Ka Nupepa Kuokoa, Volume LXI, Number 38, 21 September 1922 — Elima Makahiki Ka Paa Ana o ka Poka i ke Poo Lilo Nae Kela Poka i Kumu no Kekahi Wahine Kepani e Ma'i ai a Make HIKI OLE KE WEHE I KA POKA MA KE POO Hoalaia Mai na Hoomanao Ani no Kekahi Hana Karaima Kahiko i Lawelaweia [ARTICLE]

Elima Makahiki Ka Paa Ana o ka Poka i ke Poo

Lilo Nae Kela Poka i Kumu no Kekahi Wahine Kepani e Ma'i ai a Make

HIKI OLE KE WEHE I KA POKA MA KE POO

Hoalaia Mai na Hoomanao Ani no Kekahi Hana Karaima Kahiko i Lawelaweia

Mahope iho o ke ola ana mo ka paa no o ka poka iloko o kona poo no na makahiki elima, i make ai he wahine Kepani o Wasa Kawarooto ka inoa, maloko o ka Halema'i Moiwahine ,ma ka Poakolu o ka pule aku nei i hala. Mamuli nae o ka make ana aku la o kela wahine Kepani i ala mai ai na hoomanao ana no kekahi hana ki-pu i lawelaweia mawaho ae nei o Kahala, i ka makahiki 1918, 0 ia no ke ki ana o kona makuakane i kana ipo aloha a make, a pela hoi me ka laua keikikane o ekolu makahiki, a ki iaia me ke komo ana o ka poka ma koea poo, a law:e okoa ae kela makuakane ona 1 kona ola iho. I kulike ai me na oleloike i waihoia ae ma ka manawa i malamaia ai o ka aha kiure koronelo nioniele kumu make, ua noho keia wahine Kepani me kana kane, me ka mare ole no kekahi manawa loihi, a ua loaa ia laua he hookahi keikikane o ekolu makahiki. I ka wa nae i lohe ai o ka makuakane, aole i mare kana kaikamahine i ke kanaka e noho pu ana me ia, ma ke ano he kane nana, ua hoea aku la ua makuakane nei no kahi o kana kaikamahine e noho ana ma kahi o Schuman ma Kahala, a ki aku la i ke kane manuahi a kana kaikamahine, pela hoi i kana keiki, alaila ki ae la i ka pu i kana kaikamahine, a no kona manau pa ha, ua pau loa kela poe ekolu i ka make, ua hoohuli ae la oia i ka pu panapana iaia, a lawe ae la i kona ola iho. Aole nae i make o Wasa Kawartioto, aka ua hoihoiia oia maloko o ka Halema'i Moiwahine, malaila oia kahi i waiho ai me ke aumeume ana o ka make ame ke ola, no na mahina ekolu, ahiki i kona ola ana, me ka hoi ana aku a noho ma ka home o kona mau hoaloha. Ua manao no na kauka e wehe i ka poka, aka mamuli o ka nihinihi loa o kahi e oki ai i ke poo, ua waihoia no kela poka pela; aole no hoi he pilikia i ikeia no kela wahine Kepani, ahiki he eono ae nei pule i hala, ua loaa oia i ka ma'i niua ma ke poo, a hoihoiia no ka Halema'i Moiwahine, malaila oia kahi i lapaauia ai ahiki i kona make ana, me ka paa no o ka poka iloko o kona poo.