Ka Nupepa Kuokoa, Volume LXI, Number 27, 6 July 1922 — Page 8
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
KA POE I WAEIA NO KA HOI ANA MA MOLOKAI.
He ewalu mau ohana a ke Komisina Home Hawaii, o ka wae ana ae, maiwaena mai o ka poe noi he kanahiku a oi, no ka hoi ana aku e noho ma na aina o Kalamaula, malalo o ke kanawai hoopulapula; eia nae he ekolu wale no o kela mau ohana e hoi mua ana, mamuli keia o ka uuku loa o na apana aina, i pau i ka hoomaemaeia; aka e hoi aku ana no ke koena iho o na ohana i waeia, ma ka manawa e hoomaemaeia ae ai na apana aina e ae.
He hana maalahi loa no ka hoi koke ana aku o na ohana, a ke komisina i wae ae ai no ka noho ana ma kela mau aina hoopulapula o Kalamaula, aole nae i manao kela komisina he hana naauao ia, aka e hoomaemae mua ia kekahi wahi o ka aina, i hiki ai ia lakou, ke hoomaka koke aku i ke kanu ana i ka lakou mau meakanu, no ka hoolako ana mai i ka lakou mau meaai, aole hoi o ka hookuu wale aku ia lakou, me ka lilo o kekahi manawa nui, ma ka homakaukau ame ka hoomaemae ana i ka aina, e kupono ai no ke kanu ana aku i na meakanu.
Ua maopopo loa ka manao makee iloko o ke Komisina Home Hawaii, e holomua ka hana hoopulapula ma na aina o Molokai, ma o ka pupuahulu ole ika hoihoi ana aku i na kanaka Hawaii maluna o keia mau aina o Kalamaula, me ko lakou ike maopopo no, i ka paakiki, o ka noho ana aku o na kanaka malaila, iloko o ka manawa mua loa.
O ka hoomaemae mua ana i hookahi eka o kela ame keia apana aina, me ka hoolako ana i ka wai, ame kekahi mau mea e ae e pono ai ka noho mua ana aku o ka poe hoopulapula, he hana ia, e hiki ole ai ia kakou na kanaka Hawaii nei; koe wale no ka hooikaika kino ana aku o kela ame keia ohana, ma ka mahi ana i ka aina, a e pau ke kauka‘i ana aku, na kekahi poe e hana mai, ma ke ano hoolimalima.
Eia kekahi hana ku i ka naauao a ke Komisina Home Hawaii i lawelawe ae ai, o ia no ka wae ana, i kekahi poe kanaka ma na ohana nui, pela hoi ka wae ana ae, i ekolu paha o na Hawaii, ma ke ano o ke koko iloko o lakou, ka nui o ko lakou mau ohana, ame ka nui o ko lakou mau makahiki.
He mau hana hoao nae keia a ke komisina, i hiki ai ke ikeia, ke kulana oiaio loa iwaena o keia mau papa like ole o na Hawaii; no ka mea ma ka hopena o keia hana hoopulapula ka mea e nana nui ia aku nei, iloko o na makahiki mua elima. O ka holomua o ka hana hoopulapula iloko o kela mau makahiki, o ka hoomauia aku ia o ak loaa ana aku o na aina ia lakou, me ka maalahi, mahalo o keia kanawai hoopulapula.
Pehea nae ka opiopio, ke oo paha ame ka awiliwili o ke koko iloko o kakou na Hawaii, i haawiia mai keia pono, ma ke kanawai hoopulapula; he hookahi no alahele e loaa ai ka holo mua o ka noho ana aku ma kela mau aina hoopulapula, oia no ka hooikaika maoli ma ka hana ana i ka aina; e loaa pu hoi ka manao hoomanawanui ame hoomakaulii. Aia a huiia keia mau mea ekolu, alaila aole loa he kanalua ana no ka holoniua ame ke kuonoono o ka noho ana.
E kaokoa loa ana ka noho ana aku ma kela mau aina hoopulapula, mai na ano i kamaaina i ko ke kulanakauhale nei poe, a i ka poe paha o na kuaaina e ae. Ma keia hoi ana aku e noho ma Molokai, aole he kauka‘i ana aku, no na kokua mai na ohana mai, a mai na makamaka mai paha, aka e konoia ana ka wahine ame kana kane, e huli aku, mawaho ae o ko laua manawa hana i ka aina, i kekahi mau mea, e kokua mai ai i ka noho ana o ka ohana.
E hooneleia mai ana na makua ame na keiki, i na mea i maa ia lakou, i ka noho ana ma ko lakou mau home kahiko, na wahi i lako me na mea apau e oluolu ai ka noho ohana ana; nolaila aia ahiki ia lakou ke hoomanawanui, ma ke kapae ana ae ia mau mea maa, a lawe mai i na mea i malihini i ko lakou ola ohana ana, alaila e ukali i‘o ana ka holomua ia lakou, a e hooia ae ana ke ano kupono o ko lakou ola ana.
O keia manawa mua loa no, ka manawa ano puikaika o ka noho ana aku, i ka maa ana aku auanei i ka noho ana, me ka maopopo i na ano maalahi o ka huli ana i na mea e pono ai maloko o ke kai, a mauka o ka aina, e hoomaalahiia mai ana no ka noho ana, mahope aku, a e lilo ana no hoi ia noho ana, i mea hauoli.
Malalo o keia loina a ke Komisina Home Hawaii e lawelawe mai nei, ua maopopo loa, o ka poe me na ohana keiki nui, o lakou ke loaa koke ana na aina hoopulapula; no kela mau ohana, ina aole e wae koke ia ae ana lakou, alaila e hoomanawanui, a e hoomau aku i ka hoomakaukau ana ia lakou iho, i hiki mai no ia o ke kauoha no ka hoi ana i Molokai, e malo‘elo‘e auanei ke ku ana ae o na waewae iluna, a ka‘i aku no ke Kanaana hou, ka puuhonua o na kanaka Hawaii e kauia aku nei no keia nee ana aku.
KA HOOKUKU HIMENI O KA AHA PAEAINA.
O ka hookuku himeni kekahi o na hana ohohia nui ia iloko o ka Manawa e noho ai o ka ahahui paeaina. He hookuku hoi i hele mai ai na puukani amen a loea himeni, main a wahi like ole mai o keia Teritore.
Ua hoea mai kela hana ma ka po o ka Poalima aku nei i hala, maloko o ka luakini o Kawaiahao, me ka loaa ana i ka lehulehu apau i hoea ae ma kela po, he Manawa maikai loa, e lohe ai i na himeni nani, i meleia mai e na papa himeni i komo ma kela hookuku ana.
Ma kekahi ano ke olelo ae, aole he kohu o ka hana hookuku, no ke alualu ana i na makana i kulukuluia mai, mamuli o ka wae mua ole ia ana ae o kekahi himeni hookahi, na na papa himeni e mele mai ai. O ka haawiia ana aku na kela ame keia papa himeni a wae i kana himeni ponoi iho, no kela hana hookuku, he hana hiki pono ole ke haawiia ka olelo hooholo pololei; koe wale no paha ka haawiia aku o ka makana a mau makana paha in a papa himeni, mamuli o ka u‘i ame ka nani o ka lakou mau himeni; oiai nae ina paha o ka himeni hookahi ia, e meleia mai ana e kekahi mau papa himeni e ae, e oi aku ka nani o ke meleia ana mai.
Ma na makahiki mua ae ne ii hala, o ka hoomaka ia ana mai o keia hana hookuku himeni, ua waeia he hookahi himeni a na papa himeni apau e mele mai ai; a ua aha‘i aku na papa himeni, i komo ia mau hookuku ana i na makana, me na manao mahalo, aole wale mai ka poe i komo kino iloko o ka hookuku ana aka mai ka lehulehu aku kekahi o ka poe makaikai.
Ua lilo ka helu ekahi o ka hookuku himeni ana i ka papa himeni o Kalihi ma keia kau o ka aha paeaina, elike me ka hooholo ana a na lunakanawai; he olelo hooholo nae, i hilki loa ke ikeia, i ke kulike ole me ka manao o kekahi mau kumu okoa, aka no makaikai, aole keia malalo o kekahi mau kumu okoa, aka no ka lilo ole ana, i hookahi himeni a na papa apau e mele mai ai.
Eia hou keia pilikia ma keia hana hookuku, e pono ai e hoopauia ae o ia no kea no o ka wae ana am eke koho ana, i na lunakanawai na lakou e haawi mai i ka olelo hooholo, i ka papa himeni i kaa ai o ke eo o kela hookuku ana. Aole he mea maikai ka waeia o na lunakanawai, maiwaena mai o na lala o ka ahahui paeaina, ma o na apana la, a ma na mokupuni paha, na wahi he mau papa himeni kekahi i komo iloko o na hana hookuku; aka e kohoia na lunakanawai maiwaena mai o kekahi poe ike himeni, i kuleana ole iloko o na hana o ka aha, a i na papa himeni hookuku paha.
Me kela ano, ke manaoio nei keia pepa, e oili mai ana he olelo hooholo kaulike, a e loaa aku ana hoi ka makana, i ka papa himeni, i ike maoli ia aku ka nani ame ka maikai o ke mele ana mai i ka himeni hookuku.
O kekahi keia o na hana maikai loa, i hoalaia ae, i na manawa apau e noho ai o ka ahahui paeaina, i mea e hoomauia aku ai keia hana maikai, e pono e laweia ae na alahele kaulike apau, e loaa ole ai na manao hoohalahala ma kekahi ano.
Aole i hoea mai ka papa himeni o Molokai, no ke komo ana iloko o ka hookuku himeni ma keia kau, no ke kumu, aole he himeni hookuku i waeia ae, no ke alualu ana o na papa, himeni i ka makana, ina pela iho laka mea oiaio, alaila mamua o ka ukali ana aku o kekahi mau papa himeni e ae, ma ia alahele hookahi, e lawelaweia na hana hoopakele apau, e hiki ai ke ku mau‘aku keia hana i na manawa apau.
KA HOOKUKU MAKAI KIEKIE.
Ua wae ae nei ke kiaaina i ka inoa o John C. Lane, no ke kulana makai kiekie no ke Teritore, no ka hoopiha ana aku i ka makalua i hoohakahaka iho, ma o ka pau ana o ka hookohu o ka Makai Kiekie William P. Jarrett.
He mau Hawaii no keia a elua, aka nae elike me ke ano mau o na hana kalaiaina apau, pela iho la i kikoo mai ai ke kiaaina ia Mr. Lane, ma kona ano he Repubalika, a kapae aku la hoi ia Mr. Jarrett, no kona Demokarata ana.
Me keia kikoo ana mai la o ke kiaaina ia Mr. John Lane no ke kulana makai kiekie no keia Teritore, ua kukulu mai ioa i ka ninau aoao kalaiaina, o ia ka mea mua, a mahope aku ke kulana makukau o ke kanaka, a ma kekahi olelo ana ae hoi, na ka hana e a‘o mai i kekahi mea, i na makaukau no kana oihana.
Ua mahalo nui ia o William P. Jarrett, no ke ano o kona malama ana i kana oihana, kona mau ano oluolu, a hana maikai i na paahao, a he mea minamina no, ke kaawale ana aku o kekahi kanaka i ikeia kona kupono no kela oihana; aka nae, ke manaoio nei ke Kuokoa, aia no iloko o Mr. John C. Lane ia mau ano maikai, a na ka hana auanei e hoike mai, aole i kuuhihewa keia manao o ke Kuokoa.
Ke mannaia nei no hoi keia pepa, ia Mr. John Lane e hoi aku ai a noho ma kela kulana oihana hou, e huki pu aku ana oia i kekahi heluna nui o na Repubalika, no ka hoopiha ana aku i na kulana i paaia e na Demokarata, no na makahiki loihi; a ma kekahi olelo ana ae paha, he hana kuapo keia mawaena o na Demokarata ame na Repubalika, a kakaou e hoohalahala ole ai, oiai o keia iho la no ke ano o ke kalaiaina, mai Amerika mai la hoea i Hawaii nei.
Ua kakali ka aoao Repubalika me kahoomanawanui, i loko o na makahiki i kaa ai ka hoopnopono aupuni kuloko ana malalo o na kiaaina Demokarata, a i ke kau ana ae nei he kiaaina Repubalika ma ia wahi, aohe mea a na Demokarata e hookekee iho ai, no ka mea ua loihi ko lakou ai ana i ka momona ai a lawe mai i ko lakou mahele o na pomaikai, iloko o na hana kalaiaina.
"Na ka aoao lanakila e puunauwe i na waiwapio," o keia ka olelo maa ia kakou iloko o na hana kalaiaina, no laila aia no hoi a hoea mai i ka manawa e kaa ai ka noho kiaaina hou ana i na Demokarata, alaila aoha a na Repubalika mea e hana aku ai, o ka wehe wale aku no i ka papale, no ke kunou ana aku i ke kanaka e pani ae ana, ma kahi i paaia e ka Repubalika.
Nuhou Kuloko
Me ka Mauna Kea o ke kakahi aka o nehinei i huli hoi aku ai na lala o ka papa himeni o Hilo, pela hoi me na lala o ka aha paeaina, mai Hawaii Hikini mai.
Me ka mokuahi Maui o ke ku ana mai ma ka Poalua iho nei i huli hoi mai ai o H.H. Williams me ka lehu o kana wahine, i make maluna o ke kaaahi, oiai laua e holo ana no Nu Ioka.
Eia no ke waiho nei ke kupa‘i o na palapala a na makamaka i hoouna mai ai i keia keena, a no ka loaa ole o kahi kaawale o ka nupepa, pela hoopaneeia ai ka hoopuka ana aku ahiki i ka wa kupono.
He ekolu haneri me iwakalua-kumahiku ka nui o na ohua o ka holo makaikai ana no Molokai ma ka Mauna Kea o Poalua iho nei, me ka piha hauoli o na mea apau i holo ma kela huakai makaikai.
Ma ka hapalua o ka hora eiwa o ka po o ka Poakahi iho nei i hame ae ai na alelo ana ole o ke ahi, i ka home o Mr. A.I.C. Atkinson, ma lalo ae nei o Puuloa, me ka nui o na poho i loaa mai ma o kela pauahi.
Mahope o ka hoohala ana i kekahi mau pule ma Hawaii nei, no ka naua ana i na aina hoopulapula, i huli hoi aku ai ka Loea Elwood Mead, ma ka mokuahi Manoa o nehinei no Kapalakiko.
He keiki Kepani o 11 makahiki ka i haule mailuna mai o ke kaa kalaka otomobile a kona makuakane e hookele ana, ma ka auwina la o ka Poalua nei, a eha loa, eia nae aole he hophop iloko o kona mau makua no kona palekana mai ka poino mai.
Piha ka Paka Hoohauoli Aloha ma ka Pokiulai iho nei, mai ke ao mai ahiki i na hora o ke aumoe, me ka hoohauoliia o na mea apau i hoea ae malaila, no ka hoohala ana i ko lakou Pokiulai.
E malama ae ana ke Ahahui Pailina o Kalaepohaku he halawai ma ka hora elua o ka auwina la o keai Sabati iho, ma kahi o Dan Maunakea; ua makemakeia na lala apau o ka ahahui e hoea ae ma kela halawai.
Me ka hora umi o ke kakahiaka o keia Sabati iho e hoea mai ai he ekolu mau mokukaua a‘o koa Kepani no Honolulu nei, me ka hoohala ana o na luina ame na aliikoa, he mau la ma keia kulanakauhale, ma mua o ka hoomau ana aku i ko lakou alahele moana.
Me ka hora elua o keia auwina la e kau mai ia ka Lunakanawai Kaapuna James J. Banks i ka hoopa‘i maluna o Herbert A. Truslow, o ke ahewaia ana ma ka Poalima aku nei i hala, no ka hewa lawe kolohe i ka waiwai i haawiia aku nana e malama.
NA MAKE
Lawrence Ke. Lono ia Abigail Mahoe, Iune 22. Henry Lau ia Annie K. Cooper, Iune 24. Wm N. Kahai ia Mary K. Forest Iune 24. Pung Kwong Ing ia Rachael Aweau, Iune 24. Edward Soong ia Alice Ah Foo, Iune 24. Theodore Dudoit ia Mattie Stephenson, Iune 24. George Holokai ia Alice K.Kamai, Iune 25. Willie A. Lopez ia Hanna Akana, Iune 26.
NA HANAU
Na Charles Kanoho âme Minnie Jeremiah, he kaikamahine, Iune 22. Na Geo K. Kahaulelio ame Lily Manners, he keikikane, Iune 24. Na Fred Reynolds ame Rose Aping he keikikane, Iune 24. Na Leonard N. Case ame Kahili Harrison, he kaikamahine, Iune 26. Na Joseph Molena ame Mary Nahakuelua, he keikikane, Iune 28.
NA MAKE
Moke Kalua, ma ka Halemai Kepani, Iune 20.Keoa K@@@@@@@@, ma ke alanui Desha, Iune 20. Luika Kamahalo, ma ka Halemai Moiwahine, Iune 23. William Titeomo, ma ke alanui Hamohamo, Iune 24. Elizabeth Kaaipoepoe, ma ke alanui 10, Palolo, Iune 26. Eleanor Andrews, ma ke alanui Middle, Iune 27. Ekekela Ah Sam, ma ka Halemai Pupule, Iune 29. John K. Punohu, ma ka Halemai Moiwahine, Iulai 1.
BERLIN, Iulai 1 - E hoakaka ana kekahi hoike mai Gleiwitz mai no ka make ana he 15 poe, a he 25 poe i hoehaia,mamuli o ka hakaka ana o na makaainana Kelemania me na pualikoa Palani. Aia na pualikoa Palani ke kiai la i na alanui.
Nuhou Kuwaho
WAKINEKONA, Iune 29- Ua apono ae ka aha senate i keia la i ka olelo hooholo a ka hale e hoopanee ahiki i Augate 15. Ua manaoia e pau ana na hana ma keia Poaono.
BERLIN, Iune 29 - Ua hoike ae na maikai i keia la no ka hopua ana o Ernest Teichow, ke kiakaa o ka otomobile e halihali ana i ka poe pephikanaka, na lakou i pepehi i ke kuhina kalaiaina, Kauka
Rathenau. He haumana kula o Teichow a he 21 ona makahiki.
SANTA ROSA, Iune 27 - Ma keia la i ahewaia ai o W.R. Cockrill, he loio ame S. Icada, he Kepani, no ka hewa ohumu e ku e i ke kanawai no ka noho ana o na lahui e i ka aina ma Kaleponi, ma o ke kuai ana i ka aina mahiai ma ka inoa o na keiki a Icada.
MARION, Ohio, Iulai 4 - He puulu kanaka nui ka i huliamahi ae i keia la, no ka hookipa ana mai i ka Peresidena Harding, ka manawa mua loa ana i huli hoi mai ai no kona home, mahope iho e ka notoia ana i Peresidena. Ma keia auwina la e haawi ae ai ka Peresidena i kekahi hailolelo.
E LOAA ANA I KO HILO POE HE MAU AINA NOHO
Me ka la 10 o ka mahina Augate e hoea mai ana, e kuai hooliiloia aku ai ma ke kudala i ka lehu lehu, he kanakolu-kumakahi mau apana aina aupuni, ma Piihonua, e kokoke la i Hilo.
HE mau apana aina keia i maheleia ma ke ano i mau wahi noho, no lakou pakahi ka nui o hapalua eka, a no klakou hoi ke kumukuai haahaa i kauia mai ka elua haneri me kanaiwa dala.
Me ke kumu aelike no ke kuai ana i kela mau apana aina, ua hiki no ke uku liilii ia, ke kumukai iloko o eha makahiki, o ia hoi he iwakalua kumalima pakeneka i ka wa e lilo ai, a he iwakalau kumalima pakeneka iloko o kela ame keia makahiki mahope mai, no na makahiki ekolu.
I ka lilo ana o kela mau apana aina i ke kuai ua koiia ka poe e lilo ai, e kukulu i ko lakou mau home, iloko o hookahi makahiki mai ka wa aku i kuaiia ai, eia nae, o kela mau home e kukuluia ana, aole e emi iho na hoolilo malalo o ka hookahi kaukani dala. Mawaho ae o kela kumu i kooia ai ka poe e lilo mai ai o keia mau ana, e noho lakou ma ke ano nohopaa, i hookahi makhiki iluna o ka aina, mamua o ka loaa ana aku o ke sila ia lakou.
Aia a pau kela mau apana ain i ka lilo, alalila e weheia aku ana he mau alanui hou i hiki ai ko weheia kekahi mau apana ana e ae , no ka hoolilo ana kau.
Eia ke hoomakukauia ne kekahi aelike, mawaena o ke keena aina aupuni, ame ke Kalana o Hawaiik no ka wehe ana aku i alanui ma na apana aina hookuonono o Waiakea, in a no ka maikai o kela alanui, alaila ia wa e kua hooliloia aku ai kekahi mau apana he 65, o hapalua eka ka nui, no ka hookuonoono ana o na kanaka, malalo ae la no o na kumu aelike hookahi, me na aina o Piihonua.
NA LEKA KII OLE IA MAI AHIKI I IULA 1, 1922.
Aiona, Mrs. Annie Kapononui, Mas George Iaea, Davide Emmil I. Kawaauhau, Jas. Hart (2) Opunui, Johnny Kawainui, J. K. Hakuole, Mrs. Keanu, Miss Lorita Haili, John Hoopala, Mr. Kolona, John Hoopai, Sam K. Kunane, Miss Alice Kaalua Henry Alice Kaapuni, Sam Kuahulu, Mas. Kaina, Miss Lyda Lolohi, D. Kauweloa, Chas Lililehua, Wm. Kahue, Moses K. Lui, Kia Kahao, Wm. Maiola, John K. Kakaio, P.K. Paul Kamakoa, Mrs. C. K. Mahukua, Daniel Makanai, Mr.s Kalehua Kamakaokalani, Leo K. Naeole, David Noa Kauhai Kamaka,Herman C. Nohoanu, Mr. Palenapa, Jos. Kamaha, Dan Pele, Mrs. Esther Kama, Mr.s Annie Puahi, Kaliko Kanealii, Mrs. R. M. (2) Waialae, William K. Kawahamana, Iana Waiwaihole, John A. Kapakui, Michael
E ninau mai ma na leta i hoolahaia ke kii mai.
D. H. MacAdam, Lunaleta
HOOLAHA KUAI O NA HOOLIMALIMA AUPUNI LAULA.
Ma keia ke haawiia aku nei ka hoolaha akea, ma ka hora 1 p.m., Poaha Augate 10, 1922, ma ka puka komo mamua o ka Haleleka‘o Hanapepe, Hanapepe, Kauai, T.H., malaila e kuai hooliloia aku ai ma ke kudala akea i ka mea koho kiekie loa, malalo o na manao o ka Pauku 73 o ke Kanawai Kumu o Hawaii ame ka Pauku 380, o na Kanawai Hooponopono Hou ia o Hawaii o 1915, na Hoolimalima Laula o na Aina Aupuni mahope ae nei: 1. Apana 23, na Apana Taona o Hanapepem Hanapepe, Waimea, Kauai, nona ka iliaina o 7231 kapuai kuea, oi aku a emi mai paha; manawa o ka hoolimalima, 10 makahiki mai Augate 10, 1922 aku; uku hoolimalima haahaa, $40.00 o ka makahiki, e uku hapa-makahiki mua ia. 2. Apana 26, na Apana Kanu Laiki me Kula o Hanapepe, Hanapepe, Waimea, Kauai, nona ka iliaiua o 8.10 eka, oi aku a emi mai paha; manawa o ka hoolimalima, 10 makahiki mai Augate 10, 1922 aku; uku hoolimalima haahaa, $40.00 o ka makahiki, e uku hapa-makahiki mua ia.
E uku koke ka poe e lilo ai mahope iho o ke kuai, i ka uku hoolimalima o na mahima mua eono, hui pu me ka hoolilo o ka hoolaha ana ame na kaki e ae e pili ana i ka hoomaukaukau ana i na hoolimalima i oleloia.
E kaa aku no ke kua o na Hoolimalima Laula maluna ae, malalo o na ano ame na kulana apau o ka Hoolimalima Laula Aupuni, i hoopukaia e ke Kaena o ke Komisina o na Aina Aupuni.
Eia ke waiho nei na kii palapala aina o ka aina e hoolimalimaia aku ana ame ke ano o ka Hoolimalima Laula Aupuni, ma kahi waho palapala, a e ikeia no ma ke keena o ka Hope Akena Aina, hale Aupuni Kalana, Lihue, Kauai T. H., a i ole ma ke Keena o ke Komisina o na Aina Aupuni, Hale Kapitala, Honolulu, T.H.
No na hoakaka laula, e noi ae ma ke Keena o ku Hope Akena Aina, Mr. J.M. Lydgate, Hale Aupuni Kalana, Lihue, Kauai, T.H. a i ole ma ke Keena o ke Komisina o na Aina Aupuni, Hale Kapitala, Honlulu, T.H.
C.T. BAILEY,
Komisina o na Aina Aupuni.
Honolulu, T.H., Iune 27, 1922.
3611 Iulai 6, 27.
HOOLAHA KUAI O NA HOOLIMALIMA AUPUNI LAULA.
Ma keia ko haawiia aku nei ka hoolaha akea, ma ka hora 10 a.m., Poaha, Augate 10, 1922, ma ka puka komo mamua o ka Hale Kapitala Honolulu, T.H., malaila e kua hooliloia aku ai ma ke kudala akea i ka mea koho kiekie loa, malalo o na manao o ka Pauku 73 o ke Kanawai Kumu o Hawaii ame ka Pauku 380 o na Kanawai Hooponopono Hou ia o Hawaii o 1915, ka Hoolimalima Laula o na Aina Aupuni malalo iho nei:
(a) Ka mahele o ka Aina Aupuni o Lualualei, Waianae, Oahum nona ka iliaina o 695 eka, oi aku a emi mai paka;
(b) Apana B. Lualualei, Waianae, Oahu, nona ka iliaina o 470 eka, oi aku a emi mai paha;
© Apana 7A, na Aina Hookuonono o Lualualei, Waianae, Oahu non ka lilaina o 132 eka, oi aku a emi mai paha;
Huina, 1297 eka, oi aku a emi mai paha; manawa o ka hoolimalima, 15 makahiki mai Augate 10, 1922 aku; uku hoolimalima haaha, $750.00 o ka makahiki, e uku hapa-makahiki mua ia.
E komo ana maloko o keia hoolimalima he pauku e hookoe ana me ke Teritore ka pono hoomoe hawai, na alanui e ku ana ame na moali alanui, maloko o keia mau apana aina, ame kekahi mau alanui e ae, moali alanui, ame na pono alahele, e koiia mai ai no na hana o ka lehulehu; pela hoi me kekahi pauku, e hookoe ana me ke Teritore, i ke kuleana e hoopuka ai i na laikioi no ke oki wahie ana maluna o na aina e hoolimalimaia ana.
E uku koke ka mea e lilo ai mahope iho o ke kuaiia ana o ka hoolmalima, i oleloia, i ka uku hoolimalima, o na mahina mua cono, hui pu me na hoolilo o ka hoolaha ana, ame na kaki e ae apau e pili ana me ka hoomakukau ana i ka hoolimalima i oleloia.
ua kaa aku ke kuai o ka Hoolimalima Aupuni Laula maluna ae malalo o na ano ame na kulana apau o pukaia e kekeena o ke Komisina o na Aina Aupuni.
Eia ke kii palapala aina o na aina e hoolimalimaia aku ana ame ke ano o ka hoolimalima Aupuni Laula, ke waiho nei ma kahi waiiho palapala, a e ikeia no ma kekeena o ke Komisina o na Aina Aupuni, Hale Kapitala, Honolulu, T.H.
No ka hoakaka laula e noi ae ma ko keena o ke Komisina o na Aina Aupuni, Hale Kapitala, Honolulu T. H.
C.T. BAILEY,
Komisina o na Aina Aupuni.
Honolulu, T.H., Iune 27, 1922.
3611 Iulai 6, 27.
AINA ME KA HALE NO KE KUAI
Hale hou i noho mua ole ia me ka aina no ke kua, Helu 226 Alanui Makce Ailana, Waikiki. E ninau is John K. Kamanoulu, 230 Alanui Makee Ailana, a i ole, e kelepona mai ma ka Helu 79347.
6511-Iulai 6, 13, 20.
Ma ka ninauia ana aku o ka Loio William T. Bawalina; iaia i huli hoi mai nei ma ka Maui, mai Kapalakiko mai, in a e holo moho elele lahui ana oia, o kana hoakaka wale no, in a ua makemake ka aoao Repubalika iaia i moho, alaila ua makaukau loa oia, e lawe aku i kela hanohano e hookauia aku ana maluna ona.
HOOLAHA KUAI O KA HOOLIMALIMA AUPUNI LAULA.
Ma keia ke haawiia aku nei ka ka hoolaha akea, ma ka hora @@ a.m., Poakolu, Augate 2, 1922, ma ka puka komo mamua o ke k@@@ o ka Hope- Akena Aina Mr. P.K. Kalua, Wailuku, Maui, malaila e kuai hooliloia aku ai ma ke ku@@@ akea i ka mea koho kiekie loa @@ lalo o na manao o ka Pauku @@@ ke Kanawai Kumu o Hawaii @@@ ka Pauku 380 o na Kanawai Hooponpono Hou ia o Hawaii o ka 1915, ka Hoolimalima Laula o k@@ ana ka hapa o ka aina Aupuni o ka@@ hikinui, Maui,e moe ana mawana o na aina o Auwahi ame Nakula a e holo ana mai ke kai mai, ahiki i ka palena hou o ka Ululaau i H@@@@ koeia o Kahikinui, ek kukului aku ana ma kahi kokoke loa mawaena o Puu Kou ame Puu Pane, nona ka iliaina o 12,655 eka, oi aku o @@@ mai paha.
E kuai hooliloia aku ana @@@ hoolimalima malalo o ke kuleana ma ka aona o ke Teritore o Hawaii e unuhi hou ai mai ka hoolimalima mai, ma kekahi manawa, i kekahi hapa, a o ka aina no paka apau i olelola no ka hookuonoono ana i ole no ka hoohana ana aku paha a ke Komisina Home HAwaii, eliha me ia i hoakakaia ai ma ke Kanawai Kumu o Hawaii a e hookomoia kekahi manao hookaka no keia mea maloko o ka hoolimalima i oleloia.
E holilo pu ai no hoi keia hoolinalima malalo o na ano ame na kulana mahope ae nei e hookomia ma ke ano he mau kumu hoopaa maloko o ku hoolimalima e hoania aku ana.
(1) Manawa o ka hoolimalima 21 makahiki, mai Sepatemaba 21, 1923 aku;
(2) Uku hoolimalima haahaa, $1266.00 o ka makahiki, e uku hapa makahiki mua ia;
(3) E koiia ana ka mea a lilo ai e waiho mai me ke Komisina o na Aina aupuni mamaua ae u i ou ma ka lhanaia ana ame ka haawia ana o ka hoolimalima i oleloia, a iloko o kanakolu la, mahope aku a ka la o ke kuai, i kekahi hona kupono a lawapono ma ka huina o $2500.00 me na hope e aponoia a ke Komisina o nu Aina Aupuni, e hoakaka ana no ka hooko pono ia o na kulana apau ame na kumu hoopaa i paa maloko o ka hoolimalima i oleloia;
(4) E kukulu ka mea e lilo ai iloko o hookahi makahiki mai ka la aku o ka hoomaka ana o ka hoolimalima i oleloia a e malama iloko o ia manawa hookahi malalo o kona mau lilo ponoi, i pa hooiholona paa, ma ka palena o ka aina e hoolimalimaia ana, i @@@ ke me na palena o ka @@ laau i Hookoeia o Kahiki nui e kukuluia aku ana. Ua hokakaia no hoi, in a e lilo mai ana ka mea hoolimalima i keia wa, o ka aina i loleloia, oia ka mea e lilo ai o keia hoolimalima, alaila o ke pa ana i koiia malalo o keia pauku, e kukuluia ia iloko o hookahi makahiki, mai ka la aku i hanaia ai ka hoolimalima i oleloia. Pa kukuluia ka pa i koiia malalo o keia pauku, elike me na koi ana a ka Papa Mahiai ame ululaau, e pili ana i ke kukulu ana i na Pa o ka Ululaau i Hookoeia;
(5) Ina no ka huki hou ia o kekahi hapu o ka aina i paa ma keia hoolimalima e pili pu ia me ka Ululaau i Hookoeia o Kahikinui no ka hookuonoonoia e hoonee aku ka mea paa hoolimalima i ka pa ma ka palena o ka Ululaau i Hookuoia, o kahi i huki hou @@ koe nae, e lawe mua ia aku na holholona apau i oniaia e ka mea paa hoolimalima, mai ka iliaina aku i huki hou ia
E uku koke ka mea e lilo ai mahope iho o ke kuai, i ka uku hoolimalima i kohoia o na mahina mua eono, hui pu me na hoolilo o ka hoolaha ana, ame na kaki e ae e pili ana me ka hoomakaukau ana i ka hoolimlima i oleloia.
E kaa aku no ka Hoolimalima ame na kulana o ka Hoolimalima Aupuni Laula, i hoopukeia o ke keena o ke Komisina o na Aina Aupuni.
Eia ke kii palapala aina o ka aina e hoolimalima aku ana ame ke Laula, ma kahi waiho o na palapala, a e ikeia no ma ke keena o ka Hope Akena Aina Wailuku, Maui a i ole ma ke keena o ke Komisina o na Aina Aupuni, Hale Kapitala Honolulu, T.H.
No ka hoakaka laula, e ninau a ma ke keena o ka Hope Akena Aina Mr. F. K. Kalua, Wailuku Maui, a i ole ma ke keena o ke Komisina o na Aina Aupuni, Hale Kapitala, Honolulu, T.H.
C.T. BAILEY,
Komisina o na Aina Aupuni.
Honolulu, T.H., Iune 27, 1922.
3611 Iulai 6, 27.
HALE O NA ALII O HAWAII.
Ahahui Poo.
Ua makemakeia na Aliinuupula me na Mamo o ka HALE O NA ALII O HAWAII (Ahahui Poo @@@ akoakoa ae me na aahu piha ma @@ ahiahi o ka ia apopo, Poalima @@@@@ 7, i ka hora 7:30, mawaho o @Wa@ o ike i ke Kiaaina o Hawaii ana Mrs. Farrington.
Ma ke kauoha a ka Iku Lani Hoano:
W.M. J. COELHO
Iku Kau.
6511-Iulai 6.
KAPALAKIKO, Iulai 1-1- keia la i hoea mai ai ka Elele Harry A. Baldwin o Hawaii, e holo aku ana oia no Honolulu ma ka Poakolu.