Ka Nupepa Kuokoa, Volume LXI, Number 44, 2 Nowemapa 1922 — Halawai Elua Haole Lele Moku Me Ka Make Weliweli Hooku'i Elua Mau Mokulele a Haule Malalo ae Nei o Puuloa me ka Make Ana he Elua a Pakele Elua ma ka Apua [ARTICLE]

Halawai Elua Haole Lele Moku Me Ka Make Weliweli

Hooku'i Elua Mau Mokulele a Haule Malalo ae Nei o Puuloa me ka Make Ana he Elua a Pakele Elua ma ka Apua

Ma lalo aʻe nei o ke kahua hoʻomo-1 ana o na mokulele o ka ʻoihana koa o ʻAmelika, ma Luke Ficld, Puʻuloa, i halawai aʻe ai he ʻelua mau haole koa lele mokulele, me ka make, mamuli o ka hooku'i ʻana, o ka mokulele a laua e kau ana me kekahi mokulele ʻokoʻa aku, me ka loaʻa ʻana ; o na poʻino kukonukonu, i na mea e kau ana ma luna o ka ʻelua o na mokulele, a ma ka ʻapua wale no ka pakele ʻana mai o ko laua mau ola. Ma ka manawa o ka hooku'i ʻana o na mokulele a ʻelua i kahi hoʻokahi, e hoʻomaʻamaʻa ana kela mau moknlele a elua, i luna o ka lewa, ma kahi o 200 kapuaʻi ke kiʻekiʻe mai ka honua aʻe; a maluna pono aʻe hoʻi o kahi i hoʻopaʻaʻia ai o ke--kahi kao nui, ma ka uwapo ma Puʻuloa. Ma hope iho o ka lele hoʻomaʻamaʻa ʻana o na mokulele ʻelua no kokahi manawa, me ka loaʻa ʻole he ulia, ua hoʻomaka maila kekahi o kela mau mokulele, e hoʻemi i kona lele ʻana, no ka hoʻi ʻana mai i lalo, ka manawa naʻe ia, i hooku'i aʻe ai na mokulele, a ʻelua i kahi hoʻokahi, a i loko o ka manawa pokole loa. ua haʻule like maila na mokulele a ʻelua i lalo. Ua haʻule pono kekahi o kela mau mokulele i luna o ke kao, me ka nahaha o ka ʻenekini, a me ke kinoo ka mokulele, a ma kekahi mau ʻano i maopopo ʻole, ua hoʻopakele ʻia ke ola o na mea ʻelua e kau ana ma luna o kela mokulele, eia naʻe, ua nui na poʻino i kau aku ma luna o ko laua mau kino. No ka ʻelua hoʻi o na mokulele,

ua haʻule i loko o ke kai, me ka paʻa loa o na mea ma luna o ia mokulele, ma lalo o ka mokulele, i loko o ke kai, a i luʻu maoli ia, i hiki ai ke hemo ko laua mau kino make, he ʻekolu hapaha hora ma hope mai. No na haole lele moku, i hoʻopakele ʻia mai ai ko laua mau ola, ua hoʻihoʻi ʻawiwi ʻia aku laua no loko o ka hale maʻi, no ka lawelawe ʻia mai o na lapaʻau ana e hoopakele ʻia aʻe ai ko laua mau ola. He hoʻokahi o laua i haki kona wawae, me na poʻino ʻe aʻe he nui ma luna o kona kino, a ua koho wale ʻia aku, ua poina paha kekahi mau mea paʻahana o loko o kona kino. No ka ʻelua iho hoʻi o na haole i ʻeha, ua haki kona ka, a me kekahi mau poʻino ʻe aʻe he nui. Ua hoʻolala ʻia kela mau haole lele moku, e huli hoʻi aku no ʻAmerika, ma ka la mua, o keia mahina, halawai e ihola naʻe me ka poʻino, a he hoʻokahi hoʻi o na haole i halawai ai me ka make, i hoolala ʻia kona hoʻololi ʻia aku he wahi ʻokoʻa e noho hana ai, ua kikoʻo ʻia maila naʻe kona ola e ka make. He ʻekolu o kela mau haole lele moku, he poʻe wahine ka lakou me na keiki, a he hoʻokahi wale no o lakou, i mare ʻole i ka wahine, eia naʻe he makuahine kona e ola mai la ma ʻAmerika. Ma hope iho o ka make ʻana o kela mau haole, ua hoʻihoʻi ʻia mai ko laua mau kino no loko o ka hale waiho kupapaʻu ʻo Williams, me ka hoʻouna ʻia aku o ka lohe i na ʻohana o kela mau haole ma ʻAmerika, no na mea e hana aku ai ma luna o ke kino make, ina paha no ka hoʻouna ʻia aku i Amerika.