Ka Nupepa Kuokoa, Volume LXI, Number 16, 21 April 1922 — HE HANA KU I KE ALOHA OIAIO. [ARTICLE]

HE HANA KU I KE ALOHA OIAIO.

Ma ka hui hapa-makahiki, i malamaia ae e na hoahanau o ka Hoomana o na La Hope nei ma Laie, ma ka pule aku la i hala, o kekahi mea ano nui i laweia mai e noonoo, o ia no ke kukulu ana aku i home, no na hoahanau nele, pilikia a palupalu o kela hoomana; o keia kekahi o na hana pookela loa, i ku i ke kulana kokua oiaio i na hoa kanaka, o ke ano Kristiano. Ua hoikeia mai i keia keena, ina no ke kukuluia aku o kela home ma Laie, aole ia elike m# na home e ae, o ke ano manawalea, no ka poe pilikia, aka e konoia ana no ka poe e hoi ana maloko o kela home e noho ai, e hana i kekahi mau mea, i ikeia ai ko lakou makaukau, e laa paha ka ulana moena, ka ulana papale, ka hana ie, ke kuiki kapa, ame kekahi mau hana lehulehu e ae, i kamaaina i na Hawaii, ma ko lakou lawelawe ana i kela hana, e kokua nui mai ana ia, i na hoolilo kumau, o ka malama ana i kela home, a e kokua pu āku ana no hoi ia, i ka poe apau e noho, ana maloko olaila. Ma ka manaoio o keia pepa, o ka hoihoi ana aku i ka poe nele, pilikia a kupono ole ka noho ana me ko lakou mau ohana, ma na wahi, i hoomakaukauia no lakou, malalo o na kokua manawale'a ana mai a ka lehulehu, aole ia he hana kokua aloha oiaio aka e hoonohoia aku lakou, me ke a'oia aku e lawelawe mai i kekahi mau hana, e hiki ana ia lakou ke lawelawe; 0 ia hoi, e lilo ka poe e hoi ana ma kela mau home, i poe kokua ia lakou iho, i makepono ai na kokua e haawiia aku ana ia lakou He nui ka poe nele a pilikia iwaena o na Hawaii o na hoomana like ole e noho mai nei i keia la, eia nae, he mau haawina i kau mai maluna o lakou, malalo ona kumu lehulehu. O ka nele ame ka pilikia o ka noho ana, mamuli o ka uhauha, ka lealea, ame na kumu ano like he hana hewa loa, na lakou ka haawi ana aku i na kokua pili dala, i ka poe o kela ano; ua hoomahuahua aku kakou i ko lakou noho uhauha ana, mamuli o kela kauka'i mai i na kokua ana aku a na hoaloha ame na makamaka. O ka poe pilikia i'o maoli, mamuli o ka make ana aku o na kane, ka maikai ole o ka noho ana me ka ohana, me ka loaa ole o na hana kupono, e hiki ai ke malama mai ia lakou; he mea pono loa e haawila aku na kokua ana i ka kela ano, ma ka hoihoi ana maloko o ka home, elike me ia a na hoahanau Moremona e hoolala nei; e a'o aku lakou i kekahi mau hana, e hiki ai ke kuai hooliloia aku i na malihini, ame na kamaaina pu. E hooikaika aku i kela manao, ahiki i ke ku ana i home kokua, no na hoahanau pilikia o kela hoomana; e kukulu mai 1 kumu alakai, no na hoomana e ae iloko nei o ka aina, e hoohalike aku ai, no ka mea he hana kilakila, a pookela loa ia, iloko o ko lakou ola Kristiano ana. Ke ole makou e kuhihewa, aia he ahahui kokua i ka poe nele a pilikia, e ku nei iloko o ka hoomana Kakolika, he kokua nae ia, i kauka'i ole ia no ka poe pilikia wale no, aka e kokua pu ana i ka poe kino ikaika kekahi, ma ka loaa ana ia lakou he mau hoonaauao kiekie ana, ma kekahi mau'ike, e pomaikai ai ko lakou noho ana, pela hoi ka hoolako ana aku ia lakou, me na paani hooikaika kino, e loaa ai ka ikaika kupono o ke kino. . Aia no lioi he mau ahahui kokua manawale'a e ku nei iloko o na hoomana lehulehu o kakou; he mau ahahui nae ia i kukuluia, no ka haawi ana aku i na kokua ana iloko o ka wa o ka ma'i ua kupono no kela ahahui e ku mu aku ma na hana i hoalaia ae ai ia mau ahahui aka no na Hawaii i halawai maoli, me na auiui o ko ke kanaka ola ana, e loaa ole ai ka puukalahala ma kekahi ano; o keia ka home kupono e hoi ae ai e noho; kahi e hiki ai i ka poe pilikia, e hoikeike maoli mai ai i ko lakou kokua ana ia lakou iho, ma ka hoauhee ana aku i na manao pilihua, a hoopiha ifio ma ia makalua, i ka hauoli i'o, ka haawiila paha i loaa ole aku i ka hapanui o lakou ma ko lakou mau home ponoi. Ke ku i'o he home o kela ano ma Laie, o ka hoea ana mai ia i ka piha pono ana o na hana nui a kela hoomana, e hapai mai nei ia Laie iluna; o keia iho la kekahi hua maopopo loa, o ka uhane haipule oiaio, iloko o ka hoomana, aole hoi ma ka waha wale no ka olelo, he paakiki nae ma ka hooko ana. Nolaila, mai lilo keia hana kukulu home, no ka poe pilikia iloko o ko oukou hoomana e na Moremona, i mea lealea kamailio wale iho no, ake e ku aku ia iloko o ka noonoo o na hoahanau Moremona apau, a e lilo hoi i kiahoomanao, e poina ole ai ka lehulehu maloko nei o keia Teritore.