Ka Nupepa Kuokoa, Volume LXI, Number 7, 17 February 1922 — Page 6

Ka Nupepa Kuokoa

 

 

HE HOALOHALOHA NA KA AHAHUI HOOULU A HOOLA LAHUI

NO KA ELELE JONAH KUHIO KALANIANAOLE

 

 

Ke Kamaliiwahine Elizabeth K. Kalanianaole, Anoai ilihia i ke aloha e:- Oiai ua oluolu i ke Akua mana loa, ke kipa ana mai la a lawe aku la i ka uhane makamae o kau Aliikane aloha. Jonah Kuhio Kalanianaole.

Ka Elele hiwahiwa o na kau a kau

Ka na’i nina kaulana i ke alaula o ke ao,

Ke koa hookahakaha o ka hale ahaolelo,

Kau kanawai o Amerika Huipuia,

Ke Alii ia nana e o ke ahi o Kamaile,

He hanau kama no Manokalanipo.

Ua po ka uwahi a Kalawakua noo i Kilauea,

aloha ke kupa hanau papa o Pihanakalani,

Kalani hele loa. hele manawa ole,

Hooipo aku la i ke kaha me Niolopua

Kuu Haku Lehua ua mawea i ka la.

Aole e pae hou ana kona leo alii,

Ma na paia laahia o ka Hale Keokeo

Aole no e hoopapa hou ana ke anu o Wakinekona.

Ma kona papalina laahia,

O ia mau alahele ko olua i lua i ka ilikapu,

Hoopumehana i ka poli o kamea aloha no e!

Lipolipo i ke anoano e!

O keia haawe ko’iko’i i pahola ih maluna o ka aina ame ka lahui holookoa, me he olapa ana la na ka uwila. ua like no ia me kekahi hekili nu i ku’i nakolokolo i ka apapa lani kuu milimili, kuu minamina pau ole:

Hooholoia:      O makou apau na lala o ka Home Hoohanau Kapiolani, ka Ahahui Hooulu a Hoola Lahui ke komo pu aku nei iloko o ka u kanikau piha ana me oe e ke Aliiwahine, Lei Kalaunu, o Kuliaikanuukapu i ka hono o na moku.

E o i kou inoa a’u e hea aku nei, e lei no au i kona aloha mai ka hikina a ka la ma Kumukahi, a ka welona a ka la i ke kai o Lehua, ua ike ke kahoahoa ae nei i na mana lani, e hoomamaia kou kaumaha. a e huli ae a nana i ke au o ka manawa e hiki mai ana, e ikemaka i ke ala ana o ka pohaku kihi o ka Home Hoohanau Kapiolani, a ka Ahahui Hooulu Hoola Lahui makia paa: O ke aupuni o Kalakaua ame Kapiolani kana Aliiwahine:

Hooholoia: Ma o ko makou maukomite la e haawiia aku kekahi kope o keia olelo Hoalohaloha ia oe e ke Ka maliiwahine, i mea nau e hoomanao ae ai i ka luhi a kakou no na makahiki loihi, e auamo pu nei kakou i keia hana nui a ke alii i waiho iho la mahope nei, ahiki i ka hookoia ana o ka iini a kuu puuwai ikeia ilaila ka opu aholoa a makee Alii.

Me ka naau haahaa o ke aloha oiaio.

Na komite i kohoia:-

            MURIEL K. SHINGLE,

            LOUISA K. AHRENS,

            EUGENIA K. REIS,

Kamalau Hale, Feb. 2, 1922.

 

MAKEMAKE E HAAWIIA KA MANA PIHA I NA WAHINE

 

Ma ka manawa e noho ana ka ahaelele Repubalika ma ka Poalua nei he olelo hooholo ka i hoomakaukauia a i waihoia ae e Norman K. Lyman, a i aponoia hoi e ia aha, e noi ana e hoololiia ke Kanawai Kumu o Hawaii i hiki i na wahine ke lilo i mau kiure a e kohoia i elele i ka Ahalolelo lahui.

Na William Thompson i waiho pu ae he olelo hooholo e noi ana e hoololiia ke Kanawai Kumu o Hawaii, me kahi e olelo ana he “kane”, e hoopauia ia huaolelo mai ke Kasawa Kumu ae, ma ia ano e hiki ai i na wahine ke hookuponoia no ke komo ana i hoa no ke senate a no ka hale o na lunamakaainana.

He iwakalua ka nui o na wahine i kohoia i mau elele mai na apana like ole mai, a o lakou no hoi kekahi mawaena o na elele maikai a na apana like ole i koho ai a i akoakoa ae ma ka manawa o ka noho ana o ka aha elele Repubalika ma ka Poalua nei.

Ua hoea ae lakou ma ia ahaelele aole no ka makaikai wale no, aka no kekahi manao nui, o ia ke koho ana ke kanaka maikai loa e holo ana a lanakila no ke kulana elele i ka aha olelo lahui, a e loaa ana ka ike ia lakou ma na hana kalaianina ma nei mua aku. ke hoomau ko lakou hooikaika ana e nui aku ka ike e loaa ia lakou.

Mamuli paha o keia ikeia ana o ke ohohia o na wahine i na hana kalaiaina i hooulukuia ae ai na manao o na keonimana maluna ae a i waiho ae ai i kekahi mau olelo hooholo a i aponoia ai e ka ahaelele ma ka Poalua nei.

Mai ka manawa mai o ka malamaia ana o kekahi halawai nui e na wahine maloko o ka Mission Memoria Hall mamua aku o ka malamaia ana o na halawai wae moho elele a na Mahele wae elele like ole mai ia manawa mai ke ohohia o na wahine i ua haua kalaiaina, a i na kane nae, kekahi poe, e hoopalaleha ana me ka noonoo nui ole no keia pono kivila pilipaa ia lakou, a ke hoolalaia mai nei kekahi hana no ke kukulu ana ae o na wahine o Honolulu i kekahi ahahui mawaena iho o lakou no ka hooholomua ana i na hana kalaiaina.

O ka halawai mua a ke komite i kohoia ai no ka hoolala ana i kekahi mau hana no ke kukulu ana ae i ahahui mawaena o na wahine maloko o ka Library o Hawaii i malamaia ai ma ka hora 3:30 o ka auwina la o nehinei, a he lehulehu na wahine kuonoono oloko iho o Honolulu i noiia ae e lilo i lala no ke komite no lakou keia mau inoa:

Mrs. Wallace R. Farrington, Mrs. John H. Wilson, Princess Kalanianaole, Mrs. Arthur C. Alexander, Mrs. A. L. Andrews, Miss Marguerite Ashford, Mrs. Frank C. Atherton, Miss Margaret Bergen, Mrs. Frank F. Bunker, Mrs. Charles Chillingworth, Mrs. Isaac Cox, Mrs. Francis R. Day, Mrs. Walter Dillinghan, Mrs. Sallie Hume Douglas, Mrs. J. M. Dowsett, Mrs. Nina L. D. Fraser, Mrs. Walter F. Frear, Mrs. L. C. Howland, Mrs. Irene Holloway, Mrs. C. C. James, Mrs. Clifford Kimball, Mrs. Eric A. Knudsen, Miss Frances Lawrence, Mrs. A. Lewis, Jr., Mrs. F. J. Lindeman, Mrs. Harold Lyon, Mrs. F. W. Macfarlane, Miss Marie Madsen, Mrs. J. P. Morgan, Mrs. Albert W. Palmer, Mrs. W. W. Paty, Mrs. J. W. Podmore, Mrs. James A. Rath, Mrs. Theodore Richards, Mrs. Ranney Scott, Mrs. Francis M. Swanzy, Mrs. F. E. Steere, Mrs. A. P. Taylor, Mrs. Wade Warren Thayer, Mrs. Richard Trent, Mrs. H. E. Webb, Mrs. Ernest Webster, ame Mrs. Gerrit Wilder o Honolulu; Mrs. Harry Baldwin o Maui; Mrs. George Bennett ame Mrs. E. N. Holmes o Hilo; Mrs. Benjamin Bond o Kohala, Hawaii, ame Miss Elsie Wilcox o Kauai.

 

 

MOANALUA I KELA AU I HALA

AKU A O MOANALUA I KEIA

AU E NEE NEI

 

(Kakauia e J. K. Mokumaia)

E kuu Solomon Hanohano:-E oluolu mai oe i kela wahi poomanao e kau ae la maluna, manao no au e ahohui mai ana no oe, i na mea maikai i pili pono aku i ke ola ana o na kupa o keia kaha a i lilo hoi i mea e hoomanaoia ai ua pana ame na kanaka kaulana o keia kaha kahi i oleloia ai, kahi i noho ai o ka eepa, a ka meakakau i lawe mai ai a noonoo pono.

He mea pono e hoikeike ia na mea a kou meakakau nei, i ike ai i ko’u ku ana a hele a ike i ka mea pono ame ka mea hewa, i ka makahiki no ia 1884.

Mamua aku o ia he wahi kaha keia i piha i na Hawaii, he uuku loa na lahui e, kahi no hoi keia o na alii ame na kuhikuhipuuone e launa a e hauoli ai.

Mamua o ko’u hoihoi pono ana ae i ke kahua o keia kukulu manao ana, o kalaia mai no ka meakakau nei, na ua pono hakuepa wale aku no, aka ina hoi he mea oiaio e kakoo mai no hoi, i na ua kupono i ka manao, kakoo.

Nolaila i ka hoihoi pono ana ae i ka la ame ka makahiki i hoike mua ia ae la, oiai i ko’u manawa uuku o kahi kino, ke ike la au ia hale i kapaia o Halepaihi, kahi keia e hoolulu ai na ohana alii, ame na konohiki, o ke konohiki nui no o ia mau la, oia ao o Kaleiluhiole ame kona mau ohua, a e ikeia ana i a mau la o ka nee ana, o ia no ka malama ana i na hana hoohauoli o kela ame keia ano.

O ka hula, o ia kekahi o na hana ano nui ma keia kaha, ma ka’u ike, he ekolu kahuahale pili e malamaia ai na pa hula o keia ame keia ano; hula uliuli, hula paipu ame hula alaapapa, hula puili, ame ka hula kii, o ia kekahi o na hula maikai loa ame ka nui o ka akaakaia, a eia no ia makua maikai a poo hula imua o Kaleiluhiole ke ola nei no, ahiki i keia manawa, a e hoikeia aku ana no kona kulana oiaio.

Elua laua mea kahiko loa e ola nei ahiki i keia la, aia kekahi ke noho mai nei i Kau, Hawaii. He kahunapule kana oihana, e lawe mai ana ka meakakau i ko laua mau inoa a kukulu aku imua o ka lehulehu.

O ka hana ia o ia mau la, i na hana hauoli, aia no ka hana pono ke nee pu la me ka malama mau ia o na hana Kula Sabati ame na anaina haipule, oiai nae ma ka nana aku a kou meakakau nei, he ano pouliuli paha ke olelo ae, aka ma ka lakou lawelawe hana ana, o ia no ka mahiai ame ka lawai’a.

Ua nui maoli ka noho makaukau o kela ame keia home, ina he mahiai kanu uala, apau apau, oiai ua hana pu ka meakakau, nei, ina he lawai’a, apau apau e ku mau ana ke alalauwa ame ka moi, nolaila ua loaa mau ka makaukau i keia ame kela ame keia home, o ka ai ame ka i’a kau e hoomakaukau, o ia ae la kahi uku.

            Nolaila ma ka noho ana o keia kaha. me he la hookahi ohana ke nana mai, nui na opio wahine u’i a pela no hoi me na opio kane, o kekahi o na mea ano nui, e a’oia ai, na keikikane, o ia ke ku’i ai, a kalewa o ia hana imi waiwai ia, a pela no hoi me kahi lawai’a hee, ame manini. ame kahi lawai’a papai ame puhi he ano ole ke nana aku, ua loaa no ka noho makaukau ana.

I keia au mai nei, e loaa nei eono ame eha dala o ka la, auwe ke aloha e. lihi launa ole aku me kela au pouliuli a ka nui wale, o ka hoomakaulii, i ka noho ana.

            He nui na kanaka kaulana i puka ae a lilo i kumukula, a i kahunapule, a i anaaina ame lunahelu auhau, a eia no ka lakou mau pua ke ola mai nei, pela no hoi me na loea haku mele olioli, ame hula, eia no ka lakou mau pua ke ola mai nei.

(Aole i pau.)

 

 

MONTREAL Feb. 14.-Ma ka po nei i hopuia ai ka Rev. Abelard Delorme, he kahunapule Kakolika, a hoopilia ae no ka pepehi ana a make i kona hoahanau hapa Raoul Delorme, ka mea nona ke kino i loaa aku me eono puka poka ma ke poo. Ua hooko ae ke kahuna pule Abelard i ka waiho ana iho o kona kaikaina hapa i kekahi palapala hooilina. Ma kekahi manawa kokoke aku nei i hala ka lawe ana o Raoul Delorme i ka $25,000 inisua.

 

KE ANO O KE KALALAINA.

 

(Kakauia e Z. P. K. Kawaikaumaiikamakaokaopua.)

(Hoomauia mai.)

He pomaikai no na home hookuonoono hoopulapula ame ka lahui holookoa, no ka imi waiwai ana ame na ano hana kalepa like ole.

Elike me ka nui o ka ke kanaka hooikaika pono ana, ame ka pono ana e haawi aku ai no ha’i, pela e loaa ai iaia kana. O ia ko ke Akua manao luli ole.

O ka poe ku-e i keia manao o ke Akua, he poe aihue lakou, he poe powa, he poe lawe wale. Ina kii hala ole mai ko na aina e, a lawe i keia aina no lakou, a lawe i koonei waiwai no lakou, na ike no kakou he kaili wale ia; no ka mea, ua pili pono keia aina i koonei poe, na na kanaka oonei i hooikaika, a loaa ka waiwai, aole pili iki keia waiwai i na kanaka o ka aina e.

A ina hooikaika na kanaka o Hawaii a loaa ka waiwai, aole pono i ko Maui ke kii aku me ka uku ole. Aole pili iki kela waiwai i na kanaka o Maui. Ina he mea pono ke kii wale aku ko Maui, alaila, pono no ko Beritania e kii wale mai i keia paeaina. Pela no ko na kulanakauhale.

Ina hooikaika na kanaka o Lahaina a loaa ka waiwai, alaila, aole pono i na kanaka o Wailuku ke hele mai a lawe aku i kela waiwai me ka uku ole mai, elike me ka manao o ka poe no lakou ka waiwai. Pela no hoi na kanaka pakahi. Ina hooikaika kekahi kanaka a loaa kana waiwai, alaila aohe mea ma ka honua nei e pono e kii aku a olelo, na’u keia waiwai. Aole nana.

Ina pono kekahi kanaka e ae, ke kii aku a lawe wale, alaila, ua pono ko Beritania, ke kii mai a lawe wale i keia paeaina no lakou. Makehewa wale ka imi waiwai ana, ke maopopo ole keia pono o ke kanaka. Ina manao ke kanaka aole e malu kona waiwai, alaila, aole hiki iaia ke imi, aole ia e ikaika ma ka hana. Nolaila, pono e imi mua a akaka ka waiwai kupono i kela kanaka i keia kanaka, alaila, hiki pono ke hooikaika ma ka imi waiwai ana.

Pono e hoakaka mua i ko ka mea aina, a i ko ka mea hana; i ka mea kupono i na ‘lii ame ka mea kupono i na kanaka. O ia ka mea mua i ke kalaiaina ana; i kaawale ko kela ame ko keia, aole hihia kekahi i kekahi, aole huhu kekahi i kekahi. Ma keia olelo, ua maopopo ka hewa o Wiliama ka Lanakila i kona hoolili ana i na aina nui he iwakalua, i wahi nahelehele, i wahi hoi e holo ai na holoholona, hihiu, ua maopopo no hoi ka hewa o ka hoolei ana i kekahi ai, i mea e kuai nui ai kekahi ai. Ua maopopo no hoi ka hewa o ka haawi nui ana i ka ai a ke kanaka, na na holoholona waiwai ole.

No ka mea, ua maopopo ko ke Akua manao i ka ai, o ka ai kupono i ke kanaka, na ke kanaka no ia. Ua maopopo no hoi ka hewa o ka poe kii aku i ka malakeke ame ka palaoa ame kela mea keia mea a ke Akua i haawi mai ai i meaai, a puhi, a hoolilo i mea e ola ole ai ke kanaka. Ua maopopo ka hewa o ko Tureke hookapu ana i ke Kai Eleele, aole e holo na moku o na aina e malaila. Ua maopopo no hoi ka hewa o Beritania i ko lakou hookapu ana i ko na aina e, aole lawai’a ma na ahua o Nufounalani.

No ka mea, ua haawi mai ke Akua i kela mea a nui, aole i pili aku ka lima kanaka, pono i kela mea keia mea e kii aku a lawe wale.

Pela hoi e malu ai na aina ame na kanaka, i hanino ole kekahi kanaka ma ka mahiai, pono e ukuia oia elike me ka nui o kana hana ana. Pela no ka lawai’a, ame ke kahuna kalai, ame kela kanaka hana, ame keia kanaka hana. A pela no hoi na ‘lii. Pono e ukuia mai lakou elike me ka nui o ka lakou hana ana ma ka lakou oihana.

Ina malama maikai lakou i ka aina a kau i na kanawai pololei, a hoopili pono i kela mea hewa, i keia mea hewa, a hoomalu pono i kela kanaka keia kanaka hewa ole: i lawe wale ole ia kana; a ke’ake’a ole ia oia, aole hoi e hookaumahaia, ina pela ka hoomalu ana o na ‘lii i ke kanaka, alaila pono e ukuia mai lakou, elike me ke kanaka paahana, elike hoi me ke kiai i hoolimalimaia.

Ina olelo aku au i ke kanaka, “E noho oe a kiai i ko’u pa, ame ko’u waiwai, a ina e komo mai ka holoholona, e kipaku aku, a ina e hele mai ka aihue, e paa oe,” alaila, e olelo mai no kela kaneka ia’u, “Aole au e kiai wale i kou pa; aka, ina uku mai oe ia’u, alaila, kiai no au.” Ina pela ua makepono ko’u lilo, no ka mea, ua malu au ame ko’u pa ame ko’u waiwai.

Ua makepono hoi ka luhi o ka mea kiai, ua loaa kana. o ka uku pono a’u i olelo mua ai iaia. Aka, ina hiamoe oia a kiai ole, alaila, aole pono ia’u ke uku aku iaia, a ina kii mai oia i ka’u, he aihue ia, a he lawe wale. Aole nae i olelo mua na kanaka i na ‘lii o keia paeaina. Ua ili mai ko lakou noho ana no lakou. Aka, o ke ano o ka noho ana, ua like ia me ka noho ana o kela kiai i hoolimalimaia. Inakiai pono lakou i na mea apau o ka aina, a malu na kanaka, ame ko lakou waiwai, alaila, uamakepono ko lakou lilo ma ka auhau pono ana, a ua makepono no hoi ka luhi o na’lii i ka malama ana i ka aina.

O ko lakou luhi ame ka malu i loaa i na kanaka, o ia wale no ko lakou kumu pono e waiwai ai lakou, aole o ka aina; no ke aupuni ia, ua pili i na kanaka apau; aole pili i ke kino alii wale no. Aole nae e pono ke ukuia na ‘lii no ka luhi o ko lakou kino wale aole hoi no ka hana a ko lakou lima ka uku.

(Aole i pau.)

 

 

HE PANE I KA HOOLAHA KU-E A WM. KALEIHUIA.

 

Mr. Lunahooponopono o ka Nupepa Kuokoa: Aloha oe:- @ no mai i wahi pepa, no ka pane ana aku i ke ku-e a kuu hoapaahana Demokarata, William Kaleihuia, i hoike ae ai oia i kona manao kalaiaina, ma ke kolamu o kau pepa o ka la 10 iho la; a ma ia itamu i hoike ae ai oia i kona hoowahawaha loa, i na hana epa a ke komite Kuwaena o ka aoao kalaiaina Demokahata, ma o kona kaili-ku ana ae i ka mana hooponopono o ka ninau moho elele, me ka ui ole ana ae, i na Demokarata oiaio, no ka hooponopono a kukakuka ana maluna o ua ninau ano nui la.

Pehea no hoi oia i lawe mua ole mai ai i keia ku-e i ka wa e noonooia ana keia kumuhana imua o ke komite kuwaena.

Ua hoolaha aku au iloko o ka nupepa i ka la 20 ame ka la 27 o kela mahina aku la i hala, no ka mea e pili ana i ka noonoo ana maluna o keia ninau elele, i malamaia ma ka Phoenix Hall, ma ka la 28 o kela mahina aku la i hala; a ma ia halawai, aole he mau ku-e no ka noonoo ana i ka ninau elele i waihoia mai imua o ke Komite Kuwaena:

Aia ka hoi a pau na mea i ka hooponoponoia me ka lokahi, alaila ka hoi oe hoowahawaha mai: ihea la hoi oukou i ka wa e lapaauia ana ke kanaka aia ka hoi a pau i ke kanuia, o ia iho la ka wa a oukou e hele mai ai e ku-e.

Ua hai ae oe ma kau leka o ka la 6 o Feberuari iho la, ua kailiku ae ke Komite Kuwaena i ka mana apau loa.

Ma na Rula o ka aoao Demokarata, aole ahaelele elike me ka aoao Repubalika, na ka aha wae moho elele e wae i ka elele o ka aoao kalaiaina; aka nae ua manao au, ina ua ku-e mua mai na Demokarata i keia mau hana a ke komite kuwaena, ua hiki no ke malamaia ma ke ano koho wae o na mahele kalapu o keia Teritore.

Ke kumu o ke Komite Kuwaena i ahai ae ai i ka wae ana i ka elele o ka aoao Kalaiaina:

1.       Na Komite Kuwaena, ua kohoia lakou e na apana like ole apuni keia Teritore, a penei:

Apana 1, eha komite; Apana 2, eha komite; Apana 3, eono komite; Apana 4, eono komite; Apana 5, eono komite, Apana 6, eha komite: Huina kanakolu komite kuwaena:

2.       keia mau komite, ua kohoia lakou elike me na rula o ka aoao kalaiaina Demokarata, a ua manao makou, o makou no o na komite ka wahaolelo o na kalapu, a mahele like ole apuni keia Teritore:

3.       Mamuli o ko oukou ikemaka iho no o ka aoao kalaiaina Demokarata, he aoao ia o ka poe ilihune, a i wahi e hoemi mai ai i na hoolilo, ua manao makou o ia ke alahele o ke ola mau loa.

4.       No ke koho kuikawa elike me keia kuia i loaa ia kakou, aole i hoakaka pono ke kanawai, aole no hoi na rula o ka aoao. Aka, ma ka mana i kohoia a loaa i ke komite kuwaena i alakai no na mea e pono ai ka aoao ua manao makou ua pono ia hana ana.

5.       E heluhelu oukou i ka pauku 36 o ka buke rula o ka aoao Demokarata, malaila oukou e ike ai, ua haawiia ka mana e hoololi i na rula ame na kanawai me ka hoolaha ana aku, hookahi pule mamua o ka aponoia ana o ia kumuhana. Ua hoolaha au iloko o ka nupepa Kuokoa i ka la 20 ame ka la 27 o kela mahina aku la i hala, a iloko o ka nupepa ahiahi, Star-Bulletin, o ka la 21 o kela mahina aku la, a iloko o ka nupepa kakahiaka, ka Advertiser, o ka la 22, 23, 24, 25, 27 ame ka la 28 o kela mahina aku la i hala, ma ka halawai i malamaia i ka la i haiia maloko o ia mau hoolaha. ua akoakoa ae na lala ame na palapala hope o ia mau komite, he 25 ka huina nui; a o ia huina, ua oi aku mamua o ka elua hapakolu o na lala komite kuwaena:

            He mau la mamua aku o kela halawai i malamaia no ka noonoo ana i ka elele o ka aoao, ua halawai au me Hon. J. Kumalae maluna o ka ninau koho wae moho mahele kalapu, ua hoole loa mai oia ma keia: ua hui pu au me Mrs. Mary Haaheo Atcherley a hoike aku iaia, ina e ae ana ua moho elele o ka aoao, e uku i na hoolilo o ke koho wae moho o na mahele kalapu like ole, ua hoole loa mai oia. a ui mai, ua ka aoao kalaiaina no e uku ia mau hoolilo:

Nolaila ua hala ole makou, o na komite kuwaena, a na ke Akua e hoopomaikai i ka poe e hoowahawaha nei i keia mau hana a ke komite kuwaena.

Me ka maholo nui ia oe e Mr. Lunahooponopono.

GEO. KEKOA AH NEE,

 

AOHE LUA ELIKE ME KALANIANAOLE.

 

Mr. Solomon Hanohano, Lunahooponopono o ka Nupepa Kuokoa:-Mahalo a nui i ko’u ike ana iho la i ko’u wahi manao ma ka pepa a eia hou keia mau wahi manao liilii.

No ka pau ole no o ko’u manao aloha i ke Alii, ke huli aku a nana aole i pau pono i ka hoakakaia kani mau hana i hana ai no ka pono o keia lahui Hawaii he oiaio, ua hana no oia i ka pono kaulike o na lahui apau iloko o ke Teritore o Hawaii nei, aka o ka oi aku o keia lahui Hawaii, iloko no o ia pehi o kekahi poe kanaka Hawaii, aole ia i lilo i mea nona e hoomaau ai ia lakou, ua opu alii oia ia lakou elike no me kona ano alii.

Iloko o kona hoino akea aku no i ka haole, ina oia e ike e hoino ana ka haole i ke kanaka, eia nae o ka haole no ka mea nana i hoohanohano i kona wa e ola ana, ahiki i kona make ana, o na kanaka Hawaii, aia a make, alaila olelo ae la, he aloha i ke alii, hana aku la ka lakou mau hana maikai mahope aku nei, me ka ike ole mai o ke alii.

Ina o keia mau kaukani dala i lilo iho nei i ka hoolewa, na pua nani, i luia aku i ka wa ona e ola ana. ina ua pomaikai, wahi o ka haiolelo a Rev. Akaiko Akana, no ka pahu wale no, elima kaukani dala aia paha ka hoolilo maluna aku o ka miliona dala a i ole nae oia i ike i keia mau mea i kona wa e ola ana, a i ole, maopopo paha e hanaia aku ana oia pela.

Nolaila, ka’u e olelo nei, aole i hoohanohano na kanaka Hawaii iaia, oiai i kona wa e haiolelo ai, aole ku ae o na Hawaii apau iluna, a hoomaka oia e kamailio, alaila noho iho ilalo, aole loa; aka o Amerika wale no ka i hana pela, wahi a John Wise i olelo mai ai i kona ike maka, ana aole hiki i kona mau waimaka ke paa i ka hoohanohano a ka hale ahaolelo o Amerika i ke alii, i kona manawa e ku ai e kamailio iluna o ka papahele o ke ku ae la no ia o ka poe apau iluna, a huli ae la o John Wise a ninau ae la i ke kiaipuka, ina he hana mau ia keia hana pela, ae mai la ke kiaipuka, he hana mau ia pela i ke alii wale no aole i na mea e ae apau, he hanohano nui keia i loaa ia kakou na Hawaii.

Ua hoike mai o John Wise i keia moolelo, i ka wa e ola ana ke alii, a ua ike maka iho nei ka lehulehu i ka oiaio i ka make ana o ke alii, e lohe makawalu ia ana ma ka uwea kelekalapa i na hoalohaloha a Amerika iaia, a ua hiki no ke oleloia ae, ke pookela o na alii apau mai ka hookumu ana mai o ke alii oiaio, mai kinohi mai a ia Kamehameha, o ka oi keia o ke pookela aloha kanaka.

Ua ha’i mai oia i kona manao, nui kona makemake e hoonaauao i na keiki Hawaii, me kona dala, nana oia aole lawa me kana dala ponoi, e hana ana oia no kekahi, koe hoi kekahi, aole ona makemake e hana kapakahi, nolaila, ua hele aku oia i Wakinekona e hooikaika i keia pono, e hoonaauao wale ia na keiki Hawaii, oiaio ka hapanui he poe makua ilihune, kuhikuhiia mai no na ka ahaolelo o Hawaii nei e hooholo.

Noi hou aku oia e ae mai ke aupuni o Amerika e hookaawaleia i dala na keia lahui Hawaii ilihune, a e ikeia hoi ma ke ano he banako hoaie dala, i wahi e hiki ai ia lakou e kukulu i home no lakou, a e hoonaauao kupono ia na keiki, ike nui oia i ka pilikia o keia kanawai, noi aina he 25 inoa, i ka puka ana mai he kakaikahi na Hawaii, o ka poe i nele loa i kahi dala, haalele aku la i ko lakou mau helu maikai, lilo aku la no i ka lahui e.

Nolaila hooikaika oia maluna o keia kanawai hoopulapula ahiki iho la i ka hopena.

Ua malama oia i ke kulana maemae aole puni i na mea hoohihia o keia ao. a hoopoino aku i ka noho ana o kekahi ohana. elike me ka moolelo o na alii o ke au i hala ka puni i na wahine, a kiiia aku la ka wahine a kekahi kanaka, ina e noho maikai ana ko lana noho ana, a kipe aku la hoi kekahi i ka aina, no ka lilo wale mai no’o ka wahine i ke alii, aole hiki ke alo ae na kanaka, o keia alii, aole i ikeia ia mea iaia, a hala wale aku la oia.

Lawelaweia na hana ponotika me ka maemae, kuokoa, ame ke kaulike, ua noho haahaa ia eia me kona lahui a hala wale aku la, ina e hailukuia oia e na kanaka, haaei mai no oia i kona lima. e aloha ana ia lakou.

Me ka oiaie.

 

HOOLAHA HOOKAPU I’A.

 

Ma keia ke haawiia nei ka lohe i ka poe apau e ike ana i keia, i kulike a me na kuhikuhi o ka Pauku 614 o na Kanawai Houluuluia o Hawaii, 1915 owau, o ka mea nona ka inoa malalo iho nei, ka ona o ke kai lawai’a i ka paia o ke kai o “KEAUAU,” no ka waiwai o ke Alii W. C. Lunalilo ma mua, a o ia no hoi ke kai o ka Ili aina o Kapahulu. ke koho a ke hookaawale nei au no’u iho, a no ko’u pono kaokoa wale no, i ka i’a i kapaia he “amaama” oloko o ua kai la. O ka poe apau e lawe ana i ua i’a la a’u e hookapu nei me ko’u ae ole aku, e hoopiiia no ma ke kanawai.

MRS. BLANCHE HUMMEL,

Ona o ke Kai Lawai’a o Keauau, Kapahulu, Wakiki, Oahu.

            Honolulu, Ianuari 27, 1922.

 

HE HOOPOLOLEI NO KA’U MAU I

ITAMU O NA ANOAI.

 

Ma ka mahele elua o ke Kuokoa aoao 3 kolamu ekahi o ka la 3 o keia mahina, a aia ma ka mahele elima laina ekolu ame eha, a ma kahi e olelo ana “hoa lala o ke Komisina o na aina hoopulapula”, o ka pololei malaila, “Elele Lahui i Wakinekona”.

Ma ka mahele ewalu, laina eono ame ehiku, ma kahi e olelo ana: “O kuu wahine mare” o ka ponolei malaila; “O kuu hoa aiwaiu, ka mea i piha ke eke huluhulu i ke akua, na ka lode keia mau olelo.

Ma ka laina 16, 17, 18, 19, ect; kaomi iho la ka lima o ke kahu mano me ka hawanawana ana, he maia ka hala! Pela no i ka elua ame ka ekolu o ka manawa.

GEO. W. KAUHANE,

 

 

NEW PALAMA THEATER

“KA HALEKEAKA NANI MAWAHO AKU O HONOLULU”

Sabati-“THE GREAT IMPERSONATION.”

Poakahi-LOUISE LOVELY iloko o “WHILE THE DEVIL LAUGHS”

Poalua-EILEEN PERCY iloko o “BEWARE OF THE BRIDE.”

Poakolu-TOM MOORE iloko o “DUDS.”

 

EMPIRE

Hoikeike mau, 12 m. a 10:15 p.m. Poaono, 10 a.m. a 10:15 p.m.

Elua hoikeike Sabati, 6:30 ame 8:30.

 

Ke Paani Nei-WILLIAM FARNUM iloko o “IF I WERE KING.”

Keia Sabati-SHIRLEY MASON iloko o “THE FLAME OF YOUTH.”

Keia Poakolu-GERALDINE FARRAR iloko o “THE WOMAN AND THE PUPPET.”

 

 

HAWAII

 

Hoikeike mau i na la apau koe ka Poaono ame Sabati.

KA POE HANA KEAKA A DICK WILBUR

Ke Paani Nei-“THE SWEETEST GIRL IN DIXIE.”

 

Hoomaka Poakahi-“FRIENDLY ENEMIES.”

E Hoea Mai Ana-“UNCLE TOM’S CABIN.”

 

Elua Hoikeike Po Sabati, 6:30 ame 8:30.

Kiionioni i na auwina la apau koe ka Poaono ame Sabati, hora 12 m. a

 

LIBERTY

Hoikeike i na la apau, koe ke Sabati, hora 2:45.

Elua Hoikeike, Poaono ame Sabati. 6:30 ame 8:30.

Ke Paani Nei-ETHEL CLAYTON iloko o “BEYOND.”

Hoomaka Sabati-WILLIAM S. HART iloko o “THE THREE WORD BRAND.”

 

HALEKUAII O NA HAWAII ME KA LEHULEHU

Makeke o Ke Kalana, Alanui Maunakea.

Ua nee mai la makou i keia makeke i kukuluia no ka lehulehu, a he oiaio ua nui ka makepono o na meaai loaa maanei i ka lehulehu, mawaho ae o kekahi mau makeke aku, nolaila he mea maikai i na Hawaii apau, e naue ae malaila e kuai ai i ka lakou mau meaai, ka poi, pipi, puaa, hame, bacona, huamoa, wainbaka, kamano, uala ame na meaai apau e ola ai ka home me ka ohana.

KUMU KUAI O KEIA PULE.

15 Paona Poi, ma ke Dala Kuike wale no.........................................$1.00

15 Paona Kopaa Keokeo, dala kuike wale no....................................1.00

15 Paona Laiki Kepani me Hawaii, Dala Kuike...................................1.00

49 Paona Eke Palaoa Helu 1, Dala Kuike...........................................2.25

12 Kini Liilii, waiu Cream, Dala Kuike ............................................... .75

12 Kini Nunui, Waiu Cream, Dala Kuike ...........................................1.50

12 Kini Nunui, Waiu Kia, Dala Kuike  .............................................2.25

 4 Paona King Salmon, Dala Kuike ................................................. .25

 4 Opelu Nunui, Dala Kuike ..........................................................  .25

A he nui wale aku na meaai i hoolakoia, a oukou e hoowahawaha ole ai me ke kumukuai makepono loa, a e hoomanao oukou, ma ke kuai ana i ka oukou mau meaai ma ko’u halekuai, loaa ana ia oukou he 5 pakeneta maluna o na dala kuike apau, mawaho ae o ka POI ame na I’A MALOO.

Nolaila ina ua maa oukou i ke kuai ana mai na lahui e ka’u ninau ia oukou, he puka no auanei ka na lahui e i ko lakou   LOKAHI, a he mau miliona dala a na Hawaii e hanai nei ia lakou i na makahiki apau.

Ahea oukou noonoo iho ia kakou Hawaii Aloha?

                                                                        JAMES L. HOLT.

 

O NA HAWAII

i makemake i ka pomaikai o ke Kanawai Hoopulapula o Molokai e hoolako ia lakou iho no ka holomua ma ka loaa ana ia lakou o na lako Mahiai me Hanai Holoholona ma keia hui kamaaina.

Ke malama nei makou i na lako hana maikai loa pela hoi me ke Pena Sherwin-Williams ka mikini uwi waiu De Leval ame na lako pili i ka home o na ano apau.

Maloko o ko makou Keena o na Lako Paani e loaa no he ahua o na pu liilii ame na raifela maikai.

 

E.O. Hall & Son, Ltd.