Ka Nupepa Kuokoa, Volume LXI, Number 46, 16 November 1922 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

Honolulu, T.H. Poaha, Novemaba 16, 1922.

 

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea Manao

Ino---Kau i ke Aki i ka

Manawa Hope

 

            Me ka mama apau i loaa ia Keoni i hooko aku ai i ke kauna a kona hakuwahine, a iaia i hala aku ai lalau iho la ka @@l@ i ka apana pepa e paa ana i ka lima o ke S Wiliama a hookaawale aku la, ke kumu hoi nana i hoomaule i ka ba@oneta opio, a hookomo aku la iloko o kekahi ume laka aku la @@paa, i loaa ole kekahi mea e kamailioia ai no ia palapala mahope iho o ka ninauia ana mai.

            He kakaikahi loa ka poe i ike no ko Sa Wiliama mare ana. @a hamau loa ka Lede Linetona no ia mea iaia wale iho no, me ia loaa mai no nae o na kauoha iaia mai ke Sa Wiliama mai e hoike ae oia ia mea ma ke akea, a mahope o kela hoi @@a mai o ke kaikunane mai kana huakai imi wahine i America a loaa ole ai ka wahine iaia, aohe n ooia i kamailio aku i kekahi poe ua mare oia i ka wahine, no ia kumu i manao mai ai kekahi poe he kanaka mare wahine ole oia.

            No ia kumu i hoopihoihoi ole ia ai ko ka Lede Linetona noonoo aohe mea e ike ana i ka mea pili i ko Sa Wiliama okiia ana mai ka wahine mai.

            I ka hoi ana mai o Keoni i hoounaia ae e kii i ke kauka, kauoha hou aku la ka lede e kii aku oia i kekahi mau kauwa no ka hele ana mai a hapai aku i ke Sa Wiliama iloko o kona rumi moe ponoi, a malaila i hoao ai ka Lede Linetona ame ka wahine malama hale e lapaau i ka mea mai me na laau lapaau e waiho ana maloko o ka hale ia manawa no ka hoopakele ana i ke ola o ka mea i mai.

            He mai piva iloko o ke poo kona i hoike ae ai o Sa Habati, ua maopopo i ka Lede Linetona ke kumu, aohe nae on a hoike ae i kona manao a ma ka helehelena o Sa Habati ma kana nana mai he liilii loa ka manaolana iloko ona no ke ola ae o ko Sa Wiliama mai.

            E waiho iki kaua e ka makamaka heluhelu i ke Sa Wiliama e waiho ana me ka mai a e huli hou ae ka kaua nana ana no Vekinia.

            Ia Vekinia i haalele iho ai i ka hokele mamuli o kona kipaku maoli ia ana aku e Elederida, ka lunanui o ka hokele, kau akula oia maluna o kekahi kaalio a holo aku no kekahi wahi mehameha ku kakaikahi o kauhale, a malaila oia hoolimalima @ i kekahi hale no ka noho ana no kekahi mau la kakaikahi ahiki i ka holopono ana o kana hana e hoolala ai no kekahi wahi okoa ana e nee aku ai.

            Alaila hoike aku la oia i ka lohe i ka banako kahi o kana mau dala i hoahuia ai he makemake oia ehuki i kana mau dala apau ma kekahi la ana i makemake ai.

            I ka hiki ana i ka manawa ana i makemake ai, alaila, kikoo aku la oia i kana mau dala a pau a hele aku la e kuai i tikiki uuku kaa nona no ka holo ana i Kapalakiko, a he pule mahope o ka manawa o ka loaa ana mai o ka leka lokoino a ka Lede Linetona aia oia ke holo la maluna o ke kaaahi o ka Pakipika e hoea aku ai i kona home mua-me ka manaolana mau no ke ko o kana mau mea e hana aku ana, oia hoi ka hooiaioia o kana koi he wahine oia i mareia me ke Sa Wiliama, a e lilo ai hoi ia mau hooiaio ana i mea hoomalu i kana kaikamahine mai ka hewa a mai ka hilahila mai.

            Ua hoea aku la oia i ka manawa hope i kekahi wahi kulanakauhale uuku he mau mile kakaikahi mai kona home kahiko mai-mawaena o na mauna, a laila hoouna aku la i kekahi elele no ke kii ana ia Chi Lu, kahi Pake kuke kahiko a laua no ka holo ana mai e hui me ia.

            Ua loaa ka ike maopopo ia Vekinia no ka hiki iaia ke hilinai aku maluna o Chi Lu no kona hoike i na mea oiaio a pau ana i ike ai e pili ana i ko laua mareia ana.

            I ka loaa ana aku o Chi Lu ua haawi koke mai oia i kona ae me ka hauoli pu no kona halawai hou me kona hakuwahine mua, ka mea ana i malama ai no na makahiki lehulehu oiai oia e noho pu ana me Mr. Abota.

            Ia hoea ana mai o Chi Lu alaila, hoakaka aku la o Vekinia i kona pilikia, pela hoi me kana mau mea apu i makemake ai e hana aku no kona pono a pela me kana kaikamahine, a noi pu aku la i ua wahi Pake la e kokua mai iaia ma o kona holo @na aku i kahi a lakou i noho mua ai a e huli aku ia Makaleka @oleka.

            Ua pono keia i ko Chi Lu manao a ua hooiaio mai oia i kona lilo ana he mea kokua nui ia Vekinia ma kana hana, me ka makemake nui iloko on a e hookoia ka Vekinia mau koi a pau imua o kekahi aha hookolokolo.

            Mahope o ka pau ana o na hana apau ana i makemake ai, a loaa no hoi iaia na palapala a komo iloko o kona mau lima, haawi aku la oia i kekahi mau dala ana i hookaawale ai ia Makaleka Foleka a hookuu aku la iaia e hoi i kona home.

            Eia nae, o ka mea kupanaha i ko Vekinia e ae aku iaia e hele pu me ia ma na wahi apau a Vekinia e hele ai, a elike me kona noho hana ana malalo on a ame kona makuakane pela no oia e noho hana ai malalo ona a me kana bebe, a e lilo laua i mau hakuhana nona ma ia mua aku.

            Aohe on a makemake i ka uku, o kahi uku wale no ana i makemake ai oia ka ai ame ka ia e loaa aku ana iaia, ua lawa @ a pela hoi me kahi e hoomoeia ai o kona poo, a elike me ka loihi o kona makemake ana mai iaia pela no ka loihi ana e noho aku ai malalo on a.

            Ua piha loa o Vekenia i ke aloha i keia wahi Pake kuke kahiko a laua a helelai maoli kona mau waimaka no ka hooma@@@ pu ana ae kekahi no kona luaui i haalele mai ai iaia. Ma keia noi a kahi Pake ua maopopo ia Vekinia kona aloha ame ka hilinai maluna on a, a oiai aohe oia i noonoo i kekahi mea ia ano mamua, alaila noonoo iho la oia he hana naauao @ana ka haawiana aku i kona ae no ke noi a Chi Lu.

            Ua maopopo iaia he Pake hiki pu oia e haawi ia aku ka hilinai, a no ka mea, he kanaka hana no oia i noho hana mua me laua a ua haawi ia aku ka hilinai nona; ua ike ia kona hoopono ame ka hoolohe ma na mea apau, aohe no hoi ana manawa i pakike a i ole i hana ai i kekahi hana ku-e i ko laua mau pono @oko o na makahiki lehulehu ana o ka noho pu ana me laua.

            Aole o keia wale ae la no, aka ua lilo pu o Chi Lu i mea hoopakele a he maluhia no hoi ka mea e loaa ana me ka loaa ole o ka manao hopohopo ke noho pu mai oia me laua, aole e mehameha ka noho ana maloko o kela kulanakauhale malihini @@@a me ka hilinai ole iaia iho hookahi no kona palekana.

            "He makemake no au e hele pu oe me au, hookahi no pilikia au e noonoo nei oia keia, aohe nui o kau dala me au i keia manawa, a ke pakiko loa nei au i kou mau hoolilo i nei manawa, nolaila e ike mai oe he pilikia nui keia ma kou aoao, @@le no ka hoole maoli aku i kau noi, oiai o kou makemake no ia e noho nei aka, aohe paha oe e makemake ana e noho mai @@ana me kahi uku o ka ai wale no ame kahi e moe ai, oiai he mau pilikia e ae no paha ke halawai ana me oe a kaua e ike @le aku nei i nei manawa, a he hana maikai ole nau ka paa ana mai ia oe."

            "Alaila, ua lawe pu anei oia i kau mau dala apau a ko makuakane i hooili mai ai nau?" wahia Chi Lu o ka pane ana mai me ka hulili o na maka e hoike ana i kona piha i ka huhu ia Sa Wiliama.

            "Pehea ka nui o kau dala i koe i nei manawa?" i ninau koke mai ai kahi Pake, i kona ike ana mai i ko Vekinia hoopilikiaia ma ka noonoo no kona nele i ke dala.

            "He eha kaukani a oi iki," i pane aku ai o Vekinia me kona hilinai ia Chi Lu aole oia e walaau wale aku ana no ia mea i kekahi poe.

            "Ua nui kau mau bila aie oiai au e noho ana maloko o ke kulanakauhale o Nu Ioka a ua hookaa aku au ia mau bila apau a ua lilo ka hapanui o hookahi kaukani mailoko ae o ka elima kaukani i hoahuia ai maloko o ka banako e Sa Wiliama nau."

            Ina manawa apau a Vekinia e makemake ai i dala ua hiki iaia ke kikoo i ka banako no ka uku ana i kana mau bila, a ua ike ae nei kakou ma kekahi wahi o keia moolelo no kona kikoo ana i kana mau dala apau i hoahu ai maloko o ka banako ma Nu Ioka.

            No keia pane a Vekinia alaila lamalama ae la ka helehelena o Chi Lu, no ka mea, ike iho la oia he mau dala mahuahua no koe a Velinia e halawai koke ole ai me ka nele.

            "Maikai!" wahi a Chi Lu. "E loihi aku ana no ke ola ana aku o kuu haku wahine! Ua maopopo, ia Chi Lu nei ka mea e hana aku ai no olua!" wahi hou ana o ka pane ana mai.

            Ma keia pane a Chi Lu ua loaa ka manaoio ia Vekinia ina no ka noho pu o Chi Lu me ia e lilo ana oia i kuene maikai a e hoao pu ana oia e pakiko mai i na hoolilo o ka noho ana no laila, haawi aku la oia i kona hilinai iaia a hooholo pu ihola ina no kona makemake e hele pu me ia ua ae oia e lawe iaia.

            He pane hoohauoli loa aku keia a Vekinia i kahi Pake elemakule, no ka mea ua hoike mai oia i ka lamalama o kona helehelena.

            O ka ninau nui i koe a laua e noonoo ai oia ko laua hale e noho aku ai, eia nae, mahope o kona noonoo ana no kekahi manawa, hooholo iho la oia, aole e noho maloko o kekahi hale e ike nui ia mai ai e na kanaka maloko o kekahi kulanakauhale nui, a oiai aohe wahi maloko o Kapalakiko i kamaaina iaia ka maikai ame ka maluhia o ka noho ana, haupu ae la oia no kahi a laua i noho ai me ka makuakane mamua maloko o ia kulanakauhale nolaila, hooholo iho la oia e hoi a malaila e noho ai.

            I kona hoike ana aku i keia mea ia Chi Lu ua apono koke mai oia, nolaila, i ka holopono ana o keia manao mawaena iho o laua, hoi hou aku la o Chi Lu i kahi a lakou i noho mua ai ma Nevada no ka hoolilo ana aku i ka papaihale on a a Sa Wiliama i haawi aku ai iaia ma ke kuai, a ia lilo ana hoi hou mai la i Kapalakiko, a malaila i loaa ai kekahi hale ekolu rumi moe me na rumi e ae, ma kekahi wahi, piha nui ole i ka noho ia e na kanaka, i ole oia e lilo i mea ninaninau a kamailio wale ia, no kona manao malaila oia e noho ai ahiki i ka hookoia ana o kana hoopii okimare.

            I ka loaa ana o ko lakou hale e noho ai, hoolako iho la o Vekinia me na lako hale emi e hoonui ole ia ai na hoolilo o ko lakou noho ana ma ke ano pakiko loa, oiai nae, me ka emiloa o ia mau mea i hoolakoia he ku no i ka nani ame ka maemae ko lakou hale ke nana aku. O ka Chi Lu hana ma ka halekuke a mawaho, a ma na hana no hoi maloko o ka hale ka Vekinia me ka malama pu i kana bepe, a i kekahi manawa e lawe ana o Chi Lu e hooholoholo i ka bebe i loaa kekahi manawa hoomaha ia Vekinia.

            Maloko o keia hale i ike iho ai o Vekinia ua loaa iaia he awalulu a he wahi hoi e loaa ai ka maluhia ame ka palekana, me ka hoouluhua nui ole ia o kona noonoo, koe wale no kona hoomanao ame ke aloha i ke kane ana nae e hookaawale aku ana ma kekahi la e hiki mai ana.

            Ma keia manawa ua ike o Vekinia a apono loa i ka naauao o kona ae ana e lawe pu ia Chi Lu me ia, loaa kona kokoolua aole e mehameha loa ka noho ana o ia hale, ia manawa ua ahewa pu iho la oia i kona hoole ana aku i ke noi a ka wahine malama keiki i noho pu  ai me ia maloko o ka hokele ma Nu Ioka, aka ua hala ka manawa no ka mihi ana.

            Ua hooko o Chi Lu i kana olelo mamuli o kona hookele ana i na mea apau e pono ai ko laua noho ana ma ke ano pakiko loa, a me ia ano ko laua noho ana me ka hauoli a hala he manawa loihi.

            Iloko o ka makahiki mua loa o ko ka lede opio o ka Hitadela o ke ola ana ua haawiia na hana makaala apau no kona ola, a oiai aole o Vekinia i maa i ka malama ana i kekahi keiki ua lilo ka makaala ana i ke ola o kana bebe i hana koikoi i kau iho maluna ona.

            Ia lakou i noho ai maloko o Kapalakiko a hala na malama ekolu a i kekahi la hoakaka aku la o Chi Lu imua o Vekinia no kona makemake e lawelawe i kekahi hana imi pomaikai nona iho, he manao hoi on a a Vekinia i apono loa ai.

            Wahi a Chi Lu ma kana hoakaka ana i kona manao aohe i lawa ka hana nana ma ka home oiai laua e noho pu ana nana e hana ai, ua nui a lawa loa ka manawa nona e hana ai i kekahi okoa aku, pela oia i manao ai he mea pono e loaa i hana e ae nana e hana ai mawaho ae o na hana ma ka home i lilo ai ia hana i mea kokua mai i ko laua noho ana.

            He rumi kaawale aia ma kekahi aoao mai o ka hale a e pili pu mai ana i ka hale a laua e noho ana, a maloko o ia rumi kaawale i makemake ai oia e hoolimalima, in a e loaa mai ana ma ka hoolimalima me ka uku haahaa, o ka hana ana i manao ai oia ka hoolilo ana ia rumi i rumi holoi a aiana lole.

            Ina no ka lilo mai o ia rumi ua makemake oia e hoolimalima i kekahi mau Pake a na laua e holoi i na lole e haawiia mai ana, a ma ka aiana ana e kokua aku ai oia ia laua, he hana hiki loa iaia ke hana i kona manawa kaawale mai na hana e ae o ka home.

            Ua apono loa o Vekinia i keia manao o Chi Lu a ua hoomakaukau koke ia ka hana no ka hookoia o ia manao o Chi Lu, me ka loaa ole nae o kekahi manao hoohuoi iaia no ke kumu o ko Chi Lu makemake, eia ka, i makemake o Chi Lu ia hana i mea e loaa mai ai ke dala no ke kokua a no ka hoolako ana mai ia laua me kekahi mau mea e pono ai ko laua ola ana i ka mananwa e emi loa mai ai ka Vekinia mau dala.

            Ua ike o Vekinia o na wahi kenikeni liilii loa a Chi Lu i loaa aku ai iaia aku aohe i lawa ia wahi uku no ka hana ana i lawelawe mai ai nona, no ia kumu i hauoli loa ai o Vekinia a ae aku la ia Chi Lu e hana i kahi hana nona ponoi i mea nona e pono ai.

            I ka holopono ana o na hana i manaoia hoomaka iho la o Chi Lu e lawelawe i ka hana holoi lole  mahope o ka lilo ana mai o kekahi rumi nui iaia ma ka hoolimalima ame kekahi hale holoi lole, a me ka loaa ana iaia elua mau Pake no ke kokua ana mai iaia ma ia hana, he hana hoi ikeia ka holomua ame ka nui o ka hana me ka nui pu o na pomaikai ma ia hope mai, a i lilo ai hoi ia hana i mea kokua nui mai i ko laua noho ana.

            I kela âme keia la e ikeia aku ana ka lamalama ae o kona helehelena i ka manawa e loaa mai ai ke dala iaia mai ka poe mai no lakou na lole ana i lawe mai ai no ka holoi ia, a e lohe pu ia aku ana kona leo ia manawa i piha me ka hauoli ia manawa i piha me ka hauoli.

            "O maikai! Nui keia mau dala na kuu hakuwahine ame kana bebe, in a e houluulu mau ia ana!" wahi ana.

            I ka manawa i ulu ae ai ke kino o ka bebe a Vekinia ahiki iaia he paani a ke holoholo nona iho, ia manawa i koikoi loa ai ke kau ana iho o ka hana maluna o na poohiwi o ka makuahine.

(Aole i pau)

 

HAINA NANE.

 

            Solomon, ka noeau o ke Kilohana a ka lahui, a i ole ia o ka manu nene ahiu holo hauanu maluna o ka hoku o na ale o ka Pakipika; Aloha oe:--Oluolu hou mai no i kahi kowa kaawale o kou oneki no'u, a ma ua kowa la au i manaolana iho ai, ua hiki mai i ka wa e weluwelu ai ka meahuna a ua keiki la o Waialua ma ke poo o kela hamare kui hao a kui aiana a Sa Naita Heneri o Navala, no ke kolu o ka manawa.

            Aole au e hewa ke kukulu hou aku i ke kino o ua meahuna la a ke keiki heenalu o Kaena, a o ia iho keia:

            He kama kana, a he inoa hoi ua kaulana apuni ke ao, ua apana ia iho ke kino o ua kama la i na mahele elua penei:

            Ka mua, aia ia ma na mokupuni apau, i ole pela, e hoihoi iho no aku i ke kino i kahi a ke aloha i noho ai.

            Ka lua, e loaa ana ia nei ma na pali Koolau ae nei, e nana ana i ke koa mokumoku o Heeia, a e olelo hou ae ana ua keiki la malalo iho, he wahi ia ua kamaaina iaia; a ke olelo nei hoi ka meakakau, ua nele kela peni hulu Kamelo me kela ike no ia mau wahi.

            Ke ike mai la oukou e ka la hiki ae i Makanoni, a ka la pahee i ka ilikai o Lehua, i ke kino o ka nane a ke keiki o Waialua, a ia wa hookahi no nae, e ike like iho ai oukou i ka pili ole o ka haina i manaoia.

            Ke uiui mai nei nae ua keiki la o ka ehukai penei:

            1--Owai kuu inoa ma ka mahele mua?

            Pane. Wati. Wehewehe, maloko o kela mokupuni ame keia mokupuni pakahi i nohoia e kekahi mea kino kanaka, aole loa e nele ia mea he wati, a i ka hoihoi ana ae a hookupono iho i ke kino o ke kanaka e loaa no he wati me ka hehee pu mai no o ka pilali i ka ua.

            Pehea kou manao ana, aohe no ia he pili? Ka! he pili ia, ua kama ia e ka maka o ka peni hulu kamelo, a ua keiki la o ke Kakela, hele kela a pili paewa ole ka la i Papaenaena. Oawi aku auanei ka mea nana oukou e hoonioni aku? Ho! lahilahi loa ke keiki o Waialua wai o ka bia.

            2.--Owai kuu inoa ma ka mahele elua?

            Pane. Kala. Wehewehe ana. He inoa keia no kekahi manu, he kupa, he ewe, a he keiki papa hoi no na moku manu ma na huli Koolau ae nei, a oia nei ka Kawelowai i hoonoho aku ai i kiai loko no na amokumoku koa o Heeia, me ka papa pu ana aku i ua kiai loko la ana, e huna loa ia ka lua manalo a laua.

            Uwese mai olua, he ua no Hilo, e pee wale no olua e Kawelowai ma a anahulu ka la ia Olowaku, aole olua e pakele ana, a no ka mea, o Hilo nei e, kau ka Hoaka, eha ke Ku eha ka moe, momomoe auanei i ke kai o ko haku, a kua omaka mai, pa ai i na poho paakai, e waiho ae la no ma kai o Puna; uanii na ai o olua.

            3.--Owai kuu inoa pololei ke huiia na mahele elua? Pane. "Waki Kala." He inoa keia i kaulana ma ka waha o na lahui kanaka apau, i loaa ka naauao, a he kaulana hoi kona i hiki loa aku i na welelau o ka honua, a o kona lono, ua kaahele ae ia apauni ke ao, elike no me ka manao maloko o ke kino o ka mea ui a ke keiki o Waialua.

            Pehea papani aku la paha ke o, holu ka aina i ka iwi kikala o ko Waialua keiki, e kala no hoi ka hoahanau i pahapaha aku ai ia oe, e kapae ke kaua e ke hoahanau, alaa ka hewa la o ka paakiki, he make a no ka mea,

            A ka lae o Kalaau,

            Huai ka puka moae,

            He moae ko na Kona,

            He Hoolua ma Koolau,

            Ilaila hui na makani,

            O ka welelau ae auanei o kela makani,

            O ka welelau o keia makani,

            Puili puahiohio lele ae la Waialua,

            Aia la, aia i kai.

            Nana mai no e Kawelowai i pii ka ohu o ko aina a hanai maluna o Kaala me Konahuanui, ola oe ma ka apua, aka i kokolo aku ka uwahi o Kula, he hau a papale ka uhiwai maluna o na kuahiwi o ko aina, hoomanao ae no, ua pulupulu kukui wela, ke ahi aulima, a ua keiki la o ke Kakela, ma ke kikala o ko Waialua kini, a no ka mea, no ka waa iki ka make, pau pu me ka waa nui.

            Kou no a mau,

J.W. K. KAKELAMALUIKALEO,

            Keiki o ka Peni Hulu Kamelo.

 

            Ea, pakele mai la no kahi eu o Puaena, ua pulelo aku la no ma ka puka a Kaniho, nolaila iliki hou ia mai a kanono!--L.H.

 

            HE HOOMAIKAI NUI.

            Ke haawi aku nei au i kau mau hoomaikai nui palena ole ia oukou e na mana koho baloka o Maui,

Molokai i hui pu ia me Kalaupapa, ame Lani, no ka hanohano a oukou i haawi mai ai iau no ka elima o ka manawa.

            Na ke Akua e malama a kiai ia kakou apau a hui hou aku no.

            Ka oukou Kauwa no,

                                    LEVI L, IOSEPA,

            Waialua, Molokai, Nov, 9, 1922.

 

HOOHENO NO HAALILIO

He lei a he wehi no Haalilio,

Ka hoc alakai o ka lahui.

Ua poniia oe e ka lehulehu,

I elele lahui i Wakinekona.

Nau i nai iho nei na mokupuni,

Na kai ewalu o Hawaii nei.

A hoea loa aku i Amerika,

I ke aupuni nui aiwaiwa.

Ilaila hoi oe a e hana ai,

I pono kaulike no ka lehulehu,

O oe hookahi kau i ka hano,

Ka nai aupuni Demokarata,

I lima akau no ke Kapitala,

Ka Paredaiso nani o Hawaii nei.

E nai oe i ka pono kaulike,

No ka ili ulaula ili puakea,

E ola na pua o Hawaii nei,

A kau i ke ao malamalama,

Hea aku makou e o mai oe,

O Haalilio kou inoa.

Hainaia mai ana ka puana,

Ka nai aupuni Demokrata.

Hakuia e William Waialae,

 

E Kuai i Kou Mau

Pono Hale

ma ka

Hawaii Furniture Co.

Helu 469 Alanui Moi,

kokoke i ke kihi o ke Alanui Liliha

He oluolu na kukai olelo ana

 

 

"Kopa Moi Keokeo No Ka Mikini Holoi"

He Kopa maikai loa i hiki ke hoohanaia

no na ano hana apau i pili i ka home.

Hiki ke holoi i na lole nahenahe loa me

ka pilikia ole. O kona oi loa aku o ka

maikai no na mikini holoi--No ka holoi

i na pa âme holoi hale.

KUAI I PUOLO MAI KOU MEAAI MAI

T.H. Davies & Co., Ltd.

Na Akena Wale no no ka Paeaina Hawaii

 

"Hoao i ke Kope Kona Kamehameha"

Ke kope maloko olaila kona mau ano

 maikai kumu apau, i hoomoaia me ke

 akahele loa, i wahi e moani ai ke ala,

a hookomoia aku iloko o na puolo ame

na kini, e komo ole ai ke ea iloko olaila

--o ke Kope Kona Kamehameha ia.

E nana i ka hoailona melemele. He

ono a mikomiko ka hoailona Kamehameha

i kupono i na Hawaii. Hiki ke

loaa ia oe ma na puolo o 1-paona a i

ole ma na kini o 5-paona.

AMERICAN FACTORS, LIMITED.

 

"O ke Kanaka Kuai i na Lako Hana Maikai ua Lanakila

e no Oia i ka Hapa o ka Hakaka"

Aole hiki ia oe ke lawelawe i na hana maikai me na meahana inoino.

O ke kanaka e hoao ana e hana me na meahana inoino, e hoea

mai ana i kona wa e kiola ai, a kuai i na mea kupono, in a he noonoo

oia. Aka nae ua poho wale ka manawa ame ke dala ma ka hana ana pela.

Ke kuai nei o Lewers & Cooke, Ltd., i na lako hana maikai wale no.

KE MALAMA NEI MAKOU HE AHUA PIHA PONO LAULA O NA

LAKO MAHIAI AME NA LAKO KUKULU HALE

He Makemake Paha Kou i

KO'I, KIPIKUA, KOPALA, HO, HAMARE, PAHIOLO, KOI LIILII, NA

LAKO KAMANA PIHA PONO, HOANA HOOKALA, PAKEKE.

Papa o Kela âme Keia Ano, na Lako Heo, Pena, Aniani

Kakau mai a i ole kipa mai no na hoakaka. E hookoia no na

kauoha apau ma ka leka me ke akahele ame ka hikiwawe loa.

LEWERS & COOKE, LIMITED

Honolulu

 

"Na Io Pipi Momona Waeia Mai na Aina Hanai

Pipi Like Ole Mai o Hawaii Nei"

O eia io pipi momona, ka papa maikai hookahi ma ka makeke, a ke kuai

hoolilo nei makou, ma ke kumukuai haahaa, me ka hoopono maoli.

Eia keia mau kumukuai malalo loa iho o ko na makeke e ae, a hui pu iho

me na kulana maemae e hoohanaia nei e makou ma ka lawelawe ame ka hoahu

ana i na io pipi, he mea pono e lilo ko makou makeke i makeke nou.

Pipi Ku Mokupuni …………………………..15c o ka lb. 
 Kulana Aoao o ka Pipi……………….15c o ka lb. 
 Kuekue Pipi…………………………..121/2c o ka lb. 
 Pipi Palai Iwi Hoehoe……………………………15c o ka lb. 
 Pipi Palai Uha…….15c o ka lb. 
 Kulana Aoao Koala.……………..151/2c o ka lb. 
 Io Hipa Ku…………………………..10c o ka lb. 
 Io Umauma o ka Hipa………..10c o ka lb. 
 Io Hoehoe Palupalu………………………….121/2c o ka lb. 
 WAIUBAKA MAILE……………..50c o ka lb.

METROPOLITAN MEAT MARKET

E ninau no LUI; he oluolu na kukai ana ma ka kaua olelo makuahine.

Hele mai, mai hilahila!