Ka Nupepa Kuokoa, Volume LXI, Number 15, 14 April 1922 — E Ili Aku na Ahewa ma Kahi i Pili.i ka Hewa [ARTICLE]

E Ili Aku na Ahewa ma Kahi i Pili.i ka Hewa

O kekahi o na nuhou ano nui iloko o keia mau la e nee nei, o ia no ka loaa ana aku, mahope o ka hookia ana o na buke o ka makeke kulanakauhale, o ka pokole ana o kekahi huina dala mahuah'ua o ka makeke, he pokole hoi, i kau aku ai ke ko'iko'i malūna o Mr. Wm. E. Miles, ka mea malama buke mua o kela makeke. O kona pili i'o i ka hewa ame ka ole, he ninau ia na na kiure kiekie ame ka aha hookolokolo e hooholo mai, ma ko ka lehulehu aoao nae, ke ku nei lakou a koi aku, e laweia ae na keehina wikani apau, no ke kau aku o na ahewa ana a ke kanawai ma kahi i pili i'o i ka hewa. Ma ka manaoio o keia pepa, aole i kaawale ae ka lunanui o' kela makeke mai ke kau ana aku o kekahi ko'iko'i nui, no ke ano o ka lawelaweia ana o na hana o ka makeke; a ina i makemake kakou, e hookauia ae ka makeke, ma ke kulana holomua, e poho ole ai, he harfa naauao, ke koho ana i kekahi kanaka makaukau, a i kamaaina i na hana o ka makeke, ma ke poo o kela makeke. / Ke hopuhopuia mai nei na kamalii hele o ka po, i keia manawa; nolaila e makaala na makua ika lakou poe keiki, o paa auanei i ka hopuia. Ua aeia na keiki e hele pu ana me ko lakou mau makua, aka no na keiki auwana, c loaa aku ana mahope o ka hora ewalu o ka po, aole he mau kumu kupono no ko lakou hele ana ma na alanui, koe wale no ka maauhele i ka po, o n keiki o kela ano, e hoopaaia lakou ma ke kula o Waialee e pono ai.