Ka Nupepa Kuokoa, Volume LXI, Number 3, 20 Ianuali 1922 — Page 8

Ka Nupepa Kuokoa

KE KILOHANA POOKELA NO KA LAHUI HAWAII.

 

            "ʻOiai hoi ua loaa pono mai nei au ia oe, nolaila aoha aʻu huna hou ana iho iaʻu he mea pono e hoikeia aku ia oe ka moolelo holookoa, " i pane aku ai o Keoni, me ka akaaka pu ana aku.

            "E noho ana au iloko o ka rumi waiho buke a Mr. Beniona e pili kokoke aku ana i ka rumi hookipa, i ka auwina la a ko kaikamahina i hele ae ai ilaila, a lohe aku la au i kona kamailio ana aku ia Mr. Beniona i na mea apau, e hoakaka ana no hoi i ka nui o ko olua mau pilikia ame ko olua makemake e hoolimalima i na lako hale apau o olua maloko o kahi hale a olua o ka noho ana oia keia, me ko olua makemake pu e kuai i kela wahi aina o olua me ka hale e ku ana maluna iho ma ka Adironadaka."

            "A!  no ia loaa ana ia oe o ka manawa kupono loa e hoolilo mai ai i kekahi mau dala au, he waiwai hoi aʻu i hoole aku ai ia oe mai ka lawe ana mai he makahiki mamua aku, oia anei ke kumu o kou kuai ana?  wahi a Makaleka.

            "E Keoni, me ka hauoli nui au e haawi aku nei i koʻu mahalo ia oe, a no ka mea, aole oe i hoihoi wale mai no i kuu ola ame ka ikaika me aʻu, a e hauoli nei i keia la, aka ua olokaa pu ae oe i na haawe kaumaha apau mailuna ae oʻu.  Mai make paha au, a mai ike hou ole mai paha oe iaʻu, elike me ia au e ike mai la i keia la, in a aole i loaa mai kela mau kokua au, oia hoi ke dala aʻu i makemake loa ai e loaa mai i ka manawa kupono loa, a i loaa io mai ai no hoi.  O, e Keoni, ua aie nui aku au ia oe a oi aku mamua o kaʻu mea i moeuhane mua ai!"

            Alaila helelei iho la kona mau waimaka ia manawa, a huna ae la ikona mau maka me ka hainaka, a no kekahi mau minuke kona uwe malie ana, no kona hoomanao ana ae i ka nui o na hana maikai a kona kaikunane i hana mai ai iloko o kona manawa o ka pilikia kuhohonu loa, ana nae i ikeʻole ai na Keoni e kokua ana ia laua.

            Aea ae la ko Makaleka poo iluna, holoi ae la i na waimaka e kiheahea ana ma kona mau papalina, a ku ae la iluna ia manawa, a hele aku la a ku mamua o ke kikunane a haawi aku la i na lima, a i aku la: 

            "E ke kanaka lokomaikai a puuwai hamama, e lohe aku ana oe, a e lona pu aku ana no hoi ia oe ka ike maopopo; e noi mua aku ano au i kau huikala ana mai, a no ka mea ua hana hewa aku au ia oe.  Mamuli o koʻu manao hookiekie, alunu a lokoino no hoi, ua nana wale iho no au noʻu iho me ka noonoo ole aku i kou pono, ame ka pono pu o kekahi poe e aku i halawai me na popilikia, elike me koʻu halawai ana, a e hoomahuahua mau aku ana no hoi au i ko lakou mau ehaeha mamuli o kaʻu mau hana kuhihewa ame na hemahema, he nui ma koʻu aoao, oia mau hemahema uae aʻu i hana ai ua ike iho au i ka nawaliwali ma koʻu aoao, a pela hoi au e noi aku nei ia oe no kau huikala ana mai."

            "E Makaleka, heaha ka mea nana i hoololi ae i kou ano o na la i hala a lilo oe he mea ano hou i keia la?  Iawai au i aie ai i keia hana aloha a lokomaikai?"  wahi ana; me ka mau no o ka paa o kona mau lima i na lima o Makaleka.

            "Iaʻu nei, ohi a no ka mea, i ka manawa a kekahi e iho aku ai ilalo iloko o ke awawa malu o ka make, ia manawa e ike iho ai kekahi i kona ola i ka loli mai kekahi kulana like ole mai.  He makahiki wale no a oi aku i hala, ia manawa i ike iho ai au e Keoni ua kokoke loa koʻu hopena ma keia ao, a e hoi aku ana au i ka lua pa-u, a iloko o ia aloha lehulehu, a iloko o ia manawa i makemake loa ai au i koʻu mau hoakanaka, a o oe pu kekahi iwaena o ia poe.

            "O kou manaoio maoli anei ia e Makaleka?  i ninau mai ai o Keoni me ka leo haalulu; e huikala mai ana anei oe iaʻu no koʻu aloha ana aku no ia oe me ka manao e lilo oe i wahine naʻu, a i ole no koʻu hoaoia ana mai paha e punihei e kakahi wahine me ka manao lapuwale, a lilo ana au i mea hana hewa aku ia oe?"

            "Mai loaa iaʻu ka ike maopopo, in a no au i ku iho a noonoo me ke akahele, aole loa oe e ae ana e hoowaia ia oe iho, a hooko ole hoi i ka hoohiki au i hoopaa ai ia oe iho; aole oe e ae mai ana e hookipa aku iaʻu me ko ike no he wahine oia i mareia ma ke ano ma-lu, elike me ia a Mariena Walabirdia o ka hoike ana ae iaʻu ma ka leka.  Mai kela manawa mai aole au i hooki i koʻu hoahewa mau ana iaʻu iho no koʻu puni wale ana i na hana pahele a hooholo iho ai aole e huikala iki aku iaia.

            "Noʻʻu iho e Keoni, ua hooholo au i koʻu manao e hoopoina aku i na hewa apau i hanaia o ka wa i hala, no ka mea, ua nui ka eha o kuu naau no kaʻu mau olelo ikaika o ka hoakaka ana aku ia oe i kela manawa a kaua i halawai ai elua makahiki i hala aku nei, au e hoomanao la ma ka Adironadaka.

            "O kau mau hana maikai i ka poe popilikia, ka hana maikai hoi au i hana mai ai no keia hale ma o kou lawe ana i ka hoolimalima a hoonoho mai i keia kaikamahine malalo o kau malama ana, ke kaikamhine ilihune hoi a maua i hoao ai e hoopomaikai aku iaia, pela hoi me kou hoolako ana i home no kekahi mau kaikamhine ilihune ewalu a malama pu aku ia lakou oiai lakou e auwe ana i ka hune o keia ola ana, a pela hoi me kau mau hana kokua ia maua iloko o ko maua manawa o ka pilikia, ua hoike mai ia mau hana au i koʻu koho hewa wale ana aku no ia oe ame kou mau ano oiaio maoli; ua kuhihewa au i kou mau ano oiaio aka, mamuli o kaʻu mau mea i ike iho nei, ua hooiaio mai ia mau mea iaʻu i ka nui o kou lokomaikai ame kou aloha i ka poe iloko o ka popilikia.

            "Eia hou."  me ka akaaka ana iho o Makaleka, "o ka hauoli o ia ka mea hooiliwai kiekie loa o na manao like ole apau.  i hoike aku au ia oe i nei manawa, e Keoni, ua hauoli nui au, ua hauoli loa i nei manawa."

            "Alaila.  o kou manaoio maoli anei.  e Makaleka i hoakaka mai la ua loaa hou o Mr. Lanakasa ia oe?"  i ninau mai ai o Keoni.

            "Ae, ua loaa hou oia iaʻu a na hoolaulea hou maua ia maua iho i nei manawa mahope o ka hala ana o na makahiki lehulehu o ke kaawale ana.  E pono oe, e hele ae e ike ia makou i kekahi manawa, aia makou maloko o ka Hokele Waladofa.  Astoria e noho nei i keia manawa, ua hoike aku iaia: aole oia i maopopo i ka Mariena mea i hana ai ahiki i kuu hoakaka ana aku iaia ma kekahi wa kokoke i hala aku nei, a ke manaoio nei au e hauoli ana no oia me ka hoike mai ia oe i ka maikai ole o kana imau hana kupono ole i hana mai ai ia oe, a pela hoi iaʻu, oiai ua piha ola i ka inaina i kela manawa, no kela loaa pono ana mai o kaua iaia maloko o ka rumi o kaua wale no, mamuli o na hana imihala a Mariena.

            "Pela ana anei?  E ae io mai ana anei oia e ike mai iaʻu, a e hoopau ae ana anei oia i kona manao inaina a hoomauhala noʻu ke hele aku au ilaila?"  wahi a Keoni o ka ninau ana mai oiai no oia e paa ana i ko Makaleka lima.

            "Aole au i poina i kela mau olelo hoino ikaika loa ana o ke kamailio ana mai ia oe ame aʻu pu ma kela la poino ole.  E hoi aku ana au a hoike aku iaia no keia hui ana iho la o kaua, a e noi pu aku ana iaia e ike olua, a e hookipa aku oia ia oe i kou manawa e hiki ae ai, a ke paa nei no kuu manao e hana mai ana no oia pela, e hoike aku oe i kou manao maikai ame ka makemake e ike aku iaia ke halawai olua.

            "Noʻu iho ua hauoli loa au, a elike me koʻu piha i ka hauoli, pela no au e makemake nei i na kanaka apau e noho hauoli, a e lilo i poe noho lokahi me ka maluhia pu i na manawa apau ma nei mua aku," a hooki iho la o Makaleka i kana kamilio ana.

            Alaila, kulou iho la ke kanaka e noho mai ana mamua aku ona, a honi iho i na lima o Makaleka ana no e paa ana alaila hookuu mai la, a iaia i hookuu mai ai i na lima o Makaleka, aia ma kona helehelena, i ka Helena nana aku, he kaumaha, me he mea la e hoahewa loa ana oia iaia iho, a ua hoopihaia iho la o Helena i ke aloha i ka ike aku i kona helehelena kaumaha ia manawa.

            "E Makaleka, no ka ike hou ana aku ia oe e noho hauoli ana elike me kou noho hauoli ana mamua, no ka ike aku elike ae ana ka lamalama o kou helehelena me ko kekahi kaikamhine, oia ka mea aʻu i noonoo nui ai e haawi aku i na manaolana apau ia oe, i mea e loaa ai ia hopena ia oe a elike me kau i kono mai nei no koʻu hele ana aku i ka Hokele Walafoda, no ka ike ana aku ia oukou, malia, ke loaa iaʻu he manawa kaawale, a ke pono hoi ia ia oe, e hoea io aku ana au ilaila ma ka la apopo," wahi a Keoni o ka nana ana ae iluna me ke helehelena minoaka, oiai nae, ma kona helehelena ua hele ae la a keokeo pu.

            "O, me ka mahalo ia oe, e Keoni, o ia e pono oe e hele ae !" wahi a Makaleka, alalia huli ae la ka Keoni nana ana ia Helena a i ae la:

            "E Miss Simoa, aole au i poina ia oe, iaʻu no i ike aku nei i ku mai ua hoomanao koke ae no au i koʻu wahi o ka ike mua ana ia oe.

            "Ke hoomanao la no anei oe i ko kaua hui ana maloko o ka hale o Mrs. Satevana ma ka Adironadaka ke hoomanao nei no au; ia manawa aole au i moeuhane iki o oe no ka io o kuu io ame ke koko o kuu koko; nolaila hoopahemahema wale aku no kaʻu hoomaopopo ana ia oe, eia ka, o oe no ke kaikamhine a ka mea hookahi aʻu i aloha ai mai kuu mau la opio mai," a hoomau aku la oia i kana nana ana i ka helehelena o Helena me ka mahalo pu iloko iho on a no ka ui maoli o ka wahine opio.

            "Aole au i poina ia oe, e Mr. Wilekona," i pane aku ai o Helena me ka hooiaio pu ana aku i kana mea o ke kamailio ana aku, a mai hoomau hou aku paha oia i kana kamailio ana, o ka nee mua ana ae hoi o ka makuahine i ka akaaka a i aku la:

            "E Helena, aole makou e ae aku ana e nalowale hou oe mai ia makou aku i keia la.  E Keoni, he pule aku nei i hala, ma ka Poakolu, ua mareia o Helena nei me Robaka Egelakona, olwai la ia kanaka opio i kau noonoo iho?"

            "Aohe hiki iaʻu ke koho aku," wahi a Keoni.

            "He mau makahiki aku nei i hala, oiaio no o Helena nei ame kela kanaka opio e hele like ana i ke kula, ua halawai laua nei a ua makemake kekahi i kekahi a eia wale aku nei no la akahi a maopopo, eia ka o ke keiki hanai no ia a Mr. Lanakasa o ka malama ana mai kona wa kamalii mai," i hoakaka aku ai o Mrs. Lanakasa.

            "O, he mea kamahao maoli ka kela!"  i pane mai ai o Keoni.

            "Ae no hoi, a he moolelo i paa loa ai ka manao o keia mau opio ahiki i ko laua hoohuiia ana ma ka mare.  Ua lohe aku la oe i na mea apau, nolaila e hooko mai oe i keia koho, no ka mea, he makemake loa au e hoolaulea ia olua a ia oe e hoea ae ai ea ia manawa e hoikeia ae ai na moolelo pakahi mawaena iho o kakou o ka manawa i hala," wahi a Makaleka, a hoomaka aku la no oia e hele no kahi o ka puka e ku mai ana.

            Hahai pu aku la o Keoni Wilekona ia laua ahiki i ka hoea ana aku i ka puka pa kahi o ke kaalio e ku mai ana, a kokua aku la i na lede, ma ka pii ana aku iluna o kekaa, a nana aku la no hoi i ka holo o na lede, oiai ka wahine ana o ke aloha makawelawela ana mai kona mau la opio mai i huli mai ai a ani mai la i ka lima iaia me ka minoaka pu ana mai, i ka huli ana ae keia o ke kaalo ma ke kihi o ke alanui.

            Ia Keoni i hoi aku ai a loko o ka rumi hookipa, ku iho la oia me ke kulou o kona poo ilalo, ma kahi a Makaleka i ku ai a haawi aku ai hoi i kona mau lima iaia no ke aloha ana.  Pehea la ka loihi o kona ku ana malaila aohe mea i ike, a i puiwa oia i ke kani ana mai o ka hele ma ka puka o ka hale.

            Puiwa ae la oia i ke kani ana mai o ka hele a hamo ae la i kona lima ma kona mau maka me he mea la o kona ala ana mai no ia mai ka hiamoe mai.

            "Na ke Akua e hoopomaikai mai iaia!"  wahi ana o ka hawahawana ana iho, me ka haalulu o kona mau lehelehe.  "Ua huikala mai oia iaʻu!  Ua loihi no na la o koʻu kakali ana no keia huikala ia mai, aka nae e hoomaikaiia na lani, no ka mea, ua huikalaia mai la kaʻu mau hewa i hana aku ai iaia, mamua hoi o ka nele loa."

 

Mokuna XLIX- Ka Moolelo Walohia.

 

            Ma kekahi auwina la ae ua hele aku la o Keoni Wilekona e hooko i ke kono a Makaleka, a ua hookipaia aku no hoi oia me ka pumehana ame ke aloha kuio ma ke ano ohaoha loa, me he mea la aohe wahi kuee i hanaia mamua aku, e ke kanaka i piha me na manao ino a e hookoia aku ai paha ke karaima pepehikanaka maluna on a.

            Ma o ka lulu ana o na kanaka i ko laua mau lima, ma ko laua manawa o ka halawai ana ae, i hoike ae ai kela ame ke a pakahi o laua, ua kanuia aku a nalowale loa na manao awal ua a hoomauhala o na makahiki lehulehu i hala-aku, a o ke aloha hoakanaka oiaio ka iloko pakahi o laua ia manawa, a ia laua, e huai pakahi ana kela ame keia i kona mau manao ame kana moolelo iho ma na mea e pili an i ke kumu o ke ala ana mai o ka mokuahana maena iho o laua, ia manawa i loaa ai ka ike maopopo ia laua ua hoolilo like ia laua i mau mea paahana e ka wahine i piha me ka maalea a i makemake hoi e hoolilo i ko lakou noho aloha ana i mea hoomakaeia a ua ko io no hoi la hana ana a ua o Mariena Walabirdia.

            He liilii loa ka Makaleka mau huaolelo ma ia manawa a na keonimana e u huepau ana i ko laua mau moolelo pakahi, he noho wale mai no kana hoolohe i ka hapanui o ka manawa, me ka helehelena oluolu a minoaka ma kona mau papalina, a no ka mea, o ka noho lokahi ana me ka oluolu ame ke aloha, me ka loaa pu o ka maluhia, kana mea nui e noonoo ana ia manawa me ka hooikaika mau iloko on a e hoopoina loa aku i na mea i hanaia o ka wa i hala.

            Ua hala o Robaka âme Helena i ka holokaa ma ia auwina la maloko o ka paka, nolaila aohe mea keakea mai ia lakou, a e hookanalua iho ai hoi i ka huepau ana i ka lakou mau moolelo, a ua kakahele wale no hoi ka lakou kamailio ana ma na mea apau me ka oluolu maikai a me ka hauoli.

            Aohe mea hoehaeha e ae i ko Mr. Lanakasa noonoo iloko o na la apau o kona ola ana elike me ka moolelo o ko Keoni Wilekona hoopakele ana i kana wahine ame kana kaikamhine mailoko ae o ka pilikia a ka nele iloko o ka manawa kupilikii loa ma o ke kuai ana i ko laua home ma ke kuahiwi Adironadaka, ka hoolimalima ana i na lako hale ia a laua, ame kona malama ana me he makuakane ponoi la i ke kaikamhine ilihune a laua i hoohoaloha ai.

            He auwina la ia i hoomanaoia no ka manawa loihi ma ia hope mai, a iloko o ia manawa i hoolauna hou ia ai na hoaloha i kaawale no ka manawa loihi, a ua hoomamaia no hoi ka naau o kela ame keia, me ka hoomaemaeia o na manao awahua o na la i kaahope aku, mamuli o ka ike ana i na kaumaha o na hewa i hanaia e lakou i loko o na la o ko lakou ola ana i ka wa opio; elike me ka loihi o ko lakou hui mau ana me ka hauoli i na manawa apau.

            Ma ka Poalima ka hoea ana mai o Mr. Lanakasa me kona ohana i ke kulanakauhale o Nu Ioka, hookahi la a lakou o ka noho ana ma Kikako ma ko lakou alahele no Nu Ioka.

            Ma ke kakahiaka nui ae o ka Poaono hoomaka aku la oia e hele e nana i kana hana maloko o kona keena hana, me ka hele ana ma kela ame keia keena hana e ike i kona mau limahana a lululima aloha pu me lakou, me ka ninaninau ana aku ia lakou, ma ke ano he mau hoaloha, no ka mea e pili ana i kana hana iloko o kona manawa o ke kaawale ana ma na aina e.

            I kona hoea ana aku ma kahi a Habati Alekona e noho ana, a i ka ike ana mai o ia kanaka opio iaia, pii ae la ka ula ma kona mau papalina, me ke ano hoihoi ole mai o kana nana ana mai i kona hakuhana, alaila kulou hou iho la kona mau maka ilalo maluna o kana hana.

            Iloko o kela auwina la, i ka manawa i maalo hou mai ai o Mr. Lanakasa ma kahi a ua o Habati Alekona e noho ana, ku iki iho la o Mr. Lanakasa no kekahi manawa pokole, a kamailio iho la me kahi leo liilii:

            "E Alekona, he makemake au e ike a e kamailio pu me oe no kekahi manawa maloko o kuu keena malu ma ka hora eha o keia auwina la."

            "Ua pono ia i koʻu manao," i pane mai ai o Habati Alekona me ka pii ae la nae o ka ula ma kona mau papalina, a ke noonoo pu la no hoi oia he hana nui ka kona hakuhana i makemake ai iaia e hele aku malaila.

            I ke kani ana o ka hora eha hoea aku la o Habati i ke keena o Mr. Lanakasa a lawe ae la i kona noho ma kahi a Mr. Lanakasa o ke kuhikuhi ana mai iaia.

            "E Mr. Alekona," i pane koke mai ai o Mr. Lanakasa e kamailio ma ka mea ana i makemake loa ai e hoike mai "I noi aku nei au ia oe e hele mai iloko o keia keena no ka hoike ana aku ia oe no kuu ike ana ua hana hewa loa aku au ia oe.  Ae," i ka manawa a Alekona i hoike aku ai i kona pahaohao no ka manao o kona haku o ka olelo ana mai la.  "Ua waiho aku au i kekahi mea hoowalewale ia oe ma kou alahele, a ua ike au he hana naʻu ka hoike ana aku ia oe a e noi pu aku hoi i kau huikala ana mai iaʻu.

            "O kahi nae i laki ai o ka hana aʻu i hoolala a i hoakaka mai ai ia oe ua hoopuhiliia a holopono ole, a ua ike pu no hoi au o ka umi kaukani dala aʻu i kauoha mai ai e hele aku oe e kikoo iloko o ka Banako Lahui a i hookomoia hoi ma kou inoa, aole oe i kikoo.

            "He mea oiaio ia aole au i kikoo, a no ka mea, ua ike au aole naʻu ia dala!"  wahi a Alekona, me ke ano haalulu o kona leo, no ka mea ua lilo ka loaa ole ana mai o ia mau dala iaia ana i kuko nui ai i puupuu ikaika loa nana i hoehaeha loa i kona noonoo, a ua lilo no hoi i mea e hia-a ai oia no kekahi mau p olehulehu no ka lilo ole ana mai oia mau dala iaia, no ka mea me ia mau dala nui i manaolaua a oia e hoopauia ae ana kona mau hemahema lehulehu.

            "He mea oiaio ia au i pane mai la," wahi a Mr. Lanakasa o ka pane ana mai, a i hou mai la nae," ua loaa mai iaʻu ka ike maopopo no ko mare ana i ke kaikamhine, ka mea kupono wale no e lilo i wahine nau."

            "Ia wai la hoi ko i nei lohe ana ua mare au iaia?" i ninau iho ai o Habati Alekona iaia iho.

            A hala nae kekahi manawa iaia o ka nana pono ana aku i kona hakuhana, a i ka loaa ana o kekahi manao koa iaia, i aku la:

            "Ae, ua mare io au iaia mahope iho o kuu hoomamao ana mai iaia mai no ka manawa loihi, a iloko o ia manawa ua hoohiki au aole e mare iaia.  Eia nae, ua piha loa au i ka hauoli i nei manawa no ko'u alakai ana e hooko aku ia mare me ua kaikamahine la, a no keia kumu hokahi wale no in a aole au e mare ana i kela kaikamhine aʻu o ka hoohihia ana aole loa e loaa iki ana ka maha i kuu uhane, a o kekahi kumu aole loa e hiki iki ana iaʻu ke hooko aku i ka hana aʻu i hoolala mua ai, in a he mea ia e loaa ai iaʻu he mau miliona dala me ka umi kaukani dala au o ka haawi ana mai iaʻu ma ke ano he makana a i ole he dala kipe.

            "I nei manawa, i hoike aku au ia oe, ua nui loa kuu makemake ia Miss Helena Simoa; he manao keia i hookumuia iloko oʻu no kekahi mau makahiki me kuu manaolana mau e lilo oia naʻu, a i kuu ike ana o Robaka kekahi i haulehia pu i ke aloha iaia, ua nui loa kuu lili iaia, mamuli no o kuu ike iho he kanaka opio ui a waiwai oia, a ua loaa iaia na kulana maikai loa iloko o ko maua heihei ana no ka lilo mai o Miss Helena Samoa.

            "Ua ike au hookahi wale no kumu o kona ae ana e mare me aʻu o ia ko laua komo loa iloko o ke anu me kona makuahine ia manawa, ua loaa ka makuahine i ka maʻi nawaliwali loa, a ua pau no hoi ka hapanui o ka laua mau dala i ka hooliloia no ka hoolimalima o ka hale, ka bila no hoi a ke kauka, ame na lilo liilii e ae no hoi o ke ola ana a no ko Miss Helena Simoa manao o ke alahele wale no e hoopakeleia ae ai ke ola o kona makuahine ana i aloha nui ai oia ka mare ana me aʻu, pela oia i haawi mai ai i kona ae me ke ano makemake aloha ole no nae iloko ona noʻu, pela kaʻu ike aku i kona ano.

            "I nei manawa ke ike nei au, in a no ko maua mareia nei, he mau mea maikai ole loa maua o ka noho ana, aole e loaa iki ana ka hauoli, a i kuu ike ana ia hopena, hauoli iho la au iloko oʻu no ka hoopau koke ia ana o ia mare, oiai nae, i hoike aku no au ia oe, ua ku a maʻi maoli au no kekahi manawa mahope mai, no koʻu halawai ana me ka makapaa.

            "No Mere Wadela Alekona, i nei manawa, ka wahine aʻu o ka mare ana ke hauoli loa nei au nona, no keia kumu, he wahine maikai a oiaio loa oia o ka manao, a elike me ka oi aku o koʻu makemake iaia, pela no ka oi aku o kuu ehaeha no kuu hana ole ana i ka mea maikai iaia iloko o ka manawa loihi mamua aku, eia ka hoi la he wahine maikai loa oia ke pii me ke kane, iaʻu nae keia pauaka wale ia iho no."

            "A! ke hauoli loa nei au i koʻu lohe ana aku la i kena mauolelo au e Mr. Alekona, alaila hina mai la ua o Lanakasa imua a haawi mai la i kona lima no ka lululima ana me ke kanaka opio a i hou mai la:

            "E Mr. Alekona, ua hoomaha loa mai la oe i kuu uhane mamua o ka mea hiki iaʻu ke hoakaka aku ia oe me na huaolelo a ka waha no kou ahonui maoli iloko o na kaumaha he nui au i alo ai i na la i hala.

            "Mai ka manawa mai aʻu o ka ae wale ana iaʻu iho e hoowalewaleia mai e na manao uluahewa, a i paluaia iho hoi ma o koʻu hoowalewale pu ana aku ia oe elike me ia aʻu i hana mai ai.  Aole au i haawipio wale aku i koʻu hanohano ame koʻu inoa maikai, aka, o kou pu kekahi a ua ike no nae au i koʻu hoopaiia ana me ke koikoi loa no ka hewa aʻu i hana ai.

            "E ike iho ana oe i ke koikoi loa i koʻu manawa e hoakaka aku ai ia oe o Mrs. Simoa au i ike ai, aole oia he wahine e aku o kuu wahinemare ponoi no ia, ka wahine i hookaawaleia mai aʻu aku mamuli o kekahi mau hana kuhihewa i hanaia he mau makahike aku nei i hala, a o Helena Simoa au i manao ai e mare, o kuu kaikamahine pinoi no ia."

            "Kupanaha no ka!" i hooho ae ai o Alekona me ka piha i ke kahaha, a eu koke ae la oia a ku ana iluna, mamuli o kona hoomaopopo ana ua loaa ia Helena ka leka ame ke kelekalapa a ua o Lanakasa o ka hoouna ana mi iaia," a ke manao nei au in a i holopono kaʻu hana ana ma o ka hooko ana aku i koʻu manao aole e huikala iki mai ana iaʻu."

            "Aole paha ia oe, aka iaʻu iho no, ke manao nei au aole e hiki iki ana iaʻu, elike iho la me ia, no ka hoopuhili a akeakea ana i ka hauoli o kaʻu keiki ponoi, a pela hoi me ko Robaka, kuu keiki.  He nuhou ae n okekahi aʻu e hoike aku ana ia oe, a oia keia, ua mareia laua aneane elua pule ae nei keia i hala."

            "Ea, he nuhou nui maoli iʻo ka hoi kau!  Pehea i halawai ai laua ahiki i ko laua mare ana?"

            "A penei; ia maua i hoi mai ai mai Europa mai ua noho iki maua ma Na Mapunawai wela o Kororado no ka hoomaha iki ana, ma ke alahele mai o ka Moana Pakipika, a ia maua maleila i halawai ai maua me Helena ame kona makuahine ma ke ano uila, he makahiki mamua aku ko ka makuahine o Helena hoounaia ana e ke kauka nana oia e lawelawe ana, e hoi ilaila e hoomaha ai, i loaa ae ai iaia ka ikaika mahope o kona loaa ana i ka maʻi," i hoakaka aku ai o Mr. Lanakasa.

            "Ae; ua ike au aia laua ilaila, no ka mea, o Mere, kuu wahine i mare ai, oia ka mea kakau leka mau ia laua ilaila, a mai laia mai au i lohe ai no ko laua holo ana ilaila e hoomaha," wahi a Habati.

            "Ae; mahope o ko laua ikeia ana aia malaila ua halawai makou i kekahi la, a ia manawa i hoakakaia ai na manao kuhihewa o kela ame keia mea pakahi o makou ahiki i ka maopopo ana, a huikala aku a huikala mai, a hoopololeiia no hoi na kekee i hanaia ai mamua.

            "Nolaila, e kuu hoaloha opio, ua loaa iaʻu ka manao no koʻu aie nui ana ia oe," mahope iho o kona noonoo ana no kekahi minuke, "ua ike au i ka hewa a ui hana aku ai ia oe ma o koʻu alakai ana ia oe iloko o kekahi hana hoowalewale kiekie, ua ike iho au ua mamao loa ia mai koʻu mana aku, aka mamuli o kau mea i kamailio mai la, ke ike nei au e loaa ana no ka manao maikai ia oe a e ae maikai mai ana no oe i kaʻu noi, oia hoi kau huikala ana mai iaʻu ma na ano apau, a i mea hooiaio aku ia oe no ka oiaio o kaʻu mea e kamailio aku nei, o kela umi kaukani dala aʻu i hoohiki mai ai ia oe a i hookomoia aku ai hoi i ka Banako Lanui ma kou inoa no kau kii ana aku e unuhi mai no kou pono ponoi, ke haawi aku nei au ia mau dala nau me kuu @ apau.

            "O, aole, aole loa au e lawe mai ana ia mau dala!  O, aole!" a ku koke ae la o Habati iluna me ka piha i ka huhu, ua lilo kela mau dala i mea hoowalewale nui mai iaʻu i nei manawa a ua hooinoinoia koʻu noonoo no ia mau dala ma kekahi manawa aku nei i hala ahiki mai no i nei manawa.

            "I ka manawa i loaa mai ai o kela leka au iaʻu e hoakaka mai ana no kela umi kaukani ua piha loa au i ka hauoli no ka mea, me ia dala e hiki ana iaʻu ke lawelawe aku i kekahi oihana noʻu ponoi ma kekahi aupuni okoa aku, aka nae i ka manawa i holopono ole ai kela mare oʻu me Helena, ke kumu hoi o ia mau dala au o ka haawi ana mai iaʻu, ua piha loa au i ka hooukiuki no ka hoopahuaia ana o kaʻu papahana, ame kuu nele pu ana i ka wahine o ia hoi o Helena.

            "Ua hakaka au me kela manao hoowalewale elike me ia aʻu e hakaka ai no ka hoopakele ana ae i koʻu ola, a o ke kumu wale no o koʻu lanakila ana, o ia koʻu hoomanao ana ae i ke aʻo a kuu makuahine, ʻMai aihue oe,ʻ a o ia no hoi kekahi o na kanawai he umi i paanaau mau iaʻu a i lilo no hoi i mea punahele mau i koʻu waihono noonoo ahiki i keia la.

            "Ua lehulehu na manawa o ka ulu ana ae o ka manao iloko oʻu e kii e kikoo i kela mau dala iloko o ka banako, oiai ua haawi mai oe ia mau dala naʻu, aka nae, i kuu noonoo ana me ke akahele, na hoole iho la au iloko iho oʻu aole oʻu pono e kii ia dala aʻu i kuleana ole ai, oiai aole i hookoia ka hana a ia dala i haawiia mai ai.  Ke hoike hou aku nei au ia oe no ka lua o ka manawa aole oʻu makemake i kela dala kipe au.

            "E hana aku no au malalo ou elike me ka ikaika ame ka makaukau i loaa iaʻu, ina nae e ae maikai mai ana oe e hoomau aku no iaʻu ma ia hana; in a no koʻu pii ae ma kekahi kulana a i ole holomua paha ma kaʻu hookele hana ana a e nui ana ke dala e loaa mai ana iaʻu mai ia hana mai, aole ia holomua mamuli o ke dala au i haawi mai ai, ke kahua hoi au i manao ai o ia ka mea e hiki ai iaʻu ke pii ae ma kekahi kulana.

            "O aole; e huikala mai oe iaʻu no keia hoole loa ana aku aʻu ia oe no ka lawe mai ia mau dala, aole ia mau dala e loaa mai ana iaʻu ma ke ano maikai, aka, ma ke ano kipe, a he hoowahawaha au ia ano, e Mr. Lanakasa.

            "Ua pono kau olelo ana mai la me kela, no ka mea, ua hewa io no au," i pane aku ai kona hakuhana, me ke kani ana iho o kona uhu," aohe aʻu mea e ae e hana aku ai o ka haawi wale aku no i ka hoomaikai ia oe no ia manao kupaa ou, a ua hoomamaia ae la no hoi kuu naau mamua o ka mea hiki iaʻu ke hoakaka aku ia oe, no ka mea, ua hooia mai la aole owau ka mea nana i hoolilo ia oe i mea poino elike ka nui me kaʻu i makaʻu ai nou."

            "A, in a pela, nani hoi ia ua hoole mai la oe i ka lawe ana aku ia mau dala, a pehea hoi in a ma ka inoa o ko wahine e @ aku ai ia mau dala a i ole i ko keiki paha, ma ke ano he makana @ ia laua?"

            Lamalama ae la ko Habati helehelena ia manawa, ame ka nanaina hoihoi oia o ka nana ana aku i kona hakuhana, a i aku la:

            "Ina pela kou manao, alaila he waiho ana aku ia mau dala ma kekahi alahele okoa.  Ina o kou manaoio maoli ia e haawi aku ia Mere Alekona, a i ole i kek keiki paha, ke hauoli nei au i kou haawi aku nana, malalo nae o keia kumu, e hanaia kela dala a paa ma kona inoa me ka hiki ole iaʻu ke hoopa aku i kekahi keneka o ia dala, no ka mea, aole oʻu makemake o kela dala ana i hoolilo iaʻu i pio na na manao hoowalewale he nui e hoopapa aku au i kekahi hunahuna o ia dala, ua lawa iho la no au i na dala au e haawi mai ana iaʻu no kaʻu hana," wahi a Alekona o ka hoakaka ana aku me ka manao kuio."

            "O, in a pela naʻu e hooponopono aku ia mea," wahi a Lanakasa, no laila, ke manao nei au ua loaa like iho la ia kaua ka maha o ko kaua mau uhane no keia kuka maikai ana iho la a kaua, a noʻu iho nae ke hauoli loa nei au, no @ huikala ana mai la iaʻu, mai kamailio hou kaua no keia mea i pau iho la i ka hooponopono maikai ia, aka, e lilo keia i haawina e ao mai ana ia kaua ma nei mua aku a no na manawno hoi apau.

            "E noho mau oe e hana me aʻu elike me ka loihi o kou makemake, a elike hoi me kou hoopono i kau hana, elike me ka maikai au i hana ai i na manawa aku la i hala, a mai keia manawa aku e hoopii hou ae ana au i kou ukuhana elua haneri dala hou no ka makahiki."

            No ka hauoli loa o Habati ia manawa hopu mai a oia i ka lima o kona hakuhana a puliki iho la me ka ikaika, a mahope o kana pane ana mai," me ka mahalo nui ia oe e Mr. Lanakasa," huli koke aku la oia e hele a haalele mai la ia Mr. Lanakasa iloko o kona rumi.

            Mahope mai loaa aku la ka lohe ia Helena no keia hui a kamailio pu ana o Lanakasa me Habati mai a Mere mai, a ua hoopiha loa ia iho la oia i ka hauoli no ka Mr. Lanakasa mea i hana aku ai ia Habati. 

(Aole i pau.)