Ka Nupepa Kuokoa, Volume LXI, Number 22, 1 Iune 1922 — KA LA KAUPUA. [ARTICLE]

KA LA KAUPUA.

Ma nehinei i hoomanao aku ai ka poe ola i ka poe make, o na ilina, ma ke kau ana i na pua maluna o ko lakou mau he kupapau. O kekahi keia o na hana ano ole ia kakou ke nana aku, aka nae, he hana ia i hoike okoa mai ai na ohana, o ka poe i haalele mai i keia ola ana, i ko lakou manao āloha kui'o, ame na hoomanao ana no lakou; a ua kupono no na hana i hookoia aku ma nehinei, ma ka hoohiwahiwa ana i na pa ilina, me na pua. Ua ala mai keia manao kau i na pua maluna o na ilina, o ka poe i make, mamūli o na koa, i molia aku i ko lakou mau ola, maluna o na kahua* kaua, he hoike hoi, no ka poina ole o ka poe e ola nei, i ka lakou mau hana kilakila, .no ka pono o ko lakou mau aina, ame ko lakou mau hoa makaainana. Ma nehinei, ua hooko aku na e hoomoāna nei ma keia mokupuni ia hana, ma o ka hoohiwahiwa ana i na ilina o na koa mauka ae nei o ka ilina o Nuuanu; ua hoohalike pu aku hoi ka lehulehu ma ia hana hookahi, ma ka hoohiwahiwa ana i na ilina, o na makaainana, i haalele mai i keia ola ana, a ma kekahi olelo ana ae hoi, ua lilo ka hana kaupua a hoohiwahiwa, i hana maa a kamaaina iloko o keia au e nee nei; e pono ai ia kakou, e malama mau aku ia hana i kela ame keia anakahiki, me na manao makee a aloha no ko kakou mau hoa kanaka i hala aku ma kela ao. He wahi mea ano ole no paha, ke kau ana aku i na pua maluna o na ilina kupapau; ma ia hana ana nae, i hoike okoa ae ai kakou, i na hoomanao ana no ka poe e moe mai la ma na ilina; e lilo ka poe oia, i poe hoomanao aku no lakou, ma ka hana, ina no ia he wahi mea uuku loa. Ua hoihoiia mai ka hoomanao ana i keia la, iloko o ka mahina o Mei, mamuli o ka ikeia, he manawa ia e popohe ai na pua; a oiai he kumu hoohalike keia i laweia mai imua o kakou, o ka hana pono wale no ma ko kakou aoao, o ia ke'Komo like ana aku, me na manao kui'o, a he hookahi ka hoolilo ana i keia la, i la ano nui iloko o ko kakou ola ana. Ua oleloia, o ka la hanau ame ka la e make ai o ke kanaka, 0 na la ano nui iho la ia o ko kakou ola ana, ina pela i'o, alaila e lilo ko kakou poe make, i mea nui iloko o ko kakou mau noonoo; a e lilo ko lakou make ana, i mea na kakou e hoomanao mau ai, i na la kaupua apau, ma keia hope aku. Ma na hoike maopopo loa o na pa ilina ma nehinei, ma o na pua la, i hoohiwahiwaia aku maluna o na he kupapau, ua lilo maoli ka hana kau pua, i la ano nui, hoohala kekahi poe, he mau la, ma ka hoomaemae, ame ka hoohiwahiwa stna 1 ka pa o ko lakou ohana i pau i ka make; he hoike oiaio loa keia, no ka poina ole o na hoomanao ana no lakou, iloko o ka noonoo o ka poe e oli nei. ' Me he mea la, o ka noonoo o kekahi heluna nui o na Hawaii, ua lilo na pua, i hoohiwahiwaia aku maluna o na he kupapau, i kumu e hookomoia aku ai na manao kaumaha a ku i ke aloha no lakou; he manao pololei loa keia, aole hoi o ka pono hoohiwahiwa wale aku no ma ke ano lealea, a hoohalikelike aku paha me ka hana a kekahi poe okoa loa; o na hoohiwahiwa ana ma kela ano iho la, ua ano makehewa no, a ua pau wale ka manawa, a ua lilo wale hoi ke dala ma kela hana hoohiwahiwa i na ilina kupapau. Ua kui'o maoli no ka hoohiwahiwa ana a kekahi poe o kakou, i ko lakou mau ilina, e hoohala ana i kekahi mau la, i manawa no ka hoomakaukau ana, ame ka hana ana i na pua pepa hoohiwahiwa; o kekahi o na hana pono e lawelawe ai, o ia no ka hoihoi ana, a malama aku ia mau pua pepa, i ka wa e hala ai ka la kau pua, a noonoo aku no ka hoea mai he makahiki hou, ua loaa no na pua hoohiwahiwa, he hoomama ana mai keia i na hana, a he kaohi ana mai no hoi ia kakou, mai ke komo ana aku iloko o na hana hoomaunauna wale.