Ka Nupepa Kuokoa, Volume LXI, Number 3, 20 January 1922 — Page 3
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
HOOMOEIA KE KEIKIALII KALA-
NIANAOLE MAKUA O
MAUNAANA
(Mai ka aoao Ekahi mai).
kai ana nouka o ka ilina, aole no hoi he mau hana hookeke, a mau hana uluaoa paha i ikeia ma kekahi mau wahi; aka o ka maluhia ke kaumaha ame ka minamina, ka mea i hekau iho malua o na mea apau.
Nui na Ahahui Hawaii
Ma na hoolewa alii i hala aku, mamua o ka hoolewa o ke Keikialii Kalanianaole, aole loa he hoolewa i ikeia ai ka nui maoli o na ahanui Hawaii i koino, elike me keia hoolewa, a in a no paha he mau ahahui ka i komo i na hoolewa alii mamua aku, ua hapa mai no ia. no ka mea, ua oi loa ae ka nui o na ahahui Hawaii i keia manawa, a ua pii mahuahua loa ae no hoi ke nui o na lala, pela iho la i hiki ole ai ke loaa mai ka nui o keia hoolewa i na hoolewa alii e ae.
O na ahahui i komo ma keia huakai hoolea o ke keikialii, o ia na ahahui o na haumana o ke Kula Kamehameha, mai na kaikamahine, a na keikikane, ka Hui Opio o na Moremona ame ka Hui Manawalea; ka Hui Oiwi o na Kane amena Wahine; ka Hui Kaahumanu, ka Hui Kalama, ka Hale o na Alii o Hawaii; e kai ana iloko o keia mau ahahui, na keiki ahiki aku i ka poe oo, o kekahi poe o lakou, ua komo mau iloko o na huakai hoolewa alii mamua aku.
Ka Ahahui o na Mamakakaua, ka Ahahui Kamehameha, ka Ahahui Poola, @@ elua keia mau ahajui, ka Ahahui Pueo, mai na kane a na wahine, ka Ahahui Lunalilo mai na kane a na wahine, ka Ahahui o na Mamakakaua, a mawaho ae o keia mau ahahui o na Hawaii, na kahumai o ka Home Hoohanau Kapiolani, na keiki o na kula Punahou. Kula Kiekie o Hawaii, Kamehameha, ke kula ao koa ame na keiki ao koa.
Ka Nee Ana o ka Huakai
Mahalo iho nei ka papa hoonohonoho, no ke ano o ka nee ana o ka huakai hoolewa alii:
Na makai kaulio.
Ka mea alakai i ka huakai.
Pualikoa Iwakaluakumamakihi.
Ka Bataliona Elua me ka Bana.
Bataliona Kuikawa me na pukuniahi.
Bataliona kuikawa me ka Bana.
Bataliona o ka Oihana Kaua Moana.
Bana Puhiohe o ka Oihana Kaua.
Pualikoa Marina.
Pualikoa Marina Helu 2.
Pualikoa o na Mokuluu.
Elua Bataliona Puali Kiai Lahui.
Ka Bana o Sana Lui.
Ka Puali o na Koa o ke Kula o Hawaii.
Ka Puali o na Koa o Punahou.
Puali o na Keiki o ke Kula Koa.
Puali o na Koa o Kamehameha.
Na Koa Pelekane.
Na Keiki Ao Koa
Bana Puhiohe Concordia.
Ka Ahahui Pueo, na kane me na wahine.
Ka Ahahui Lunailo, na kane me na wahine.
Na Kaukaualii o Hawaii.
Na Ilamuku nui me kona mau ukali.
Ka Puali Makai.
Ka Bana Hawaii.
Ka Ahajui o na Keiki, Kamehameha.
Ka Ahahui o na Kaikamahine Kamehameha.
Ka Ahahui Poola.
Hale o na Alii o Hawaii.
Hui Opio on na Moremona.
Hui Manawalea.
Bana o ka Oihana Kaua.
Hui Oiwi o na Wahine.
Hui Oiwi o na Kane.
Hui Kamala.
Hui Kaahumanu.
Hui o na Home Hoohanau Kapiolani.
Na Kahu o ke Keikialii.
Na Kauka o ke Keikialii.
Na kahunapule o na hoomana like ole.
Ke kahunapule nana e malama i ke auaina.
Ka Akukana Kencrala.
Ka Ahahui o na Mamakakaua.
Na Poola e hui ana i ka pahu.
Ma kela ame keia aoao o ka pahu kupapau ka poe hapai pahu, ame ka poe paa i na kahili liilii, ka poe pua i na kahili nunui.
Ka Ahahui Kamehameha.
Ke Kaa o ke Kamaliiwahine Kalanianaole, ke Kamaliiwahine Kapiolani, ame ke Kaukawaliiwahie Keomailani.
Ke kaa o ke Kamaliiwahine Kawananakoa ame ke Kaukaualiiwahine Maria Maiopili Piikoi Parker.
Kaa o ke Kiaaina o Hawaii.
Kaa o ke Kenerala me kona mau ukali.
Kaa o ka Lunakanawai Kiekie me kona mau kokua.
Kaa o ka Peresidena o ke Senato.
Kaa o ka Lunahoomalu o ka Hale o na Lunamakaainana.
Kaa o ke Kakauolelo o Hawaii.
Kaa o na Kauikela.
Kaa o na Ukali o ke Kiaaina.
Kaa o ka Meia o Honolulu.
Kaa o na poo o na Keena o ke Teritore.
Kaa o na hoa o ka ahaolelo.
Kaa o na luna oihana federala.
Kaa o na Lunakanawai Kaopuni.
Kaa o na Lunakiai.
Ka lehulehu.
WAEIA O E. C. PETERS I LUNAKANAWAI KIEKIE.
Ma ka halawai a ka Ahahui a na Loio o Hawaii o ka noho ana ma ka Poakahi nei, a o ia no hoi kekahi o na halawai i akoakoa nui ae ai na lala o ia ahahui, i hooholo ai ia ahahui me ka lokahi o Emil C. Peters, kekahi o na leio koikoi o Honolulu i keia la oia ka hunakanawai kiekie o ka aha kiekie Teritore no ke pani ana ma kahi o ka Lunakanawai kiekie James L. Coke e pau ana kona manawa ma ka la 7 ae nei o ka mahina o Maraki e hiki mai ana.
Ua apono pu ka ahahui o na loio i na Loio ANtonio Perry, i noho kokua lunakanawai kiekie ai mamua ame Alexander Lindsay Jr., i noho lunakanawai kaapuni ai mamua i mau kokua lunakanawai kiekie, no ke pani aoa ma kahi o ka lunakanawai S.B. Kemp, e pau ana kona manawa ma ia manawa like me ka lunawai Coke, ame ka lunakanawai William S. Ediugs e pau ana kona manawa ma ka la 26 o Sepatemaba e hiki mai ana.
Ma ka aoao kalaiaina, he mau Demokarata na lunakanawai kiekie e pau ko lakou mau manawa ma ka oihana, a ua hookohuia mai lakou e ka Peresidena Wilson ma ka lua o kona kau o ke kohoia ana. O ka poe no lakou na inoa a ka papa loio Hawaii o ke apono ana ma ka Poakahi nei i mau lunakanawai kiekie no ke pani ana ma kahi o na lunakanawai e pau ana ko lakou manawa, he mau Repubalika wale no.
Ma ka halawai a ka Papa Loio Hawaii o ka noho ana ma ka Poakahi nei ua lehulehu loa na hoa o ia papa i akoakoa ae, he 60 mau hoa. Ua hoomaluia ia halawai e ka Lunakanawai Sanford B. Dole, a o ka Loio Albert M. Cristy ke kakauolelo mau o ka ahahui.
Waeia o Peters
Ma ka manawa i hapaiia mai ai ka noonoo ana no ka mea e kohoia ana e ka ahahui i lunakanawai Kiekie, na William T. Carden i waiho ae i ka inoa o E. C. Peters a na Lunakanawai William H. Heen i kokua ae. Ua pani koke ia ka waiho inoa ana, a hookahi baloka i hookomoia nona he hoike no ko ka ahahui koho ana iaia me ka lokahi no ke kulana i noonooia.
Ma ka noonooia ana no na kokua lunakanawai kiekie na Lunakanawai A. G. Robertson i waiho ae i ka inoa o Lunakanawai Antonio Perry i kokua lunakanawai ekahi a ua kokuaia mai e Mason R. Prossef. Na John W. Catheart i waiho ae i ka inoa o Lunakanawai John T. DeBolt, mahope o kona hoakaka ana ae i kona manao e haawi ana i kana mahalo nui no ka Lunakanawai DeBolt. Ma ka balokaia ana he 30 baloka i kohoia no Lunakanawai Antonio Perry a he 19 no Debolt. Haule ka inoa hope i waihoa ae ai. Hoole ka Loio Charles F. Peterson i ke apono lokahi ana a na hoa no ka mea i kohoia.
No ke kokua lunakanawai kiekie elua, na Mr. John W. Catheart i waiho ae i ka inoa o Lunakanawai Lindsay Jr., a na William B. Pittman hoi i waiho ae i ka inoa o Lunakanawai S. B. Kemp. He 59 mau baloka i kohoia. Ua loaa ia Lunakanawai Lindsay, he 32 baloka, ia Lunakanawai De Bolt he 22, a i ka Lunakanawai Kemp he 5. O Lunakanawai Lindsay Jr., ka mea kiekie loa o na baloka a ua hooholoia e lokahi ke koho ana nona.
E hoikeia aku ana i ka oihana hookolokole ma Wakinekona ke koho ana a ka Papa Loio Hawaii me ka lakou apono ana i ka Lunakanawai E. C. Peters i LUnakanawai Kiekie no ke Teritore, ame na Lunakanawai Antonio Perry ame Lunakanawai Lindsay Jr., i mau kokua LUnakanawai Kiekie, e ka Perosidena S. B. Dole ame ke kakauolelo Cristy, i ka manawa kupono e loaa ana.
KE ANO O KE KALAIAINA
(Kakauia e @. P. K. Kawaikaumaiikamakaokaopua.)
(Hoomauia mai.)
He pomaikai keia no ka poe hookuonoono, hoopulapula ame ka lehulehu holookoa, no ka imi waiwai ana ame na ano hana like ole, bipi, moa, puaa, mahiai ame na oihana kalepa liko ole.
Pela no ka hale. Ina aole makemake ka mea, nona ka hale e noho iloko pono no iaia ke hoolimalima me kekahi kanaka e, a lilo ke noho ma ua hale la, a uku aku oia i ka mea nona ka hale. Ina pela ka hana ana, alaila, ua lilo keoa hale i kumuwaiwai hoonui. Pela ao na mea kumuwaiwai apau. Aole pono e noho hoohana ole ia ka bipi kauo, ame ka lio, ame ka hoki; aole e pono e uwi ole ia ka bipi wahine.
Ina e hoohanaia lakou, a uwaiia paha, alaila, ua lilo lakou i kumuwaiwai hoonui; a i ole lakou e hoohanala, ua lilo lakou i kumuwaiwai hoonui ole, i waiwai poho wale no hoi. Ina i hooholoia ka moku kialua i hookahi malama, a hoolimalimaia kela meku, ua kupono no ekolu haneri dala no ka holo ana o ia moku. Ina pela, ekolu no haneri dala e lilo ke ku wale ia moku, aole holo no ka malama hookahi. He kanahiku dala i lilo i ke ku wale ana i hookuhi hebedonia; a he umikumamakolu e lilo i ke ku wale ana i ka la hookahi. Eia ka pono, e hoohana nui ia kela kumuwaiwai keia kumuwaiwai.
Ke kii keia o ka halelua o ke Keikialii Kalanianaole mauka ae nei o ka ilina o na alii ma Maunaala. Ua paiia keia lii mahope iho o ka waihoia ana aku o ka pahu kupapau maloko o ke halelua. Ua hoohiwahiwaia ka halelua me na pua ame na kahili.
No ke kumuwaiwai hoolewa. Oke kumuwaiwai i lilo aku i mea e loaa hou mai ai ka waiwai, ua kapaia ia he kumuwaiwai hoolewa. O na mea kuni a ka poe kuai, o na mea i hanaia e ka poe paahana ame ka ai kuai a ka poe mahiai, he mau kumuwaiwai hoolewa ia no ka mea, in a aole e hooholoia kela waiwai, aole ia he waiwai. Ina aole kuaiia ka waiwai o ka poe kuai, aohe mea o lakou e waiwai ai. Pela no ka lole a ka poe hana lole, in a aole lilo i ka poe kuai, aole ia e waiwai i ka hana ana.
O keia mau mea apau i kuaiia aku i mea e loaa hon mai ai, o ia ke kumuwaiwai hoolewa. Eia ke kumuwaiwai hoolewa ole, o ia hoi ke kumuwaiwai paa. O ka aina, he kumuwaiwai hoolewa ole ia, he kumuwaiwai paa. Ina imi waiwai ke kanaka ma ka aina, aole lilo aku ka aina; elike me ka ai ana e kuai aku ai, he kumuwaiwai hoolewa ka ai, he kumuwaiwai paa ka aina. Pela ka hale maluna o ka aina ame na kaa, ame na oo palau ame na mea hana apau a ka mahiai.
He kumuwaiwai paa ia mau mea, no ka mea i ka imi waiwai ana, he mau mea lilo ole ia. Pela no na balo papaa ame na halekuai o ka poe kuai; i ka imi waiwai ana, aole lilo ia mau mea. He kumuwaiwai paa no ia mau mea. Pela no na huila a ka poe hana lole, ame na pahiolo a na kamana, ame na mea paahana apau, he kumuwaiwai paa no ia.
I ka imi waiwai ana, aole lilo; in a e lilo aohe kumu e waiwai hou ai; nolaila, ua maopopo kke ano like ole o ke kumuwaiwai paa, me ke kumuwaiwai hoolewa. Ma kekahi hana, ua nui ke kumuwaiwai paa, ua uuku ke kumuwaiwai hoolewa; a ma kekahi hana ua uuke ke kumuwaiwai paa, ua nui ke kumuwaiwai hoolewa. Eia ke kumuwaiwai paa a ke kamana, o ka lipi, ke koi holu, ka pahiolo ame kana mau mea paahana, o ia wale no kona kumuwaiwai paa. Eia ke kumuwaiwai a ke tela o ka upa, o ke kui, o ke komo ame ka aiana.
He waiwai hoolewa kona waiwai e ae apau loa. Pela no ke kumuwaiwai e ka poe kuai, he kumuwaiwai hoolewa wale. O na halekuai, o ia ko lakou kumuwaiwai paa. O ke dala, o ka lole, o kola mea keia mea kuai, he kumuwaiwai hoolewa wale no.
Ma kekahi hana, ua paa ka nui o ke kumuwaiwai; ua paa ka nui o ke kumuwaiwai a ka poe mahiai. He mea hoolewa ole ka aina, o ia ka ka mahiai; o na hale, ame na huila, ame na kaa, ame ka oihana apau a ka mea hana lole he kumuwaiwai paa ia; o na alanui hao ame na muliwai eliia he kumuwaiwaipaa ia; a pela no na mea nui apau e waiwai ai ke aupuni.
Ma na aina naauao, in a manao na kanaka e hana i kekahi hana pono ole ke hana me ke kumuwaiwai uuku, alaila, hui na kanaka, penei:
Ina manao lakou e imi waiwai ma ka moku okohola, kuai no lakou i ka moku ame na mea apau e pono ai ka holo ana o ia moku. He $30,000 paha ke kuai ana o ia moku; alaila haawi kekahi kanaka i hookahi tausani dala, a pela no kekahi, a o kekahi kanaka, haawi no oia i elua tausani dala, a o kekahi i elina tausani. Pela lakou e haawi ai, a pau na kanakolu tausani i ka loaa; a holo ka moku, a piha i ka aila, alaila mahele lakou aole mahele like.
(Aole i pau.)
BILOXI, Miss., Jan. 16. Mamuli o ka loaa ana aku o elua mau kino make, a ma ka hoomaopopo ia ana he mau lahui e, ma kapakai kokoke i ke kulanakauhale i alakuiia aku ai ahiki i ka paa ana o 10 poe i ka hopuia. Ma ka olelo a na makai na make keia mau kanaka mamuli o ka hakaka ana ma hope iho o ka hoao ana ma ku pulo aku i hala e paa i kekahi mokukuna hoopae maluna i ka waiona e hekau ana ma kahakai.
HE HOALOHALOHA NO WILLIAM WERNER.
E oluolu mai e Mr. Lunahooponopono no makou hoi kahi rumi o ke Kilohana, he mau waimaka,
I ka makuahine aloha, Mrs. E. Waioli Werner:--Nani wale ka hoi ka la o ka haku, i hoea mai i ka ipuka o ko olua home, me he makani kualau la, no ka hooilo, nalo mauwale iho la no kau mea aloha, kakou pu hoi ilaila.
Luuluu wale ke one pua rose o Mahamoku, kaumaha iho la Hanalei i ka ua nui, ke kani uina mai la ka wai o Namalokaoa, o ke kama i ko alo W. Werner, ua hala, ua nalo, no ka wa mau loa.
Hooholoia, ma o ko makou mau komite, ke komo pu aku mei ka Ekalesia o Hanapepe, kona Kula Sabati, ame Ahahui Hooiaika Kristiano, iloko o keia kaumaha pu me oe, e Mrs. E. Waioli Werner, ame ka olua mau lei, na pua hoi mohala iloko o ko olua kihapai.
Ua kaniahaopuna no hoi, ka naha iho la ka hoi ia o ka pakeke, ma ka punawai, a moku ae la ke kaula dala, i awaiauluia o na la makamua o ka hauoli, a nona makou e komo pu aku nei e auamo like i na haawina i kau mai maluna ou, oiai o kau kane i alona nui ia, oia no ka peresidena nui o na Hooikaika Kristiano iloko o ka Mokupuni o Kauai nei, a hala loa aku i ka Aha Paeaina.
Nolaila, he mea minamina a hiki ole no hoi ke hoopoinaia kona mau ano maikai, pookela ma kana mau hana, no kona ekalesia, wahi no ana ma kana hoike komite o kek kau o ka Aha Mokupuni i noho no ma ka luakini o Waioli i Novemaba, 1021; ua paa ka hale kahu, ua hoomaemae hou ia ka luakini kahiko o na makua mikanele mua, a hoolaa hou ia, ua pau ka aie, a ua koe no ke dala.
He mau hiona keia ma ka manawa e malamaia ana na hana haipule hope maluna o ke kinowailua o ke Keikialii ma ka ilina ma Maunaala. O ka hiona maluna o ke kahunapule ia e malama ana i ke anaina haipule hope, a o ka hiona malalo iho, kekahi ia o ke anaina me na ahuula ame na kahili.
Nolaila, ua hana o W. Werner i kana hana, ua holopono, ua waiho iho la mahope nei he kiahoomanao i mea na kakou e nana aku ai, i kumu hoohalike maikai no na Hooikaika Kristiana apau.
Aloha no na makamaka, ka hale kipa o na mea apau, oiai he puuwai lahalaha, he mau lima mohala, he mau maka hoiloi me na minoaka e hoike mai ana, o kona ola ana no ka lehulehu o na lehulehu.
O ia ke ano o keia hoaloha i moe, moe no iloko o ka manaolana, no ke ola hou, ma o Kristo la, kona Haku aloha.
Nolaila, e ka Makuahine Elikapeka e, e hoolana no i ka manao, ma o ko kakou Makua Lani, o keia ka makou e pula nei, e kau mai ke aloha o ko kakou Haku maluna ou ame ka olua mau lei keiki me na moopuna, a na Iehova Sabaota, ke Alii nani, e holoi i na waimaka o kakou.
Hooholoia, i hookahi kope i ka wahine kanemake hookahi i ka Nupepa Kuokoa ame ka Buke Ka Hoaloha.
O moku no na komite,
D. K. KAPAILEE,
Komite Ekalesia;
MRS. SAM MALIEKAI,
Komite Kula Sabati;
MRS. FANNY SABO,
Komite Hooikaika Kristiano.
TOKIO, Jan. 16.-- O na mokupuni Liuehu e kauliilii ana mawaena e ka mokupuni Formosa ame Iapana ponoi ame na mokupuni liilii Monin ma ka hema pololei loa aku o Tokio, o lakou kekahi hapa o na mokuuni o Iapana a elike me ia aole lakou i komo pu iloko o na mano o ke kuikahi a na mana eha i hanaia e Amerika, Pelekane, Palani ame Iapana, elike me ka olelo hooholo a ka papa o na elele aupuni ame ka ahakuka a ka aha kuhina. Ma ka manao o ke aupuni o Iapana ua kaawale kela mau mokupuni mai ka aelike kuikahi mai o ka oihana koa.
HE WAHI HOOMANAO ALOHA NO J. K. KALANIANAOLE
Ke hoomanao ae nei ae nei au i kou ike mua ana ia Kuhio. He wahi keiki uuku loa no elua paha makahiki a malalo mai paha. He wahi keiki puipui nemonemo e makemake aku ai makou na hoa o ka makuahine e hapai ae ai a hoonoho i ka uha e milimili ai.
Ke hoomanao ae nei au, aole lealea loa o keia wahi keiki i ka milimiliia. Loko no o kona uuku, ua oi aku kona makemake e paani me kamalii; ua ike pinepine au iaia mai kona wa uuku, a mahuahua, a nui, a kanaka makua; he hoaloha a makamaka maikai mou ka makuahine, aole loa au i ike a lohe paha i kekahi hana ino kimopo ana i kona mau hoa paani, (mean) wahi a ka haole. He wahi keiki kolohe a kapaia no oia e kona makuahine i kahi keiki "kolohe," o na kolohe lealea maikai wale no nae.
He hakaka no, ua makaukau loa oia me kona mau wahi puupuulima, aole loa nae ia e ae e hakaka a pepehi aku i kekahi keiki uuku iho malalo on a, elike me kekahi mau kamalii; a pela no i kona nui ana ae, aole loa oe e lohe i kekahi mea e olelo ana, ua hanainoia mai la o mea e Kuhio, aole loa!
I ka nunui ana ae o na kaikuaana, oia no kahi mea nuku loa, ua hoounaia aku la lakou e ka Moi i Kaleponi i na halekula a Bremer i San Mateo (military academy) e hoonaauaola ai, a i ka lua o ko lakou makahiki o ka noho ana malaila, ua kauoha mai la ka moi iau (oiai e holo ana au i Kaleponi, no ka lono mai o kau kaikamahine), e hele loa aku au e ike i na keiki alii, a e makaikai i ko lakou kulana, a noho ana paha malaila.
I kau ike aku, ua maikai no ko lakou ola kino, a ua hooikaikaia no ka naauao. Hai mai la nae na kumu iau: "Pehea la ka paa ana o ka Kuhio haawina, ua piha loa oia i ke kolohe. He paa no nae ka haawina."
He punahele like oia na na kumu ame na haumana. He hoike ana no keia i ke kaona o ke kanaka. Ua lealeaia no ka lealea me ka maemae no, a aole no hoi he hoohemahemaia o kana hana (duty) e ili iho ana maluna on a.
Pela iho la oia i na makahiki he 20 ana i noho elele ai i Wakinekona. O ka iini nui o kona naau i na manawa apau, e paio no ka pono o kona lahui, ame ko na kupa Hawaii apau.
O ka hana mua ka paio ana aku no ka pono kiwila ou e ka Hawaii makua i ike ole i ka olelo haole. Ua olelo nui ae kekahi poe o na lahui e, e hoopau loa ka hanaia ana o na kanawai ame na hana aupuni me ka olelo Hawaiii; ua paio ikaika aku ko kakou alii no ia mea iloko o kona noha ana ano hemahema malihini i Wakinekona, a ua hooholoia mai e na mana o Wakinekona e hele p@l@@ ka mana o na olelo elua, ka olelo Hawaii me ka olelo haole no umi makahiki. Ua manaoia paha, hele ahiki ia manawa ua pau aku i ka make na Hawaii ike ole i ka olelo haole, a ua ike wale no hoi ka poe opio e pii nei i ka olelo haole.
Nolaila no ka hanohano i koaa ia oe e ka Hawaii o keia mau la e koho ai i ka poe na lakou e kau mai na kanawai ia kakou, ua aie kakou i ke alii aloha kanaka, aloha aina. Ua nui a pau ole i ka helu pokole na hana hoowaiwai aina ana i hana ai, aka o ka oi ae mamua o na mea apau kona hooikaika nui ana i ke kanawai hoopulapula i na koko Hawaii.
O kana hana hui loa ia, ua moe pono ole ia ka pe, e kuko ai, e imi ai i kahi e hiki ai keia hana hui pookela no ka pono o kona lahui oiwi.
Ua ikeia ka pipili nui ana mai o na Hawaii i ke kaona e kaukai ana ke ola i na hana poola. Pau aku la na wahi kuleana i na kanaka o na aina e, a hoi aku la na makua, na keiki, i na rumi hoolimalima o na Pake, na Kepani, e noho ai, a e kaukai ana ke ola i ka limaikaika o ka mea hookahi; a heaha ka hopen: Holulelule mai la na makua no ka okuu wale iho no i na rumi hoolimalima, aole wahi mahiai e hooikaika ai i @@@@ kino i maamau i ka poe kahiko o kakou.
Akahi, he inu wahi kope wale aku la no ko kakahiaka, a o ka poi, ka ai o ka aina, ai mo ka pakiko no ka pii loa, a hoolawa aku i ka laiki a ka Pake, o ka hopena, onawaliwali mai la, a ke hookau iho kahi mai, o ka hiolo aku la no ia.
No ka ike o ke alii i keia mau ano, na manaoia o ka manaolana wale no, no na wahi koena o ka lahui, ka hoihoi ana ia lakou maluna o na aina hookuonoono me ke kokua ana o ke aupuni, a kupono ko lakou mau wawae, a kuonoono olaio ke kanaka Hawaii.
No keia manaonui o ke alii, ke kuko a iini hope loa ana, no ka pono o kona lahui, ua hoomanawananui aku oia i keia mau kau ahaolelo ma Wakinekona iloko no o ka mai o kona kino i hoomaopopo ole ia e ka lehulehu.
Ua hoomanawananuiia ke anu ame ka wela o Wakinekona, ka wela ino, kawau o kela kulanakauhale, ke anu no hoi o ka waanu, kupono ole no kona kino mawaliwali.
O ka hana hope loa, ka hooikaika ana aku nei i Panaewa no ka pono o na Hawaii. Aloha no ke alii i mauna i ke ola nou ame au e ke koko Hawaii!
MRS. E. M. NAKUINA.
Ka Pila GRAFONOLA COLUMBIA
Maopopo ka Wa e Pau Ai.
Na ka mea hoopaa nona iho e makaala ia mea nou. Ua hiki ia oe ke hulahula ahiki i ka huamele hope loa.
Uku LIilii ke Makemakeia
Thayer Piano Co.,
LIMITED.
148-150 ALANUI HOKELE
Teritore o Hawaii, )
Kulanakauhale a Kalana )ss.
o Honolulu. )
O W. H. Campbell mamuli o kona hoohiki pono ia ana. ua hoike ae me ka olelo ana he Mea Uku Dala oia no ka The First American Savings and Trust Company of Hawaii, Limited, a o ka papa hoike malolo iho nei, he hoakaka oiaio a pololei iao na waiwai o ka The First American Savings and Trust Company of Hawaii, LImited. ahiki me ke komo pu o ka la 31 o Dekemaba,
1921; o ua papa hoike la, ua koiia mai ia e ka Pauku Helu 3327 o na Kanawai Hoohuihuiia, o 1915, o ke Teritore o Hawaii.
O ke kumuwaiwai i hoamanaia o ka Hui he $200,000.00, i maheleia iloko o 200 kea no ka waiwaiio o $100.00 pakahi. O ka heluna o na kea i hoopukaia he 2000, o ke kanahiku pakeneka o ia mea, ua like pu me $14,000.00, ua ukuia, e koe ana he $60,000.00 no ke kauohaia aku e ukuia mai. O na loaa aia o ka hui ma ka la 31 o Dekemaba, 1921, elike me ia i hoomaopopoia, o ia keia malalo iho nei:
Kumupaa i ukuia mai…..$ 140,000.00
Moohelu Oi……………. 23,000.00
Puka i mahele ole ia……. 50,053.51
Na hoemi………………. 738.65
Na hoahu dala…………. 1,242,024.62
---------------
$1,457,816.78
Na loaa o ka Hui ma ka la 31 o Dekemaba, 1921, o ia keia malalo iho nei penei:
Nahoaie ame hoemi……$1,053,298.83
Na kea me na bona……. 234,701.41
Na waiwai pau………… 21,973.85
Na waiwai paa aelike kuai 1,985.00
Dala ma ka banako……... 137,104.71
Ukupanee e loaa mai ana.. 6,577.98
Na loaa e ae…………….. 175.00
-----------------
$1,457,816.78
W. H. CAMPBELL,
Mea Uku Dala.
Hanaia a hoohikiia imua ou i keia la 16 o Ianuari, 1922.
J. H. ELLIS.
Noteri no ka Leuiehu, Apana Hookolokolo Kaapuni Ekahi, Teritore o Hawaii
Ma keia ke hooia aku kei au, o ka papa hoike maluna ae, he kope oiaio a pololei ia o ka papa hoike kumu i waihoia aku malol o ke keena o ka Puuka o ke Teritore o Hawaii.
J. H. ELLIS,
Notari no ka Lehulehu Apana Hookolokolo Kaapuni Ekahi, Teritore o Hawaii.
6487-- Jan. 20, 27; Feb. 3.
HOOLAHA
E ike auanei na lala apau o ka HUI HOOLEWA ALOHA LAHUI O LAHAINA, ma keia, ke waiho aku noi i kou kulana hope puuku, no ia hui, no ka nawaliwali o kou ola kino, ame ke kaawale o kou home ma ke Kulanakauhale o Honolulu. Nolaila o na hookaa dala ana o na lala no ka hui ma keia hope aku, e noho nei ma ke Kulanakauhale o Honolulu, e uku ae lakou ia Mrs. Eizabeth R. Hose, ka puuku nui o ka hui, ma ke keena hoolewa o Mr. H. H. Williams, ma ka Poaono mua o ka mahina, mai ka hora 2 ahiki i ka hora 6 auwina la. O na lala o Waianae, Oahu, e uku ae lakou ia Harry Poe, ma kona home.
No ka oiaio o keia ke kakau nui na i kou inoa i keia la 31 o Dekemaba, M. @@. 1921.
HOOLAHA HALAWAI
E noho ana ka halawai a ke Kalapu Demokarata o ka Mahele 11, o ka Apana 4, i ka Lapule, Ianuari 22, 1922, hora 2 p.m., ma ka halekaa o John H. Wilson, Alanui laniwai.
Nolaila ke konoia aku nei na lala ame na mana koho apau o ka Mahele 9 o ka Apana 4, ame ko ka Mahele 11 o ka Apana 4, e hoea kino mai ma keia halawai, no ka noonoo ana i Moho Elele, ma kahi o ka Elele Alii Kalanianaole i hualele mai i keia ola ana, elike me ke Kuahaua a ko kakou Kiaaina no ke Koho Balota Kuikawa iloko ae nei o Maraki
Me ka oiaio,
BENJ. DOLE,
6487--Jan. 20. Kakauolelo.
MRS. ELLEN KAHAAWIPU COELHO
No kau ohana keiki me au ke panai aku nei i ko makou hoomaikai piha i na makamaka me na hoaloha, no kealoha i haawiia mai me na pua hoohiwahiwa nani no ko makou mama i haalele mai ia makou e u paumako nona. Ua moe i ka moe mau loa o ELLEN KAHAAWIPU COELHO.
W. J. COELHO
6487-- Jan. 20.
AKENA HAAWI PALAPALA MARE.
Ua hookohuia mai au i akena haawi palapala mare, no ka Apana o Hilo Hema, Hawaii, e loaa o oau i na la apapu ma ke keena o ka Aha Kaapuni o Hilo, a ma kou home noho ma Waiakea.
A. K. AONA,
Akena Haawi, Palapala Mare.
6487--Jan. 20,27; Feb. 3, 10,17, 24.