Ka Nupepa Kuokoa, Volume LXI, Number 18, 4 May 1922 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

Na Komisina

W.R. Farrington, Lunahoomalu;

Kalanianaole, Lala;     Rudolph M. Duncan, Lala;

Akaiko Akana, Lala;   Geo. P. Cooke, Kakauolelo

 

Meakakau Nupepa, malalo o ke Kakauolelo,

JOHN H. WISE.

 

Malalo o ka loko maikai o ka on a o keia Nupepa Kuokoa, L. A. Thurston (Kakina), ua haawila mai keia aoao no na mano pili i na hana a ke Komisina Hoopulapula Lahui Hawaii. No laila e loaa ana he mau manao pili i ka hana a ke Komisina ma keia aoaoa.

 

Ma keia aoa ao e ike ai ka poe heluhelu i na hana, na makemake, ame ka hoolala ana no ka hoomaka ana o na hana maluna o ka Mokupuni o Molokai.

 

Ua hamama no hoi keia aoao no na ninau pili i keia hana mai na Hawaii mai, e makemake ana e ui i ke Komisina no na mea like oli i makemake ia e ninau mai.

 

Ka Waimapuna o Oloolo, Molokai

 

I na la i hala aku o Hawaii nei, ua ikeia he mau waimapuna he lehulehu, ma na kahakai o keia paeaina. O keia haawina ua loaa pu no hoi ma na aina o Molokai. O keia mau waimapuna o Oloolo, us kamaaina ia keia mau wai, a ua ikeia e na kanaka o Kaunakakai, a ua kamaaina hoi i na keiki kahiko o Molokai.

 

I na la mamua aku o ka hoohui aina o HAwaii nei, ua hoomaopopoia keia mau wai, ma ke ano he wahi auau no na kamaaina o ia mau kahakai. Ua kaulana pu no hoi ma ke ano he wahi auau no na alii, ahiki loa mai no ia Kamehameha V. E hoomano mai no hoi kakou, na keia alii i kanu kela uluniu e ulu la ma na kahakai o Kalamaula ahiki mai i keia la.

 

I ka makahiki 1888 mahope o kekahi haule ua nui ana, ame ke kahe ana o ka wai no kekahi mau la, a na ia wai hoi i hoolana i ka aina holookoa o Kaunakakai, ua hoopihaia keia lokowai o hookahi hapa eha paha ka nui, a iloko o keia hapa eka he elima mau waimapuna e pii ae ana. I ka maloo ana o keia waikahe, ua ikeia ua piha keia loko i ka lepo, a i kela ame keia ua nui mahope mai, ua uhi hou ia aku, a i ka makahiki 1898, he umi makahiki mahope mai, aole he mau hiohiona lokowai ma ia wahi. A mai ia makahiki mai hoi ahiki i keia la ua ulu ae na kumulaau kiawe a ua hiki ole e manaoia he loko kekahi me keia wahi.

 

I ka manawa i hoomakaia ai e kanu ko o Molokai, ua imiia no na lokowai kahiko, aole nae i hoikeia keia lokowai e na kamaaina, a o kekahi no paha, aole ka poe dala i makemake e imiia ka wai maluna o na aina aupuni, o hoi aku ka pomaikai o ia wai i ke aupuni i ka pau ana o ka manawa hoolimalima. No keia mau kumu ua waiho wale ia keia moolelo o keia loko, ame keia mau waimapuna ahiki mai la i ka la i makemakeia ai e loaa ka wai hookahekahe, no na meakanu o na aina hoopulapula ma Kalamaula. I ka imiia ana aku ka hana e na kamaaina, ua loaa aku la keia wahi, a i ka eliia ana ua loaa pono aku la kekahi waipuna hookahi o na waipuna elima i ikeia i na la o Kamehameha V.

 

I keia la ke pii ae la keia wai, a o ka hohonu o ka lepo nana i uhi iho i keia lokowai, he 4 kapuai, a oi aku. Ke mau la no nae ka pii ana o ka wai, a ke paumaia la he 500,000 kalani i kela ame keia 24 hora. Aole emi iho o keia wai, a o kona ikaika paakai he 54.8 wale no grains o ke kalani wai hookahi. He anuanu maikai, a ua hiki no e inuia e ke kanaka me ka pilikia ole. Ua oi ae ka ono mamua o ka wai o Kaunakakai e inuia la no e na kanaka o keia la.

 

Aole nae i lawa keia mau kalani wai no na eka he 300 e maheleheleia aku ana, no na kanaka Hawaii e hoi mua aku ana maluna o keia mau aina. O ka nui o ka wai i makemakeia no keia mau eka, he 2,000,000 kalani, aka, ua manao wale ia nae, in a no e paumaia ana keia mau kalani o 2,000,000 aole no e emi iho ana keia wai, a o ia ka hana o keia mau la aku.

 

O kekahi ua kaawale loa mai keia waipuna mai kahi mai o na auwai hookahe i makemakeia, a e eliia ana ma kekahi wahi o 200 kapuai mauka aku o keia waipuna, he lua no ka manaoia ana e loaa paha ke kumu o keia wai, a in a e loaa io ana ua maalahi hoi ka pauma ana aku i na auwai. aka, in a no aole e loaa ana ke kumu wai, ua pau ka ninau wai no keia mau aina e noho mua ia aku ana e na kanaka Hawaii.

 

He moolelo kupaianaha no ko keia lokowai. Ua oleloia i na la i hala wale aku la o HAwaii nei, na la hoi e hui kuka ana na akua me na kanaka, ua hoomaopopo mai o Mrs. Kahinu, he wahine u‘i ka i ke mau ia ma keia lokowai e kahi ana i kona lauoho. Aole paha i launa kamailio aku na kanaka me keia wahine, aka, ua ike mau ia oia e noho ana ma kekahi puu leop mauka iho o keia loko. A he oloolo hoi kona mau waiu. No keia oloolo paha o ka waiu ke kumu i haawiia ai ka inoa o Oloolo.

 

Eia iho makai o keia lokowai, ka uluniu i kanuia ai e Kamehameha V ma ke ano he kiahoomanao nona. A maloko o keia uluniu he waipuna no i nalowale, ahiki i keia la, i ikeia o Kaaua. A makai aku o keia uluniu he waipuna no i ikeia a i kamaaina no i na kanaka, i ikeia o Kamaloko. O keia mau lokowai a waipuna hoi, ua nalowale ahiki i keia la, i like no hoi me ka nalowale ana o Oloolo. Elike no hoi me na waipuna kahiko, aole i aeia e hanaia kekahi mau hana pelapela malaila, oia hoi ka holoi ana ame ka auau ana o na wahine i loaa i ka ma‘i wahine. A mamuli o ka uhakiia ana o keia kanawai pela no i nalowale ai.

 

Ina e huliia aku ana keia mau waipuna, ke manao nei no kekahi poe kamaaina o Molokai e loaa ana no.

 

O ka mea kupanaha i ka hoomaopopo ana, o ka loaa ana o keia waipuna o Oloolo i ka manawa i makemakeia ai o hoohana aku i ka aina no ka pomaikai o na kanaka Hawaii, a i keia mau la o ka pomaikai o na kanaka, e loaa ana ka ka wai. Ma ka nana aku eia no ke Akua ke kokua mai nei i keia hana no ka pono o keia lahui.

 

No ka aina hoi Palaau, aoloe he hopohopo ana no ka loaa o ka wai no ia mau 500 eka wehe koke ia aku ana no mahope o ka laweia ana o keia mau apana aina o Kalamaula. Eia no ka wai ke kahe la ma kekahi lokoi‘a kahiko, i kanula hoi me ke kalo kona mau aoao. Aole i nalowale keia wai, eia no ke kahe nei, a o ke ana wale aku no koe i ka ikaika paakai o ia wai. Ua inu mai nei no ko oukou meakakau a ua ike no he ono no ka wai, a he wai e hiki ana e paumaia no ka pono o na aina Palaau.

 

O ka wai inuk ua hiki ke paipu i kahi kokoke i na aina i keia la, he wai i laweia mai ke kuahiwi mai, a he wai ono hoi. Nolaila, i ka loaa ana o ka wai inu, ame ka loaa ana hoi o ka wai hookahekahe no na meakanu, ame na holoholona, ua hiki mai kakou i kahi e hoomaikai hou aku ai i na kanaka nana i noonoo keia haawi aina ana no na kanaka Hawaii.

 

Aole mea i kow, o ka pau mai o na aina i ke anaia a o ke kukulu aku hoi i na home, a o ka hoi aku la no ia o na kanaka maluna o ko lakou mau aina. I keia la ua nui no na kanaka e waiho mai nei i ka lakou mau noi aina, a e wae ae ana paha na Komisina mai kekahi huina ae paha o 100 he poe o 24. Aole no nae e loihi aku na la a e weheia aku ana o Palaau.

 

Makai o keia mau aina o Kalamaula ame Palaau, he mau lokoi‘a kahiko, i piha me ka lepo i keia mau la. Hookahi lokoi‘a ma Palaau i hiki aku kona nui i ka 400 eka, a ua minamina no hoi ke noonoo iho i keia loko nui hewahewa, i hoopihaia e ka lepo ahiki ole e ikeia he hoailona kekahi o ka loko.

 

Ma ka aoao kai nae o keia loko, ua hiki e ikeia iho ke kuauna pohaku ame na hiohiona o na makaha o ke au kahiko. Ina e hiki ana e ka ia keia lepo a loaa hou ka loko, he pomaikai nui ke loaa mai ana i na kanaka e hoi aku ana maluna o keia mau aina.

 

Aka, ua nui no nae ka i‘a o ke kai, ka hee ame ka anae. Ka weke ame na i‘a he lehulehu wale aku. He mau hoailona keia o ka pomaikai e loaa ana i na kanaka, e hoi aku ana maluna o keia mau aina. O kekahi, ua piha no hoi ke kuahiwi me na kao, a o ia alanui no ia e loaa ai ka i‘a o ka noho ana aku.

 

I keia la, ke hoomaka mai nei ka Hui Hanai Pipi o na keiki Cooke ma, e hoopiha i kekahi mau puaa wahine a lakou he 100 paha, no ka makaukau e haawi mai i na kanaka mua e hoi aku ana i ka aina, ma kahi paha o ka elua a ekolu puaa kumulau a ke kanaka hookahi. E kuaiia mai ana no hoi na moa maikai, aole i makemakeia na moa kulana maikai ole e laweia aku e hanai. Ua haawiia aku no hoi ke kauoha no ka laweia ana mai o na pipi waiu helu ekahi, no ka pomaikai o na kanaka Hawaii.

 

O keia mau hoolala ana a ke Komisina, he mau hana e hiki ole ai i kekahi kanaka Hawaii, e ku mai a olelo, aole i haawiia aku iaia na kokua ana, no ka holomua o kona noho ana. Auhea la ka hookuonoono aina ana i oi aku i keia haawina, e haawiia mai nei. I keia la, o na kanaka manao maikai, e huli mai ana lakou a o hoomaikai mai ana i ke komisina no keia mau lawelawe naauao ana.

 

Me keia mau hoolala naauao, hookahi wale no mea i koiia mai ia oe e ke kanaka Hawaii, e hoi a e hooikaika me ka hoomanawanui, a i na la ma keia mua aku, e ohi ana oe i na pomaikai, a e ili aku ana keia pomaikai i kekahi heluna lehulehu o keia lahui aloha.

 

Aole nae i pau aku na mea i makemakeia no na aina ma Molokai. Aia he 15,000 eka aina maluna aku o na aina palahalaha o Palaau ame Hoolehua ame Kalamaula pu no hoi, i makemakeia e haawiia mai i na kanaka HAwaii, a o ka ninau wale no i koe, o ia ka loaa o ka wai. No na aina pili kahakai, o 800 eka, ua loaa ka wai, a koe kela mau tausani eka maluna aole wai.

 

O na hoolala ana i mea e loaa ai ka wai, hookahi elike me ka mea i hoike mua ia ae nei, o ka wai no na aina o Kalamaula, o ke noi ana aku i ka Ahaolelo o Hawaii nei, e noho mai ana i ka malama o Feberuari, 1923, i haawina hoaie o $250,000 no ke kii ana i na wai kuahiwi, ame na wai i ka manawa ua.

 

Ke loaa ka lua i makemakeia no ka lawe ana mai i ka wai a hookio, ua hiki e loaa ka wai no ka hoolawa ana no 1300 eka aina ma Kalamaula. O ka lua o na hoolaha an, o ia no ke kii ana aku i ka Ahaolelo o Amerika i haawina o $3,500,000 no ke kii ana i na wai e lele la ma kela aoao akau ame hikina o Molokai.

 

Ke loaa keia haawina hoaie mai ka ahaolelo mai o Amerika, e lawa ana na wai no keia mau eka o 15,000. A i ka hiki ana aku ia manawa, e hiki ana e hoolawaia na kanaka he 500 maluna o keia mokupuni o Molokai, a e ike aku ana kakou i na pomaikai e loaa ana i keia lahui.

 

Nolaila, he wahi uuku wale no keia o na hana i makemake ia, e hoohana aku no na kanaka Hawaii. O ke kumu o ka hana eia i keia mua aku, ma ke ano nui. O ka hoike mai o na kanaka mua i ko lakou ohohia ame ko lakou holomua ma keia mau aina pili kahakai o Kalamaula ame Palaau, ke alanui e hiki ai e loaa na hoohana ano nui i makemakeia.

 

Ke manao nai ko oukou meakakau, e hiki ana e loaa keia mau dala i makemakeia no keia mau hana ano nui, ke heleia e noi i ka ahaolelo o Amerika. O ke ko‘iko‘i o ka loaa ana o keia mau dala, ame ka hiki e loaa na mea i makemakeia, aia no iloko o ka lima o na kanaka mana koho baloka o Hawaii nei. I nui ke aho, a e ohi no ka lahui Hawaii i na pomaikai he nui.

 

 

Ua Kokoke Mai ka Manawa e Weheia ai na Aina Hoopulapula

 

Iloko o na pule helu wale no, mai keia manawa aku, e hookoia ai na manaolana o ka poe na lakou i hooikaika e loaa ka haawiia ana mai o na aina aupuni o Molokai no na Hawaii.

 

I ka poe i ike ole i na hana i hookumuia no ka loaa o keia mau aina, he mea pono no e hoakaka iki ia aku. I ka makahiki 1919 ka hookomoia ana o ka olelo hooholo e John H. Wise, e noi ana i ka ahaolelo makua o Amerika, no ka haawiia ana mai o kekahi mau aina aupuni no na kanaka Hawaii wale no. Ma ke kino o keia olelo hooholo, ua hunahunaia ka manao nui, a in a no paha i hoike akea ia ae ka manao, in a paha i keia la, aole kakou na kanaka Hawaii i lilo i poe hoopomaikaiiamamuli o keia loaa ana o na aina ia kakou wale no.

 

Mamuli o keia mau mano hunahuna o ka olelo hooholo ua kueia mai, aka, o ka mea apiki nae, aole he manawa i hoikeia aku ai ka manao o keia olelo hooholo, i ka poe kue mai. Ua kueia mai keia olelo hooholo no ke kumu, he manao kue kumukanawai, oiai he manao haawi wale no i na kanaka Hawaii, aole hoi i kekahi poe Amerika e aku. Aka, ua ku mau aku o John Wise, e paio no ka pono o keia olelo hooholo me ka hoike ole i na manao iloko o kona naau, no na mea i makemakeia ahiki i ka holo ana. Ia manawa no hoi, ua hookomoia mai he olelo hooholo no ka haawi ana i na aina apau malalo o ke Kiaaina no ka hookuonoonoia ana, a e manaoia ana no hoi, o na kanaka a ke Kiaaina e ae ai ia lakou e loaa ai na aina aupuni.

 

Mamuli o ka ike ana o John Wise, e lilo ana keia olelo hooholo a ke Kiaaina, i mea e hoopilikia mai ai i kana olelo hooholo, no ka haawi ana i na kanaka Hawaii wale no, ua hookomo aku oia he paku‘i i ka olelo hooholo a ke Kiaaina, e hoopakele ana i kana olelo hooholo. Ua kue ikaika ia keia hoololi a John Wise, aka, ua ike nae ka poe e kakoo ana i ka olelo hooholo a ke Kiaaina, in a aole e aeia ana ka hoololi a Wise, e make ana ka lakou olelo hooholo a mamuli o ia, ua aeia kela hoololi e hookomoia.

 

Mahope o ka holo ana o keia mau olelo hooholo, ua hoomaopopo ole kekahi poe i ka manao nui o keia hoololi a Wise. Ua manao ia, mamuli o ka hooholo hope ia ana o ka olelo hooholo a ke Kiaaina, o lilo ana ka mea hope i mea oi aku o ka mana, mamua o ka mea i puka mua, a oiai ma ke kau kanawai o ka mea hope, ka mea oi aku o ka mana. O keia mau mea nae, ua ike mua o Wise, a ua hoohemahema no hoi ka poe e kakoo ana i ka olelo hooholo a ke Kiaaina.

 

Mahaope o ka holo ana o keia mau olelo hooholo, ua kau mai ka manao o ke Kiaaina e kohoia i Komisina e hele i Wakinekona, no ka hooikaika ana, no keia mau olelo hooholo. Aole no i like ka manao o kekahi poe no ka hoouna ana i komisina i Wakinekona, a ua lilo keia olelo hooholo i hookomoia mai e Wise, no ka hoouna ana i komisina i Wakinekona, no ke kokua ana i ka Elele Alii Kuhio, i mea kueia e kekahi poe, a mamuli o ka ikaika o ke kokua ana a ke Alii Kuhio, ua hooholoia keia olelo hooholo, i na hora hope loa o ka ahaolelo o 1919.

 

I ka hiki ana mai o ka manawa e kohoia ai keia komisina, ua makemake ke Alii Kuhio o Wise kekahi e kohoia. Aka, i kona hele ana aku e hui me ke Kiaaina, ua hoike mai ke Kiaaina i knoa kue ia Wise, ame kona olelo mai e waiho hou aku ke Alii i inoa hou, aka, ua hoole aku ke Alii me kona olelo aku, ina aole e kohoia ana o Wise, alaila, e kue ana oia i na kanaka e hele ae ana ma ke ano komisina, me ka ikaika loa.

 

I ka ike ana mai o ke Kiaaina i ka manao o ke Alii, ua emi pu kona kue, a mahope o kekahi e hele ma ke ano komisina. Aka, aole no i pau ke kue mahope o keia ae ana mai. Ua oni hou ae ke Kiaaina he alanui e ae e hiki ole ai o Wise. Ua kauohaia aku o Wise e hele ae i ke keena o ke Kiaaina, a i kona hiki ana mai, me ka ike ole i na hana i hanaia, ua waiho aku ke Kiaaina i kana ninau, in a paha e eo ana o Wise e hele ma ke ano kakauolelo no ke komisina, a e kohoia na komisina mai ke senate aku, o Shingle ame Chillingworth, no ka mea he elua wale no komisina o ka hale hookahi, a o Wise i kakauolelo.

 

Me ka loaa ole ia Wise he manawa e ike ai i na hana i hanaia mamua aku o keia, ua komo mai la no nae ka hoohuoi iloko o kona naau no keia kulana e waihoia aku nei, a ua pane mai oia, "Ina aole au e kohoia ana i komisina, aole au e ae e hele i Wkinekona ma na ano apau."

 

Ma keia pane, ua huli hou mai ke Kiaaina a hoike mai i ko ke Alii Kuhio manao, a o keia hololi hoi ana i ke kulana kakauolelo, ua manao oia ua biki no hoi ia i ko Wise manao. Aka, ma ka aoao nae o ke Kiaaina i kona ike ana,, aole e ae ana o Wise e hele ma kekahi kulana e ae, ua haawi koke mai oia i kana hookohu ia Wise, a o ia iho la ke alanui o ko Wise waeia ana.

 

Mamua o ka haalele ana o ke komisina, ua pa‘iia he buke o na mea i makemakeia e hoohana aku ma Wakinekona. Maloko nae o keia buke i ke komisina, a i ka moana i hoikeia mai ai. Ua ike koke iho la no nae o Wise i na hana i makemakeia, e apuhi no kana olelo hooholo, a ua maopopo no hoi iaia na manao o keia hookomo ole ia ana okeia olelo hooholo. I ka halawai mua loa a ke komisina, ua hoike aku o Wise, i kona manao, a waiho malie mai ke komisina nana wale no e lawelawe na mea e pili ana i kana olelo hooholo, a e ae aku no hoi oia i ke Kiaaina ame na komisinae aku, na lakou wale no e lawelawe na hana maluna o ka olelo hooholo a ke Kiaaina. Ua manao ke Kiaaina he manao maikai keia, a ua ae ai la i keia manao o Wise. O na buke nae he 50 i haawiia mai ia Wise e paa na ke komisina, ua pau i ke kiloiia iloko o ke kai, a nele ka hoea ana o na kope o keia buke i Wakinekona, aka, mahope o kekahi mau la pokole wale no, ua hoea ae la he 500 kope o keia mau buke.

 

I ke ku ana o ke komisina imua o ke komite, ua lawe ae ke Kiaaina, oia ka mua o ka hooloheia ana, a i ka pau ana o kana mau olelo, ua kaheaia o Wise. Mamuli o ka hiki ana i ka bora 12 o ia la, ua koi aku o Wise e aeia mai i manawa okoa kona e hooloheia ai, no ka mea he nui kona manao.

 

Mamua o ka hele ana o keia komisina, ua manao ke Kiaaina ame kekahi poe o ke komisina, he mau manao hoopau manawa wale no keia o Wise, a e hoole mai ana ka ahaolelo o Amerika i ka hoolohe ana i ko Wise manao, no ka mea he mau hana kue kumukanawai keia, o ka manao ana e loaa, wale no ka aina i na kanaka Hawaii, a e hooneleia kekahi poe Amerika e ae.

 

I keia kaheaia ana o Wise, ua hooia mai ke Kiaaina i kona manao he kue kumukanawai keia. Ua manao pu no hoi ke Kiaaina ame kekahi poe o ke komisina, mamuli o ka hooholo hope ia ana o ka olelo hooholo a ke Kiaaina, a ua lilo hoi ka olelo hooholo a Wise i mea holomua, e lilo ana ka noonooia ana maluna wale no o ka olelo hooholo a ke Kiaaina.

 

I ke ku ana o Wise, o ka ninau mua i wailoia mai iaia, o ia no, in a paha ua ike oia, ua lilo kana olelo hooholo i mea hope. Ua hoike aku o Wise, pela no, in a aole i hookomoia ka hoololi i ka olelo hooholo a ke Kiaaina. Ua hoike aku o Wise i kahi o kela hoololi, a o ka mua loa no hoi ia o ke Kiaaina i ike ai, he hoololi kekahi i hookomoia iloko o kana olelo hooholo. Ua ike mai ka mea nana ka ninau, ua lilo ka Wise olelo hooholo i mea e noonoo mua ia, no ke kumu, ua hoololiia ka olelo hooholo a ke Kiaaina.

 

Me keia, ua waiho aku o Wise i na kumu o kana koi, o ia hoi o keia hapakolu, na aina leialii i hoololiia hoi i mau aina aupuni mahope mai o ka hoohui aina, ua hoike mua mai o Kamehameha III, o ka mahele ia o na makaainana. Maluna o keia kahua, ua loaa ke aponoia ana o keia koi, a ua hoholo mai ke komite no na Hawaii kela mau aina. Ua nui nae ke kueia o na aina mua i waihoia aku, a ua waiho hou ia aku na aina hou, a o ia no na aina i ikeia i keia la ua loaa mai no na kanaka Hawaii.

 

O ka hakuia ana o ke kanawai, o ke Alii Kuhio ka i haawi aku i kona mau manao apau, no ka mea, oia no kekahi lala o kela komite o ka hale. Aole he mau hoololi i komo, ahiki wale i ka hiki ana o keia bila imua o ke komie senate. Malaila ua komo aku na kue a Carter, ka lunanui o ka Parker Ranch ame Kauka Raymond o Maui. Ua hoikeia keia mau kue imua o kela komite, a ua hoopaneeia ka ahaolelo me ka holo ole o ke kanawai.

 

Mamuli o keia holo ole ana, ua hoihoi hou ia mai na manaolana maluna o kekahi hana ma Hawaii nei, i mea e pau ai na kue. I ka noho ana o ka ahaolelo o 1921, ua ike aku o Wise, he alanui hou e loaa ai kona makemake, a ua hoike aku oia i ke Alii Kuhio i kona manao, ame na hoolala hou ana i mea e holo ai. O na kue nui i ikeia, o ia no ka nui loa o ke koko o ko na aina e, iloko o na kanaka i manaoia no ka loaa o ka aina, o ia hoi, he 1-32 wale no koko Hawaii; a o ka lua o ka nui loa o na aina i manaoia no ka wehe koko ia ana.

 

Maluna o keia mau kue, ua hoemi hou ia iho e Wise ke koko Hawaii a i ka 1/2, a o na aina e wehe mua ia, o na aina o Molokai, ame kekahi mau apana ma Hawaii. O keia mau aina nae ma Hawaii, aole na Wise kela mau aina i hookomo. I ka loaa ana o keia mau hoololi, ua kali aku o Wise i ka manawa e hooko ai i kana bila hou. A i ka manawa on a i ike ai ua makemake nui ia e hooholo he hoololi kumukanawai o Hawaii, o ia hoi e aeia na hui mahiko e paa i na eka, a oi aku mamua o ke tausani, a ua lilo keia hoololi i mea makemake nui ia e kekahi hapa o ka ahaolelo, ua lilo iho la keia mea i alanui no ke kuai ana aku, i mea e holo ai ka Wise kanawai.

 

Ua lilo nae keia manao o Wise i mea kue ia mai e kekahi poe kiekie o ka aina, ahiki maoli i ka hui ana o Wise me keia poe, a hoike aku o Wise, in a aole e hooholoia kana kanawai, me na hoololi elua i makemakeia, aole loa e holo ana ka lakou hoololi kumukanawai i makemake ai. He mau la mahope mai o keia hui ana, ua hoike mai ke Kiaaina ua apono ka poe kue i na hoololi a Wise, a ua ae lakou e hoopau i ka lakou mau kue i ka bila hoopulapula, ame ka hoouna hou ana i komisina i Wakinekona, me ka waiho mai na ke Alii Kuhio e koho kela komisina. Ua waeia o C. Rice, H. Rice ame Wise na komisina e hele e hooikaika maluna o keia bila hou.

 

I ka hiki ana aku o keia komisisina i Wakinekona, o ka ninau nui mawaho ae o nakue i hoomaopopoia, o iano na hoino i hookauia aku maluna o keia lahui Hawaii, i lowa, naaupo a pelapela ka lahui Hawaii."

 

Ma ka nana aku, i ko Wise manawa i ku ai e hoike i kona manao, ua like oia me kekahi kanaka i piha loa i ka huhu, a ua okalakala kona leo. Aka, ua lilo nae ia ikaika o kona leo i mea hoolohe akahele ia e ke komie. Ua ike paha ka poe heluhelu i keia pane a Wise, o ia hoi, aole ka lahui Hawaii he poe molowa, no ka mea ua hoike mai ko lakou ikaika hana i ka nui o ko lakou lahui i na makahiki mamua o ka loaa ana mai o Hawaii i na haole. Iloko o ka helu kanaka kiekie o 400,000 o ia mau makahiki, aole nae he hookahi paona ai i hookomoia mai iloko o Hawaii, aole no hoi he ia lole a mea e ae paha no ka pono o na kanaka o ia manawa. I keia mau la o 250,000 wale no kanaka, ua lilo aku he $50,000.000 no na pno meaai, ame lole, ame na pono e ae no keia mau heluna kanaka. No ka naaupo hoi, ua kaaheleia e na kupuna Hawaii ka moana Pakipika, mai kekahi kukulu ahiki i kekahi kukulu maluna o na auwaa liilii wale no. He 1800 mile ke kaawalo o Samoa mai Hawaii aku; he 2300 mile ke kaawale o Tahiti mai Hawaii aku; a he 3800 mile ke kowa o Nu Kilani mai Hawaii aku, ana, ua heleia nae keia mau kai e na kupuna Hawaii maluna o na auwaa liilii, me ke kauka‘i wale ana no i na hoku ame na au o ka moana.

 

 

Aole mau moku nunui; aole no hoi he mau panana, aka, ua hele aku keia mau auwaa, a ua hoi mai me ka lanakila me ka loaa ole o na pilikia. Ina he poe naaupo na kanaka Hawaii, aole loa e hiki keia mau holo moana ana. I keia la ke holo nei na moku nunui ma keia mau wahi ame na panana, na lakou e alakai i na kapena ma ka lakou mau huakai. Ua hiki anei i kekahi moku nui me kona kapena ke hele ma keia mau kai, i aloia ai e na kanaka Hawaii maluna o ko lakou mau auwaa. Ua hiki e ikeia aku aole loa! Ina aole panana, aole e hiki e loaa o Hawaii i na kapena o na moku nunui o keia mau la.

 

No ka ninau pelapela o na kanaka Hawaii, ua hoike aku o Wise, aole lahui kanaka maluna o ka ilihonua, i like mai ka maemae me na kanaka Hawaii, aole e hiki ia lakou ke hele me ka auau ole i kela ame keia la. Ma Amerika, a ua kamaaina o Wise, aole e hiki e loaa kekahi wahi auau ma kekahi mau kulanakauhale, koe wale no ma na hokele. Aole me ia ma Hawaii. He wahi auau ko na kanaka Hawaii ma na wahi noho apau.

 

Ua lilo keia mau olelo pale i mea makahehi loa ia e na komite, a ua hoike koke mai ka lunahoomalu, ua pau na kue, a ua makaukau ke komite e hooholo i ka bila, in a e hiki ana ia Wise ke kakau i ka hoike. Iloko o hookahi hora mahope mai, ua pau ka hoike i ke kakauia, a ua waihoia aku imua o ka lunahoomalu o ke komite. He mau la helua mahope mai ua hooholoia ka bila e ka hale o na senatoa, a ua iho aku i ka hale olalo.

 

He mau la helu wale no malaila, mamuli o ka ikaika o ke Alii Kuhio ame kona mau hoa, ua holo ka bila malaila. He 9 la mahope mai o ka hoohooia ana okeia bila e ka hale olalo, ua kakauinoa ka peresidena i keia bila, a i keia la ke ike aku nei kakou e ka lahui, i ka olino ana mai o kona malamalama, a e lilo ana hoi ka mea i oleloia, he mea kue kumukanawai i mea hoopomaikai mai i ka lahui Hawaii.

 

He nui na olelo hoino i ke Alii Kuhio ame Wise na luna o keia kanawai, a ke ku nei nae hookahi wale no o laua i keia la, e ikemaka ana i na hana hoopomaikai i ko laua lahui. Ua hala aku hookahi o keia mau kanaka, ke Alii Kuhio, me ka loaa ole he mau hoomaikai no keia hana maikai i lawelaweia e laua. Ke nana aku nei hoi o Wise i na pomaikai e holo ana i kona lahui. Ua ike no oia in a kakou e kauka‘i ana na na kanaka e hoomaikai mai no na hana maikai, aole loa e loaa ana ia mea, aka, wahi ana, ua kauka‘i aku oia na ke Akua e hoomaikai mai iaia no keia mau hooluhi, ame keia mau hoino.

 

Ua hiki e hoomaopopoia, i ka la 1 o Augate o keia makahiki, e hoomaka ai na kanaka Hawaii e hoi aku no Molokai. Ke manaolana nei o Wise, e lilo ana na kanaka Hawaii hoomanawanui, e hooikaika ana i na inea, na kanaka mua e huawua mai mai o na aina, no ke kumu i keia mau makahiki mua 5, e lilo ana keia poe mua e hoi aku ai i poe ana, na lakou e hooia mai i ka holomua ame ka holomua ole o keia kumuhana ano nui, i ike ole ia i na la o ka nohoalii o Hawaii nei.

 

Ua lawa na mea apau, ka wai, ka aina momona, na dala o ka hoomaka ana. Heaha hou aku la koe! O ka ikeika o ke kanaka ame kona hoomanawanui ka mea ano nui a ma ka‘u nana aku e hiki ana e loaa keia mau mea, no ke kumu, o ke koko no o na kanaka Hawaii o na haneri makahiki i hala aku, o ia no ka poe kue, o ia hoi he "lahui mokeia e kahe nei iloko o na aakoko o na kanaka Hawaii o keia la.

 

Hookahi wale no mea e koiia aku nei, o ke ku ae o na keiki Hawaii me maluna o ko lakou mau wawae, a e hooikaika e hoihoi hou ia mai na la ulakolako o ka noho lahui ana o keia poe kanaka Hawaii o keia hanauna. Aole no e ikeia aku ana he pomaikai, ina na keiki Hawaii e hoi aku ana me ka manao ana, e noho wale no, a na na holoholona e hanai mai. O ka lalau iho o na lima, a o ka hoohana ana aku i na aina me ka ikaika apau, ke alanui e loaa ai ka noho pomaikai ana o keia mua aku. A in a kakou e hoohemehema ana, o ka pau ae la no ia o na manaolana, a e hoi hou aku ana no kakou malalo o na kanawai hookuonoono aina, o na la i hala aku, e loaa hou ana no na poino elike me na kanaka e noho mai la ma Waiakea, ka nele i ka ike ana aku i na pomaikai omua.

 

E wae ana na Komosina i na kanaka Hawaii kupono i keia mau la aku. Ke pule nei a ke manaolana nei au, e waeia ana na kanaka Hawaii kupono i keia mau la aku. Ke pule nei a ke manaolana nei au, e waeia ana na kanaka hoomanawanui, na kanaka i manao maoli e hoi no ka pono o keia mua aku. Aole no paha e lawa ana na kanaka apau e koi mai nei i na aina, aka, iloko o na malama hou aku i koe o keia makahiki e wehe hou ia aku ana kekahi mau haneri eka o Palaau pili kahakai. he mau aina no i kulike me keia o Kalamaula, a ua manao o Lyman, ma kekahi ano ae, ua oi aku paha keia mau aina o Palaau mamua o na aina o Kalamaula. Nolaila, e komo iho ka hoomanawanui iloko o na kanaka Hawaii iho i koe, a aole no e nui na la i koe wehe hou ia aku no ka aina. A o keia wehe ana e hoomauia aku ana no no kekahi mau makahiki.

 

O ka‘u e a‘o mau aku nei, e malama na wahi kenikeni, e hoiliili, a aole oe e ahewa mai ana i keia a‘o, ke lawe oe, no ka mea, me keia mau dala au e hoiliili ai, e loaa ana ia oe ka waiwai oia mau dala, i kou hoi ana aku maluna o ka aina, no ka mea, e nele ana oe i ka loaa ana mai o na pomaikai i na la mua, a oiai oe e kali ana o ka ulu ae o kau meakanu, a e kali pu ana hoi o ka nui ae o na wahi moa a puaa paha, eia hoi na wahi dala ma kau mau wahi hipuu, a e ola ana oe no ia mau la, e kakali ana i ka loaa mai o na pomaikai o kou luhi.

 

O na manaolana ua o keia mua aku ou e ke kanaka Hawaii, ua nui a ua palahalaha, a e aho nae kakou i ka hoomanawanui.

 

Mamuli o ka Huikau o na Pepa Hoomanao ke Kumu o ka Lalau Loa Ana

 

Ma kela helu aku nei o ke Kuokoa, i puka ae ai kekahi mau huahelu i kopeia mai kekahi mau pepa hoomanao mai, e waiho huikai ana ma ke pakaukau hana a ko‘u keiki lawelawe ma keia hana kakau, i puka hewa ae ai na huahelu e kau la ma ke kolamu helu 6, o ia puka ana.

 

O na huahelu oiaio i hooponoponoia, e pili ana no na hua laiki, e helelei ana mai ke pola ai mai, o elua kauna ia a kela ame keia Pake ma ke aupuni o Kina, no lakou ka heluna o 400,000,000 kanaka a oi aku a emi mai paha, e loaa ana, ma ka hoonui ana aku ia 400,000,000 kanaka me 8 hua laiki, keia huahelu o 3,200,000,000 hua laiki; a ma ka hoomaopopo ana ae i ka heluna o na hua laiki e loaa ana iloko o ke ini@a paa, nona ka averike i hoomaopopoia o 550 hua, iloko olaila alaila, e loaa ma ka hoonui ana i keia huahelu me 1728 na iniha paa i ke kapuai paa, e loaa ana he 950,400 hua laiki.

 

Ma ka puunaue ana ae ia 3,200,000,000 hua laiki, i helelei mai kela ame keia pola ai mai, ma ka aina hookahi ana, me 950,400 e loaa ana ka huahelu o 3367 kapuai paa ame ka hakina---e kiola ka hakina.

 

Ma ka hoomaopopoia, aia he 4 kapuai paa i ke eke laiki o 100 paona. Ina pela, e puunaue ae ia 3367 me 4 loaa o 841 3/4 eke laiki ma ka ai hookahi ana a na auna Pake ma Kina. Aia hoi he 3 ai ana o ka la, he mea pono no e hoonui aku ia 841 3/4 me 3, e loaa ana ka heluna o 2525 1/4 eke, e piha i keia laiki i helelei wale iho, e oleloia nei, i ka la hookahi. Hoonui aku i keia huahelu o 2525 1/4 me na la he 30 o ka malama, e loaa ana ka huahelu manaonao o 75,757 1/2 eke. O keia 75,757 1/2 ka heluna o na eke laiki i hoomaunaunaia.

 

Ua manaonao maoli ma ka hoomaopopoia ana, a he mea oiaio no e pilikia ai o kekahi mau mahele aina o Kina, e nohoia ana e kekahi heluna kanaka o 30,000, no hookahi malama.

 

Ina e hoomahuahuaia ae ka heluna o na malama o ka ai hoomaunauna ana, alaila, e manoanoa ino aku ana ka pilikia e kau iho maluna o keia heluna kanaka, i ka ai.

 

Ma keia heluna kanaka ka‘u hoomaopopo ana ia kakou, e ka poe ai poi, o Hawaii nei, i na ai anu me ka hoomaopopo ole i na pala ai, o ka umeke ame na hakina, a  i ole o na miki ai i lilo wale aku i na hana e, mawaho ae o ka hana hahao ae iloko o ka waha no ka opu.

 

He ku i ka welawela ka hoomaopopo ana iho i na heluna paona ai, i lilo aku mamuli o ka hoohemahemaia. Hele no na keiki miki no i ka ai i mea kapili pepa no ka lupe. Hele no na wahine Kepani e kuai poi i mea pia no na lole holoi a lakou; a he lehulehu wale aku o na hana hoomaunauna i keia ai o Hawaii, a Hawaii e kue ole aku nei i keia mau hana.

 

No keia mea, pokole e ka ai, aole e hiki ke hoolawa pono ia na kanaka; pii mai ke kumukuai a kiekie kupono e ahuwale ai o Kalamaula ke nana aku i keia loa, a huai ae ka manao e hoi ilaila e hana no ke kino iho ame ka ohana. E nana aku i na Pake kanu laiki ma ka lakou mau mala, o ke pakini, o na kii kanaka ame na welu like ole i kauia ma na kaula e moe ana mai kekahi pe‘a a i kekahi pe‘a o ka mala, i mea hoomaka‘uka‘u aku i ka manu ai laiki, i ole lakou e kii mai i na hua laiki e kau ana ma na lau laiki.

 

Ua hoomaopopo na Pake i ka nui hewahewa o ke poho e loaa mai ana, in a aole e hoomaopopoia. Ma na hua laiki ka helu ana.

 

Ina no hoi, o na kanaka e hana pela, ma ko lakou mau home a ma na mala ai, me ka makaala ana i na holoholona kolo ma ka honua, na lakou e hoopoino nei i na ai, he mea e ana ka lako maoli i na ai maikai a mohaha, me ka ike ole ia o ia mea he pilikia i ka ai, koe wale no a he hoopa‘i mai ke Akua mai.

 

O na aina apau i komo ma ke kanawai hoopulapula, he Kanaana la o keia au hou no na Hawaii kuauli.

 

Moolelo o ka Halawai 32 a ke Komisina o na Home Hawaii

 

Ua heluheluia ka moolelo o ka halawai i hala a mahope o ka noonooia ana ua hooholoia e aponoia me na hoololi ole.

 

Na Aina o Keaukaha ame Panaewa

 

Ua hoike mai ke kakauolelo, mamuli o kekahi hoakaka a ke Kiaaina, ua kakau aku oia i ka loio kuhina no kona manao kanawai, maluna o ka ninau, in a paha e hiki ana i ke Komisina ke hoihoi aku i na aina o Keaukaha ame Panaewa malalo o ka malu o ke Komisina o na Aina Aupuni, a nana e haawi mai ka ae, in a ke ano he poe noho no ka manawa, ma ke ano hoolimalima i ka poe e noi ae ana i keia mau aina. Ua pane mai nae ka loio kuhina aole e hiki keia ninau e hookoia pela, no ka mea, ke hoakaka mai nei ka Pauku 212 o na Komisina Home Hawaii, in a e hoihoila ia mau aina i ke Komisina o na Aina Aupuni. E hooliloia aku ana ia mau aina mala lo o ka hoolimalima laula wale no. Ua hoike mai nae ka loio kuhina in a paha e kukalaia ka hoolimalima o keia mau aina, a e koho mai ke Kalana o Hawaii, alaila ua hiki i ke Kalana o Hawaii e hoolimalima aku i na apana. Aka, aole i apono ke Komisina i keia mau hoolala ana a ua hoopanecia ka hoonooia ana o keia ninau.

 

Hoike o na Wai

 

Ua haawiia ae he mau kope o na hoike a Mr. Jorgensen i huipuia me na hoike i hoonohonohoia no na apana ano nunui ame na wai maloko o ke teritore, a pela pu no hoi ka hoike no na wai ame na kumuwai o ka aoao akau o Molokai i na lala o ke Komisina.

 

Ua hoike mai o Mr. Cooke, ua haawi aku oia e anaia ka ikaika paakai o ka wai i loaa mai nei ma Kalamaula i ka H. S. P. A. ame ke Kula Kiekie o Hawaii; a ua loaa mai ka laua mau hoike penei, ka ka mua he 57.8 a ka ka hope he 54.4 grains paakai o ke kalani hookahi.

 

Ma ke noi a Mr. Duncan ua hoopaneeia ka halawai a ke Komisina mamuli o ka make ana o Mr. P. C. Jones, a hui hou i ka la 2 o Mei 1922.

 

GEO.P. COOKE,

Lunanui Manahooko me Kakauolelo.

 

Ua haawiia aku nei ke kauoha i ka Lunanui o ka Hui Hanai Pipi o na keiki Cooke, oia hoi o Mr. Conant e hookaawale i hookahi haneri puaa wahine ohi no ka hoopiha ana aku me kekahi ke‘a, a hookaawale ia mau puaa no ke kuai ana aku i na kanaka Hawaii e hoi aku ana i Molokai ma ke ano he mau kumulau.

 

O na puaa ulaula keia, a e loaa ana he hoomaka koke ana me keia mau puaa, he elua a ekolu kumulao a ka ohana hookahi. He hana mai kai keia a Mr. Cooke o ka ae ana mai, e, hana i keia hana no ka pomaikai o na kanaka e hoi aku ana maluna o na aina hoopulapula.