Ka Nupepa Kuokoa, Volume LXI, Number 10, 10 March 1922 — Page 1

Ka Nupepa Kuokoa

 

MAHELE ELUA                   NUPEPA KUOKOA             MAHELE ELUA

 

 

 

 

He Moolelo no Pita Nikola

a i ole

Ke Duke i Haalele Aku i Kona Kula na Hanohano a Lawe Mai i ke Kulana Makainana

 

            “ E hoi i’o paha oe e Beka, aia a ka la apopo, alaila lawe mai oe i kela mau buke, ia wa e hoomaka hou ai ko’u a’o ana ia oe i ka himeni.  O keia kekahi o na kanaka paarula ole. o ka hoopuka ana aku nei imua ou, i na olelo kupono loe. He kuleana anei kekahi ona e kamailio ai i na olelo o kela ano?”

            “Aole loa ona wahi lihi kuleana maluna o’u, aka no ko’u makemake ole e hoala mai i kekahi pilikia, malia he oi aku paha ka pono ia’u e haalele iho i kou hale nei,” i pane mai ai o Beka, me ka wiwo ole no na olelo hooweliweli a Keka Wala iaia.

            Hele pu aku la o Nikola me Beka, a hemo mawaho o ka hale, alaila huli mai la imua o Beka, me ka i ana mai: “Aole loa au hopohopo ana no kekahi pilikia, aka ina he pilikia i’o kekahi, alaila mai ia Keka wale mai no ia, aole mai kekahi mea okoa ae.”

            “Ua maopopo ia’u na mea apau, pehea e hele ana anei oe e Beka me a’u?” wahi a Keka, a no ka ike ana aku o Beka i ka hele o Nikola mamua, ukali mai la oia mahope, me ka hahai aku no hoi o Keka mahope ona, a o ia ka Beka i pane mai ai.

            “E hoi aku oe ihope loa, aole e hookokoke mai ia’u!”

“Aole au e hoolohe aku ana i kau mau olelo!” i pane aku ai o Keka Wala, me ka leo pekanana.

            Hiki hou ole iho la ia Nikola ke homanawanui, nolaila hopu mai la oia i ka lima o Beka, a alakai aku la mamua, me ka huli ana mai imua o Keka, a kamailio mai la: “E noho iho oe e Keka Wala maanei ahiki i kuu hoi hou ana mai, iloko o na sekona pokole wale no.”

            Ua kuhihewa loa o Keka, e maka’u ana o Nikola iaia, aka ma ke ano nae o ka leo o Nikola i pane mai ai aole loa he wahi maka’u iki iloko olaila, aka noonoo iho la nae o Keka, malia paha no ka maopopo ole i ua a Nikola, ka mea e loaa aku ana iaia, pela i komo ole ai ka maka’u iloko ona.

            “Ua hiki hoi paha oe e kena kanaka e hoonana ana, e ike ana oe, i ko mihi me ka walania, no ka hoao ana mai e ku mawaena o’u ame Beka,” i namunamu liilii iho ai oKeka, iaia e ku aku la nana i ka hele o Nikola me Beka.

            Aole i loihi kela hele pu ana aku o Nikola me ke kaikalika ke kau la ma kona waha, a iaia i hoea mai ai imua o Keka pane mai la:

            “Eia au imua ou e Keka a ina he mea kekahi au i makemake ai e kamailio mai ia’u, o keia ka manawa!” “Ae, he mea ka’u i makemake ai ia oe e kena kanaka ino lapuwale o ka manao ana, o kou akamai i ka hookani piano. o ka maunu pahele iho la ia e lilo aku ai o Beka ia oe.  Eia mai ka mea e hiki hou ole ai ia oe ke pulapu i kela kaikamahine,” o ka wa no ia o Keka i lele mai ai, me ka iho palua ana mai l kana mau puupuu no ke poo o Nikola.

            He kanaka kino ikaika o Keka Wala. a ua maka’uia oia e kona mau hoa, me ka aa ole o kekahi o lakou e ku aku imua ona, a mamuli o ka ikaika o kona kino, ua manao maoli no ua kanaka nei, he hana maalahi loa nana ka hoohamau ana aku i ka waha o Nikola e hiki hou ole ai iaia ke kamailio mai i na olelo hoinoino iaia nei.

            Ua kuhiheqa loa nae kela noonoo o Keka Wala, no ka mea aole o Nikola he holona ma ka hana ku’iku’i puupuu, he hana ia nana i a’o a ailolo, a ua komo oia iloko o na lealea hooikaika kino o na ano like ole, a oia kekahi o na kanaka akamai loa i ka hakoko; eia nae, aohe ana hoikeike ana aku i kona makaukau, imua o keia kanaka, oiai ua lilo ka inaina ame ka lili, i kumu e olalau ai ke ano o kana ku’i ana mai iaia nei.

            Ma kela lele mua ana mai a Keka maluna o Nikola me ka manao e loaa pono mai ana ke poo i kana mau puupuu, alo ae la o Nikola, a kikihi ana ua kanaka nei i kahi e. Huli hou mai la oia ihope, me ka holo ana mai e ku’i ia Nikola, ua alo hou ae la no oia a hala aku la ka puupuu a Keka ma kekahi aoao, eia nae o kona palule ka i nahae, me ka manuhe’e ole aku o kekahi wahi o kona kino.

            “E ke kanaka maka’u wale, e ku mai a hakaka elike me ke kanaka, aole elike me ke kekahi ilio kawa-u,” pane mai ai o Keka me ka piha i ka hoona@iuki. no kona hoohokaia e Nikola.

            “He nui loa ka manawa no ka hakaka ana, ke nana wlae aku nei no au, i ka nui o kou ike hakaka, aia hoi a li’uli’u iho. hoikeike aku au i ke ano o ka hakaka ana, a ka poe hookani piano.”

            “Eia mai ko mea e ike ai,” wahi a Keka, me ka holo pololei ana mai imua, a puliki mai la ia Nikola, mamua nae o ka paa ana mai o Nikola i na lima o ua kanaka nei, ua loaa muya aku la ka papa auwae i ka puupuu a Nikola, a auku ana ke poo iluna, o ia no oe o kekahi pipi. i owiliia ae ka a-i, a i ka lua mai hoi o ka puupuu, uwoki ae e kahe awai ana ke koko mai ka ihu aku.

            Ua nui kela eha i loaa ia Keka, aka ke ano mau nae o na kanaka hohewale, aoel i makemake e kaa ka lanakila ma ka aoao o ko lakou mau enemi, hoomaka mai la oia e ku’i i kana puupuu, me ka pa lihi ana mai ma ka papalina o Nikola, o keia ka mea nana i hoopii mai i ka wela iloko o ke keiki Pelekane, he hookahi no ia puupuu o ke ku’i hou ana aku. loaa pono aku la ma kekahi maka o Keka, pau ke kaakaa ana, a koe wale no he hookahi maka, e nanakee mai ai i kona enemi.

            “Ea, aole anei oe i lawa aku la e Keka? E hoopau ko kaua hakaka ana, a e noho kaua e kamailio, ma na mea e liko ai kaua i mau hoaloha oiaio loa,” i pane aku ai o Nikola.

            “Aole loa au e haawipio malalo au e kena kanaka iho,” wahi a Keka, me kona holo hou ana mai imua; aia ka manao hoohuoi iloko o ua kanaka nei, aole i mamao loa aku o Beka ma kahi e, aka aia no kela kaikamahine maloko o ka nahelehele kahi i noho mai ai nana i ka laua nei hakaka, a e lilo ana i mea hilahila loa nona, ke nui kona eha ma kela hakaka ana, nolaila e hoao ana oia elike  me ka hiki iaia, i wahi e kau aku ai kekahi eha maluna o Nikola.

            Ma keia hakaka hou ana a laua, ua nahaehae maoli ka palule o Nikola, me kona loaa ole mai nae i ka puupuu a Keka, e pono ku’i mai la iaia, a i kela ame keia manawa ana e ku’i aku ai, e loaa mau aku ana ma ka papa auwae, a ma ke poo no hoi o Keka, ahiki i kona pane okoa ana aku:

            “Pehea, aole anei oe i lawa aku la i kena mau kalo paa?” wahi a Nikola me ka leo o ke kanaka keonimana. “Aole au i lawa, o oe ka’u e hookau aku ana i kekahi eha, e hiki ole ai ia oe ke hoopoina ma keia mua aku.”

            “Ae, ua hiki, ina o kou makemake ia ea, alaila eia mai ka ai hoopau a ke keiki Pelekane,” o ka wa no ia i oloio aku ai ka puupuu a Nikola, a loaa pono aku la ma ka papa auwae o Keka, uwoki oe e kikihi ana, a waiho palaha ana iluna o ka honua, aohe wahi mea a onioni ae.

            He hana maalahi loa na Nikola, ka hoeha ana mai ia Keka, i kinohi o ko laua hakaka ana, ke manao oia e hana pela, a no kona manao hoi, malia paha e hoopau ana no o Keka i kona hakaka ana, ke ike iho i kona pilikia, pela wale no oia i hooloihi ai i ka hakaka ana.

            Oiai o keka e waiho ana ilalo me ka onioni ole ae, kulou ihe la o Nikola, a kaili mai la i ka pu panapana, mai ka pakeke ae mahope o ka lolewawae o Keka, ua ike oia, ina e ala hou ae ana kela kanaka iluna, aole ana e nele kona ki mai iaia nei i ka pu panapana, nolail ae pono oia e lawe i ke kulana makaala ma kona aoao. Laia nae i ku pololei ae ai iluna, a hookomo ae la hoi i ka pu panapana a Keka maloko o kona pakeke, ike aku la oia i ke ku mai o Beka mamua pono mai ona, a o ia ka Nikola i hooho ae ai me ka piha kahaha:

            “Ea, aole au i manao, e hoi hou mai ana oe e Beka. Pehea ua ike mai nei anei oe i na mea apau i hanaia?” wahi a Nikola, me kona nana ana aku no kahi a Keka e waiho mai ana.

            “Ae, ua ike au i na mea apau. he keu aku ke ku i ka weliweli ame ka maka’u,” wahi a ke kaikamahine opio, me ka palulu okoa ana ae i kona mau maka.

            “Ua hoao au elike me ka hiki ia’u, e hoopau i ko maua hakaka ana, aole ne he wahi mea a maliu iki mai o Keka, o ka hopena iho la no nae keia au e nana aku la, no na kanaka paakiki, no ka manao paha o ka nui o kona kino ame ikaika, o ke kumu iho la ia e kaa ai ka lanakila ana kona aoao.”

            “Ua ike au i na mea apau, ua kaawale loa oe mai na ahewaia mai.  Ua eha no oia mamuli o kona paakiki, a oia no hoi ka mea nana i hoala mai i ke kumu o ko olua hakaka ana. Pehea ua nui anei ka eha i loaa iaia?”

            “Aole o’u manao ua eha loa oia, o ka’u wale no e kauoha aku nei ia oe e Beka, e haalele koke mai oe i keia wahi!”

            “Heaha ke kumu o kou kauoha ana mai ia’u e hele mai keia wahi aku?” i pane mai ai o Beka, me kona hoihoi ole iho la e haalele mai ia Nikola.

            “No keia kumu, ina e ike mai ana o Keka Wala, o oe pu kekahi maanei. e oi loa mai ana ke ano p kana mau hana, mamuli o kona hilahila, no ka ikeia ana o kona pilikia, nolaila no kou pono,a no ko kaua pono pu no hoi kekahi, e ae mai oe i ko’u manao, e hookaawale koke aku i keia manawa mamua o kona ala ana ae iluha.”

            Ike koke mai la ke kaikamahine opio i ka naauao o kela mano o Nikola. o kona kaha aku la no ia hele, me ka paku’iku’i olelo hou ole mai, a iloko o ka manawa pokole loa. i nalowale aku ai oia iloko o ka ululaau.

            Aia no o Keka Wala ke waiho malie la, a i whai e hoi hou mai ai ka ikaika iloko o kona kino, kii mai la o Nikola i kekahi po’i wai i kona hale. a hele aku la no ka hamohamo ana aku i ka helehelena o Keka, no kekahi manawa, aole no hoi i loihi kona lawelawe ana i kela hana, ala ae la o Keka iluna, anana mai la me na maka hookokoe ia Nikola.

            “Ke kaumaha loa nei au no keia pilikia i loaa ia oe e Keka, aole nae no’u ka makemake hakaka, aka nau i kono mai ia’u, o ka mea apiki nae, o oe o kaua ka i loaa i ka pilikia.”

            Hamohamo wale ae la no o Keka ma kona maka i eha, me ke ku ana ae iluna, alaila haha ae la ma ka pakeke mahope o kona lolewawae, ike e mai la nae o Nikola i ka manao o kela haha ana ae a Keka i ka pakeke o kona lolewawae, a o ia kana i pane mai ai:

            “Ua laweia mai nei ko pu panapana e a’u, pela i loaa ole aku la ia oe maloko o kau wahi i waiho ai,” wahi ana me ka leo o ka mea i piha ole me ka pihoihoi.

            “E haawi koke mai oe i kela pu!” i okalakala mai ai ka pane ana a Keka.

            “Aole ia ae ia wahi, o ka olelo mai i ko’u kuleana ole e paa ai i ka pu panapana.”

            “Ke hoike aku nei au imua ou e Keka i ka nui o ko’u kaumaha, no keia pilikia mawaena o kaua. P ka’u nonoi wale no ia oe, o ia kou hoopau loa i ka manao huhu ia’u, a e lilo kaua i mau hoaloha maikai ma keia mua aku.”

            Nana wale mai la no o Keka i ka lima o Nikola, o ka hoopahola ana aku imua ona, no ko laua lululima ana aohe nae he wahi mea a hopu mai, aka i mai la i na olelo a ke kanaka hoomauhala:

            “Ua hiki hoi paha, e ike ana oe e keia kanaka hookano e hoea mai ana ka la e uku pono ia ai oe, no kau mau mea i hana mai ai ia’u i keia la,” wahi a Keka, me ke kaha ana aku hele.

            Ike koke iho la o Nikola, ua lilo kela kanaka he enemi ino loa nona, alole nae e hiki iaia ke hoahewa iho no kana mea i hana aku ai i kela kanaka, koe wale no kona mahalo no kona a’o mua ana i ka ike ku’iku’i puupuu, ina paha aole oia i hoomaamaa mua i ka pelepele, e laa keia halawai ana me kekahi kanaka ino, he pomaikai kona pakele, mai ka hookauia mai o kekahi poino maluna o kona kino.

            Ke hoomaikai pu la hoi ua o Nikola, no ka hiki ana iaia ke hoohoka ia Keka Wala, ma ia ano, e noho mana mau aku ai oia maluna o na kanaka apau e noho hana ana malalo o Makuaia; ina nei no kona lilo he pio na Keka Wala o ka hoea ana mai ia i ka pau ana o kona mana, ma ke ano he lunanui na Makuaia.

            He hookahi mea maopopo loa, ina o Nikola ka i lilo i pio na Keka Wala, alaila o Keka ana ke noho mana maluna o na kanaka apau malalo o Makuaia, ua pomaikai loa nae ua o Nikola, ua hiki iaia ke hoohoka i kela kanaka, a ua loaa hoi he haawina a’o maikai loa iaia, e aa hou ole mai ai oia e ku imua oia nei, koe wale no paha ka hoohalua ana mai i kona ola, ma ke ano o ke kanaka hohewale.

            Aia o Nikola ke ku la me ka noonoo nui ana iloko ona, ina paha ua pono kela haawi ana aku i na puupuu peku i oki ia Keka, o kana i hooholo iho ai, ua pono kana mea i hana aku ai, no ka mea ua hoolilo kahiko mai o Keka Wala iaia i enemi ino no kela kanaka.

            Ua kamailio mua aku ua o Nikola ia Beka, no kona makemake ole i ka hakaka, aka nae, i ka hiki ole ana iaia ke alo ae, mai ke kupale ana ma kona aoao, ua kono ia mai oia e haawi aku i kona enemi, i kekahi mau kalo paa, e kaanini ai ke alo iluna o ka honua’ a ina he mau hookolo ana mai kekahi. ma kekahi ano no ka hooili ana mai i na ahewa ana, maluna o ka mea i hewa, aole he wahi kanalua iki o Nikola, no kona pili ole i ka hewa, aka e ili aku ana na ahewa ana maluna o ke kanaka, i aa mai e hakaka me ia nei.

            Aia na manao kaumaha iloko o Nikola, no kana mea i hana aku ai malua o Keka, aole nae no ka eha ana o kela kanaka iaia, aka no ka hookaulana wale ia ae o ka inoa o Beka Kameona, ma ke ano imihala no ka hele mau mai e ike i ua o Nikola, a no ke a’oia o ke kaikamahine i ka ike himeni. Ke hopohopo loa la oia i ka mea a na kanaka o kela wahi e kamailio mai ai nona ame Beka, oiai ke hoomaopopo la oia, e hele aku ana o Keka Wala, e kukala ma kela ame keia wahi, no ka pipili mau o Beka i ua o Nikola.

            Iaia e noonoo ana i na mea like ole, hooholo iho la kona manao, he oi loa aku ka pono, e noho hamau loa oia, no ka hakaka mawaena ona ame Keka; ke maopopo la no hoi iaia, e noho hamau ana  o Keka, no ka mea he hana hoohilahila wale no kona hoao ana ae e kamailio no kela hakaka ana o laua, aole ana e nele kona paheneheneia mai e na mea apau, i kona hupo, ka maka’u wale, ame ka ikaika ole.

            Ma kela wahi, pau ae la ko Nikola manao, e hela aku e hui pu me kona haku, aka huli hoi hou mai la oia no kona hale, a haule aku la maluna o kona moe hooluolu, aia no kona puoho ana mai, ma na hora o ka uwina la.

            Iaia i haalele iho ai i kona hale, no ka hele ana aku e hui pu me Makuaia ma ka aina ahiahi o kela la, hoolalau aku la kana hele ana ma ke kahawai, ahiki i kahi o ka hale o Beka i ku ai, nana aku la oia mawaho o ka lanai, e noho mai ana o Beka, heluhelu i kekahi o kana mau buke, i haawi makana aku ai i kela kaikamahine.

            No ka lilo loa o Beka i ka heluhelu, aole oia i ike mai i kela hele ana aku o Nikola, a i puiwa oia, i ke kani o ka puka-pa, i alawa mai ka hana o ua kaikamahine nei, eia ka o Nikola, ke kumu o ke kani o ka puka-pa, a ku koke ae la oia iluna, me ka haawi ana mai i kana kunou i ke kanaka, i hoolilo mai iaia, i hoaloha no ia nei.

            “Ke kaumaha loa nei au i ka hoike ana aku imua ou e Nikola, ua lilo oe ame Keka Wala, i mau enemi ino loa, mamuli o’u.”

            “Aohe a’u mea e kaumahaai, no ka mea, mamuli o ka hiki ana ia’u ke hoolilo aku ia Keka i pio na’u. e hiki pono auanei ia’u ke lawelawe aku i ka’u mau hana ma keia wahi, e hiki ole ai i kekahi kanaka, ke hookiekie mai maluna o’u. Eia ihea o Keka e ike ole ia aku nei”?

            “Aole au i ike iaia, malia paha aia no iloko o kona lua kahi i noho ai, e kakali ana ahiki i ka poeleele ana, o ka manawa ia e hemo mai ai iwaho,” wahi o Beka, me ka noke okoa ana ae i ka akaaka.

            “Aole he kumu e ae o ko’u hoomaalo ana mai nei maanei, aka no ka papa ana aku no ia ia oe, aole e kamailio wale ae, i na mea i hanaia i keia la, he hana hoohaahaa aku ia ka Keka, me ka hoohilahila pu no hoi iaia.”

            “Ua pono no kona eha ana, ua ike no kela kanaka. aole ona kuleana maluna o’u, lili wale mai no nae, no ko’u hele aku i kou hale. E hoohilahila ia no oia e pono ai!”

            “Eia hou keia, ina ua manao oe, e lilo ana kou hele ana ae no ko’u hale mai i kou hale nei, a maanei au e a’o aku ai i ka ike himeni ia oe.”

            “He oi loa ae ka pona owau no ke hele aku i kou hale, no ka mea ua lilo ko’u hoea ana aku imua ou, a lohe i ke ano o kau paani ana i ka piano, me he mea la, ua komo aku au iloko o kekahi aupuni okoa.

Heaha ka’u nana i ke kamailio mai o na kanaka e pili ana ia’u, oiai, owau no ko’u haku, aole he mea e ae i kuleana maluna o’u?”

            “Ke hauoli nei au no kena mau olelo au: o keia iho la no ka manao nui o ko’u hele ana mai la e ike ia oe, aka ua pau ae la keia pohihihi. Pehea e hele ae ana anei oe ma ka la apopo no ko’u hale?”

            “Ae, e hoea aku ana au no kou hale, i ka wa e pau ai ka’u mau hana.”

            Aole he kamailio aku ua o Nikola, no kana hana nui ma kela po, o ia ka hele ana aku e hui kino, me ke kanaka nana ka pepa hoolaha a laua i ike ai, aia nae iloko o ua o Nikola ka manao paa, aia a loaa kekahi mau ike mopopo loa e pili ana no kela kanaka, alaila kamailio mai oia ia Beka, i kana mau mea i ike ai.

 

 

MOKUNA  X

 

            Me he mea la, aole he manawa e ae a Mr. Makuaia i hoike mai ai i ka mohala maikai o kona helehelena elike me ka po ana iho o kela la, aole loa he wahi hoailona iki, o ka pihoihoi ame ka maka’u iloko ona; oiai nae he po kela no kekahi hana ano nui loa.

            Ua hoohalaia kekahi manawa o kela ahiahi e Mr. Makuaia mae Nikola ma ke kamailio ana, me ka hoakaka mau aku o Nikola, i kona manao, no na mea pono e hanaia no ka palekana o ka ululaau, a no ke kokua ana aku i kana mau hoakaka, ua holo okoa mai la oia e kii i kana kii i kaha ai, no na hale kiai i manaoia e kukulu.

            Iloko o keia mau kamailio apau a Nikola, he kunou wale no ke poo o Makuaia, ke ike la no nae o Nikola, he uukuloa na olelo i komo aku iloko o ke poo o kona haku hana, a he liilii loa kana mea hiki ke hoomaopopo mai, i na kii e waiho la imua o kona alo, aka ana ka noonoo o kela kanaka i kahi e loa.

            I kela ame keia manawa. e alawa mau aku ana ka nana ana a Makuaia i ka uwaki ma ka paia, a e wehe okoa ae ana no hoi i kana uwaki, aole nae ka pihoihoi, aole hoi ka maka’u aka o ke kuoo ka hoailona a Nikola e ike aku la ma ka helehelena o kona haku.

            I ke kani ana mai o ka hora umi, ku ino ae la o Makuaia iluna, me ka hele ana aku no kahi i waiho ai o ka pahuhao, wehe mai la i ke pani, a lalau aku la i na dala a Nikola o ka haawi ana aku iaia.  I ka paa ana mai o kela mau dala iloko o kona lima, hele ae la no kekahi wahi keena uuku, i hanaia ma ka paia o kona rumi, a lawe mai la he kukui lamalama uwila. alaila waiho ae la maluna o ke pakaukau. no ka nana ana iho, ina paha ke mau la no ka maikai o kela lamalama, aole paha.

            “Ua makaukau anei oe, e Nikola me kau mau pu panapana?” i huli mai ai ua o Makuaia a ninau i ke duke opio. Kunou aku la ke poo o Nikola, e hooia aku ana, no kona paa pu ana mai i kana mau pu panapana, a pane mai la:

            “He makaukau mau au me ka pu panapana i na manawa apau, aka aole nae au i manao, e ki mai ana kela kanaka ia’u i ka pu, pehea la kou manao e Mr. Makuaia?”

            “Aole o’u manao, e hoopilikia wale mai ana kela kanaka ia oe ma kekahi ano, no ke mea aole o oe kekahi i kuleana iloko o ka hana mawaena o’u ame kela kanaka. He elele wale iho no kou kulana, no ka hooko ana aku i ka’u mau kauoha, o ka iini iloko o’u, o ia no kou hooko ana i ka’u mau kauoha apau me ka pololei. Ua haawi aku au i ko’u hilinai piha ana maluna ou e Nikola, nolaila, me ia hilinai o’u. pela wale no au e hoouna nei ia oe ma keia hana nui. E kamailio mai ana kela kanaka ia oe i kekahi mau olelo, a e hoolohe pono loa oe, a i kou wa e huli hoi mai ai imua o’u, e hoike mai oe ia mau olelo apau, me ka poina ole i hookahi huaolelo.”

            “Aole ia he hana paakiki, o ka hooko ana aku e kuu haku, ina o kena wale ae la no kau mea i makemake ai na’u e hoike aku ia oe.”

            Aia no na bila dala iloko o ka lima o Makuaia kahi i paa ai, me he mea la, e kaupaona ana oia i kela mau dala, me ke hoomau ana mai i kana kamailio ana:

            “Ke makemake nei au e hele koke oe i keia manawa no ke kumulaau mapala, mamua o ka hoea ana mai o kela kanaka. E kaa ma kou aoao ke kakali ana, a i kona wa e hoea mai ai e hoomalamalama aku oe i kona helehelena me ka lamalama uwila, a e mau kou paa ana i ka lamalama i hiki ai ia oe ke hoomaopopo loa i kona helehelena, oiai olua e kamailio ana, a ma ia ano no hoi, e hiki ai iaia ke helu pono mai i ka nui o kau mau dala e haawi aku ana.

            “Oiai oe me kela kanaka, e hoomamao oe ia oe ia iho mai iaia mai, o kau wale no ka hoomalamalama aku, i wahi e hiki pono ai iaia ke helu i na dala, ina paha ua pololei, elike me ka huina ana i makemake mai ai e loaa aku iaia. I ka holopono ana o na mea apau, a mamua o kou huli hoi ana mai, me ka haalele aku i kela kanaka, mai poina oe i ke kamailio ana aku iaia i keia mau huaolelo: “Mai hoopoina i ke koko maluna o ka pahi e Haka Kenede.”

            “Ke paanaau nei ia’u kena mau olelo, a pehea, ina he nui na olelo a kela kanaka i makemake ai e kamailio mai aiia’u, e hoolohe aku anei au ia mau olelo ana?”

            “O oe no ka lunakanawai ma ia wahi, nau e koho, no ke kupono o ka hoolohe ana aku ia mau olelo ame ka ole. Ua makemake loa au ia oe e Nikola, e makaala loa iaia. mai hoolalau kou mau maka ma kahi e: pehea he hikiwawe anei oe ma ka unuhi ana i kau pu mailoko ae o kou pakeke?”

            “Heaha ka manao o kena mau olelo hope e Makuaia.”

            “Eia no ka manao, ina he eleu loa oe ma ka lalau ana i kau pu panapana, a ki aku me ka pololei loa, alaila aole ou hopohopo ana. aka ina he ulolohi loa oe, a he ano pihoihoi paha kou, alaila e waiho malie kau pu iloko o ka pakeke o kou kuka, me ka paa mau no o kou lima i kela pu, a i ka manawa mua loa au e hoohuoi ai aia kekahi hana epa ma ka aoao o kela kanaka, o kou, wa ia e ki aku ai iaia, mai ka pakeke aku o kou kuka, me ka wehe oole mai i kela pu panapana iwaho.”

            Wehe ae la o Nikola i kana pu panapana a paa iloko o kona lima, me ka pane ana mai imua o kona haku:

            “Ua manao ka hoi au. aole la au e koiia mai ana e lawelawe aku i kekahi hana i ku-e ko’u ano keoninana!”

            “Aole loa oe e hoounaia ana e a’u ma kekahi misionja e hoopilikiaia mai ai kou ola, aole loa.:”

            “A pehea, ina he kanaka kela me ka manao hoopoino ole mai ia’u, alaila o ka manao ana e ki aku iaia, aole ia he hana o ke kulana keonimane.”

            “Aole au i olelo aku nei ia oe e Nikola, e ki aku i kela kanaka, o ka’u wale no i hoonaauao e aku nei ia oe, o ia kou makaala ana iaia i na manawa apau, i ka manawa mua loa au e ike aku ai, e hoopoino mai ana oia i kou ola, ina paha he pu kana, a pu ole paha, ia wa oe e kupale ai nou iho, ma ke ki ana aku i kau pu, o keia maoli no ko’u manao, i kamailio aku nei, aole ma kekahi ano e ae.”

            “Alaila, heaha iho la ke kumu, a kela kanaka e hoao mai ai e hoopilikia ia’u?”

            “Aole i maopopo ia’u, aka nae ma ka’u koho wale no, malia paha, i kona manawa e ike mai ai. he kanaka okoa loa oe, aole hoi owau, kana mea i makemake mai ai, e lilo ana ia i kumu e hoalaia aku ai kona inaina, a hoao mai oia e hoopilikia ia oe.”

            “Ina pela, ua oi aku no ka pono oe kino maoli no e Makuaia ke hele e hui me kela kanaka, i hookau aku ai oe i ka make maluna ona.”

            kulana mai la o Makuaia ihope. no kela mau olelo a Nikola, a e ole ke pakaukau. ina ua hina ua kanaka nei ilalo, no ka mea ua pololei ka Nikola mea i kamailio mai ai, aia iloko ona ka manao, e make kela kanaka, i makemake mai e loaa aku na kaukani dala mahuahua iaia.

            “Ua makemake oe e Makuaia e make keia kanaka; ua loaa mua ia’u kela ike ma ka po mua loa. o ko’u hoea ana mai no keia wahi, a hooko aku i ka’u hana kii. Nolaila e lohe oe e Mr. Makuaia i ko’u manao oiaio loa. aole o’u makemake. e hapala wale ko’u mau lima, me ke koko o kekahi kanaka hala ole.”

            “Aole loa au i koi aku ia oe, nau e pepehi i kela kanaka a make,” wahi a Makuaia, me ke ku pololei ana ae iluna, aia hoi ka pihoihoi ke nohoalii la ma kona mau maka. O ka’u mau olelo apau i kamailio mua aku nei, no kou palekana no ia e Nikola. Aole loa he wahi manao iki iloko o’u, e loaa kekahi pilikia ia oe ma kekahi ano, ina no ia he wahi mea uuku loa. Pehea, e hoi hope anei oe, me ka ae ole e hele aku e hooko i keia hana?”

            “O ka hana pepehikanaka, he hana ia, i komo ole mai iloko o ka aelike, no ko’u noho hana aku malaloo ou.”wahi a Nikola, me kona pane pololei ole aku i na olelo a kona haku iaia.”

            “Aole e hiki ia’u ke hele kino aku e hui pu me keia kanaka, a oki loa aku hoi ko’u hoouna ana ia Kaila, ma keia misiona, aka o oe wale no e Nikola. Ua hoohiki mai oe imua o’u, e hooko oe i keia hana me ka pololei loa, eia nae, ke ike aku nei au ma ke ano o kou mau olelo, ke hopohopo loa nei oe, i ka hele ana aku e hui pu me kela kanaka.”

            “He oiaio, ua hoohiki aku au imua ou, owau ka mea nana e lawe aku i ko mau dala, a haawi i kela kanaka; aole nae ma ke ano au e a’o mai nei i ka’u mau mea e hana ai, aka, alike no me ka’u mea i ike ai he pono. Aole au i ike ia mea he maka’u, me ko’u nana ole ae i ka nui o kou mau pu. Ina ua maopopo aku la ia oe, na ano a’u i haawi aku ai i ka’u hoohiki, no ka hooko i keia hana nui, alaila e haawi mai i na kaukani dala, a na’u aku ka hana i koe, me ka hoonui olelo ole.”

            “Ae. ua pono kena e Nikola, he keu aku maoli no paha ko’u hupo. o ke kamailio wale aku no i na olelo e hoonaukiuki aku ai ia oe. Ke holopono keia hana a kaua i keia po. e uku pono ia ana kou luhi.”

            Helu hou iho la ua o Makuaia i na bila dala, me ka haawi ana mai ia Nikola, a lalau aku la no hoi o Nikola, me ka hookomo ana iho, ma ka pakeke maloko o kona kuka, a hoomaka hou mai la o Makuaia i kana kamailio ana:

            “Aole au i ike i kekahi kumu kupono o kou noonoo ana, he makemake kekahi iloko o’u, e ki aku oi ia Haka Kenede a make. Aole anei he kuleana ko ela ame aeia e aupale nona iho? Ua loaa ia oe ke kuleana e kupale ai no kou ola.

            “E ae mai oe e Makuaia, e ninau aku au, ina paha he kumu kekahi au i manao ai, e hoopoino mai ana kela kanaka ia’u?”

            “Aole au i ike i kekahi kumu, aka aohe hewa o ka hoomakaukau e mamua o ka hoea ana mai o ka poino.”

            “Ina pela, ua lawa keia kamailio ana, a e hele au a hooko i keia hana; a ke makemake nei au e loaa keia hoomaopopo ana ia oe e Mr. Makuaia, aole e ili mai na ko’iko’i o ka ahewaia maluna o’u, ina e pilikia ana ka kaua hana ma kekahi ano, a halawai paha kela kanaka me kekahi poino.”

            “Ua maopopo ia’u kena mau mea au e kamailio mai nei Eia ka manawa ke nee nei imua, nolaila e hele oe e hooko i kau hana!”

            Me ka pane ole aku i kona haku, iho mai la o Nikola no ka hale malalo, a hemo aku la ma ka lanai mamua, a mailaila aku nowaho o ke kahua manienie, o kana mea nae i kahaha ai, aole oia i ike ia Mr. Kaila.

Ke hele la ua o Nikola ma ke kahua manienie, me ka nanea, ua kahea mai la nae kekahi o na kiai iaia, nolaila hele aku la oia e hui pu me kela kiai, no ka hoakaka ana aku iaia, e hele ana oia i ka holoholo, aka e hoi hou mai ana no oia no ka hale o Mr. Makuaia.

 

(Aole i pau.)