Ka Nupepa Kuokoa, Volume LXI, Number 46, 16 Nowemapa 1922 — HAINA NANE. [ARTICLE]

HAINA NANE.

E Mr. Lunahooponopono o ka Nupepa Kuokoa, ke Kilohana Pookela no ka Lahui Hawaii, a o ka ipukukui pioole i na kau a kau; Aloha oe:—E oluolu mai hoi, noʻu kauwahi rumi kaawale o ka hiwahiwa o ka lahui, no ka nane a ke keiki o ka Pali Koolau o Waialua e ninau ana; penei: He inoa koʻu ua kaulana apuni ke ao nei. Owau ka panepoo o na inoa apau o ke ao nei. Ua maheleia kuu inoa elua mahele, ka hapa mua, aia au i na mokupuni apau ina e loaa ole au ilaila, e hoihoi iho no kaua i ke kino i kahi i ku ai ke aloha. Haina. Ka. E loaa no ke ka ma na mokupuni apau. O ia ka mea e penaia ai i na laau uwapo; o ia na ka ipu aiwaha (ipuhaole) ame na ka pu (palaai), ina e loaa ole au ilaila e hoihoi iho no kaua i ke kino kahi i ku ai ke aloha. He mea oiaio, o ka no ka hikimua loa, e loaa ai ina ma ke kamailio ana ma kekahi mau kumuhana, a kamailio e ae paha. Mahele elua. E loaa no au ma na pali hauliuli o ke Koolau. Owau ke kiai makalae o ia mau kakaipali; e nana ana i ke koʻa mokumoku o Heeia. Haina. Ohu. O ka ohu e kau haaheo ana iluna o Konahuanui, a me ia mau kakai pali iho; o ia o Kilohana a hala loa aku i na palena o ia huli Koolau; oia iho la no na kiai o ia makalae, a kaua e ike la i na koʻa mokumoku o ke Koolau. Ke ninau hou nei: Owai ka mahele mua? Ka. Owai hoi ka mahele elua? Ohu. I ka hoohui ana, e loaa ana, Kaohu. Keiki kaulana i ka himeni, e hele la i ka loa ame ka laula o ke ao nei apuni. Ua pa lihi aku la paha oe e J. H. K., keiki o Waialua. Me ka Oiaio, S. K. NAWAIEKOLU, Aole i pa lihi mai la kahi eu o Waialua, ua hala-hu loa mai la i kula huli hou ia mai. O kau haina kekahi e S. K. K. o Kalaupapa i lalau:—L. H.