Ka Nupepa Kuokoa, Volume LXI, Number 45, 9 November 1922 — Page 8

AOAO NO NA MANAO PEPA                                                      NA MOOLELO HOONANEA, NA NUHOU KALAINA

SOLOMON HANOHANO, LUNAHOOPONOPONO                                                      ME NA NUHOU O KA MANAWA

 

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA HONOLULU, T. H.,   POAHA, NOVEMBA 9, 1922

 

KA HOPENA O KE KOHO ELELE

            Ua hoea mai kakou, i ka hopena o ka paio hahana, i hooukaia. maluna o ke kulana elele lahui i Wakinekona, mamuli o ke kohoia ana o William P. Jarrett i elele lahui mai Hawaii aku nei i Wakinekona, ma ka Poalua aku la i hala, a haule hoi o John H. Wise.

            Oiai nae, ua kakoo aku ke Kuokoa ia John H. Wise mamuli o kona kupono, aka i kona lanakila ole ana maluna o Mr. Jarrett, ma ka pahu balota, ke haawi aku nei keia papa i na hoomaikai kiekie ana ia Mr. Jarrett, no kona hapaiia ana ae e ka hapanui o na mana koho o keia Teritore ma kekahi kulana ano nui loa iloko o ko kakou hookele aupuni kuloko ana.

            He mea oiaio, o ka lanakila i loaa ia W. P. Jarrett ma ka Poalua aku la i hala. he lanakila ia i haawiia aku iaia e na Repubalika, malalo o na kumu i maopopo ole i keia pepa, koe wale no ke kiola ana i ka lakou moho ponoi iho, a haawi aku la i ko lakou mau baloka ia Mr. W. P. Jarrett.

            Aia no he mau kumu hoohuoi ma ka aoao o keia pepa, no ka mea a na Repubalika i hana aku ai, ma ke koho baloka o na elele. o ia no ka pau ole o na kawelewele kalaiaina, o ke kau koho wae moho aku nei i hala, mawaena o na Repubalika iho; aka nae he mea makehewa wale no ka uwe ana iho iloko o keia manawa. a e haawiia hoi na kakoo ana apau, ia W. P. Jarrett, ka mea a ka hapanui i koho aku ai i elele na Hawaii nei i Wakinekona.

            O ka ninau no ke kanaka kupono i elele i Wakinekona mai Hawaii aku nei, he ninau ia i ili aku ai maluna o na mana koho ka hooholo ana, nolaila o ka makemake o ka hapanui ka kakou e nana aku ai, aole o ko ka poe kakaikahi.

            He haawina a o maikai loa nae keia no na alakai o ka aoao Repubalika, e ike iho ai lakou. aia wale no ka poe ko'iko'i a kuonoono iloko nei o ka aina a ku mai iwaho, me ka hooikaika ana i ka lanakila o na moho Repubalika apau, alaila hiki i ka elele Repubalika ke lanakila.

            Ua lilo keia kohoia o W. P. Jarrett i mea hookahaha aku. aole wale no i ka manao o na Demokarata, aka o na Repubalika pu no kekahi; ma keia ano nae i lilo ai ko W. P. Jarrett mau ano ame kana mau hana o ka wa i hala i kumu kokua nui aku no kona lanakila ma ka pahu baloka.

            Ma ka manawa a na Repubalika i kukulu mai ai ia H. A. Baldwin. i moho elele lahui, ua haawi aku na Repubalika ko'iko'i iloko nei o ka aina. i na kakoo piha ana iaia, o ka hopena i ikeia, o ia no kona kohoia ana, me kekahi heluna baloka kiekie loa. i ike mua ole ia. ma ka moolelo o ke koho elele lahui ma Hawaii nei; he hoike oiaio loa keia, no ka huliamahi ana o na Repubalika apau e koho iaia ka mea hoi i ike ole ia ma ke koho baloka o ka Poalua nei, i ka wa i lilo ai o John H. Wise i moho na ka aoao Repubalika.

            Ua hanini aku la nae ka waiu; ua hoea mai la hoi kakou, i ka hopena o ka paio no ke kulana elele lahui, o ka hana naauao ma ke aoao o ko kakou mau alakai kalaina kuloko. o ia no ke kapae ana ae i na manao maikai ole apau, a kokua aku. ma na alahele apau. no ka holopono o na hana a ka Elele W. P. Jarrett ma Wakinekona, no ka pono o Hawaii nei.

            Aole he mea a ka Kuokoa nei e mihi ai, no kona kahua i ku ai maluna o ka ninau elele. iloko o ka hoouka kalaiana i hala aku la. a i ka lanakila ole ana o kana moho i kakoo aku ai, ke lawe mai nei ia i kona haulehia me na manao maikai, me na kalokalo ana hai. no ka ukaliia o na hana a ko kakou elele lahui hou me ka holomua.

 

KE KUPANAHA O KE KOHO ANA A NA MANA KOHO

            Ma ka Mokupuni o Oahu nei, keu aku ke kupianaha o ke koho ana a na mana koho. o ia ka ikaika o na moho apau o ke aoao Repubalika. no ka ahaolelo kuloko, a nawaliwali loa hoi ka moho elele lauhi no Wakinekona.

            Ua ikeia keia ma na mahele i noho mana ia e na Demokarata ame na mahele i noho mana ia e na Repubalika; ua haawi aku na Demokarata i kekahi mahele nui o ko lakou mau baloka. i na moho o ka aoao Repubalika; a hui pu iho hoi me ke koho pololei o na Repubalika. i ka lakou mau moho iho, ua hiki old in moho Demokarata ke lanakila maluna o na moho Repubalika.

            O ka loaa ana o ka lanakila i na moho Repubalika o ka apana elima. no ka hale o na lunamakaainana, aole ia mamuli o ka ikaika o ko laua aoao kalaiaina, aka mamuli o ko laua kokuaia ana mai, e kekahi mahele nui o na Repubalika; nolaila he kupaianaha keia o ke ano o ke koho ana o na mana koho, i ka lakou mau moho.

            I ka nana aku, ua like ole ka noonoo o na mana koho, no ke kulana elele lahui i Wakinekona, ame ke kulana o ko kakou ahaolelo kuloko; in a i makee na Repubalika, a pela me na Demokarata i kela mau kulana a elua, ua maopopo loa e like ana ka ikaika huki i na moho. aole nae pela ka mea ikeia. ma ka moho elele i Wakinekona, ua komo aku na Repubalika, e kokua i ka lanakila o ka moho Demokarata, a i na moho Repubalika hoi. no ka ahaolelo kuloko, ua komo mai na mana koho Demokarata e koho i na moho Repubalika.

            O keia iho la no nae ke ano o ka kalaiaina, e lanakila ana kekahi aoao, a e haule ana kekahi aoao, elike no me na hana paonioni apau; nolaila e hoao kakou e hoopoina i na mea i hala aku la. a e nana aku i ka hana, a ka poe a kakou, i hoolilo aku la i poe kauwa na ka lehulehu.

 

KEKAHI HOOPONOPONO AHAOLELO KUPONO

            Ma ko kakou kanawai e ku nei i keia manawa, ua papaia ka lawelawe ana o na lahui, aole lakou he mau makaainana Amerika. i na hana aupuni, in a ia e hoohanaia ana e ke aupuni, a malalo paha o ka aelike.

            Ma keia ano, ua noa na hana aupuni i na Pilipino, no ka mea he mau makaainana Amerika lakou, ma o ke kaa ana aku o na mokupuni Pilipine malalo o ka hoomalu ana a ke aupuni o Amerika Huipuia.

            O ka like ole nae o na Pilipino makaainana Amerika, me na Hawaii. a mau lahui e ae paha, i lilo he mau makaainana Amerika, o ia no ka hiki ole i na Pilipino ke koho baloka; a oiai o ka mana koho baloka kekahi mea ano nui, iloko o na aoao kaiaina o kakou. he mea pono no, e noonooia kekahi hooponopono ahaolele, e pili ana i kekuleana ana o na Pilipino i na hana aupuni.

            Ua kauka'i aku ka pono o kekahi heluna nui o na makaainana Hawaii maluna o na hana aupuni, mai na hana o ke Teritore. a na hana o na kalana o kakou; i ke kaa ana aku nae o na hana malalo o ka poe lawe ailike. ua kiiia aku la na Pilipino i mau limahana. aole e hiki ke papaia aku ko lakou hoohanaia. oiai e hamama ana ka puka, no ka hoohanaia o na makaainana Amerika.

            E haawiia ka hana i na makaainana koho baloka wale no e pono ai. no ka mea iloko o ka wa kalaiana, o na baloka o ka poe i kuleana i ke koho baloka, ka i ake ia mai e na moho oloko o ka ahaolelo. o keia ke ana kaulike. i pili loa aku iloko o ke kumu ame ka mole o ka hana kalaiaina.

            Ua pono loa ka lawelaweia ana o na keehina i wahi e uku ai na luna oihana o ke Teritore ame na kalana o kakou, i ko lakou mau auhau. i hoohemahemaia no kekahi mau makahiki. Aole o lakou ke ohi i na uku mahina nunui o na dala a ka lehulehu. ma ka hookaa ana nae i ko lakou auhau, he keu a ka hoohemahema maoli, a i ka poe, e hana ole ana malolo o ke aupuni. aka e hooikaika ana ma na hana ikaika, me na ukuhana haahaa. o lakou iho la ke hoomanao mau i ko lakou mau auhau kela ame keia makahiki. E lilo ka hana, ma ka aoao o ke keena auhau, i kumu alakai no keia mua aku, i ole ai e ala hou mai na koi auhau kaa ole, ma keia mua aku.

PAU OLE NO KA POHIHIHI

            Oiai, ua emi mai ka nui o na baloka i kiolaia, ma na mahele koho o kakou, apuni keia Teritore, ma ka Poalua aku la i hala, aia no nae he mau baloka i kiolaia, ma ia ano he hoike maopopo loa ia, no ka mau no o ka pohihihi o kekahi poe, i ke kaha ana i ko lakou mau baloka.

            O ka hemahema nui loa i ikeia ma ke koho baloka aku la i hala. a i kiolaia ai hoi kekahi heluna nui o na baloka, o ia no ke kaha ana, a oi wale aku i ka heluna o na moho i makemakeia.

            O na hemahema o na wa koho ae nei i hala, e laa ke kaha ana maloko mai o ke kuea, a mawaho paha o ke kuea, aole he ikeia ma kekahi mau mahele koho, he hoike keia, no ka lilo o na hoonaauao ana i na mana koho, iloko o na la aku la i hala, i mau mea waiwai; a in a e hoomauia aku ana ka hoonaauao ana i na mana koho ma keia mua aku, e hoea mai ana no i ka wa e emi mai ai ka nui o na baloka kiolaia.

            He hookahi nae kumu i naauao ai ke kaha ana o ka hapanui o na mana koho i ko lakou mau baloka, o ia no ko lakou paa pu ana me na baloka hooikaika o na aoao kalaiaina, ma keia mahele, i ikeia ai ka makaala ame ka makaukau kalaiaina o ke aoao Demokarata, ua ikeia ka pololei o ke kaha ana i na moho Demokarata wale no; aole keia mamuli o ka naauao o na mana koho, aka no ka loaa mua ana o na baloka hoohalikelike i kaha mua ia; o ka lakou hana wale no, o ia ke kaha ana i ko lakou mua ia; o ka lakou hana wale no, o ia ke kaha ana i ko lakou mau baloka. elike me na kaha e kau ana maluna o na baloka hoohalikelike, no kela ame keia kulana oihana pakahi.

            E hoea mai ana nae, i ka manawa e waiwai ole ai kela mau baloka hoikeike in a e loaa i'o ana ia kakou ka naauao ma ke koho baloka ana, o ia no ka nana ana i na moho ma ko lakou aoao kalaiaina, a kau aku i ke kahape'a mamua aku o na inoa o na moho iloko o na kuea i hookaawaleia.

            O kekahi hemahema i ike mau ia i na wa koho baloka apau i kaahope aku nai, a i ike hou ia no hoi ma ke koho baloka aku nei i hala, o ia no ke kaha ana o kekahi mea i kona baloka, a holoi hou i ke kahape'a, alaila hana iho la i kahape'a hou. O ka mea pono e hana ai, e hoihoi mai i kela baloka i hewa. a e noi aku i na lunanana i baloka hou.

            E hoopau i ko kakou ano naaupo, ma ka hoao ana e hana me ka makee i ka pono koho baloka, me ke ano e kiola ole ia ai ma kiea mua aku.

 

KA POLOLEI ANA O KE KEKEE I HANAIA

            Ina no hoi he ulu i'o ke kenikeni (10 keneta) ke kanuia, elike me na a'o kalohe a na makua i na keiki liilii o na wa i hala, elike me ka mea e palapala nei i keia; in a ua hauole ka ohi ana i na dala mai na lala laau mai i ulu ae mai ke kenikeni mai.

            Ma ko'u wa kamalii, a ma kekahi manawa ua haawi mai na makua a i ole ka hoaloha o ko'u mau makua ia'u i ke kenikeni; a ma ka hele ana ma-o a maanei iloko o na hana a kamalii, a hoi mai, ninau mai la na makua i ke kenikeni, me ka manao o na makua e maopopo ka'u mea o ka hana aua me ia kenikeni. Ua iho koke iho la ko'u mau lima iloko o na ki-eke apau, mai ke ki-eke a'u no i hahao iho ai i ua wahi kenikeni nei, a me na ke-eke e ae apau o ka ili alualu me ka mae iho o ka helehelena e nalowale ole mai ai i na makua. Hoka wale iho la no au, a ninau na makua: Aia ihea ko kenikeni, eke keiki? Pane aku la au me ka nawaliwali o kahi leo: "Ua haule ia." Eia ka olelo a na makua, i poina ole ia'u ahiki i keia la: "E ulu ana!" Moe a kakahiaka, ala ae e hele aku e hooma'u wai i kahi i haule ai, i ulu koke ae."

            Ua hana naaupo aku au i keia mea, elike no me ke ano o na kamalii, malalo o na a'o kolohe a na makua; a aole au i ike i ka ulu ana ahiki wale i keia la a'u e palapala nei. No keia mea, ala wale ae la no kahi noonoo i ka waiho mai o na aina hoopulapula, a manao iho la, in a i'o i ulu na kenikeni o ka nalowale ana ma kuu mau la kamalii, in a awau ka mea mua e lulu i keia anoano maikai he kenikeni, a e makaala no au i ka'u mala i ke ao ame ka po ahiki i ko'u ohi ana i na dala mai kona mau lala mai, ma na aina o Molokai. Ke kuko keia a Keonihoomanawanui.

            Ke noonoo pono iho no hoi kaua, e kuu mea heluhelu, aia i'o no he man dala nunui e loaa ana, mai na hua mai o na laau au i kanu aku ai me keia kumukuai he kenikeni. Aia na opeope anoano liilii o na hua meaai ma na halekuai hua ai, elike me Davis & Co., California Feed Co. a pela aku, a e loaa no ma keia kumukuai he kenikeni.

            A nolaila, i hakalia wale no ia oe e ka mea noho aina i ke kuai aku ia mau anoano a onou aku iloko o ka lepo. I lohi wale no i ke kali aku o ke oo mai, o ka ohi no ia i na dala nunui mai na hua mai e kau ana ma na lala. He lapaie loa ka lawelawe ana o na hana hooulu laau ma Molokai, i oi aku i ka'u a ko'u wa kamalii no kahi kenikeni i nalowale ai. Me ka pakeke wai ia o ka'u ohikihiki ana. O keia ana o Molokai, he mau auwaha wai nunui i hanaia e moe ana ma ka loa o ka aina a mai ia auwaha mai, moe aku na auwaha liilii iloko o kela ame keia mahele aina. He wai e holo ana nona ka ikiaika o 2,500,000 galani i kela ame keia 24 hora.

            He luhi ole na hana a na kini o keia mau aina o keia mua koke iho. He mau mea no e hauoli ai ka naau o na makua e hoi aku ana ilaila. He oiaio no e ohi ana no oukou e na noho aina i ka momona o ka aina ma keia mua iho, a na oukou auanei e hoolawa mai i ke kulanakauhale nei me na meaai; mai ka moa ame kona hua; ka i'o pipi ame kona waiu; ke i'o puaa ame kona aila puaa, a he lehulehu wale aku. O keia ke ola hou ana o ka aina ame ka lahui.

 

NA MARE

            Kelii Kalauloa ia Kekua Hipa, Oct. 16

            Harvey Imaikalani ia Elizabeth Kaiwi, Nov. 2

 

NA HANAU

            Na Ned R. Bevins ame Carnation K. Kekuhiwa, he keikikane, Iulai 30.

            Na James K. Keawe ame Hannah Akana, he kaikamahine, Oct. 27.

            Na P. Dole âme Emily K. Kekoa,  he kaikamahine, Oct. 28.

            Na Jas. Matsugaro âme Elizabeth Kaluakini, he keikikane, Oct. 29.

            Na Joseph K. With ame Rosalie Asani, he kaikamahine. Oc. 29.

            Na Geo. M. Lovell ame Julia Kealoha, he keikikane, Nov. 2,

            Na Samuel Kama âme Lily Ledward, he kaikamahine,

 

NA MAKE.

            Kahuwai Kane, ma Kaimuki, Oct. 30.

            John Frank, ma ke aalnui Jack, Nov. 1.

            Koleka Makekau, ma ke alanui Sheriden, Nov. 1.

            Geo. Robertson Jr., ma ke alanui Kalihi, Oct. 2.

            Simeon Kalawaia, Halema'i Moiwahine, Nov. 2.

            Kakaola, Halema'i Moiwahine, Nov. 3.

            Alfred K. Kane, ma ke alanui Kulika, Nov. 4.

 

NA LEKA I KII OLE IA MAI AHIKI I NOV. 4, 1922.

Aikona, Moses            Kapahua, Mas.

Akalaka, Mary                        Keahi, William

Akana, John                Kealohapauole,

Haia, Mrs. Sarah                     Mrs. H.

Haupu, Joseph             Koo, Mii

Henelita, Miss             Kuikahi, A. K.

            Kalani              Kupa, D. W. Kaalekahi

Hono, Mas. Jashua      Kupihea, Hon. & Mrs. D. M.

Kaae, Jesse K.             Lani, John

Kaakua, Mrs.              Lopaki, M. R.

            Maggie                        Tiue

Kaiona, Sol.                Mahi, Miss Pickie

Kahala, Mas.               Maialoha, Mrs.

            William                        Sam

Kahoonei, K. M.         Maikai, Mrs. R. K.

Kaikauna, Mr. &                    

            Mrs. D.           Maunakea, James

Kailiuli, Mrs.               Maunakea Miss

            Louisia                                    Martha

Kailiuli, Moku             Napua, Mrs.

Kalani, Peter                           Emily

Kaluakini, Mrs.           Nuuhiwa, Mrs.

            W.D.                           Rosie

Kamana, Mrs. J.          Paka, Mrs. Tom

            K.                    Poli, Susie

Kamalani, Jonah          Puulei, John

Kamalani, Mrs.           Solomona, Mr.

            Abbie (2)

Kanae, Mrs.

            Edith

            E ninau mai ma na leta i hoolahaia ke kii mai.

                        D. H. MacADAM, Lunaleka

 

NO KA NAHA ANA O KA PAHU AILA KE KUMU O KE AHI.

            No ka naha ana o ka pahu aila i kaumaha loa i ka aila o ka mokuahi City of Honolulu a kahe ka aila a loaa ke ahi iloko o ka rumi enekini ame ka rumi e hoaia ai ke ahi, ke kumu o ka poino ana o ia mokuahi i ak mahina i hala, a pau ia mokuahi i ka aia e ke ahi a i hoopiholoia ai hoi mahope iho mamuli o kona ki pokaia ana e kekahi o na moku kiai awa o los Angles.

            He lono keia i laweia mai i Honolulu nei e kakahi ohua maluna mai o ka mokuahi Matsonia o ke ku ana mai ma ka Poalua iho nei, mahope o kona kamailio pu ana me kekahi luna o ka papa kapilimoku ma Kapalakiko mamua iho o kona kau ana mai i ka moku.

           

NUHOU KULOKO

            Malie ka Poalua nei, ka la koao baloka, mai ke kakahiaka ahiki i ka pau ana o ke koho baloka.

 

            Nui ka hauoli o ka poe i koho a lanakila o Jarrett, a kukule hoi ka poe i koho ia Wise a lanakila ole.

 

            He luau nui ka na Demokarata e haawi ana ma kekahi wahi o keia kulanakauhale ma ka auwina la o keia Poaono iho.

 

            Ua hoopaneeia ka hoopuka ana aku i na manao no ka aoao hoopulapula ma keia pepa, no ka loaa ole o ka rumi e komo ai.

           

            Ua hoohauoli ia na mea apau ma na wahi koho baloka me na leo himeni ame na meakani a na puali himeni lehulehu a na Repubalika.

           

            O na wahi koho baloka oi aku o ka walaau o na Pukiki ame kekahi mau Demokarata kakaikahi, oia kahi koho ma ka Paka Mauumae, Kakaako, a ma Kapalama.

 

            O kekahi o na hana hoohaunaele a na Demokarata ma na wahi koho baloka o ka Apana Eha, he kaa otomobile me kekahi poe himeni me ka ohe saxaphone.

           

            O na pohaku akoakoa pukapuka i ikeia ai mamua aku nei ma na paia owaho o Kawahao, ua hunaia aku i nei manawa me ka aahu konakalika, he laumania wale no ke ike ia aku nei.

 

            Me ka nana ole ae i kona haule ana e mau aku ana no ko Wise noho ana ma ka Aoao Repubalika, a i ka manawa e hiki mai ai no ka hana e hooikaika ana no oia no ka holomua o ka aoao kalaiaina.

           

            Elua hapakolu o 432 mau wahine i hoopaa i ko lakou mau inoa maloko o ka Mahele Eono, "Ka Apana Kakini Kilika, " he pakeneka kiekie loa keia. Elima pakeneka o ka huina nui i manaoia ua hele a ua make paha.

           

            Mai ka puka ana o ka la o ka Poalua nei ahiki i ka manawa i paa ai na pahu baloka e ike mau ia ana na kaa otomobile me ka inoa o William P. Jarrett e kau ana me na hua nunui.

 

            He ula wale no na umauma ame na papale o na kane ame na wahine Demokarata i na lipine me ka inoa o William P. Jarrett e kau ana ma ka Poalua nei.

           

            Mai keia manawa aku, ua wehe hamama hou ia ka buke hoopaainoa no ka poe kupono i ke koho baloka, maloko o ke keena o ke kakauolelo kulanakauhale.

 

            No kakahi mau makahiki, akahi no ma keia koho baloka, i kaa ai i na moho Repubalika o ka apana elima, ka hapanui o na moho lanakila, aohe no he wa, a lanakila holookoa na moho Repubalika apau.

 

            Me he mea la, aole kamailio nui iloko o keia mau la, mahope o ka hala ana aku la o ke koho baloka laula, o ka lanakila wale no i loaa ia W. P. Jarrett, no ke kulana elele lahui i Wakinekona.

 

            No ka piha hauoli loa o na alakai Demokarata no ka aha'i ana o ka moho elele lahui o kela aoao kalaiaina, i ka lanakila i keia kau, ua haawi manawale'a ae lakou i na meaai no ka paina luau e haawi ia aku ana e na Demokarata no ka poe i hooikaika ai a puka ka lakou moho elele.

 

            Ma na hoike i loaa mai nei no ke koho baloka ma Amerika, ua loaa i na Demokarata he 28 mau moho hou iloko o ka hale o na lunamakainana, me ka mahele hapalua, o na senatoa mawaena o na Repubalika ame na Demokarata.

 

            E malama ae ana ka Ahahui Pa Ilina o Kalaepohaku, he halawai ma ka hora elua ma ka hapa, o ka auwina la o keia Sabati iho, ma ka home o D. Maunakea, a ua makemakeia na lala apau o kela ahahui e hoea ae ma ia halawai, no ka hoolohe ana i ka hoike a ke komite i kohoia ai, no ka huli ana i na buke a na lunanui o ka ahahui.

 

 

HALE O NA ALII O HAWAII.

            Ke kauohaia nei na Mamo Alii apau o ka HALE O NA ALII O HAWAII (Ahahui Poo) e hiki ae ma Kamaki Kuea i ke kakahiaka Poaono, Novemaba 11, 1922, i ka hora 10 ponoi, me na AHU, no ke komo pu ana ma na Hana Hoomanao Haipule e malamaia ana no ka poe i molia i ko lakou ola no ko ke ao nei.

            Ke kono pu ia nei na Mamo o na Halau, e hui pu mai ma keia anaina.

            Ma ke Kauoha a ka Iku Lani Hoano:

                                                                                                            W. J. COELHO,

                                                                                                                        Iku kau.

 

NUHOU KUWAHO

            NU IOKA, Nov. 7. -- Elima mau nupepa, ekolu o lakou he mau nupepa Repubalika, i hoike ae i keia ahiahi no ke kohoia ana o A. E. Smith, he Demokarata, haule ke Kiaaina Nathan L. Miller, ma ka paio ana no ke kulana kiaaina o Nu Ioka.

 

            KIKAKO, Nov. 7.-- Ua ikeia ma na hoike i hoihoiia mai ma ke koho baloka o ka po nei no ke Kalana Cook, o na Demokarata ka oi aku o na paloka, ma kahi a na Repubalika e hoomalu ana i ke aupuni, aneane ma kahi o ka elua ia hookahi.

 

            KANSAS CITY, Nov. 7-- Ma na hoike hapa no ke koho baloka i hoihoiia mai na kalana mai ehiku no ka paio ana no ke kulana kiaaina he 2234 baloka i haawiia no Davis, he Demokarata, a he 1564 no Moirgan, he Repubalika, i keia la.

 

            WAAWAA KE POO O KAKAHI PAKE I KA WA I HAKAKA AI.

            No ka lili o Chin Yin ia Lau Long he mau Pake holoi lole, ua ala ae he hakaka mawaena o laua maluna o ka Mkuahi Matsonia a o ka hope o ia hakaka ana oia ka waawaa ana o ke poo o Lau Long. Ma ka hora 8:30 o ke kakahiaka Poalua nei kela hakaka ana. ua laweia ae o Lau Long i ka halema'i Moiwahine a o Chin Yin hoi i ka halepaahao.

            Ma ke kakahiaka Poalua nei ua pii like aku la keia mau Pake no luna o ka Mokuahi Matsonia no ke kii ana i na lole lepo o na kanaka hana o ka moku no ka lawe ana ae i ko laua mau hale holoi no ka holoi ana. ia laua maluna o ka Matsonia ua pau loa no kanaka ia Lau Long a ua piha loa o Chin Yin i ka huhu no kona nele ana, a i mea e hookoiaa ai kona manao lili na ku'i mai la oia ia Lau Long a hina o Lau Long a pa kona poo i ka peleki hao, a molu ka ilipoo a kaheawai mai ke koko. Ua laweia ae ka mea i eha i ka Halema'i Moiwahine, a i kona nanaia ana e ke kauka i ikeia ai ua waawaa kona poo a he kulana kuhaiki loa kona.

            Ua paaia o Chin Yin ma ka halepaahao no ke kali ana aku no ko Lau Long hopena.

 

I NA MANA KOHO O KA APANA SENATOA EKOLU

            Ua pau na hana hakoko kalaiaina. O ka hana pono a naauao ma ka aoao o na moho, a pela no hoi ma ka aoao o na makaainana, o ke kapae ae i na manao ku-ee a paonioni kalaiaina, a nana aku imua no ka pono a pomaikai e loaa mai ana ma o na moho i kohoia i wahaolelo no ka lehulehu.

            No'u iho, aohe hoohalahala ana. Anoai paha, he manawa e hiki mai ana, e hoihoiia mai ai ko'u mau luhi me na hooikaika ana no ka elele lahui, ka oihana pookela hoi o keia au malihini a kakou e noho nei.

            Maluna on a au e paulele nei. Ua hoike mai ka hapanui o na mana koho i na hilinai piha i ka Elele Lahui i kohoia.

            O ka lanakila i loaa i ke Aoao Demokarata, ma ke kau koho balota nui i kaahope aku la o 1922, ma o ka Elele Lahui William P. Jarrett la, o ka hookahua ana no ia ma ka Teritore o Hawaii, no ka manawa mua loa, i aupuni no ka lehulehu, ma o ka lehulehu, a no ka lehulehu.

            No na kakoo i haawiia mai ia'u, ka panai aku nei i ko'u mau mahalo a hoomaikai palena ole.

                        C. P. IAUKEA,

Moho Senatoa Demokarata i Haule.

 

            Aia a hiki mai ke ola i na kanaka, hoomaka ka haunaele iwaena o lakou. He mau kupaa loa keia i na lahui kanaka i loaa ole he puka a pomaikai no ke kumupaa.

 

            A loaa ka pomaikai ia kakou maluna o na aina hoopulapula, heaha ana la ka kakou halelu.

 

            O na aina keia e noho ai (aina hoopulapula), pau ka pono o ka poe hoopukapuka aina. Aohe kuai lilo aku a kuai lilo mai. E nalo aku ana ia mea hoopilikia i na pua o Hawaii.

 

E Kuai I Kou Mau

Pono Hale

Ma ka

Hawaii Furniture Co.

Helu 469 Alanui Moi,

kokoke i ke kihi o ke Alanui

Liliha

He oluolu na kukai olelo ana

 

LANAKILA NA MOHO REPUBALIKA MA HAWAII.

            HILO, HAWAII, Nov. 7. -Ma ka pau ana o ka heluia ana o na baloka ma keia Mokupuni, i huiia o Hawaii Hikina ame Hawaii Komohana, he 3028 ka nui o na baloka i loaa ia William P. Jarrett, ka moho Elele Demokarata, he 2421 no John H. Wise, moho elele Repubalika i ka Ahaolelo Lahui.

            Ua haule ino loa o J. H. Keawehaku, kahi moho hookahi ma ka aoao Demokarata ma keia Mokupuni, no ke kulana lunamakaainana.

            Oiai ka ua e haluku ana ma keia kulanakauhale, he mea ole nae ia i na kanaka, e ake ana e lohe i na mea hou koho baloka. I ka wa i loaa mai ai o ka lono no ka lilo ana ia William P. Jarrett ka lanakila, ua ikeia ka piha hauoli o na kanaka mai o a o o ke kulanakauhale, me ka malamaia ana o kekahi kaihuakai nui.

            Ma na mea i hoomaopopo ia, aia ma kahi o elua hapakolu o na mana koho i hele ae e koho baloka ma keia la. Ma kela ame keia wahi o ke kulanakauhale, he mea ha'o ole ka ike mau ia ana aku o na kalapu himeni, na kaa otomobile ame na kanaka hooikaika o Jarrett e hooikaika ana i ka lakou moho.

            Ma ka mahele o ka poe oihana kalepa maloko o ke kulanakauhale nei he 484 mau baloka i loaa ia Jarrett i ka 310 no Wise. Ma Waiakea, he ekolu i ka hookahi ka ikaika o Jarrett; ma na aina home hookuonoono, he 52 baloka kona oi maluna o Wise. Ma ka aina hanai holoholona o Parker, he 122 baloka i loaa ia Jarrett a he 57 ia Wise.

            Ma na mahele o Makapaia, Honomakau, Kahauloa ame Pahala o na mahele wale no ia i lilo mai ia Wise.

            Ua kohoia o Rev. S. L. Desha Sr., ame William C. Vannatta, he mau Repubalika no ke aha senate no ke kau o eha makahiki. Ma Hawaii Hikina, ua koho ia na moho lunamakaainana Repubalika Richard W. Filler, Thomas Pedro, Jr., Capt. Evans da Silva ame George H. Vicars, me ke kue ole ia. Ma Hawaii Komohana, he hookahi wale no moho lanamakaainana Demokarata i holo ku-e i na moho Repubalika, eia nae ua koho ia o Francis K. Aona. Emil Muller, Charles K. Stillman Jr., ame Robert Wilhelm, he poe Repubalika wale no.

            O Senatoa Desha, na Lunamakainana Silva, Aona ame Muller i kohoia iho la i mau hoa no ka aha olelo, he poe lakou i noho mua maloko o ia hale. No Senatoa Vannatta hoi, he hoa oia no ka Hale o na Lunamakaainana i kela kau aku nei, a o ka hapanui iho i koe he poe hou wale no.

 

HOOPAA KA ELELE IAIA IHO E HAAWI I KA MEA MAIKAI

            "o kuu makemake kuio oa oia ka loaa ole iho i ka poe mana koho o Hawaii ka noonoo kaumaha no ko'u kohoia ana no ke kuiana hele," wahi a William P. Jarrett ma kana haiolelo ma ka po Poaha nei mailuna mai o ke kaa otomobile ana e ku ana, imua o ka ahakanaka nui e ku aku ana me na manao ahahia nona a e koi aku ana laia hoakaka mai i kona manao ma kekahi mau mea mahope o kona lanakila ana.

            "E hana aku ana au i na mea apau maloko o ka mana i loaa a'u e kaumaha ole ai ka pe na akau i koho mai ia'u no ko'u kohoia ana.

            "E hooko aku ana au a e hana aku ana hoi i mea e loaa mai ai na pomaikai oi loa no ke teritore me ka hooikeike pu ana na manawa a pau e lilo ai i mea paahana waiwai no ka hanohano nui i haawiia mai ia'u." Ua haawiia aku he mau loa huro ma ia manawa e ka ahakaraka i piha me ka hauoli no kona lanakila ana.

 

HOOLAHA LULU MANAWALEA HELU 15.

            Ma keia ke kauohaia aku nei na lala apau o ka Ahahui Kalama o uku koke mai'i ka auhau manawalea o Hookahi Dala ($1.00) no ko kakou hoahanau Mrs. Kauhane Kenahee i haalele mai i keia ola ana. E hoomaka ana kaohi ana mai Novemaba 2, 1922 a pau i Dekemaba1 1922, o ia hoi he 30 la.

            MRS. A. P. CHUNG HOON.

            Kakauolelo Ohi Dala, Ahahui Kalama.

            Honolulu, T. H. Nov. 2, 1922. 6529-- Nov. 9. 16.

 

            I NA MANA KOHO O KA APANA ELIMA:

            E ae oluolu mai oukou e lawe aku i ka'u mau hoomaikai palena ae ana ia oukou no na baloka kickie a oukou i haawi mai ai ia'u ma ke koho baloka i lula iho la ma ka la 7 o Novemaba.

            O wau iho no o

GEORGE KEKOA AH NEE

 

LIBERTY THEATER

E Hoomaka Ana i Keia Po, No Ekolu Po:

Marv Miles Miltner ilk o "SOUTH OF SUVA"

"FROM THE FARM."

Ukukomo: 25, 40 Keneka; Noho i hookaawaleia, 60c.

 

EMPIRE THEATER

KE Paani Nei:

TOM MIX ilk o "THE NIGHT HORSEMEN."

"A PAIR OF SEXES."

 

Ukukomo: 15, 25, 40 keneka; ukuia ka auhau kana.

 

STRAND THEATER

E Hoomaka Ana i Keia Po:

NEAL HART iloko o "THE RANGE LAND."

ART ACORD iloko o "WINERS OF THE WEST."

Ukukomo: 15, 25, 40 Keneka; ukuia ka auhau kana.

 

NEW PALAMA THEATER

Ma keila hale hoikeike e ikeia ai na kii maikai me ka lilo mau o ka papakuhikuhi i kela ame keia po

Hele mai i pau kuhihewa.

Hoikeike ae: 5, 10, 20 Keneka: Po. 10, 15, 20, 30 Keneka.