Ka Nupepa Kuokoa, Volume LXI, Number 11, 17 March 1922 — He Mea e Hauoli ai ka Manao [ARTICLE]

He Mea e Hauoli ai ka Manao

He mea na ke Kuokoa e hauoli nei, mamuli o na hoike i loaa mai i keia keena, eia na Hawaii ke pii mahuahua loa nei, ma ka hoahu ana, i ka lakou mau kenikeni liilii, iloko o keia mau la, maloko o ka banako, Hawaii Bank of Commerce, he banako hou, o ka weheia ana ae, no na hana hoahu liilii. O keia ke keehina hikimua, o ka hoea aku i kahi o ka noho kuonoono ana, he pohaku paepae hoi, nana e hapai ae ia kakou, na Hawaii mai ke kulana nele, a i ke kulana lako, nolaila e hoomau aku i kela hana maikai, e ohi no auanei i na pomaikai mahope aku. t 'E hoopau Lka noho uhauha ana, i ka hoomaunauna wale ana i na kenikeni liilii e loaa nei ia oukou e na Hawaii, a e hoomanao mau, o ka mea i loaa he waihona kona maloko o ka banako, oia ke lanakila ana i ka wa. o ka pilikia e hoea mai ai. Mai. hoonawaliwali i keia hana maikai! O ka ahamele me na hana hoohauoli, a hoikeike, i haawiia ae e ke Kalapu Hoeueu Hawaii, maloko o ka Halekeaka Liberty, no na po hope ekolu o ka pule aku nei i hala, o kekahi ia o na ahamele ku i ka nani, me ka maikai maoli o na mea apau i hanaia mai, ka mea i haawi aku i na manao mahalo kui'o iloko o na malihini ame na kamaaina pu, i ike i na hana o kela mau po ekolu. Ua hoike mai ko ke kulanakauhale nei poe, i ko lak<pu mau manao kokua, no ka o kela ahamele i haawiia, mamuli o ka manaoio, o ka waihona i makemakeia ai e loaa, ma kela hooikaika ana, no ke kokua ana aku ia i ka waihona, hoonaauao o na keiki Hawaii, hana hoi, a ka lehulehu i hoike ae ai i ko lakou kokua oiai ma ka aole ma ka olelowaleno. \ Ua ku a hoowahawaha maoli ke komite kuwaena Demokarata, i na hana hailuku a kipehi kalaiaina, a ka poe haiolelo, e kokua nei ia McCandless, no ke kulana elele lahui, pela i haawiia ae ai ke kauoha i ka poe haiolelo apau, no ka pono o kela moho, aole e kamailio hou i na olelo hoinoino pilikino, ma na wahi haiolelo akea. Eia ka olelo kaulana ke ku nei : "O na ilio i paoa ka waha i ka ai i ka huamoa, he ttana paakiki ka hoopaū ana ia hana."

Ke hauhili mai nei ka ai a Kawele-a i ka poe haiolelo e kakoo nei ia McCandless i moho elele lahui i Wakinekona. Ma ka halawai malalo o Aala ma ka po o ka Poaono aku nei i hala, i hoike ae ai o George Kekoa Ah Nee, ke kakauolelo a Ke Komite kuwaena Demokarata, o Kauka Raymond, ka mea nana e kokua nei i ke dala, no ka uku ana i na hoolilo kalaiaina o Mrs; Mary Atcherley; k'e hoole loa mai nei o Kauka Ravmond, aole ana wahi keneka iki no na hoolilo o Mrs. Atcherlev, a oki loa aku ke kakoo ana iaja ame Kumalae. He hauhili mai hoi kau a koe aku!

Ke oili aku nei ke Kuokoa, me kona kino hou, o ewalu aoao, me ewalu kolamu o ka aoao; me ka lana mau o ko makou manae, e ku mau aku ia, i kukui hooinalamalama no na home