui, a hoi ka lepo i ka lepo elike me ia, i kinohi, a hoi ka uhane i ka Mea Nana i haawi mai.
E ka Lunahooponopono o ke Kilohana Pookela o ka lahui Hawaii, Aloha oe:--E noi aku ana i ka oluolu o kou puuwai i rumi kaawale no ka’u puolo waimaka luuluu, walohia, paumako, no kuu wahine hele loa, i niau palanehe aku la ma ke ala koiula a Kane a nalo na maka huna iloko o ke koloka aka kinowailua, i ike mai ai na kini o kuu wahine na makamaka ame na hoaloha e noho ana i ka makani kuehu lepo o Puako, i ke kai hawanawana o Kawaihae, i ka hoohae a ka Naulu, ame ka Ua Kipuupuu o Waimea, Auwe, luuluu wale!
O Mrs. Hannah Keola Kinoulu, ua hala, ua nalo, ua wehe i ka pili hooko ialoko, ua haalele mai ia’u e auamo i ka ukana a ke aloha e haehae ana i ka puuwai. Auwe kuu wahine e!
Ma ka Poalua, Ianuari 23, hora 4:30 p.m., 1923, i haalele mai ai oia i keia ola honua ana, a hoi aku la i ka home mao.
Ka lani kuu home e maha mau ai
Pokole paa ole kuu noho maanei.
Ua hanauiia mai kuu wahine aloha mai ka puhaka mai o Lelepali (k) ame Manu-a (w) i Aperila 23, 1857, a ua piha iaia na makahiki he 65, 8 mahina, 22 la a hala wale aku la oia ma kela aoao o ka muliwai eleele o ka make.
He wahine makee kane, malama i ka laahia o ka berita mare, he haahaa, oluolu, he lokomaikai, he malama i ka mea e loaa ana ahiki i kona hora hope.
He 24 makahiki o ko maua noho mare ana a hala wale aku la oia, a iloko o ia mau makahiki, ua nohoia me ka oluolu ame ke aloha, a ke hoomanao ae ia mau hiona, he ku i ka walohia mokumokuahua o ka naau. Ahiki mai ko aloha, e uwe no au!
Ua mare mua no oia i ke kane ia J. P. Pakiai, a na laua mai 4 Keiki ame na moopuna, a ua make 3 keiki, a koe 1, e noho mai la i Honolulu, ame na moopuna e ola nei.
I ka make ana o ke kane mua, ua mareia iho la maua i ka 1898, a mai ia manawa mai ka noho ana me ka oluolu ame ke aloha, a hala wale aku la oia, a haalele mai la ia’u e u me ka naau luuluu a mokumokuahua i ke aloha o kuu wahine hele loa.
Ua kamaaina oia i ke kai malino o Kona, ke kai Hawanawana o Kawaihae, ka makani olauniu o Puako, ka makani Apaapaa o Kohala, ka Ua Kipuupuu o Waimea, ke ke-a makauliuli o Kekaha, Auwe aloha ino!
Ke haawi aku nei au i na hoomaikai ia Mrs. Maguire no kana makana poke-pua i hana noeau ia, a pela no hoi ia Jas. Kuhaiki, no kana makana no ka pahu o kuu wahine kekahi o na makana pookela loa i haawiia mai ia’u, a pela pu hoi na ohana ame na hoaloha apau o na aina kupolua nei i ka la’i o Keaukukuiula me ka puolo waimaka a ke aloha.
Aloha o Kona, aina kupolua i ka la’i, me ka puolo waimaka a ka opua hinano ua malie.
Owwu iho no,
DAVID K. KINOULU,
Puukala, N. Kona Hawaii.
ELIMA I LOAA NA HOOPII HOAHEWA.
Ma ka auwina la o ka Poaha aku nei i hala, i hoihoi ae ai ke kiure kiekie i kana hoike, no ka loaa ana he hoopii hoahewa, e ku-e ana i kekahi poe elima, no lakou na hihia, i ninaninauia e kela kiure.
No ka hewa powa ma ke degere ekahi, ua loaa na hoopii hoahewa, e ku-en ana ia Annie Tau Lin, a i ikeia hoi ma kekahi inoa o Annie Parker, Valentin Alguno ame Charles Molani.
Ma ka moolelo e pili ana i ka hihia o kela poe ekolu, ua hoea aku lakou ma kekahi po, no ka home o Wong Pay, he Pake ma Ewa, a me ka waha o ka pu panapana i kauia aku imua ona ame kekahi poe Pake e ae, i laweia mai ai ka huina o $308 e lakou.
He mau pule ae nei i hala, ua hopuia o Charles Molani, no kona komo pu ana aku me Willie Cockett ma ka powa ana i kekahi Pake, mauka ae nei i Kalihi.
O kekahi mea i loaa ka hoopii hoahewa i ke kiure kiekie, a i waihoia ae ka hoike imua o ka aha, oia o Fred Noa, o kona hewa, o ia ka hoohaumia ana i kekahi kaikamahine uuku, malalo o na makahiki he umi kumamalua.
No ka lawe ana hoi i ke kaa otomobile, ma ke ano kolohe, i hoihoi ae ai ke kiure kiekie, he hoopii hoahewa, e ku-e ana ia Albert Figuerra. Ma ka moolelo o kona hihia na lawe o Albert Figuerra i ke kaa otomobile o M. A. Damon, ma ke ano aihue, oiai e ku ana mamua mai o ka Hokele Moana, ma ka po o ka Poaona, o ka pule mamua aku.
NA HANA A KA HALE
La Hana 9.
Na bila hou i hookomoia ae i ka hale o na lunamakaainana ma keia la:
B. H. 140—E haawi ana i ka mana i ka papa o na lunakiai o Honolulu e hookaawale i haawina dala no ke kokua ana ia Mekia Kealakai.—Coelho.
B. H. 141—E hoolako ana i oihana wai no Lualualei, Waialua, Kaneohe ame Nanakuli, Mokupuni o Oahu.—Anderson.
B. H. 142—E hookumu ana i kula a’o mahiai ma Ewa.—Anderson.
B. H. 143—E hookaawale ana i haawina dala kuikawa no ka oihana kinaiahi o Honolulu.—Hussey.
B. H. 144—E hoakaka ana no kekahi kiahoomanao kaua.—Vitousek.
B. H. 145—E pili ana i ka auhau ana.—Auld.
B. H. 146—E hookaawale ana i haawina dala o $1174.38 no ke kokua ana i na kanaka hana o ka halema’i.—Auld.
B. H. 147—E hookaawale ana i $2120.84 no ke kokua ana i ka Halema’i pupule.—Auld.
B. H. 148—No ke kau hou ana aku i auhau waiwai kaulele no ke Kalana o Hawaii.—Vicars.
B. H. 149—He bila e hoakaka ana aole e loaa aku i na makai kekahi uku kaulele mawaho ae o ko lakou mau ukuhana paa mau.—Jerves.
Na Olelo Hooholo
Na J. W. Kalua e noi ana i haawina dala o $10,000 no kekahi laina paipuwai no ke Awawa o Halawa, Molokai. Waihoia i ke komite waiwai.
Na W. J. Coelho he eono mau olelo hooholo a komo aku i na lima o ke komite like ole.
Na G. H. Holt e noi ana i haawina dala a e hookomoia iloko o ka bila haawina e ke komite waiwai kekahi itamu o $75 no ka uku hoomau o Fred K. Cockett.
La Hana 11.
Na bila hou a ka hale i hookomoia ae ma keia la:
B. H. 150—E hookaawale ana i haawina dala no ka pomaikai o Mrs. Mary Ann Waiaholo.—Joseph.
B. H. 151—E hookaawale ana i haawina dala no ka pomaikai o Jas. Kupanaia.—Joseph.
B. H. 152—E pili ana i na oihana wai o ke kalana.—Ferreira.
B. H. 153—E hookapu loa ana i ke kiolaia o na ili huaai maluna o na alanui kauaoao o ke kulanakauhale.—Fernandez.
B. H. 154—E pili ana no na hope luna aupuni o ke Kalana o Kauai.—Meheula.
B. H. 155—E pili ana i na koho baloka ana ame ka hoopaa ana o ka poe koho baloka i na inoa maloko o na buke hoopaainoa.—Meheula.
B. H. 156—E pili ana i ka hoonui ana ae i ka oihana mahiai.—Meheula.
B. H. 157—E hoolako ana i haawina dala no ke kokua ana ia Jos. Richard.—Muller.
B. H. 158—E hookaawale ana i haawina dala uku hoomau no Mrs. J. J. Fern—Holt.
B. H. 199—E pili ana i ka mana hookolokolo o na aha hookolokolo apana.—Hussey.
B. H. 160—E hookaawale ana i haawina dala o $13,000 no ka pomaikai o ka Ahahui Pa ilina o Hilo.—Vicars.
Holo ma ka heluhelu ekolu ana na B. H. 13, 119, 2, 51, 54, 113, 122 ame 133.
Hoike a ke Komite Pa’i
Na Anderson ka lunahoomalu o ke komite pa’i he hoike ua pau i ke paaiia na B. H. 140, 141, 143 ame 148, a haawiia aku i ke komite waiwai na bila 145, 156 ame 147, i ke komite o ke aupuni kulanakauhale, ame kalana na bila 140, 141, 143 amd 148; i ke komite hoonaauao ka bila 142; i ke komite hoonaauao ka bila 142; i ke komite o ka oihana hookolokolo ka bila 144, a i ke komite ola, makai ame ka oihana koa ka bila 149.
NA HANA A KA HALE
La Hana 14
B. H. 161—E hoakaka ana no ke kope ana i na Papa Kuhikuhi o na palapala hoolilo maloko o ke keena kakau kope o ke aupuni.—Kalua.
B. H. 162—E hoakaka ana no na hana ame na mana o na lunakiai.—Hayselden.
B. H. 163—E pili ana me ka hale hoikeike ia ma Kapiolani paka.—Wilder.
B. H. 164—E pili ana i ka auhau ana.—Wilder.
Pa’iia na Bila
Na Anderson lunahoomalu o ke komite pa’i he hoike ua pau na bila mai ka helu 152 a ka 160 i ke pa’iia. Waihoia aku i na komite like ole e ka Lunahoomalu Cooke. I ke komite hookolokolo na B. H. 155, 156 ame 159; i ke komite waiwai na B. H. 157 ame 160; i ke komite o ke aupuni kulanakauhale na bila 152 ame 154; i ke komite ola ka bila 153, a na b. S. 16, 17, 18 ame 22 i ke komite waiwai, i ke komite hookolokolo ka b. S. 7 a i ke komite hoonaauao ka B. S. 11.
Holo ma ka heluhelu ekolu ana ka b. H. 2, ka bila e haawi ana i ke Kamaliiwahine Kalanianaole i haawina hoomau o $500 no ka mahine, ame na bila 51, 54, 113, 122, ame 133.
Na Olelo Hooholo
Na J. W. Kalua, he olelo hooholo hoomaikai na na hoa o ka ahaolelo ia Rev. O. H. Kulika ame W. H. Rice, a e noi ana e hoounaia aku i mau kope o ka olelo hooholo ia laua.
Na W. J. Coelho, he olelo hooholo e noi ana i uku hoomau no Zachariah mcKeague, he kanaka i hana me ka oihana hoonaauao no na makahiki he 29 a i elemakule ahiki ole ke hana i mea e ola ai oia i nei manawa.
NA HANA A KA HALE
La Hana 15
Na bila hou i hokomoia ae i ka hale ma keia la:
B. H. 165—E haawi ana i ka mana i ke aupuni kulanakauhale ame kalana o Honolulu e aie dala a e hoopuka aku i mau bona a kuai aku no na laina paipu lawe mea ino.—Anderson.
B. H. 166—E pili ana i ka uku o ka poe kiure.—Hayselden.
B. H. 167—He bila e hoakaka ana no ka hana ana i alanui mai na aina hookuonono aku o Honomu a i ke kahawai o Kolekole, am ka Wailele o Akaka, Hilo Hema.—Silva.
B. H. 168—He bila no ka uku ana ae i ka Hui Kaa Pacific ame ka Halehana kaa no ka hana ana ame na materia no ke kaa oto o ka aha hookolokolo o na opio i $17.20.—Fernandez.
Na bila i hoopaneeia mai ka heluhelu ekolu ana a ka la hana 16:
B. H. 11, 92, 134, 144, am3 159, ua holo ma ka heluhelu elua ana i nei la.
Holo ma ka heluhelu ekolu ana ka B. H. 31 i hookomoia ae ai e Hussey, e pili ana i no hoi malama banako, a hoopaneeia mai ka heluhelu ekolu ana i ka B. S. 6 a ka Poakahi nei.
Na Olelo Hooholo
Na W. J. Coelho he olelo hooholo e noi ana e hookokuia aku i hope luna auhau no ka apana o Koolauloa.
Na coelho no he olelo hooholo mahope aku o ka iwakalua o na la hana a ka hale aole mau bila e noi ana i mau haawina dala, a pela hoi me na olelo hooholo a mau palapala hoopii e hookomoia mai i ka hale me ka ae lokahi mua ole o na hoa o ka hale.
Na John Ferreira he olelo hooholo e hoakaka ana e hokomoia iloko o ka bila haawina kekahi itamu no ka uku hoomau ana i Recard R. silva, he kanaka i lawelawe no ka manawa loihi i ka hana maloko o ka Halema’i Malulani ma Wailuku, Maui, malalo o ke Kalana o Maui.
Na Anderson he olelo hooholo e nei ana i ka papa o na lunakiai e hoolako ae i ka hale i ke koho no na lilo o ka hana ana i mau kukui uwila ma ke alanui pali o Nuuanu ahiki i Heeia.
Na Anderson no he olelo hooholo e noi ana e hokomoia iloko o ka bila haawina dala na itamu no na uku hoomau no keia poe malalo nei:
Mrs. Julia Nani Alapai, i $60 no ka mahina; Henry K. Heanu, i $60; Mrs. Moses Ulunahele, i $50; Mrs. Annie Kanakanui, i $100; Thomas Aiu, i $50; Mrs. Matthew Kane, i $60 Capt. N. C. Neilson, i $50; Miss Sadie McLain, i $60; P. K. Ohulenui, i $50 a ia Alexander George (makapo) i $50.
NA HANA A KA HALE
La Hana 16
B. H. 169—E pili ana i ka hookuu ana mai ka auhau ae.—Hussey.
B. H. 170—E pili ana i ka hele ana o ke keiki i ke kula aupuni a i na kula kuokoa.—Coelho.
B. H. 171—No ka hoohoihoi ana i ka hana a i ole ka hoonui ana ae i na alanui hae.—Coelho.
B. H. 172—He bila keia elike me na bila senate, e pili ana i na moohelu waiwai a ke aupuni i hooiaioia.—Kalua.
B. H. 173—E pili ana i na koho baloka wae moho.—Ferreira.
B. H. 175—E pili ana i na hana a ka loio kuhina.—Vicars.
B. H. 176—E pili ana i na kaa otomobile i hoohanaia e na luna aupuni no na hana o ka lehulehu.—Silva.
B. H. 177—E pili ana i ke aupuni kulanakauhale.—Vitousek.
B. H. 178—E noi ana i haawina dala kokua no J. K. Maa.—Pedro.
Holo ma ka heluhelu ekolu ana na B. H. 11, 92., 144, 139, 1 hoopanee hou ia mai ka noonoo hou ana maluna o ka B. H. 134, a ka Poakahi nei.
He bila keia e hoakaka ana e lilo no i hewa feloni ke kalaiwa ana o kekahi i ke kaa oto i kona manawa ona.
Holo ma ka heluhelu elua na B. H. 40, 43, 48, 57, 146 ame 147. Hoopanee hou ia mai ka noonoo a hooholo ana ma ka heluhelu ekolu i ka B. S. 6, o keia la.
Waihoia aku i na komite kumau like ole e ka Lunahomalu Cooke keia mau bila: I ke komite waiwai na B. H. 167, ame na B. S. 23, 32; i ke komite o ke aupuni kulanakauhale ame kalana ka B. H. 165 ame ka B. S. 35; i ke komite hokolokolo ka B. H. 166.
Na Olelo Hooholo
Na Anderson he olelo hooholo e hoakaka ana aole e noonooia kekahi bila a i ole e waihoia paha ma ka papa ke ole e hoea mai ka mea nana ia bila iloko o ka hale ma ka manawa e noonooia ana ka bila. Moe ma ka papa keia olelo hooholo.
Na vicars he olelo hooholo e kauoha ana i ka Loio Kuhina e waiho ae i hoike i ka hale no na hana e pili ana i ka oihana a ka Makai Kiekie o ke Teritore.
Na Anderson he olelo hooholo e noi ana i uku hoomau no Claud Haupu o $75 o ka mahina a e ukuia ae e ke aupuni kulanakauhale.
Na Pedro he olelo hooholo e noi ana i uku hoomau no Mrs. Rosabella Kanepuu, a e hokomoia iloko o ka bila haawina mai Iulai 1923 i Iune 1925.
Na Pedro no he olelo hooholo e noi ana i uku hoomau no Joseph Kawaha a na ke Kalana o Hawaii e uku ae i ka wahine kane-make, a Kawaha i $50 no ka mahina.
Moe ma ka papa ka B. H. 153 i hookomoia ae ai e Fernandez e pili ana i ke kiola ana i na ili huaai maluna o na alanui kauaoao o ke kulanakauhale.
NA HANA A KE SENATE
La Hana 13
O keia ka la holo loa o ka lawelawe ana o ka aha senate i kana mau hana ahiki i ka hoopaneeia ana, maloko o na minuke he iwakalua ua pau loa na hana maluna o ke pakaukau o ka lunahoomalu.
Huki hou ke Senatoa McInerny i kana bila e hoopau loa ana i na kanawai e ku nei i nei manawa e ku-e ana i ka nana ana ame ka pepehi ana i na pipi i loaa i ka ma’i akepau, a hookomo aku he bila hou ma ia wahi e hoakaka ana aole dala o ke Teritore mai ka waihona waiwai aku e ukuia aku i kekahi ona o ka holoholona i loaa i ka ma’i akepau, mahope o ka hoahewaia ana o ia mau holoholona e ke kanawai.
Na Senatoa Desha he olelo hooholo S. C. R., e noi ana e maheleheleia i mau pa hale o hapalua eka ka ili o ka pa hookahi, o kela hapa o ka aina o Waiakea, mauka o ke alanui Kilauea, hilo, mawaena o ka pa halekula o Piopio ame na apana pahela home hookuonoono o Waiakea i maheleheleia nona ka ili aneane he 71 eka, o ia mau apana i oleloia e kuaiia aku i ka poe koho kiekie loa i mau na hale noho a o ke koena aku o ka aina e hoolimalimaia aku, i alahele huli dala, a o ia mau apana e hoolimalimaia aku ana aole e emi iho malalo o 25 eka pakahi ma ka hookoeia o ka pono e huki hou mai ai ia aina holookoa ai ole kekahi hapa paha i ka wa e okiia ai @
Aponoia ka H. C. R. 3, mahope o ka hookomoia ana o ka huaolelo “na makaainana” ma kahi o ka “poe noho”, elike me ia i hooponopono hou ia mai ai e ke komite maluna o na aina aupuni.
NA BILA SENATE
Na bila Senate.
Loaa mai i ka hale i keia la na B. S. 11, 16, 17, 18, 22 ame 27.
Palapala Hoopii.
Na Evan Da Silva i hookomo ae na palapala hoopii e noi ana e kukuluia i halekula aupuni ma Honohina a i ole mawaena o Honohina ame Hakalau, Hilo Akau, Hawaii. Waihoia aku i ke komite hoonaauao.
Na Olelo Hooholo
Na Ferreira he olelo hooholo e koi ana i ka papa hoonaauao e hoike ae i ka hale i ke kumu o ka hoopauia ana o ke kula aupuni ma Kuiaha, Makawao, Maui.
Ka lua o na olelo hooholo i hookomoia ae ma kela la e noi ana e hookomoia iloko o ke bila aie dala ka huina o $50,000 no kekahi uwapo hou ame ka hale ukana, a e eliia ke awa o Pualu me ka hana ana i ke alanui e hiki aku ai ia uwapo, ma kahi kokoke i Waialua, Molokai.
NA HANA A KE SENATE
La Hana 14
Na bila hou i hookomoia ae i ke senate ma keia la:
B. S. 55—E kauoha ana i ka papa o na lunakiai o Hawaii e haawi ae ia William K. Kahaleohu i uku hoomau no kona wa e ola ana i $60 no ka mahina.—Desha.
B. S. 56—E noi ana e haawi muaia ka huina o $50,000 no ka hana ana i alanui mawaena o na aina hookuonoono o Kaapahu ame Paauilo, Apana o Hamakua, a ma ke kuaiia ana aku o na aina aupuni e hoihoiia ae ai i ka waihona o ke aupuni na dala i hooliloia no ia alanui.—Vannatta.
B. S. 57—He bila e lilo ai i hana na na luna aupuni kalana apau o Hawaii ka hooko ana aku i ke kanawai hookapu waiona a Volstead, a o na dala hoopa’i ame na bela i lilo wale i ke aupuni e holo ae i ka waihona waiwai o ke kalana.—Desha.
B. S. 58—Aole kanaka e hookohuia i hope makai nui no ke Kalana o Hawaii me kona hoomaamaa kanawai mua ole a loaa kona laikini.—Desha.
B. S. 59—E hookaawale ana i $7500 pakui no ka waihona uku o na paahao.—Jarrett.
B. S. 60—E kau ana i uku no na paahao aole e oi aku maluna o 25 keneka no ka la, a e hoamana ana i ka lunapaahao e hoihoi ae i na dala i hoakuia i loaa ma ka hana ana a na paahao i waihona hoahu i ka banako i mea e hiki ai e loaa i, ukupanee ia lakou.—Jarrett.
Holo ma ka heluhelu elua ana ka B. S. 51, e pakui ana i $15,000 i ka haawina i hookaawaleia elua makahiki i hala no na hoolilo o ke komisina limahana.
NA HANA A KE SENATE
La Hana 15
Hookahi bila hou i hokomoia ae i ke senate ma keia la o ia keia malalo nei:
B. S. 63—E noi ana i uku hoomau o $75 no ka mahina no elua makahiki no ka lunakanawai mua Henry Hall o Hamakua, Hawaii.—Vannatta.
Holo ma ka heluhelu ana ka B. H. 63, e pili ana i ka hooliloia ana aku o na ili pipi a pela aku.
Holo ma ka heluhelu elua ana na b. H. 111, 66, 112, ame ka b. S. 24, he kanawai e hololi ana i na kanawai e ku nei i nei manawa ma o ka haawi ana i kekahi kakauolelo o ka aha kakau i ka mana e lawe i ka hooiaio ana i na palapala o na ano apau i manaoia no ke kope ana maloko o ka buke o ke aupuni.
PANE HAINA NINAU MOA.
Solomon Hanohano; Aloha oe:--E oluolu loa mai oe; e lawe aku i ka’u mau hoomaikai palena ole, no kou hoomanawanui ana mai, me ke kui-he ole a hoohalahala paha, i na hoounauna like ole i hookauia aku maluna ou; aka ua hiki mai la ka manawa a u e hooluhi hou ole aku ai ia oe, no ka ninau (Moa) hooniua noonoo ame ka lolo, no ka mea, ua ulaa pu ia ae la ka puu wahie, i hunaia ai kahi moa, a ahuwale; aole kau iho kahi laau maluna o kahi.
Ka pao no a ke kolopa kila, e hoonaueue ana i ka papa-ku a loaa i’o aku la ka mole, ke kumu oiaio hoi o ka wai e hua’i nei i Waiakamilo.
“O, ua eueu nei, a i makaukau hoi me keia mau mea paahana ae la, he hiapaiole ia no ka uka i puia i ke ala onaona o ka like-lehua o Pauoa.
E ka mea hanohano S. K. K. Liko, ke pahola aku nei au i ko’u hoomaikai nui no kau haina pololei loa, no ka’u ninau (Moa), a ua eo hoi ia oe ka makana.
Aka, ke kaumaha nei no nae au i kekahi mau hoa iho i kulike hoi ka laua mau haina me kau e ka mea i kaili mua ae la i ka eo, a e pana’i pu aku ana au i ko’u mahalo nui no laua; o ia hoi na mea hanohano J. P. K. Wailiula o mana, Kauai; ame D. K. Waiakamilo boy, kuu hoaloha maikai.
Minamina nui au i ka hala hope loa ana o kau haina e kuu hoa ha’iha’i olelo, Mr. D. K. Kanealii, ina la hoi ua kaili aku oe i ka makana a kaua.
Ma keia ke hooia aku nei au, ua lilo ka makana ia S. K. K. Liko.
E oluolu e hui kino ae me ka Lunahooponopono, ke hooki nei an me ka hoomaikai nui i na keiki limahei o ka papapa’i, Adieu.
Me ka mahalo,
GEORGE MALUNA,
907 Waiakamilo Rd, Honolulu,
He hoopii okimare ka i hookomoia ae e Daniel Kalauokaaea e ku-e ana ia Loisa Kalauokaaea iloko o ka aha kaapuni ma ka Poakahi nei no ka hewa he pepehi hoomainoino.
NA MANAO PANE O S. K. KEKOOWAI IA WM. WADDOUPS.
Mr. Lunahooponopono o ke Kilohana a ka lahui; Aloha oe:--I ko’u heluhelu ana i na manao pane o keia makamaka maikai o kakou, oia hoi o S. K. Kekoowai; i loaa mai ai ia’u ka ike i kona hemahema, maoli, he malama Baibala wale iho no ka, aole nae i ike i na manao ano nui oloko, kaa nae ka ike, me ka hoomaopopo ana i kou mau poopoo apau i keia haole, a ka naauao lua ole, a ke lilo aku nei hoi oe, i mea ku-e aku i ka oiaio o ka ke Akua hooponopono ana me ko kakou mau kupuna, i pau nui aku i ka hoi e hiamoe.
He kupanaha maoli, ia Kekoowai ke huli aku a ku-e i na hoikeike manao oiaio apau, i hoikeia e Wm. M. Waddoups, ma ka helu o ke Kuokoa o ka la 8 aku nei o kela mahina, me ka olelo iho; he mau manao koho wale iho no ka ia, o ke ano hoomalimali, he mau manao alakai hoopilipili Baibala, pili nakekeke wale iho no, me ka maopopo ole ka i ka manao o ia olelo Hawaii, o kini, lau, a mano.
He kupaianaha maoli keia; me ka olelo iho, he moolelo hookumu honua; a hookumu, lani ka ko keia lahui e ku nei; mai kinohi loa mai, ma o ko lakou mau kupuna mua la, a o ka ninau nae ia oe, e Kekoowai, aia mahea o ka Buke Baibala au e paa la, ko moolelo, au i kuhihewa ai?
He lahui Hebera oe ma o kou mau kupuna mua la i hoopuehuia mai e ke Akua, a poe ia keia mau mokupuni o ke kai, he lahui malalo o ka berita a Iehova i hana aelike ai me Aberahama, nona ka manao nui i kukuluia mai ai e Wm. M. Waddoups, ma kau olelo Hawaii ponoi, o ia o kini lau, a manao, o keia huaolelo he nui loa a lehulehu a ma ka olelo hoi i pili ia Aberahama, o ia hoi ka makua o ka lehulehu, Kin. 17:4,5, a ma Kin. 22:17., hoonui aku oia Iehova i ka lehulehu o ka Aberahama mamo elike ka nui me na hoku o ka lani, ame ke one o kahakai.
O kela mau kumu hookuihe ia oe e pili ana: 1. Ka hoomaemae ana i ka haumia, 2. Ke oki poepoe ana, ame na mea e pili ana i ke ano o ka hoomana akua ana, he mau hana ia a ko kakou mau kupuna i a’oia mai ai o ke Akua, pela e hana ai, alaila; Oia hoomaopopo mai, (Iehova) a ina aole oe e hoomaopopo aku ma keia mau mea ae la; aole no Oia e hoomaopopo mai ana, elike me keia noho huikau ana a kakou e huikau nei, ahiki i ka ulu ana ae o na manao ha’oha’o i ke kumu o ko kakou ulu nui ole.
Ua pololei ka haole (Wm. M. Waddoups) i pane mai ai ma kanapane; aole o ka Baibala he moolelo piliwale no ia i ka lahui Habera; aole loa he moolelo ia no na mea apau, o ka ke Akua mea i hana ai, ame ka na kanaka mea o ka hoopalahalaha ana aku a nui loa ai na lahui kanaka, aole no ka lahui kanaka Hebera wale no na mea i hoopaa ia iloko o ka Baibala; aole loa!
No ka mea e pili ana i ka hoike a ke kauwa a ke Akua, e pili ana no Iakoba ke keike a Lehi, ka ohana i hiki aku i ka aina o Amerika 500 a oi makahiki mamua o ko Iesu Kristo hanauia ana; ma ka aina o Palesetina, a ulu ae la ka manao hoino; a i iho la, he ha’oha’o, e ha’oha’o no paha; no ka mea he ku-e a’o hoomana maoli ko Kekoowai; aole he ha’oha’o!
Me ka hoike maopopo mai no ka o ke kauwa a ke Akua, he 600 makahiki mamua o ko Iesu hanauia ana; a he 11 makahiki o ko lakou nee ana ma ke ala, kahi a ke Akua i lawe ai, a lukuia ai o Ierusalema e ka poe Kaledea, e nana iho oe ma Oihanalii 36:16-22, a ina i loaa ke kauoha i keia kanaka ia Lehi e hele; he mea maopopo loa; aole e loaa he lahui kanaka ma ka aina o Amerika, a ina ua make pu me kela poe kanaka, i kela luku weliweli i hanaia ma Ierusalema.
O kou hemahema nui e ka makemaka, okou hooiaio ana mai nei ma kau pane ku-e ia Wm. M. Waddoups, o ia iho keia; e olelo ana oe, aohe mea i hoikeia aku ia oe e kekahi kanaka, a buke paha i kakauia, e olelo ana; he kanaka no i hiki mua i Amerika mamua o Columbus,
Ma ka nana aku i kou mamao maoli, o Columbus ke kanaka mua, i hiki i ka aina o Amerika; a mahope aku ka lahui Ilikini, ka poe no lakou ka aina a Columbus i ike aku ai, he lahui nui, hiki ole ke heluia, paa pu ka aina i na kanaka; elike me ka nui o keia lahui kanaka, i ka wa i hoea mai ai ka poe mua i keia aina.
Nolaila, i kona a’o mua ia ana i ka olelo i ike ai oe, ua ha’oha’o oe; e pono no oe e a’o hou ia i ka palapala oiaio, o ka moolelo o ka lahui kumu o Amerika, o ia hoi; o ka lahui kanaka i loaa aku ai ia Columbus, iaia i hiki aku ai ilaila a ina oe e mahele iki i na mea o na plalpala oiaio la, alaila oe ike pono iho me ka maopopo loa, mailaila mai o tutu ma, a noho ai ianei, a hala loa aku malalo aku nei o kakou, kekahi poe a ke Akua i hoano okoa ai, ahiki i Kona kii hou ana mai nei ia kakou i keia la, e hoi aku imua Ona, elike me ka manao o ka wanana i hoikeia ma Isaia 11:11-13.
Ahiki aku i kela la, e hohola hou mai ka Haku i Kona lima, e hoola i ke koena o Kona poe kanaka, i ka poe e koe ana ma Asuria, ma Aigupita, ma Paterosa ma Kusame Elama, ma Sinara, me Hamata, a ma na mokupuni o ke kai, oia oe e Kekoowai, au e hoole nei, aole ka oe he Hebera, o Kekoowai oia no ka i ike, a maopopo!
E kau no hoi Ia i hae no na aina, a e hooiliili hoi i ka poe aea o ka Iseraela, a e hoakoakoa mai i na mea puehu o ka Iuda; mai na kihi eha mai o ka honua.
Alaila; e oki no ka huahua o ka Eperaima, a e pau no hoi ka enemi o ka Iuda a e noho like laua elike me na la o ko laua kukuluia ana i kinohi.
Nolaila; i keia mau la e nee nei, ua hohola io mai nei ka Haku i Kona mau lima, e hoola ia oe e Kekoowai, ma o ka euanilio la, e houluulu ia oe ma kahi i hoomakaukau ia e ke Akua i hoike ia ma Isaia 2:2-4, a e heluhelu iho oe me ka hoomaopopo ua a’oia paha oe; aole paha?
He nui na manao ano nui i a’oia mai maloko o ka Nupepa Kuokoa, e Wm. M. Waddoups, kona hoikeike maopopo ana mai i ka nane no ka oliva kumu, ame ka, oliva ulu wale, me kona hoikeike maopopo ana mai; he lala kakou no ka oliva kumu, ua laweia mai nae a ma na wahi malalo loa nei o ke kihapai, kanuia, a ina no ka maikai o ka ulu ana, e hoihoi hou ia na lala maikai apau a hoopili i ka oliva kumu, a o Iakoba ka mea nana i hoomaikeike i keia mau olelo ao, i kona lahui kanaka ponoi, o ia hoi ka poe Nepai, a o ia hoi ka Waddoups i kuhikuhi mai nei i kokakou like, me ko lakou ano.
He poe lakou na ke Akua i lawe, a honohoia ma ka aina hoano, i kapaia o Amerika, ulu lakou a lilo i lahui kanaka nui, a mamuli no hoi o ko lakou lilo ana apau loa i ka hoomanakii, malama ole i na kanawai, a’e maluna o na kauoha, a uha’i i ka berita mau loa nolaila, kii mai ai ke Akua ia Columbus, a lawe ilaila, i mea hoopoino aku ia lakou, elike me ka Iehova mea i hoopaa ia imua o Mose, nana ma Kanawailua 28:15-68, heluhelu iho.
O ha mea no, e pili ana i kela poe o amerika, o ia no ka haawina i loaa ia kakou, ma o ko kakou mau kupuna la, ia columbus loaa o Amerika, a ia Kapena Kuke hoi, loaa ana o Hawaii nei, a o na poino ame na popilikia i loaa i kela poe, o ia no ia kakou nei, lilo lakou nei ma ae i poo; a o oe ke kakaiapola o ko lakou la mau makemake apau.
No na mea e pili ana i na olelo hooiloilo a ko poe hanaiahuhu, e pili ana i ke 50 makahiki, aole ia na Wm. M. Waddoups, aole o kona haole ana, manao iho oe, o ia kau e kepa ae ai no ia mau mea, ke hooia nei oia i ke kanawai hoopulapula, he kanawai maikai loa ia, a o ia kekahi alahele e hoouluia a o ia kekahi lahui, aole elike me kau i manao ai, i poe mea keiki ole ke ohi ia, a lawe iluna o ka aina hoopulapula, aole pela, o ka manao maoli o ke ‘Lii, Kalanianaole i manao ai, o ka poe nui o na keiki, o lakou ke ohiia a lawe iluna o ua mau aina la; noho na makua a hana i ka hana hiki ia lakou ke hana, a ulu ae hoi ka lakou mau keiki, mau keiki, a komo aku, komo mai, a mare paha, i ka loaa ana mai he Hawaii oiaio, aole hoi elike me kau.
Ka mea e pili ana i na keikikane, ame na kaikamahine, a Waddoups, i olelo ai, o kekahi kumu emi nui ia o keia lahui, no ke a’o nui ole o na makua Hawaii, i na keiki a lakou, i na kanawai paa luli ole, o keia maoli ka oiaio elike me kela mau pauku a’u i hoomaikeike mua ae nei, he mea maopopo loa ia, o na makua mea keiki apau, ke kau aku nei ko lakou pono maluna o ka loaa a ka lakou mau keiki, ma ka hookuukuu wale ana me ke a’o ole ia aku. manao no e a’o aku, o ka maka’u o huhu mai keiki, loaa ole kahi meaai e ai ai, noho pu wale iho la no!
Na mea pili a’o hana o kela ano ame keia ano, aole ia he mau olelo e hiki ai ke ku-eia aku, ina no paha ua molowa oe i ka hana ana i kekahi mau mea, o ke a’oia ana mai, noho malie no hoi oe, heaha auanei kau e hoole iho ai a manao ae oe, o kou hele ana i ka haleaina, a ike ole i kekahi poe, o ia ka mea e hiki ai ia oe ke hoole ae, i ka oiaio o na mea i paneia mai o kekahi kumu no ia i pilikia ai kakou ma na haleaina apau apuni keia kaona nei, e piha pono ana ia i ka poe hana o na ano hana like ole, i ka ainaawakea.
No na mea e pili ana i ka hukiia o na kanaka Hawaii, e kekahi mau alakai mua, me ko olelo iho he mau manao i piha i ka epaepa, ka puni waiwai ame ke a’o lalau, aia a komo i Loko Paakai, bapetizoia ka uhane o na kupuna, ola, eia ka hoi, he hiki wale no ke kukuluia i Hawaii nei ka Halelaa.
No ia mau olelo au e Kekoowai, i ke alakaiia o na kanaka Hawaii i Loko Paakai, aole loa he oiaio o ia mau olelo, ua alakaiia kela Hawaii, keia Hawaii, e ko lakou manaoio ponoi iho; e hele a hana i ka hana ano nui, i kauohaia ma ke kanawai, no ka poe ola e ola ana, ame ka poe i make mua, i lohe ole i ka euanelio, oiai; ua paa loa ke kanawai hookumu, a Ioane Bapetizo, ame Iesu Kristo i kukulu ai, elike me na mea i hoolalaia no ka pono o ke kino, ame ka uhane, o kela ame keia kanaka manaoiao.
Nolaila; mai ohumu wale, no ia mau mea, e hooikaika e loaa kau, nou keia pomaikai nui ua uwaiia mai la a ko alo, o ia ke aloha kanaka, ka loaa ana i puuhonua no keia lahui Hawaii, e hoolaia ai.
Ke hooki nei au maanei me ka hoomaikai i ka Lunahooponopono o ke Kilohana ame na keiki o ka papapa’i ko’u welina,
CHAS. K. KEALOHA,
O KEPAKIANO KALA KAIKAINA UA HALA I KE ALA HOI OLE MAI.
E Mr. Solomon Hanohano; Aloha oe:--E oluolu mai hoi oe, i na he wahi rumi kaawale kekahi, o ka ahailono ahonui, e hookomo iho, i kela mau huaolelo, e kau ae la maluna, a nana hoi auanei ia e uwila aku, ma na paemoku o Hawaii nei; i ike mai ai, na kini, ame na makamaka, o maua e noho ana, ami ka hikina a ka la, i Kumukahi, ahiki loa aku, i ke kowelo ana, a ka la i ka mole olu o Lehua o Kawai Kala Kaikaina, ua haalele mai i keia ola honua ana, i ka la 21 o Ianuari, 1923.
Ua hanauia ka maua keiki aloha, Kawai Kala Kaikaina Kepakiano, ma Kaohe, Kona Hema, Aperila 2, 1909, mai ko maua puhaka aku Kala Kaikaina (k) ame Mrs. Kawehe Kaikaina.
I ka 1911, i nee mai ai ko maua noho ana no Kau nei, ka aina nona ka olelo ia Kau Kaumakani. a i ka ulu ana ae o kona kino a kupono no ka hoonaauao ana, i hookomoia aku ai oia i ke kula Kakolika e ku nei ma Waiohinu, malalo o ke a’o ana a ka lakou kumukula, Mrs. Julia Apiki, malaila oia kahi i hoonaauaoia ai, ahiki wale i kona pauaho ana mai ia maua kona makua ame na kupuna.
Ma ka la 18 o Ianuari, 1923, i loaa ai he eha, ma ka wawae, oiai oia e noho ana, iloko o kona rumi kula, a ua ike aku la kana kumu, i ke ano e o ka helehelena o kana haumana; me ka ninau pu ana aku heaha ka pilikia i loaa ia oe?
Ua hoike koke aku la kela he eha aia ma kuu wawae, e hiki ole ai e hana, i ka’u haawina o ke kula, o ka pane a kana kumu aloha, ina pela e hoi oe i ka hale, ina no ka pau o kou pilikia, hele mai. Ke hopohopo nei au, no ko’u hoi hookahi ana ma ke alanui, o kekahi wahi o ke alanui, he mehameha, ek manao nei au, e kali apau ke kula a kuu pokii, hoi like maua, ua ae mai no ke kumu.
Ua hoomanawanuiia eia, kela la ahiki i ka pau ana o ke kula a kona pokii, u hoi mai la ahiki i ko makou hale ma Leilehua ko maua home hookuonoono, a ma ka Poalima ae, Ianuari 19, aole oia i hele i ke kula, pehu mai la ka wawae me ka hu’i pu, a he nui ka ua o keia mau la mai ka Poalima mai, ahiki wale i ke kakahiaka, Sabati.
Ke huli hele nei, i ka pono no ka maua keiki, aole he loaa mai o ka maha, a ma ke ahiahi Sabati Ianuari 21, i lele loa ae ai kona hanu hope, a pili iho la kona mau maka. Auwe luuluu wale au i kuu keiki!
Ma ka Poakahi, Ianuari 22 ae, i akoakoa mai ai ka ohana, a hooholo i ka mea pono, i hoihoi loa ia aku ai, kona kino lepo, no Kamaoa, ka home hoi o kona anakala, Wohi Keanu, a malaila i hoomoeia aku ai kona kino lepo, e hoi ka lepo i ka lepo, a o ka uhane i ka Mea Nana i hana mai.
E hoomaikaiia Kona inoa hemolele, ma na lani kiekie loa he malu ma ka honua, he aloha i kanaka.
Ke haawi aku nei maua, a o makou huiia, i na hoomaikai he nui, i ka mea nana i hana kona halelua. ke hoomaikai pu aku nei no hoi i na makamaka, ame na hoaloha apau, i ku kiai pu mai me makou, iloko o na hora o ke kaumaha ame ka luuluu.
O makou iho no ka ohana,
KALA KAIKAINA,
KA AHAHUI KULA SABATI O OAHU.
E noho ana ka Ahahui Kula Sabati o ka Mokupuni o Oahu ma ka Ekalesia o Hauula, ma Keana, Kahuku i ka la 5 o Aperila, 1923; hora 1:00 p.m., no ka malama ana i ko lakou halawai hana.
Ke kauohaia aku nei na lala o ia aha, e hele ae me ka makukau. O ke ola o ka Aha o $3.00, e hoouna aku i ke Komite Ola, Rev. Jas. Akimo.
Ke kauoha pu ia aku nei na Kula Sabati apau o ka Aha, e hiki ae ma ke Sabati la 8 o Aperila, 1923, no ka Hoike Hui a ka Aha e malamaia ana. O na haawina, na kela me keia Kula Sabati e wae nona, o ia na haawina kuikawa, me ka makaukau i na haawina kokua.
Me ka haahaa,
OSCAR P. COX,
Lunahoomalu.
Honolulu, Mar. 13, 1923.
AHUWALE KA MEAHUNA
Mamuli paha o ka piha loa i ka manaoio, i hoike okoa ae ai kekai o na makai o ka oihana makai o Kaneohe, Koolaupoko, aia he @ haneri dala e loaa nei ia lakou mai ka poe kipe aku.
Maloko o ka luakini o Kaneohe i hoike okoa ae ai ka makai, he poe lakou e lawe nei i ke dala @ a ua nui ka poe i lohe no @ hoike manaoio.
He mea oiaio, i ka manaka 3 ola ana o William Henry, ua lawe aku oia i keia hewa hookahi no imu@ ke kiure ninaninau, aka, no ka @ ole o na ike oiaio ma ko William Henry aoao, ua haule wale @ hoopii.
Me he mea la, he hana kahiko@ keia a kuluma i keia poe, a k@ noonoo ae, o na dala e loaa nei mai ke kalana mai, a hui pu me na @ kipe, ua momona maoli no na makai o Koolaupoko.
Ke ninau nei ka poe i lohe @ i keia hoike manaoio, o ka @ hea la ke huli pono mai i keia @ o na poo paha ma ka oihana, @ ole, o na komisina paha o ka oihana makai ninaninau?
KIU O NA MEAHUNA.
Ma ke Kauoha.
TERITORE O HAWAII.
Keena o ka Puuku, Honolulu, Oahu.
Ma ka hana e hoopau ana i ka W. W. HALL, LIMITED.
OIAI, o ka W. W. HALL LIMITED, he hui ia i kukuluia a e ku ana malamo a ma ka mana o na kanawai o ke Teritore o Hawaii, i kulike ai me ke kanawai i hoomakaukauia ma na hana o keia ano, ua waihoia mai iloko o keia keena he palapala noi no ka hoopau ana i ka hui i oleloia hui pu me kekahi palapala i hooiaioia i hoohui pu ia me ia, elike me ia i koiia ai ma ke kanawai.
NOLAILA, ma keia ke haawiia aku nei ka hoolaha i kekahi mea. a i na kanaka apau, he nau kuleana mamua a e kuleana nei paha i kela manawa ma kekahi ano iloko o ka hui i oleloia, e pono e waiho mai i na ku-e ana no ka aeia aku o ka palapala noi i oleloia maloko o keia keena ma, a i ole mamua ae o ka la 21 o Mei, 1923, a o kela ame keia mea e makemake ana e hooloheia aku maluna o ia mea, he pono e hoea kino ae ma ke keena o ka mea nona ka inoa malalo iho maloko o ka Hale Mana Hooko, ma ka hora 12 awakea o ka la i oleloia, a e hoike mai i ke kumu, ina he kumu kekahi, i wahi e ae ole ia aku ai ka palapala noi i oleloia.
HENRY C. HAPAI,
Puuku, Teritore o Hawaii.
Honolulu, Maraki 12, 1923.
6547—Mar. 15, 22, 29; Apr. 5, 12, 19, 26; Mei. 3, 10, 17.
TERITORE O HAWAII
Keena o ka Puuku, Honolulu, Oahu.
Ma ka hana e hoopau ana i ke CASTNER REALTY COMPANY, LIMITED.
OIAI, o ke CASTNER REALTY COMPANY, LIMITED, he hui ia i kukuluia a e ku ana malamo a ma ka mana o na kanawai o ke Teritore o Hawaii, i kulike ai me ke kanawai i hoomakaukauia ma na hana o keia ano, ua waihoia mai iloko o keia keena he palapala noi no ka hoopau ana i ka hui i oleloia hui pu me kekahi palapala i hooiaioia i hoohui pu ia me ia, elike me ia i koiia ai ma ke kanawai.
NOLAILA, ma keia ke haawiia aku nei ka hoolaha i kekahi mea. a i na kanaka apau, he nau kuleana mamua a e kuleana nei paha i kela manawa ma kekahi ano iloko o ka hui i oleloia, e pono e waiho mai i na ku-e ana no ka aeia aku o ka palapala noi i oleloia maloko o keia keena ma, a i ole mamua ae o ka la 21 o Mei, 1923, a o kela ame keia mea e makemake ana e hooloheia aku maluna o ia mea, he pono e hoea kino ae ma ke keena o ka mea nona ka inoa malalo iho maloko o ka Hale Mana Hooko, ma ka hora 12 awakea o ka la i oleloia, a e hoike mai i ke kumu, ina he kumu kekahi, i wahi e ae ole ia aku ai ka palapala noi i oleloia.
HENRY C. HAPAI,
Puuku, Teritore o Hawaii.
Honolulu, Maraki 12, 1923.
6547—Mar. 15, 22, 29; Apr. 5, 12, 19, 26; Mei. 3, 10, 17.
TERITORE O HAWAII
Keena o ka Puuku, Honolulu, Oahu.
Ma ka hana e hoopau ana i ke KAHULUI WHOLESALE LIQUOR COMPANY, LIMITED.
OIAI, o ke KUHULUI WHOLESALE LIQUOR COMPANY, LIMITED, he hui ia i kukuluia a e ku ana malamo a ma ka mana o na kanawai o ke Teritore o Hawaii, i kulike ai me ke kanawai i hoomakaukauia ma na hana o keia ano, ua waihoia mai iloko o keia keena he palapala noi no ka hoopau ana i ka hui i oleloia hui pu me kekahi palapala i hooiaioia i hoohui pu ia me ia, elike me ia i koiia ai ma ke kanawai.
NOLAILA, ma keia ke haawiia aku nei ka hoolaha i kekahi mea. a i na kanaka apau, he nau kuleana mamua a e kuleana nei paha i kela manawa ma kekahi ano iloko o ka hui i oleloia, e pono e waiho mai i na ku-e ana no ka aeia aku o ka palapala noi i oleloia maloko o keia keena ma, a i ole mamua ae o ka la 22 o Mei, 1923, a o kela ame keia mea e makemake ana e hooloheia aku maluna o ia mea, he pono e hoea kino ae ma ke keena o ka mea nona ka inoa malalo iho maloko o ka Hale Mana Hooko, ma ka hora 12 awakea o ka la i oleloia, a e hoike mai i ke kumu, ina he kumu kekahi, i wahi e ae ole ia aku ai ka palapala noi i oleloia.
HENRY C. HAPAI,
Puuku, Teritore o Hawaii.
Honolulu, Maraki 12, 1923.
6547—Mar. 15, 22, 29; Apr. 5, 12, 19, 26; Mei. 3, 10, 17.