Ka Nupepa Kuokoa, Volume LXI, Number 10, 10 Malaki 1922 — Page 3
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
Lawe ponoi ae no kekahi kepani I kona ola.
No ka make loa o kona manaolana no kona ola loihi aku mamuli o ka eha o kona wawae ke kumu I manaoia ai no ko Suejiro Koshiji, he Kepani elemakule nona na makahiki he 54, I lawe ponoi ae ai I kona ola ma ke kakahiaka Sabati nei ma ka hora 3:45 o ka wanaao, maloko o kekahi hale ma ke alanui ololi kokoke I ka halema’i Kepani. He 15 minuke mahope iho o kona oki ana ae I kona kaniai a lele loa ae la kona aho.
Aneane he iwakalua-kumamakolu makahiki I hala aku nei ko Koshiji hoea ana I keia mau mokupuni, a ma ka mahina wale no o lanuari I hala aku nei kona hana ana I kona home, ma Kainaliu, Kona Hema Hawaii. Oiai oia e hana ana ma ka mahina o Augate I hala aku nai ua pekuia oia e ka hoki ma ka wawae, mamalo iho o ke kuli, a mai ia Manawa mai kela poino ana o kona wawae me ke ola ole. Mahope koke iho o kela eha ana o kona wawae, na hele ae la oia imua o ke kauka no ke oki ana I ka wawae I eha ai, a no kona ike I ke ola ole o kahi I okiia ai ua holo mai la oia I Honolulu nei ma ka la 20o Ianuari no ka lapaauia ana ma ka halema’I Kepani.
Ua oki hou ia kona wawae maloko o ka halema’I a ua laweia ka iwi. Ma ka Poaono aku la I hala ka ae ana mai o ke kauka iaia, no ka Manawa, mua, e holoholo mai ka Manawa mai o kona okiia ana.
O na hoolilo o kona noho ana maloko o ka halema’I Kepani na kona mau hoaloha e auamo ia mau hoolilo, o ia ka Ahahui Manawalea o na Kepani ka ahahui nana e malama a e kokua nei I ka halema’I. Malia paha e ola ae ana no hoi ia wawae ona, elike me kekahi poe no hoi e muumuu mai nein a wawae, eia nae ua pauaho koke iho la oia I keia ola ana, a hoopokole ae la I kona mau la ma o ke oki ana ae I kona kaniai.
Moku kekahi koa I ka pahi ma kekahi haunaele.
He koa no ka puali 11 a nona hoi ka inoa o Frank Valentine o 22 makahiki ka I moku ka ai, ka papalina hema ame ak lima hema I ka pahi ma ka po Poakolu nai, ma ka Manawa o ka ulu ana ae o kekahi hakaka maloko o kekeahi hale ma kahi kokoke I ke alanui Pauoa ame Nuuanu. Ua laweia ae ua koa la a ka halema’I o na poino ulia a malaila I lapaau mua ia ai, a mahope iho I hoihoi loa ia aku ai I ka halema’I o na koa ma ka Papu Kahauiki.
Mahope o ak laweia ana ae o ke koa I eha ai no ka halema’I e kekahi o kona mau hoaloha, ua hoounaia aku la kekahi mau makai o ka oihana koa amen a makaikiu o ke aupuni kulanakauhale ame kalana no kahi o ka hakaka a hou pahi I hanaia ai, a malaila I paa ai o Alice Kuala ame Catalino Rodrigues I ka hopuia no ko laua ninauia aku me ka hookomo pu ia ae o kekahi hoopii no laua no ko laua kue I ke kanawai hookapu waiona. He omole me ka okolehao ka I loaa aku maloko o kela hale aneane ekolu hapaha galani a laweia ae e ha makai I ka halewai I hoike ma ka aoao o ke aupuni.
Mahope koke iho o ka laweia ana ae o nawahine, ua laweia ae la e namakai he Poko Riko nona ka inoa o Santiago Torres, a hoopaaia ae I ka halawai no kona hookolokoloia, no kona hoohana ana I ka oi o ka pahi umiumi maluna o Valentine, ke koa I mokumoku ai I ka pahi. He pauku iwi paha ka hala I ulu mai ai kela hakaka.
Makaala loa ka poe kuai rama I na kanaka o ke aupuni.
Ma keia mau la e nee nei, eia na kanaka haihai kanawai a mauaauwa rama ke makaala loa nei I na kanaka o ke aupuni, ma o ka lawe ana I ke kelepona I mea nana e hoike mai, ina paha aia na kanaka o ke aupuni ma ua alanui kahi I hakilo ai ia lakou.
Ma kela mau la aku nei, ua hookani ae la kekahi poe I ke keena o Pat. Gleason, ka makai federala, a I ka hoolohe ana aku a kekahi kupakako oloko o ua keena nei, ua halo mai la ka mea nana I hookani mai I kela keena, me ka panai pu ana aku hoi o ke kupakako ia mea hookahi, a o ka ninau o ka waihoia ana mai, penei no ia:
“Ua makemake au e kamailio pu me Gleason.”
“Owai keia, e kamailio nei!” wahi a ka ninau.
I kela wa I meha iho ai ke kamailio ana a kekahi aoao mai, a I ka hala ana o kekahi wa, ua lohe aku la ke kanaka o ke aupuni I kekahi leo “A-“ ma kela aoao, a laila kau ae la I ka ohe hoolohe iluna.
I ka wa I hoikeia aku ai o ka lohe ia Gleason no kela mea, ua hoike mai la oia me na minoaka ma kona mau papalina, o ia hoi, o ka manao o kela kaheaia ana mai o kona keena, I wahi ai ia lakou, ka poe haihai kanawai, ina paha aia no kona mau kanaka maloko o kela keena I kela wa, a I ole ia aia paha ma na alanui kahi I hakilo ai ia lakou, ka poe haihai kanakai, a piepiele waiona.
Ekolu hale I lilo ae ai ka makana hoikeike.
He mau la aku nei I hala ua hoopuka ia ae kekahi manao maloko o na nupepa pukala kuloko e haawi ana I kekahi makana I na halekuai mua ekolu a na lunakanawai e hooholo ana no ka maikai loa o ka hoonohonohoia ana o na kini meaai ma kea no hoikeike ma na puka aniani, no ia kumu ua hoomakaukau kela ame keia halekuai I na kini meaai o na ano like ole ma kea no maikai loa, elike me ia e manaoia ana ma na puka aniani, kahi e hiki ai ke ike aku I ko lakou Manawa e hele ai e nana I kela ame keia halekuai.
Ma ka po Sabati nei I loaa ai ka olelo hooholo a na lunakanawai I kohoia na lakou e hooholo I na halekuai oi ae o ka maikai o ka hoonohonoho ana I ka kini meaai, a eia ka lakou olelo hooholo: “Ua lilo I ka Liberty House ka makana ekahi; I ka halekuai o McInerny ka makana olua, a I ka halekuai o Wiehman ka makana ekolu.” Ua hoike ae ka ka mea nana ka makana I kona hauoli no ko hooko ana mai o ka poe na lakou na halekuai I ka hana hookuku a pela hoi me ka olelo hooholo a na lunakanawai. O na lunakanawai I kohoia no keia hana hookuku oia o Mrs. A. H. Tarleton, Mrs. Thomas A. Fisher, ame Mrs. A. A. Weiseberger. Ua kohoia lakou ma ke ano he mau elele main a ahahui like ole mai, ka Outdoor Circle, ke College Club ame ka Housewives League.
O ka hana I hoolalaia ai I kinohi e haawiia I elua makana I ka halekuai meaai kini maikai loa o ka hoonohonohoia ana ma kea no hoikeike ma ka puka aniani a I hookahi I kekahi o na halekuai e ae, aka nae, mahope o ko na lunakanawai nana ana I na mea hoikeikeia ma na halekuai like ole ua hooholo lakou me ka lokahi, ua oi aku ka nani o na mea hoikeike ma na halekuai kini meaai mamua o na halekuai e ae, a mamuli o ka ae maikai ana mai o ka mea nana ka makana ame Mr. Tarleton ua lawe ae na lunakanawai I ke ko’iko’I o ka hooholo ana maluna iho o ko lakou mau hokua. Ua nannia e na lunakanawai na halekuai kini meaai apau, a mawaho ae o na halekuai I lilo aku ai ka makana o na halekuai Model Grocery, Andrade, Susashiya, Palace of Sweets, ka Pacific Cigar Store ame ka Ho Win Kai, e ku nei ma ke kihi o na ala@ Alapai ame Beritania, kekahi ona hale maikai loa o ka hoonohonohoia ana o ka lakou mau waiwai no ka hoikeike ana ma na puka aniani. Ma ka halekuai o ka inoa hope loa, oiai he uuku o ia hale, eia nae, ma ka hoakaka a na lunakanawai ua maikai maoli ka hoonohonohoia ana o na mea kini ma ka puka aniani no ka hoike ike ana maloko o ia hale.
“O ka Liberty House ka oi aku o ka nani o ka hoonohonohoia ana o na kini meaai”, wahi a na lunakanawai, a ua haawi maoli no na kanaka oloko o ia hale I ko lakou Manawa ame ko lakou noonoo nui ana maluna o kea no o ka hoonohonoho ana I ka lakou mau waiwai, ma ke kii mua e ikeia aku ana, na kini meaai o na ano like ole,, ka lua ka halekuke, kahi e hoomakaukauia ae ia mau meaai, a o ke kolu o na kii o ia ka rumi aina me ka pakaukau, kahi e noho iho ai e ai ia mau meaai kini. Pela no me ko ka halekuai o McInerny, he nani okoa no hoi kona o ka hoomakaukauia ana, ua emi iki iho nae kona nani I ko ka Liberty House,” a pela no paha I lilo ai ka makana helu ia hale. “O ke kolu o na halekuai I loaa ka makana oia ko Wiehman, aole keia he halekuai meaai, o na kii ame na mea hoonani like malila, a oia nae, ua maiau ka hoonhonohoia ana o na mea hoikeike ma ka puka aniani e ume ia aku ai no ka noonoo o ka mea e kaalo ae ana mawaho a kiei aku iloko ma ka puka aniani, he nui na halekuai e ae I nani no ka hoonohonohoia ana o na mea hoikeike ma na puka aniani a ua aneane aku no kekahi o ia mau halekuai e kaili ae I ka noonoo o na lunakanawai ma o ka haawi ana aku I ka makana ekolu I kekahi o ia mau halekuai koe wale no ma kekahi mau mea I lilo aku ai ke kolu o na makana I ka halekuai o Wiehman. Ina ka no ka haawiia aku o ke kolu o na makana I kekahi o na halekuai kini meaai ina ka ua haawiia aku I ka Model Grocery Store, no ka mea ua maikai a ua haawiia he noonoo nui me ka akahele loa o ka hoonohonohoia ana o na kini meaai ma ia halekuai.
CLEVELAND, Mar. 3.- He umi-ku-mamakolu poe I make a he 12 I hoehaia I keia la I ka Manawa o ke kaaahi laweleka o Nu Ioka I hooku’I ai me kekahi kaa Bus lawe ohua ma Painesville, Ohio. E holo ana ke kaaahi me ka mama loa he 60 mile I ka hora a ma ka Manawa o ka hooku’I ana aku I ke kaa Bus lawe ohua ua lele aku na kino a kauliilii ma o a maanei ma kahi o haneri kapuai ka mamao. Kakaikahi wale no o ka poe I make I hiki ke ikeia ko lakou mau helehelena a me ko lakou mau inoa Ua manaoioia he poe wale no lakou apau noloko iho o Painesville ame Fairport, na kaona elua a ke kaaohua e holo a e halihali ohua ana.
Ke A’o Nei I ka Hanai Moa
Kekahi o na ohana e ake loa nei e hoi I ka aina hoopulapula, ke a’o a ke imi nei e loaa na mea e hooholomua ia ai o na hana hanai holoholona.
He lehulehu o ia poe, e hele nei mauka o Puahia, ma ka halekula “College of Hawaii” no ke a’oia mai I na ike hanai moa; a ua loaa ka ike a makaukau o kekahi o ia mau auna @ ka Leie like ana ma ia halekula, a ke leohana nei ia ike hoopulapula moa m@ na pehu hoohanau moa.
He 24 la I hala ae nei, I hopiha ai keia makamaka I kana pahu hoohanau moa, me na hua he 85, a I kela mau la aku nei I keko mai ai na hua he 71. He 71 moa liilii iloko o 19 la o ka hoomahana ana I loaa mai, I keia hoa hoomanawanui maoli.
Ina o keia ke ano o ka Hawaii e hoonohoia ai maluna o ka aina hoopulapula , e pomaikai io ana kakou e ke koena o Hawaii, e loaa ole ana o ka aina I keia huki mua ana’ a no ka mea, aia I ka holomua o ke ola ana o keia poe e hoi ana ma Molokai, ka hemo pau mai o na aina mai Hawaii a Kauai.
He Mau Olelo Noeau e Naauao Ai
O ke kino amen a huaolelo e nalohiu aku ana; aka o na hana kaulana e mau loa aku no ia.-Napoliona.
Pili paha keia olelo no ka poe I like me ke Alii Kuhio Kalanianaole I moe ame kana mau hana.
O ke ola o ke kanaka I nele I ka waiwai he halewili ia I nele I ke kulina e wili ai.-Howard.
Pili paha keia olelo I ka poe e hoi ana I ka aina hoopulapula, a malaila, huli ke alo iluna helu I na aaho o kaupoku.
Mai haawi iki oe I kou hilinai maluna o ke kanaka, hookahi ana Manawa I hoopunipuni mai ai ia oe.-Shakespeare.
O ka mea puana I ka leo himeni a keikei loa aole e hiki iaia ke niele a pae pono.-Howard.
O ka haaheo, haalele iho ia I kona home I ke kakahiaka nui maluna o ka lio, a hoi wawae mai I ke ahiahi.-German
E a’o mai ana keia wahi olelo, e hele wawae aku I kakahiakanui I hoi mai ma ka lio I ke ahiahi.
Ua oi aku ka pono e lilo kau dala mamua o ka lilo ana o kou manawa.-Howard.
Ua like no ka wahine me ka ohe, e holu ana ia I ke aheahe makani, aka aole oia e haki I ka makani ikaika.-Whateley.
Mai lualu oe I ka nene e lele ana a haalele oe I ka pelehu e paa ana iloko o kou lima.-Ilelani.
He oiaio keia wahi olelo, I hoi kakou I ka aina, mai hoolilo wale I ko kakou Manawa I ke alualu I ka puahiohio.
Oke alelo o ka wahine he ekolu wale no iniha ka loihi, aka nae ua hiki iaia ke pepehi I ke kanaka ehiku kapuai ke kiekie.-Iapana.
He oiaio, owai auanei ia kanaka nui e ku aku imua o keia mea he wahine. Davida, Solomona, Napoliona ame Kamehameha pau loa lakou nei ae la I ka palaha I keia mea he wahine.
O ka mea loaa iaia ka naauao, oia ke aloha I kona uhane; O ka mea hoopaa I ka ike, e loaa iaia ka pono.-Solomona.
E hoolohe I ka oleloa’o, e haliu hoi I ke a’oia mai, I naauao oe I kou hopena.-Solomona.
He wai hohonu, ka olelo iloko o ko kanaka naau; na ke kanaka naauao e uhuki ae.-Solomona.
Lokahi Ole Ke Kiuke Ma Ka Hihia O Pierce
Ma ka hihia ohumu a ke aupuni Amerika o ka hoopii ana ae e ku-e ana ia James R. Pierce o ka hooloheia ana ma kekahi la o ka pule aku la I hala mamua o ka aha hookolokolo federala a ka Lunakanawai Horace W. Vaughan, he hihia hoi o Pierce I hoopiiia ae ai no ka loaa ana o 215 mau kini opiuma maluna o ke kao Bennington ma ka mahina o Sepatemaba aku nei I hala, ua loaa ole kekahi olelo hooholo a ke kiure nana I hoolohe ia hihia a hoopauia mai ke kiure.
No kekahi mau la lehulehu ke hooloheia ana o keia hihia mamua o ka aha federala, a ma ka auwina la o ka Poalima o ak pule aku la I komo aku ai ka hihia iloko o ka papa kiure. Eha hora ka noonoo ana o ka papa kiure I ka lakou olelo hooholo, a I ka pau ana o ia Manawa ua hoihoi ae la ia kino I ak hoike aohe olelo hooholo I loaa mamuli o ka paakiki o na hoa, eono ma ka aoaoa hoahewa a eono ma ka aoaoa e kuu ana I ka mea I hoopiiia. Ma ka hora eha o ia auwina la I hoopauia mai ai ia papa kure e ka lunakanawai, aohe nae he hoakaka ia Manawa no ka hoolohe hou ia o ia hihia ame ka ole.
He mau mahina lehulehu aku nei I hala ka hookomoia ana ae o ka hihia o Pierce e ke kiure kiekie federala I ka aha hui pu me ko Frank Santos ame Ismu Hiraku he mau kanaka I owili pu ia ae iloko o ia hihia. Ma ka Poakolu aku o Santos ame Hiraku I hole ai I ka pili ole o ka hewa I hoopiiia ae ai laua, a ualaweia ae laua e ke aupuni I hoike ma ka aoao o ke aupuni e ku-e ana ia Pierce, aka nae I ka Manawa o ko Pierce hookolokoloia ana ua hoololi ae la laua I ko laua manao a ae ae la ua hewa laua a pela laua I laweia ae ai I mau hoike ma ka aoao o ke aupuni. He poe lehulehu a ae kekahi mawaho ae o laua I laweia ae I hoike ma ka aoao o ke aupuni.
New Palama Theater
“KA HALEKEAKA NANI MAWAHO AKU O HONOLULU”
SABATI-THOMAS MEIGHAN iloko o “CAPPY RICKS”
POAKAHI-MACK SENNETT Comedy, “DOWN ON THE FARM”
POALUA-“THE WHIP”
POAKOLU-“THE SEA RIDERS”
UKUKOMO: 10 a 30 Keneka
EMPIRE
Hoikeike mau 12m. a 10:15 p.m. Poaono, 10 a.m. a 10:15 p.m.
Elua hoikeike Sabati, 6:30 ame 8:30.
Ke Paani Nei-BUCK JONES I loko o “JUST PALS”
Hoomaka Sabati-EILEEN PERCY I loko o “THE TOMBOY”
Hoomaka Poakolu-PEARL WHITE iloko o “THE THIEF”
UKUKOMO: 15, 25, 40 Keneka; Ukuia ka auhau kaua.
HAWAII
HUI HANAKEAKA A DICK WILBUR
Ke Paani Nei-“UNCLE TOMʻS CABIN”
Hoomaka Poakahi-“THE BARRIER”
Kiionioni I na auwina la apau koe ka Poaono ame Sabati, hora 12 m. a 5:30 p.m.
UKUKOMO: 15, 25, 40 Keneka, ukuia ka auhau kaua
LIBERTY
Hoikeike I na la apau, koe ke Sabati, hora 2:45. Elua Hoikeike, Poaono ame Sabati, 6:30 ame 8:30.
Aole Mau Hoikeike ma na Po ma ka Hapa Hope o Keia Pule. Hoikeike I ke Ao-MARC MacDERMOTT iloko o “EVEN AS EVE” Hoomaka Sabati-“BLIND WIVES” Hoomaka Poaha-DAVID POWELL iloko o “THE BONNIE BRIER BUSH” Ukukomo: 25, 40 keneka. Noho I hookaawaleia 60c. Kelepono 5060
OKIIA ka UKUHANA
O Kona Ano Emi ka Uku o ka Ai Ana
AINA AHIAHI PIHA ma ke Café Ono 30 KENEKA
Mai ka 11 a.m. a 6p.m.
SUPA, PALENA, PIPI a I ole IʻA, HUAAI, PALAOA, WAIPAKA, MEA HOONOONO, KOPE, TI HAU
He maemae, kuke o ka papa ekahi na ke kuke mua o ka Matson.
Na kauoha o ka pokole me ka uku oluolu loa.
E hoao mai ia makou e pau no kuhihewa
Ma ka Pili Uwapo. Mauka o ka Uwapo 16
Hawaii Bank of Commerce, LIMITED
Alanui Moe, Mawaena o na Alanui Papu ame Bekela HE BANAKO HOAHU LIILII Ua Hiki Ia O eke Hoahu Mai ka 10 Keneka Mai a Pii Aku E HELE MAI E KUKA PU ME MAKOU Hemo ka Puka I na La Apau mai ka Hora 9 a.m. a ka Hora 2 p.m. Poaono, Hora 9 a.m. a 12 m. Ahiahi Hora 6:30 a 7:30
NA MEAAI
Waiu Federala, Kininunui… $1.20 Kakini Waiu Federala, Kini Liilii… 60 “ Carnation, a I ole Alpine, Nunui… 1.20 “ Carnation, a I ole Alpine, Liilii… .65 “ Waiu Kia… 2.20 “ Pia Hapuu Hawaii… 6no 1.00 “ Kopaa Keokeo o Honolulu nei… 17lb.no1.00 “ Kopa Crystal White… 20 auka no 1.00 “ Palaoa o 10 paona eke… .45 “
He Kuai Mau Makou Malalo Iho
BAILEY’S GROCETERIA ALANUI MOIWAHINE, KIHI O AALA MAKEKE
O NA HAWAII
I makemake I ka pomaikai o ke Kanawai Hoopulapula o Molokai, e hoolako ia lakou iho no ka holomua ma ka loaa ana ia lakou o na lako Mahiai me Hanai Holoholona ma keia hui kamaaina.
Ke malama nei makou I na loko hana maikai loa, pela hoi me ke Pena Sherwin-Williams, ke mikini uwi wai De Leval ame na loko pili I ka home o na ano apau.
Maloko o ko makou Keena o na Lako Paani e loaa no he ahua o nap u liilii amen a raifela maikai.
E. O. Hall & Son, Ltd.
Kopa Moi Keokeo No Ka Mikini Holoi
He Kopa maikai loa I hiki ke hoohanaia no na ano hana apau I pili I ka home, Hiki ke holoi I na lole nahenahe loa me ka pilikia ole. O kona oi loa aku o ka maikai nona mikini holoi-No ka holoi I na pa ame holoi hale.
KUAI I PUOLO MAI KOU HALEKUAI MEAAI MAI
T. H. Davies & Co., Ltd.
Na Akena Wale no no ka Paeaina Hawaii