Ka Nupepa Kuokoa, Volume LXI, Number 4, 27 Ianuali 1922 — Page 5

Ka Nupepa Kuokoa

 

He Moolelo no

 

PITA NIKOLA

 

a i ole

 

Ke Duke i Haalele Aku i Kona Kulana Hanohano a Lawe Mai i ke Kulana Makaninana

 

Ua lakou i hoea aku ai no kahi i ku ai o ka hale o Beka, @ i kaawale ai ka hele ana a kela poe ekolu, hoi aku @ ka no kona home, hele aku la no hoi o Keka no kahi @ a hoi pololei aku la o Nikola, no ka home o kona@.

@ kela hoea ana aku o Nikola no ka hale, aole he mau @ ano nui ana i lohe, koe wale no, ka hoea ana mai @ koena aku o na malihini mai Nu loka mai, me ka hiki @ i na kiai, ke hooko i na kauoha a Nikola o ka haawi na aku ia lakou, no ka mea aohe wahi kapu i kela mau malihini. e hele ana lakou ma kela ame keia wahi oloko ka pa, a komo loa aku iloko o ka ululaau.

He nui loa ka manawa i koe, alaila hoea mai i ka aina ahiahi, nolaila hoi pololei loa aku la o Nikola no kona hale, a hoea mai kona pahulole, o ke kii aku la no ia a wehe ka la i kana mau buke leo mele, a waiho aku la iluna o ka piano o kona hoomaka aku la no ia e hookani ma ke ano hoomaamaa i kona mau manamanalima i hele a laau.  I kinohi me ka malie wale no oia e kikoni la i na ki o ka piano ia li’uli’u ana aku nae o kana hookani ana, ua poina @ la oia i na mea apau, a hoolele aku la i kona noonoo. maluna o na leo mele, ke kuupau la oia i ka hookani, me he mea la, aia oia imua o kekahi anaina nui, kahi i hookani ai.

No ka hapalua hora paha kela hookani ana a ua o Nikola maluna o ka piano, kani ana  no ke kelepona, o kona haahele iho la no ia i ka piano, a hele mai la e hoolohe, a’o keia kana mea o ka lohe ana aku:

“O oe anei kela e Nikola?”

“Ae, owau no keia e kamailio aku nei,” i pane aku ai no hoi o Nikola ma kekahi aoao aku.

“Ke poeleele aku nei i keia manawa, heaha kau mea i hoolala ai no na hana o keia po?” i ninau hou mai ai o Mr. Makuaia.

“Elike no me na hoonohonoho ana o ka po i hala, pela no keia po.”

“Ke makemake nei au e hoololiia ke ano o na hana kiai na keia po. Ua hamama na ipuka apau o ko’u home i keia po, aole e hiki ia’u ke pani, mamuli o na hana. a keia poe lalau o ka hoea ana mai nei. E kauoha aku oe i kou poe kanaka e hookokoke mai i ka hale, ma na wahi nae, e ike ole ia ai; pehea e hiki ana no anei ia oe ke hoonee koke aku i keia papahana imua?”

“Manao au, aole no ia he hana nui, ua hiki ia’u ke hooko aku elike me kau i makemake ai?”

“Eia hou keia, ua makemake au e hoea mai oe no ka hale nei, no ka noho pu ana me a’u. Pehea e hoea mai ana anei oe no ka aina ahiahi?”

“Ae, ke kakali nei au o ke kokoke ae ia manawa, alaila au hele aku.”

“Ua pono kela, na kamailio mja aku nei au i kuu kaikamahine. e hoea mai ana oe. nolaila e komo mai i kekahi paalole kupono, no ka mea he mau malihini ko ka hale nei i keia ahiahi.”

“Ina pela ua pono, aia au a makaukau, alaila hoea aku no ka hale, mahope o ko’u hoonohonoho hou ana aku i na kanaka ma ko lakou mau wahi kiai.”

Ma kela wahi i pau ai ua kamailio ana mawaena o Nikola ame kona haku, o kona waiho aku la no ia i ke kelepono, a hele koke aku la e hoomakaukau iaia iho, me ka nalu nui ana iloko ona, no ke ano o kona haku. elike me kana i ike ai ma ka po mamua aku; a ke hoomaopopo la oia, ua like no ka maka’u o kela kanaka i kana kaikamahine, me kona maka’u i kekahi mea okoa ae, pela oia i kauoha awiwi mai ai iaia nei e hele aku, no ka noho pu ana maloko o ka hale.

Aole he wahi auau maopopo i hoomakaukauia ma kela wahi i ku ai o ko Nikola hale, aka nae oia no ke kahawai ke waiho mai la ma kahi kokoke, nolaila hele aku la oia i ke kahawai e auau ai, a iaia i huli hoi mai ai, ua maikai maoli kona kino.

Ho-a aku la i ka ipukukui, alaila komo iho la i kona lole me ka malie, aka nae iaia i nana aku ai iloko o ke aniani kilohi, ike aku la oia i ka maalo ana ae o kekahi mea ma hoaka o ka puka aniani. I kinohi ua manao loa oia, ua kuhihewa ka ike a kona mau maka, aka nae, iaia i nana aku ai ma ka puka aniani, he oiaio, ike aku la oia i kekahi mea pouliuli, nolaila lalau aku la oia i kana pu panapana. a holo aku la no kahi o ka puka, iaia no hoi a oili iwaho. oloio ana kekahi kanaka, a nalowale aku la ma ke kihi o kona hale, me ka hoomaka ana aku o Nikola e alualu mahope ona, me ke kahea pu ana iloko o ia manawa hookahi:

“Owai kela? E ku koke mai, o kii aku auanei ia oe e a’u ka pu!” aohe nae wahi mea a ku mai o kela kanaka, o kana wale no e lohe la, o ia ka uuina o na lala laau maloo. o kona ki aku la no ia i kana pu no elua manawa, ma ke ano hoomaka’uka’u.

“He mea makehewa wale no ka hoao ana aku e alualu loko o kela pouli, ku malie iho la ua o Nikola i kahi hookahi, me ka hoolohe ana , ke lohe la no oia i ka uuina o na lala laau maloo, eia nae, aia ma kahi mamao loa mai iaia aku, nolaila hoi hou mai la oia noloko o ka hale, a hoopau pono aku la i na hemahema o kona lole, aia no hoi kana pu panapana ke waiho la ma kona aoao.

Ua hoopiha loa ia mai o Nikola me ka kahaha, iaia i ike aku ai i ke kanaka o ka hoea ana ae no kona hale, no ka mea o kona helehelena, o ka helehelna no ia o kela kanaka, o ka nana pono loa ana mai iaia, ma kona manawa o ke kau ana iluna o ke kaaahi. mamua o ka haalele ana aku @ ke kaa ia Nu Ioka, a ke nalu nui la oia i ka hana a kela kanaka, o ka hoea ana aku, iloko o kela manawa o ka po.

 

MOKUNA VI.

 

Owai nae kela kanaka, a heaha kana hana o ka hoea ana aku no kela wahi? Ua maopopo loa ia Nikola, aole oia i kuhihewa, i ka helehelena ana i ike aku ai ma ka puka aniani, o ke kanaka hookahi no ia, o ka ike ana mai iaia nei nei ma kahi hoolulu o ke kaaahi ma Nu Ioka, a o Nikola, i koho aku ai, ua ike mua kela kanaka iaia; a ua nalu nui @ hoi oia no ke ano o kela kanaka, oiai oia e holo ana maluna o ke kaaahi, o ka mea wale no nana i kono mai iaia e hoopoina nona, o ia kona halawai ana me Beka Kamerona ma ke alanui.

He hookahi mea maopopo loa, ua hookolo mai kela kanaka mahope o Nikola no Pohaku Eleele, aka nae, o ke kumu o kona hana ana pela, ame kona hoao ana e hooke koke mai ma ka hale a Nikola e noho ana, he ninau pohihi no ia.

“Ina he hana hoomahua a he hana kolohe paha ka kela kanaka i makemake ai, alaila ke pohihihi loa la o Nikola, no kekahi mea ana i hana aku ai, e hoohaluaia mai ai kona ola. Ina he manao aihue ka iloko o kela kanaka, he uuku loa ka pomaikai e loaa ana iaia, no ka mea he mau wahi dala liilii loa ka Nikola, me kana uwaki pakeke o elua dala ke kumukuai; a ina hoi he manao pepehikanaka kona, alaila, ua nui loa ka manawa nona e pepehi mai ai iaia nei, oiai oia e nanea ana i ka auau ma ke kahawai.

Aole he wahi mea a maopopo iki ia Nikola, ka manao nui, ame ka hana maoli a kela kanaka o ka hoea ana mai. He hoohalua anei ka hana a kela kanaka i ke ola o Makuaia, a i ole i kona ola paha? Ina no kona ola ka kela kanaka e hoohalua mai la, alaila ua pohihihi loa oia, no ka mea aole he hookahi ona enemi ma Amerika, a ina no paha ua loaa iaia he hookahi enemi, aole ana no ia enemi, e hookolo mai iaia, i keia wahi loihi, me ka holo pu ana i pakele ai kona ola.

I ka paa ana o kona lole i ke komo hoopiha hou iho la o Nikola i kana pu, me ka hookomo ana iloko o kona pakeke, o kona hemo aku la no ia iwaho, me ke pani ana mai i ka puka a paa, o ke kamoe pololei aku la no ia o kana hele ana no kahi e ku ana o ka hale o kona haku.

Oiai ua o Nikola e hele la, hooholo iho la oia e huna loa aole e kamailio iki no kana mea i ike ai, oiai ua pili ponoi iaia ka hana a kela kanaka hoohalua, a i ka wa a na kanaka kiai i ninau mai ai iaia, i ke kumu o ke kani ana o ka pu panapana no elua manawa, hoonalonalo wale aku la no oia, ma ke kamailio ana aku ia lakou, he pu kiki wale iho no kela nana.

Aole e ku mai ka Keka Wala uwaki ahiki i ka hora umikumamalua o kela po. nolaila o ka Nikola hana, o ia no ka hele ana aku e ike pakahi i na kanaka kiai, ma ko lakou wahi, e ku kiai ana, a kauoha aku la ia lakou apau, e hoakoakoa ae maloko o ka halelio.

I ka akoakoa ana ae o na kiai apau, hoike aku la oia no ke kauoha hou i loaa mai iaia, o ia ke ku kiai ana aku o na kanaka, ma na wahi e kokoke ana i ka hale. e kakali malie lakou, ahiki i ka hoi ana o na mea apau iloko o ka hale, o ko lakou manawa ia e lawe ae ai i ko lakou mau wahi kiai, elike me ka ia nei i kuhikuhi aku ai, malalo o na kumulaau.

Ke nana mai la kela poe kanaka me na manao hoohuoi, no ko ia nei paalole maikai e komo ana, me ka ninau okoa ana mai o kekahi o lakou, i ka manao o ko ia nei komo ana mai i kela paalole, ia wa i hoakaka hou aku ai oia, no ka makemake ana o Makuaia, e noho pu oia me ia maloko o ka hale, a mai kela hale mai no oia, e kiai makaala mai ai, i kekahi mea e hoao aku ana e hoopilikia i ka haku o lakou, a ina e ike ana lakou i kekahi mea, alaila e puhi ae lakou i ka ulili, e hemo koke mai no oia iwaho no ke kokua ana ia lakou.

Hoike pu aku la no hoi o Nikola i kona poe kanaka, ua makemake loa ko lakou haku e hunakele loa ia na hana kiai i kela hale, aole e ike mai na malihini, a lohe aku paha no ka hoonohoia ana he mau kiai apuni ka hale, nolaila a’o ikaika mai la oia ia lakou, aole he hookani wale i kekahi ulili, aia wale no a ike maoli ia kekahi kanaka a mea e ae paha ma kela po.

Mahope iho kela kamakamailio pu ana me kona poe kanaka, i hele mai ai o Nikola no ka home o kona haku, a iloko o kona kahaha nui, aole kela pihoihoi a ano maka’u o Makuaia, aka e noho mai ana ua kanaka nei, me he mea la, aole he wahi mea nana i hoopilikia i kona noonoo. eia nae, ike aku la o Nikola, ua inu kona haku, a ke nohoalii la ka ulumahiehie maluna o kona helehelena, a aole oia i lohe i ke kani o kana pu panapana no elua manawa, a aole no hoi i lohe kekahi o na malihini, a ina no paha i lohe lakou he mea liilii wale no ia i ko lakou noonoo.

Ua makaukau ka paina ahiahi e kakali wale ana no o ka iho mai o na lede opio, aole no hoi i loihi iho kela noho ana a Nikola, iho mai la o Pege me kekeahi lede okoa iho, a o ka wa no hoi ia i komo mai ai he elua mau keonimana, a hoolaunaia ae la keia, a i ka ike ana mai hoi o ke kaikamahina a Makuaia, i ka paalole hou o Nikola, ua hoololi ae la ua kaikamahine nei, i kana mea i noonoo ai no ka lunanui a kona makuakane, a haawi mai la oia i kona aloha ma ke ano paa rula, me ka hoolauna ana mai i kona hoaloha, i hoa no Nikola e noho pu ai e ai maluna o ke pakaukau.

Ke ai la lakou nei, me ka inu ana no hoi i na kiaha waina, a na kekahi o na keonimana malihini mai Nu Ioka mai, ka noke i ke kamilio, aia hoi o Makuaia ma ke poo o ke pakaukau kahi i noho ai, me ka minoaka mau ana i kela ame keia manawa, eia nae, aia wale no ka hapanui o kana nana ana iwaho o ka puka aniani.

O ko lakou nei ai hoi ia ahiki i ka maona ana, ku mai la o Pege i ka lima o Nikola, a alakai aku la no kahi o ka piano, no ka mea iloko o na hookaau kamailio ana a lakou, i maopopo aku ai i kela poe he akamai keia i ka hookani piano, me ka himeni pu, a no ka hoao ana i kona akamai, pela i hiki mai ai o Pege e alakai ia Nikola i kahi o ka piano.

Aohe no he hoole ana aku a Nikola i ka makemake o ke kaikamahine a kona haku. a i hakalia no a kau kona mau manamanalima, ma na papa ki o ka piano, o ke kani kapalili aku la no ia, aia hoi na mea apau ke noho hoola’i malie mai la hoolohe i kana hookani ana. a i ka pau ana o kana mele mua, ia wa i kamailio mai ai ka lua o na lede opio, e hookani aku oia i kekahi mele, a kela kaikamahine i makemake loa ai, he mele no keia a Nikola i hookani mau ai maluna o ka piano, o ke kani aku la no ia, me kona noke pu ana ae i ka himeni, a o ka u’i iho no hoi o kona leo, ua piha maoli kela anaina i ka hauoli iaia.

Nana mai la nae ua o Nikola, aia kona haku ke noho la mawaena o ke koki, kahi e hiki pono ai iaia ke ike iawaho o na puka aniani apau, aia no hoi kekahi lima, ke paa la ma kekahi o na pakeke hope o kona lolewawae, a malia paha, aole i makemake kela kanaka i ko ia nei paani i ka piano, oiai aole ia o kana hana i hoolimalimaia mai ai, e noho aku malalo o kona haku, o ke ku ae la no ia o Nikola iluna, me ke noi ana aku i kona mau hoa, e hookuu mai iaia, no ka hele ana mai e hui me kona haku, ua paa e mai la nae kona lima, i ka hopuia e Pege, me ka i ana mai:

“E paani mai oe i kekahi mele hulahula. he keu aku maoli no kou akamai i ka hookani piano; aole oe i kupono iki no ka hana lunanui!”

Luliluli wale ae la no ke poo o Nikola me ka pane ana aku:

“Ke kaumaha loa nei au i ka hoike ana aku ia oe, aole he hiki ia’u ke paani i ke mele hulahula,” me ka haalele ana aku i na malihini ma kahi o ka piano, a hele mai la oia no kahi a Makuaia e noho aku ana.

Aia no ke ciga ke paa la iloko o ka lima o Makuaia me ke puhi ole ia, aia hoi ka hou ma kona lae kahi i kau ai, alaila kulou aku la o Nikola imua, a pane aku la:

“Ke manao nei au, aole au mea e hopohopo ai, ua puni owaho nei o ka hale i na kiai, aka ina oe e makemake ana, alaila ua hiki no ia’u ke hele iwaho e nana ai i keia manawa.”

“Manao au, aole no he pilikia, ua hiki no ia’u ke hoomanawanui no kekahi manawa,” i pane mai ai o Makuaia, make ano haalulu no nae o kona kino, e hoike mai ana kela ano, i kona hele maoli a piha i ka maka’u.

“Ua palekana oe maloko nei o keia rumi, mamua o na wahi e ae o kou home nei, aole loa kekahi mea e aa ana e hoopilikia mai la oe.”

Ma kela wahi o na kamailio mawaena o Nikola me kona haku, ua kani mai la ka piano, a hiki hou ole iho la ia laua nei ke kamailio, aia hoi na malihini ke hulahula mai la, me ka hele ana mai o Pege no kahi a Nikola e noho ana, me ka manao e noi mai iaia nei e hulahula laua, eia nae, i ka ike mai o Pege i ka hele o na maka o kona makuakane a kuna hihi, hopu ino mai la oia i kona mau lima, me ka pane ana mai:

“Heaha keia e kuu makuakane, ua ma’i anei oe?”

“Aole o’u pilikia, he pihoihoi wale no, ina oe e ae mai ana, alaila e hookuu mai oe e hoi au noloko o ko’u rumi, a e hoomau aku no hoi oukou i ka nanea ana, ahiki i ka pau ana o ko oukou hauoli.”

“He mea hiki anei kekahi ia’u ke hana aku nou?”

“Aole he mea hiki ia oe ke hana mai e kuu kaikamahine!  E noho oe me na maihini, a nou hoi e Nikola, e hele aku oe e huli ia Kaika, no ka hoihoi ana aku ia’u no ko’u rumi!”

Huli mai la o Nikola hele, no ka huli ana i ke kauwa a Makuaia, me ka ukali ana mai nae o Pege mahope ona, a o ia ka ua kaikamahine nei o ka ninau ana mai ia Nikola:

“Ea, heaha keia pilikia i loaa i kuu makuakane, ua maopopo anei ia oe? Me he mea la ua loaa oia i ka ma’i, eia nae ma ka’u nana aku, ua hele maoli kona mau maka a ku i ka hoomaka’uka’u, iaia e nana ana iwaho o ka puka aniani, o ia no oe o ka mea i ike aku i ke akua lapu.”

“O kona pilikia a’u e hoomaopopo ana nona.”

“E makaala loa aku oe iaia, a ina e makemake mai ana oia ia’u, alaila e hoike mai oe, me ka hoohakalia ole.”

“Ke paa loa nei ko’u manao, aole oia e makemake mai ana ia oe; ina no e komo aku ana kekahi laau, i maa iaia i ka ai ana, o ka pau ae la no ia o kela pilikia, nolaila mai lele kou oili no kou makuakane!”

E makaukau ana o Nikola e hele aku e huli ia Kaika, ke kauwa a Makuaia, ua oili e mai la ua kanaka nei, a pii aku la no ka hale maluna, me ka ukali ana aku o Makuaia mahope ona, a pii aku la no hoi o Nikola mahope, a iaia i hoea aku ai ma ka haka pono ana aku o kona mau maka, maluna o kona wahi moe, oiai ua ho-aia ae ke kukui e kana kauwa, a e huli ana hoi kela kanaka ialoko o ka rumi, ina paha he mea kolohe kekahi i komo ae iloko.

“Ea, heaha keia pilikia i loaa ia oe e kuu haku?” i ninau aku ai o Nikola. “He mea anei kekahi au i ike aku nei?”

“Ae, ua paa loa kuu manao, ua ike aku nei au i kekahi mea mawaho o ka hale, e kokoke la i ka halekuke.”

“Malia paha ua kuhihewa oe, a ina he mea kekahi au o ka ike ana aku nei ea, malia o kekahi paha o na kiai!”

“Aole, aole, ua ike maoli aku nei no au-!”

“Ae, heaha kau mea i ike aku nei, e hoike koke mai ia’u me ka huna ole aku i kekahi meahuna!”

“He mea ano ole wale no ia; aka nae pehea kou manao, ua ike mai anei o Pege i ko’u ano?”

“Ae, ua loaa aku ka ike iaia, ua ano e loa oe i keia po, i kaokoa ae mai kou ano i kamaaina iaia.

Lalau aku la o Nikola i ka lima o kona haku, a huki aku la iaia noloko o ka rumi, me ka hoonoho ana aku iaia noluna o ka moe, a o ia ka ua o Makuaia o ka pane ana mai:

“Auhea oe e Nikola, ua pololei ka Pege i ike mai ai no ko’u ano , ua hele maoli au a ano e loa!”

“Elike no me ka’u i kamailio mua aku nei, aole loa au mea e maka’u ai, no ka mea, he hana paakiki loa na kekahi kanaka ka manao ana mai e komo iloko nei o ka hale, me ka loaa mua ole o ka aeia; aka nae, e iho hou aku ana au, no ka hale malalo, a puka loa aku iwaho, no kahi a na kiai e noho mai la, no ka nana ana, ina paha he mea kekahi a lakou i ike ai.”

“Ae. ua pono kela, e hele aku oe e nana, aia a pau kau hana, alaila pii hou mai oe iluna nei. he mea kekahi a’u i makemake ai e kamailio pu me oe!”

Haalele aku la o Nikola i kona haku maloko o kona rumi, a iho mai la ilalo, me kona hookokoke ole aku ma kahi a na malihini e hoohauoli ana ia lakou iho, aka hele aku la oia a komo maloko o ke keena e waihoia ai o na meaai, iaia nae o ka wehe ana aku i ka puka, halawai aku la ka ike a kona mau maka me Beka Kamerona, me ka puiwa o kela kaikamahine no kona loaa pono ana ia Nikola maloko o kela kaikamahine no kona loaa pono ana ia Nikola maloko o kela hele, a o ia ka Nikola, o ka ninau ana aku iaia:

“Heaha kau hana e Miss Kamerona maloko nei o keia wahi?”

Nana mai la o Beka Kamerona, i ka paalole maikai o Nikola e komo ana, alaila noke ae la oia i ka akaaka, me ka pane ana mai nae:

“I hele mai nei au no ke kokua ana ia Anate Tile i na hana o ka hale nei.”

“Pela anei ka mea oiaio?” wahi a Nikola, me kona maopopo ole loa i ke kuleana o kela kaikamahine e hoea mai ai maloko o kela home.”

“O ka mea oiaio loa ia. Ua maopopo mua ia’u. he nui ka Anate Tile hana, a ua makemake oia ia’u e kokua aku iaia, a o kekahi no hoi, he makemake au e kiei iki aku i ke ano o na malihini a Makuaia.”

“Aha, akahi no a maopopo ia’u, eia ka ua makemake oe, e ike aku i ka lole huelo loihi o Pege, ia oe e kiei mai ai ma ka puka ki, aole anei pela?”

“Ae, a ua ike aku au i ka lole nani o Pege, a pela no hoi me kekahi lede me ia. Pehea aole anei ou manao, he keu maoli ka u’i ame ka nani o ko laua mau lole e komo ana?”

“Aohe maopopo ia’u, no ka mea aole au i maa i ka lole o na wahine.”

“Aole o ke kiei wale no ka’u hana, aka o ka hoolohe pu no kekahi, a e Nikola. he keu aku maoli a ka nani o kau paani ana i ka piano!”

“Malia paha he maikai i’o ka’u hookani ana i ka piano, aka aole nae elike aku me ka hookani ana a na anela ma ka lani, ke ku maoli i ka nani ame ka hoohihi o ka manao.”

“Aole he wahi lilo o ka paani ana a na anela, ina he hiki ia lakou ke hookani i ka piano, ua ume maoli ia aku ko’u manao hoohihi, i kau paani ana, i kau a mea o ke ku maoli i ka nani. Ua aneane maoli no oe e kono mai ia’u e hoopoina i na mea apau, a koe ka nani ame ka maikai.”

“Aia hoi maloko o ke keena hookipa i kela manawa, na malihini ame Pege ke noke mai la i ka hoohauoli ia lakou iho, me ko laua nei lohe ana aku i na leo himeni, a o ia ka Nikola o ka pane ana mai:

“Pehea oe i kela mea maikai e hanaia mai la maloko o kela rumi?” wahi ana me ke kuhikuhi ana aku o kona manamanalima i kahi o ka rumi hookipa.

“Aohe ilaila ko’u hialaai,” wahi a Beka Kamerona. me ka luliluli ana iho o kona poo, a o ia ka Nikola o ka i hou ana mai:

“Aole anei ou makemake i na mele hulahula?”

“Ae, he makemake no au ia mau mele, eia nae. no na wawae wale no ia; o kau mau mele i hookani mai nei maluna o ka piano, he mau mele ia no ka puuwai.” me ka hoopili ana ae o Beka Kamerona i kona mau lima a elua ma kahi o kona umauma.

“Ke hauoli loa nei au i ka hoike ana aku ia oe. no kou manao ana pela, oiai mailoko i’o mai o ka puu wai, i oili mai ai kela mau mela; aia a loaa kekahi manawa kaawale ia’u ma keia hope aku, alaila e hookani hou ana au i kela mau mele, imua ou, ame kekahi mau mele hou ae, au i lohe mua ole ai.”

I ka pau ana o kela mau olelo a Nikola o ke kamailio ana mai, o kona kaha aku la no ia hele, no ka huli ana ia Mrs. Begena, ka makuahine hanauna o Beka, me ka ukali ana aku no hoi o ke kaikamahine opio mahope ona, a ia laua nei i komo aku ai noloko o ka halekuke, o ka wa hookahi no hoi ia a Mrs. Begena, o ka huli ana mai hoi noloko o ka halekuke, mai ka puka mai e hamama ana mahope, aia hoi kona mau lima, ke pupue wale la no i ke poheoheo o ka puka, me ka namunamu ana i kekahi mau huaolelo e lohe pono ole ia aku ai kana mau mea e kamailio ana.

I kela ike ana mai o ua wahine nei i ke komo ana aku o Nikola ame Beka, nana pono mai la oia me na maka i piha me ke pihoihoi, alaila hooikaika wale mai la no kana hele ana. a loaa kekahi noho, o kona noho iho la no ia ilalo, me ka holo awiwi ana aku o Beka Kamerona. a kukuli iho la ma ka aoao o kona makuahine hanauna me ke kamailio ana aku:

“Ea, heaha keia pilikia i loaa ia oe e Tile? Ea, ina he mea kekahi au i ike aku nei, e hoike koke mai oe ia’u i keia manawa!”

Mamuli o ko Mr. Makuaia hoopihaia ana me ke pihoihoi ma kela po, a pela hoi keia ike ana aku o Nikola, ua loaa pu ia haawina pihoihoi i kona wahine lawelawe, aole oia i ku malie iho, a ninau aku i kela wahine, aka oili koke aku la oia iwaho, ma ka puka e hamama mai ana.

He pouliuli wale no owaho, me ka hiki ole iaia ke ike aku i kekahi mea. aka nae. i ka hala ana o kekahi mau minuke o kona ku malie ana i kahi hookahi, akahi no a hiki iaia ke ike aku i na kumulaau i ke ku mai. pela hoi me na pahu meakanu, e hoopuni ana i ka hale, me kona maopopo loa, aia kekahi o kona mau kiai, ma kahi kokoke loa, e hiki ai ke lohe mai i kona kahea aku.

Ke paa la kana pu panapana maloko o kekahi lima, ke au hele la hoi kana nana ana ma o a maanei. aole ona ike aku i ka maaloalo ae o kekahi meakino, aole no hoi oia i makemake e hoopuiwa aku i kona mau kia’i, nolaila i ka maopopo loa ana iaia, aole he kino kanaka, ma kahi kokoke mai i ka hale, hookomo hou iho la oia i kana pu panapana iloko o ka pakeke o kona lolewawae, pela hoi me kana ulili maloko o ka pakeke o kona kuka, o kona komo hou mai la no ia iloko o ka halekuke, no ka ninaninau ana ia Mrs. Begena no kana mea i ike ai.

Loaa mai la no iaia kela wahine e noho ana maluna o ka noho, a e paa ana hoi o Beka he kiaha wai iloko o kekahi lima, me ka hookikina ana aku i kona makuahine hanauna, e inu i ka wai, iloko no hoi o kela manawa hookahi, ke noke la no oia i ka ninau i ke kumu o ke ano e o kona makuahine:

“Ea, e hoike koke mai oe ia’u, i kau mea i ike aku nei, ke kumu nana i hookunahihi i kou helehelena?”

“Aole, aole!” i namunamu wale mai ai no ka Mrs. Begena kamailio ana.

“Ua ike oe i kekahi mea, o ke kumu ia o kou anoe!” i mau aku ai no o Beka i ke koi paakiki ana.

“Aohe a’u mea i ike e kuu kaikamahine!”

“Ina hoi ha aole au mea i ike, alaila ua loohia anei oe i ka ma’i?”

“Aole ko’u he ma’i maoli, he ano poniuniu wale no. malia paha no ka nui o ka wela o kela po.”

“Eia hoi paha ka mea apiki, ua ku a pihoihoi maoli oe, a o ke ano o kou mau maka, ua like me kekahi mea, i hele a piha me ka maka’u.” Ua maka’u anei oe i kekahi mea?”

“Aole! Aole a’u mea i ike!”

“Heaha kau mea i ike aku nei e Mrs. Begene, ke kumu nana i hookunahihi mai i kou ano i keia po?” i pane aku ai o Nikola.

I ka lohe ana mai o kela wahine, i ka leo o Nikola, luliluli wale mai la no oia i kona poo, a hoomau hou aku la no o Nikola i ka ninau ana:

“Ea, he mea kau i ike aku nei, pela i piha ai oe i ke pihoihoi. Pehea he kino kanaka anei kau o ka ike ana aku nei?”

No keia ninau, huli mai la ka nana ana a ua wahine nei imua o Beka, me ke auhee ana aku hoi o kela nanaina kunahihi mai iaia aku, a pane mai la:

“Aole a’u mea i ike ai e Mr. Nikola, ke manao nei au, e hoi noloko o ko’u rumi,” wahi ana, eia nae, aole oia i hoike mai i ka mea oiaio.

Ku ae la o Mrs. Begena iluna, me ka lalau ana mai i ke kiahawai a inu ae la, me ke kamailio hou ana mai:

“Aohe a’u mea i ike aku nei, o keia ka mea oiaio loa.” wahi ana, aia hoi o Nikola ke nana pono la ma na maka o Beka, pela hoi o Beka e nana aku ana ia Nikola. me he mea la, ua loaa like aku ia laua ka ike, aole o Mrs. Begena i kamailio aku ia laua i ka mea oiaio loa, aka nae, ua kokua aku la o Beka i kona makuahine, ma ka hopu ana aku i kona lima, a hele like aku la laua, no kahi o ke alapii e hoea aku ai no kahi i waiho ai o kona rumi, ma ka papahele elua.

I kela hala ana mai o Beka Kamerona, no ka hoihoi ana i kona makuahine hanauna noloko o kona rumi, ua koe hookahi wale aku la no o Nikola me ka noonoo nui ana i ke kumu nana i hoopioloke aku i ka noonoo o kela mau mea a elua ma ia po.

Hoko o kona noonoo o ka mea hookahi no a Makuaia i ike ai ma kela po, o ka Mrs. Begena no ia o ka ike ana, o ka mea nae nana i hookahaha loa mai i kona noonoo, o ia no ka maka’u like ana o keai mau mea a elua. Ua manaoio loa o Nikola i na mea a Mrs. Begena i kamailio aku ai iaia i kinohi, aole i maopopo iki iaia ke kumu o ka maka’u o Makuaia, o ka mea apiki nae, ua kau aku ia maka’u maluna o kela wahine, me kona aa ole e hoike mai iaia nei i ka mea oiaio.

Mai ka manawa kamalii mai, ahiki wale i kona kanaka makua ana, he mea manaoio no o Nikola i na akua lapu o ka po, mamuli o ka manaoio o kona lahui kanaka i na hana hoomanamana, aka nae iaia i komo ai i ke kaua, i loaa mai ai iaia ka ike o na aku lapu e kau ai ka weli, o ia no na akua me na wawae a e paa ana hoi me na mea kaua.

No kekahi mau minuke kela ku malie ana a Nikola, hookomo ae la oia i kana ulili iloko o ka waha, hemo hou aku la no ia iwaho, me ka manao paa e hele aku e hui kino me kona mau kanaka, a e ninau aku ia lakou, ina paha he mea ka lakou i ike ai, mai ko lakou mau wahi kiai mai.

Hele aku la ua o Nikola a loaa ke kanaka kiai ma kahi o ke kumulaau, o Anade kona inoa, a i ka ninau ana aku o Nikola iaia. ina paha he mea kekahi ana i ike ai mai kona wahi kiai mai, hoole loa mai la kela kanak, me ka olelo ana mai, aole ana mea i ike, koe wale no ka poe o ka hale. e hemo ae ana mawaho o ka lanai, a e noho kokoke ana no hoi ma kahi o na puka aniani, a hoohiki paa mai la oia imua o Nikola, aole loa kekahi kanaka i maalo ae ma kona wahi kiai. a hookokoke aku i ka hale i noho ai kona haku.

“Pehea ua ike anei oe i kekahi mea e kamailio pu ana me Mrs. Begena mawaho pono aku o ka puka. mahope o ka halekuke?” i ninau aku ai o Nikola i kela kiai.

“Aole au i ike iki i kekahi mea, o ke kumu paha hoi, aole he hiki ia’u ke ike aku i ka puka mahope o ka halekuke ma. keia wahi aku, ua alaiia ae e ke kumulaau lemi.”

“Alaila aole anei oe i nee ae mai keia wahi aku au e ku nei?”

“Aole o’u wahi mea a onioni iki. no ko’u hopohopo, o ikeia mai auanei au.”

“Ua ikeia kekahi mea i keia po, aole nae e hiki ia’u ke hooia aku imua ou. i ke ano o ua mea la i ikeia mai nei. O ka’u kauoha wale no ia oe. o ia kou hakilo pono loa ana ma ka makaala, a ina oe e ike ana i ka maalo ae o kekahi mea ma keia wahi au e kiai nei, mai hoohakalia i ka hoohana ana i kau pu, ke ae ole kela mea e hoike mai i kona ino ame kana hana o ka hoea ana mai maloko o keia wahi.”

 

(Aole i pau.)