Ka Nupepa Kuokoa, Volume LXI, Number 3, 20 Ianuali 1922 — Page 4
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
HE MEA NUI O KALANIANA-
OLE I NA MAKAAINANA.
Ma ka haalele ana mai o ke Keikialil Kalanianaole i keia ola ana, ma ka wanaao o ka Poalima o ka pule akue nei i hala, pela hoi ka hoomoeia ana aku o kona kinowailua ma ka ilina o na alii, mauka ae nei o Maunaala, ua hoea mai kakou, i ka nalohiaana aku o ke alii, hope loa, i kuleana i ka noho kalauna o Hawaii nei.
Ua hoike mai na makaainana, iloko o ka pule hookahi, e waiho ana ke kinowailua o ke Keikialii Kalanianaole, maloko o ka luakini o Kawaiahao, a ma ka Halealii Iolani; pela hoi, ma ka huakai hoolewa, ma ke Sabeti nei, i ka nui makee, me ka minamina iloko o ko lakou mau puuwai nona, nawai hoi e ole ka minaminaia, ua nanaia aku ke Keikialii Kalanianaole, ma ke ano he alakai wiwoole no kona lahui kanaka, a he wahaolelo hopoole. e na'i ana, no na pono ame na pomaikai laula o Hawaii nei.
He Keikialii o Kalanianaole o ke kulana makaainana, e hookauwa ana iaia iho no na alahele e pono ai kona lahui, e kapae ana i kona kulana alii, no ka hana a na makaainana o keia Teritore i hookau aku ai maluna ona; e auamo ana i na hoinoia me ka hoomanawanui; e hoomanawa nui ana, iloko o ke kulana nawaliwali o kona haulehia oia, ma ke kahua kaua o kana hana no ka pono o kona lahui ame ka lehulehu, nolaila, aia he mau kumu maikai a kupono loa, ma ka aoao o na makaainana e minamina ai, a e komohia ai iloko o ke kaumaha, iaia i haalele mai ai i keia ola ana iloko o kona mau la o ke kanaka u'i.
Ua hala aku ke Keikialii Kalanianaole, ua ili iho maluna o kakou na Hawaii, Ke ko'iko'i o ka lawe ana mai, a hooko aku i kana mau oleloa'o, no ko kakou pono, he mau oleloa'o hoi, i haawiia mai, me na manao makee, e ike i kona lahui e ku ana maluna; o ko lakou mau kapuai wawae me ka maloelow; e ike aku ana ia lakou, ma ke kulana kuokoa me ke kuonoono
Me he mea la, aole he mea i oiaku ka ike elike me ke Keikialii Kalanianaole, no na alahele e holomua ai o kona lahui kanaka; iloko nae o ia manawa hookahi, aole no oia i huna iho, i ka hoike ana ae i kona manao maoli, o ia no ka loaa ana mai o ka holomua, ma ka hana kino ana aku o na Hawaii, me ka hooikaika ana no lakou iho, aole hoi o ke kauka'i aku na ha'i e hana mai no lakou.
O ka bila hoopulapula lahui, ke kiahoomanao ana i kukulu iho ai mahope nei no kona lahui kanaka; o ka iini hookahi iloko ona, e hoi na kanaka Hawaii a noho maluna o na aina hoopulapula a e hana aku no lakou iho, ma ka mahi ana i ka lepo o ka honua, ame na hana apau e loaa ai ka noho kuokoa ana, e hoole anei kakou i ke kupono o kela mau a'o ana a ke Keikikialii Kalanianaole, no ka hoea i'o aku i ka pahuhopu o kona iini no ko kakou holomua?
Ma ka hana a na Hawaii i hoikeike mai ai, ia lakou e ka'i ana me na manao kui'o o ke kaumaha, mo ka hoolewa o ke Keikialii Kalanianaole, ko lakou alakai, e ukaliiia ana e kona mau hoaloha, ame na luna oihana kiekie o na aupuni like ole ma Hawaii nei; aole he kanalua ma ka aoao o keia pepa ke olelo ae, ua lilo ka make ana aku la o ke keikialii, i kumu e hoonipaaia aku ai, kana mau oleloa'o, iloko o ka puuwai o na kanaka Hawaii apau.
Ua molia aku ke Keikialii Kalanianaole i kona ola, no ka hana a na makaainana o Hawaii nei i hookau aku ai maluna o kona hokua: me kona kino ma'i, i hoomanawanui aku ai oia e paio maluna o na nila kanawai, ana i manaoio ai, no ka pono o Hawaii nei; ua ku aku imua o kona mau enemi, me ka wiwoole, e hoomanawanui ana i na kipehiia mai, me na olelo hailuku, o kela ame keia ano; aole nae i pohoia mau hooikaika ana no ko oukou pono e na Hawaii, aka ua papahiia mai ia mau hooikaika ana me ka manaolana ana i iini mau ai e hookoia, no ka pono ame ka pomaikai o kona lahui.
Ma ka manawa o ke Keikialii Kalanianaole e ola ana, ua hiki ole e ikeia ka noonoo o na maakainana nona koe wale no kona mau hoaloha pikipaa aka iaia i haalele mai ai i keia ola ana ua ume akuoia i ka lehulehu o na makaainana a nana aku iaia me na manao kaumaha o ka minamina: o ke kui'o ame ke kui'o ole o ia kaumaha iloko o ka lahui nona. na ka lakou hana e hoike mai ma keia mua aku, in a e hooko ana lakou, a hooko ole paha. i ka iini o ka mea i hala, e hooikaika na Hawaii no lakou iho, i loaa ai ka noho kuokoa ana a i hoolaupa'i hou ia ai ka lahui.
Ua hala aku nae ke Keikialii Kalanianaole, ua haalele iho i ka noho pu ana me kona mau hoa makaainana eia nae ua waiho iho no oia i kana mau hana maikai apau mahope nei i kiahoomanao nona, e hiki ole ai ke hoopoinai, no na hanauna lehuehu ma keia hope aku.
E noho ae ana na halawai a na kalapu Repubalika ame Demokarata ma keia mua iho, no ke koho ana i na elele, no na alahele wae moho he mea pono e komo na kane iloko o na kalapu, e lilo i mau lala no ia mau kalapu, i loaa ai ke kuleana e koho i na elele kupono, na lakou e wae ae i na moho kupono, na kela ame keia aoao Kalaiana kuloko o kakou. Mai hoohemahema i kela hana; o lilo auanei i mea e mihi ai mahope aku, i ka wa e oili ae ai na moho, i makemake ole ia e ka lehulehu.
KE KULANA ELELE I KA AHAOLELO LAHUI.
Ua waiho hakahakaia iho ke kulana elele lahui o Hawaii nei, ma o ka make ana o ka Elele Kalanianaole, o ka hoopiha ana aku i kela makalua, he hana ia i ili mai ke ko'iko'i maluna o na mana koho baloka o keia Teritore.
Ma ka la 25 o ka mahina ae nei o Maraki, e koho baloko ai kakou, no na moho e holo mai ana no keia kulana ano nui
No na makahiki he iwakalua, i hookau mau aku ai na makaainana o Hawaii nei i ka hanohano maluna on a, ma ke ano he elele i Wakinekona. Ua aloha aku na mea apau iaia, a in a aole i hoopokoleia mai kona ola ana, a aole hoi oia i hoopau i kona holo elele lahui ana nana e paa kela noho no na makahiki hou he iwakalua e hoea mai ana.
@ o keia mau makahiki he iwakalua o kona paa ana i ke kulana elele lahui o ka bila hoopulapula lahui ke kiahoomanao ana i kukulu iho ai nona mahope nei, a ua liilo kona make ana, i mea minamina nui na kakou, no ka mea aole i hoea mai i ka pahuhopu, o na hana nui ana i iina ai no ka holopono o ka hana hoopulapula lahui.
o keia kekahi o na hana pookela a ka Elele Kalanianaole i hooikaika ai; aka maluna iho o ka mea e pii ae ana ma kona makalua, ke ko'iko'i o ka hooko ana aku i na hana i koe no ka pono o ka hana hoopulapula lahui.
O ka elele lahui a Hawaii nei e hoouna aku ana no Waiknekona, e pono oia e lilo i mea hooko aku i kekahi mau pono nui i manaoia no ka poe hoopulapula ma Hawaii nei, aole malaila wale iho la no pau, aka e lilo pu oia i mea hooikaika ma na hooponopono ahaolelo i pili loa i ka holomua o keia Teritore, aole e hana ana i kona makemake ponoi iho, aka i ka makemake o na makaainana, na lakou i hookau i ka hanohano o ke kulana elele lahui, maluna on a.
O ka elele a kakou e koho aku ai, he mea pono e lilo oia i Repubalika, elika me ke kulana hookele aupuni ma Wakinekona i keia la, he kanaka i like kona noonoo me ko na Repubalika, o ko kakou hoouna ana akui kekahi moa i kaokoa 'ae kona noonoo mai ka hookele aupuni Repubalika ae, e lilo ana oia i mea hoemi mai i na hooponopono ahaolelo no ka holomua o Hawaii nei.
KUPONO KA WAE ANA'A KE KOMITE KUWAENA
Ma ka haawi ana ae a ke komite kuwaena o ka aoao Repubalika i na kakoo ana i na inoa o E. C. Peters, Antonio Perry ame John Bolt, no na kulana lunakanawai pakahi iloko o ka aha kiekie o keia Teritore, ke manao nei keia pepa, ua lokahi ka hapanui o na makaaina, no kela mau inoa me ka manaoio, o lakou kekahi mau kanaka makaukau loa i waeia ae, i kupono i mau lunakanawai kiekie.
No Antonio Perry âme John De Bolt, he mau lunakanawai mua kekahi no ka aha kiekie, a he kokua hoi kekahi no kela aha, i ka wa e hakahaka ai kekahi noho lunakanawai, nolaila ua kamaaina mua laua i kela aha; a o ka mea i kakooia ae ai ma ke kulana lunakanawai kiekie, oia kekahi o na loio makaukau loa ma keia kulanakauhale; a ua kupono ka haawiia ana o na kakoo e ke komite ia lakou.
Ma ke kulana lakaiaina nae, ua hoike mai ke komite kuwaena Repubalika, i kona kapae ana ae i kaaoao kalaiaina mahope, a haawi aku la i kana mau kakoo ana, elike me ka kela komite i manaoio au, o kela poe ekolu, kekahi mae lunakanawai a Hawaii nei e haaheo ai, ma keia mua aku.
O keia no na inoa a ka Elele Kalanianaole i makemake ai, no ka aha kiekie, ua hookoia kela makemake on a, aole nae, mamuli wale no o ka lohe ana o na hoa o kela komite, i ka makemake o Kalanianaole, aka ua paa mua no ko lakou manao, e kakoo aku i kela mauinoa, mamuli o ko lakou makaukau, a kupono maoli i mau lunakanawai no ka aha kiekie.
He mea minamina no, ka ike ana aku, i ka hoomau hou ole ia, o ka poe e paa nei i kela mau oihana, ma ko lakou mau kulana oihana eia nae he hana keia i hiki ole ke alo ae, oiai eia ka mana hookohu oihana iloko o na Repubalika, o na Repubalika, ke kupono e paa i na oihana, aia no hoi a kaa aku i ka aoao Demokarata ka lanakila, ia wa e hoonoho ae ai i mau lunakanawai Demokarata, elike me na lunakanawai kiekie, a mau kulana oihana e ae.
Iwaena o kekahi poe kuonoono a waiwai he hana maa ia lakou ka hoonohonoho ana i ka papa kuhikuhi pili dala o ko lakou ola ana. He pule hoomakaulii ka i hookaawaleia iloko o keia mahina, ma ke ano e lilo ia i mea hoomahu'i mau aku na kakou i kela ame keia makahiki. o ka hana naauao loa, o ia no ka hoao ana e hoomakaulii a e pakiko i na hoolilo, ma ka hoemi ana mai i na hoolilo mamua o na loaa.
Ua loaa aku ka noonoo i kekahi mahele nui o na haole, he kuleana ko na Hawaii i ke kulana elele lahui; ina pela i'o alaila he mea pono i na Hawaii ke hoolokahi ia lakou iho ma ke koho ana i kekahi moho a lakou i manaolo aku ai ma on a la e nanaia mai ai ko lakou pono ma na hooponopono ahaolelo ma Wakinekona.
Nuhou Kuloko
E hoomanawanui mai no e na makamaka no kekahi mau palapala i hoounaia mai i keia keena, a loaa he wahi kaawale o ka pepa no keia pule ae.
No ka manao ana e hoolako aku i na Hawaii, me na hiona apau o ka hoolewa o ke keikialii Kalanianaole, ho umi-kumamaha aoao o ka Nupepa Kuokoa e puka aku nei i keia pule.
I kulike ai me na lono lauahea na hoole loa mai nei o Harry Baldwin o Maui i ke koi a na hoaloha lehulehu, aole oia e lilo i moho elele na ka aoao Repubalike ma keia kau koho baloka
Ma ka la 25 o ka mahina ae nei o Maraki, e malamaia ai he koho baloka kuikawa apuni keia Teritore, no ke koho ana i elele lahui i Wakinekona, ma kahi o ka Elele Kalanianaole, u haalele mai i keia ola ana.
Eia na palapala kakoo a na makamaka i kakau mai nei i keia keena, no John H. Wise ame Norman K. Lyman, ke waiho nei, ua hiki ole ke hoopukaia aku i keia pule, no ka loaa ole o kahi kaawale o ka nupepa.
O Norman K. Kyman ame John H. Wise, na moho o ka aoao Repubalika e loheia nei i keia mau la, uo ka wae ana mai o ka ahaelele Repubalika i kekahi o laua i moho no ke koho baloka kuikawa.
He halawai ka ke kalapu Demokarata o ka mahele 11, apana 4, e malama ae ana ma ka hora elua o ka auwina la, o keia Sabati iho, maloko o ka halekaa o ka Meia Wilson, ma ke alanui @aniwai.
Ma ka la 28 o keia mahina e noho ae ai ka ahaelele a na Demokarata, no ka wae ana i ka moho elele a kela ao ao kalaiaina, e kukulu mai ai imua o na mana koho baloka, no keia kau kuikawa.
Eia na palapala hoopii no ke kakau inoa ana o na makaainana o Hawaii nei ke lawe hele ia nei ma na wahi apau, no ke kakoo ana aku, no ka hooholoia mai o ka bila hoopae limahana pake no keia Teritore.
Ma ka Mauna Kea o keia Poaono ae e huli hoi aku ai o Norman K. Lyman no Hilo, Hawaii, a wahi ana, he nui kona mau manaolana, no ke kulana elele lahui ana e alualu aku ana, ma ka aoao Repubalika.
Ma ke kakahiaka o ke Sabati aku la i hala, i hoea mai ai ka Lunakanawai David Kapahee o Kauai, no ke komo pu ana ma ka huakai hoolew o kalanianaole, a ma ka poaha nei i huli hoi aku ai oia no ka mokupuni kaili La.
Ua hookohuia mai nei o A. K. Aona, ke kakauolelo o ka aha kaapuni o Hilo, i akena haawi palapala mare no Hilo Hema, o ka poe o Hilo i makemake e loaa na palapala mare, e hele ae e ike iaia, ma ke keena o ka aha kaapuni o Hilo, e loaa no oia malaila i na la apau, a ma kona home noho ma Waiakea.
I ke kulanakauhale iho nei ka Luna@ Joseph N. Uahinui o Molokai, no ke komo pu ana iloko o ka hoolewa o ke keikialii Kalanianaole, a ma ka mikahala o ka poalua nei i huli hoi aku ai oia no Maui, no ka halawai a ka papa lunakiai, a huli hoi loa ae no kona home ma Kaunakakai.
Mamuli o ka hoolewa o ke Keikialii kalanianaole ma ke Sabati i hala, aole i malamaia ka halawai a k poe i kuleana i ka pa ilina o Kalaepohaku, ma ia Sabati, aka e malamaia ana ia ma ka hora elua o keia auwina la Sabati iho, Jan. 22, ma ka pa ilina o kalaepohaku i oleloia.
E noho ae ana ka halawai a na kalapu Repubalika, ma ka la 28 o keia mahina, no ka waiho ana i na inoa, o na elele, e noho mai ana ma ka ahaelele wae moho elele, ma ka la 14 o ka mahina o Feberuari. Ma ka la 4 o Feberuari e kohoia ai ka poe e waihoia ae ai ko lakou mau inoa i mau elele.
E MALAMAIA ANA HE KOHO BALOKA ELELE.
(Mai ka aoao ekahi mai).
ae ai ka moho, a ka aoao, maiwaena mai o na inoa apau, e waihoia ae ana ma kela ahaelele.
Ma ka aoao Demokarata hoi, ua hooholo na alakai o kela aoao kalaiaina, e malama be ahaelele wae moho ma ka la 28 o ka mahina nei o Januari, ma kela ahaelele e akoakoa ae ai na elele apau, o na kalapu like ole, no ka wae ame ke koho ana i ka moho a ia aoao,
maiwaena mai o na inoa e waihoia ae ana.
No keia mau la e nee nei, he nui @ mea e kamailioia nei no na moho, e hoopauia ae ana nae na pohihibi, ma ka manawa e hoea maoli mai ai i ka wa a na aoao kalaiaina kuloko, e koho ai i na moho i ka wa e noho mai ai o na ahaelele.
Nuhou Kuwaho
(MANILA, P. I., Jan. 16. - he eha mau ma'i korela hou i puka ae a hookahi make i hoikeia mai maloko o na hora he 24. Ma ka hoike a na kauka o ka papa ola ua holopono na hana i lawelaweia ma ke kinai ana aku i keia ma'i
NU DOKA, JAN. 16 - O ka mea i hoopae malu i ka waiona e hekau P. Morgan & Co., ma ka la apopo i ka ae ana aku i ka aie $5,000,000 a Cuba. Ua hoakakaia ae ua hoopau ka poe malama banako Amerika i ka noonoo ana no ka aie data $50,000,000 i hoolalaia ai no ka hoaie ana aku ia Cuba ahiki i ko Cuba ikeia ana aku i ka loli ae ma kekahi kulana oi ae o ka maikai.
KA LYMAN PAPAHANA I HOOLALA AI INA OLE E KOHOLA
Ma ka poakolu nei ka hoikeamaka ana ae a Norman K. Lyman ma ke akea i kona manao oia ana kekahi o na moho elele ma ka Aoao Repubalika e holo ana no ia kulana; he hoa oia no ka ahaolelo kuloko i hala, he loia ma kaua oihana, a o kekahi no hoi o na kanaka ko'iko'i ma ke kulanakauhale o Hilo, a ma ka mokupuni holookoa no hoi o Hawaii
O keia malalo nei kana papahana i hoolala ai a i hoike ae hoi ana ke akea no na hana ana e hooikaika aku ana ina no kona kohoia i elele i ka ahaolelo lahui:
I mau haawina dala mai ke aupuni federala mai no na alanui o ke Teritore holookoa
I mahele iloko o na haawina dala o ka ahaolelo lahui no ka hoonaauao ana i na opio ma Hawaii nei:
E oi ae ka maikai o ka hookoia ana o ke kanawai e pili ana i ka hoohana ana aku i na lahui e ma na hana aupuni e ke aupuni makua.
E hoonuiia aku na hana e pono ai na awakumoku, na palekai ame na hana hou.
E paholaia mai ka pono o ke kanawai hoaie dala i ka oihana mahiai i keia teritore.
Ka hana hou ana ame ka hana ana i mau alanui ahiki i ka Paka Lahui Hawaii ma Kilauea.
No ka hooholomua ana aku i ka hoopulapula ana i na Hawaii elike me ia i hoakakaia ma ke kanawai i hooholoia e ka ahaolelo ma o na hooikaika ana la a ke Keikialii Kuhio.
Hookomo ana mai i kekahi heluna o na limahana o na aina e no ka hoomauia ana aku o na hana imi pomaikai ma Hawaii nei elike me ia i hoolalaia ma ka bila hoopaelimahana e waiho mai la mamua o ka ahaolelo lahui i nei manawa
A iloko o kona manawa o kona hoike ana ae i kona manao holo ma ke ano i elele ua noi pu mai oia i ke kakoo ana aku a ka poe koho baloka apau, mai na kane a na wahine.
He Hawaii nei oiaio o Norman K. Lyman, ma Hawaii nei no oia i hanauia ai, a ma na kula aupuni no o Hawaii nei kona hoonaauaoia ana, a no ka hoomahuahua ana aku i kona ike kanawai ua komo aku oia i ke Kula A'o Kanawai Hastings ma Kaleponi malalo o kana hooikaika ponoi ana, a ua puka pono mai, me ka loaa iaia o ke degere L.L.D. a oia no hoi kekahi o na hoa o ka ahahui o ka Papa Loio o ke Teritore o Hawaii i keia la, me ka loaa iaia o ka mana piha e hoomaamaa kanawai a e lawelawe hoi i na hihia apau ma loko o keia teritore.
NA MARE.
Herman Kalahiki ia Rose P. Naauna, Jan. 16.
NA HANAU
Na Mr. âme Mrs. Robert Kaaukai Boyd, the kaikamahine, Jan. 10
Na Morris H. Todd ame Esther P. Akana, He kaikamahine, Jan. 9.
Na Chas. K. Kauha ame Virginia P. Ikeole, he kaikamahina, Jan 13.
Na Carl Mortensen âme Julia K. Makia, he kaikamahine, Jan. 15.
Na louis Vera Cruz ame Elizabeth Haili, he keikakane, Jan. 15
Na Joseph T. Brunes ame Martha Kaaiai, Jan. 15.
NA MAKE
Kahawaii, ma ka home Lunalilo, Jan. 11.
John Nahinu, ma ke alanui papu, Jan. 12.
Joseph Mahoe Opio, ma ke Alanui Puowaina, Jan. 12.
Mary Apana, ma ke alanui Papu, Jan. 12.
Stella K. Cockett, ma ke alanui Fernandes, Jan. 14.
Sam J. kahinu, ma ke alanui Kula, Jan. 14.
Mrs. Mileka Kaaiahua, ma kalihi, Jan. 17.
HALE O NA ALII O HAWAII.
E malamaia ana ka halawai kumau i hoopaneeia o ka ahahui Poo ma ka Phoenix Hall i keia Sabati, Ianuari 22, hora 2 p.m
WM, J. OOELHO
Hoolaha
NORMAN K. LYMAN
I ka Poe Koho Baloko o ke Teritore o Hawaii:
Ma keia ke hoike aku nei au ma ke akea owau kekahi moho no ke kulana Elele i ka Ahaolelo Lahui. He Hawaii au ma ka hanau ana a ua hoonaauaoia maloko o na kula ma Hawaii nei; ua hooikaika au ma ka hana ana no ko'u komo ana aku i ke Kula Kanawai Hastings ma Kapalakiko ahiki i ko'u puka pono ana mai, a he hoa au no ka Papa Loio Hawaii o na Aha Hookolokolo apau o keia aupuni.
He mau kau lehulehu o ka ahaoloho ka'u i komo ai a he hoa hoi no ka Papa o na lunakiai o ka Mokupuni o Hawaii no elua kau.
Ke noi aku nei au i ke kakoo ana mai a ka poe koho baloka o na papa apau mai na kane a na wahine, a in a no ko'u waeia ma ka ahaelele Repubalika e noho mai ana ma ka la 14 o Feberuari, a kohoia hoi i wahaolelo a i Elele na Hawaii i ka Ahaolelo Lahui, e holo aku ana au i Wakinekona a e hana me ke kupaa no ka pomaikai o kuu onehanau, a e hoao pu no hoi e hana aku e loaa ka holoponopono o na hana elike me ka ke keikialii Kuhio i hana ai.
Oia hoi e hoao no au me ka hooikaika e hana i na mea i hoakakaia malalo nei:
I mau haawina dala mai ke aupuni federala mai no na alanui o ke Teritore holookoa.
I mahele iloko o na haawina dala o ka ahaolelo lahui no ka hoonaauao ana i na opio ma Hawaii nei.
E oi ae ka maikai o ka hookoia ana o ke kanawai e pili ana i ka hoohana ana aku i na lahui e ma ua hana aupuni e ke aupuni makua.
E hoonuiia aku na hana e pono ai na awakumoku, na palekai ame na hana hou.
E paholaia mai ka pono o ke kanawai hoaie dala i ka oihana mahiai i keia Teritore.
Ka hana hou ana ame ka hana ana i mau alanui ahiki i ka Paka Lahui Hawaii ma Kilauea.
No ka hooholomua ana aku i ka hoopulapula ana i na Hawaii elike me ia i hoakakaia ma ke kanawai i hooholoia e ka ahaolelo ma o na hooikaika ana la a ke keikialii Kuhio.
Hookomo ana mai i kekahi heluna o na limahana o na aina e no ka hoomauia ana aku o na hana imi pomaikai ma Hawaii nei elike me ia i hoolalaia ma ka bila hoopaellimahana e waiho mai la mamua o ka ahaolelo lahui i nei manawa.
NORMAN KALANILEHUA LYMAN
NEW PALAMA THEATER
" KA HALEKEAKA NANI MAWAHO AKU O HONOLULU"
Poaono-WALLACE REID iloko o ka "THE HELL DIGGERS"
Sabati-NEAL HART iloko o ka "BLACK SHEEP"
Poakahi--WILL ROGERS iloko o ka "JESS' CALL ME JIM"
Hoikeike i na la apau elua hoikeike ahiahi 6:40 ame 8:40
UKUKOMO: 5 a 30 Keneka.
EMPIRE
Hoikeike mau, 12 m. a 10:15 p.m Poaono, 10 a.m a 10:15 p.m.
Elua hoikeike Sabati, 6:30 âme 8:30
Ke paani nei-TOM MIX iloko o ka "HANDS OFF"
Sabati-JACK PICKFORD iloko o ka "THE DOUBLE DYED DECEIVER."
Poakolu-GEORGE WALSH iloko o ka "FROM NOW ON"
UKUKOMO: 15, 25, 40 keheka; Ukuia ka auhau kaua
HAWAII
Hoikeike mau i na la apau koe ka Poano ame Sabati.
KA POE HANA KEAKA A DICK WILBUR
Kee paani nei-"THE TRAIL OF THE LONESOME PINE"
Poakahi-"NOTHING BUT THE TRUTH"
UKUKOMO: 65c. Noho i hookaawaleia, 85c (ukula ka auhau kaua)
LIBERTY
Hoikeike Kuikawa Makepono, Poaono, hora 2:15.
UKUKOMO: 25 'âme 55c.
Hoikeike i na la apau, koe ke Sabati, hora 2:45. Elua Hoikeike, Poaono ame sabati, 6:30 ame 8:30.
Ke paani nei--NELL SHIPMAN iloko o ka "THE GIRL FROM GOD'S COUNTRY"
Sabati--"NO WOMEN KNOWS"
Poaha-MACK SONNETT'S "DOWN ON THE FARM"
Ukukomo: 25, 40 keneka, noho i hookaawaleia 60c, Kelepona 5060
Kuai i na Nupepa me na Buke Nupepa
BUY YOUR MAGAZINES. NEWSPAPERS AND PERIODICALS
FISHER's NEWS CART
BRAIN FOOD
REGISTERED TRADE MARK NEWS CART
FISHERS NEWS AGENCY P.O BOX 1224, HONOLULU, TW
WE TAKE SUBSCRIPTIONS.
Ke haawi aku nei ka ohana o Mr. William Werner i ka lakou hoomaikai i na ahahui kaumualii, Ka Halau o Kapiolani, Ka hale o na Alii, kaahumanau, Ka Hui Aloha a i na hoaloha ame na makamaka no apau i komopu mai e kumakena pu me lakou iloko o na hora o ka luuluu, a i haawi mai hoi i na makana pua nani no ka hoohiwahiwa ana iho i ke kino wailua o ka lakou mea aloha i haalele mai i keia ola, ana a na ka mana ame ka lokomaikai o na lani e kini a hoomalu mai ia kakou apau.
SPRINGFIELD, III., Jan. 16 - @ aoao kalaiaina hou, a e hookeleia ana e na wahine wale no, a i kapaia ka "Aoao kalaiaiua Holomua Rusavela" ka i waiho aku i kana mau pepa hoohui me ke aupuni maanei i keia la. O ka hana a keia aoao kalaiaina i hoolala ai o ia ke kakoo ana aku i na moho i kaa ole malalo o ka hoomalu ana mai a ke aupuni, a i ole aoia mai paha e kekahi mau alakai kalaiaina e ae
KAHEA HALAWAI A KA AOAO DEMOKARATA
Ma keia ke haawiia aku nei ka hoolaha i na komite kuwaena Teritore apau o ka Aoao Demokarata apuni keia Teritore, e akoakoa mai ma ka halawai e malamaia ana ma Honolulu nei, ma ka la 28 o ka mahina o Ianuari nei, no ke koho ana i moho elele lahui na ka aoao Demokarata, no ke koho baloka kuikawa e malamaia ana ma ka la 25 o ka mahina ae nei o Maraki
Ke haawi pu ia aku nei no hoi ka , ua makemakeia na persidena, na kakauolelo, na komite @ ame na alakai o ka aoao, e hoea pu mai mu ia halawai.
Ke haawiia aku nei no hoi ke kauoha i na moho apau e alualu ana no ke kulana elele lahuim e waiho mai i ka lakou mau palapala noi holo moho elele, mai keia manawa aku ahiki i ka hora 12 o ke awakea o ka Poalima, ka la 27 o ianuari, ma ka lima o ka luna hoomalu o ke komite kuwaena Teritore, a i ole i ke kakauolelo paha.
E malamaia ana keia halawai koho elele maloko o ka Halehui Phoenix, ma ke kihi o na alanui Papu me Beritania, ma ka hora ekahi o ka auwina la.
WM. B. PITTMAN,
Lunahoomalu o ke Komite Kuwaena Teritore, aoao Demokarata.
CEO. KEKOA AHNEE,
Kakauolelo.