Ka Nupepa Kuokoa, Volume LXI, Number 22, 1 Iune 1922 — UA HALA O MRS. AMELIA DILLON. [ARTICLE]

UA HALA O MRS. AMELIA DILLON.

Ma ka hora 10 o ka po o Mei 4, ia'u me ko'u makuahine e hoomakaukau ana o hoi iho e hoaumoe, ua kani mai la ko makou kelepona: I ko'u hoolohe ana, pa-e mai la ka leo o ko 'u kaikunane mai Hilo mai: Eia ka mea hou kaumaha, "Ua haalele mai la o Amelia i keia ola ana ma ka haukapila o Hilo." Ua hoohikileleia ko'u manao no keia lono kaumaha. Ia wa huli au i kuu makuahine a pane iaia no keia lono. Ia wa hoololi oia i kona manao hele no Lahaina Maui, e ike ai i ko makou kupunawahine e ola mai la ma Lahaina, oiai o kona alahele ia no kekahi la ae. Hoea keia lono nolaila no Hilo kana hele, e ike ai i ke kaikamahine a kana aikane, Mrs. Mihana A-i. He mau la wale no ko Amelia loaa ana i ka ma'i anu, a ua hoikeia mai no ia mea ia makou, me ka oleloia mai ke pii maikai iki mai nei no oia. Ae, i kona ike ana i kona maikai ua hoao oia e hoohele maloko o kona rumi moe. He ake nui oia 1 ka nohona maemae o kona home. A no ia kumu oia i lawelawe ai i ka hana hoomaemae ana i kona homo. He nui a momona kona kino. Iloko no nae o ia momona, he mea ole na hana he nui iaia ke hanaia mai. Ua a'o kona makuahine iaia i ka hana. Elike me kona ake ana i ka hana ua hoomaka oia e lawelawe i na hana o kona loaa koke no ia i ka relapse mo ke komo pu o ka numonia. I ka ike ana o ke Kauka Osorio i kona kulana ma'i, ua kauoha koke ia oia e hoi iloko o ka haukapila. Aole i hala na la elua iaia malaila ua kii mai la ka anela o ka make i kona uhane a lawe aku la iaia mai keia ola ana, a waiho iho i kona makuahine aloha ame kana kane ame ka ohana me na makamaka e kaumaha nona. Ma ka aoao o kona moe kona makuahine aloha ahonui ahiki wale no i kona pauaho ana. Malaila no kana kane e ike ai iaia ma kela ahiahi, mahope o kona hoi ana mai Olaa mai. A no kekahi mea hana ana i makemake ai e hoopau ma ka home, ua hoi aku oia no kona home. Aole nae oia i liuliu ma ka home ua keleponaia mai la oia mai ka haukapila mai ua make kana wahine. Ua hoopihoihoiia kona noonoo. la wa o kona hele koke no ia no ka haukapila a loaa aku kana wahine e moe ana ma ka maha mau loa.

Ua hoikeia ae keia lono kaumaha i na hoaloha ma Hilo a ma na wahi no'apau; ua hiki ole ke paa i na waimaka o ke aloha nona, no ka mea, he kaikamahine oia i piha i ke aloha ame ka lokomaikai. Ua like no oia me kona makuahine i ka piha ia mea he lokomaikai; no ia lokomaikai i nui ai kona mau hoaloha. He aloha makuahine oia, he aloha ohana no hoi, he aloha oia i kona mau hoaloha. He aloha i ka poe kiekie, a i ka poe haahaa a ilihune, a i ka poe o na lahui like ole. He aloha pu oia i na holoholona e hanaiia ana lakou i na wa apau, he punahele lakou iaia, a me kona punahele ana ia lakou, pela no lakou e pipili mai ai iaia. Ua hoolilo oia i kona makuahine i mea nui i kona noonoo. E noho pu ana laua, e hana pu ana i na mea hana e pono ai no ka noho ana. A ma na wahi apau ana i noho ai me kana kane ma Kukuihaele, Honokaa, Hilo, Naalehu Kau, ua kahea mau oia i kona makuahine e hoi aku e noho pu me ia i kekahi manawa. He pili mau kona makuahine me ia a na ka make i hookaawale iho la ia laua. Aloha no! He hoaloha oiaio o Amelia Dillon no'u. Elike me ka hoohoaloha ana o kona makuahine Mrs. Mihana A-a me ko 'u makuahine, pela no hoi maua ka laua mau kaikamahine i hoohoaloha ai, me ke aloha i kekahi a i kekahi. Ma kana wahi i noho ai ua kono mai oia ia'u ame ko'u makuahine e hoohala i kekahi manawa me laua. He oiaio ua hookoia kona makemake. Ua launa aku a launa mai makou me ke aloha ame ka hauoli kupono ana. Aloha wale na wahi a makou i noho a hele pu ai ke hoomanao ae. Ua hanauia o Amelia Makahiookekululiilii Dillon ma Honomu, Hawaii Mei, 29, 1877 e kona makuahine Mrs. Mihana A-i, makuakane Mr. Simou Kealoha. O kona makuahine oia no ka muli loa o na kaikuaana o Mrs. Emma Nawahi ame Mrs. Alai Akana e ola nei ma Hilo. O kekahi o kona mau hoahanau e ola nei, oia no o Mrs. Noa Aluli ame Miss Kuualoha Akana o Honolulu, Mrs. John Kai ame Mrs. Adam Baker o Hilo, a he nui aku no na ohana iloko nei o keia Teritore a pela pu ma Amenleā. Ua hoonaauaoia o Amelia Dillon ma ke kula o St. Andrews Priory ma Honolulu me kona hoahanau i make oia o Kalei Nawahi, iloko o kona mau makahiki o 9. He 11 makahiki o kona hele ana ma keia kula malalo o ka a'o ana a na Sister Albertina ame Beatrice. 1 kona hemo ana mai ke kula mai, ua hoi mai no oia i Hilo; a mahope mai oia ua mare oia me James Nakapuahi. Mahope o ko laua noho mare ana no 11 mahina me 9 la, ua loaa kana kane i ka ma'i a make oia. Mahope mai o ia, ua mare hou oia ia William Ellis; no kana hana hookani pila a kaahele iloko o Amerika i lawe pu ai oia i kana wahine me ia ahiki laua ma Nu loka, Bosetona me kekahi mau wahi aku no 8 makahiki. Hoi mai o Amelia i Hilo, a no kekahi manawa loihi ua kaawale me keia kane; a mare hou oia ia Mr. John Dillon, i ka la 11 o Novemaba 1918. He luna auhau kana hana no ka apana o Olaa, Puna. Ma Olaa ko laua wahi i noho ai i keia mahina aku nei ahiki i kona loaa ana i ke anu, hoi mai oia i ka home o kona makuahine ma Hilo. Ua nui ka minamina ame ke alohaia o keia kaikamahine kupa a kamaaina o ka aina lulehua o Hilo. Ke aloha nei makou nona ke hoomanao nei iaia i na wa apau. Aloha, aloha. Amelia! He oiaio ua haalele mai oe ia makou, aole loa makou e poina ia oe. Na ke Akua e hoomama mai i na manao kaumaha ou e ko makou Aunty Mihana ame Mr. Dillon a pela pu me ka ohana. Me ke aloha, HATTIE L. SAFFERY,